Saˍtanˍ awˉ lawˉ heˍ htaˇ kaꞈ te leh, miˬ guiˬ hkʼoˆ haiˬ ve awˬ ceuˬ tanˬ cawˬ la ve yoˬ. Awˬ hkuiˉ puiˍ htaˇ kʼo, Saˍtanˍ lehˬ biˇ jaˇ ve mvuhˇ naw ma tcuh yaˇ hpehꞈ ve yoˬ. Yaꞈ hkʼaˇ yawˇ lehˬ, “hteˇ ve cawˇ ve awˬ hkʼaw lo” maˇ yeˬ chehˇ. (Yoˇhanˬ 8:44) Gʼuiˬ sha gʼa cawˇ ve oˉ kʼoˍ pui ve teˇ ceuˬ htaꞈ Saˍtanˍ heuˆ gaˇ ve yoˬ. Gʼuiˬ sha htaꞈ chiˇ baˬ leh Saˍtanˍ hkawˇ na yuˬ laˇ tuˬ, yawˇ lehˬ yaˇ miˇ awˉ lawˉ teˇ gʼaˇ Eˇvaꞈ htaꞈ beˬ ve yoˬ. Eˇvaꞈ geh Aˍdanˍ kaꞈ Gʼuiˬ sha hkawˇ maˇ na yuˬ. Aˍdanˍ chi hkʼe dawˇ cheˆ ve pa taw, tuꞈ hkanˍ ve leh suh ve teˇ ceuˬ gaˬ la ve yoˬ.—Awˬ hkuiˉ puiˍ 3:1-6, 19 gʼaw sheˍ.

 Eˇvaꞈ Gʼuiˬ sha hkawˇ maˇ na yuˬ tuˬ Saˍtanˍ dawˇ hkʼaˇ piˇ htaˇ, Gʼuiˬ sha uˉ peunˍ keunˍ ve uiˍ jaˇ mvuh jaˇ ve aˉ yaˇ htaꞈ yawˇ hpfuhˆ ve yoˬ. Chaw yaˇ maˇ˗awˍ ve Saˍtanˍ geh teˇ geh Gʼuiˬ sha uˉ peunˍ shehˍ hpaˇ hpehꞈ ve htaꞈ maˇ haꞈ yuˬ. Hkʼe te leh, Saˍtanˍ “chi miˬ guiˬ htaꞈ uˉ peunˍ shehˍ hpaˇ” hpehꞈ la ve yoˬ.—Yoˇhanˬ 14:30; 1 Yoˇhanˬ 5:19 gʼaw sheˍ.

 Gʼuiˬ sha ve kanˉ teˇ ceuˬ le le biˇ jaˇ. Gʼuiˬ sha hpanˍ taˍ ve chaw yaˇ leh mvuhˇ naw ma tcuh yaˇ yawˇ hkawˇ htaꞈ hkʼa biˇ na yuˬ hpehꞈ ve yoˬ. (Bon maˍ ve 32:4, 5) Gʼuiˬ sha ngaˬ hui htaꞈ hpanˍ taˍ htaˇ, daꞈ ve leh maˇ daꞈ ve htaꞈ leuˆ te tuˬ hpehˇ laˇ ve yoˬ. A shu yawˇ hkʼaˇ yawˇ leuˆ yuˬ tuˬ hpehˇ laˇ ve chi lehˬ, Gʼuiˬ sha htaꞈ haꞈ ve teˇ ceuˬ hpeuꞈ maw piˇ ve awˬ hkʼaˇ peꞈ laˇ ve yoˬ.—Yaˍkoˆ 1:13-15; 1 Yoˇhanˬ 5:3 gʼaw sheˍ.

 Yaˬhoˉvaˬ yawˇ uˉ peunˍ ve htaꞈ hpfuhˆ gaˇ ve chaw htaꞈ awˬ yanˇ teˇ yanˇ piˇ ve yoˬ. Aˬ htoꞈ ma pa taw le. Yawˇ htaꞈ maˇ cuˇ ve uˉ peunˍ ve hkʼa peu˗eˬ chaw yaˇ awˬ pon maˇ daꞈ tehꞈ  hpeuꞈ maw laˇ ve yoˬ. (Cuˇ yiˍ piˇ ve 7:29; 8:9) Chaw yaˇ 6,000 hkʼawꞈ teꞈ chehˇ ve awˬ hkʼaw lo chi ve awˬ lawn hkʼa tawˍ lehˆ gʼa mawˬ ve yoˬ. Maꞈ bawˆ ve, awˬ liˇ htaꞈ te yaꞈ ve, maˇ hteˇ maˇ cawˇ ve, leh naˬ beuˬ, chi teˇ hpaˍ htaꞈ chaw yaˇ hpehꞈ ve uˉ peunˍ shehˍ hpaˇ gu maˇ gʼa.—Yeˍraˍmiˆ 10:23; Roˉmaꞈ 9:17 gʼaw sheˍ.

 Chaw yaˇ uˉ peunˍ ve htaꞈ maˇ shuˍ Gʼuiˬ sha uˉ peunˍ ve htaꞈ haꞈ yuˬ ve chaw awˬ bon gʼa ve yoˬ. (Iˉsaˍyaˆ 48:17, 18) Maˇ maw kʼo, Yaˬhoˉvaˬ lehˬ, chaw yaˇ uˉ peunˍ ve awˬ moˍ hkʼa peu˗eˬ htaꞈ te luˬ tuˬ yoˬ. Gʼuiˬ sha uˉ peunˍ ve awˬ hawˉ lo chehˇ tuˬ leuˆ yuˬ ve chaw ceh tiˉ miˬ guiˬ hkʼoˆ gʼa chehˇ tuˬ yoˬ. (Iˉsaˍyaˆ 11:9)—Daˍyeˍlaˆ 2:44 gʼaw sheˍ.

 VDO nyi sheˍ Aˬ htoꞈ ma pa taw Gʼuiˬ sha tuˬ hkanˍ ve htaꞈ cawˬ tcuh ve le?

 Saˍtanˍ kʼoˆ ve, Yaˬhoˉvaˬ htaꞈ oˉ kʼoˍ pui ve chaw yawˇ htaꞈ awˬ tehˬ awˬ na haꞈ ve maˇ heˆ. Oˇ ve heˍ ve yoˬ tehꞈ nawˬ hpeuꞈ maw piˇ gaˇ laˇ. Nawˬ te gʼa tehˬ tehˬ yoˬ. Yaˬhoˉvaˬ yeunˇ hkanˍ ve teˇ ceuˬ lehˬ, chaw yaˇ uˉ peunˍ ve maˇ heˆ leh, Gʼuiˬ sha uˉ peunˍ ve htaꞈ leuˆ yuˬ tuˬ awˬ yanˇ piˇ ve yoˬ. Ngaˬ hui hkʼaˬ ve teˇ ceuˬ htaꞈ leuˆ yuˬ tuˬ ngaˬ hui a shaꞈ teꞈ hkʼaˇ hpeuꞈ maw piˇ ve yoˬ.—Yawˇbaˆ 1:8-11; Tawˇ naˉ ve 27:11 gʼaw sheˍ.

 Gʼuiˬ sha htaꞈ ngaˬ hui ve uˉ peunˍ shehˍ hpaˇ hpehꞈ tuˬ leuˆ yuˬ kʼo, Gʼuiˬ sha ve tawˇ hkawˇ Liꞈ hpu htaꞈ cuˇ ve awˬ tehˬ ve oˉ kʼoˍ pui ve htaꞈ ca henˇ leh gʼa gʼaꞈ te ve yoˬ. (Yoˇhanˬ 4:23) Saˍtanˍ htaꞈ ngaˬ hui ve uˉ peunˍ shehˍ hpaˇ maˇ hpehꞈ tcuh tuˬ, Yeˍsuˆ hkʼa shuˍ mvuhˇ miˬ hpawˇ kanˉ leh maꞈ htaꞈ maˇ ca caˉ daꞈ ve yoˬ.—Yoˇhanˬ 17:14 gʼaw sheˍ.

 Saˍtanˍ lehˬ, yawˇ kanˇ paˆ htaꞈ yehˇ leh chaꞈ chiˆ ve awˬ liˇ awˬ hkʼaˇ htaꞈ daꞈ ve yoˬ tehꞈ chaw yaˇ htaꞈ dawˇ tcuh ve yoˬ. Ngaˬ hui awˬ ceuˬ oˇ ve teˇ hpaˍ htaꞈ maˇ te kʼo, awˬ chawˇ awˬ paˆ leh awˬ viˉ awˬ nyi kʼoˆ guiˇ gʼuiˬ guiˇ leh fawˉ mehˍ laˇ tuˬ yoˬ hehˉ. (1 Peˍtruˆ 4:3, 4) Chi htaꞈ pa taw, ngaˬ hui gʼa leuˆ yuˬ ve yoˬ. Gʼuiˬ sha htaꞈ haꞈ ve chaw geh ngaˬ hui awˬ chawˇ te tuˬ laˇ. Gʼuiˬ sha ve cuˇ yiˍ leh haꞈ pehnˇ ve hkʼa biˇ cawˬ ve awˬ liˇ htaꞈ na yuˬ tuˬ laˇ. Ngaˬ hui hpehꞈ haˍ htawˇ chi hkʼe te ve kʼo, Saˍtanˍ heˍ ve yoˬ tehꞈ hpeuꞈ maw piˇ ve yoˬ.—1 Kawˇrenˍhtuˆ 6:9, 10; 15:33 gʼaw sheˍ.

 Gʼuiˬ sha chaw yaˇ htaꞈ haꞈ ve pa taw, haiˬ ve leh tuꞈ hkanˍ ve awˬ ceuˬ mehˉ kʼai tuˬ yoˬ. Oˇ hkʼe te yonˍ ve chaw lehˬ, miˬ guiˬ hkʼoˆ co co taiˍ taiˍ gʼa chehˇ tuˬ yoˬ.—Yoˇhanˬ 3:16 gʼaw sheˍ.