Tawˇ tanˬ yaw daꞈ ve
Awˬ lawn 4
Nyi ma nuˇ nehˬ ve
Awˬ liˇ awˬ hkʼaˇ: ‘Nyi ma nuˇ nehˬ ve awˬ hkʼaw lo, a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ˗oˆ.’—Hpiˇliˇpiˆ 2:3.
Pawˇluꞈ hkʼaˬ hkʼe te ve le?
1. VDO nyi ve maˇ heˆ leh Tcuh yaˇ liꞈ 26:2, 3 gʼaw sheˍ. Peuˬ leh na hkawˇ chi teˇ hpaˍ htaꞈ dawˇ nyi sheˍ:
-
Pawˇluꞈ jawˇ mawˇ Aˍgiˇpaˆ geh tawˇ yaw daꞈ htaˇ, nyi ma nuˇ nehˬ ve hkʼaˬ hkʼe hpeuꞈ maw piˇ ve le?
-
Pawˇluꞈ yawˇ awˬ to htaꞈ a yeˇ yuˬ ve aꞈ kehˉ Yaˬhoˉvaˬ leh Liꞈ hpu htaꞈ a yeˇ yuˬ tuˬ hkʼaˬ hkʼe te ve le?—Tcuh yaˇ 26:22 hkʼaw nyi sheˍ.
Pawˇluꞈ ve awˬ lawn aˬ htoꞈ ma maˍ laˇ ve le?
2. Ngaˬ hui hto toˇ htaˇ, yawˆ yan ve leh nuˇ nehˬ ve hkʼaw tawˇ yaw ve kʼo, shu na gaˇ tuˬ yoˬ.
Pawˇluꞈ htaꞈ henˇ yuˬ ve
3. Yawˆ yan ve hkʼaw tawˇ yaw ve. Ngaˬ hui teˇ lawn le le shiˍ leh ngaˬ hui yaw daꞈ ve chaw teꞈ chiˉ maˇ shiˍ ve tehꞈ taˇ te piˇ. Yaꞈ hkʼaˇ, ngaˬ hui yawˇ geh yawˆ yan ve hkʼaw tawˇ yaw daꞈ sheˍ.
4. Ngaˬ hui maˍ ve awˬ lawn Liꞈ hpu hkʼaw cawˬ ve tehꞈ hpeuꞈ maw piˇ ve. Gʼuiˬ sha ve tawˇ hkawˇ lehˬ chaw yaˇ ve te hkʼaˇ dawˇ hkʼaˇ htaꞈ pa piˇ gʼa ve yoˬ. Ngaˬ hui Liꞈ hpu htaꞈ hkʼaˬ htaˆ kaꞈ yehˇ ve kʼo, awˬ nu ve chaw ngaˬ hui ve tawˇ hkawˇ aꞈ kehˉ, Gʼuiˬ sha ve tawˇ hkawˇ htaꞈ yonˍ tuˬ yoˬ.
5. Hkʼaˬ htaˆ kaꞈ nyi ma nuˇ nehˬ ve. Ngaˬ hui cawˇ ve tehꞈ hpeuꞈ maw piˇ tuˬ ceh tiˉ maˇ te. Ngaˬ hui maˇ deˇ daꞈ tcuh gaˇ ve yoˬ. Chi hkʼoˆ kaꞈ, ngaˬ hui nyi ma nuˇ nehˬ ve tehꞈ hpeuꞈ maw piˇ ve lehˬ, nyi ma gawˬ lehˍ te leh hkʼaˬ hkʼe htaˇ tawˇ maˇ yaw cawˇ ve htaꞈ shiˍ ve yoˬ. (Tawˇ naˉ ve 17:14; Tiˇtuˆ 3:2) Ngaˬ hui nyi ma nuˇ nehˬ ve hkʼaw tawˇ yaw ve kʼo, ngaˬ hui yaw daꞈ ve chaw awˬ gʼuˇ suhˍ hpawˇ daꞈ ve awˬ lawn sha tanˇ htaꞈ na gaˇ tuˬ yoˬ hehˉ.
