AWˬ LAWN 2
Gʼuiˬ sha lehˬ A shu le
1. Aˬ htoꞈ ma pa taw ngaˬ hui Gʼuiˬ sha htaꞈ oˉ kʼoˍ pui cawˇ ve le?
Awˬ tehˬ awˬ na Gʼuiˬ sha lehˬ, teˇ ceuˬ le le htaꞈ Te hpanˍ shehˍ hpaˇ hpehꞈ ve yoˬ. Yawˇ awˬ hkuiˉ puiˍ kaꞈ awˬ leh meuˇ kaꞈ maˇ cawˬ. (Chiˇ mvuh ve 90:2) Liꞈ hpu hkʼaw cawˬ ve daꞈ ve awˬ lawn sha tanˇ yawˇ geh laˬ ve yoˬ. (1 Tiˆmoˉseˍ 1:11) Gʼuiˬ sha ngaˬ hui htaꞈ a shaꞈ peꞈ laˇ ve pa taw, yawˇ teˇ gʼaˇ htaꞈ ceh tiˉ oˉ kʼoˍ pui cawˇ ve yoˬ.—Hpeuꞈ maˍ ve 4:11 gʼaw sheˍ.
2. Gʼuiˬ sha hkʼaˬ hkʼe cawˬ ve le?
Chaw teˇ gʼaˇ kaꞈ Gʼuiˬ sha htaꞈ maˇ mawˬ jaw. Awˬ lawn kʼo, yawˇ awˬ ha hpehꞈ ve yoˬ. Tcuhˉ kuiˬ lehˬ, miˬ guiˬ hkʼoˆ a shaꞈ teꞈ ve hkʼa peu˗eˬ aꞈ kehˉ yawˇ mvuh jaˇ ve yoˬ. (Yoˇhanˬ 1:18; 4:24) Yaꞈ hkʼaˇ, hpanˍ taˍ ve awˬ ceuˬ htaꞈ mawˬ kʼo, yawˇ ve awˬ hoꞈ awˬ han te hkʼaˇ dawˇ hkʼaˇ htaꞈ shiˍ hpehꞈ ve yoˬ. Tawˇ pa haˉ te kʼo, yawˇ cuˇ yiˍ leh haꞈ pehnˇ ve cawˬ ve yoˬ tehꞈ, iˉ shiˍ suhˉ veˆ laiˉ ceuˬ maw laˇ ve yoˬ. Yawˇ ve kanˇ paˆ uiˍ jaˇ ve yoˬ tehꞈ kʼehˬ jaˇ ve mvuhˇ naw ma miˬ naˆ ma hpeuꞈ maw laˇ ve yoˬ.—Roˉmaꞈ 1:20 gʼaw sheˍ.
Gʼuiˬ sha ve awˬ hoꞈ awˬ han te hkʼaˇ dawˇ hkʼaˇ htaꞈ leuˉ leh henˇ shiˍ hpehꞈ tuˬ ngaˬ hui Liꞈ hpu gʼa gʼaw ve yoˬ. Gʼuiˬ sha dawˇ cawˇ leh maˇ dawˇ cawˇ ve awˬ ceuˬ, yawˇ shu htaꞈ te piˇ ve awˬ hkʼaˇ leh, hpehꞈ la ve awˬ lawn teˇ hpaˍ htaꞈ yawˇ te hkʼawꞈ ve awˬ hkʼaˇ Liꞈ hpu ngaˬ hui htaꞈ hto laˇ ve yoˬ.—Chiˇ mvuh ve 103:7-10 gʼaw sheˍ.
3. Gʼuiˬ sha awˬ meh cawˬ ve laˇ?
Yeˍsuˆ kʼoˆ ve, “Mvuhˇ naw ma hkʼoˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ.” (Maꞈhtehˍ 6:9) Gʼuiˬ sha aˉ yaˇ laiˉ ceuˬ cawˬ htawˇ, awˬ meh teˇ meh tiˉ cawˬ ve yoˬ. Teˇ chaw ceuˬ leh teˇ chaw ceuˬ ve tawˇ hkawˇ awˬ meh oˇ ve awˬ hkawˇ tawˆ la ve maˇ shuˍ daꞈ. Laˇhuˍ hkawˇ kʼo, “Yaˬhoˉvaˬ” kʼoˆ ve yoˬ. (Chiˇ mvuh ve 83:18, MGS) Hpeuꞈ maˍ ve liꞈ 19:6 hkʼaw “Haˍleˍluˇyaˬ” tehꞈ kʼoˆ ve tcuhˉ kuiˬ lehˬ, Yaˬ maˇ heˆ leh Yaˬhoˉvaˬ htaꞈ chiˇ mvuh˗o tehꞈ kʼoˆ gaˇ ve yoˬ.
Liꞈ hpu laiˉ daw awˬ hkʼaw lo Gʼuiˬ sha awˬ meh yuˬ baˬ leh, Jawˇmawˇ maˇ heˆ kʼo Gʼuiˬ sha yuˬ keu ve yoˬ. Yaꞈ hkʼaˇ Liꞈ hpu bvuhꞈ htaˇ, Gʼuiˬ sha awˬ meh aˬ laˬ hkʼe 7,000 pawˆ cawˬ ve yoˬ. Yeˍsuˆ Gʼuiˬ sha awˬ lawn maˍ htaˇ, chaw yaˇ htaꞈ Gʼuiˬ sha awˬ meh shiˍ piˇ ve yoˬ.—Yoˇhanˬ 17:26 gʼaw sheˍ.
VDO nyi sheˍ Gʼuiˬ sha awˬ meh cawˬ˗ aw laˇ?
4. Yaˬhoˉvaˬ ngaˬ hui awˬ pon dawˇ nyi puiˉ ve laˇ?
Haꞈ pehnˇ ve hkʼa biˇ cawˬ ve awˬ pa chi teˇ gʼaˇ hkʼa shuˍ, hkʼaˬ htaˆ kaꞈ ngaˬ hui awˬ bon gʼa tuˬ Gʼuiˬ sha te ve yoˬ.
Tuꞈ ve hkanˍ ve cawˬ maˇ jaˇ ve oˇ ve lehˬ, Yaˬhoˉvaˬ ngaˬ hui awˬ pon maˇ dawˇ nyi puiˉ ve Gʼuiˬ sha hpehꞈ ve yoˬ tehꞈ kʼoˆ gaˇ ve laˇ? Ngaˬ hui htaꞈ lawˇ nyi laˇ tuˬ awˬ pon Gʼuiˬ sha tuꞈ hkanˍ tcuh laˇ ve yoˬ tehꞈ chaw teˇ hpaˍ hpaˍ kʼoˆ ve awˬ tehˬ maˇ heˆ.—Yaˍkoˆ 1:13 gʼaw sheˍ.
Gʼuiˬ sha chaw yaˇ htaꞈ awˬ meꞈ awˬ hponˇ cawˬ piˇ ve awˬ hkʼaw lo a shu yawˇ hkʼaˇ yawˇ awˬ to awˬ pon leuˆ yuˬ tuˬ hpehˇ piˇ taˍ ve yoˬ. Gʼuiˬ sha kanˉ te tuˬ ngaˬ hui hkʼaˇ ngaˬ hui leuˆ yuˬ tuˬ hpehˇ laˇ ve teˇ ceuˬ awˬ hpfuhˇ hkʼaˆ ve maˇ heˆ laˇ? (Yawˇsuˆ 24:15) Yaꞈ hkʼaˇ, maˇ daꞈ ve awˬ ceuˬ shu htaꞈ te piˇ tuˬ laiˉ gʼaˇ leuˆ yuˬ ve yoˬ. Chi htaꞈ pa taw laiˉ gʼaˇ tuꞈ hkanˍ jaˇ. Maˇ hteˇ maˇ cawˇ ve awˬ ceuˬ chi htaꞈ mawˬ htaˇ, Gʼuiˬ sha nyi ma naˬ ve yoˬ.—Awˬ hkuiˉ puiˍ 6:5, 6 gʼaw sheˍ.
Yaˬhoˉvaˬ lehˬ, ngaˬ hui awˬ pon dawˇ nyi puiˉ ve Gʼuiˬ sha hpehꞈ ve yoˬ. Ngaˬ hui chehˇ sha pyawˍ sha tuˬ yawˇ heuˆ gaˇ ve yoˬ. Maˇ maw kʼo, shu htaꞈ tuꞈ hkanˍ piˇ ve chaw leh tuꞈ ve hkanˍ ve awˬ ceuˬ hkʼa peu˗eˬ htaꞈ yawˇ te luˬ tuˬ yoˬ. Tinˍ taˍ ve awˬ nyi oˇ ve hkʼa gaˬ, tuꞈ hkanˍ ve htaꞈ maˇ hehꞈ hkehnˉ ve pa taw awˬ bon cawˬ ve yoˬ. Aˬ htoꞈ ma awˬ bon cawˬ tuˬ, henˇ yuˬ tuˬ 8 awˬ hkʼaw lo cawˬ ve yoˬ.—2 Peˍtruˆ 2:9; 3:7, 13 gʼaw sheˍ.
5. Gʼuiˬ sha htaꞈ meuˆ daꞈ maˇ la tuˬ ngaˬ hui hkʼaˬ hkʼe te tuˬ le?
Ngaˬ hui Yaˬhoˉvaˬ htaꞈ meuˆ daꞈ tuˬ yawˇ geh bon lawˬ hpehꞈ ve yoˬ. Yawˇ lehˬ, ngaˬ hui teˇ gʼaˇ leh teˇ gʼaˇ htaꞈ dawˇ nyi laˇ ve yoˬ. (Chiˇ mvuh ve 65:2; 145:18) Yawˇ lehˬ, ha lehˬ ha kʼa venˇ baˆ hpehˇ laˇ ve yoˬ. Yawˇ nyi hkʼaˇ suh tuˬ coˇ caˇ leh te ve awˬ hkʼaw lo teˇ pawˆ pawˆ te maˇ gʼa ve htawˇ, ngaˬ hui coˇ caˇ ve htaꞈ yawˇ mawˬ ve yoˬ. Chi htaꞈ pa taw, ngaˬ hui maˇ biˇ maˇ lawꞈ ve htawˇ, Gʼuiˬ sha htaꞈ awˬ tehˬ awˬ na meuˆ daꞈ gʼa ve yoˬ.—Chiˇ mvuh ve 103:12-14; Yaˍkoˆ 4:8 gʼaw sheˍ.
Yaˬhoˉvaˬ ngaˬ hui htaꞈ a shaꞈ peꞈ laˇ ve pa taw, yawˇ htaꞈ shu aꞈ kehˉ haꞈ cawˇ ve yoˬ. (Maˍkuˆ 12:30) Gʼuiˬ sha htaꞈ haꞈ tuˬ, yawˇ ve awˬ lawn henˇ shiˍ maˇ la leh yawˇ lawˬ ve hkʼe shaˬ te shaˬ nawˬ yawˇ htaꞈ shaˬ meuˆ daꞈ maˇ la tuˬ yoˬ.—1 Tiˆmoˉseˍ 2:4; 1 Yoˇhanˬ 5:3 gʼaw sheˍ.
