Yusufu Ma Adripika Nguki Eri Onzi
A’DIKO 21
Yusufu Ma Adripika Nguki Eri Onzi
MI NDRE mva ’di candisi azakoza kokoru. ’Di Yusufu i. Eri ma Adripika oziki eri ’ba mu’ba Misiria ’diyi dri sawa ’disi. Yusufu ni nga ovu ’dale ati’boru. Erima adripika ’diyi ’ye e’yo onzi ’dinile ri eri ma rua a’du e’yo si ya? A’dusiku Eyini ovuzu ma’yala si Yusufu vu ri si.
Eyi ma ati Yakobo le ndra Yusufu ni saaru. Ice ima leta eriniri erini koti ndrizaru tu izururi edezu erini ri si. Erima adripika 10 erima drilea ’diyi nga ’di eca ma’yala si Yusufu vu, Yakobo ni eri lele turisi. Te e’yo azini eyi ni eri nguzu onzi ni ci.
Orobi obi Yusufuni pale iri. Orobi eri obi pi iri ’diyi ma alea Yusufu ma adripika osiki kumuti vaa eri ma drilea. Yusufu ni di oribi ’diyi oluzu eyini ria eyi ma a’oko ecadi angiri tu.
O’du alu Yusufu ma adripika erima drilea ’diyi ni kabilo eyi ma ati niri oceria, Yakobo zi Yusufuni muzu eyi ’dale ngoni’a ri ndrezu. Yusufu ma adripika ni ndreria eri emu yivu, yi ma azi ’yo kini: ‘Ama ma ’di eri ra!’ Te Rubeni eri ma adripi okori kini: ‘Yo emi ma ’ye ’dini ku!’ ’Da ma paria bi eri ecozu eri ’bezu bule yii ni nzuzu te ri ma alia. Nga di ri vaa otuta otuzu yi nga a’du afa ’ye’a ri ma dria.
Sawa ’diri ma alea ’ba omvele Isimaelini ruri eca ki. Yuda ’yo ima adripika yini: ‘Ama ozi eri ’ba Isimaelini ’diyi ni.’ Nga di ’ye dinile. Ozi di Yusufu ni silingi dahabu ru 20 si ra. Asindriza kokoru nga eri ozi aje were si ra!
Eri ma adripika ’diyi nga ’yo yi ma ati ni ngoni ya? Nga indri ’di ra nga ’di Yusufu ma bongo drizaruri su indri ma ari alia ’dika dika. ’Da ma vutia nga di bongo nde ji akua yima ati Yakobo vu nga ’yo kini: ‘Ama isu bongo ’di, mi ndre kani ’di ovu ni Yusufu ma koti ni ku ya ni.’
Yakobo nga dre eri ’di i. ‘Anyapa asia ’diyi ’di Yusufu ni ni,’ nga di awu wuzu tu. ’Dinile Yusufu ma adripika leki yi ma ati ma ega e’yo trotro eyini otule rile. Yakobo ovu candisi tu. Nga awu wuzu o’du kakau te Yusufu ovuni drazaru ku. Ama ma ndreki a’du afa ’ye ’i eri be ’bani eri ji ria ’dale ’bo ri vutia ni’ani.
