‘Nawˬ hui shu htaꞈ maˍ piˇ shehˍ hpaˇ hpehꞈ cawˇ ve yoˬ.’ (Heˍ 5:12) Dawˇ nyi sheˍ. Mvuhˇ naw ma miˬ naˆ ma hkʼoˆ Yaˬhoˉvaˬ lehˬ cheuˬ jaˇ ve saˍ laꞈ lonˉ hpehꞈ ve yoˬ. Yawˇ ve awˬ lawn shu htaꞈ maˍ tuˬ yawˇ ngaˬ hui htaꞈ kuˬ laˇ ve yoˬ! Yehˬ kʼa hkʼaw maˇ kʼoˆ, Hkriꞈ yaˇ awˬ moˍ hkʼaw maˇ kʼoˆ, hto toˇ kuiˬ lo maˇ kʼoˆ, Yaˬhoˉvaˬ ve awˬ lawn shu htaꞈ maˍ piˇ ve lehˬ awˬ hpfuhˇ hkʼaˆ jaˇ leh a yeˇ uiˍ ve awˬ vuiˬ hpehꞈ ve yoˬ. Ngaˬ hui hkʼaˬ hkʼe te gʼa tuˬ le?

Tcuh yaˇ Pawˇluꞈ ve tawˇ hkawˇ htaꞈ dawˇ nyi sheˍ. Yawˇ Tiˆmoˉseˍ htaꞈ kʼoˆ piˇ ve, “shu htaꞈ Liꞈ hpu gʼaw maˍ piˇ ve, awˬ gʼaˇ piˇ ve leh maˍ piˇ ve teˇ hpaˍ htaꞈ coˇ caˇ leh te chehˇ taˍ˗oꞈ. . . . Nawˬ chi hkʼe te ve kʼo, nawˬ awˬ to htaꞈ maˇ kʼoˆ, nawˬ ve hkawˇ htaꞈ gʼa kaˇ ve chaw teˇ hpaˍ htaꞈ maˇ kʼoˆ, nawˬ htaiˍ hkʼawꞈ piˇ tuˬ yoˬ.” (1 Tiˆ 4:13, 16) Nawˬ hto toˇ ve awˬ lawn shu ve a shaꞈ htaꞈ ponˬ piˇ gʼa ve yoˬ. Chi htaꞈ pa taw, nawˬ gʼaw ve leh maˍ ve htaꞈ daꞈ la tcuh cawˇ ve yoˬ. Liꞈ chi teˇ kʼoˆ nawˬ htaꞈ ga laˇ tuˬ yoˬ. Chi teˇ hpaˍ htaꞈ dawˇ nyi sheˍ.

Yaˬhoˉvaˬ “nawˬ hui htaꞈ maˍ laˇ tuˬ yoˬ.” (Isy 30:20) Nawˬ gʼaw leh maˍ puiˉ tuˬ liꞈ chi teˇ kʼoˆ ga laˇ ve htawˇ, ngaˬ hui hto toˇ ve awˬ lawn lehˬ Yaˬhoˉvaˬ geh laˬ leh yawˇ shu htaꞈ gʼawˬ veu laˇ ve yoˬ tehꞈ taˇ leunˇ piˇ. (Yoˇ 6:44) Chi htaꞈ pa taw, daꞈ kehˬ ve awˬ ha hpu hkʼaˬ htaˆ kaꞈ lawˬ sheˍ. Gʼuiˬ sha ve tawˇ hkawˇ hkʼa dehꞈ yehˇ sheˍ. Yaˬhoˉvaˬ htaꞈ chiˇ mvuh leh a shu yawˇ awˬ to htaꞈ a yeˇ yuˬ tuˬ taˇ te. Na taˍ ve chaw Yaˬhoˉvaˬ htaꞈ nyi ma awˬ tawˬ hkʼa gaˬ haꞈ tuˬ dawˇ law taˍ sheˍ.

Chaw yaˇ awˬ pon a yeˇ uiˍ ve awˬ lawn hto maˍ piˇ tuˬ, Yaˬhoˉvaˬ nawˬ htaꞈ kuˬ laˇ ve yoˬ. Nawˬ “Gʼuiˬ sha peꞈ laˇ ve awˬ gʼaˇ awˬ shaˉ htaꞈ cuˇ” ve kʼo, nawˬ te gʼa ve yoˬ tehꞈ ngaˬ hui hkʼa dehꞈ yonˍ ve yoˬ.—1 Peˍ 4:11.

Nawˬ geh teˇ geh liꞈ maˍ chehˇ ve chaw,

Yaˬhoˉvaˬ ve Shaˉhkiˆhkanˍ ve chaw ve Uˉ peunˍ ve Kawˍmiˍtiˍ