1, 2. ’Ba ndra Yehova ma agyiru ’diyi ma azi yi a’dipi?

’BA MINI le ma ovu mi agyiru ri ni ovu ’ba ngole ri i? Eri ovu ’ba azi mini le saaru ni. ’Ba azi mini ecozu e’yo isuzu eri be ku, dika isuni vini e’yo mi be ku indi ’dileri i. Mi vini le ma ovu ’ba azi asi ndripi saaru, azini mini eri ma adriza lezu saaru ni i.

² Yehova Mungu ni ’ba azi yi ope ovuzu ima agyiru. Eceta si, Ibrahimu ni ndra ’ba Yehova ma agyiru ’diyi ma azi. (Isaya 41:8; Yakobo 2:23) Yehova le ndra vini Daudi ni saaru. ’Yo ndra Daudi ni ’ba ‘ima asi ni lele’ tu ri i. (’Yeta 13:22) Nabi Danieli ni vini ndra ’ba azi Yehova ni “lele turi’i.”​—Danieli 9:23.

3. Ibrahimu pi ndra Daudi pie, azini Danieli pie Yehova ma agyi ni a’dusi?

³ ’Ba ekile Ibrahimu le, Daudi le, azini Danieli le ’diyi eca ndra Yehova ma agyiru ngoniru? Yehova ece kini Ibrahimu eca ima agyiru erini ima “o’duko erile ’borisi.” (E’doza 22:18) Yehova eca ’ba ’diyi ma agyiru eyini eri ma ti erizu ra risi. Suru piri eco vini eca eri ma agyiru ra. Yehova ’yo ndra anzi Israeli ni ’diyi ni: “Emi eri o’duko mani, ma nga ovu Mungu emini, emi vini nga ovu ’ba mani beni.” (Yeremia 7:23) Le vini mi ma eri Yehova ma ti, ika le asi dria si eca eri ma agyiru ra ria.

4, 5. Yehova ni ima agyi yini ta mbaza fe ngoniru?

⁴ Biblia ece kini Yehova ni geri nda ima okpo e’dazu ecozu “’ba asi be kililiru i vu ’diyi ma aza kozu beni.”  (2 Suru ma E’yo 16:9) Zaburi 32:8 ma alea, Yehova ’yo ’ba ima agyiru ’diyi ni: “Ma nga mi imba ra, ma nga vini mi dri ce geri mini ngazu muzu aleniaria; ma nga mi dri ondua fe mani mi ndreria ma milesi.”

⁵ Ari’bo azi okpo be saaru ni le ama ma ovu Mungu ma agyiru ku. Te di Yehova le amani ta mbaza fe ra. (Mi la Zaburi 55:22.) Ama azi nga Yehova ni asi dria si erini ovuzu ama agyi ni risi. E’yo ka tro eca ewaru ti, ama econi eri ku ku. Ama di vini ovu asi ’baza agu zaburi sipi ri ni ndra ovuzu ri be. Si ndra e’yo Yehova ma dria ’dini: “Erini ovule ma dri ndiriarisi, ma ngani aba ku.” (Zaburi 16:8; 63:8) Geri Satani ni lezu agyi amani Mungu be ri ezazu ’diyi ngo yi?

6. E’yo ndra Satani ni nze inzoru ’ba yi tozu ri ngoni?

⁶ Ama oni ndra e’yo inzoru Satani ni nze Yehova ma rua, erini ’yozu Yehova ni inzo nze, azini e’yo erini ’ye ’diyi ovuni muke ku ri Capita 11 ma alea ’bo. ’Yo kini Adamu pini Eva be e’yo onyiru kaniku onzi ri pezu yima ngulupi ni ceni ku ri ovuni muke ku. Buku Yobu niri ece vini amani e’yo inzo Satani ni, erini ’ba lepi ovupi Mungu ma agyiru ’diyi tozu ri ma dria. Satani ’yo kini eyi Yehova ni inzi eyini afa azi isuzu ani ci risi, ovuni eyini Yehova ni lezu saaru risi ku. Satani ’yo vini i eco ’ba ciri oja Mungu ma ari’bo ru ra. Ama ma ne di nga e’yo amani eco oni engazu Yobu vu ri, azini geri Yehova ni ndra eri ma ta mbazu ri.

7, 8. (a) Yehova ma leta Yobu ni lezu ri ndra ngopi? (b) Satani nze ndra e’yo Yobu si ngoni?

⁷ Yobu ni ndra a’di i? Eri ndra ’ba azi onyiru ni, dika eli aga di erini drazu ’bo ri ma vutia 3,600 ’dipi ’bo. Yehova ’yo kini ewu erivu ’da ma alea, ’ba azi nyakua ’dia  eri le ni yo. Yobu ru ndra Mungu ni saaru, dika ngu ndra e’yo onzi ri onzi. (Yobu 1:8) Adaru, Yobu ni ndra Yehova ma agyi ada ri i.

⁸ Satani ni ’yo risi, Yobu ni Mungu ni inzi erini ecozu lonyi isuzu beni. Satani ’yo Yehova ni ’dini: “Mi toni kali eri ma ageia kuru, jo erini pie, afa dria erini ovuzu yi be ’diyi pie dria ku ya? Mi fe asi ndriza azi eri ma drini ’yele ’diyi ma dria ’bo, lonyi erini ezu tre angua. Te di curu’do mi eju nga mi dri, mi elo afa dria erini ovuzu yi be ’diyi ma rua, eri nga ani mi o’da va mi milia ’dia.”​—Yobu 1:10, 11.

9. Yehova ku Satani ni driwala a’du ’yezu?

⁹ Satani to ndra Yobu ni, ’yo kini Yobu ni Yehova ni inzi erini lonyi isuzu Erivu risi. Satani ’yo vini i eco Yobu ni oja azi ngaza Yehova niri kuzu ra. Yehova awini inzo Satani ni eji ’da a’i ku, te fe Satani ni driwala erini ecozu Yobu ma leta erini Yehova ni lezu ri o’bizu ra.

10. Satani fe Yobu ni candi geri ngole risi? Yobu ’yo di ani ngoni?

¹⁰ Okorisi, Satani ja afa Yobu ni ovuzu yi be ’diyi ma dri woro. Vutinia, Satani o’di ati’bo Yobu ni ’diyi dria. Yobu avi afa erini ovuzu eyi be ’diyi dria dria. Asizu, Satani ja anzi Yobu ni ’diyi ma dri dria oli azi ambo akuku ru ni si. Te Yobu awini Yehova ni ga ku. “E’yo ’diyi ma alea dria Yobu ezani ku, ’yoni Mungu ’yeni kililiru ku, ’dinini ku.”​—Yobu 1:12-19, 22.

11. (a) Candi Satani ni eji Yobu niri ma azi a’duni? (b) Yobu ’yo di ani ngoni?

¹¹ Satani asini ’daa ku. Eji vini inzo azi ndu ni Mungu ma rua, ’yo ’dini: “Mi elo eri ma fala pi rua be, eri nga mi o’da kpere va mi milia ’dia.” Satani fe di azo azi ’ba ma rua ni suzu saaru ni bi Yobu ni. (Yobu 2:5, 7) Yobu awini  vini Yehova ni ga ku. ’Yo ’dini: “De nga ma drani ku ma ngani e’yo kililiru maniri ku ku!”​—Yobu 27:5.

12. Yobu e’da Satani ni ’ba inzo nzepi ri ru ngoniru?

¹² Yobu awini ndra e’yo Satani ni i tozu ri ni ku, awini vini asisile ini candi nyazu angiri ri ni ku. Erini ndra ega risi, Yehova ni e’yo ewaru ini ovuzu alenia ’diyi fe ni. (Yobu 6:4; 16:11-14) Erini tro e’yo egazu ’dale ra ti, Yobu awini Yehova ni ga ku. E’yo ndra ’bani le ri e’da di i nditiri ’bo. Yobu leni ndra Yehova ni erini afa azi isuzu ani ci risi ku. Eri ndra Mungu ma agyi ni erini Mungu ni lezu saaru risi. E’yo ndra Satani ni eri tozu ’dayi woro inzo ni!

13. Yobu ni e’yo ti tazu kililiru ri eji di orodri ngo i?

¹³ Yobu awini ndra Yehova ni ga ku, dika e’da Satani ni ’ba inzo nzepi ri ru erini tro ndra e’yo i ’yepi ’bua ’daleri nizu ku ra ti. Yehova co tusu Yobu ma dria angiri erini ovuzu ima agyi asi ada be ri i risi.​—Yobu 42:12-17.

14, 15. E’yo Satani ni ’ba dria tozu ri ngo i?

¹⁴ Ama eco imbata amboru ni isu e’yo i ’yepi Yobu be ri ma alea ra. Satani ni nga kiri ama to, ’yo kini ama Yehova ni inzi amani afa azi isuzu erivu risi. Yobu 2:4 ma alea, Satani ’yo ’dini: ‘’Ba nga afa erini ovuzu yi be ’diyi ofe dria idri ini ma paria.’ Satani to ni lu Yobu ni i a’dule ku, te to ’ba dria nyakua ’dia ’diyi. Eli turu turu Yobu ni drazu ’bo ri ma vutia, Satani ni ndra nga kiri Yehova ni o’da, azini ati’bo erini ’diyi to ria. Eceta si, E’yo O’beza 27:11 ’yo ’dini: “Mva mani, mi ma ovu onduaru, mi fe di ma asi ma ovu ayikosi fo, ma ma omvi e’yo ’ba ma o’dapiri ma tia ani.”

¹⁵ Mi eco pe e’yo erizu Yehova ma tia azini o’a eri ma  agyiru, mini ecozu Satani ni e’dazu ’ba inzo nzepi ri ru beni. Ika ojata azi amboru ni ’ye idri mini ri ma alea ecozu ecazu Yehova ma agyiru beni, mi ’da peta kililiru ndeni mini eco pe idri mini ma alea ri pe! ’Di peta azi amboru ni. Satani ni ’yo risi e’yo ka eca ewaru, mi nga Mungu ni ga si. Eri le ama ici e’yo Mungu niri gazu. Eri ’dileri ’ye ngoniru?

16. (a) Geri Satani ni ayu ’ba yi icizu Yehova ni inzizu ku beni ri ngo i? (b) ’Ba asu Supiri eco le inzita mini fe Yehova niri atri geri ngole risi?

¹⁶ Satani ni geri ndu ndu yi ayu ecozu ’ba yi icizu Mungu ni gazu beni. Eri aci “kamile, awu be ’ba ndazu nyazu.” (1 Petero 5:8) ’Ba mi agyiru, azini ori’ba ru ’diyi ka le mini Biblia oniza oga si, kaniku ka le mi oga e’yo kililiru ri ’yezu si, le mi ma ovu osuta si ku. Eco nga fe mini egazu eyi ’da a’di ’di mi be. * (Yohana 15:19, 20) Satani ni vini i ’ba inzo si “malaika dizaniriru.” Eri di ani le ama ici Yehova ma ti gazu. (2 ’Ba Korintoa ’Diyi 11:14) Geri azi Satani ni lezu ama icizu Yehova ni inzizu ku beni ri erini fezu mini egazu mi orodri adani si Mungu ni yo ri.​—E’yo O’beza 24:10.

17. Asisile amani Yehova ma ti erizu ri ngoni?

¹⁷ Aka Yehova ma ti eri ra, ama di nga Satani ni e’da ’ba inzo nzepi ri ru. A’du ni nga ama aza ko ecozu ovuzu ’ba e’yo eripi ra ’diyi ru ni? Biblia ’yo ’dini: “Mi ma le Yehova Mungu miniri mi asi driasi, mi orindi driasi, mi okpo driasi indi.” (Azita Amvizu 6:5) Ama e’yo eri  Yehova ma tia amani eri lezu saaru risi. Ama leta Yehova niri ni zo ria, ama nga le e’yo dria erini lu amani ’diyi ’ye ra. ’Ba ti pele Yohana si ndra ’dini: “Leta amani Mungu lezuri ’di, amani azita erini ma ta mbazuri’i. Te azita erini ovuni nzizaru ku.”​—1 Yohana 5:3.

18, 19. (a) Afa azi Yehova ni ’yo eyi onzi ’diyi ngo yi? (b) Ama ni ngoniru Yehova econi ama omi afa ama ndepi ra ri ’yezu ku?

¹⁸ Afa azi Yehova ni lu amani eyi onzi ’diyi ngo yi? Eyi ma azi yi sanduku e’yo dri be “Mi ma Ngu Afa Yehova ni Ngule Onzi ’Diyi Onzi” ri ma alea. Oko risi, eri nga e’da ekile afa ’diyi ma azi ovuni onzi ku le. Te di mini e’yo siza Biblia ma alea ’dayi lazu azini asisile drozu yi ma dria ria, mi di nga azita Yehova ni ’diyi ma vuti obizu ri ondua ni a’dusi yari va ra. Mi di vini nga isu ne kini, le mi ma ’ye ojata azi yi idri mini ri ma alea ra. Eyini tro ovuzu ewaru ra ti, mini ojata ’diyi ’yezu ra rini nga fe mini ovuzu asianzu si, azini ayikosi mini ovuzu Mungu  ma agyiru asi adasi ri si. (Isaya 48:17, 18) Ama ni ngoniru ama eco ojata ’diyi ’ye ra?

¹⁹ Yehova econi fe amani afa azi ama okpo ndepi te ni ’ye ku. (Azita Amvizu 30:11-14) Eri ama Agyi ada ri i, ni vini e’yo ama dria aga amani ni ama ngulupi ma dria ri ra. Ni e’yo amani ovuzu okporu ’diyi, okpo ako amani ’diyi pie dria ra. (Zaburi 103:14) ’Ba ti pele Paulo fe amani asi omiza ’dini: ‘Mungu ni a’ita be, eri ngani ku obeta emi okpo agapi ra rini emi obezu ku, te obeta nde be tualu eri nga geri emini fuzuri ede, emini ecozu eri agazu asi tezasi beni.’ (1 ’Ba Korintoa ’Diyi 10:13) Ama eco di ovu asi ’baza si ra, Yehova ni nga sa dria si amani okpo fe e’yo kililiru ri ’yezu ra. Eri nga mini “okpo agapi turi” fe mini ecozu e’yo ewaru ’diyi ma ti tazu. (2 ’Ba Korintoa ’Diyi 4:7) Paulo ni azakoma Yehova niri isuzu e’yo ewaru ’diyi ma ti tazu ’bo ri ma vutia, ’yo ’dini: “Ma eco e’yo dria ’yezaru ’ba okpo fepi ma dririsi.”​—’Ba Filipia ’Diyi 4:13.

20. Adriza amani le vuti ni obi ’diyi ngo yi? Ale vuti ni obi ra a’dusi?

²⁰ Aka le ovu Yehova ma agyiru ra, le ama ’ye e’yo erini lu amani eyi onzi ’diyi ku. Afa azi vini o’bazaru ’di ma dria, amani le ’ye ni ci. (’Ba Rumia ’Diyi 12:9) ’Ba Mungu ma agyiru ’diyi afa erini lele tu ’diyi le indi. ’Ba ece e’yo eyi ma dria E’yo Siza ’di ma alea. Zaburi 15:1-5. (Mi la.) ’Ba Yehova ma agyiru ’diyi adriza erini ’diyi ma vuti obi. Adriza ’diyi ma azi, “leta avasiri pi, ayiko pi, asi anzuru pi, asi teza e’yereri pi, asi ndriza pi, onyi pi, a’ita pi, asi e’yereri pi, asi teza e’yo ruani gazu ri pie.”​—’Ba Galatia ’Diyi 5:22, 23.

21. Mi eco e’do adriza Mungu ni le saaru ’diyi e’da ngoniru?

²¹ Mi eco di oni adriza onyiru ’diyi e’dazu idri mini ri ma alea ngoniru? Le mi ma oni e’yo Yehova ni le ’diyi mini Biblia lazu, azini onizu sa driasi risi. (Isaya 30:20, 21) Mini ’dileri ’yeria mi ma leta Yehova niri ni di nga zo, dika mi ma leta erini ri ka di zo ’bo, mi di nga le e’yo erini lu mini ’diyi ’ye i.

22. Orodri mini nga isu mini Yehova ma ti erizu ra risi ri ngo i?

²² Mini ojata yi ’yezu idri mini ma alea ri ni si ekile mini bongo okpolo ni truzu, dika mini o’di ri suzu pari nia ri le. Biblia ni ’yo risi, le mi ma “tru ’ba okuri” mi rua ’yeta erini be, azini mi ma su “’ba o’diru, ovupi ’bazaru o’diru” ri. (’Ba Kolosaia ’Diyi 3:9, 10) Erini tro ovuzu ewaru ra ti, aka ojata ’ye azini aka Yehova ma ti eri ra, ’yo amani ama nga “orodri isu amboru.” (Zaburi 19:11) Le di mi ma pe e’yo erizu Yehova ma tia, azini mi ma e’da Satani ni ’ba inzo nzepi ri ru. Mi ma inzi Yehova ni mini ngazu orodri isuzu ani risi ku, te mini eri lezu asi adasi risi. Mi di nga ani eca Mungu ma agyi ada ri ru!