Yeˍsuˆ yawˇ ve awˬ laꞈ gʼawˇ hui htaꞈ awˬ tehˬ ve teˇ bon liˇ tiˉ maˍ piˇ ve yoˬ. Bon liˇ oˇ ve lehˬ, co co taiˍ taiˍ a shaꞈ teꞈ kuiˬ lo loꞈ˗e ve yaꞈ kʼaw teˇ caˆ htaꞈ shuˍ ve yoˬ. Yeˍsuˆ kʼoˆ ve, yaꞈ kʼaw oˇ ve htaꞈ “ca mawˬ leh loꞈ˗e ve chaw a ciˉ ceh tiˉ cawˬ ve yoˬ.” (Maꞈhtehˍ 7:14) Gʼuiˬ sha haꞈ yuˬ ve oˉ kʼoˍ pui ve teˇ ceuˬ tiˉ ve oˇ ve lehˬ, yawˇ ve tawˇ hkawˇ Liꞈ hpu htaꞈ cuˇ ve yoˬ. Awˬ tehˬ ve oˉ kʼoˍ pui ve chaw teˇ gʼaˇ le le yonˍ ve teˇ ceuˬ tiˉ awˬ hkʼaw lo hawˍ daꞈ ve yoˬ.—Yoˇhanˬ 4:23, 24; 14:6; Eˇfeˇsuꞈ 4:4, 5 gʼaw sheˍ.

 VDO nyi sheˍ Gʼuiˬ sha lehˬ bon liˇ teˇ maˬ le le htaꞈ haꞈ yuˬ˗aw laˇ?

 Yeˍsuˆ shaˍ tiꞈ piˇ taˍ ve, maˇ heˆ heˆ ve tcuh kaˍ paˍ lehˬ, Hkriꞈ yaˇ bon liˇ htaꞈ te luˬ ve yoˬ. Yawˇ hui awˬ htaꞈ hpawˇ nyi kʼo, awˬ tehˬ oˉ kʼoˍ pui ve chaw htaꞈ shuˍ ve yoˬ. Yawˇ hui ve bon yehˬ teˇ hpaˍ Hkriꞈ yaˇ ve yoˬ tehꞈ kʼoˆ ve yoˬ. Yaꞈ hkʼaˇ, oˇ hkʼe ve chaw awˬ tehˬ awˬ na hkʼaˬ hkʼe hpehꞈ ve htaꞈ nawˬ shiˍ gʼa ve yoˬ. Hkʼaˬ hkʼe shiˍ gʼa ve le. Awˬ tehˬ ve oˉ kʼoˍ pui ve teˇ ceuˬ ceh tiˉ ve oˇ ve lehˬ, awˬ tehˬ ve Hkriꞈ yaˇ cawˬ la ve yoˬ. Yawˇ hui ve te hkʼaˇ dawˇ hkʼaˇ htaꞈ nyi leh fuiˍ daꞈ gʼa ve yoˬ.—Maꞈhtehˍ 7:13-23 gʼaw sheˍ.

 Awˬ tehˬ ve Hkriꞈ yaˇ yoˬ tehꞈ awˬ heˆ ngaˇ ceuˬ chi htaꞈ chaˬ nyi sheˍ.

•    Awˬ tehˬ ve Hkriꞈ yaˇ lehˬ, Liꞈ hpu htaꞈ Gʼuiˬ sha ve tawˇ hkawˇ yoˬ tehꞈ shawˍ ve yoˬ. Yawˇ hui coˇ caˇ leh Liꞈ hpu hkʼaw ve awˬ liˇ awˬ hkʼaˇ awˬ hkʼaˇ suh a shaꞈ teꞈ ve yoˬ. Chi htaꞈ pa taw awˬ tehˬ ve bon liˇ lehˬ, chaw yaˇ ve dawˇ hkʼaˇ htaꞈ cuˇ ve bon liˇ htaꞈ peun daꞈ ve yoˬ. (Maꞈhtehˍ 15:7-9) Awˬ tehˬ ve oˉ kʼoˍ pui ve chaw teˇ ceuˬ kʼoˆ maˍ leh teˇ ceuˬ maˇ te.—Yoˇhanˬ 17:17; 2 Tiˆmoˉseˍ 3:16, 17 gʼaw sheˍ.

•   Yeˍsuˆ ve awˬ tehˬ ve awˬ laꞈ gʼawˇ hui Gʼuiˬ sha awˬ meh Yaˬhoˉvaˬ htaꞈ yawˆ yan ve yoˬ. Yeˍsuˆ Gʼuiˬ sha awˬ meh htaꞈ yawˆ yan leh shiˍ piˇ ve yoˬ. Yawˇ lehˬ, Gʼuiˬ sha htaꞈ shiˍ daꞈ tuˬ shu htaꞈ ga piˇ leh, Gʼuiˬ sha awˬ meh htaꞈ yawˆ yan piˇ lawˬ˗oꞈ tehꞈ bon lawˬ tuˬ maˍ piˇ ve yoˬ. (Maꞈhtehˍ 6:9) Nawˬ chehˇ kuiˬ lo hkʼaˬ teˇ bon liˇ Gʼuiˬ sha awˬ meh htaꞈ shiˍ piˇ chehˇ ve le.—Yoˇhanˬ 17:26; Roˉmaꞈ 10:13, 14 gʼaw sheˍ.

•   Awˬ tehˬ ve Hkriꞈ yaˇ Gʼuiˬ sha ve mvuhˇ miˬ awˬ lawn hto toˇ ve yoˬ. Gʼuiˬ sha ve mvuhˇ miˬ awˬ lawn sha tanˇ maˍ tuˬ awˬ pon, Gʼuiˬ sha lehˬ Yeˍsuˆ htaꞈ peu laˇ ve yoˬ. Chaw yaˇ ve dawˇ law kuiˬ Gʼuiˬ sha ve mvuhˇ miˬ teˇ maˬ tiˉ cawˬ ve yoˬ. Awˬ lawn chi ve htaꞈ Yeˍsuˆ suh htaˇ hkʼa gaˬ kʼoˆ chehˇ ve yoˬ. (Luˉkaꞈ 4:43; 8:1; 23:42, 43) Awˬ lawn oˇ ve htaꞈ yawˇ ve awˬ laꞈ gʼawˇ hui hto toˇ tuˬ yoˬ tehꞈ yawˇ kʼoˆ ve yoˬ. Chaw teˇ gʼaˇ nawˬ geh laˬ leh Gʼuiˬ sha ve mvuhˇ miˬ awˬ lawn hto laˇ ve kʼo, yawˇ hkʼaˬ teˇ bon liˇ hkʼaw chehˇ ve hehˉ le.—Maꞈhtehˍ 24:14 gʼaw sheˍ.

•   Yeˍsuˆ ve awˬ laꞈ gʼawˇ hui haiˬ ve miˬ guiˬ awˬ liˇ htaꞈ maˇ caˉ daꞈ. Yawˇ hui mvuhˇ miˬ hpawˇ kanˉ leh maˇ cawˇ maˇ hawˍ daꞈ ve awˬ ceuˬ htaꞈ maˇ caˉ daꞈ ve pa taw, nawˬ nyi leh fuiˍ daꞈ gʼa ve yoˬ. (Yoˇhanˬ 17:16) Miˬ guiˬ ve awˬ liˇ luˬ ve sheˆ ve dawˇ hkʼaˇ awˬ hkʼaˇ suh yawˇ hui maˇ gʼaꞈ te.—Yaˍkoˆ 4:4 gʼaw sheˍ.

•   Awˬ tehˬ ve Hkriꞈ yaˇ awˬ tehˬ awˬ na haꞈ daꞈ puiˉ ve yoˬ. Yawˇ hui Gʼuiˬ sha ve tawˇ hkawˇ htaꞈ henˇ ve pa taw, chaw ceuˬ teˇ ceuˬ le le htaꞈ yawˆ yan ve yoˬ. Mvuhˇ miˬ teˇ peˆ leh teˇ peˆ bawˆ daꞈ tuˬ bon liˇ awˬ kehˆ laiˉ pawˆ awˬ gʼaˇ piˇ ve htawˇ, awˬ tehˬ oˉ kʼoˍ pui ve chaw maˇ te. (Miˆhkaˍ 4:1-3) Yaꞈ hkʼaˇ, shu htaꞈ ga piˇ leh awˬ gʼaˇ piˇ tuˬ awˬ pon, awˬ tehˬ ve Hkriꞈ yaˇ lehˬ a shu yawˇ ve hpu shi mawˇ jeˬ leh awˬ yanˇ yehˇ ve yoˬ.—Yoˇhanˬ 13:34, 35; 1 Yoˇhanˬ 4:20 gʼaw sheˍ.

 Gʼuiˬ sha awˬ meh htaꞈ yawˆ yan ve, chaw yaˇ dawˇ law kuiˬ teˇ maˬ tiˉ Gʼuiˬ sha ve mvuhˇ miˬ awˬ lawn hto toˇ ve, leh maˍ hkawˇ hkʼa peu˗eˬ Gʼuiˬ sha ve tawˇ hkawˇ htaꞈ cuˇ ve, chi teˇ hpaˍ htaꞈ hkʼaˬ ve teˇ bon liˇ te chehˇ ve le. Maꞈ htaꞈ maˇ ca caˉ daꞈ leh haꞈ daꞈ puiˉ ve hkʼaˬ teˇ moˍ cawˬ ve le. Nawˬ hkʼaˬ hkʼe dawˇ le.—1 Yoˇhanˬ 3:10-12 gʼaw sheˍ.