1, 2. Saˍtanˍ leh neˇ hui htaꞈ caˉ daꞈ ve awˬ lawn ngaˬ hui aˬ htoꞈ ma shiˍ tuˬ loˍ ve le?

 Ngaˬ hui Yaˬhoˉvaˬ ve miˬ guiˬ awˬ suhˉ hkʼaw gʼa chehˇ htaˇ, a shaꞈ teꞈ chehˇ ve daꞈ jaˇ tuˬ yoˬ. Awˬ leh meuˇ gaˬ kʼo, Gʼuiˬ sha dawˇ law taˍ ve hkʼe gʼa teꞈ chehˇ tuˬ yoˬ. Yaꞈ hkʼaˇ, chi teˇ hkui ngaˬ hui Saˍtanˍ leh neˇ hui uˉ peunˍ ve miˬ guiˬ hkʼoˆ chehˇ taˍ ve yoˬ. (2 Kawˇrenˍhtuˆ 4:4) Ngaˬ hui yawˇ hui htaꞈ maˇ mawˬ gʼa ve htawˇ, yawˇ hui awˬ tehˬ awˬ na teꞈ chehˇ leh kanˇ paˆ cawˬ maˇ jaˇ.

² Ngaˬ hui Yaˬhoˉvaˬ htaꞈ meuˆ daꞈ tcuhˉ taˍ leh Saˍtanˍ htaꞈ tawˍ daꞈ gʼaˇ tuˬ, ngaˬ hui te cawˇ ve aw ceuˬ htaꞈ chi teˇ lawn hkʼaw henˇ tuˬ yoˬ. Ngaˬ hui htaꞈ ga laˇ tuˬ yoˬ tehꞈ Yaˬhoˉvaˬ ka tiꞈ te laˇ ve yoˬ. Yaꞈ hkʼaˇ, Saˍtanˍ leh neˇ hui ngaˬ hui htaꞈ beˬ yuˬ leh te luˬ laˇ tuˬ ve awˬ hkʼaˇ ngaˬ hui shiˍ tuˬ loˍ ve yoˬ.

3. Saˍtan ngaˬ hui htaꞈ aˬ htoꞈ ma te laˇ gaˇ ve le?

³ Saˍtanˍ kʼoˆ ve, chaw yaˇ a shu yawˇ awˬ to pon ceh tiˉ dawˇ nyi ve pa taw, Yaˬhoˉvaˬ htaꞈ oˉ kʼoˍ pui chehˇ leh, ngaˬ hui haˍ ve awˬ ceuˬ gʼa hpuˇ ve kʼo, Yaˬhoˉvaˬ htaꞈ chiˇ baˬ tuˬ yoˬ. (Yawˇbaˆ 2:4, 5 gʼaw sheˍ.) Chaw teˇ gʼaˇ Yaˬhoˉvaˬ ve awˬ lawn henˇ gaˇ ve htaꞈ Saˍtanˍ leh neˇ hui mawˬ htaˇ, yawˇ hui coˇ caˇ leh tawˍ piˇ tuˬ yoˬ. Chaw teˇ gʼaˇ Yaˬhoˉvaˬ htaꞈ awˬ to chiˇ aꞈ leh Baˆtiˆsaˬ haꞈ yuˬ ve kʼo, yawˇ hui nyi ma zuhˆ jaˇ. Liꞈ hpu hkʼaw kʼoˆ ve, Neˇ haiˬ Saˍtanˍ “kuˬ chehˇ ve laˇ caˬ shiˉ hkʼa shuˍ shuˍ, shu htaꞈ cheꞈ caˇ  tuˬ ca caw nyi toˇ chehˇ ve yoˬ.” (1 Peˍtruˆ 5:8) Saˍtanˍ lehˬ ngaˬ hui Yaˬhoˉvaˬ htaꞈ meuˆ daꞈ ve teˇ ceuˬ te luˬ laˇ gaˇ ve yoˬ.—Chiˇ mvuh ve 7:1, 2; 2 Tiˆmoˉseˍ 3:12.

4, 5. (a) Saˍtanˍ maˇ te gʼa ve aˬ htoꞈ ma le? (b) “Neˇ haiˬ htaꞈ tawˍ taˍ˗oꞈ” tehꞈ kʼoˆ ve aˬ htoꞈ ma htaꞈ kʼoˆ gaˇ ve le?

⁴ Yaꞈ hkʼaˇ, ngaˬ hui Saˍtanˍ leh neˇ hui htaꞈ kawˆ tuˬ maˇ loˍ. Yawˇ hui ngaˬ hui htaꞈ teˇ ceuˬ le le te laˇ gʼa tuˬ Yaˬhoˉvaˬ a hkaw˗anˬ maˇ piˇ. Awˬ tehˬ ve Hkriꞈ yaˇ “chaw awˬ moˍ lonˉ” lehˬ “uiˍ jaˇ ve tuꞈ ve hkanˍ ve” htaꞈ ponˬ tuˬ yoˬ tehꞈ, Yaˬhoˉvaˬ ka tiꞈ te taˍ ve yoˬ. (Hpeuꞈ maˍ ve 7:9, 14) Awˬ ceuˬ chi ve awˬ tehˬ hpehꞈ la tuˬ yoˬ. Saˍtanˍ hkʼaˬ ma coˇ caˇ ve htawˇ, tawˍ taˍ maˇ gʼa. Awˬ lawn kʼo, Yaˬhoˉvaˬ yawˇ ve chaw htaꞈ haꞈ shaˉ piˇ tuˬ yoˬ.

 ⁵ Ngaˬ hui Yaˬhoˉvaˬ htaꞈ hkʼaˬ htaˆ kaꞈ meuˆ daꞈ chehˇ ve kʼo, Saˍtanˍ ngaˬ hui htaꞈ te luˬ laˇ maˇ gʼa. Liꞈ hpu ngaˬ hui htaꞈ awˬ gʼaˇ peꞈ laˇ leh kʼoˆ ve, “nawˬ hui Gʼuiˬ sha geh chehˇ kʼo, Gʼuiˬ sha htawˇ nawˬ hui geh chehˇ tuˬ yoˬ.” (2 Raˍsaˍvanˍ 15:2; 1 Kawˇrenˍhtuˆ 10:13 gʼaw sheˍ.) Aˍbeˍlaˆ, Eˇnawˆ, Noˉaꞈ, Saˍraˇ, Moˉseˍ, leh awˬ kaˍ awˬ nu ka tiꞈ yeˬ ve chaw laiˉ gʼaˇ Yaˬhoˉvaˬ htaꞈ hkʼaˬ htaˆ kaꞈ meuˆ daꞈ chehˇ leh Saˍtanˍ htaꞈ tawˍ daꞈ gʼaˇ jaw ve yoˬ. (Heˍbrehˇ 11:4-40) Ngaˬ hui kaꞈ te gʼa ve yoˬ. Liꞈ hpu hkʼaw kʼoˆ ve, “Neˇ haiˬ htaꞈ tawˍ taˍ˗oꞈ. Nawˬ hui lo yawˇ hpaw tawˆ˗e tuˬ yoˬ.”—Yaˍkoˆ 4:7.

6. Saˍtanˍ ngaˬ hui htaꞈ hkʼaˬ hkʼe te luˬ laˇ ve le?

⁶ Saˍtanˍ ngaˬ hui htaꞈ teˇ ceuˬ le le te laˇ gʼa tuˬ Yaˬhoˉvaˬ yawˇ htaꞈ a hkaw˗anˬ maˇ piˇ ve tehꞈ yawˇ shiˍ ve htawˇ, ngaˬ hui Gʼuiˬ sha htaꞈ meuˆ daꞈ ve luˬ kʼai tuˬ yawˇ coˇ caˇ ve yoˬ. Chi beuꞈ teˇ co˗e, ngaˬ hui htaꞈ te luˬ laˇ tuˬ Neˇ haiˬ laiˉ hkʼaˇ yehˇ ve yoˬ. Laiˉ hiˉ hkʼawꞈ yehˇ jaw ve laiˉ hkʼaˇ htaꞈ kaꞈ yehˇ chehˇ sheˍ ve yoˬ. Awˬ hkʼaˇ chi teˇ hpaˍ aˬ htoꞈ ma cawˬ ve le?

7. Aˬ htoꞈ ma te Saˍtanˍ ngaˬ hui htaꞈ tawˍ laˇ ve le?

⁷ Tcuh yaˇ Yoˇhanˬ bvuhꞈ taˍ ve, “miˬ guiˬ hkʼa peu˗eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ” ve yoˬ. (1 Yoˇhanˬ 5:19) Saˍtanˍ haiˬ ve miˬ guiˬ htaꞈ uˉ peunˍ chehˇ leh Yaˬhoˉvaˬ ve chaw htaꞈ kaꞈ uˉ peunˍ gaˇ ve yoˬ. (Miˆhkaˍ 4:1; Yoˇhanˬ 15:19; Hpeuꞈ maˍ ve 12:12, 17) Yawˇ awˬ yanˇ a ciˉ ceh tiˉ cawˬ ve tehꞈ Saˍtanˍ shiˍ ve pa taw, ngaˬ hui Gʼuiˬ sha htaꞈ ka tiꞈ maˇ yeˬ tuˬ yawˇ gʼaˇ hteꞈ nyiˉ laˇ ve yoˬ. Teˇ pawˆ pawˆ kʼo, Neˇ haiˬ tawˍ laˇ ve awˬ hkʼaˇ htaꞈ hkʼa tawˍ lehˆ mawˬ ve yoˬ. Yaꞈ hkʼaˇ, teˇ pawˆ pawˆ kʼo Neˇ haiˬ geh laˬ ve tehꞈ ngaˬ hui hkʼa dehꞈ maˇ mawˬ.

8. Hkriꞈ yaˇ aˬ htoꞈ ma awˬ lawn tawnˇ taˍ cawˇ ve le?

⁸ Eˇfeˇsuꞈ liꞈ 6:12 hkʼaw kʼoˆ ve, ngaˬ hui “mvuhˇ hpe lo  chehˇ ve haiˬ ve awˬ ha teˇ hpaˍ htaꞈ . . . gʼa tawˍ daꞈ ve yoˬ.” Yaˬhoˉvaˬ htaꞈ awˬ to chiˇ aꞈ piˇ ve chaw teˇ gʼaˇ le le Neˇ haiˬ leh neˇ hui htaꞈ gʼa tawˍ daꞈ ve tehꞈ ngaˬ hui maˇ leunˇ cawˇ. Pawˇluꞈ Eˇfeˇsuꞈ Hkriꞈ yaˇ htaꞈ liꞈ bvuhꞈ piˇ htaˇ, “yeˬ chehˇ” leh tawˍ daꞈ˗oꞈ tehꞈ 3 pawˆ kʼoˆ piˇ ve yoˬ.—Eˇfeˇsuꞈ 6:11, 13, 14.

9. Saˍtanˍ leh neˇ hui coˇ caˇ leh ngaˬ hui htaꞈ aˬ htoꞈ ma te laˇ ve le?

⁹ Ngaˬ hui htaꞈ heˍ yuˬ beˬ yuˬ tuˬ, Saˍtanˍ leh neˇ hui laiˉ hkʼaˇ yehˇ ve yoˬ. Ngaˬ hui Saˍtanˍ ve awˬ hkʼaˇ teˇ hkʼaˇ tawˍ daꞈ gʼaˇ ve kʼo, awˬ kaˍ awˬ nu awˬ hkʼaˇ htaꞈ kaꞈ gʼaˇ tuˬ yoˬ tehꞈ kʼoˆ gaˇ ve maˇ heˆ. Ngaˬ hui htaꞈ va htaw tuˬ, Saˍtanˍ ngaˬ hui ve gʼaˇ nuˇ kuiˬ gʼaꞈ nyi ve yoˬ. Yaꞈ hkʼaˇ, yawˇ ve va hkʼaˬ hkʼe cawˬ ve Liꞈ hpu maˍ laˇ ve pa taw, ngaˬ hui yawˇ ve va htaꞈ jaw kʼai gʼa ve yoˬ. (2 Kawˇrenˍhtuˆ 2:11; Kʼoˆ maˍ ve awˬ lawn 31 htaꞈ nyi sheˍ.) Yawˇ yehˇ ve teˇ hkʼaˇ lehˬ neˇ te ve awˬ ceuˬ yoˬ.

10. (a) Neˇ te ve awˬ ceuˬ aˬ htoꞈ ma le? (b) Neˇ te ve awˬ ceuˬ htaꞈ Yaˬhoˉvaˬ hkʼaˬ hkʼe dawˇ ve le?

¹⁰ Neˇ te ve awˬ ceuˬ lehˬ chaw yaˇ aꞈ kehˉ kanˇ paˆ cawˬ ve htaꞈ caˉ daꞈ ve yoˬ. Chi hkʼe te ve chaw lehˬ neˇ hui htaꞈ caˉ daꞈ chehˇ ve yoˬ. Tawˇ pa haˉ te kʼo, awˬ bon daꞈ maˇ daꞈ ve htaꞈ nyi ve, mawˉ paˍ sheˍ paˍ geh kʼai ve, faˍ te shaˉ te ve, suh peuˬ ve chaw htaꞈ tawˇ ca yaw ve chi teˇ hpaˍ hpehꞈ ve yoˬ. Liꞈ hpu hkʼaw kʼoˆ ve, neˇ te ve awˬ ceuˬ “chaꞈ chiˆ” leh ngaˬ hui neˇ hui htaꞈ caˉ daꞈ ve kʼo, Yaˬhoˉvaˬ htaꞈ kaꞈ oˉ kʼoˍ pui maˇ hpehꞈ. (Bon maˍ ve 18:10-12; Hpeuꞈ maˍ ve 21:8) Hkriꞈ yaˇ neˇ te ve teˇ ceuˬ le le htaꞈ gʼa jaw kʼai ve yoˬ.—Roˉmaꞈ 12:9.

11. Chaw yaˇ aꞈ kehˉ kanˇ paˆ cawˬ ve awˬ ceuˬ htaꞈ ngaˬ hui dawˇ cawˇ ve kʼo, aˬ htoꞈ ma hpehꞈ la ve le?

¹¹ Chaw yaˇ aꞈ kehˉ kanˇ paˆ cawˬ ve awˬ ceuˬ htaꞈ ngaˬ hui dawˇ cawˇ ve kʼo, ngaˬ hui neˇ te ve awˬ ceuˬ htaꞈ ca te tuˬ beˬ yuˬ sha ve tehꞈ Saˍtanˍ shiˍ ve yoˬ. Neˇ te ve awˬ ceuˬ teˇ  ceuˬ le le ngaˬ hui Yaˬhoˉvaˬ geh meuˆ daꞈ ve htaꞈ te luˬ laˇ gʼa ve yoˬ.

12. Saˍtanˍ ngaˬ hui htaꞈ hkʼaˬ hkʼe dawˇ tcuh gaˇ ve le?

¹² Saˍtanˍ coˇ caˇ leh chaw yaˇ awˬ lawn teˇ hpaˍ fuiˍ daꞈ pehˬ daꞈ maˇ gʼa tuˬ te piˇ ve yoˬ. Yawˇ hui htawˇ dawˇ nawˬ dawˇ cawˬ la tuˬ Neˇ haiˬ a yehˉ yehˉ te piˇ ve pa taw, chaw yaˇ “haiˬ ve awˬ ceuˬ htaꞈ daꞈ ve awˬ ceuˬ tehꞈ kʼoˆ leh, daꞈ ve awˬ ceuˬ htaꞈ haiˬ ve awˬ ceuˬ tehꞈ kʼoˆ chehˇ ve yoˬ.” (Iˉsaˍyaˆ 5:20) Liꞈ hpu hkʼaw beˆ maˍ laˇ ve yehˇ maˇ gʼa, leh Gʼuiˬ sha ve awˬ liˇ awˬ hkʼaˇ htaꞈ maˇ gʼaꞈ te ve kʼo, ngaˬ hui ha lehˬ tuˬ yoˬ tehꞈ Neˇ haiˬ ngaˬ hui htaꞈ dawˇ tcuh gaˇ ve yoˬ.

13. Chaw yaˇ htawˇ dawˇ nawˬ dawˇ cawˬ la tuˬ, Saˍtanˍ hkʼaˬ hkʼe te ve le?

¹³ Htawˇ dawˇ nawˬ dawˇ cawˬ la tuˬ ve lehˬ Saˍtanˍ yehˇ gʼa jaˇ ve teˇ hkʼaˇ hpehꞈ ve yoˬ. Yawˇ awˬ hkʼaˇ chi htaꞈ yehˇ laˬ ve maw jaˇ peuˬ. Eˍdenˍ hko hkʼaw Eˇvaꞈ htawˇ dawˇ nawˬ dawˇ cawˬ tuˬ Neˇ haiˬ na piˇ ve, “hko hkʼaw lo cawˬ ve iˉ shiˍ teˇ hpaˍ htaꞈ maˇ gʼa caˇ tehꞈ Gʼuiˬ sha kʼoˆ laˇ taˍ ve laˇ?” (Awˬ hkuiˉ puiˍ 3:1) Yawˇbaˆ awˬ co˗e htaˇ, mvuhˇ naw ma tcuh yaˇ mehˆ gʼuˇ suhˍ Saˍtanˍ Yaˬhoˉvaˬ htaꞈ na piˇ ve, “Yawˇbaˆ nawˬ geh teˇ ceuˬ ceuˬ maˇ gʼa ve hkʼe kʼo, yawˇ nawˬ htaꞈ oˉ kʼoˍ pui tuˬ hehˉ laˇ?” (Yawˇbaˆ 1:9) Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, Saˍtanˍ yawˇ htaꞈ kʼoˆ piˇ ve, “nawˬ Gʼuiˬ sha ve Yaˇ hpu hpehꞈ ve kʼo, ha pui shiˍ chi teˇ hpaˍ htaꞈ hkaoˍ monˇ hpehꞈ la tuˬ tawˇ piˇ˗oˆ.”—Maꞈhtehˍ 4:3.

14. ‘Neˇ te ve awˬ ceuˬ awˬ tehˬ maˇ daꞈ ve laˇ’ tehꞈ chaw yaˇ htawˇ dawˇ nawˬ dawˇ cawˬ la tuˬ, Saˍtanˍ aˬ htoꞈ ma te ve le?

¹⁴ Chi beuꞈ teˇ co˗e htawˇ, chaw yaˇ htawˇ dawˇ nawˬ dawˇ cawˬ la tuˬ Neˇ haiˬ coˇ caˇ chehˇ ve yoˬ. Neˇ te ve teˇ ceuˬ ceuˬ kawˆ tuˬ maˇ cawˬ tehꞈ Saˍtanˍ chaw yaˇ htaꞈ dawˇ tcuh ve yoˬ. Chi htaꞈ pa taw, ‘neˇ te ve awˬ ceuˬ awˬ tehˬ maˇ daꞈ ve laˇ’ tehꞈ chaw teˇ hpaˍ hpaˍ htawˇ dawˇ nawˬ dawˇ  cawˬ la ve yoˬ. Ngaˬ hui ve awˬ viˉ awˬ nyi teˇ hpaˍ hpaˍ htawˇ, htawˇ dawˇ nawˬ dawˇ cawˬ ve yoˬ. (2 Kawˇrenˍhtuˆ 11:3) Oˇ hkʼe kʼo, ngaˬ hui a shu yawˇ awˬ to htaꞈ hkʼaˬ hkʼe te fanˬ gʼa tuˬ le? Saˍtanˍ ngaˬ hui htaꞈ heˍ maˇ gʼa tuˬ, hkʼaˬ hkʼe gʼa te ve le? Saˍtanˍ heˍ laˇ gʼa ve 2 hpawˇ htaꞈ teˇ geh chaˬ nyi sheˍ. Chi teˇ hpaˍ lehˬ pyawˍ ve awˬ ceuˬ leh a naˍ gu ve awˬ hkʼaˇ hpehꞈ ve yoˬ.

15. Pyawˍ ve htaꞈ ngaˬ hui leuˆ yuˬ ve teˇ yanˇ, hkʼaˬ hkʼe te neˇ hui htaꞈ caˉ daꞈ gʼa ve le?

¹⁵ Chi beuꞈ teˇ co˗e, awˬ han hkʼaw, vdo hkʼaw, awˬ han tawˆ kuiˬ hkʼaw (TV), hkaw hpi˗u teuˇ leˬ guiˇ ve hkʼaw, leh In˗teu˗neꞈ hkʼaw, neˇ ve awˬ lawn, faˍ te shaˉ te ve, chaw yaˇ aꞈ kehˉ kanˇ paˆ cawˬ ve awˬ lawn htaꞈ caˉ daꞈ ve chi teˇ hpaˍ cawˬ ve yoˬ. Awˬ lawn chi hkʼe ve kawˆ tuˬ maˇ cawˬ leh pyawˍ jaˇ tehꞈ laiˉ gʼaˇ dawˇ ve yoˬ. Yawˇ hui a shaꞈ teꞈ kuiˬ lo neˇ hui htaꞈ loꞈ la tcuh chehˇ ve pa taw, kawˆ tuˬ uiˍ jaˇ tehꞈ yawˇ hui maˇ shiˍ. Chaw teˇ gʼaˇ awˬ bon daꞈ maˇ daꞈ ve htaꞈ nyi ve, laꞈ hkʼaˇ nyi ve, hpaiˇ nyi ve, goˬ liˬ shiˍ htaꞈ mawˉ nyi ve chi teˇ hpaˍ te ve kʼo, yawˇ neˇ te ve awˬ ceuˬ htaꞈ caˉ daꞈ chehˇ ve yoˬ. Nyi˗a kʼo, nyi ma pfuhˇ lawꞈ lawꞈ cawˬ leh pyawˍ jaˇ tehꞈ Saˍtanˍ chaw yaˇ htaꞈ dawˇ tcuh ve yoˬ. Chi htaꞈ pa taw, awˬ ceuˬ chi ve kawˆ tuˬ cawˬ jaˇ ve tehꞈ laiˉ gʼaˇ maˇ mawˬ. Awˬ tehˬ awˬ na neˇ te ve awˬ ceuˬ htaꞈ maˇ ca caˉ daꞈ ve kʼo, neˇ hui ve awˬ lawn leh chaw yaˇ aꞈ kehˉ kanˇ paˆ cawˬ ve awˬ lawn htaꞈ nyi ve htawˇ, kawˆ tuˬ maˇ cawˬ tehꞈ teˇ hpaˍ hpaˍ dawˇ ve yoˬ hehˉ. Aˬ htoꞈ ma te chi hkʼe dawˇ ve kawˆ tuˬ cawˬ ve le?—1 Kawˇrenˍhtuˆ 10:12.

16. Chaw yaˇ aꞈ kehˉ kanˇ paˆ cawˬ ve pyawˍ ve awˬ ceuˬ htaꞈ aˬ htoꞈ ma te ngaˬ hui maˇ ca caˉ daꞈ cawˇ ve le?

¹⁶ Saˍtanˍ leh neˇ hui ngaˬ hui ve dawˇ hkʼaˇ htaꞈ shiˍ maˇ gʼa. Yaꞈ hkʼaˇ, ngaˬ hui leh ngaˬ hui ve yehˬ kʼa awˬ pon teˇ  ceuˬ ceuˬ leuˆ yuˬ htaˇ, pyawˍ ve awˬ ceuˬ leuˆ yuˬ htaˇ, ngaˬ hui aˬ htoꞈ ma loˍ ve, hkʼaˬ hkʼe dawˇ ve yawˇ hui shiˍ gʼa ve yoˬ. Neˇ hui htaꞈ caˉ daꞈ ve awˬ han, liꞈ hkawˇ, liꞈ kʼoˆ, faˍ te shaˉ te ve, neˇ geh ve, mawˉ nyi ma, neˇ suhˍ chawꞈ ve, maˇ heˆ leh chi htaꞈ shuˍ ve awˬ lawn leuˆ yuˬ ve kʼo, Saˍtanˍ leh neˇ hui ve awˬ lawn ngaˬ hui shiˍ gaˇ ve tehꞈ yawˇ hui shiˍ ve yoˬ. Chi hkʼe hpehꞈ ve kʼo, ngaˬ hui neˇ te ve awˬ ceuˬ htaꞈ ca caˉ daꞈ tuˬ, yawˇ hui beˬ yuˬ laˇ sha ve yoˬ.—Gaˍlaˍtiˆ 6:7 gʼaw sheˍ.

17. Ngaˬ hui chehˇ sha cawˬ sha gaˇ ve pa taw, Saˍtanˍ awˬ lawn chi htaꞈ hkʼaˬ hkʼe te yehˇ ve le?

¹⁷ Teˇ gʼaˇ le le chehˇ sha cawˬ sha gaˇ ve pa taw, Saˍtanˍ awˬ lawn chi htaꞈ yehˇ leh beˬ yuˬ laˇ ve yoˬ. Chi beuꞈ teˇ  co˗e, naˬ ve gawˬ ve htaꞈ laiˉ gʼaˇ gʼa hkanˍ chehˇ ve yoˬ. Teˇ hpaˍ hpaˍ a naˍ gu ve awˬ hkʼaˇ laiˉ hpawˇ ca te nyi ve htawˇ, maˇ hkehnˇ la. (Maˍkuˆ 5:25, 26) Yawˇ hui dawˇ law kuiˬ maˇ cawˬ ve pa taw, hkʼaˬ hkʼe ve awˬ hkʼaˇ kaꞈ te nyi gaˇ ve yoˬ. Yaꞈ hkʼaˇ, ngaˬ hui Hkriꞈ yaˇ hpehꞈ ve pa taw, neˇ te ve awˬ ceuˬ htaꞈ caˉ daꞈ ve a naˍ gu ve awˬ hkʼaˇ maˇ ca cuˇ tuˬ, shaˍ tiꞈ gʼa te ve yoˬ.—Oˉ kʼoˍ pui ve 19:31.

18. Hkriꞈ yaˇ a naˍ gu ve awˬ hkʼaˇ hkʼaˬ hkʼe ve htaꞈ jaw kʼai cawˇ ve le?

¹⁸ Aˬ sho˗eˬ htaˇ, Iˉsaˍreˍlaˆ chaw teˇ hpaˍ hpaˍ faˍ te shaˉ te ve yoˬ. Yaˬhoˉvaˬ yawˇ hui htaꞈ kʼoˆ piˇ ve, “nawˬ hui laꞈ sheh chiˇ leh bon lawˬ chehˇ ve htawˇ, ngaˬ nawˬ hui htaꞈ nyi laˇ tuˬ ve maˇ heˆ. Nawˬ hui bon hkʼaˬ ma lawˬ ve htawˇ, ngaˬ na yuˬ laˇ tuˬ ve maˇ heˆ.” (Iˉsaˍyaˆ 1:15) Yaˬhoˉvaˬ yawˇ hui ve bon lawˬ hkawˇ htaꞈ maˇ na yuˬ piˇ! Teˇ ceuˬ ceuˬ te leh Yaˬhoˉvaˬ geh meuˆ daꞈ ve htaꞈ luˬ kʼai ve kʼo, ngaˬ hui maˇ te gaˇ. Yaˬhoˉvaˬ hkʼaˬ htaˆ kaꞈ ga laˇ tcuh gaˇ ve kʼo, ngaˬ hui maˇ chehˇ sha ve htawˇ, yawˇ maˇ dawˇ cawˇ ve awˬ ceuˬ htaꞈ gʼa jaw kʼai ve yoˬ. (Chiˇ mvuh ve 41:3) Chi htaꞈ pa taw, ngaˬ hui a naˍ gu ve awˬ hkʼaˇ maˇ te sheˍ htaˇ, awˬ hkʼaˇ chi ve neˇ te ve awˬ ceuˬ maˇ heˆ leh chaw yaˇ aꞈ kehˉ kanˇ paˆ cawˬ ve htaꞈ caˉ daꞈ ve laˇ tehꞈ ngaˬ hui hkʼa dehꞈ gʼa chaˬ nyi ve yoˬ. (Maꞈhtehˍ 6:13) Neˇ hui htaꞈ caˉ daꞈ ve kʼo, ngaˬ hui te maˇ gʼa!—Kʼoˆ maˍ ve awˬ lawn 32 htaꞈ nyi sheˍ.

19. Saˍtanˍ chaw yaˇ htaꞈ hkʼaˬ hkʼe te kawˆ tcuh ve le?

¹⁹ Saˍtanˍ leh neˇ hui awˬ tehˬ teꞈ chehˇ ve maˇ heˆ tehꞈ chaw teˇ hpaˍ dawˇ ve yoˬ. Yaꞈ hkʼaˇ, awˬ nu ve chaw neˇ hui htaꞈ gʼa mawˬ leh awˬ hkawˇ gʼa kaˇ jaw ve pa taw, neˇ hui awˬ tehˬ teꞈ chehˇ ve tehꞈ yawˇ hui shiˍ ve yoˬ. Laiˉ gʼaˇ neˇ hui htaꞈ caˉ daꞈ ve awˬ liˇ awˬ hkʼaˇ yonˍ jaˇ leh haiˬ jaˇ ve neˇ htaꞈ kawˆ jaˇ. Shu neˇ hui htaꞈ kawˆ tuˬ, chaw teˇ hpaˍ hpaˍ neˇ hui naˬ tuˬ te laˇ ve awˬ lawn laiˉ gʼaˇ htaꞈ ca kʼoˆ piˇ ve yoˬ. Laiˉ pawˆ kʼo, chaw yaˇ awˬ lawn oˇ hkʼe ve htaꞈ shiˍ gaˇ  jaˇ leh shu htaꞈ haˆ kʼoˆ maˍ piˇ gaˇ ve yoˬ. Chi htaꞈ pa taw, chaw yaˇ neˇ hui htaꞈ kawˆ jaˇ ve yoˬ.

20. Saˍtanˍ htaꞈ maˇ ga piˇ gaˇ ve kʼo, aˬ htoꞈ ma maˇ te cawˇ ve le?

²⁰ Saˍtanˍ lehˬ chaw yaˇ yawˇ htaꞈ kawˆ tcuh gaˇ ve yoˬ. (2 Hteˇsaˍlawˇniˆ 2:9, 10) Yawˇ heˍ puiˉ jaˇ. Neˇ te ve awˬ ceuˬ dawˇ cawˇ ve chaw htaꞈ yawˇ beˬ yuˬ leh heˍ ve awˬ lawn teˇ hpaˍ yon tcuh ve yoˬ. Oˇ hkʼe ve chaw yawˇ gʼa mawˬ gʼa kaˇ jaw ve awˬ ceuˬ shu htaꞈ kʼoˆ maˍ piˇ ve yoˬ. Awˬ lawn oˇ ve htaꞈ shaˬ te shaˬ kʼoˆ daꞈ kʼai ve kʼo, awˬ tehˬ awˬ na cawˬ ve hkʼe hpehꞈ la ve yoˬ. Saˍtanˍ htaꞈ maˇ ga piˇ gaˇ ve pa taw, awˬ lawn oˇ hkʼe ve shu htaꞈ ca kʼoˆ maˍ piˇ tuˬ, ngaˬ hui maˇ te.—Yoˇhanˬ 8:44; 2 Tiˆmoˉseˍ 2:16.

21. Neˇ hui ve awˬ lawn aꞈ kehˉ ngaˬ hui aˬ htoꞈ ma ve awˬ lawn kʼoˆ cawˇ ve le?

²¹ Yaˬhoˉvaˬ ve chaw neˇ htaꞈ mawˬ leh awˬ hkawˇ kaˇ jaw ve kʼo, shu dawˇ cawˇ tuˬ ca kʼoˆ maˍ piˇ ve htaꞈ maˇ te cawˇ. Saˍtanˍ leh neˇ hui te gʼa ve awˬ ceuˬ htaꞈ Yaˬhoˉvaˬ ve chaw maˇ kawˆ cawˇ. Yaˬhoˉvaˬ Yeˍsuˆ htaꞈ kanˇ paˆ piˇ ve awˬ lawn ngaˬ hui dawˇ nyi leh shu htaꞈ kʼoˆ maˍ piˇ cawˇ ve yoˬ. (Heˍbrehˇ 12:2) Yeˍsuˆ awˬ laꞈ gʼawˇ htaꞈ neˇ ve awˬ lawn kʼoˆ maˍ piˇ jaw ve htawˇ, yawˇ hui ha lehˬ tuˬ ceh te piˇ ve maˇ heˆ. Yawˇ Gʼuiˬ sha ve mvuhˇ miˬ awˬ lawn sha tanˇ leh Gʼuiˬ sha ve “uiˍ jaˇ ve kanˉ” htaꞈ hkʼaˬ htaˆ kaꞈ kʼoˆ maˍ piˇ ve yoˬ.—Tcuh yaˇ 2:11; Luˉkaꞈ 8:1; Roˉmaꞈ 1:11, 12.

22. Nawˬ aˬ htoꞈ ma te tuˬ dawˇ taˍ ve le?

²² Ngaˬ hui Yaˬhoˉvaˬ geh maˇ kʼawꞈ meuˆ daꞈ tuˬ, Saˍtanˍ dawˇ law taˍ ve tehꞈ taˇ leunˇ piˇ. Chi hkʼe hpehꞈ la tuˬ, yawˇ te gʼa ve hkʼe teˇ ceuˬ le le te tuˬ yoˬ. Yaꞈ hkʼaˇ, ngaˬ hui yawˇ ve awˬ hkʼaˇ htaꞈ shiˍ leh neˇ te ve awˬ ceuˬ teˇ ceuˬ le le htaꞈ maˇ caˉ daꞈ gaˇ. Ngaˬ hui dawˇ taˍ ve htaꞈ te luˬ laˇ tuˬ, Neˇ haiˬ htaꞈ “a hkaw˗anˬ taˇ piˇ.” (Eˇfeˇsuꞈ 4:27 gʼaw sheˍ.) Ngaˬ hui yawˇ htaꞈ tawˍ daꞈ ve kʼo, yawˇ ve va htaꞈ maˇ yaw tuˬ yoˬ. Yaˬhoˉvaˬ uˉ peunˍ ve awˬ hawˉ lo chehˇ ve pa taw, ngaˬ hui kawˆ tuˬ maˇ cawˬ.—Eˇfeˇsuꞈ 6:11.