’Ba ’Di Yesu ni Ra
A’DIKO 101
’Ba ’Di Yesu ni Ra
MI NE nga e’yo onzikanyaru i ’yepi diri! ’Ba ’di Yesuni ra. ’Ba pa Yesuni pati sia. ’Ba opa musumari eri ma dria azini eri ma pa. ’Ba ’ye e’yo ’dinile ri Yesu ma rua a’du eyosi ya?
A’dusikuni ’ba azi ’diyi ngu Yesuni onzi. Mi ni ’ba nde ’diyi ra ya? Alu zori malaika onzi Sitani ’ba ’ba Obepi ri i. Eri vini ndra ’ba fepi Adamu pi Eva be nyo azita Yehova ni ri. Ani Sitani fe bani ari’bo Yesu ni ’diyi ni e’yo onzi ’dinile ri ’yezu ni.
De nga ’ba pani Yesuni pati sia ’dile ku, ari’bo erini ’diyi ’ye vini ndra e’yo ta sipi ku ’dinile ri indi. Mi ico ’ba bi ndra eri amvu Getesimani ni ma alea risi ngoniari ega ra ya? Ari’bo erini ri ndra adipi ki? Eyi ndra ’ba dini dri cepi ’diyi. Ane nga a’du e’yo ’ye i ’di ma vutia nia ri.
’Ba dini drileru ’diyi ka Yesuni bi ’bo, ’ba eri vuti bipi ’diyi apa ra. Urisi nga ki Yesuni ku ari’bo erini ’diyi be a’dule. Te ’ba ti opele Petero pi Yohana be apaki ni ndra re ku. Nga ki ’ba nde ’diyi vuti bi nezu a’du e’yo ni nga i ’ye Yesu rua nia ni.
Kuhani ’diyi nga Yesu ni ji Ana ndra okorisi ovupi kuhani ma drileru ri dri. Te, ’ba ongulumuru ’diyi ’duni sawa ’dia angiri ku. Ngaki mu Kaifa sawa disi kuhani ma drile ru ri vu. ’Ba dini drile ru kakua nga ki yi tra aku Kaifa nia.
Aku Kaifa nia ’ba nga Yesu ni ozi zita si. ’Ba eji ’ba eyi ki inzo nzezu Yesu ma rua. Atalo dria nga ’yo kini: ‘Le ’ba ma diki Yesuni ecekokoru.’ Ngaki tusu owi milenia dika ’ba azini ngaki eri osa eyi dri agalesi.
E’yo ’diyi ni dria e’yi ’ye zu ria, isu de Peteroni amve aku dria ’da indi. Angu ni ndra ambizu saaru ini ’da sirisi, ’ba ngaki ndra aci idu. Eyi ni aci yuria. Zamva azi ati’boru ni nga Petero ni ne ani ’yo kini: ‘Agu ’di ovu ndra Yesu be.’
Petero nga omvi: ‘Yo, ani ni eri ku!’
Pale na ’ba riki ’yo Petero tia eri ovu ndra Yesu be. Te Petero ga e’yo ’diyi driasi. Pale nazu erini gazu si ria, Yesu nga ti oja eri nezu ani. Petero nga o’a candisi inzo ini nze ’diyisi ani nga mu awu wuzu.
Angu ni ’ba ce ria waa o’du Towi ma obitisi, kuhani ki ’Ba Eyo Amapi ’Diyi be ’duki Yesu ni ji pari ’bani eyi okuzu ria. ’Dia ngaki e’yo otu eri ma dria. Ngaki eri ji Ponzio Pilato opi Yudea ri dri.
Ngaki ’yo Pilato tia: ‘Agu ’di ’ba onzi ’dinile ni. Le ’ba ma ’di eri ra.’ Pilato ni Yesu ni ozizu ’boria, nga ’yo kini: ‘Ane ni e’yo onzi agu ’di ma rua alu ni ku.’ Ani Pilato nga di fe eri jizu Herode Andipa dri. Herode ni opi Galilia ni ri, te eri o’a Yerusalemua. Herode neni vini e’yo onzi Yesu rua ku indi. Ani pe vini eri ma ti vule Pilato vu.
Pilato le ndra Yesu ni tru ra. Te ari’bo Yesuni ’diyi le ki ndra Pilato ma tru ’ba azi aru joa ndu ni i. ’Diri ndra agu oguo ru Baraba i. Sawa ka ca azia ’bo, Pilato nga Yesu ni eji amve. Nga ’yo yi tia: ‘Emi ne opi emini!’ Kuhani ma ambo nga otre o’duko urusi: ‘Emi ji eri ’dale! ’Ba ma ’di eri ra! ’Ba ma ’di eri ra!’ Pilato nga di Baraba ni ku ra fe Yesu ni ’di te.
O’du Towi si etu azia,’ba nga Yesuni di pati rua. Mi econi ne e’da ma alea ’dia ku, te Yesu ma kalea iri tro ’ba di vini oguo azini ki iri eri be indi. De nga isuni Yesu dra nga ku, oguo eribe ’da ma azi ’yo tinia kini: ‘Mi ega e’yo ma dria mini firia suru minia ’boria indi fo.’ Yesu nga omvi tinia: ‘Ma ’yo mi tia, mi nga ovu ma be Paradisia.’
’Da ovuni oyo soza azi muke ni ku ya? Mi ni paradisi Yesu ni e’yo nzezu drinia ri ra ya? Paradisi ndra Mungu ni ede okokelerisi ri ndra ngoa? Ndra nyakua ’dia. Ani Yesu ka nga eca opi ru ’bua ’dale ’bo, eri nga agu nde ’di i iji Paradisi o’diru nyakua ri ma alea. Ama o’aki ni e’yo ’disi ayikosi ku ya?
Matayo 26:57-75; 27:1-50; Luka 22:54-71; 23:1-49; Yohana 18:12-40; 19:1-30.
