Timoteo ni ndra karile azi o’api ayikosi ’ba yi ma aza kozu risi ri i. Aci ndra pari kakau ma alea ’ba azi ’diyi ma aza kozu. ’Yeta erini ’disi, eri ndra sawa driasi ayikosi idri erini ma alea. Mi le e’yo oni eri ma dria ra ya?—

Timoteo zo ndra aku ambo omvele Lusitera ru ria. Erini ndra nga ovuzu odekua ru ria, eri ma idi Loisi pi eri ma andri Eunike be, e’doki eri imba Yehova ma dria. Timoteo ni zozu ’bo ri ma vutia, le di ndra vini ’ba yi ma aza ko e’yo onizu Yehova ma dria.

’Dini Timoteo ni nga ovuzu karile ru ria, Paulo nga eri zi le mu i be e’yo oluzu pari azi ’diyi ma alea ra ya ri ma dria.  Timoteo nga ’yo kini: ‘Ee!’ O’a ndra ava si muzu ’ba azi ’diyi ma aza kozu.

Timoteo nga mu Paulo be aku ambo Makedonia ni omvele Tesalonikia ria. Ecozu cazu ’dale, aci muzu pasi ri ndra izu vutinia eyi o’bo ayu cazu ’dale. Eyini di cazu ’dale ’bo ria, koki ’ba kakau ma aza e’yo onizu Yehova ma dria. Te ’ba azi ’diyi ngaki eca a’oko si dika leki ndra eyi ma idri fu ra. Coti Paulo pi Timoteo be ngaki mu e’yo olu pari nduni ma alea.

Mba were vutia, Paulo nga Timoteo ma ti pe muzu vule Tesalonikia kani adripi yi ’dale ngoni’ari nezu. Dri dazu ’dale aku ambo ’di ma alea ri le ndra asi mbaza ni! Te Timoteo mu ndra ra a’dusikuni ri ndra asisile dro adripi ’dale ’diyi ma dria tu. Nga dri eda Paulo vu o’duko muke be. Adripi Tesalonikia ’diyi woro kililiru!

Timoteo nga ndra azi okporu Paulo be eli kakau. O’du azini alu Paulo nga si kini Timoteo ni ’ba azi kilili ecopi ongulumu Kristiani ni ’diyi ma aza kopi rani a’dusikuni le Yehova i azini ’ba yi saaru.

Mi le ’ba yi saaru dika mi le eyi ma aza ko e’yo onizu Yehova ma dria ra ya?— Mi ka le ra, mi nga o’a idri mini ma alea ayiko si ekile Timoteo ni ndra o’azu rile!