1, 2. Mini ega risi Mungu ziza eri feta azi orodri ru ni a’dusi? Le ama ma oni e’yo Biblia ni imba Mungu ziza ma dria ri ra a’dusi?

’BA KA nyaku ’di o’bi afa Mungu ni o’ba ’diyi ma azi yi pie, eri adanisi lu afa azi werea ni. ’Ba nyakua ’diyi e’da Yehova ma milea werea ekile yi werearu e’depi engazu bafu ma alea ri le. (Zaburi 115:15; Isaya 40:15) ’Ba ka ama o’bi angu ndu ndu Mungu ni o’ba ’diyi pie, ama e’da ekile ama orodri yo ri le. Te di Zaburi 145:18, 19 ece amani ’dini: “Yehovani ’ba dria owupi vunia ’diyi vu ogogo, eri ba dria owupi vunia asi adarusi ’diyi vu ogogo. Eri nga e’yo ’ba eri rupi ’diyini leleri ’ye ra, eri nga wuta yini eri, nga yi opa ra.” ’Di amani drileba amboru ni! Yehova, O’bapi amani okpo dria ma e’iru ri le ovu ama agyiru, azini le izita amani ri eri ra. Adaru, izita izizu ri drileba azi amboru ni, feta azi onyiru Yehova ni fele ama alu alu ni woro ra ri i.

² Te di Yehova eco lu izita amani ri eri, aka eri zi geri erini ayiko fepi ra risi ria. Ama eco di eri zi geri kililiru ’dale risi ngoniru? Ama ma ne di nga e’yo Biblia ni nze Mungu ziza ma dria ri.

3. Le mi ma zi Yehova ni ra a’dusi?

³ Yehova le ama ma izi, kaniku ama ma nze e’yo i be ra. Ama ’dileri ni ngoniru? Mi ma la nga ’Ba Filipia ’Diyi 4:6, 7. Mi ma ega nga e’yo afa E’yo Siza ’di ma alea Mungu ni a’i mivu asi ndriza si ri ma dria. Dricere angu dria ma dri cepi niri le mi saaru, dika le mi ma ece ini e’yo ewaru mini dri fuzu eyi pie ’diyi.

4. Mini Yehova ni zizu sa dria siri ni nga fe emi agyi eri be rini ecazu okporu ngoniru?

 ⁴ Mungu ziza ni ama aza ko agyi amani Yehova be ri sizu okporu. ’Ba ovupi agyiru ’diyi sa driasi e’yo nze eyi ma eselea e’yo eyini ega ’diyi ma dria, e’yo eyi obipi ’diyi pie, azini e’yo eyi ma asia ’diyi pie, agyi eyini rini ecozu zozu okporu beni. Izizu Yehova vuri si vini tro tro ’dile. Eri ima egata yi ece mini, e’yo ima asia ’diyi pie, azini e’yo erini nga ’ye ewu drusi ri ma alea ’diyi pie Biblia ma alea si. Mi eco vini erini e’yo mi asia ri ece mini e’yo nzezu eri be sa dria si risi. Ika ’dileri ’ye ra, mi agyi Yehova beri ni nga eca okporu.​—Yakobo 4:8.

5. Ama ni ngoniru Yehova erini izita ’ba yini izi ’diyi dria ku?

⁵ Yehova ni izita ’ba yini izi ’diyi eri dria ra ya? Yo, erini izita azi ’diyi ku. Ewu nabi Isaya ngari ’dasi, Yehova ’yo anzi Israeli ni ’diyi ni ’dini: “Emi ka zita zi ma tia kakau, ma ngani eri ku; dri emini ga tre arisi.” (Isaya 1:15) Ani  aka ovu milesi ku, ama eco afa azi Yehova ni ayiko fepi ku ni ’ye ra, eri di ani ga izita amani ri eriko si.

6. A’ita afa azi orodriru ni a’dusi? Mi eco e’da mi a’ita be ngoniru?

⁶ Aka le Yehova ma eri izita amani ri ra, le ama a’ita eri ma dria ri ma ovu okporu. (Marako 11:24) ’Ba ti pele Paulo ece e’yoni ’dini: “A’ita kokoru econi ’bani ayiko fezaru eri dri ku. A’disiku ’ba emupi Mungu vuri ma a’i kini eri indi, azini eri adri orodri fe ’ba eri ndrupi ’diyi dri.” (’Ba Ebraniani 11:6) Amani a’ita e’dazu geri ’disi a’dule ri cani ku. Le ama e’da a’ita amani ri nditiri amani e’yo Yehova ni lu amani ’diyi ma vuti o’bizu o’du alu alusi risi.​—Mi la Yakobo 2:26.

7. (a) Le ama ma gba dri ele azini ama ma ovu inzita si amani Yehova ni ziria a’dusi? (b) Ama eco Mungu ziza amani ri asi adasi ri e’da ngoniru?

⁷ Amani Yehova ni ziria, le ama ma gba dri ele azini ama ovu inzita si. A’dusi? ’Ba ka mini drileba fe e’yo nzezu opi suru ma dri cepi ri be, mi e’yo nze eri be inzita si. Yehova ni Mungu Okpo E’ini, ani le dri gbaza azini inzita amani fe izita iziria ri ma ovu ’da ma drilea ku ya? (E’doza 17:1; Zaburi 138:6) Le ama ma ovu asi adasi, azini ama ma zi Yehova ni engazu ama asia. Le ama ma amvi e’yo alu ri ma ale siri siri i ku.​—Matayo 6:7, 8.

8. Aka Mungu zi afa azi isuzu, le ama ma ’ye drinia a’duni?

⁸ Asizu, aka Mungu zi afa azi isuzu, le ama ma nga azi asi driasi ecozu afa nderi isuzu. Eceta si, aka Yehova ni zi afa amani le o’du alu alusi ’diyi isuzu, ama econi azi nga ovu si ’yozu Yehova ni di nga e’yo azi ’diyi ’ye dria ni ’dini ku. Le ama ma nga azi avasi, dika le ama ma ne azi esele azi ’diyi edematara ru ku. (Matayo 6:11; 2 ’Ba Tesalonikia ’Diyi 3:10) Kaniku aka Yehova ni zi ama aza kozu ezata ’yezu ku, le ama ma ona ama afa ecopi ama obepi  e’yo onzi ’yezu ’diyi si. (’Ba Kolosaia ’Diyi 3:5) Ama ma one di nga zita ’ba yini ozi izita ma dria saaru ’diyi ma azi.

9. Le izita amani ri ma mu a’di vu? Afa Yohana 14:6 ni imba amani Mungu ziza ma dria ri a’duni?

⁹ Le izita amani ri ma mu a’di vu? Yesu lu ndra ’ba ima vuti bipi ’diyi ni izita eyini ri ma mu “Ata amani ovupi ’buari” vu. (Matayo 6:9) ’Yo vini eyini ’dini: “Ma geri ni ma’i, ma e’yo adaruni ma’i, ma idrini ma’i; ’ba aluni cani Ata vu ku, pe lu kiri ma vurisi ka.” (Yohana 14:6) Ani le izita amani ri ma mu Yehova vu, geri Yesu vusi. Amani izizu Yesu vusi ri ma efi ngoni? Yehova ni ecozu izita amani ri erizu, le ama ma e’da inzita azi ngaza orodriru, Yehova ni fe Yesu niri ni. Amani ndra oni ’bo ri le, Yesu emu ndra nyakua ama onzezu ezata ma alea, azini dra ma alea. (Yohana 3:16; ’Ba Rumia ’Diyi 5:12) Yehova pe vini Yesu ni ovuzu Kuhani ma amboru azini ’Ba E’yo Lipiri ru.​—Yohana 5:22; ’Ba Ebraniani 6:20.

10. Le mi ma ’ye afa azi e’dazu mi Mungu ziria ’dini ci ya?

¹⁰ Le ama ma ’ye ’yeta azi e’dazu ama Mungu ziria ’dini ci ya? Yo, Yehova awini ece amani ama kumu osi va, ama ri va, kaniku ama pa so ’buasi ka ama izi ivu ndo ’dini ku. Biblia ni ece amani risi, ama eco e’yo nze Yehova be geri ci risi ra. (1 Suru ma E’yo 17:16; Nehemia 8:6; Danieli 6:10; Marako 11:25) Afa Yehova ni orodri ru ri ovuni geri amani izizu ri’i ku, te asisile amani eri zizu rini ovuzu kililiru ri’i. Ama eco Mungu zi o’duko si, kaniku o’duko kokoru. Ama eco vini izi etusi, kaniku inisi ra. Amani Yehova ni ziria, le ama ma ni ra eri izita amani ri eri ra, ’ba azi ndu ni ka tro eri ku ti.​—Nehemia 2:1-6.

11. Ama eco e’yo nze Yehova be afa ngole ’diyi ma dria?

¹¹ Afa amani eco a’i Mungu ziza ma alea ’diyi a’duni?  Ama eco izi afa azi ci Yehova ni lele ra risi ra. Biblia ’yo ’dini: “Ama ka afa erini lele feleri zi, eri ama eri ra.” (1 Yohana 5:14) Ama eco izi afa ama ngulupi ni leleni risi ra ya? Ee, ama eco ra. Amani Yehova ni zizu ri si ekile amani e’yo nzezu ’ba azi ama agyiru ni be rile. Ama eco e’yo ci ama omia azini ama asia ri ece Yehova ni ra. (Zaburi 62:8) Ama eco Mungu zi orindi alatararu erini okporu ri a’izu, erini ecozu ama aza kozu e’yo kililiru ri ’yezu beni. (Luka 11:13) Ama eco vini Yehova vu ondua a’i peta kililiru ’diyi pezu, dika ama eco izi okpo a’izu e’yo ewaru ’diyi ma ti tazu. (Yakobo 1:5) Le ama ma zi Yehova ni truta a’izu ezata amani ’ye ’diyi si. (’Ba Efesoa ’Diyi 1:3, 7) Ama eco vini Mungu zi ’ba azi ’diyi ni, ’ba amavu akua ’diyi ni, azini adripi ongulumu ma alea ’diyi ni amvupi yi pie.​—Yeta 12:5; ’Ba Kolosaia ’Diyi 4:12.

12. Le afa Mungu ziza amani ri ma alea orodriru ndeni ri ma ovu a’duni?

¹² Afa Mungu ziza ma alea orodriru ndeni ri a’duni? Yehova i, azini e’yo erini leleri i. Le ama ma fe awa’difo erini afa dria erini ’ye amani ’diyi si. (1 Suru ma E’yo 29:10-13) Ani ’di e’yo ada niri ra, a’dusiku Yesu ni ndra nga ovuzu nyakua ’dia ria, imba ’ba ima vuti bipi ’diyi Mungu ziza si ra. (Mi la Matayo 6:9-13.) Erini ’yo risi, le oko risi ama ma izi Mungu ma ru ni ovuzu inzizaru. Efini si le ru Mungu niri ma ovu ’bazaru alaru. Vutinia, Yesu ’yo kini le ama ma zi Suru Mungu niri ni emuzu, azini e’yo Mungu ni leleri ni i ’yezu nyakua. Amani Mungu zizu e’yo okporu ’dayi si ’bo ri ma vutia, Yesu ’yo kini ama eco di izi afa azi amani le ama ngulupi ni ’diyi si ra. Ama nga afa amani orodriru ndeni ri e’da amani Yehova ni ’bazu e’yo erini leleri be idri amani ri ma alea oko risi.

13. Le Mungu amani zi ri ma zoza ma ovu ngopi?

 ¹³ Le Mungu amani zi ri ma zoza ma ovu ngopi? Biblia awini amani e’yo ece zoza niri ma dria ku. Izita amani ri ma zoza ni ovu e’yo amani ovuzu alenia ri vusi. Eco sa ’du were, kaniku eri vini sa ’du izu ra. Eceta si, ama izita nyaka ma dria ri eco sa ’du were, te Mungu amani zi awa’difo fezu Yehova ni, kaniku amani erini e’yo ama asia ’diyi ecezu ri eco sa ’du izu. (1 Samueli 1:12, 15) Ale ni  Mungu zi izu, ’ba azi ’diyi ni osuzu ani beni ekile ’ba azi ’diyi ni ndra ’ye Yesu ngari ri le ’dini ku. (Luka 20:46, 47) Afa Yehova ni ayiko fepi ri ovuni Mungu ’bani zi ’dale ri’i ku. Afa Yehova ni orodriru ri amani eri zizu engazu ama asia ri i.

14. Ama eco Mungu zi pale si? ’Diri di amani a’du ma e’yo imba Yehova ma dria?

¹⁴ Ama eco Mungu zi pale si? Yehova le ama ma izi sa dria si. Biblia ece kini le ama ma ‘ande Mungu ziza si ku,’ ama ma zi Mungu “asi okporu be,” azini ama ma “ku Mungu zizu ku.” (Matayo 26:41; ’Ba Rumia ’Diyi 12:12; 1 ’Ba Tesalonikia ’Diyi 5:17) Yehova ni ngonde izita amani ri erizu. Ama eco erini awa’difo fe o’du alu alusi leta erini e’da amani risi, azini afa erini fe amani ’diyi si. Ama eco vini eri zi egata isuzu, okpo isuzu, azini asi omiza isuzu.  Ecozu Yehova ni zizu ra ri ka ovu amani orodriru, ama nga drileba ci i e’dapi amani ’bo ri ayu e’yo nzezu Yehova be.

15. ’Ba ka Mungu zi de ’bo, ama ’yo “amena” ’dini a’dusi?

¹⁵ ’Ba ka Mungu zi de ’bo, ama ’yo “amena” ’dini a’dusi? E’yo ’bani ’yo “amena” ri ma efi “adaru” kaniku “ma ovu di ’dile.” ’Diri geri amani ecozu e’dazu Mungu ziza amani ri asi adasi ri i. (Zaburi 41:13) Biblia ece vini amani, ’yozu izita ma vutia “amena” ri afa azi onyiru ni. ’Ba ka Mungu zi o’bi yini, ama eco “amena” ’yo o’dukosi, kaniku asi si e’dazu kini egata amani ri tualu ’bani nze izita ma alea ri be.​—1 Suru ma E’yo 16:36; 1 ’Ba Korintoa ’Diyi 14:16.

16. Afa ecepi Yehova ni adaru izita amani ’diyi omvi ra ri a’duni?

¹⁶ Yehova ni adaru izita amani ’diyi omvi ra ya? Ee, eri omvi ra. Biblia ma alea ’ba omve eri ’ba “Zita ’bani zileri Eripiri” i. (Zaburi 65:2) Yehova ni izita ’ba milioni milioni asi ada be ’diyi vuri eri, azini omvi ra. Eri izita nde yi omvi geri ndu ndu si.

17. Yehova ni malaika yi ayu ati’bo erini nyakua ’diyi pie izita amani ’diyi omvizu ngoniru?

¹⁷ Yehova ni malaika yi ayu, a’ti’bo erini nyakua ’diyi pie ecozu izita amani ’diyi omvizu. (’Ba Ebraniani 1:13, 14) Eceta ’ba yini Mungu zizu ecozu e’yo Biblia ma alea ri vazu, te vutinia ’ba Yehova ma E’yo Eti Nzepi ’Diyi eca eyivu coti coti ’diyi kakau. Biblia ece kini malaika yi azi “e’yo bari” oluzu wudrikuru drisi dria ri nga indi. (Mi la E’yo Eceza 14:6.) Eceta amani ndra Yehova ni zizu e’yo azi ewaru ama bipi nisi, kaniku afa azi amani lele ra nisi, te vutinia adripi kaniku amvupi azi amani Kristiani ru ni  ko ama aza afa amani zi ’dasi ra ’diyi kakau.​—E’yo O’beza 12:25; Yakobo 2:16.

18. Yehova ni orindi alatararu ri ayu Biblia be izita amani ’diyi omvizu ngoniru?

¹⁸ Yehova ni vini orindi alatararu ri ayu izita amani ’diyi omvizu. Aka Mungu zi azakoma isuzu e’yo ewaru ni ma ti tazu, eri amani ima orindi alatararu ri fe amani egata fezu, azini okpo fezu e’yo nde ma ti tazu. (2 ’Ba Korintoa ’Diyi 4:7) Yehova ni vini Biblia ayu izita amani ’diyi omvizu, azini ama aza kozu peta kililiru ri pezu. Amani Biblia laria, ama e’yo siza ecopi ama aza kopi ra ’diyi isu. Yehova eco vini fe e’yo ’ba azi ni omvi okuta ma alea ri ma ovu omvita amani le isu ri i, kaniku eri mbaza azi ongulumu ma alea ni ayu e’yo siza azi Biblia ma alea ecopi ama aza kopi ra ni e’dazu amani.​—’Ba Galatia ’Diyi 6:1.

19. Ama sa azini si ega Yehova omvini nga ama izita ku ’dini a’dusi?

¹⁹ Sa azini si, mi eco di vini mi ngulupi zi, ‘Yehova omvi di nga kiri izita mavu ri ku a’dusi?’ Le mi ma ni ra, Yehova ni sa ini ama izita omvizu ri geri erini ngazu izita nde omvizu ri be ri ra. Ni afa amani lele ’diyi ra. Le ama ma mu drile Mungu zizu e’yo ama ndepi risi e’dazu erini ama eri zi asi adasi, azini ama a’ita eri ma dria ri okporu. (Luka 11:5-10) Sa azini si, Yehova ni ama izita omvi geri azi amani e’yo egazu drinia ku nisi. Eceta si, ama eco Mungu ni zi e’yo azi ewaru ama bipi nisi, te erini e’yo nde dezu ri ma paria, eco amani okpo fe e’yo ’da ma ti tazu i.​—Mi la ’Ba Filipia ’Diyi 4:13.

20. Le ama ma zi Yehova ni sa dria si a’dusi?

²⁰ Yehova ni zizu ri amani drileba azi amboru ni! Ama eco ovu asi ’baza be kini eri nga izita amani ri eri ra. (Zaburi 145:18) Aka mu drile sa dria si Yehova ni zizu engazu ama asia, agyi amani eri be ri ni nga eca okporu.