Gʼuiˬ sha lehˬ, Aˍbraˍhanˍ ve awˬ yaˇ awˬ duˬ htaꞈ chaw ceuˬ teˇ ceuˬ teh piˇ leh awˬ liˇ tawˇ hkawˇ piˇ ve yoˬ. Chaw ceuˬ oˇ ve htaꞈ “Iˉsaˍreˍlaˆ” tehꞈ Yaˬhoˉvaˬ kuˬ leh Yawˇ ve Tawˇ hkawˇ leh, awˬ tehˬ oˉ kʼoˍ pui ve teˇ ceuˬ htaꞈ haꞈ shaˉ tcuh ve yoˬ. (Chiˇ mvuh ve 147:19, 20) Hkʼe te leh, Iˉsaˍreˍlaˆ chaw htaꞈ pa taw chaw ceuˬ hkʼa peu˗eˬ awˬ bon gʼa tuˬ yoˬ.—Awˬ hkuiˉ puiˍ 22:18 gʼaw sheˍ.

 Yawˇ ve shaˉ hkiˆ hpehꞈ tuˬ awˬ pon, Gʼuiˬ sha Iˉsaˍreˍlaˆ chaw ceuˬ htaꞈ leuˆ yuˬ ve yoˬ. Chaw yaˇ Gʼuiˬ sha ve tawˇ hkawˇ na yuˬ ve awˬ hkʼaw lo awˬ bon gʼa ve yoˬ tehꞈ, aˬ sho˗eˬ htaˇ Iˉsaˍreˍlaˆ ve raˍsaˍvanˍ hpeuꞈ maw laˇ ve yoˬ. (Bon maˍ ve 4:6) Hkʼe te leh, Iˉsaˍreˍlaˆ chaw ceuˬ htaꞈ pa taw, awˬ kaˍ awˬ nu chaw awˬ tehˬ ve Gʼuiˬ sha htaꞈ shiˍ la gʼa ve yoˬ.—Iˉsaˍyaˆ 43:10, 12 gʼaw sheˍ.

 Awˬ yanˇ maw la htaˇ, Iˉsaˍreˍlaˆ chaw ceuˬ htaꞈ Gʼuiˬ sha nyi hkʼaˇ maˇ kʼawꞈ suh˗o, leh chaw ceuˬ oˇ ve awˬ tan Hkriꞈ yaˇ awˬ moˍ htaꞈ Yaˬhoˉvaˬ leuˆ yuˬ ve yoˬ. (Maꞈhtehˍ 21:43; 23:37, 38) Chi teˇ hkui, Iˉsaˍreˍlaˆ chaw awˬ tan awˬ tehˬ ve Hkriꞈ yaˇ hui Yaˬhoˉvaˬ ve shaˉ hkiˆ hkanˍ ve chaw hpehꞈ la ve yoˬ.—Tcuh yaˇ 15:14, 17 gʼaw sheˍ.

 Daꞈ ve awˬ lawn sha tanˇ hto toˇ ve kanˉ te leh, chaw ceuˬ hkʼa peu˗eˬ yawˇ ve awˬ laꞈ gʼawˇ hpehꞈ la tuˬ, Yeˍsuˆ yawˇ hkʼaˇ suh gʼaꞈ yuˬ ve chaw htaꞈ kanˉ hkʼaˇ hpehꞈ piˇ ve yoˬ. (Maꞈhtehˍ 10:7, 11; 24:14; 28:19, 20) Chi teˇ co˗e leh ve awˬ yanˇ awˬ hkʼaw lo, hto toˇ ve kanˉ chi ve lehˬ chi beuꞈ peuˬ la hpawˇ chehˇ taˍ ve yoˬ. Yaˬhoˉvaˬ lehˬ, chaw ceuˬ teˇ ceuˬ le le laiˉ lanˬ gʼaˇ nyi ma teˇ shiˍ tiˉ awˬ hkʼaw lo awˬ tehˬ ve oˉ kʼoˍ pui tuˬ shaw hpoˆ chehˇ ve lehˬ raˍsaˍvanˍ awˬ hkʼaw lo awˉ lawˉ teˇ pawˆ hpehꞈ ve yoˬ. (Hpeuꞈ maˍ ve 7:9, 10) Awˬ tehˬ ve Hkriꞈ yaˇ hui teˇ gʼaˇ leh teˇ gʼaˇ ga daꞈ leh, awˬ gʼaˇ piˇ daꞈ tuˬ yawˇ hui htaꞈ kanˉ hkʼaˇ hpehꞈ piˇ ve yoˬ. Miˬ guiˬ hkʼoˆ teˇ kaˬ le le yawˇ hui hpawnˬ daꞈ kuiˬ lo, Liꞈ hpu awˬ lawn hkʼa shuˍ shuˍ˗ehˬ henˇ tuˬ awˬ hkʼaˇ gu teh taˍ ve yoˬ.—Heˍbrehˇ 10:24, 25 gʼaw sheˍ.

 Aˬ laˬ hkʼe 1870 hkʼawꞈ htaˇ, Liꞈ hpu henˇ ve chaw awˬ moˍ ehˉ lehˬ, Liꞈ hpu hkʼaw mehˉ kʼai taˍ ve awˬ tehˬ ve awˬ lawn htaꞈ tanˬ ca mawˬ ve yoˬ. Hto toˇ ve kanˉ te tuˬ awˬ pon, Yeˍsuˆ lehˬ Hkriꞈ yaˇ awˬ moˍ shaw hpoˆ chehˇ ve tehꞈ yawˇ hui shiˍ ve yoˬ. Hkʼe te leh, yawˇ hui lehˬ mvuhˇ miˬ teˇ peˆ le le chaw ceuˬ teˇ ceuˬ le le htaꞈ Gʼuiˬ sha ve mvuhˇ miˬ awˬ lawn ca hto piˇ ve yoˬ. Yawˇ hui Yaˬhoˉvaˬ ve Shaˉhkiˆhkanˍ ve chaw tehꞈ 1931 hkʼawꞈ htaˇ tanˬ meh laˬ ve yoˬ.—Tcuh yaˇ 1:8; 2:1, 4; 5:42 gʼaw sheˍ.

 Tcuh yaˇ awˬ co˗e htaˇ, Hkriꞈ yaˇ awˬ moˍ ve Awˬ hoˉ Yeˍsuˆ sheh kʼai ve awˬ hawˉ lo chehˇ ve uˉ peunˍ ve kawˍmiˍtiˍ lehˬ, mvuhˇ miˬ laiˉ peˆ lo chehˇ ve Hkriꞈ yaˇ awˬ moˍ teˇ hpaˍ htaꞈ nyi haꞈ shaˉ piˇ ve yoˬ. (Tcuh yaˇ 16:4, 5) Oˇ htaˇ hkʼa shuˍ chi beuꞈ htawˇ, miˬ guiˬ hkʼa peu˗eˬ hkʼoˆ chehˇ ve Yaˬhoˉvaˬ ve Shaˉhkiˆhkanˍ ve chaw htaꞈ nyi haꞈ shaˉ tuˬ chaw mawˇ chaw kehˉ teˇ hpaˍ hpaˍ Uˉ peunˍ ve Kawˍmiˍtiˍ hpehꞈ ve yoˬ. Kawˍmiˍtiˍ chi ve Liꞈ hpu henˇ tuˬ ga piˇ ve liꞈ htaꞈ 600 hpaˆ chaw ceuˬ tawˇ hkawˇ yuˬ tawˆ ve, yanˍ tawˆ ve, leh pehˬ tawˆ chehˇ ve Yaˬhoˉvaˬ ve Shaˉhkiˆhkanˍ ve chaw awˬ tcuhˉ puiˍ teˇ hpaˍ htaꞈ nyi haꞈ shaˉ ve yoˬ. Chi htaꞈ pa taw, Kawˍmiˍtiˍ lehˬ Hkriꞈ yaˇ awˬ moˍ 100,000 hpaˆ awˬ pon Liꞈ hpu htaꞈ cuˇ ve awˬ hkʼaw lo awˬ gʼaˇ piˇ leh beˆ maˍ piˇ ve yoˬ. Hkriꞈ yaˇ awˬ moˍ teˇ moˍ leh teˇ moˍ hkʼaw keunˍ ve hawˉ hkʼaˆ lehˬ, chaw mawˇ chaw kehˉ maˇ heˆ leh, nyi haꞈ shaˉ shehˍ hpaˇ te ve yoˬ. Hawˉ hkʼaˆ chi teˇ hpaˍ Gʼuiˬ sha ve yawˬ awˬ moˍ htaꞈ haꞈ pehnˇ ve awˬ hkʼaw lo nyi haꞈ shaˉ piˇ ve yoˬ.—1 Peˍtruˆ 5:2, 3 gʼaw sheˍ.

 Daꞈ ve awˬ lawn sha tanˇ ca hto toˇ leh chaw htaꞈ awˬ laꞈ gʼawˇ hpehꞈ la tcuh tuˬ, Yaˬhoˉvaˬ ve Shaˉhkiˆhkanˍ ve chaw htaꞈ kanˉ hkʼaˇ hpehꞈ piˇ ve yoˬ. Oˇ htaˇ tcuh yaˇ hkʼa shuˍ ngaˬ hui htawˇ teˇ yehˬ peuˬ teˇ yehˬ ca hto piˇ ve yoˬ. (Tcuh yaˇ 20:20) Awˬ tehˬ ve htaꞈ nyi ma hteˇ˗ehˍ haꞈ ve chaw geh teˇ geh Liꞈ hpu henˇ tuˬ ngaˬ hui ca kʼai ve yoˬ. Yaꞈ hkʼaˇ, Yaˬhoˉvaˬ ve Shaˉhkiˆhkanˍ ve chaw htaꞈ kanˉ hkʼaˇ ceh hpehꞈ ve maˇ heˆ. Ngaˬ hui ha kʼaˉ puiˉ ve Awˬ pa cawˬ ve yehˬ kʼa hpehꞈ ve yoˬ. Ngaˬ hui awˬ viˉ awˬ nyi hpehꞈ leh, teˇ gʼaˇ leh teˇ gʼaˇ dawˇ nyi daꞈ ve yoˬ. (2 Hteˇsaˍlawˇniˆ 1:3) Gʼuiˬ sha nyi hkʼaˇ suh leh shu htaꞈ ga piˇ tuˬ Yaˬhoˉvaˬ ve chaw hui htaꞈ kanˉ hkʼaˇ hpehꞈ piˇ ve pa taw, yawˇ hui lehˬ miˬ guiˬ hkʼoˆ dawˇ sha jaˇ ve yehˬ kʼa hpehꞈ ve yoˬ.—Chiˇ mvuh ve 33:12; Tcuh yaˇ 20:35 gʼaw sheˍ.