Gʼuiˬ sha ve mvuhˇ miˬ lehˬ, mvuhˇ naw ma hkʼoˆ uˉ peunˍ ve awˬ moˍ hpehꞈ ve yoˬ. Uˉ peunˍ ve awˬ moˍ chi ve awˬ nu ve uˉ peunˍ ve awˬ moˍ teˇ hpaˍ awˬ tan uˉ peunˍ leh, Gʼuiˬ sha ve a loˍ mvuhˇ naw ma hkʼoˆ leh miˬ guiˬ hkʼoˆ te biˇ piˇ tuˬ yoˬ. Gʼuiˬ sha ve mvuhˇ miˬ awˬ lawn sha tanˇ daꞈ ve teˇ ceuˬ hpehꞈ ve yoˬ. Maˇ maw kʼo, Gʼuiˬ sha ve mvuhˇ miˬ chaw yaˇ loˍ ve daꞈ ve uˉ peunˍ ve awˬ moˍ hpehꞈ tuˬ yoˬ. Miˬ guiˬ hkʼoˆ chehˇ ve chaw hkʼa peu˗eˬ htaꞈ hawˍ daꞈ puiˉ tuˬ te piˇ tuˬ yoˬ.—Daˍyeˍlaˆ 2:44; Maꞈhtehˍ 6:9, 10; 24:14 gʼaw sheˍ.

 Yaˬhoˉvaˬ Gʼuiˬ sha ve mvuhˇ miˬ hkʼaw, yawˇ ve Yaˇ hpu Yeˍsuˆ Hkriꞈ htaꞈ Hkunˉ hawˉ hkanˇ te tcuh ve yoˬ.—Hpeuꞈ maˍ ve 11:15 gʼaw sheˍ.

 VDO nyi sheˍ Gʼuiˬ sha ve mvuhˇ miˬ lehˬ aˬ htoꞈ ma le?

 Gʼuiˬ sha ve Yaˇ hpu Hkunˉ hawˉ hkanˇ te keunˍ jaˇ ve yoˬ. Awˬ lawn kʼo yawˇ nyi ma daꞈ leh, hteˇ cawˇ ve hpawˇ yeˬ chehˇ ve yoˬ. (Maꞈhtehˍ 11:28-30) Yeˍsuˆ lehˬ, mvuhˇ naw ma hkʼoˆ chehˇ leh miˬ guiˬ hkʼoˆ uˉ peunˍ tuˬ ve pa taw, chaw yaˇ htaꞈ ga piˇ tuˬ kanˇ paˆ cawˬ ve yoˬ. Chi htaꞈ pa taw teꞈ tu la peuˬ hkʼawꞈ nawˉ, yawˇ mvuhˇ naw ma hkʼoˆ taˆ˗e leh Gʼuiˬ sha ve laꞈ sha paˉ lo mui law taˍ ve yoˬ. (Heˍbrehˇ 10:12, 13) Awˬ leh meuˇ gaˬ leh, yawˇ tanˬ uˉ peunˍ tuˬ Gʼuiˬ sha yawˇ htaꞈ kanˇ paˆ aꞈ piˇ ve yoˬ.—Daˍyeˍlaˆ 7:13, 14 gʼaw sheˍ.

 Yeˍsuˆ geh mvuhˇ naw ma hkʼoˆ uˉ peunˍ tuˬ “daꞈ kehˬ ve chaw hui” tehꞈ meh ve teˇ moˍ cawˬ ve yoˬ. (Daˍyeˍlaˆ 7:27, MGS) Awˉ lawˉ leuˆ yuˬ ve daꞈ kehˬ ve chaw hui lehˬ, ka tiꞈ yeˬ ve Yeˍsuˆ ve tcuh yaˇ hpehꞈ ve yoˬ. Daꞈ kehˬ ve chaw hui hawˉ hkʼaˆ yaˇ miˇ htaꞈ chi beuꞈ hkʼa gaˬ Yaˬhoˉvaˬ leuˆ yuˬ chehˇ sheˍ ve yoˬ. Yeˍsuˆ hkʼa shuˍ yawˇ hui htaꞈ awˬ ha ve awˬ to teꞈ tu la piˇ ve yoˬ.—Yoˇhanˬ 14:1-3; 1 Kawˇrenˍhtuˆ 15:42-44 gʼaw sheˍ.

 Mvuhˇ naw ma hkʼoˆ taˆ˗e ve chaw hkʼaˬ nyiˇ gʼaˇ cawˬ ve le. Yeˍsuˆ yawˇ hui htaꞈ “i ve yawˬ teˇ moˍ” tehꞈ kuˬ ve yoˬ. (Luˉkaꞈ 12:32) Biˇ la htaˇ 144,000 gʼaˇ cawˬ tuˬ yoˬ. Yawˇ hui Yeˍsuˆ geh miˬ guiˬ hkʼoˆ uˉ peunˍ tuˬ yoˬ.—Hpeuꞈ maˍ ve 14:1 gʼaw sheˍ.

 Gʼuiˬ sha ve mvuhˇ miˬ lehˬ, 1914 hkʼawꞈ htaˇ tanˬ uˉ peunˍ ve yoˬ. a Yeˍsuˆ Hkunˉ hawˉ hkanˇ tanˬ te htaˇ, awˉ lawˉ te ve teˇ ceuˬ lehˬ Saˍtanˍ leh yawˇ ve neˇ hui htaꞈ miˬ guiˬ hkʼoˆ gʼaꞈ ce la piˇ ve yoˬ. Saˍtanˍ nyi ma zuhˆ jaˇ leh, miˬ guiˬ hkʼoˆ tuꞈ hkanˍ ve awˬ ceuˬ te ve yoˬ. (Hpeuꞈ maˍ ve 12:7-10, 12) Oˇ htaˇ tanˬ leh, chaw yaˇ kawˆ tuˬ dawˇ haˍ tuˬ cawˬ maˇ la ve yoˬ. Maꞈ keuˆ ve, meuꞈ ve kaˆ ve, naˬ beuˬ, leh miˬ hiˆ ve chi teˇ hpaˍ lehˬ maˇ maw kʼo, Gʼuiˬ sha ve mvuhˇ miˬ lehˬ miˬ guiˬ hkʼoˆ tanˬ uˉ peunˍ tuˬ ve “awˬ heˆ” hpehꞈ ve yoˬ.—Luˉkaꞈ 21:7, 10, 11, 31 gʼaw sheˍ.

 Gʼuiˬ sha ve mvuhˇ miˬ lehˬ, miˬ guiˬ hkʼa peu˗eˬ hkʼoˆ hto toˇ chehˇ ve kanˉ htaꞈ cuˇ leh, chaw ceuˬ teˇ ceuˬ le le hkʼaw laˬ ve chaw awˬ moˍ lonˉ htaꞈ cawˇ daꞈ hawˍ daꞈ tuˬ te chehˇ˗oˬ ve yoˬ. Nyi ma nuˇ nehˬ ve chaw laiˉ lanˬ gʼaˇ Yeˍsuˆ ve mvuhˇ miˬ yaˇ hpehꞈ la chehˇ ve yoˬ. Miˬ guiˬ hkʼoˆ haiˬ ve chi teˇ co˗e htaꞈ Gʼuiˬ sha te luˬ htaˇ, yawˇ hui htaꞈ haꞈ shaˉ piˇ tuˬ yoˬ. Hkʼe te leh, Gʼuiˬ sha ve mvuhˇ miˬ ve awˬ bon htaꞈ gʼa gaˇ ve chaw teˇ gʼaˇ le le, na yuˬ ve awˬ hkʼaw lo Yeˍsuˆ ve mvuhˇ miˬ yaˇ hpehꞈ la tuˬ henˇ shiˍ cawˇ ve yoˬ.—Hpeuꞈ maˍ ve 7:9, 14, 16, 17 gʼaw sheˍ.

 Awˬ hkuiˉ puiˍ htaˇ chaw yaˇ awˬ pon Gʼuiˬ sha dawˇ law taˍ ve hkʼe 1,000 hkʼawꞈ awˬ kaˍ lo, Gʼuiˬ sha ve mvuhˇ miˬ te biˇ tuˬ yoˬ. Miˬ guiˬ hkʼa peu˗eˬ hkʼoˆ paˍraˍdiˇsuˆ hko hpehꞈ tuˬ yoˬ. Awˬ leh meuˇ htaˇ, Yeˍsuˆ Awˬ pa htaꞈ Mvuhˇ miˬ chiˇ aꞈ piˇ tuˬ yoˬ. (1 Kawˇrenˍhtuˆ 15:24-26) Gʼuiˬ sha ve mvuhˇ miˬ awˬ lawn nawˬ hto piˇ gaˇ ve chaw teˇ gʼaˇ gʼaˇ cawˬ˗aw laˇ.—Chiˇ mvuh ve 37:10, 11, 29 gʼaw sheˍ.