Daꞈ ve awˬ lawn sha tanˇ lehˬ, ha lehˬ ve Gʼuiˬ sha Yaˬhoˉvaˬ geh laˬ ve yoˬ. Yawˇ lehˬ yehˬ kʼa htaꞈ ha lehˬ tcuh gaˇ ve yoˬ. (1 Tiˆmoˉseˍ 1:11) Gʼuiˬ sha lehˬ, heuˆ daꞈ ve teˇ ceuˬ htaꞈ teh taˍ ve yoˬ. Yaˇ hu duˬ hu leh yehˬ kʼa yeˬ chehˇ tuˬ, mvuhˇ miˬ awˬ liˇ awˬ hkʼaˇ suh heuˆ daꞈ ve teˇ ceuˬ a yeˇ uiˍ ve yoˬ. Hkriꞈ yaˇ lehˬ heuˆ daꞈ ve liꞈ te ve htaꞈ caˉ daꞈ ve mvuhˇ miˬ awˬ liˇ htaꞈ na yuˬ cawˇ ve yoˬ.—Luˉkaꞈ 2:1, 4, 5 gʼaw sheˍ.

 Heuˆ daꞈ ve teˇ ceuˬ htaꞈ Gʼuiˬ sha hkʼaˬ hkʼe dawˇ ve le. Heuˆ daꞈ peuˬ ve hawˉ hkʼaˆ yaˇ miˇ htaꞈ yawˇ hkʼaˬ htaˆ kaꞈ teˇ geh chehˇ tcuh piˇ gaˇ ve yoˬ. Awˬ hpawˇ awˬ miˇ ka tiꞈ yeˬ daꞈ tuˬ Yaˬhoˉvaˬ heuˆ gaˇ ve yoˬ. (Heˍbrehˇ 13:4) Awˬ hpawˇ awˬ miˇ baˬ daꞈ ve htaꞈ yawˇ canˇ ve yoˬ. (Maˍlaˍhkiˆ 2:16) Awˬ hpawˇ awˬ miˇ ma teˇ gʼaˇ haˉ chawˇ te htaˇ hehꞈ, Hkriꞈ yaˇ baˬ daꞈ leh awˬ suhˉ heuˆ tuˬ Gʼuiˬ sha a hkaw˗anˬ piˇ ve yoˬ.—Maꞈhtehˍ 19:3-6, 9 gʼaw sheˍ.

 Yaˬhoˉvaˬ lehˬ, hawˉ hkʼaˆ leh yaˇ miˇ heuˆ daꞈ htaˇ awˬ chawˇ hpehꞈ daꞈ tuˬ te hpanˍ ve yoˬ. (Awˬ hkuiˉ puiˍ 2:18) Awˬ suhˍ awˬ shaˍ hpawˇ ca caˍ leh Gʼuiˬ sha awˬ lawn maˍ tuˬ, awˬ hpawˇ lehˬ yehˬ kʼa htaꞈ sheh kʼai cawˇ ve yoˬ. Awˬ miˇ ma awˬ pon yawˇ dawˇ nyi piˇ leh yawˇ htaꞈ haꞈ cawˇ ve yoˬ. Awˬ hpawˇ awˬ miˇ yawˆ yan daꞈ leh haꞈ daꞈ cawˇ ve yoˬ. Awˬ hpawˇ awˬ miˇ teˇ gʼaˇ le le yaꞈ kuiˬ cawˬ ve pa taw, yehˬ kʼa ha lehˬ tuˬ awˬ pon venˇ baˆ hpehˇ daꞈ ve awˬ hkʼaˇ henˇ shiˍ ve teˇ ceuˬ a yeˇ uiˍ ve yoˬ.—Eˇfeˇsuꞈ 4:31, 32; 5:22-25, 33; 1 Peˍtruˆ 3:7 gʼaw sheˍ.

 Awˬ hpawˇ awˬ miˇ ma maˇ cawˇ maˇ hawˍ daꞈ ve kʼo, yawˇ huiˉ maˬ coˇ caˇ leh haꞈ pehnˇ ve awˬ hkʼaw lo te piˇ daꞈ cawˇ ve yoˬ. (1 Kawˇrenˍhtuˆ 13:4, 5) Awˬ hpawˇ awˬ miˇ ma awˬ hkʼaw lo i ve awˬ lawn htaꞈ gu tuˬ teˇ gʼaˇ teˇ kaˬ hpaˆ daꞈ chehˇ tuˬ Gʼuiˬ sha ve tawˇ hkawˇ maˇ beˆ maˍ laˇ.—1 Kawˇrenˍhtuˆ 7:10-13 gʼaw sheˍ.

 Yaˬhoˉvaˬ nawˬ hui htaꞈ ha lehˬ piˇ tcuh gaˇ ve yoˬ. Yaˇ nehˬ hpehꞈ chehˇ ve awˬ yanˇ awˬ hkʼaw lo ha lehˬ tuˬ Gʼuiˬ sha nawˬ htaꞈ daꞈ jaˇ ve beˆ maˍ laˇ hkawˇ peꞈ laˇ ve yoˬ. Nawˬ pa nawˬ e hpehꞈ jaw hpuˇ jaw ve awˬ ceuˬ leh cuˇ yiˍ htaꞈ nawˬ awˬ bon gʼa tuˬ Gʼuiˬ sha heuˆ gaˇ ve yoˬ. (Kawˇlawˇsehˇ 3:20) Nawˬ ve Te hpanˍ shehˍ hpaˇ leh yawˇ ve Yaˇ hpu awˬ pon kanˉ te ve awˬ hkʼaw lo Yaˬhoˉvaˬ nawˬ htaꞈ ha lehˬ tcuh gaˇ ve yoˬ.—Cuˇ yiˍ piˇ ve 11:9–12:1; Maꞈhtehˍ 19:13-15; 21:15-16 gʼaw sheˍ.

 Nawˬ ve yaˇ htaꞈ caˇ tuˬ dawˬ tuˬ, veuꞈ kʼaˇ, chehˇ kuiˬ cawˬ piˇ tuˬ awˬ pon nawˬ kanˉ te hkeuꞈ cawˇ ve yoˬ. (1 Tiˆmoˉseˍ 5:8) Yaꞈ hkʼaˇ, nawˬ hui ve yaˇ ha lehˬ ve htaꞈ gʼa hpuˇ tuˬ awˬ pon, Gʼuiˬ sha htaꞈ haꞈ ve maˇ kʼoˆ, yawˇ ve awˬ lawn shiˍ tuˬ gʼa maˍ piˇ ve yoˬ. (Eˇfeˇsuꞈ 6:4) Nawˬ Gʼuiˬ sha htaꞈ haꞈ ve henˇ kuiˬ jawˬ kuiˬ te taˍ ve lehˬ, nawˬ ve yaˇ nyi ma awˬ tawˬ hkʼa gaˬ heuˆ la gʼa ve yoˬ. Nawˬ Gʼuiˬ sha ve tawˇ hkawˇ htaꞈ cuˇ leh beˆ maˍ piˇ ve kʼo, yaˇ ve dawˇ hkʼaˇ kʼawꞈ gu daꞈ la piˇ gʼa tuˬ yoˬ.—Bon maˍ ve 6:4-7; Tawˇ naˉ ve 22:6 gʼaw sheˍ.

 Nawˬ yaˇ htaꞈ awˬ gʼaˇ piˇ leh chiˇ mvuh piˇ ve kʼo, yawˇ hui awˬ bon gʼa ve yoˬ. Yawˇ hui htaꞈ dawˇ hkʼaˇ gu piˇ leh jawꞈ maˍ tuˬ loˍ ve yoˬ. Chi hkʼe te maˍ piˇ ve lehˬ, yawˇ hui ha lehˬ ve htaꞈ mehˉ kʼai tuˬ te piˇ ve te hkʼaˇ htaꞈ jaw kʼai tuˬ ga piˇ ve yoˬ. (Tawˇ naˉ ve 22:15) Yaꞈ hkʼaˇ, jawꞈ maˍ ve teˇ ceuˬ hehnˇ jaˇ ve maˇ te cawˇ.—Kawˇlawˇsehˇ 3:21 gʼaw sheˍ.

 Yaˬhoˉvaˬ ve Shaˉhkiˆhkanˍ ve chaw lehˬ, awˬ pa awˬ e leh yaˇ htaꞈ ga piˇ ve liꞈ laiˉ kʼoˆ yanˍ tawˆ ve yoˬ. Liꞈ chi teˇ hpaˍ Liꞈ hpu htaꞈ cuˇ taˍ ve yoˬ.—Chiˇ mvuh ve 19:7, 11 gʼaw sheˍ.