Malaika Andri Mariamu Ni
A’DIKO 84
Malaika Andri Mariamu Ni
OKU drizaru ’di Mariamu i. Eri Israelio o’api aku Nazereti ni ma alea ri i. Mungu ni ra eri ’ba azi kilili ’dinile ni. ’Da bani asisile erini malaika i’ni Gabireli ma ti epezu e’yo nzezu eri be ri. Mi ni Gabireli imu a’du ma e’yo lu Mariamu ni’ari ra ya? Ama ma ne ki nga.
Gabireli nga ’yo: ‘Izi mi cici mi ’ba ovupi asi anzutiru be ri la. Yehova ni mi be.’ Mariamu ne nga engazu agu ’diri ku. Nga di eca urisi a’dusikuni va ni e’yo erini nze ’di ma efiku. Te coti Gabireli nga eri ma asi omi.
Nga ’yo kini: ‘Mi ovu uri si ku Mariamu, a’dusikuni mi fudri ra Yehova ma milea. ’Dari bani asisile eri ni muzu e’yo onyiru ’yezu mi be ri. Mi nga mva isu ra. Mi nga ru ni ’da Yesu i.’
Gabireli nga mu drile ’yozu kini: ‘Mva ’diri nga ovu ’ba amboru ni dika ’ba nga eri omve mvi Mungu Oru Turi ni ri i. Yehova ni nga eri ’ba opi ru ekile erini ndra Daudi ni ’ba rile. Te Yesu ni nga o’a opi ru ’dani ’dani dika opi nyaza erini ri ngani i de ku!’
Mariamu nga di zi: ‘E’yo ’diri nga i ’ye ngoni ru ya? Ma agupi yo. Dika alani nga agupi be aluni ku, ma nga mva isu ngoni ngoni ru?’
Gabireli nga omvi kini: ‘Okpo Munguni ri nga esi mi dria. Ani ’ba nga mva nde omve mvi Munguni ri’i.’ Gabireli mu drile kini: ‘Mi ne ori’ba mini Elizabeti ni. ’Ba ’yoki ndra kini de ’bo ngani mva isu ku. Te mi ne sawa ’disi esu mva ’bo. Ani e’yo ’disi Mungu eco e’yo driasi ra.’
Mariamu nga di ’yo malaika tia kini: ‘Ma zamva ati’boru Yehova ni! Ma ’ye i ma rua trotro mini nze dile.’ Malaika nga di mu ra.
Mariamu nga i a’ri muzu Elizabeti ni andrizu. Elizabeti ka o’duko Mariamu ni eri ’bo mva nga ombu eri ma alea ayikosi. Nga ga tre orindi Munguni si ani ’yo Mariamu ma tia kini: ‘Mi drile ’ba oku dria ma eselea.’ Mariamu nga o’a Elizabeti be mba na, nga di mvi i vile akua Nazeretia.
Ace were Mariamu ni agupi omvele Yusufu i ri ’du. Te Yesufu ni oniria kini Mariamu ni mu mva osi, nga ega kini le i ma ’du eri ini oku ru ’dini ni ku. Malaika Munguni nga ’yo eri tia kini: ‘Mi ma ’ye urisi Mariamu ni ’duzu mini oku ru ’dini ku. Mungu fe erini mva ’dari ni.’ Ani Mariamu pi Yusufu be ngaki eyi ’du ra dika teki kpere mva Yesu ni osizu.
