Yohana Fe Baputizi Yesu Ni
A’DIKO 88
Yohana Fe Baputizi Yesu Ni
MI NE nga a’balau esipi agu ’da ma dria ’di. Agu nde ’di Yesu i. Eri ma eli ca di 30 ’dipi ’bo. Azini agu eri be ’da Yohana i. Ama oni vini e’yo eri ma dria ’bo indi. Mi eco sawa ndra Mariamu ni muzu i ma ori’ba Elizabeti ni andrizu, azini mvani ombuzu Elizabeti ma alea ayikosi ri ega ra ya? Mva nde ’da ndra Yohana i. Te Yohana pi Yesu be a’du afa ’ye ya?
Yohana ebi nga lu Yesuni su Yi Yoridani ma alea o’diru. ’Diri geri baputizi fezu ’bani ri. Okorisi, ’ba su eri yi ma alea va ’dale, vutinia ’ba inze di eri. ’Dini adri azi Yohana ni nga ’ba kakau vuri i risi, ’ba omve ndra eri Yohana Baputizi fepiri. Te Yohana fe Yesuni baputizi a’du e’yosi ya?
’Di asisile Yesu ni emuzu Yohana ni zizu baputizi fezu ini ri. Yohana ni Baputizi fe ’ba lepi e’dapi eyi o’aki candisi ezata eyini si ’diyi ma e’yo si ’diyi ni. Te Yesu ede ndra ezata azi erini o’azu candisi ni ra ya? Yesu ’yeni ndra ezata azi erini ecozu o’azu candisi ni ku, a’dusikuni eri mva Munguni engazu ’bua ’dale. Ani zi di ndra Yohana i baputizi fezu i dri asisile ndu nisi. Ama ma ne nga asisile ’dari ngonia ri.
De nga Yesu muni Yohana vu ku, eri ndra ’Ba azi ngapi bau be kome pi edezu mesa pie azini afa azi ndundu ’diyi pie. Yusufu, Mariamu vile agupi ri ndra bani vini azi ’da i nga ani imba bani Yesuni azi ’dasi ni. Te Yehova epeni ndra Mvi ini ri ma ti nyakua azi bau ni ngazu ’dini ku. Epe ndra Yesu ma ti azi ndu ’dini leri ngazu ani sawa ca di ndra Yesu ni azi nde e’dozu ’bo. E’dozu azi i ma ati ni ngazu, Yesu mu di bani ndra baputizi isu Yohana vu. Mungu o’a ndra ayikosi ra ya?
Ee, o’a ndra ayikosi, a’dusikuni Yesuni efuria yi ma alearisi amve ’boria, o’duko enga ’bua ’yo kini: ‘Diri Mvi mani, mani lele tu ri i.’ Bu zi vini i ma ti ani a’balau esi di engazu ’buarisi Yesu ma dria. Te ovuni ndra a’balau adari i ku. ’Da ri dra orindi alatararu Munguni wura a’balau ni si.
Ani sawa ’di ma alea, Yesu ovu di egata be kakau asi ini ma alea, ani mu pari roko dria odu 40. ’Dale Satani nga emu eri vu. Paleko na Satani nga Yesu ni obe azita Munguni nyozu. Te Yesu ga obeta erini ’diyi dria si.
’Di ma vutia Yesu nga dri da dika fu dri ’ba ima vuti bipi oko ’diyi ma azi be. Yi ma ru ki Anderia pi Petero (omvele Simone) i ri pie, Filipo pie azini Natanieli (omvele Batolomeo) i ri pie. Yesu pi ’ba eri ma vuti bipi o’diru ’diyi pie ko ki dri muzu aku Galilia ni ma alea. ’Dale, ngaki asi aku Natanieli nia angu omvele Kana Galilia ria. ’Da Yesu nga mu omu oku bizani ma alea, ’diri ’bani sawa erini tali ini oko ri edezu ri. Mi ni tali ’di ngo i’ari ra ya? Oja yi ewa ru.
Matayo 3:13-17; 4:1-11; 13:55; Marako 6:3; Yohana 1:29-51; 2:1-12.
