Chaw yaˇ miˬ guiˬ hkʼoˆ co co taiˍ taiˍ gʼa chehˇ ve awˬ lawn sha tanˇ Liꞈ hpu hkʼaw bvuhꞈ taˍ ve yoˬ. (Chiˇ mvuh ve 37:29) Liꞈ hpu hkʼaw awˬ kʼoˆ ehˉ 66 kʼoˆ cawˬ ve yoˬ. Awˬ kʼoˆ ehˉ oˇ ve teˇ hpaˍ bvuhꞈ tuˬ Gʼuiˬ sha lehˬ, hawˉ hkʼaˆ paˍ ka tiꞈ yeˬ ve 40 gʼaˇ htaꞈ yehˇ ve yoˬ. Ponˬ laˬ ve aˬ laˬ hkʼe 3,500 hkʼawꞈ htaˇ, Moˉseˍ lehˬ awˉ lawˉ 5 kʼoˆ bvuhꞈ ve yoˬ. Ponˬ laˬ ve 1,900 hkʼawꞈ hpaˆ htaˇ, tcuh yaˇ Yoˇhanˬ lehˬ awˬ leh meuˇ teˇ kʼoˆ bvuhꞈ peuˬ ve yoˬ. Liꞈ hpu bvuhꞈ paˍ a shu ve dawˇ hkʼaˇ bvuhꞈ ve le? Gʼuiˬ sha lehˬ, Liꞈ hpu bvuhꞈ paˍ teˇ hpaˍ htaꞈ yawˇ ve daꞈ kehˬ ve awˬ ha hpu dawˇ pawnˍ piˇ ve yoˬ. (2 Saˍmo˗eˍlaˆ 23:2) Yawˇ hui Gʼuiˬ sha ve dawˇ hkʼaˇ bvuhꞈ ve yoˬ. Yawˇ hui ve dawˇ hkʼaˇ maˇ heˆ. Chi htaꞈ pa taw, Liꞈ hpu lehˬ Yaˬhoˉvaˬ geh laˬ ve yoˬ.—2 Tiˆmoˉseˍ 3:16; 2 Peˍtruˆ 1:20, 21 gʼaw sheˍ.

VDO nyi sheˍ Liꞈ hpu lehˬ a shu ve dawˇ hkʼaˇ le?

 Liꞈ hpu Gʼuiˬ sha geh lo laˬ ve htaꞈ ngaˬ hui shiˍ ve yoˬ. Awˬ lawn kʼo, Liꞈ hpu lehˬ awˬ gʼuˇ suhˍ hpawˇ ve awˬ lawn hkʼa tawˍ lehˆ kʼoˆ laˇ ve yoˬ. Chaw yaˇ hkʼaˬ ve teˇ gʼaˇ htawˇ oˇ hkʼe te maˇ gʼa. (Yawˇsuˆ 23:14) Awˬ gʼuˇ suhˍ hpawˇ chaw yaˇ geh hpehꞈ la tuˬ ve awˬ ceuˬ, Awˬ gʼaˇ uiˍ shehˍ hpaˇ Gʼuiˬ sha teˇ gʼaˇ tiˉ shiˍ ve yoˬ.—Iˉsaˍyaˆ 42:9; 46:10 gʼaw sheˍ.

 Ngaˬ hui dawˇ law hpehꞈ ve, Gʼuiˬ sha geh lo laˬ ve liꞈ lehˬ awˬ kaˍ awˬ nu liꞈ htaꞈ peun daꞈ ve yoˬ. Liꞈ hpu oˇ hkʼe hpehꞈ ve yoˬ. Liꞈ hpu lehˬ laiˉ ha chaw ceuˬ tawˇ hkawˇ awˬ hkʼaw lo, laiˉ hinˉ lanˬ kʼoˆ pehˬ tawˆ˗e ve yoˬ. Liꞈ hpu lehˬ, aˬ sho˗eˬ htaˇ bvuhꞈ taˍ ve htawˇ, mvuhˇ lawn miˬ lawn henˇ paˍ shiˍ ve awˬ ceuˬ htaꞈ hawˍ daꞈ ve yoˬ. Liꞈ hpu 40 gʼaˇ bvuhꞈ taˍ ve awˬ lawn hawˍ daꞈ ve yoˬ. a Liꞈ hpu hkʼaw kʼoˆ taˍ ve haꞈ pehnˇ ve awˬ lawn lehˬ, awˬ tehˬ awˬ na haꞈ pehnˇ ve Gʼuiˬ sha geh laˬ ve yoˬ. Liꞈ hpu lehˬ, chaw yaˇ ve a shaꞈ teꞈ hkʼaˇ daꞈ la tuˬ pa piˇ ve kanˇ paˆ cawˬ ve yoˬ. Awˬ ceuˬ chi htaꞈ pa taw, Liꞈ hpu Gʼuiˬ sha ve tawˇ hkawˇ hpehꞈ ve yoˬ tehꞈ laiˉ lanˬ gʼaˇ yonˍ ve yoˬ.—1 Hteˇsaˍlawˇniˆ 2:13 gʼaw sheˍ.

 VDO nyi sheˍ Liꞈ hpu lehˬ awˬ tehˬ awˬ na hpehꞈ ve yoˬ tehꞈ, ngaˬ hui hkaˬ hkʼe te yonˍ gʼa tuˬ le?

 Gʼuiˬ sha chaw yaˇ htaꞈ dawˇ law kuiˬ peꞈ piˇ ve daꞈ ve awˬ lawn sha tanˇ Liꞈ hpu hkʼaw awˬ lawn lonˉ ma hpehꞈ ve yoˬ. Aˬ sho˗eˬ htaˇ, miˬ guiˬ hkʼoˆ paˍraˍdiˇsuˆ hkʼaw chaw yaˇ gʼa tawˆ˗e ve awˬ lawn leh, hko oˇ ve kʼawꞈ gu te tuˬ awˬ hkʼaˇ Liꞈ hpu kʼaoˍ taˍ ve yoˬ.—Hpeuꞈ maˍ ve 21:4, 5 gʼaw sheˍ.

 Gʼuiˬ sha ve tawˇ hkawˇ lehˬ awˬ liˇ tawˇ hkawˇ, awˬ liˇ awˬ hkʼaˇ, leh beˆ maˍ laˇ hkawˇ cawˬ ve yoˬ. Gʼuiˬ sha chaw yaˇ htaꞈ te piˇ jaw ve awˬ ceuˬ Liꞈ hpu awˬ hkʼaw lo bvuhꞈ taˍ ve yoˬ. Bvuhꞈ taˍ ve oˇ ve teˇ hpaˍ, Gʼuiˬ sha ve awˬ hoꞈ awˬ han te hkʼaˇ dawˇ hkʼaˇ hpeuꞈ maˍ laˇ ve yoˬ. Chi htaꞈ pa taw, nawˬ Gʼuiˬ sha htaꞈ shiˍ daꞈ tuˬ Liꞈ hpu ga laˇ gʼa ve yoˬ. Nawˬ Gʼuiˬ sha htaꞈ awˬ chawˇ te tuˬ ve awˬ hkʼaˇ kaꞈ Liꞈ hpu kʼaoˍ taˍ ve yoˬ.—Chiˇ mvuh ve 19:7, 11; Yaˍkoˆ 2:23; 4:8 gʼaw sheˍ.

 Liꞈ hpu tcuhˉ kuiˬ shiˍ tuˬ Yeˍsuˆ shu htaꞈ ga piˇ ve hkʼe, liꞈ chi teˇ kʼoˆ nawˬ htaꞈ ga laˇ ve yoˬ. Yawˇ lehˬ Liꞈ hpu awˬ tawn laiˉ tawn “tcuhˉ kuiˬ hpeuꞈ maˍ piˇ ve yoˬ.”—Luˉkaꞈ 24:27, 45 gʼaw sheˍ.

 Gʼuiˬ sha geh laˬ ve daꞈ ve awˬ lawn sha tanˇ chi aꞈ kehˉ daꞈ leuˉ ve hkʼaˬ nyiˇ ceuˬ maˇ cawˬ. Yaꞈ hkʼaˇ, chaw teˇ hpaˍ hpaˍ daꞈ ve awˬ lawn sha tanˇ chi htaꞈ a yeˇ maˇ te. Awˬ kaˍ awˬ nu chaw kʼo maˇ dawˇ cawˇ. Nyi ma taˇ luˬ. Nawˬ co co taiˍ taiˍ a shaꞈ teꞈ chehˇ tuˬ dawˇ law kuiˬ Gʼuiˬ sha htaꞈ shiˍ ve ceh tiˉ cawˬ ve yoˬ.—Yoˇhanˬ 17:3 gʼaw sheˍ.