Yaˬhoˉvaˬ leh yawˇ ve tawˇ hkawˇ Liꞈ hpu htaꞈ haꞈ ve chaw teˇ gʼaˇ le le˗oˬ,

Yeˍsuˆ kʼoˆ ve “hteˇ ve cawˇ ve awˬ ceuˬ htaꞈ nawˬ hui shiˍ tuˬ yoˬ. Hteˇ ve cawˇ ve awˬ ceuˬ oˇ ve lehˬ nawˬ hui htaꞈ hpehˇ laˇ tuˬ yoˬ.” (Yoˇhanˬ 8:32) Liꞈ hpu hkʼaw awˬ tehˬ ve htaꞈ nawˬ awˉ lawˉ gʼa shiˍ htaˇ, nawˬ hkʼaˬ hkʼe kʼai ve dawˇ nyi sheˍ. Maˇ heˆ heˆ ve awˬ ceuˬ miˬ guiˬ chi hkʼoˆ hkʼa biˇ cawˬ ve htawˇ, awˬ tehˬ ve awˬ lawn gʼa henˇ ve ha lehˬ jaˇ.—2 Tiˆmoˉseˍ 3:1.

Yaˬhoˉvaˬ Gʼuiˬ sha awˬ tehˬ ve awˬ lawn ngaˬ hui htaꞈ shiˍ tcuh gaˇ ve yoˬ. Ngaˬ hui shu htaꞈ haꞈ leh awˬ tehˬ ve awˬ lawn kʼoˆ maˍ piˇ gaˇ ve yoˬ. Yaꞈ hkʼaˇ, Gʼuiˬ sha kanˉ te tuˬ ngaˬ hui chi aꞈ kehˉ gʼa coˇ caˇ ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ yawˆ yan ve pa taw, Hkriꞈ yaˇ ve a shaꞈ teꞈ hkʼaˇ teꞈ chehˇ kʼai gʼa tuˬ, ngaˬ hui te gʼa ve hkʼe teˇ ceuˬ le le te ve yoˬ. Ngaˬ hui Gʼuiˬ sha htaꞈ haꞈ ve tehꞈ hpeuꞈ maw piˇ tuˬ, a yeˇ uiˍ ve awˬ hkʼaˇ Yeˍsuˆ kʼoˆ maˍ laˇ ve yoˬ. Yawˇ kʼoˆ ve, “ngaˬ lehˬ ngaˬ Awˬ pa piˇ taˍ ve tawˇ hkawˇ teˇ hpaˍ htaꞈ na yuˬ leh, yawˇ ve haꞈ pehnˇ ve awˬ hkʼaw lo chehˇ ve yoˬ. Chi hkʼa shuˍ shuˍ, nawˬ hui htawˇ ngaˬ piˇ taˍ ve tawˇ hkawˇ teˇ hpaˍ htaꞈ na yuˬ ve kʼo, ngaˬ ve haꞈ pehnˇ ve awˬ hkʼaw lo nawˬ hui chehˇ tuˬ yoˬ.”—Yoˇhanˬ 15:10.

Yeˍsuˆ Awˬ pa htaꞈ haꞈ jaˇ leh Awˬ pa kʼoˆ piˇ ve teˇ ceuˬ le le htaꞈ gʼaꞈ te ve yoˬ. Ngaˬ hui a shaꞈ teꞈ kuiˬ hkʼaw Yeˍsuˆ htaꞈ henˇ yuˬ ve kʼo, Yaˬhoˉvaˬ ngaˬ hui htaꞈ haꞈ leh ngaˬ hui awˬ tehˬ awˬ na ha lehˬ tuˬ yoˬ. Yeˍsuˆ kʼoˆ ve, “awˬ ceuˬ chi teˇ hpaˍ htaꞈ nawˬ hui shiˍ leh, shiˍ ve hkʼe te ve kʼo, nawˬ hui awˬ bon uiˍ ve yoˬ.”—Yoˇhanˬ 13:17.

Liꞈ hpu hkʼaw cawˬ ve awˬ tehˬ ve htaꞈ a shaꞈ teꞈ kuiˬ lo yuˬ yehˇ ve awˬ hkʼaˇ leh Gʼuiˬ sha geh awˬ chawˇ te ve awˬ hkʼaˇ shiˍ tuˬ, liꞈ chi teˇ kʼoˆ nawˬ hui htaꞈ ga laˇ gʼa ve tehꞈ ngaˬ hui dawˇ law ve yoˬ. Nawˬ hui Gʼuiˬ sha htaꞈ haꞈ maˇ laˇ tuˬ leh “co tiꞈ ha tiꞈ gʼa htaˇ hkʼa gaˬ” nawˬ hui “Gʼuiˬ sha ve haꞈ pehnˇ ve awˬ hkʼaw lo a shu yawˇ awˬ to yeˬ chaweh chehˇ taˍ” gʼa tuˬ, ngaˬ hui bon lawˬ laˇ chehˇ ve yoˬ.—Yuˇdaꞈ 21.