Chaw hkʼa peu˗eˬ bon lawˬ ve awˬ hkʼaw lo Gʼuiˬ sha htaꞈ meuˆ daꞈ la tuˬ yawˇ kuˬ piˇ ve yoˬ. (Chiˇ mvuh ve 65:2) Yaꞈ hkʼaˇ, yawˇ lehˬ bon lawˬ hkawˇ teˇ ceuˬ le le htaꞈ haꞈ yuˬ leh na tuˬ ve maˇ heˆ. Tawˇ pa haˉ te kʼo, awˬ miˇ ma htaꞈ hkʼa mvuhˇ hkʼa na te ve awˬ hpawˇ ve bon lawˬ hkawˇ htaꞈ tawˍ taˍ tuˬ cawˬ puiˉ ve yoˬ. (1 Peˍtruˆ 3:7) Iˉsaˍreˍlaˆ chaw maˇ daꞈ ve awˬ ceuˬ htaꞈ te tcuhˉ taˍ ve kʼo, yawˇ hui ve bon lawˬ hkawˇ htaꞈ Gʼuiˬ sha maˇ na. Bon lawˬ ve teˇ ceuˬ yawˆ yan cawˇ ve laꞈ shawnˍ hpehꞈ ve yoˬ. Yaꞈ hkʼaˇ, uiˍ ve venˇ baˆ te ve chaw dawˇ hpfuhˆ ve kʼo, yawˇ hui ve bon lawˬ hkawˇ htaꞈ htawˇ Gʼuiˬ sha haꞈ yuˬ piˇ ve yoˬ.—Iˉsaˍyaˆ 1:15; 55:7 gʼaw sheˍ.

 VDO nyi sheˍ Gʼuiˬ sha lehˬ bon lawˬ hkawˇ teˇ ceuˬ le le htaꞈ na yuˬ˗aw laˇ?

 Awˬ lawn kʼo, bon lawˬ ve lehˬ Gʼuiˬ sha htaꞈ oˉ kʼoˍ pui ve teˇ ceuˬ hpehꞈ ve pa taw, ngaˬ hui ve Te hpanˍ shehˍ hpaˇ Yaˬhoˉvaˬ geh ceh tiˉ lawˬ cawˇ ve yoˬ. (Maꞈhtehˍ 4:10; 6:9) Ngaˬ hui maˇ biˇ ve chaw hpehꞈ ve pa taw, Yeˍsuˆ awˬ meh awˬ hkʼaw lo lawˬ cawˇ ve yoˬ. Awˬ lawn kʼo, ngaˬ hui ve venˇ baˆ awˬ pon yawˇ gʼa suh ve yoˬ. (Yoˇhanˬ 14:6) Bon lawˬ htaˇ, teˇ pawˆ peuˬ teˇ pawˆ hkʼaˬ htaˆ kaꞈ hkʼa shuˍ shuˍ˗ehˬ lawˬ ve maˇ heˆ kʼo, bvuhꞈ taˍ ve bon lawˬ hkawˇ gʼaꞈ gʼaw tuˬ Yaˬhoˉvaˬ maˇ heuˆ gaˇ. Yawˇ lehˬ, ngaˬ hui bon lawˬ hkawˇ nyi ma hkʼaw tawˆ la tcuh piˇ gaˇ ve yoˬ.—Maꞈhtehˍ 6:7; Hpiˇliˇpiˆ 4:6, 7 gʼaw sheˍ.

 Taꞈ iˉ gawˬ lehˍ bon lawˬ ve htawˇ, ngaˬ hui ve Te hpanˍ shehˍ hpaˇ kaˇ ve yoˬ. (1 Saˍmo˗eˍlaˆ 1:12, 13) Hkʼaˬ ve teˇ yanˇ htawˇ, bon lawˬ tuˬ yawˇ ngaˬ hui htaꞈ kuˬ laˇ ve yoˬ. Chi htaꞈ pa taw, ngaˬ hui tu la htaˇ, maˇ zuhꞈ sheˍ htaˇ, awˍ caˇ htaˇ, leh dawˇ haˍ gaˇ haˍ htaˇ bon lawˬ hpehꞈ ve yoˬ.—Chiˇ mvuh ve 55:22; Maꞈhtehˍ 15:36 gʼaw sheˍ.

 Gʼuiˬ sha htaꞈ meuˆ daꞈ la tuˬ maˇ sha. Awˬ lawn kʼo, Gʼuiˬ sha htaꞈ maˇ yonˍ leh miˬ guiˬ hkʼoˆ gawˬ lehˍ cawˬ la tuˬ yoˬ tehꞈ yawˇ ka tiꞈ te taˍ ve htaꞈ kʼoˆ guiˇ gʼuiˬ guiˇ ve chaw awˬ kaˍ lo ngaˬ hui chehˇ taˍ ve yoˬ. (2 Tiˆmoˉseˍ 3:1, 4; 2 Peˍtruˆ 3:3, 13) Chi htaꞈ  pa taw, ngaˬ hui awˬ gʼaˇ yuˬ tuˬ awˬ pon hkʼa shuˍ yonˍ ve chaw htaꞈ awˬ chawˇ te tuˬ loˍ leh yawˇ hui htaꞈ htawˇ ngaˬ hui awˬ gʼaˇ piˇ tuˬ loˍ ve yoˬ.—Heˍbrehˇ 10:24, 25 gʼaw sheˍ.

 Gʼuiˬ sha htaꞈ haꞈ ve chaw htaꞈ awˬ chawˇ te ve teˇ ceuˬ Gʼuiˬ sha htaꞈ meuˆ daꞈ tuˬ, ngaˬ hui htaꞈ ga laˇ ve yoˬ. Yaˬhoˉvaˬ ve Shaˉhkiˆhkanˍ ve chaw hpawnˬ daꞈ kuiˬ lo, yawˇ hui yonˍ ve htaꞈ nyi ve teˇ yanˇ awˬ bon gʼa tuˬ yoˬ.—Roˉmaꞈ 1:11, 12 gʼaw sheˍ.

 Liꞈ hpu hkʼaw gʼa henˇ ve awˬ ceuˬ htaꞈ gʼaꞈ dawˇ nyi ve awˬ hkʼaw lo, nawˬ Yaˬhoˉvaˬ htaꞈ meuˆ daꞈ gʼa ve yoˬ. Yawˇ te taˍ ve kanˉ, yawˇ beˆ maˍ laˇ ve tawˇ hkawˇ, leh yawˇ ve ka tiꞈ htaꞈ chaˬ nyi loˬ. Ngaˬ hui bon lawˬ ve awˬ hkʼaw lo dawˇ nyi kʼai ve teˇ ceuˬ lehˬ, yawˇ ve cuˇ yiˍ leh haꞈ pehnˇ ve awˬ bon htaꞈ dawˇ nawˇ tcuh laˇ ve yoˬ.—Yawˇsuˆ 1:8; Chiˇ mvuh ve 1:1-3 gʼaw sheˍ.

 Gʼuiˬ sha htaꞈ yonˍ leh gʼaˇ va htaˇ hehꞈ, nawˬ yawˇ htaꞈ meuˆ daꞈ gʼa tuˬ yoˬ. Yaꞈ hkʼaˇ, a shaꞈ teꞈ ve teˇ ceuˬ htaꞈ gʼa caˍ piˇ ve hkʼa shuˍ shuˍ, yonˍ ve teˇ ceuˬ htaꞈ kaꞈ gʼa caˍ piˇ ve yoˬ. Nawˬ yonˍ ve teˇ ceuˬ htaꞈ caˍ tcuhˉ taˍ hpehꞈ tuˬ, nawˬ yonˍ la ve awˬ hkʼaˇ htaꞈ gʼa kʼawꞈ hpfuhˆ dawˇ nyi ve yoˬ.—Maꞈhtehˍ 4:4; Heˍbrehˇ 11:1, 6 gʼaw sheˍ.

 Yaˬhoˉvaˬ htaꞈ haꞈ ve chaw awˬ pon yawˇ dawˇ nyi piˇ puiˉ ve yoˬ. Yawˇ hui yonˍ ve teˇ ceuˬ maˇ kʼoˆ, co co taiˍ taiˍ ve a shaꞈ gʼa tuˬ dawˇ law kuiˬ htaꞈ maˇ kʼoˆ, kawˆ tuˬ cawˬ ve hkʼaw maˇ gʼa gaˬ tuˬ Gʼuiˬ sha haꞈ shaˉ piˇ ve yoˬ. (Chiˇ mvuh ve 91:1, 2, 7-10) Ngaˬ hui chehˇ sha cawˬ sha leh, ha lehˬ ve htaꞈ te luˬ laˇ ve awˬ ceuˬ jaw kʼai tuˬ yawˇ shaˍ tiꞈ peꞈ laˇ ve yoˬ. Ngaˬ hui htaꞈ daꞈ jaˇ ve a shaꞈ teꞈ hkʼaˇ Yaˬhoˉvaˬ maˍ laˇ ve yoˬ.—Chiˇ mvuh ve 73:27, 28; Yaˍkoˆ 4:4, 8 gʼaw sheˍ.