IMBATA 8
Yosia Ma Agyi Yi Ndra Muke
Mini egarisi e’yo muke ri ’yezu ri ewaru ya?— ’Ba kakau yi ega ’dini. Biblia lu amani kini eri ndra e’yo azi ewaru ni karile azi alu omvele Yosia i rini e’yo muke ri ’yezu. Te eri vini ndra agyi muke eri ma aza kopi ra ’diyi pie. Ama ma oniki nga e’yo angiri Yosia ma dria agyi erini ’diyi pie.
Yosia ma ati ni ndra opi Yudaa omvele Amoni i. Amoni ni ndra ’ba onzi wura inzile inzi ’diyi inzipi ri. Yosia ma ati ka mu dra ’bo, Yosia nga eca opi Yudaa ri ru. Te eri ma eli ndra lu aro! Mini ega risi eri ndra ’ba onzi ati le ni ya?— Yo, ovuni eri le ku!
Zefania li ndra ’ba yi ma bilendu wura inzile inziri kuzu ja
Tro ndra erini ovuzu mva werea ni ra ti, Yosia le ndra Yehova ma ti eri. Ani pe ndra di lu ovuzu agyi ru ’ba Yehova ni lepi ’diyi pie a’dule. ’Ba nde ’diyi koki ndra Yosia ma aza e’yo muke ri ’yezu i. ’Ba ndra ovupi Yosia ma agyi ru ’diyi ma azi a’dipi ya?
Eri ma agyi alu ri ndra Zefania i. Zefania ni ndra nabi ’ba Yudaa ’diyi ma bilendu lipi kini kaki mu drile inzita wura inzile inzi ’diyi niri be, eyi nga panga isu ra ri i. Yosia eri e’yo Zefania ma tia, ani inzi Yehova ni i ovuni wura inzile inzi ’diyi ku.
Yosia ma agyi irizo ri ndra Yeremia i. Eyi ma eli ndra trotro dika zoki tualu enyia enyia pari alu ria. Eyi ndra agyi muke saaru ni, ani sawa Yosia ni drazu risi Yeremia nga imvo ongo si Yosia ma kore fu i ngopi’ari ma dria. Yeremia pi Yosia be koki ndra eyi ma aza eyi ma eselea e’yo kililiru ri ’yezu azini Yehova ma ti erizu.
Yeremia pi Yosia be koki ndra eyi ma aza eyi eselea e’yo kililiru ri ’yezu
E’yo mini eco oni Yosia vu ri ngoni?— Yosia ni tro ndra ovuzu agupiamva werea ni ti, le ndra e’yo muke ri ’ye i. Ni ndra ra le ima ovu agyi ru ’ba Yehova ni lepi ra ’diyi pie. ’Dini le mi ma pe mi agyi ru ’ba Yehova ni lepi azini ecopi mi aza kopi e’yo muke ’diyi ’yezu ’diyi a’dule!
