’Ba ’Bibio ni Dri Ce ’Diyi
A’DIKO 86
’Ba ’Bibio ni Dri Ce ’Diyi
MI ECO ’bibio dipi imve agu ’da ni e’dazu ’da ne ra ya? Eyini Yerusalemu ni kuzu ’boria, ’bibio nde e’da i eyini. ’Ba ’diyi engaki pari Etu ni Efuria dika azi eyini e’yo onizu ’bibio ma dria. A’iki kini ’bibio o’diru ’di i eyi ma dri ce agu azi orodriru ni vu.
’Ba nde ’diyi ni caria Yerusalemua ’boria, ziki kini: ‘Mva ’bani osi ngapi ovupi opi Yahudini ru ri ngoa ya?’ ’Ba “Yahudi” ni ’diyi ti azi nisi omve anzi Isiraelini. ’Ba nde ’diyi muki drile ’yozu kini: ‘Ama neki ’bibio mva nde ni ri i pari Etu ni Efuria ani ama emuki eri inzi.’
Herodi opi Yerusalemua ri ni e’yo ’di erizu ’boria, eri ma asi e’do oti oti. Leni ndra opi azini ma ’du opi nyaza iniri aluni ku. Ani nga ’di atalo edeta edepi ’diyi ki omve dria eyi zizu kini: ‘Opi ’bani e’yo ni ondri ri ’ba nga eri osi ngoa ya?’ Ngaki omvi: ‘Biblia ’yo Bethelehemua.’
Herodi nga di ’ba engapi Etu ni Efuria diyi ki omve, dika ’yo eyi tia: ‘Emu ki mva osipi ’dari nda. Eka eri esu ’bo, emi ma lu e’yo ni mani. Ale vini mu eri inzi indi.’ Te deresi, Herodi le mva nde ni ’di ra!
’Bibio nga di ’ba nde ma dri ce Betelehemua kpere so pa pari ’bani mva nde osizu ria. ’Ba nde di ni firia joa, isuki Mariamu pi odekule Yesu be. Ngaki feta eyini iji feki Yesu ni. Te vuti vutiru, Yehova li ’ba nde ’da ma bile ndu dri dazu opi Herodi vu ku. Ani ngaki dri da suru eyini engazu ria geri nduni si.
Herodi ni eriria kini ’ba onduaru engapi pari Etu ni Efuria ’diyi daki dri eyi vile surua ’boria, a’oko nya eri saara. Ani nga di azita fe anzi nyiri eli be irisi valeru Betelehemua ’di ki o’dizu dria te. Te Yehova lu e’yo ’diri Yusufu ni geri orobiasi drialeru, ani Yusufu pi apaki odekule Yesu be angu Misiri ni ma alea risi te. Yusufu ni erizu kini opi Herodi drabo ria, nga Mariamu pi ’du Yesu be dri dazu Nazeretia. ’Diri pari ndra Yesu ni zozu ri.
Mi ni egarisi adi fe ’bibio ’da ni dizu imveru ’dinile ni? Le mi ma nira ’ba ’diyi muki Yerusalemua eyini ’bibio ’di nezu ’bori ma vutia. Sitani ’ba obepiri le ndra Mvi Munguni ’di ’dira dika ni vini ra Opi Yerusalemu ni Herodi le vini ndra mva nderi ’di te. Ani le ma ovu ndra Satani i fepi ’bibio nde ni di ni.
