Teˇ bon liˇ le le nyi ma hteˇ ve chaw cawˬ ve yoˬ. Gʼuiˬ sha chaw oˇ ve teˇ hpaˍ htaꞈ mawˬ leh, dawˇ nyi piˇ puiˉ ve yoˬ. Chi lehˬ, daꞈ ve awˬ lawn sha tanˇ hpehꞈ ve yoˬ. Yaꞈ hkʼaˇ, haiˬ ve awˬ ceuˬ te tuˬ chaw teˇ hpaˍ hpaˍ bon liˇ htaꞈ awˉ ve pa taw nyi ma luˬ lawꞈ lawꞈ cawˬ ve yoˬ. (2 Kawˇrenˍhtuˆ 4:3, 4; 11:13-15) Awˬ haiˬ te ve, maꞈ bawˆ ve, chaw ceuˬ te mehˍ piˇ ve, leh yaˇ ehˉ htaꞈ hkʼa mvuhˇ hkʼa na te ve htawˇ, bon liˇ teˇ hpaˍ hpaˍ caˉ daꞈ ve yoˬ tehꞈ sha tanˇ tawˆ chehˇ ve yoˬ. Chi hkʼe te ve teˇ ceuˬ lehˬ, Gʼuiˬ sha htaꞈ awˬ tehˬ awˬ na yonˍ ve chaw nyi ma hkʼaˬ ma luˬ tuˬ te ve le.—Maꞈhtehˍ 24:3-5, 11, 12 gʼaw sheˍ.

 Awˬ tehˬ ve bon liˇ Gʼuiˬ sha htaꞈ chiˇ mvuh ve teˇ yanˇ, bon liˇ awˬ kehˆ lehˬ, Gʼuiˬ sha nyi hkʼaˇ maˇ suh tuˬ te piˇ chehˇ ve yoˬ. Bon liˇ awˬ kehˆ lehˬ, Gʼuiˬ sha awˬ lawn maˇ kʼoˆ, suh peuˬ ve chaw awˬ lawn maˇ kʼoˆ, leh awˬ kaˍ awˬ nu awˬ lawn htaꞈ maˍ ve dawˇ hkʼaˇ Liꞈ hpu hkʼaw maˇ cawˬ. Yaꞈ hkʼaˇ, Yaˬhoˉvaˬ lehˬ yawˇ htaꞈ caˉ daꞈ ve awˬ tehˬ ve awˬ lawn chaw yaˇ htaꞈ shiˍ tcuh gaˇ ve yoˬ.—Iˉsaˍyaˆ 26:19; 1 Tiˆmoˉseˍ 2:3-5 gʼaw sheˍ.

 Nyi ma sha tuˬ cawˬ ve yoˬ. Gʼuiˬ sha htaꞈ haꞈ ve yoˬ tehꞈ kʼoˆ ve bon liˇ lehˬ, Saˍtanˍ ve miˬ guiˬ awˬ liˇ htaꞈ haꞈ ve kʼo, Gʼuiˬ sha nyi hkʼaˇ suh tuˬ ve maˇ heˆ. (Yaˍkoˆ 4:4) Gʼuiˬ sha ve Tawˇ hkawˇ hkʼaw bon liˇ awˬ kehˆ hkʼa peu˗eˬ htaꞈ “Uiˍ ve Baˍbuˍlonˍ venˇ” tehꞈ kuˬ ve yoˬ. Awˉ lawˉ htaˇ, Noˉaꞈ awˬ co˗e Iˉ kaˆ htonˍ peuˬ hkʼawꞈ nawˉ, Baˍbuˍlonˍ lehˬ bon liˇ awˬ kehˆ tanˬ tawˆ la kuiˬ venˇ hpehꞈ ve yoˬ. Maˇ maw kʼo, Gʼuiˬ sha lehˬ chaw yaˇ htaꞈ heˍ leh nyiˉ piˇ ve bon liˇ awˬ kehˆ htaꞈ teˇ hkui tiˉ te mehˉ peuˬ tuˬ yoˬ.—Hpeuꞈ maˍ ve 17:1, 2, 5, 16, 17; 18:8 gʼaw sheˍ.

 Daꞈ ve awˬ lawn sha tanˇ kʼawꞈ cawˬ sheˍ. Miˬ guiˬ hkʼoˆ bon liˇ awˬ kehˆ hkʼaw chehˇ ve nyi ma hteˇ ve chaw htaꞈ Yaˬhoˉvaˬ maˇ leunˇ. Awˬ tehˬ ve teˇ ceuˬ yawˇ lehˬ, yawˇ hui htaꞈ maˍ piˇ leh yawˇ hui nyi ma teˇ shiˍ tiˉ hpehꞈ la piˇ ve yoˬ.—Miˆhkaˍ 4:2, 5 gʼaw sheˍ.

 Awˬ tehˬ ve leh daꞈ ve htaꞈ haꞈ ve chaw awˬ pon Yaˬhoˉvaˬ dawˇ nyi piˇ ve yoˬ. Bon liˇ awˬ kehˆ htaꞈ baˬ taˉ tuˬ yawˇ yawˇ hui htaꞈ shaˍ tiꞈ piˇ ve yoˬ. Gʼuiˬ sha htaꞈ haꞈ ve chaw yawˇ nyi hkʼaˇ suh tuˬ, a shu yawˇ hkʼaˇ yawˇ a shaꞈ teꞈ hkʼaˇ ha lehˬ ha kʼa kʼawꞈ gu daꞈ la piˇ ve yoˬ.—Hpeuꞈ maˍ ve 18:4 gʼaw sheˍ.

 Hkriꞈ yaˇ awˉ lawˉ teˇ co˗e htaˇ, nyi ma hteˇ ve chaw tcuh yaˇ hui geh daꞈ ve awˬ lawn sha tanˇ gʼa kaˇ htaˇ, yawˇ hui ha lehˬ ve yoˬ. Yawˇ hui Yaˬhoˉvaˬ geh a shaꞈ teꞈ hkʼaˇ awˬ suhˉ gʼa henˇ ve yoˬ. Tcuhˉ kuiˬ leh dawˇ law kuiˬ cawˬ ve a shaꞈ teꞈ hkʼaˇ oˇ ve maˇ maˇ ha lehˬ tuˬ te piˇ ve yoˬ. Yawˇ hui lehˬ, chi beuꞈ teˇ co˗e ngaˬ hui awˬ pon henˇ yuˬ tuˬ hpehꞈ ve yoˬ. Awˬ lawn kʼo, yawˇ hui daꞈ ve awˬ lawn sha tanˇ haꞈ yuˬ htaˇ, yawˇ hui a shaꞈ teꞈ kuiˬ hkʼaw lo Yaˬhoˉvaˬ a yeˇ uiˍ jaˇ ve yoˬ tehꞈ shawˍ ve yoˬ.—1 Hteˇsaˍlawˇniˆ 1:8, 9; 2:13 gʼaw sheˍ.

 Bon liˇ awˬ kehˆ hkʼaw tawˆ la ve chaw htaꞈ Yaˬhoˉvaˬ haꞈ yuˬ leh, yawˇ htaꞈ oˉ kʼoˍ pui ve yehˬ kʼa hkʼaw loꞈ la tcuh ve yoˬ. Yaˬhoˉvaˬ kuˬ laˇ ve hkawˇ htaꞈ haꞈ yuˬ ve kʼo, yawˇ lehˬ nawˬ ve awˬ chawˇ hpehꞈ la ve yoˬ. Yaˬhoˉvaˬ htaꞈ haꞈ pehnˇ ve hkʼa biˇ cawˬ ve oˉ kʼoˍ pui ve chaw nawˬ ve yehˬ kʼa suhˉ hpehꞈ la leh, nawˬ co co taiˍ taiˍ a shaꞈ gʼa tuˬ yoˬ.—Maˍkuˆ 10:29, 30; 2 Kawˇrenˍhtuˆ 6:17, 18 gʼaw sheˍ.

 Bon liˇ awˬ kehˆ htaꞈ suhˉ jehˬ ve teˇ ceuˬ laˬ chehˇ ve lehˬ, daꞈ ve awˬ lawn sha tanˇ hpehꞈ ve yoˬ. Miˬ guiˬ hkʼa peu˗eˬ hkʼoˆ fawˉ mehˍ ve htaꞈ gʼa hkanˍ chehˇ ve chaw hui htaꞈ ponˬ piˇ tuˬ yoˬ. Bon liˇ awˬ kehˆ chaw yaˇ htaꞈ awˬ moˍ awˬ moˍ pehˬ leh, sheh yaꞈ tuˬ awˬ yanˇ kʼawꞈ cawˬ tuˬ ve maˇ heˆ. Hkʼa chehˇ taˍ ve chaw nyi ma teˇ shiˍ tiˉ awˬ hkʼaw lo awˬ tehˬ awˬ na Gʼuiˬ sha teˇ gʼaˇ htaꞈ ceh tiˉ oˉ kʼoˍ pui tuˬ yoˬ.—Hpeuꞈ maˍ ve 18:20, 21; 21:3, 4 gʼaw sheˍ.