Karile Yesuni Hekalua
A’DIKO 87
Karile Yesuni Hekalua
MI NE nga mva oderu e’yo nzepi ’ba ’wara ’yi be da i. ’Ba ’diyi ba e’yo Mungu ni imbapi Hekalua Yerusalemua ’diyi. Dika ’ba oderu da i Yesu i. Zo nga lu were. Eri nga lu karile ru eli be 12.
Imba ’ba ’diyi osuki saaru e’yo Yesuni ni Mungu ma dria azini Biblia ma dria ’disi. Te Mariamu pi Yusufu be dia yo a’du e’yo si ya? Eyiki ngoa? Ama ma esu nga omvita ni.
Eli dria si, Yusufu pi ’ba i vile akua ’diyi pie mu Yerusalemua omu Agazu ’ba driasi ri inzi. Aci e’dozu Nazeretia cazu kpere Yesusalemua ri zo saaru. Ewu ’dasi ’ba azi ndra ovupi mutukari be ni yo dika garamusi yi ndra vini yo indi. Ani ’ba dria ni ndra aci pa si dika eri ndra o’du ’du ogogo na ’dipi caza Yerusalemua.
Sawa disi ’ba Yusufu vile akua ’diyi di kakau. Ani Yesu ma adripika dika amvupika nyiri nyiri ’diyi ndra di vini ci indi. Eli ’dasi Yusufu pi Mariamu be azini anzi nyiri eyini ’diyi pie dria eyi ki di mvi Yerusalemua risi vule Nazeretia. Egaki Yesuni vini emu ria ’ba azi ’diyi pie indi ’dini. Te eyini pa sozu ava lizu ria, isu Yesu ni ’ba engapi Yerusalemuasi ’dayi ma eselea yo! Ani ngaki dri da Yerusalemua eri ndazu.
Asizu ngaki Yesu ni isu imba’ba ma eselea. Eri e’yo eri eyi ma tia dika zita ozi eyi ma tia. Ani ’ba dria eca osuta si ondua Yesuni ri ma e’yo si. Mariamu nga di ’yo: ‘Mva la mi ’ye dini a’du e’yo si ya? Ma i azini mi ati i ama ebiki mi nda.’
Yesu nga i andri ni zi kini: ‘Emi ma nda a’du e’yosi ya? Emi nini kini le ma ma ovu jo ma Atiniri ma aleari ku ya?’
Yesu le ndra o’ata a’oazu pari e’yo Mungu ni onizuri ma aleari saaru. Ani le di ama ma ovuki asisile eri vile ’daleri be ku ya? Akua Nazeretia ’dale, Yesu ri ndra aci okuta Mungu inzizu ri ma alea sabutu dria si. Erini ndra bile cozu imbata nde irizu risi, oni ndra e’yo kakau ru Biblia ma alea. Ani le ama ma o’a ki Yesu le dika ama ma obi eceta erini ma vuti.
