Yeˍruˆsaˍlehnˍ venˇ neˇ ve Beˍtaˍniˆ venˇ lo Yeˍsuˆ gaˬ la htaˇ, yawˇ ve awˬ chawˇ Laˍzaˍruˆ suh ve awˇ nyi gaˬ peuˬ. Yeˍsuˆ lehˬ, Laˍzaˍruˆ ve awˬ viˉ ma Maˍhtaˆ leh Maˍriˆ geh tuˍ hpfuh lo kʼai ve yoˬ. Teˇ hkui gaˬ leh, chaw moˍ lonˉ hpawnˬ la ve yoˬ. Yeˍsuˆ Laˍzaˍruˆ htaꞈ kʼawꞈ teꞈ tu la piˇ htaˇ, Maˍhtaˆ leh Maˍriˆ hkʼaˬ ma ha lehˬ ve htaꞈ nawˬ dawˇ mawˬ gʼa˗aw laˇ.—Yoˇhanˬ 11:21-24, 38-44 gʼaw sheˍ.

 Maˍhtaˆ lehˬ, suh peuˬ ve chaw awˬ pon daꞈ ve awˬ lawn sha tanˇ cawˬ ve yoˬ tehꞈ yawˇ shiˍ peuˬ ve yoˬ. Yaˬhoˉvaˬ suh peuˬ ve chaw htaꞈ miˬ guiˬ hkʼoˆ kʼawꞈ teꞈ tu la piˇ tuˬ yoˬ tehꞈ, Gʼuiˬ sha ve Tawˇ hkawˇ kʼoˆ taˍ ve htaꞈ yawˇ shiˍ ve yoˬ.—Yawˇbaˆ 14:14, 15 gʼaw sheˍ.

 Chaw yaˇ htaꞈ jeꞈ yuˬ hpanˍ taˍ ve yoˬ. (Awˬ hkuiˉ puiˍ 2:7; 3:19) Ngaˬ hui awˬ suhˍ awˬ shaˍ hkʼaw chehˇ ve awˬ ha hpehꞈ ve maˇ heˆ. Chi htaꞈ pa taw ngaˬ hui suh kʼo, teˇ ceuˬ kaꞈ maˇ ponˬ. Ngaˬ hui suh htaˇ uˉ nawꞈ nehˆ kaꞈ suh leh, teꞈ chiˉ kaꞈ maˇ dawˇ nyi puiˉ. Hkʼe te leh, suh ve chaw maˇ nawˇ ve pa taw, Laˍzaˍruˆ lehˬ suh ve htaꞈ hkʼaˬ hkʼe hpehꞈ la ve awˬ lawn teꞈ ciˉ kaꞈ maˇ kʼoˆ.—Chiˇ mvuh ve 146:4; Cuˇ yiˍ piˇ ve 9:5, 6, 10 gʼaw sheˍ.

 Chaw yaˇ suh peuˬ hkʼawꞈ nawˉ, Gʼuiˬ sha yawˇ hui htaꞈ aˬ miˍ hkʼaw hkanˍ tcuh ve laˇ. Suh peuˬ ve chaw teꞈ chiˉ maˇ shiˍ maˇ nawˇ tehꞈ Liꞈ hpu hkʼaw kʼoˆ taˍ ve pa taw, aˬ miˍ moˬ naˆ hoꞈ awˬ lawn heˍ ve teˇ ceuˬ hpehꞈ leh, Gʼuiˬ sha htaꞈ venˇ baˆ taˍ chehˇ ve yoˬ. Chaw yaˇ htaꞈ aˬ miˍ hkʼaw hkanˍ tcuh tuˬ yoˬ tehꞈ dawˇ ve ceh kaꞈ Gʼuiˬ sha canˇ jaˇ ve yoˬ.—Yeˍraˍmiˆ 7:31 gʼaw sheˍ.

 VDO nyi sheˍ Suh peu˗eˬ kʼo hkʼaˬ hkʼe hpehꞈ ve le?

 Suh peuˬ ve chaw tawˇ yaw maˇ puiˉ kaˇ maˇ puiˉ. (Chiˇ mvuh ve 30:9) Yaꞈ hkʼaˇ, mvuhˇ naw ma tcuh yaˇ teˇ hpaˍ hpaˍ haiˬ ve pa taw, suh peuˬ ve chaw hkʼe te leh chaw htaꞈ tawˇ yaw piˇ ve yoˬ. (2 Peˍtruˆ 2:4) Suh peuˬ ve chaw htaꞈ coˇ caˇ leh tawˇ na nyi ve htaꞈ Yaˬhoˉvaˬ tawˍ taˍ ve yoˬ.—Bon maˍ ve 18:10, 11 gʼaw sheˍ.

 Suh peuˬ ve chaw laiˉ lanˬ gʼaˇ miˬ guiˬ hkʼoˆ kʼawꞈ teꞈ tu la tuˬ yoˬ. Gʼuiˬ sha htaꞈ maˇ shiˍ leh, maˇ daꞈ ve awˬ ceuˬ te ve chaw teˇ hpaˍ hpaˍ htaꞈ htawˇ kʼawꞈ teꞈ tu la piˇ tuˬ yoˬ.—Chiˇ mvuh ve 37:9; Tcuh yaˇ 24:15 gʼaw sheˍ.

 Teꞈ tu la ve chaw Gʼuiˬ sha htaꞈ caˉ daꞈ ve awˬ tehˬ ve awˬ lawn henˇ shiˍ gʼa leh, Yeˍsuˆ htaꞈ yonˍ ve hkʼaw yawˇ hkawˇ na yuˬ tuˬ yoˬ. (Hpeuꞈ maˍ ve 20:11-13) Kʼawꞈ teꞈ tu la leh daꞈ ve awˬ ceuˬ htaꞈ te ve chaw oˇ ve teˇ hpaˍ miˬ guiˬ hkʼoˆ co co taiˍ taiˍ pyawˍ ve a shaꞈ gʼa tuˬ yoˬ.—Yoˇhanˬ 5:28, 29 gʼaw sheˍ.

 Suh peuˬ ve chaw dawˇ law kuiˬ cawˬ tuˬ, Gʼuiˬ sha yawˇ ve Yaˇ hpu htaꞈ peu laˇ leh ngaˬ hui awˬ pon hkanˍ suh ve yoˬ. Chi htaꞈ pa taw, suh peuˬ ve chaw htaꞈ kʼawꞈ teꞈ tu la piˇ ve teˇ ceuˬ hpeuꞈ maw laˇ ve, Yaˬhoˉvaˬ haꞈ pehnˇ ve leh ha kʼaˉ puiˉ jaˇ ve yoˬ. Suh peuˬ ve chaw kʼawꞈ teꞈ tu la htaˇ, nawˬ a shu htaꞈ mawˬ daꞈ gaˇ ve le.—Yoˇhanˬ 3:16; Roˉmaꞈ 6:23 gʼaw sheˍ.