Liꞈ hpu hkʼaw maˍ ve awˬ hkʼaˇ lonˉ teˇ hpaˍ htaꞈ henˇ ve lehˬ, nawˬ Yaˬhoˉvaˬ htaꞈ haꞈ ve teˇ ceuˬ awˬ gʼaˇ uiˍ la piˇ ve yoˬ. Haꞈ ve teˇ ceuˬ chi hkʼaˬ htaˆ kaꞈ gʼa uiˍ la piˇ ve yoˬ. (1 Peˍtruˆ 2:2) Liꞈ hpu henˇ ve awˬ hkʼaw lo nawˬ caˉ leh Gʼuiˬ sha htaꞈ awˬ chawˇ meuˆ daꞈ maˇ la htaˇ hehꞈ co co taiˍ taiˍ a shaꞈ teꞈ ve dawˇ law kuiˬ htaꞈ gʼa ve yoˬ.—Yoˇhanˬ 17:3; Yuˇdaꞈ 21 gʼaw sheˍ.

 Nawˬ Gʼuiˬ sha awˬ lawn shaˬ shiˍ maˇ la ve awˬ hkʼaw lo nawˬ yonˍ ve teˇ ceuˬ awˬ gʼaˇ shaˬ uiˍ la ve yoˬ. Yonˍ ve teˇ ceuˬ lehˬ, Gʼuiˬ sha nyi hkʼaˇ suh tuˬ ga laˇ ve yoˬ. (Heˍbrehˇ 11:1, 6) Nawˬ dawˇ hpfuhˆ leh a shaꞈ teꞈ hkʼaˇ kʼawꞈ gu daꞈ la tuˬ yonˍ ve teˇ ceuˬ awˬ gʼaˇ peꞈ laˇ ve yoˬ.—Tcuh yaˇ 3:19 gʼaw sheˍ.

 Nawˬ gʼa henˇ shiˍ taˍ ve awˬ ceuˬ shu htaꞈ nawˬ hto piˇ gaˇ ve lehˬ anˇ tuˬ hpehꞈ ve maˇ heˆ. Awˬ lawn kʼo, ngaˬ hui teˇ gʼaˇ le le daꞈ ve awˬ lawn shu htaꞈ hto piˇ gaˇ ve yoˬ. Nawˬ Liꞈ hpu caˉ henˇ ve awˬ hkʼaw lo, nawˬ lehˬ Yaˬhoˉvaˬ awˬ lawn maˇ kʼoˆ, daꞈ ve awˬ lawn sha tanˇ maˇ kʼoˆ, yonˍ ve teˇ ceuˬ shu htaꞈ kʼaoˍ maˍ piˇ tuˬ Liꞈ hpu yehˇ ve awˬ hkʼaˇ gʼa henˇ ve yoˬ.—Roˉmaꞈ 10:13-15 gʼaw sheˍ.

 Maˇ˗awˍ ve chaw lehˬ, daꞈ ve awˬ lawn sha tanˇ tanˬ hto piˇ htaˇ, awˬ viˉ awˬ nyi leh awˬ chawˇ awˬ paˆ htaꞈ awˉ lawˉ hto piˇ ve yoˬ. Tawˇ yaw shaˉ yaw ve nuˇ lehˍ te loˬ. Yawˇ hui yonˍ yaꞈ ve yoˬ tehꞈ, kʼoˆ piˇ ve aꞈ kehˉ Gʼuiˬ sha ka tiꞈ te taˍ ve awˬ lawn hto piˇ loˬ. Laiˉ pawˆ kʼo, nawˬ maˍ hkawˇ aꞈ kehˉ nawˬ te ve awˬ hkʼaˇ shu ve nyi ma htaꞈ heuˆ ve yoˬ tehꞈ taˇ leunˇ.—2 Tiˆmoˉseˍ 2:24, 25 gʼaw sheˍ.

 Gʼuiˬ sha tawˇ hkawˇ henˇ ve teˇ ceuˬ co ha hpawˇ uiˍ la mvuh la tuˬ ga laˇ ve yoˬ. Awˬ leh meuˇ gaˬ leh, nawˬ Yaˬhoˉvaˬ htaꞈ meuˆ daꞈ jaˇ ve awˬ chawˇ teˇ gʼaˇ hpehꞈ gʼa ve yoˬ. Awˬ tehˬ kʼo, nawˬ yawˇ ve yehˬ yaˇ kʼa yaˇ teˇ gʼaˇ kaꞈ hpehꞈ ve yoˬ.—2 Kawˇrenˍhtuˆ 6:18 gʼaw sheˍ.

 Nawˬ Gʼuiˬ sha tawˇ hkawˇ caˉ henˇ ve awˬ hkʼaw lo uiˍ la mvuh la gʼa ve yoˬ. (Heˍbrehˇ 5:13, 14) Yaˬhoˉvaˬ ve Shaˉhkiˆhkanˍ ve chaw teˇ gʼaˇ geh Liꞈ hpu henˇ tuˬ lawˬ loˬ. Yawˇ lehˬ, Liꞈ hpu ngaˬ hui htaꞈ aˬ htoꞈ ma maˍ laˇ gʼa ve le? tehꞈ kʼoˆ ve liꞈ htaꞈ yehˇ tuˬ yoˬ. Nawˬ Gʼuiˬ sha ve tawˇ hkawˇ htaꞈ shaˬ henˇ kʼo, shaˬ nawˬ a shaꞈ teꞈ kuiˬ daꞈ maˇ la ve yoˬ.—Chiˇ mvuh ve 1:1-3; 73:27, 28 gʼaw sheˍ.

 Daꞈ ve awˬ lawn sha tanˇ lehˬ, ha lehˬ ve Gʼuiˬ sha geh laˬ ve yoˬ. Yawˇ ve chaw hui htaꞈ awˬ chawˇ meuˆ daꞈ maˇ la ve kʼo, yawˇ htaꞈ kaꞈ meuˆ daꞈ maˇ la ve yoˬ. (Heˍbrehˇ 10:24, 25) Yaˬhoˉvaˬ nyi hkʼaˇ suh tuˬ coˇ caˇ leh te tcuhˉ taˍ ve kʼo, co co taiˍ taiˍ ve awˬ tehˬ ve a shaꞈ gʼaˇ hteꞈ vawˆ tiˍ chehˇ ve yoˬ. Gʼuiˬ sha htaꞈ awˬ chawˇ meuˆ daꞈ maˇ la ve teˇ ceuˬ chi aꞈ kehˉ daꞈ ve teˇ ceuˬ maˇ cawˬ.—1 Tiˆmoˉseˍ 1:11; 6:19 gʼaw sheˍ.