E’yo ewaru ma aleasi ’Ba Yehova ma E’yo Eti Nzepi ’Diyi ki eyi otu mbele adripi azini amvupi e’yo nderi ma alea ’diyi ma aza kozu. Otuta ’dile ’diyi leta ada ama eselea ri e’da. (Yohana 13:34, 35; 1 Yohana 3:17, 18) Geri amani azakoma fezu ri ngoni?

Ama sende fe. Ndra liki amboru ni ’dezu Yudea ria, Kristiani ndra oko Antiokia ’diyi ngaki afa feza fe Kristiani ’dale ’diyi ni. (’Yeta 11:27-30) ’Dinile indi akaki sawa driasi e’yo eri adripi amani pari azia ’diyi ma dria kini eyi e’yo ewaru ma alea, ama afa feza esele ndu ndu ’diyi fe ’ba ’diyi pini geri ongulumu amani ama okuzu ri vusi.—2 ’Ba Korintoa ’Diyi 8:13-15.

Ama azakoma fe ’yetasi. ’Ba mbazaru ovupi e’yo ewaru ’di ma alea indi riki e’do adripi azini amvupi dria dria ki nda lezu nizu kini ’ba dria eyi muke. Amuti azakoma feza otupiri ni vini nyaka, yi mvuza, bongo, azini aro ma ti pe. Adripi azini amvupi ecopi azi ngapi eyi ma drisi ra ’diyi vini oturu eyi ma ngulupi si muzu azakoma fezu Jo Kaini (Kingdom Hall) sizu jo ’bani lazu ri pie. Ti ecita azini otuta ama eselea ri ni fe ama afa azakoma fezu ’diyi otu mbele ’ba e’yo ewaru ma alea ’diyi ma aza kozu. Afekini lu azakoma “ori’ba a’ita ma alea ’diyi” ni a’dule ku, ama vini azakoma fe ’ba azi ’diyi ni indi ka ki tro ovu dini ndu ma alea ti.—’Ba Galatia ’Diyi 6:10.

Ama asi omiza fe E’yo Siza si. ’Ba e’yo ewaru ni isu ’diyi leki asi omiza ecekokoru. Sawa ewaru ’diyi ma alea, ama okpo isu engazu “Mungu asi omiza driani” ri vu. (2 ’Ba Korintoa ’Diyi 1:3, 4) Ama oyo soza kilili Biblia ma alea Suru Munguni rini ngazu rua suza azini ocoko dria dezu ri ma e’yo olu ’ba e’yo ewaru ma alea ’diyi ni.—E’yo Eceza 21:4.

• Afa fepi ’Ba Yehova ma E’yo Eti Nzepi ’Diyi ki azakoma fe mbele ’ba e’yo ewaru ma alea ’diyi pini ri a’du afa ni ya?

• Azakoma e’yo siza si amani eco fe ’ba ocoko ma alea ’diyi ni ri ngoni?