Agupi Okpo Be Turi
A’DIKO 54
Agupi Okpo Be Turi
MI NI agu ovupi drio okpo be tu ri ra ya? Eri ’ba e’yo lipi ’bani omvele Samisoni i ri. Yehova fe Samisoni dri okpo ’diri ni. De nga Samisoni osi ni ku, Yehova nga ’yo eri ma andri ni kini: ‘Ace were mi nga agupiamva isu ra. Eri nga ovu dricere ru ba Israelini ’diyi opazu engazu ’ba Filisitia ’diyi vu risi ni.’
’Ba Filisitia ni ’diyi ’ba onzi o’a ’ba Kanania ’diyi. Ovuki ’ba a’di ’dipi ’diyi pie kakua, azini eyi ’ba Israelini ’diyi ni candi fe. Pale okori si, Samisoni ni muria pari ’ba Filisitia ’diyi ni o’azu ria, kami amboru efu awube eri vu. Te Samisoni ’di kami ’diri i ma drisi afa azi kokoru. Nga vini ’ba Filisitia turu turu azi ni ki o’di indi.
’Di ma vu tia Samisoni nga oku omvele Delila i ri be agyi ’ba. ’Ba dricere ru Filisitia ni ’diyi nga ’yo kini, ’ba alu alu ni nga Delila dri silingi dahabu ru ri fe 1,100, ka nga lu eyini a’du afa ni fe Samisoni ni ovuzu okpo be nia ri ra ria. Delila le silingi ’diri ra. Ovuni Samisoni ma agyi adaru ri i ku, kani agyi ru ’ba Munguni ’diyi be ku. Nga Samisoni zi dika dika a’du afa ni fe erini ovuzu okpo be nia ri ma dria.
Asizu, Delila nga e’yo ’di ma eti isu Samisoni vu risi. ’Yo ’dini: ‘Yi ofani nga dribi ima driari ku, ini engazu ima andri ma opkojoarisi kpere sawa ’disi, Mungu pe ma ovuzu ati’bo ini ru ndu. ’Ba ka ma dribi ofa ra, ma nga di eca okpo kokoru.’
Delila ni e’yo ’diri onizu ’bo ria, fe Samisoni ni o’du kozu ima kumu dria. ’Da ma vutia omve ’ba alu ofa eri ma dribi dria. Samisoni ka mu enga o’duari si ’bo, eri ma okpo fu eri ma rua ri si ra. ’Ba Filisitia ’diyi nga efi eri bizu. Onze eri ma mile iri tro ra, azini nga eri ’ba ati’bo ru eyini.
O’du alu ’ba Filisitia ’diyi oku yi taulu omu edeza amboruri edezu Dagoni adroi eyini ri dri, nga Samisoni ni eji engazu arujoarisi eri ma fe eyi ma oguki beni. ’Deresi Samisoni ma dribi du dika ’bo. Samisoni ’yo mva i ma dri bipiri ma tia: ‘Mi ku ma ma amvi nga idiafe jo ni pa sozu drinia ri.’ Samisoni nga di Mungu zi okpo fezu ini, coti bi idiafe ’diyi. Nga ’yo dini: ‘Mi ku ma ma dra ’ba Filisitia ’diyi be taulu.’ ’Ba Filisitia ogogo 3,000 emuki omu ’di ma alea ni, coti Samisoni ka mu i ati idiafe ma rua ’bo, nga jo nyo va ani ’ba onzi ’diyi odraki dria.
