Hema Inzita Inzizu Ri
A’DIKO 37
Hema Inzita Inzizu Ri
MI NI afa ’bani si ’di a’du afa ni’ari ra ya? Eri Hema ’bani Yehovani inzi zuri i. ’Ba vini eri omve hema ti ecizaniri. ’Ba si eri eli alu ba ’diyi ni efuzu Misiria ri si ’bo ri ma vutia. Mi ni a’di fe igata ’diri ni’ari ra ya?
Eri Yehova ma egatani. Musa ni ovuzu oni Sinai ma dria ri si Yehova ’yo eri ni ma si eri. Kini ma ede eri ’bani ecozu eri onzezu ndu ndu ra. Geri ’dinile ri si ’ba eco eri ’du jizu pari azini ’diyi ma alia dika, eri ofizu ogogo ra. ’Ba Israelini ’diyi ni aciria pari ndu ndu roko dria ’diyi ma alia ria, riki aci hema nde ’di be.
Mi ka angu ndre hema ma ale werea ria, kala asizu ri ma alea, mi nga sanduka oyo soza ni ri ndre. Eri ma dria malaika iri omvele kerubi ru edele mele si ’diyi ma wura o’oko nia irile irile. Mungu nga vini Azita Mudri ’Diyi si dika oni iri ’bara ’bara ’diyi ma dria adusiku ni Musa onyo ndra oko ’dayi te. ’Ba oni iri ’diyi sanduku e’yo aziza ni ma alia. Azini imvu ovupi mana pie ri ’ba ’ba alenia indi. Mi eco ega mana ni a’du afa ni’ari ra ya?
Yehova pe Musa ma adripi Aroni ni ovuzu kuhani ru adule. Eri ’ba yi ma dri ce Yehovani inzizu. Eri ma anzipi yi vini kuhani ru indi.
Mi ma ndre rumu amboru hema ma alia ’diyi. Ovu rumu werea ’dapi ’dapi pale iri. Mi ndre Sanduku, acika ni efuzu drinia risi tuzu oru ’diri ra ya? ’Diri pari edeta edezu kuhani ni afa azi aji be arikari ru omvele obiese ri evezu ri i. Ovu pi ’da indiri tala pati tala ni ovuzu drinia aziri ri. Afa na zu rumu ’da ma alea ri mesa ni. Eri ma dria ’ba ’ba mukati 12.
Rii dri tabaranekula nia ba okelea ambu ni, yi be alea tre. ’Ba kuhani ru ’diyi eri ayu dri ojizu. ’Da vini alitara ni. ’Dia ba anyapa odraba ’bo ’diyi eve owitaru Yehova dri. Hema ’diri agandua piri pari anzi Israelini ’diyi ni o’azu ri ma alea, ani anzi Israelini aso di hema eyini agayi nisi kuru.
Efuza 25:8-40; 26:1-37; 27:1-8; 28:1; 30:1-10, 17-21; 34:1, 2; ’Ba Ebraniani 9:1-5.
