Oni Mizeituni Ma Dria
A’DIKO 98
Oni Mizeituni Ma Dria
’DI YESU i Oni Mizeituni ma dria. ’Ba su eri ma ageyia ’diyi ’ba ti opele erini ’diyi ki. Yi ndra ’ba iri iri ovupi adripika ru Anderia pi Petero be azini Yakobo pi Yohana be. Pari e’dapi a’aleru ’da ’i hekalu Munguni Yerusalemua ri ’i.
O’a di ndra ca o’du iri sawa Yesu ni fizu Yerusalemua akanya mva dria risi ’bo ri ma vutia. Eri o’du Irizu ri ’i. Obitisi Yesu nga vini fi hekalua. ’Da hekalua, atalo edeta edepi ’diyi le ndra Yesu ni bi eri ’dizu te. Te ngaki ndra ’ye orisi a’dusikuni o’bi kakau le ki ndra Yesuni saaru.
Yesu nga ’ba dini drileru ’di ki omve, ‘Ori i azini anzi ori ni!’ Nga ’yo eyi tia, Mungu ni nga emi dri panga fe e’yo onzi dria emini ’yele ’disi. ’Di ma vutia, Yesu nga tu Oni Mizeituni ma dria ’dale, coti ’ba ti opele ’diyi e’doki eri ozi zita si. Mini oziki yesu ni zita ngoki si’ari ra ya?
’Ba ti opele ’diyi e’doki eri ozi ewu driale ’diyi ma eyosi. Niki ra Yesu ni nga asiza e’yo onzi niri eji nyaku dria ra. Te leki ni ’di nga i ’ye a’du nga’riari. Yesu ni nga dri eda Opi nyazu nyakua dika a’du ngari ya?
Yesu ni ra ba ima vuti bipi ’diyi ngani ima dri edata nyakuari ne ku. A’dusikuni eri nga o’a bua ’dale pari ’bani ecozu eri nezu ku ’dini ria. Ani Yesu nga di e’yo nga pi eyi ’yepi sawa ini Opi nyazu ’bua ’dale risi ’diyi olu eyi ni. Afa nde ’diyi ma azi a’du afa ni ya?
Yesu yo kini, suru yi nga enga omba ’bazu suru azini ’diyi pie, ’ba kakau ni nga ovu azoru dika abirisi, adra ni nga ga nyaku drisi dria azini oyakia pie. Yesu ’yo vini kini, e’yo baru suru niri nga ovu oluzaru wudrikuru drisi dria. Aneki e’yo ’diyi ni eyi ’yeria ku ya? Ee! Ani le ama ma nira adaYesu ni sawa ’disi opi nyaria ’bua ’dale. Ace were eri nga asiza eji e’yo onzi nyakua ’di ma dria woro.
