Yesu Ede Hekalu Ma Ale
A’DIKO 89
Yesu Ede Hekalu Ma Ale
A’OKO nya Yesu ni ’dia saaru, ovuni ’dini ku ya? Mi ni a’oko nya eri saaru ’dini a’du ma e’yo sia ri ra ya? Asisile niri ’ba hekalu Mungu ni ma alea Yerusalumua ’diyi ki anyamgbolo ru. Le ki sende angiri isu ’ba emupi Mungu inzipi ’diyi vu.
Mi eco manio oderu, kabilo pie azini amamu pie ’daki ne ra ya? ’Ba ’diyi ki bani anyapa ’diyi ki ozi hekalu ma alea ’dia. Mi ni a’du ma e’yo si’ari ra ya? A’dusikuni anzi Israelini leki anyapa ’du ji owiza ru Mungu dri.
Azita Mungu driri ’yo anzi Israelini ka onzi ’ye, ma owiki owita Mungu dri. Dika sawa azini si anzi Israelini eyi ndra vini owita owi eyi ma asi ni le risi. Te anzi Israelini ’diyi ndra aria kaniku anyapa isu owizaru Mungu dri ngoa ya?
Anzi Israelini ma azi ki ndra aria kaniku anyapa pie. Te Israeli kakau ru ki ndra anyapa kokoru azini aria kokoru. Eyi ma azi kakau engaki ndra Yerusalemu ma ageyia risi re tu ani ecoki ndra emu anyapa be owizaru Mungu dri ’dini ku. Ani eki ndra di anyapa nde ’di ki je aria pie hekalua ’daa ogogo owizaru Mungu dri. Te ’ba anyapa nde ozipi ’diyi oli ki aje ni saaru tu. Ani riki ndra di ’ba nde ki nya aramu si. ’Da ma driasi azita ndra eyini yo afa ozizu hekalu Munguni ma alea.
’Di i asisile a’oko ni Yesu ni nyazu saaru ri. Nga di ’ba nde ma mesa oze va sende eyini pie ere ki ndu ndu. Nga vini amuka ede baka si anyapa ki drozu hekalua risi amve. Nga azita fe ’ba afa nde ozipi ’diyi dri kini: ‘Emi edaki emi e’yi pie ’dia risi! Aleni emini jo ma Ati ni ojazu jo tujari edezu ri ru ku.’
’Ba Yesu ma vuti bipi ’diyi ma azi eyi ki hekalua Yerusalemua ’dia indi. Nga ki osu ’yeta Yesu ni ’dasi tu. Ngaki di e’yo siza Biblia alea e’yo nzepi Mvi Mungu ni ma dria ri ega kini: ‘Leta jo Munguni lezuri nga ve eri ma alea ekile aci le.’
Yesu ni ovuria Yerusalemua Omu Agoza nyazu ria, ede tali kakau. ’Da ma vutia, Yesu nga mu Yudea azini nga di vini aci i’do dri dazu Galilia. Te erini mviria Galilia, fi vini aku ambo Samaria ni ma aleasi. Ama ma ne nga a’du ma eyo ’ye i ’da nia’ri.
