1. Le a’di ma ece amani geri kililiru Mungu ni inzizu ri ni?

DINI karakara yi ’yo kini, eyi e’yo ada Mungu ma dria ri imba. Te di ’daleri econi i ku, adusiku e’yo eyini imba Mungu ma dria azini geri amani Mungu ni inzizu ri ma dria ’diyi ndu ndu. Ama eco di geri Mungu ni inzizu kililiru ri oni ngoniru? Yehova eco lu geri amani ini inzita fezu kililiru ri ece ni.

2. Ama eco geri kililiru Mungu ni inzizu ri oni ngoniru?

² Yehova fe amani Biblia amani ecozu geri kililiru inzita fezu ini ri onizu beni. Le di mi ma oni e’yo Biblia ni imba ri, dika Yehova ni nga mi aza ko e’yo erini imba ’diyi vazu ra erini asizu misi saaru risi.​—Isaya 48:17.

3. Mungu le ama ma ’ye a’du afa ni?

³ ’Ba azi yi ’yo kini dini dria yi Mungu ma milea onyiru, te ’di ovuni e’yo ndra Yesu ni imba ri i ku. Yesu ’yo ndra ’dini: “’Ba dria ’yopi ma tia, ‘Opi, Opi,’ ’diyi ngani fi Suru ’buaria ku, te ’ba e’yo ma Ata ovupi ’buarini leleri ’yepiri’i.” Eri di ani orodri ru amani e’yo Mungu ni leleri onizu, azini e’yo amani oni ri ’yezu ’yeta si. ’Di e’yo azi okporu ni a’dusiku Yesu o’bi ’ba Mungu ma ti eripi ku ’diyi ’ba e’yo ezapi ’diyi si, omve eyi “’ba e’yo onzi ’yepi ’diyi.”​—Matayo 7:21-23.

4. E’yo Yesu ni nze e’yo Mungu ni leleri ma dria ri ngoni?

⁴ Yesu ece amani kini, aka le e’yo Mungu ni leleri ’ye, ama nga e’yo ewaru ’diyi isu ece kokoru ra. ’Yo ’dini: ‘Emi fi kalitile luruarurisi; a’disiku kalitile walaru azini  geri walaru ri muzu drijaza vu, ’ba fipi alenia ’diyi kakau. Te kalitile luruaru azini geri iziaru ri muzu idri vu, ’ba eri isupi ’diyi were.’ (Matayo 7:13, 14) Geri iziaru ri geri kililiru Mungu ni inzizu, ’ba jipi idri ’dani ’dani ri ma alea ri i. Geri walaru ri geri onzi ’ba eyini ayu, lezu Mungu ni inzizu, ’ba dri cepi drijaza vu ri i. Yehova leni ’ba azi ma dra ku. Fe ’ba dria ni drileba ecozu e’yo onizu ima dria ri ra.​—2 Petero 3:9.

5. Ama eco ’ba Mungu ni inzipi geri kililiru risi ’diyi ni ngoniru?

⁵ Yesu ’yo ndra kini, ama eco ’ba Mungu ni inzipi geri kililiru ri si ’diyi isu ra. Amani ecozu eyi isuzu, le ama ma oni e’yo eyini a’ile ’diyi, e’yo eyini ’yele ’diyi pie. Yesu ’yo ’dini: “Emi nga yi ama, efi yini ’yale ’diyisi.” Mu drile ’yozu ’dini: “Pati alu alu dria onyiruri eri efi onyiruri ’ya ra.” (Matayo 7:16, 17) ’Di ma efi ovuni kini ’ba dria Mungu ni inzipi ’diyi ezata kokoru ’dini ku. Te ati’bo Mungu ni ’diyi sa driasi o’bi e’yo onyiru ri ’ye’i. Ama di mu e’yo oni afa ecopi ama aza kopi ’ba Mungu ni inzipi geri kililiru risi ’diyi nizu ri ma dria.

6, 7. Le Biblia ma ati geri kililiru Mungu ni inzizu ri ni a’dusi? Eceta Yesu ni e’da ri imba amani a’du ma e’yo ni?

⁶ Le geri amani Mungu inzizu ri ma ovu Biblia ni lele ra ri i. Biblia ’yo ’dini: “E’yo Siza dria efu Munguni i ma ava vule driniarisi, eri ovu orodriru imbatasi, egazu ’ba ma dria yi ma e’yo onzi ecezu, ’ba otuzu kililiru, azini imbata e’yo kililiruri imbazurisi, ’dini ’ba Munguniri ma ovu ani edezaru ovuzu ngonde afa dria be fudri ci erini ani ’yeta onyiru ’yezu dria.” (2 Timoteo 3:16, 17) ’Ba ti pele Paulo si ndra waraga Kristiani yini ’dini: “Emini e’yo Munguni ’diri eriria ama vu, emi a’ini eri ekile  e’yo ’banirile ku, te ekile erini ovule adadarurile, ekile e’yo Munguni” ri le. (1 ’Ba Tesalonikia ’Diyi 2:13) Geri kililiru Mungu ni inzizu ri Biblia ni e’yo ni atizu ra ri i. ’Ba atini e’yo ni egata ’ba ada niri si, e’yo a’bia risi, kaniku geri azi ndu nisi ku.

⁷ E’yo dria Yesu ni ndra imba ’diyi enga O’duko Mungu niri ma alea. (Mi la Yohana 17:17.) Eri ndra E’yo Siza yi ayu saaru. (Matayo 4:4, 7, 10) Ati’bo Mungu ni ada ’diyi eceta Yesu niri ma vuti bi, dika eyi e’yo eyini imba ’diyi ati dria e’yo Biblia ni nze risi.

8. Yesu imba amani e’yo geri Yehova ni inzizu ri ma dria ngoni?

⁸ Le ama ma fe inzita Yehova ni a’dule. Zaburi 83:18 ’yo ’dini: “Mi’i a’dule omvele Yehova’iri, mi ovu Mungu Uru Tu angu wudrikuru dria ma driliari’i.” Yesu ni ndra lezu ’ba dria ma ni Mungu adari kililiru risi, imba eyini Mungu ma ru ra. (Mi la Yohana 17:6.) Yesu ’yo ’dini: ‘Mi ma inzi Yehova Mungu mini, mi ma nga azi eri dri a’dule.’ (Matayo 4:10) Amani ovuzu ati’bo Mungu ni ’diyi risi, ama eceta Yesu niri ma vuti obi. Ama lu inzita fe Yehova ni a’dule, ama ru erini ri ayu, azini ama ru nde imba ’ba azi ’diyi ni indi. Ama vini ’ba yini e’yo erini nga ’ye amani ’diyi ece.

9, 10. Ama eco leta e’da ama eselea ngoni ru?

⁹ Le ama ma le ’ba yi engazu ama asia. Yesu imba ’ba ima vuti bipi ’diyi, eyini eyi lezu eyi ma eselea. (Mi la Yohana 13:35.) Ama asini e’yo pari agu azi ni engazu ri ma dria kaniku suru erini ri ma dria ku. Ama asini vini e’yo eri lonyi be, kaniku eri alio ni ri ma dria ku. Leta amani e’da ama eselea rini ama eci tualu adripiru, azini amvupi ru. (’Ba Kolosaia ’Diyi 3:14) Ama eco di ani fi e’yo a’di ’diza niri ma alea ’ba yi o’dizu ku. Biblia ’yo ’dini: “Anzi Munguni piyi e’da yi e’yo ’disi anzi ’Ba asu Supirini  be: ’Ba dria alu alu e’yo kililiru ’yepi kuri ovuni ’ba Munguni ku, ’ba i adrini lepi kuri vini ’dinile indi.” Ece vini amani e’yo ’dini: “Ama ma le ama ama eselia; ama ma ovu Kainile ku, eri ’ba onzirini, fu i adrini kai.”​—1 Yohana 3:10-12; 4:20, 21.

¹⁰ Ama sa amani ri ayu, okpo amani ri pie, azini afa amani isu lonyi ru ’diyi pie ama aza kozu, azini ama asi omizu ama eselea. (’Ba Ebraniani 10:24, 25) Ama e’yo “’ye onyiru ’ba dria vu.”​—’Ba Galatiaa ’Diyi 6:10.

11. Le ama ma a’i Yesu ni geri amani ecozu Mungu ni nizu ri ru a’dusi?

¹¹ le ama ma eri e’yo Yesu ma tia a’dusiku eri amani geri ecozu e’yo onizu Mungu ma dria ri e’da ni. Biblia ’yo ’dini: “’Ba econi yi pazaru ’ba azini ma e’yosi ku, te ru andini ’bu etia ovupi fezaru ’ba eselia, amani ama pazu aniri aluni yo.” (’Yeta 4:12) Ama oni ndra e’yo Mungu ni Yesu ma ti epezu, emuzu ’ba ima ti eripi ra ’diyi onzezu ri Capita 5 buku ’di vuri ma alea ’bo. (Matayo 20:28) Yehova pe ndra Yesu ni ovuzu Opiru nyaku ’di ma dri cezu ’bo. ’Di bani asisile Biblia ni ecezu amani, le ama ma eri Yesu ma ti aka le idri ’dani ’dani ri isu ra ri i.​—Mi la Yohana 3:36.

12. Ama econi fi e’yo politiki niri ma alea ku a’dusi?

¹² Le ama ma fi e’yo politiki niri ma alea ku. Yesu awini ndra fi e’yo politiki niri ma alea ku. ’Bani ndra eri ma e’yo liria, ’yo opi Rumia omvele Pilato ru rini ’dini: “Opi nyaza mani ovuni nyaku ’diria ku.” (Mi la Yohana 18:36.) Ekile Yesu le, ama vini lu atita fe Suru Mungu ni ’bua rini a’dule. E’yo ’disi, pari ndu ndu amani o’azu ri ma alea, ama econi fi e’yo politiki niri ma alea ku. Te di Biblia ece amani kini, le ama ma inzi “’ba ’ba dri cepi” ’diyi ma e’yo. Eyi gamete ndu ndu ’ba dri cepi ’diyi. (’Ba  Rumia ’Diyi 13:1) Ama azita suru amani o’azu alenia ’diyi ni o’ba ri ma vuti obi. Te di azita ’bani ’baleri ka fe mini azita Mungu niri nyozu, ama e’yo ’ye ekile ’ba ti opele ndra ’yopi: “Ama ma ru Mungu aga ’ba ra” ’diyi ni ’yeleri le.​—’Yeta 5:29; Marako 12:17.

13. E’yo amani olu Suru Munguni ri ma dria ri ngoni?

¹³ Amani onile risi, Suru Munguni ri eco lu e’yo nyakua ’dia ’diyi otu ni a’dule. Yesu ’yo ndra kini “e’yo baru suruni” ri ni nga ovu oluzaru wudrikuru drisi dria. (Mi la Matayo 24:14.) Opi nyaza azi ’ba ada ni ecopi e’yo Suru Mungu niri ni nga ’ye amani ’diyi ’yepi ra ni yo. (Zaburi 146:3) Yesu imba ndra ama izizu Suru Mungu niri si ’dini: “Suru mini ma emu, e’yo mini leleri ma ’ye i nyakua ekile ’buarile.” (Matayo 6:10) Biblia ece amani Suru Mungu niri ni nga opi nyaza ’ba ada ni ’diyi ma dri ja dria, dika ‘Suru nderi nga pa so ’dani ’dani.’​—Danieli 2:44.

14. Mini ega risi ’ba Mungu ni inzipi geri kililiru risi ’diyi ’ba ngo yi?

¹⁴ Mini e’yo ’diyi onizu ’bo ri ma vutia, mi zi di nga mi ngulupi: ‘A’dipi e’yo eyini imba ri ati Biblia si ni? A’dipi ’ba azi ’diyi ni Mungu ma ru a’di’i yari olu ni? ’Ba leta e’dapi eyi ma eselea, dika a’ipi kini Mungu epe Yesu ma ti emuzu ama pazu ri a’dipi? ’Ba fipi e’yo politiki ni ma alea ku ’diyi a’dipi? ’Ba e’yo olupi kini Suru Mungu niri ni nga e’yo ewaru ama obipi ’diyi de ni ’diyi a’dipi?’ Eri lu, ’Ba Yehova ma E’yo Eti Nzepi ’Diyi.​—Isaya 43:10-12.

15. Aka le Mungu ma a’i inzita amani fe ini ri ra, le ama ma ’ye a’duni?

¹⁵ Mini lu a’izu kini Mungu ni ci a’dule ri cani ku. Orindi onzi ni vini Mungu ni ci ri ra, te econi e’yo erini  ’diyi ma vuti obi ku. (Yakobo 2:19) A’izu kini Mungu ni ci ’dini a’dule ri cani ku. Aka le Mungu ma a’i inzita amani fe ini ri ra, le ama ma obi e’yo erini ’diyi ma vuti.

16. Le ama ma ga dini inzoru ri si a’dusi?

¹⁶ Mungu ni ecozu inzita amani fe ini ri a’izu ra, le ama ma ku dini inzoru ri ja. Nabi Isaya si ndra ’dini: “Emi efu eri ma aliarisi, emi ma ovu di alaru.” (Isaya 52:11; 2 ’Ba Korintoa ’Diyi 6:17) ’Da di bani asisile amani e’yo azi i ecipi dini inzoru ’diyi pie ri gazu dria si ri i.

17, 18. “Babuloni Amboru” ri a’duni, dika le mi ma efu alenia risi mbeleru a’dusi?

¹⁷ Dini inzoru ri a’duni? ’Di dini ci lepi ama ma fe inzita Mungu ni geri Biblia ni e’yo ni atizu ku risi ri i. Biblia ma alea, ’ba dini inzoru ’diyi omve “Babuloni Amboru” ri i. (E’yo Eceza 17:5) A’dusi? Yi Tiza Noa ngari ri ma vutia, imbata dini kakau yini imba inzoru ’diyi e’do ndra aku ambo omvele Babuloni ru ria. Imbata inzoru ’diyi ere di yi wudrikuru drisi dria. Eceta si, ’ba Babulonia ’diyi ndra mungu kalafe be na ’bani omve trinita ruri inzi. Sa ’disi, dini kakau yi vini imba kini Mungu ni trinita ni. Te Biblia imba amani nditiri kini Mungu ada ri lu alu, Yehova i, dika Yesu ni eri ma Mvi i. (Yohana 17:3) ’Ba Babulonia ’diyi ndra vini imba kini ’ba drapi ’bo rini fu muzu o’azu drile drile orindiru, azini eri mu candi nya aci okopi kuri ma alea. ’Diri inzo ni.—Mi ne E’yo O’bazaru ’Diyi 14, 17, azini 18.

¹⁸ Mungu ondri ndra kini, sa ’bani dini inzoru ’diyi ma dri jazu ri ace di were. (E’yo Eceza 18:8) Ini le mi ma ku dini inzoru ri mbeleru a’dusi yari ra ya? Yehova Mungu le mi ma efu alenia risi de nga sa dini inzoru ’diyi ma dri jazu ri ecani ku.​—E’yo Eceza 18:4.

19. Ika azi nga Yehova ni, eri nga mini ageyi teza fe geri ngole risi?

 ¹⁹ Ika dini inzoru ri ku ecozu e’dozu Yehova ni inzizu, ’ba mi agyiru kaniku ori’ba ru ’diyi ma azi yi nga eca ani aoko si, dika eyi nga e’do mini inzamatara fe. Te Yehova econi mi ku a’dule ku. Mi nga eca ’ba milioni milioni wudrikuru si leta e’dapi eyi ma eselea asi ada si ’diyi ma azi ru. Mi vini nga ovu asi ’baza ngazu o’azu ’dani ’dani wudrikuru Mungu ni o’di ri ma alea ri be. (Marako 10:28-30) Sa azini si, ’ba mi agyiru kaniku ori’ba ru mini inzamatara fepi ’diyi ma azi yi vini nga emu e’yo Biblia ma alea ri oni sa azi ma vutia ra.

20. Amani inzita fezu Mungu ni geri kililiru risi ri orodriru tu a’dusi?

²⁰ Sa Mungu ni ngazu e’yo onzi ’diyi atrizu ri ace di were, vutinia Suru Mungu niri ni di nga opi nya wudrikuru drisi dria ni. (2 Petero 3:9, 13) Sa ’da ka nga eca ’bo, e’yo yi di nga ndri saaru! ’Ba dria yi nga Yehova ni inzi geri erini lezu ’ba ma inzi i ani risi. Eri di ani orodriru tu mini e’dozu Mungu ni inzizu geri kililiru risi mbeleru.