1. A’di fe amani idri ni?

YEHOVA ni “Mungu idriruri’i.” (Yeremia 10:10) O’ba ama ni, dika fe amani idri ni. Biblia ’yo kini: “Mi ’ba ndra afa dria mi’i, yi ovu ndra ’bazaru, yi ovu indi mini lele ’dinirisi.” (E’yo Eceza 4:11) Adaru, Yehova le ama ma o’a idriru. Idri feta azi ndrizaru tu erini fele amani ri i.​—Mi la Zaburi 36:9.

2. Ama eco o’a idri amani ri ma alea kililiru ngoniru?

² Yehova fe amani afa dria amani le o’azu idriru ekile nyaka le, azini yi le ’diyi. (’Yeta 17:28) Te di afa ’diyi agapi dria ra ri, le ama ma ovu ayikosi idri amani ri ma alea. (’Yeta 14:15-17) Ecozu o’azu kililiru idri amani ri ma alea, le ama ma obi azita Mungu ni ’diyi ma vuti.​—Isaya 48:17, 18.

3. Kaini ni ndra Abele ni ’dizu risi Yehova ’ye a’duni?

³ Biblia ni imba amani risi, idri amani ri, azini idri ’ba azi ’diyi vuri Yehova ni orodriru. Eceta si, mva Adamu pini ti Eva be ’bani omve Kaini ru rini ndra ecazu ima adri Abele be aoko si ria, Yehova fe erini bile ndu liza. Te di Kaini awini e’yo nde eri ku, ani aoko eri nyapi risi, ‘enga i adripi Abele ma rua ombasi, fu eri kai.’ (E’doza 4:3-8) Yehova fe Kaini ni panga erini Abele ni ’dizu risi. (E’doza 4:9-11) Aoko azini angu onzi ovuni muke ku a’dusiku eco fe amani ovuzu adraru ra. Te di ’ba adraru ’daleri econi idri ’dani ’dani ri isu ku. (Mi la  1 Yohana 3:15.) Amani Yehova ni ayiko fezu, le ama ma e’da leta ’ba dria ni.​—1 Yohana 3:11, 12.

4. Azita Mungu ni fe anzi Israeli ni ’diyi niri ma azi alu ni imba amani orodri idri niri ngoniru?

⁴ Eli ni agazu ’da ma vutia alifu alifu ’bo ria, Yehova e’da idri nga kiri ini orodriru ri sa erini Azita Mudri ’diyi fezu Musa ni risi. Azita nde ma azi alu ri ’yo ’dini: “Mi ’di ’ba ku.” (Azita Amvizu 5:17) Agu azi ka ndra ’ba ’di akasi, ’ba vini eri ’di te.

5. Mungu ma egata mva ofuza ma dria ri ngoni?

⁵ Mungu ma egata mva ofuza ma dria ri ngoni? Mva ’bani nga osi ku ri ma idri vini Yehova ni orodriru. Azita Yehova ni ndra fe Israeli niri ma alea, Yehova ’yo kini ’ba azi ka oku mva be alea ni ’ye onzi, dika eri ma mva nde ka dra ra, le ’ba ma ’di agu ’da te. (Mi la Efuza 21:22, 23; Zaburi 127:3.) E’yo ’di imba di amani, mva ofuzu ri onzi.​—Mi ne E’yo O’bazaru ’Diyi 28 ri.

6, 7. Ama eco idri ma orodri amani saaru ri e’da Yehova ni ngoniru?

⁶ Ama eco di e’da Yehova ni ama idri amani, azini ’ba azi ’diyi niri ne orodriru geri ngole risi? Ama ’daleri e’da amani afa azi ecopi idri amani, azini idri ’ba azi ’diyi niri ’yepi onzi ra ’diyi ’yezu ku risi. E’yo ’disi, ama econi afa azi taba le, marungi le, kaniku aro azi ndu ’ba rua ezapi eza ’diyi ayu ku a’dusiku eyi ama rua eza eza, dika e’yi vini ama ’di ra.

⁷ Mungu ni amani idri fezu ni, azini erini rua amani ri o’bazu ni risi, le ama ma ayu eri geri ecopi erini ayiko fepi ra risi. Le di ani ama ma mba rua amani ri ma ta kililiru. Aka tani mba ku, ama nga eca ondiru Mungu ma milea. (’Ba Rumia ’Diyi 6:19; 12:1; 2 ’Ba Korintoa ’Diyi 7:1) Aka idri ne afa azi orodriru ni ru ku, ama  econi Yehova idri fepi amani niri inzi ku. Amani adriza azi ondiru ’diyi kuzu ri ni tro ovuzu ewaru ti, aka okpo ’ba angiri idri ni ovuzu amani orodriru risi, Yehova ni nga ama aza ko ra.

8. Ama eco a’du ’ye idri amani, azini ’ba azi ’diyi niri ma ta mbazu?

⁸ Ama oni di idri eri feta azi orodriru niri ’bo. Yehova ni ra ama nga okpo ’ba asi dria si lezu idri amani, azini ’ba azi ’diyi niri ma ta mbazu. Ama ’dileri ’ye amani afa azi ekile mutuka le, pikipiki le, azini gari le ’diyi onzuzu geri kililiru si risi. Ama econi avita azi ’bani ecozu drazu alenia ra ’diyi avi ku. (Zaburi 11:5) Ama vini o’bi asi driasi aku amani ri ’bazu kililiru. Yehova fe azita anzi Israeli ni ’diyi ni ’dini: “Mi ka jo o’diru si, mi ma bi abi jo dri mini ma kalaasi, ’ba kazu e’dezu driniasi, ari omvizu jo mini ma dria ’dini ku.”​—Azita Amvizu 22:8.

9. Le ama ma ’ye e’yo anyapa yi pie geri ngole risi?

⁹ Geri amani o’azu anyapa yi pie ri vini e’yo azi Yehova ni ’du okpo ru ni. Fe amani driwala anyapa azi lizu nyazaru kaniku inyiriko ni ayuzu ’dini ra. Ama eco vini anyapa azi lepi ama ’yepi onzi ri ’di ra. (E’doza 3:21; 9:3; Efuza 21:28) Te di ama econi anyapa yi o’di akasi, kaniku avizu ’dini ku.​—E’yo O’beza 12:10.

10. Ama ni ngoniru ari so pa idri ma paria?

¹⁰ Ari Yehova ma milea alatararu a’dusiku ari so pa idri ma paria. Kaini ni Abele ni ’dizu ’bo ri ma vutia, Yehova ’yo erini ’dini: “O’duko mi adripi ma ariniri wu ma bilia engazu nyakuarisi.” (E’doza 4:10) Ari Abele niri ni pa sozu eri ma idri ma paria risi, Yehova fe panga Kaini ni erini Abele ni ’dizu risi. Yi tiza Noa ngari  ri ma vutia, Yehova e’da kini, ari so pa idri ma paria. Yehova fe driwala Noa ni azini ’ba erivu akua ’diyi ni anyapa ma za nyazu ra. Te ’yo eyi ni ’dini: “Afa dria idri be acipi nyaku ma dria ’diyi nga ovu emi dri zaru; ma fe afa dria emi dri ’bo, mani afa idiza ibiru felerile.” Te di, afa azi Yehova ni ndra oga yini nyazaru si ni ci: “Emi ma nya za idrini be ku, efini kini arini be, ’dini ku.”​—E’doza 1:29; 9:3, 4.

11. Azita Mungu ni fe suru Israeli niri ni ari ma dria ri ngoni?

¹¹ Eli ka mu aga 800 Yehova ni Noa ni ari nyaza ogazu si ri ma vutia ’bo, fe vini azita ’ba i inzipi ’diyi ni ’dini: “’Ba dria alu alu anzi Israelini pi ma eselia ani’ba ovupi yi ma eselia ’diyi be, anyapa kani aria ’bani ecole nyale rari gbipi erini za ndariari, ma osu arini ra, ma ku nyaku drinia ci.” Vutinia, ’yo eyi ni ’dini: “Emi ma nya ari afa rua ari beri vileri aluni ku.” (’Ba Levini 17:13, 14) Yehova le nga kiri ’ba ma ne ari alatara ru. Eyi ndra za nya ra, te econi ari nya ku. Eyi ndra anyapa ci eyini ’di nyaka ru ri ma ari osu va.

12. Kristiani ada ’diyi ari ne geri ngole risi?

¹² Eli ni agazu were Yesu ni drazu ’bo ri ma vutia ria, ’ba ti opele ’diyi oku yi tualu mbaza ongulumu Kristiani ni ’diyi ma alea Yerusalemua ’diyi pie, ecozu azita Kristiani yini eco vuti ni obi ra ’diyi opezu engazu azita ndra fele Israeli ni ’diyi ma eselea. (Mi la ’Yeta 15:28, 29; 21:25.) Yehova ko ndra yi ma aza nizu kini ari nga kiri ima milea alatararu azini le ndra yi ma ne vini ari alatararu. Kristiani ndra oko ’diyi econi ari nya kaniku mvu ku, dika eco vini anyapa ’bani lile ku ri ma za nya ku. Eyini ndra ari nyazu ri si ekile eyini wura inzile inzi ri inzizu, kaniku eyini ali o’bazu ri le. E’dozu sa ’dasi,  Kristiani ada ’diyi econi ari nya kaniku mvu ku. Te di sa ’disi ria? Yehova le nga kiri ama ma ne ari afa azi alatararu ni ru.

13. Kristiani yi ga ’bani ari suzu eyi ma rua si a’dusi?

¹³ ’Di ma efi di Kristiani yi ga ’bani ari suzu eyi ma rua si ’dini ya? Ee, eyi ga si. Azita Yehova ni fe amani ri oga amani ari nyazu kaniku mvuzu ri si. Dakitari ka mini ewa mvuza oga si, mi eco ewa so mi rua sindani si ra ya? Yo, mi econi ku! Geri alu ’dileri si, ama econi vini fe ’bani ari suzu ama rua ku, a’dusiku azita oga ari nyazu, kaniku mvuzu ri amani si.​—Mi ne E’yo O’bazaru ’Diyi 29 ri.

14, 15. Ruta e’dazu idri ni azini Yehova ma ti erizu ri ma orodri Kristiani yini ngopi?

¹⁴ Te di dakitari ka di ’yo ama nga dra te ’ba ka ari su ama rua ku ria? Le ’ba alu alu ma pe i nga azita Mungu ni ari ma dria ri ma vuti obi ra yari ni. Kristiani yi ruta e’da angiri, idri Mungu ni fe amani feta ru rini, eyi ani geri nda asi dria si ecozu aro nduni isuzu ayuzaru. Te econi a’i ’bani ari suzu eyi ma rua ku.

¹⁵ Ama azi nga okpo si lezu o’azu rua ala si, te ama ga ’bani ari suzu ama rua si. Amani Yehova ma ti erizu ra ri orodriru aga amani lezu idri amani ri idrizu amani eri ma azita nyozu risi ri ra. Yesu ’yo ndra ’dini: “’Ba ka le idri ini pa ra eri nga idri nde avi ra, te ’ba ka idri ini avi e’yo manisi, eri nga eri isu ra.” (Matayo 16:25) Amani Yehova ni lezu saaru risi, ale azita erini ’diyi ma vuti obi i. Ni afa amani onyiru ndeni ’diyi ra, ani ama idri ne orodriru, azini alatara ru ekile Yehova ni neleri le.​—’Ba Ebraniani 11:6.

16. Ati’bo Mungu ni ’diyi e’yo erini ri ma vuti obi a’dusi?

¹⁶ Ati’bo Mungu ni asi ada be ’diyi ngonde azita erini  ari ma dria ’diyi ma vuti obizu. Econi ari nya kaniku mvu ku, dika econi vini a’i ’bani ari suzu eyi ma rua aro ru eyi atizu ’dini ku. * Te, eyi a’i aro azi ’diyi ayu ecozu eyi ma idri pazu ra. Eyi a’i asi adasi ra, ’ba idri azini ari O’bapi ri ni afa amani onyiru ndeni ’diyi ra. Mi a’i di ’ba mi O’bapiri ni afa mini onyiru ndeni ’diyi niri ra ya?

17. Geri ndra alu Yehova ni a’i ari ayuzu Israelia ra ri ngo i?

¹⁷ Azita ndra fele Musa vusi ri ma alea, Yehova ’yo anzi Israeli ni ’diyi ni ’dini: “Rua ma idriri ari ma alia; azini ma fe eri emi dri ’bo pari edeta edezuri ma dria e’yo onzi edezu emi orindi dri; a’dusiku arini e’yo onzi ede idri ma e’yosini.” (’Ba Levini 17:11) Anzi Israeli ni ’diyi ka ndra ezata ’ye, eyi truta a’i Yehova vu eyini anyapa owizu risi. Eyi vini ndra atalo edeta edepi ri zi erini ecozu anyapa nde ma ari oyazu pari edeta edezu hekalu ma alea ri ma dria. Geri alu Yehova ni ndra fe eyini ari ayuzu ra ri ’di’i.

18. Owita Yesu ni i owizu ri zi di amani geri a’du isuzu?

¹⁸ Yesu ni emuzu nyakua ’bo ria, oja di azita ndra anyapa owizu ri ra. Fe ima idri, kaniku ari ama ezata ni ecozu ovuzu wuzaru beni. (Matayo 20:28; ’Ba Ebraniani 10:1) Yehova ni Yesuni engazu azini eri jizu ’bua ’bo ri ma vutia, Yehova zi geri ’ba dria ni, eyini ecozu idri ’dani ’dani ri isuzu, a’dusiku idri Yesu vuri ma orodri angiri tu.​—Yohana 3:16; ’Ba Ebraniani 9:11, 12; 1 Petero 1:18, 19.

19. Ama eco di a’du ’ye “’ba aluni ma ari ” ni ecozu ovuzu ama dria ku?

 ¹⁹ Ama Yehova ni awa’difo si tu, erini amani idri fezu feta ru risi! Ale vini olu ’ba yini, eyi nga idri ’dani ’dani ri isu ra, eyi ka a’ita ’ba Yesu ma dria ra ria. Ama okpo ’ba angiri ’ba yini geri idri niri e’dazu, amani eyi lezu saaru risi. (Ezekieli 3:17-21) Ekile ’ba ti pele Paulo le, ama eco di nga ’yo ’dini ra: “Ma mani alaru, ’ba aluni ma ari ovuni ma dria ku, ma runi ndra e’yo dria Munguni eceleri oluzu emi dri ku.” (’Yeta 20:26, 27) Ama nga ruta e’da idri ni azini ari ni, aka ’ba azi ’diyi ni e’yo ece Yehova ma dria ra, azini aka eyini idri ma orodri Yehova ni ngopi yari ece ra ria.