Yaˬhoˉvaˬ lehˬ, hawˉ hkʼaˆ yaˇ miˇ htaꞈ miˬ guiˬ piˇ ve yoˬ. Miˬ guiˬ chi ngaˬ hui ve chehˇ kuiˬ hpehꞈ ve yoˬ. Chaw yaˇ awˉ lawˉ teˇ ca Aˍdanˍ leh Eˇvaꞈ mvuhˇ naw ma hkʼoˆ awˬ yaˇ awˬ duˬ cawˬ tuˬ hpanˍ taˍ ve maˇ heˆ. Awˬ lawn kʼo, yawˇ te hpanˍ taˍ ve mvuhˇ naw ma tcuh yaˇ mvuhˇ naw ma hkʼoˆ chehˇ peuˬ ve yoˬ. (Yawˇbaˆ 38:4, 7) Gʼuiˬ sha hawˉ hkʼaˆ awˉ lawˉ teˇ gʼaˇ htaꞈ nyi sha ve paˍraˍdiˇsuˆ Eˍdenˍ meh ve hko hkʼaw chehˇ tcuh ve yoˬ. (Awˬ hkuiˉ puiˍ 2:15-17) Yaˬhoˉvaˬ lehˬ, yawˇ leh yawˇ ve awˬ yaˇ awˬ duˬ miˬ guiˬ hkʼoˆ awˬ leh maˇ cawˬ ve a shaꞈ teꞈ chehˇ tuˬ awˬ yanˇ piˇ ve yoˬ.—Chiˇ mvuh ve 37:29; 115:16 gʼaw sheˍ.

 Awˬ hkuiˉ puiˍ htaˇ, Eˍdenˍ hko ceh tiˉ paˍraˍdiˇsuˆ hpehꞈ ve yoˬ. Chaw yaˇ awˉ lawˉ teˇ ca yawˇ hui ve awˬ yaˇ awˬ duˬ miˬ guiˬ hkʼoˆ biˇ la piˇ tcuh ve yoˬ. Chi ve awˬ hkʼoˆ, miˬ guiˬ hkʼa peu˗eˬ htaꞈ uˉ peunˍ leh paˍraˍdiˇsuˆ hpehꞈ tcuh ve yoˬ. (Awˬ hkuiˉ puiˍ 1:28) Miˬ guiˬ htaꞈ te luˬ tuˬ awˬ nyi maˇ cawˬ. Hkʼaˬ htaˆ kaꞈ chaw yaˇ ve chehˇ kuiˬ hpehꞈ tuˬ yoˬ.—Chiˇ mvuh ve 104:5 gʼaw sheˍ.

 VDO nyi sheˍ Aˬ htoꞈ ma pa taw Gʼuiˬ sha miˬ guiˬ htaꞈ te hpanˍ ve le?

 Aˍdanˍ leh Eˇvaꞈ Gʼuiˬ sha hkawˇ maˇ na ve pa taw, Yaˬhoˉvaˬ yawˇ hui htaꞈ hko oˇ ve hkʼaw gʼaꞈ tawˆ piˇ ve yoˬ. Hkʼe te leh, paˍraˍdiˇsuˆ mehˉ kʼai ve yoˬ. Hko oˇ ve htaꞈ kʼawꞈ gu te gʼa jaw ve chaw maˇ cawˬ. Liꞈ hpu hkʼaw kʼoˆ ve, “miˬ guiˬ chi haiˬ ve chaw htaꞈ piˇ taˍ ve yoˬ.” (Yawˇbaˆ 9:24)—Awˬ hkuiˉ puiˍ 3:23, 24 gʼaw sheˍ.

 Awˬ hkuiˉ puiˍ htaˇ, chaw yaˇ awˬ pon dawˇ law taˍ ve htaꞈ Yaˬhoˉvaˬ baˬ taˉ˗aw leh laˇ. Maˇ baˬ neˍ. Yawˇ kanˇ paˆ uiˍ jaˇ. Yawˇ te maˇ gʼa ve awˬ ceuˬ maˇ cawˬ. (Iˉsaˍyaˆ 45:18) Chaw yaˇ htaꞈ yawˇ dawˇ law taˍ ve hkʼe hpehꞈ tcuh tuˬ yoˬ.—Chiˇ mvuh ve 37:11, 34 gʼaw sheˍ.

 Yeˍsuˆ Gʼuiˬ sha ve Hkunˉ hawˉ hkanˇ hpehꞈ leh miˬ guiˬ hkʼoˆ tanˬ uˉ peunˍ htaˇ, paˍraˍdiˇsuˆ hko htaꞈ awˬ suhˉ kʼawꞈ gu te ve yoˬ. Aˍmaˍgeˍdonˍ meh ve maꞈ awˬ hkʼaw lo, Yeˍsuˆ Hkriꞈ mvuhˇ naw  ma tcuh yaˇ htaꞈ shiˍ veu leh canˇ paˍ hpawˇ chehˇ ve hkʼa peu˗eˬ htaꞈ te luˬ piˇ tuˬ yoˬ. Peuˬ kʼo, Yeˍsuˆ Saˍtanˍ htaꞈ 1,000 hkʼawꞈ hkʼa gaˬ haw tiˍ tuˬ yoˬ. Luˬ ve sheˆ ve chi htaꞈ Gʼuiˬ sha ve chaw ponˬ tuˬ yoˬ. Awˬ lawn kʼo, Yeˍsuˆ yawˇ hui htaꞈ sheh kʼai leh haꞈ shaˉ piˇ ve yoˬ. Miˬ guiˬ hkʼoˆ Paˍraˍdiˇsuˆ hkʼaw yawˇ hui co co taiˍ taiˍ teꞈ chehˇ tuˬ yoˬ.—Hpeuꞈ maˍ ve 20:1-3; 21:3, 4 gʼaw sheˍ.

 Miˬ guiˬ hkʼoˆ haiˬ ve awˬ ceuˬ htaꞈ Gʼuiˬ sha hkʼaˬ htaˆ te luˬ tuˬ le. Awˬ leh meuˇ gaˬ la paˇ neˇ ve “awˬ heˆ” htaꞈ shiˍ tuˬ Yeˍsuˆ kʼoˆ ve yoˬ. Miˬ guiˬ hkʼoˆ chaw yaˇ htaꞈ hpehꞈ la chehˇ ve awˬ ceuˬ kawˆ tuˬ uiˍ jaˇ ve teˇ hpaˍ lehˬ, maˇ maw kʼo “chi teˇ co˗e awˬ yanˇ leh tuˬ” yoˬ tehꞈ hpeuꞈ maw laˇ ve yoˬ. (Maꞈhtehˍ 24:3, MGS)—Maꞈhtehˍ 24:7-14, 21, 22 gʼaw sheˍ.

 Yeˍsuˆ mvuhˇ naw ma hkʼoˆ chehˇ leh miˬ guiˬ hkʼoˆ 1,000 hkʼawꞈ uˉ peunˍ chehˇ ve awˬ yanˇ awˬ hkʼaw lo, tuꞈ hkanˍ ve hkʼa peu˗eˬ peuˬ tcuh tuˬ yoˬ. (Iˉsaˍyaˆ 9:6, 7; 11:9) Hkunˉ hawˉ hkanˇ hpehꞈ ve awˬ hkʼoˆ, Yeˍsuˆ paw hkuˇ lonˉ kaꞈ hpehꞈ leh Gʼuiˬ sha htaꞈ hkʼa haꞈ ve chaw ve venˇ baˆ htaꞈ tsuhˇ hkʼa piˇ tuˬ yoˬ. Gʼuiˬ sha lehˬ Yeˍsuˆ htaꞈ cuˇ ve awˬ hkʼaw lo naˬ ve, mawˇ ve, leh suh ve htaꞈ maˇ kʼawꞈ cawˬ tcuh.—Iˉsaˍyaˆ 25:8; 33:24 gʼaw sheˍ.

 Gʼuiˬ sha htaꞈ hkʼa na yuˬ ve chaw paˍraˍdiˇsuˆ hko hkʼaw chehˇ tuˬ yoˬ. (1 Yoˇhanˬ 2:17) Nyi ma nuˇ nehˬ ve chaw htaꞈ ca leh Gʼuiˬ sha nyi ma cawˇ tuˬ ve awˬ hkʼaˇ maˍ piˇ tuˬ, Yeˍsuˆ lehˬ yawˇ ve awˬ laꞈ gʼawˇ htaꞈ kʼai tcuh ve yoˬ. Awˬ gʼuˇ suhˍ hpawˇ miˬ guiˬ hkʼoˆ paˍraˍdiˇsuˆ hkʼaw chehˇ tuˬ, chi beuꞈ Gʼuiˬ sha chaw laiˉ lanˬ gʼaˇ htaꞈ gu piˇ chehˇ ve yoˬ. (Zeˍhpaˍniˆ 2:3) Yaˬhoˉvaˬ ve Shaˉhkiˆhkanˍ ve chaw ve hpawnˬ daꞈ kuiˬ yehˬ lo laˬ ve chaw lehˬ, awˬ hpawˇ awˬ miˇ ma leh awˬ pa awˬ e hpehꞈ ve awˬ hkʼaw lo shaˬ te shaˬ daꞈ la tuˬ gʼa henˇ shiˍ ve yoˬ. Awˬ yaˇ leh awˬ pa awˬ e geh teˇ geh Gʼuiˬ sha htaꞈ oˉ kʼoˍ pui ve teˇ ceuˬ, daꞈ ve awˬ lawn sha tanˇ yawˇ hui htaꞈ ga piˇ gʼa ve awˬ hkʼaˇ henˇ ve yoˬ.—Miˆhkaˍ 4:1-4 gʼaw sheˍ.