Iburahimu—agyi Munguni
A’DIKO 13
Iburahimu—agyi Munguni
ANGU azi aluni ’bani ndra muzu o’azu Yi Tiza ma vutia ri ndra Uri ’i. Eca ndra aku ambo azi ni ovupi jo onyiru ’diyi pie ri. Te ’ba ’daa ’diyi ndra mungu inzoru ’diyi inzi. Eyi ndra vini ’ye ’dile Babelia indi. ’Ba Babelia azini Uria ’diyi ovuni ndra Noa azini erima mvi Semi ndra mupi drile Yehovani inzipi ’diyi le ku.
Eli 350 ni alizu yi tiza ma vutia ’boria, Noa ndra a’itabe ri nga dra ra. Eri ndra lu eli iri ’da ma vutia agu mini ne i’da di ma alea ’di ’ba osi eri ra. Eri ndra ’ba azi ndu ’dinini Mungu ma milea. Eri ma ru ndra Iburahimu ’i. Eri ndra o’a ’ba ivile akua ’diyi pie aku ambo Uri ni ma alea.
O’du azini alu Yehova ’yo Iburahimu ni: ‘Ifu Uria risi azini mi ori’ba ma eselea risi imu pari mani nga e’da mini ria.’ Iburahimu eri ndra Mungu ma ti afa ini muke Uria ’diyi kuzu ra ya? Ee, eri ndra ra. Iburahimu ni ndra Mungu ma agyi ru asisile erini ndra Mungu ma ti erizu sawa driasi ra risi.
’Ba Iburahimu vile akua ’diyi ma azi muki ndra eri be erini Uri ni kuzu risi indi. Erima ati Tera mu ndra eri be indi. Erima adri ma mva, Loti mu ndra vini eribe indi. Sara, Iburahimu ma okuni mu vini ndra eribe indi. Sawa azini ma vutia, ngaki di ndra eca angu omvele Harania ria, Tera nga di dra ra. Eyi ndra re tu engazu Uria risi.
Sawa azini ma vutia, Iburahimu pi ngaki angu Harani ni ku ’ba ivile akua ’diyi pie muzu angu omvele Kanani ’i ria. ’Dale Yehova nga ’yo: ‘Di angu mani nga fe mi anzipika ni ri’i.’ Iburahimu nga di o’a Kanania azini ri o’a hema ma alea.
Mungu nga di e’do Iburahimu ma aza ko ani nga di ovu kabilo azini anyapa azi ’diyi pie angiri azini ati’bo be turu turu. Te anzi eyini Sara be eyini ndra isu ni yo.
Iburahimu ni ovuzu elibe 99 ria, Yehova ’yo ndra erini: ‘Ma mini oyo so mi nga ovu suru kakau ’bani ma ata ni.’ Te ’diri ndra nga ’i ’ye ngoni ngoni, Iburahimu pini ndra ovuzu dezaru Sara be ’bo azini eyima mva ni ovuzu yo ria?
