Ngaˬ hui ve Te hpanˍ shehˍ hpaˇ lehˬ, ngaˬ hui aꞈ kehˉ cuˇ yiˍ cawˬ ve yoˬ. Haꞈ pehnˇ ve hkʼa biˇ cawˬ ve awˬ pa hkʼa shuˍ, yawˇ ngaˬ hui htaꞈ haꞈ shaˉ laˇ ve yoˬ. Ngaˬ hui yawˇ htaꞈ maˇ peun tuˬ yawˇ dawˇ law ve maˇ heˆ. (Yeˍraˍmiˆ 10:23) Yaˇ ehˉ teˇ gʼaˇ awˬ pa awˬ e beˆ maˍ piˇ ve htaꞈ loˍ ve hkʼe, ngaˬ hui htaꞈ htawˇ Gʼuiˬ sha beˆ maˍ laˇ tuˬ loˍ ve yoˬ. (Iˉsaˍyaˆ 48:17, 18) Liꞈ hpu hkʼaw beˆ maˍ laˇ ve awˬ liˇ awˬ hkʼaˇ Gʼuiˬ sha peꞈ laˇ ve laꞈ shawnˍ hpehꞈ ve yoˬ.—2 Tiˆmoˉseˍ 3:16 gʼaw sheˍ.

 Yaˬhoˉvaˬ ve awˬ liˇ tawˇ hkawˇ leh awˬ liˇ awˬ hkʼaˇ, chi beuꞈ ngaˬ hui htaꞈ daꞈ jaˇ ve a shaꞈ teꞈ hkʼaˇ maˍ laˇ ve awˬ hkʼoˆ kaꞈ, awˬ gʼuˇ suhˍ hpawˇ co co taiˍ taiˍ ve laꞈ shawnˍ gʼa tuˬ awˬ hkʼaˇ maw laˇ ve yoˬ. Gʼuiˬ sha ngaˬ hui htaꞈ te hpanˍ taˍ laˇ ve pa taw, yawˇ beˆ maˍ laˇ ve awˬ bon htaꞈ dawˇ nawˇ ve awˬ hkʼaw lo haꞈ yuˬ cawˇ ve yoˬ.—Chiˇ mvuh ve 19:7, 11; Hpeuꞈ maˍ ve 4:11 gʼaw sheˍ.

 Liꞈ hpu hkʼaw ve awˬ liˇ awˬ hkʼaˇ laiˉ hkʼaˇ laiˉ hpawˇ lo awˬ tehˬ awˬ na yehˇ hpehꞈ ve yoˬ. Yaꞈ hkʼaˇ, awˬ liˇ tawˇ hkawˇ kʼo, awˬ lawn teˇ lawn lawn htaꞈ ceh tiˉ hteˇ˗ehˍ yehˇ gʼa ve yoˬ. (Bon maˍ ve 22:8) Awˬ liˇ awˬ hkʼaˇ teˇ maˬ a shaꞈ teꞈ chehˇ ve awˬ hkʼaw lo yehˇ ve awˬ hkʼaˇ shiˍ tuˬ gʼa dawˇ nyi puiˉ ve yoˬ. (Tawˇ naˉ ve 2:10-12) Tawˇ pa haˉ te tuˬ awˬ pon, Liꞈ hpu hkʼaw maˍ ve, a shaꞈ lehˬ Gʼuiˬ sha peꞈ laˇ ve laꞈ shawnˍ hpehꞈ ve yoˬ. Awˬ liˇ awˬ hkʼaˇ chi ve ngaˬ hui kanˉ te kuiˬ lo maˇ kʼoˆ, aˉ hkʼaw lo maˇ kʼoˆ, yaꞈ kʼaw toˇ htaˇ maˇ kʼoˆ, beˆ maˍ laˇ ve yoˬ. Ngaˬ hui ve a shaꞈ leh shu ve a shaꞈ kawˆ tuˬ hkʼaw maˇ gʼa gaˬ tcuh tuˬ awˬ liˇ awˬ hkʼaˇ chi ve shaˍ tiꞈ te tuˬ maˍ laˇ ve yoˬ.—Tcuh yaˇ 17:28 gʼaw sheˍ.

 Awˬ liˇ awˬ hkʼaˇ a yeˇ uiˍ jaˇ ve nyiˇ maˬ htaꞈ Yeˍsuˆ kʼoˆ ve yoˬ. Awˉ lawˉ teˇ hkʼaˇ hpeuꞈ maw laˇ ve, Gʼuiˬ sha htaꞈ shiˍ ve, yawˇ htaꞈ haꞈ ve, leh ka tiꞈ yeˬ ve awˬ  hkʼaw lo yawˇ ve kanˉ te tuˬ awˬ pon chaw yaˇ a shaꞈ teꞈ ve yoˬ. Ngaˬ hui dawˇ cheˆ ve teˇ ceuˬ le le awˬ hkʼaw lo awˬ liˇ awˬ hkʼaˇ awˉ lawˉ chi teˇ hkʼaˇ htaꞈ cuˇ cawˇ ve yoˬ. (Tawˇ naˉ ve 3:6) Awˬ liˇ awˬ hkʼaˇ chi ve htaꞈ a yeˇ te ve chaw hui lehˬ, Gʼuiˬ sha htaꞈ meuˆ daꞈ ve, awˬ tehˬ awˬ na ha lehˬ ve teˇ ceuˬ cawˬ ve, leh co co taiˍ taiˍ a shaꞈ gʼa ve yoˬ.—Maꞈhtehˍ 22:36-38 gʼaw sheˍ.

 Awˬ liˇ awˬ hkʼaˇ nyiˇ hkʼaˇ teˇ hkʼaˇ lehˬ, shu htaꞈ hawˍ daꞈ puiˉ tuˬ beˆ maˍ laˇ ve yoˬ. (1 Kawˇrenˍhtuˆ 13:4-7) Awˬ liˇ awˬ hkʼaˇ nyiˇ hkʼaˇ teˇ hkʼaˇ chi ve htaꞈ yuˬ yehˇ ve teˇ ceuˬ lehˬ, Gʼuiˬ sha chaw yaˇ htaꞈ te piˇ ve awˬ hkʼaˇ hkʼa shuˍ ngaˬ hui gʼaꞈ te ve yoˬ.—Maꞈhtehˍ 7:12; 22:39, 40 gʼaw sheˍ.

 Liꞈ hpu hkʼaw ve awˬ liˇ awˬ hkʼaˇ lehˬ, yehˬ kʼa haꞈ daꞈ cawˇ daꞈ tuˬ ve awˬ hkʼaˇ maˍ piˇ ve yoˬ. (Kawˇlawˇsehˇ 3:12-14) Gʼuiˬ sha ve tawˇ hkawˇ yehˬ kʼa htaꞈ kaꞈ haꞈ shaˉ ve awˬ hkʼaw lo, awˬ hpawˇ awˬ miˇ teˇ geh yeˬ chehˇ cawˇ ve yoˬ tehꞈ awˬ liˇ awˬ hkʼaˇ teˇ hkʼaˇ kʼawꞈ beˆ maˍ laˇ ve yoˬ.—Awˬ hkuiˉ puiˍ 2:24 gʼaw sheˍ.

 Liꞈ hpu maˍ ve hkawˇ htaꞈ na yuˬ ve teˇ ceuˬ nyi ma hpawˇ maˇ kʼoˆ, hpu shi mawˇ jeˬ hpawˇ maˇ kʼoˆ, ngaˬ hui ve chehˇ sha cawˬ sha ve teˇ ceuˬ htaꞈ haꞈ shaˉ laˇ ve yoˬ. Tawˇ pa haˉ te kʼo, laiˉ pawˆ laiˉ yanˇ gʼaˇ hpehˇ paˍ lehˬ Liꞈ hpu awˬ liˇ awˬ hkʼaˇ suh a shaꞈ teꞈ ve gʼaˇ ga caˇ paˍ htaꞈ dawˇ cawˇ ve yoˬ. Awˬ lawn kʼo, yawˇ hui ka tiꞈ yeˬ leh kanˉ te ve kaiˬ ve yoˬ. (Tawˇ naˉ ve 10:4, 26; Heˍbrehˇ 13:18) Gʼuiˬ sha ve tawˇ hkawˇ ngaˬ hui htaꞈ kʼawꞈ maˍ laˇ ve, a shaꞈ teꞈ tuˬ loˍ ve teˇ hpaˍ cawˬ kʼo, nyi hkʼaˇ gʼa suh leh, hpu shi mawˇ jeˬ aꞈ kehˉ Gʼuiˬ sha htaꞈ awˬ chawˇ te ve teˇ ceuˬ awˬ hpfuhˇ hkʼaˆ jaˇ ve yoˬ tehꞈ shawˍ cawˇ ve yoˬ.—Maꞈhtehˍ 6:24, 25, 33; 1 Tiˆmoˉseˍ 6:8-10 gʼaw sheˍ.

 Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve teˇ ceuˬ ngaˬ hui awˬ to chehˇ sha cawˬ sha hpawˇ haꞈ shaˉ laˇ ve yoˬ. (Tawˇ naˉ ve 14:30; 22:24, 25) Tawˇ pa haˉ te kʼo, Gʼuiˬ sha ve tawˇ hkawˇ tzuhˬ taˇ dawˬ bvuhˆ kʼoˆ ve htaꞈ na yuˬ ve kʼo, kawˆ tuˬ ve a naˍ leh maˇ dawˇ maˇ gaˇ ve awˬ ceuˬ maˇ gʼa hpuˇ. (Tawˇ naˉ ve 23:20) Tzuhˬ dawˬ hpehꞈ ve yoˬ. Yaꞈ hkʼaˇ, dawˬ bvuhˆ tuˬ Yaˬhoˉvaˬ a hkaw˗anˬ maˇ peꞈ laˇ. (Chiˇ mvuh ve 104:15; 1 Kawˇrenˍhtuˆ 6:10) Gʼuiˬ sha ve awˬ liˇ awˬ hkʼaˇ ngaˬ hui ve te hkʼaˇ htaꞈ ceh tiˉ shaˍ tiꞈ te tuˬ maˍ laˇ ve maˇ heˆ, ngaˬ hui dawˇ hkʼaˇ htaꞈ htawˇ shaˍ tiꞈ gʼa te ve yoˬ tehꞈ, maˍ laˇ ve pa taw ngaˬ hui awˬ bon gʼa ve yoˬ. (Chiˇ mvuh ve 119:97-100) Yaꞈ hkʼaˇ, awˬ tehˬ ve Hkriꞈ yaˇ a shu yawˇ awˬ to awˬ bon gʼa tuˬ Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve ceh tiˉ maˇ heˆ, yawˇ hui Yaˬhoˉvaˬ Gʼuiˬ sha htaꞈ yawˆ yan tuˬ awˬ pon te ve yoˬ.—Maꞈhtehˍ 5:14-16 gʼaw sheˍ.