Yeˍsuˆ awˬ kaˍ awˬ nu chaw teˇ gʼaˇ htaꞈ kaꞈ maˇ shuˍ. Yawˇ miˬ guiˬ hkʼoˆ maˇ paw la sheˍ htaˇ, mvuhˇ naw ma hkʼoˆ awˬ ha ve awˬ to hpehꞈ ve yoˬ. (Yoˇhanˬ 8:23) Gʼuiˬ sha yawˇ htaꞈ awˉ lawˉ peuˇ hpanˍ ve yoˬ. Awˬ kaˍ awˬ nu hkʼa peu˗eˬ htaꞈ Yeˍsuˆ gʼa ga hpanˍ ve yoˬ. Yaˬhoˉvaˬ hteˇ lehˍ hpanˍ ve yawˇ teˇ gʼaˇ tiˉ cawˬ ve yoˬ. Chi htaꞈ pa taw, Gʼuiˬ sha ve “Yaˇ hpu tiˍ” tehꞈ kuˬ keunˍ ve yoˬ. (Yoˇhanˬ 1:14) Yeˍsuˆ Gʼuiˬ sha awˬ tan kanˉ te shehˍ hpaˇ hpehꞈ ve pa taw, yawˇ htaꞈ “Tawˇ hkawˇ” kaꞈ kuˬ ve yoˬ.—Tawˇ naˉ ve 8:22, 23, 30; Kawˇlawˇsehˇ 1:15, 16 gʼaw sheˍ.

 Gʼuiˬ sha yawˇ ve Yaˇ hpu miˬ guiˬ hkʼoˆ peu laˇ tuˬ, mvuhˇ naw ma hkʼoˆ Yeˍsuˆ ve a shaꞈ jiˆ yaꞈ la leh, Yuˇdaꞈ chaw Maˍriˆ meh ve daꞈ kehˬ ve yaˇ miˇ gʼoˇ peˬ hkʼaw keu piˇ ve yoˬ. Yeˍsuˆ lehˬ, chaw yaˇ hpehꞈ ve awˬ pa maˇ cawˬ. (Luˉkaꞈ 1:30-35) Yeˍsuˆ lehˬ, 3 ceuˬ chi htaꞈ te tuˬ miˬ guiˬ hkʼoˆ laˬ ve yoˬ. (1) Gʼuiˬ sha htaꞈ caˉ daꞈ ve awˬ tehˬ ve awˬ lawn maˍ ve, (2) tuꞈ ve hkanˍ ve htaꞈ gʼa hpuˇ htaˇ htawˇ, Gʼuiˬ sha a loˍ gʼaꞈ te tuˬ ngaˬ hui awˬ pon Yeˍsuˆ henˇ yuˬ tuˬ te maˍ laˇ ve, leh (3) yawˇ biˇ jaˇ ve a shaꞈ chaw yaˇ htaꞈ “htaiˍ hkʼawꞈ” laˇ tuˬ laˬ ve yoˬ.—Maꞈhtehˍ 20:28 gʼaw sheˍ.

 Htaiˍ hkʼawꞈ ve oˇ ve lehˬ, chaw teˇ gʼaˇ a shaꞈ ponˬ tuˬ awˬ hpfuhˇ piˇ ve htaꞈ kʼoˆ gaˇ ve yoˬ. (Tawˆ kʼai ve 21:29, 30) Chaw yaˇ mawˇ suh tuˬ awˬ hkuiˉ puiˍ htaˇ Gʼuiˬ sha dawˇ law ve maˇ heˆ. Ngaˬ hui hkʼaˬ hkʼe te shiˍ gʼa ve le. Liꞈ hpu hkʼaw “venˇ baˆ” kʼoˆ ve htaꞈ te ve kʼo, suh tuˬ yoˬ tehꞈ hawˉ hkʼaˆ awˉ lawˉ teˇ gʼaˇ htaꞈ Gʼuiˬ sha kʼoˆ piˇ ve yoˬ. Chi htaꞈ pa taw, Aˍdanˍ venˇ baˆ maˇ te kʼo yawˇ maˇ suh. (Awˬ hkuiˉ puiˍ 2:16, 17; 5:5) Liꞈ hpu hkʼaw kʼoˆ ve hkʼe, Aˍdanˍ htaꞈ pa taw chaw yaˇ hkʼa peu˗eˬ awˬ hkʼoˆ suh ve teˇ ceuˬ “gaˬ la ve” yoˬ. Hkʼe te leh, venˇ baˆ leh suh ve teˇ ceuˬ Aˍdanˍ lehˬ, awˬ yaˇ awˬ duˬ htaꞈ pehˉ kʼai ve yoˬ. Aˍdanˍ geh gʼa ve venˇ baˆ htaꞈ  ponˬ tuˬ htaiˍ hkʼawꞈ laˇ ve htaꞈ ngaˬ hui loˍ ve yoˬ.—Roˉmaꞈ 5:12; 6:23 gʼaw sheˍ.

 Ngaˬ hui suh ve htaꞈ ponˬ tuˬ a shu htaiˍ hkʼawꞈ laˇ gʼa tuˬ le. Ngaˬ hui suh˗e htaˇ, ngaˬ hui hkʼaˇ ngaˬ hui venˇ baˆ meuˉ ve awˬ hpfuhˇ htaꞈ ceh shaiˍ gʼa ve yoˬ. Maˇ biˇ ve chaw yaˇ teˇ gʼaˇ kaꞈ shu ve venˇ baˆ meuˉ ve awˬ hpfuhˇ htaꞈ shaiˍ maˇ gʼa.—Chiˇ mvuh ve 49:7-9 gʼaw sheˍ.

 Yeˍsuˆ ngaˬ hui htaꞈ maˇ shuˍ, yawˇ biˇ jaˇ ve yoˬ. Yawˇ ve venˇ baˆ awˬ pon suh tuˬ maˇ loˍ. Awˬ lawn kʼo, yawˇ venˇ baˆ maˇ te jaw. Yaꞈ hkʼaˇ, shu ve venˇ baˆ awˬ pon Yeˍsuˆ hkanˍ suh ve yoˬ. Gʼuiˬ sha chaw yaˇ htaꞈ haꞈ jaˇ leh, ngaˬ hui awˬ pon hkanˍ suh tcuh tuˬ yawˇ ve Yaˇ hpu htaꞈ peu laˇ ve yoˬ. Yeˍsuˆ htawˇ, ngaˬ hui htaꞈ haꞈ jaˇ leh Awˬ pa hkawˇ na yuˬ ve awˬ hkʼaw lo, ngaˬ hui ve venˇ baˆ awˬ pon htaiˍ hkʼawꞈ laˇ tuˬ yawˇ ve a shaꞈ peꞈ laˇ ve yoˬ.—Yoˇhanˬ 3:16; Roˉmaꞈ 5:18, 19 gʼaw sheˍ.

 VDO nyi sheˍ Aˬ htoꞈ ma te Yeˍsuˆ suh˗e ve le?

 Yeˍsuˆ miˬ guiˬ hkʼoˆ chehˇ htaˇ chaw naˬ htaꞈ gu na˗e piˇ ve, suh peuˬ ve chaw htaꞈ teꞈ tu la piˇ ve, leh kawˆ tuˬ hkʼaw chehˇ ve chaw htaꞈ ga piˇ ve yoˬ. Yawˇ awˬ ceuˬ chi teˇ hpaˍ te ve lehˬ, hkʼa na yuˬ ve chaw yaˇ awˬ pon awˬ gʼuˇ suhˍ hpawˇ te tuˬ hpeuꞈ maw piˇ ve yoˬ. (Maꞈhtehˍ 15:30, 31; Yoˇhanˬ 5:28) Yeˍsuˆ suh peuˬ hkʼawꞈ nawˉ, Gʼuiˬ sha yawˇ htaꞈ awˬ ha ve awˬ to teꞈ tu la tcuh ve yoˬ. (1 Peˍtruˆ 3:18) Yaˬhoˉvaˬ yawˇ htaꞈ miˬ guiˬ hkʼa peu˗eˬ hkʼoˆ Hkunˉ hawˉ hkanˇ hpehꞈ tcuh htaˇ hkʼa gaˬ, yawˇ lehˬ Gʼuiˬ sha laꞈ sha paˉ lo mui taˍ ve yoˬ. (Heˍbrehˇ 10:12, 13) Chi teˇ hkui, yawˇ Hkunˉ hawˉ hkanˇ hpehꞈ leh mvuhˇ naw ma hkʼoˆ uˉ peunˍ chehˇ ve yoˬ. Leh yawˇ hkʼaˇ suh gʼaꞈ yuˬ ve chaw daꞈ ve awˬ lawn sha tanˇ oˇ ve miˬ guiˬ hkʼa peu˗eˬ hkʼoˆ hto toˇ chehˇ ve yoˬ.—Daˍyeˍlaˆ 7:13, 14; Maꞈhtehˍ 24:14 gʼaw sheˍ.

 Maˇ maw kʼo, Yeˍsuˆ Hkunˉ hawˉ hkanˇ hpehꞈ ve awˬ hkʼaw lo shu htaꞈ tuꞈ hkanˍ piˇ ve chaw leh, tuꞈ ve hkanˍ ve awˬ ceuˬ hkʼa peu˗eˬ htaꞈ yawˇ te luˬ piˇ tuˬ yoˬ. Yeˍsuˆ htaꞈ yonˍ leh yawˇ hkawˇ htaꞈ na yuˬ ve chaw teˇ gʼaˇ le le, miˬ guiˬ hkʼoˆ paˍraˍdiˇsuˆ hkʼaw a shaꞈ gʼa tuˬ yoˬ.—Chiˇ mvuh ve 37:9-11 gʼaw sheˍ.