1, 2. Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve laꞈ shawnˍ aˬ htoꞈ ma le?

 Yaˬhoˉvaˬ ngaˬ hui teˇ gʼaˇ le le htaꞈ awˬ hpfuhˇ hkʼaˆ jaˇ ve laꞈ shawnˍ peꞈ laˇ ve yoˬ. Laꞈ shawnˍ chi ve lehˬ a shaꞈ hpehꞈ ve yoˬ. (Awˬ hkuiˉ puiˍ 1:27) Yawˇ ngaˬ hui htaꞈ daꞈ jaˇ ve a shaꞈ teꞈ chehˇ tcuh gaˇ ve yoˬ. Chi htaꞈ pa taw, ngaˬ hui hkʼa dehꞈ dawˇ cheˆ gʼa tuˬ, yawˇ awˬ liˇ awˬ hkʼaˇ peꞈ laˇ leh maˍ laˇ ve yoˬ. “Daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa” tuˬ, ngaˬ hui awˬ liˇ awˬ hkʼaˇ chi teˇ hpaˍ htaꞈ yehˇ cawˇ ve yoˬ. (Heˍbrehˇ 5:14) Chi hkʼe te ve lehˬ ngaˬ hui hkʼa dehꞈ dawˇ nyi puiˉ tuˬ Yaˬhoˉvaˬ maˍ laˇ chehˇ ve hkʼa shuˍ yoˬ. Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve kʼo, a shaꞈ teꞈ kuiˬ lo daꞈ la ve htaꞈ ngaˬ hui mawˬ leh a shaꞈ awˬ tehˬ awˬ na awˬ hpfuhˇ hkʼaˆ jaˇ ve htaꞈ ngaˬ hui shiˍ la ve yoˬ.

² Ngaˬ hui a shaꞈ teꞈ kuiˬ lo awˬ lawn cawˬ la puiˉ ve yoˬ. Laiˉ pawˆ kʼo, Liꞈ hpu hkʼaw awˬ liˇ tawˇ hkawˇ hteˇ lehˍ maˇ kʼoˆ taˍ ve awˬ ceuˬ htaꞈ gʼa hpuˇ ve yoˬ. Tawˇ pa haˉ te kʼo, a naˍ gu tuˬ awˬ hkʼaˇ awˬ suhˍ htaꞈ caˉ daꞈ ve ngaˬ hui gʼa dawˇ cheˆ ve yoˬ hehˉ. Hkʼaˬ hkʼe te leh Yaˬhoˉvaˬ nyi hkʼaˇ suh tuˬ le? Yaˬhoˉvaˬ a shaꞈ leh awˬ suhˍ htaꞈ hkʼaˬ hkʼe te shawˍ ve awˬ liˇ awˬ hkʼaˇ Liꞈ hpu hkʼaw bvuhꞈ taˍ ve yoˬ. Awˬ liˇ awˬ hkʼaˇ chi teˇ hpaˍ htaꞈ na gʼa ve kʼo, ngaˬ hui cuˇ yiˍ cawˬ ve hkʼaw dawˇ cheˆ gʼa leh daꞈ ve dawˇ shiˍ puiˉ ve nyi ma cawˬ gʼa ve yoˬ. (Tawˇ naˉ ve 2:6-11) Chi teˇ hkui ngaˬ hui awˬ liˇ awˬ hkʼaˇ teˇ hpaˍ hpaˍ htaꞈ teˇ geh henˇ tuˬ yoˬ.

3, 4. (a) Awˬ suhˍ ve awˬ lawn Yaˬhoˉvaˬ hkʼaˬ hkʼe dawˇ ve le? (b) Awˬ suhˍ lehˬ aˬ htoꞈ ma le?

³ Awˬ suhˍ lehˬ a shaꞈ hkʼa shuˍ hpehꞈ ve yoˬ. Chi htaꞈ pa taw, awˬ suhˍ daꞈ kehˬ jaˇ ve tehꞈ Li hpu ngaˬ hui htaꞈ maˍ laˇ ve yoˬ. Yaˬhoˉvaˬ mehˆ gʼuˇ suhˍ a shaꞈ awˬ hpfuhˇ hkʼaˆ jaˇ. Kaˍiˉnaˆ yawˇ ve awˬ nyi paˍ htaꞈ tiˇ pehˍ peuˬ hkʼawꞈ nawˉ Yaˬhoˉvaˬ kʼoˆ ve, “nawˬ nyi paˍ ve awˬ suhˍ lehˬ miˬ guiˬ hkʼaw chehˇ taˍ leh ngaˬ htaꞈ kuˬ chehˇ ve yoˬ.” (Awˬ hkuiˉ puiˍ 4:10) Aˍbeˍlaˆ ve awˬ suhˍ lehˬ yawˇ ve a shaꞈ aw tan hpehꞈ ve pa taw, Kaˍiˉnaˆ Aˍbeˍlaˆ htaꞈ tiˇ pehˍ ve teˇ yanˇ, Kaˍiˉnaˆ yawˇ awˬ nyi paˍ ve a shaꞈ yuˬ kʼai ve yoˬ.

⁴ Noˉaꞈ teˇ co˗e iˉ kaˆ htonˍ peuˬ hkʼawꞈ nawˉ, shaˍ caˇ hpehꞈ ve tehꞈ Gʼuiˬ sha chaw yaˇ htaꞈ kʼoˆ piˇ ve yoˬ. Yaꞈ hkʼaˇ, “a shaꞈ teꞈ ve awˬ ceuˬ hpehꞈ ve awˬ suhˍ teˇ ceuˬ htaꞈ awˬ shaˍ geh teˇ geh nawˬ hui maˇ gʼa hkawꞈ caˇ” tehꞈ yawˇ kʼoˆ taˍ ve yoˬ. (Awˬ hkuiˉ puiˍ 9:4) Tawˇ hkawˇ chi ve Noˉaꞈ ve awˬ yaˇ awˬ duˬ leh ngaˬ hui teˇ gʼaˇ le le gʼa na yuˬ ve yoˬ. Yaˬhoˉvaˬ mehˆ gʼuˇ suhˍ awˬ suhˍ lehˬ a shaꞈ hkʼa shuˍ hpehꞈ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Ngaˬ hui Yaˬhoˉvaˬ hkʼa shuˍ gʼa dawˇ ve yoˬ.—Chiˇ mvuh ve 36:9.

5, 6. Yaˬhoˉvaˬ a shaꞈ leh awˬ suhˍ htaꞈ shawˍ ve awˬ hkʼaˇ Moˉseˍ ve awˬ liˇ tawˇ hkawˇ hkʼaw hkʼaˬ hkʼe maˍ laˇ taˍ ve le?

⁵ Moˉseˍ ve awˬ liˇ tawˇ hkawˇ hkʼaw Yaˬhoˉvaˬ kʼoˆ ve, “chaw hkʼaˬ ve teˇ gʼaˇ maˇ kʼoˆ, awˬ suhˍ htaꞈ caˇ ve kʼo, yawˇ htaꞈ Gʼuiˬ sha ve chaw tehꞈ shawˍ maˇ hpehꞈ. A shaꞈ teꞈ ve awˬ ceuˬ hkʼa peu˗eˬ lehˬ awˬ suhˍ htaꞈ pa taw teꞈ chehˇ ve yoˬ.”—Oˉ kʼoˍ pui ve 17:10, 11.

⁶ Moˉseˍ ve awˬ liˇ tawˇ hkawˇ hkʼaw kʼoˆ ve, a shu teˇ gʼaˇ to nuˇ to shaˆ tiˇ caˇ ve kʼo, awˬ suhˍ miˬ guiˬ hkʼaw gʼa duˇ tuˍ ve yoˬ. Chi hkʼe te ve lehˬ to nuˇ to shaˆ ve awˬ suhˍ Hpanˍ shehˍ hpaˇ Yaˬhoˉvaˬ htaꞈ kʼawꞈ hkʼawꞈ piˇ ve  hkʼa shuˍ yoˬ. (Bon maˍ ve 12:16; Yeˍsaˍkeˍlaˆ 18:4) Yaꞈ hkʼaˇ, Iˉsaˍreˍlaˆ chaw to nuˇ to shaˆ awˬ suhˍ a ciˉ kaꞈ maˇ cawˬ htaˇ hkʼa gaˬ yuˬ tawˆ tuˬ Yaˬhoˉvaˬ maˇ dawˇ law. Yawˇ hui te gʼa ve hkʼe te leh awˬ suhˍ yuˬ tawˆ˗oˬ ve kʼo, awˬ shaˍ oˇ ve caˇ htaˇ daꞈ ve dawˇ shiˍ puiˉ ve nyi ma cawˬ gʼa ve yoˬ. Yawˇ hui awˬ suhˍ htaꞈ taˍ uiˍ ve pa taw, A shaꞈ peꞈ laˇ shehˍ hpaˇ Yaˬhoˉvaˬ htaꞈ kaꞈ taˍ uiˍ chehˇ ve yoˬ. Iˉsaˍreˍlaˆ chaw venˇ baˆ hpehˇ piˇ ve htaꞈ gʼa tuˬ, yawˇ hui to nuˇ to shaˆ gʼa tuˉ tanˇ ve tehꞈ awˬ liˇ tawˇ hkawˇ hkʼaw kʼoˆ taˍ sheˍ ve yoˬ.—Kʼoˆ maˍ ve awˬ lawn 19˗20 htaꞈ nyi sheˍ.

7. Daˍviˆ awˬ suhˍ htaꞈ taˍ uiˍ ve yawˇ hkʼaˬ hkʼe hpeuꞈ maw laˇ ve le?

⁷ Daˍviˆ Hpiˇliˇtiˆ chaw htaꞈ bawˆ daꞈ chehˇ ve teˇ yanˇ, yawˇ te ve awˬ ceuˬ lehˬ awˬ suhˍ awˬ hpfuhˇ hkʼaˆ jaˇ tehꞈ ngaˬ hui htaꞈ shiˍ tcuh laˇ ve yoˬ. Daˍviˆ iˉ kaˆ shiˉ jaˇ ve teˇ pawˆ htaˇ, yawˇ ve chaw suh ve htaꞈ maˇ kawˆ leh canˇ paˍ chehˇ kuiˬ lo kʼai leh iˉ kaˆ hkʼo veu laˇ piˇ ve yoˬ. Yaꞈ hkʼaˇ, Daˍviˆ maˇ dawˬ. Yaˬhoˉvaˬ htaꞈ “tanˇ piˇ ve awˬ hkʼaw lo miˬ chaˇ hkʼoˆ lo ngeuˍ baˬ ve yoˬ.” Daˍviˆ kʼoˆ ve, “[Yaˬhoˉvaˬ˗oˬ,] iˉ kaˆ chi htaꞈ ngaˬ dawˬ maˇ hpehꞈ. Iˉ kaˆ chi htaꞈ dawˬ ve kʼo, iˉ kaˆ chi htaꞈ a shaꞈ tanˇ leh ca hkʼo ve chaw chi shehˆ gʼaˇ ve awˬ suhˍ htaꞈ dawˬ ve hkʼe hpehꞈ ve yoˬ.” Gʼuiˬ sha mehˆ gʼuˇ suhˍ a shaꞈ leh awˬ suhˍ awˬ hpfuhˇ hkʼaˆ jaˇ tehꞈ Daˍviˆ hkʼa dehꞈ shiˍ ve yoˬ.—2 Saˍmo˗eˍlaˆ 23:15-17.

8, 9. Chi beuꞈ ve Hkriꞈ yaˇ awˬ suhˍ htaꞈ hkʼaˬ hkʼe te shawˍ ve le?

⁸ Hkriꞈ yaˇ awˬ co˗e gaˬ la htaˇ, Gʼuiˬ sha ve chaw to nuˇ to shaˆ maˇ kʼawꞈ tuˉ tanˇ. Yaꞈ hkʼaˇ, yawˇ hui awˬ suhˍ htaꞈ cawˇ ve hkʼaw gʼa shawˍ taˍ sheˍ. Moˉseˍ ve awˬ liˇ tawˇ hkawˇ teˇ hpaˍ hpaˍ htaꞈ yawˇ hui gʼa gʼaꞈ te sheˍ. Teˇ ceuˬ lehˬ “awˬ suhˍ htaꞈ caˇ ve” yawˇ hui gʼa “jaw kʼai” ve yoˬ. Chi ve guiˇ yaꞈ ve leh shaˉ hoꞈ htaꞈ oˉ kʼoˍ pui ve jaw kʼai ve hkʼa shuˍ a yeˇ uiˍ ve yoˬ.—Tcuh yaˇ 15:28, 29.

⁹ Chi beuꞈ kaꞈ hkʼa shuˍ yoˬ. Yaˬhoˉvaˬ lehˬ a shaꞈ teꞈ ve  awˬ hkuiˉ puiˍ hpehꞈ leh a shaꞈ hkʼa teꞈ ve hkʼa peu˗eˬ yawˇ ve mawˇ hpehꞈ ve tehꞈ, Hkriꞈ yaˇ teˇ gʼaˇ le le shiˍ ve yoˬ. Awˬ suhˍ daꞈ kehˬ jaˇ leh a shaꞈ awˬ tan hpehꞈ ve htaꞈ kaꞈ ngaˬ hui shiˍ ve yoˬ. Chi htaꞈ pa taw, a naˍ gu tuˬ awˬ hkʼaˇ awˬ suhˍ htaꞈ caˉ daꞈ ve ngaˬ hui dawˇ cheˆ gʼa tuˬ, Liꞈ hpu hkʼaw ve awˬ liˇ awˬ hkʼaˇ htaꞈ gʼa dawˇ nyi ve yoˬ.

10, 11. (a) Shaˉhkiˆhkanˍ ve chaw awˬ suhˍ maˇ heˆ leh awˬ suhˍ hkʼaw cawˬ ve awˬ ceuˬ 4 ceuˬ keu ve htaꞈ hkʼaˬ hkʼe te shawˍ ve le? (b) Hkriꞈ yaˇ a shu yawˇ hkʼaˇ yawˇ aˬ htoꞈ ma awˬ lawn gʼa dawˇ cheˆ ve le?

¹⁰ “Awˬ suhˍ caˇ ve” htaꞈ gʼa “jaw kʼai” ve lehˬ maˇ caˇ leh maˇ dawˬ ve ceh tiˉ maˇ heˆ tehꞈ, Yaˬhoˉvaˬ ve Shaˉhkiˆhkanˍ ve chaw hkʼa dehꞈ na gʼa ve yoˬ. Chi kʼoˆ gaˇ ve lehˬ ngaˬ hui awˬ to hkʼaw awˬ suhˍ maˇ yuˬ keu, awˬ suhˍ maˇ tanˇ piˇ, leh awˬ gʼuˇ suhˍ hpawˇ yehˇ tuˬ ngaˬ hui ve awˬ suhˍ maˇ gʼawˆ teh ve yoˬ. Chi hkʼoˆ kaꞈ, awˬ suhˍ nyiˉ˗ehˍ ve, awˬ suhˍ hpuˉ˗ehˍ ve, hpeˍleˆ (platelets), hpaˆshuhˍmaˇ (plasma) awˬ suhˍ hkʼaw cawˬ ve awˬ ceuˬ 4 ceuˬ keu ve htaꞈ ngaˬ hui kaꞈ maˇ haꞈ yuˬ ve yoˬ.

¹¹ Awˬ suhˍ hkʼaw cawˬ ve awˬ ceuˬ 4 ceuˬ chi htaꞈ kʼawꞈ pehˬ tawˆ gʼa ve yoˬ. Chi ve lehˬ awˬ yawˬ ehˉ kʼoˆ ve yoˬ. A naˍ gu tuˬ awˬ yawˬ ehˉ htaꞈ yehˇ tuˬ laˇ, maˇ yehˇ tuˬ laˇ, Hkriꞈ yaˇ teˇ gʼaˇ le le a shu yawˇ hkʼaˇ yawˇ gʼa dawˇ cheˆ ve yoˬ. Ngaˬ hui ve awˬ suhˍ maˇ gʼawˆ teh taˍ ve htaꞈ yehˇ ve htawˇ, hkʼa dehꞈ gʼa dawˇ nyi ve yoˬ. Shawˆ hpeꞈ htaˇ, tehˆ nyi htaˇ, a naˍ gu chehˇ htaˇ, ngaˬ hui ve awˬ suhˍ htaꞈ hkʼaˬ hkʼe te yehˇ cawˇ ve tehꞈ, Hkriꞈ yaˇ teˇ gʼaˇ le le a shu yawˇ hkʼaˇ yawˇ gʼa dawˇ cheˆ ve yoˬ.—Kʼoˆ maˍ ve awˬ lawn 21 htaꞈ nyi sheˍ.

12. (a) Dawˇ shiˍ puiˉ ve nyi ma htaꞈ yehˇ leh dawˇ cheˆ htaˇ, aˬ htoꞈ ma te Yaˬhoˉvaˬ mehˆ gʼuˇ suhˍ a yeˇ uiˍ ve le? (b) Cuˇ yiˍ cawˬ ve hkʼaw a naˍ gu ve awˬ hkʼaˇ leuˆ yuˬ gʼa tuˬ, ngaˬ hui hkʼaˬ hkʼe te gʼa ve le?

¹² Ngaˬ hui dawˇ shiˍ puiˉ ve nyi ma htaꞈ yehˇ leh dawˇ cheˆ htaˇ, Yaˬhoˉvaˬ a yeˇ yuˬ chehˇ˗aw laˇ? Yoˬ, Yaˬhoˉvaˬ  ngaˬ hui ve dawˇ hkʼaˇ leh nyi ma hkʼaw cawˬ ve awˬ ceuˬ a yeˇ yuˬ chehˇ ve yoˬ. (Tawˇ naˉ ve 17:3; 24:12 gʼaw sheˍ.) Chi htaꞈ pa taw, ngaˬ hui a naˍ gu tuˬ awˬ hkʼaˇ maˇ leuˆ yuˬ sheˍ htaˇ, beˆ maˍ laˇ tuˬ Yaˬhoˉvaˬ geh bon gʼa lawˬ leh awˬ lawn awˬ tanˇ gʼa ca hpfuhˆ nyi ve yoˬ. Oˇ ve hkʼawꞈ nawˉ, Liꞈ hpu htaꞈ cuˇ leh te jawˬ taˍ ve dawˇ shiˍ puiˉ ve nyi ma htaꞈ yehˇ leh dawˇ cheˆ cawˇ ve yoˬ. Awˬ lawn chi hkʼe hpehꞈ la ve kʼo, nawˬ hkʼaˬ hkʼe te tuˬ le tehꞈ, ngaˬ hui a shu teˇ gʼaˇ htaꞈ kaꞈ maˇ ca na nyi cawˇ. Chi hkʼoˆ kaꞈ, yawˇ hui kaꞈ ngaˬ hui htaꞈ yawˇ hui hkʼe leˇ maˇ dawˇ tcuh laˇ cawˇ. Hkriꞈ yaˇ teˇ gʼaˇ le le “a shu yawˇ ve awˬ vuiˬ htaꞈ gʼa pfuhˇ tuˬ yoˬ.”—Gaˍlaˍtiˆ 6:5; Roˉmaꞈ 14:12.

13. Awˬ suhˍ htaꞈ caˉ daꞈ ve awˬ liˇ tawˇ hkawˇ leh awˬ liˇ awˬ hkʼaˇ ngaˬ hui dawˇ nyi ve teˇ yanˇ, Yaˬhoˉvaˬ ve awˬ lawn aˬ hto ma gʼa henˇ ve le?

¹³ Yaˬhoˉvaˬ ngaˬ hui htaꞈ te tcuh laˇ ve teˇ ceuˬ le le ngaˬ hui awˬ pon awˬ bon cawˬ leh yawˇ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. (Chiˇ mvuh ve 19:7-11) Ngaˬ hui awˬ bon gʼa htaˇ ceh tiˉ Gʼuiˬ sha hkawˇ na yuˬ ve maˇ heˆ. Ngaˬ hui yawˇ htaꞈ haꞈ ve pa taw, na yuˬ ve yoˬ. Ngaˬ hui Yaˬhoˉvaˬ htaꞈ haꞈ ve pa taw, awˬ suhˍ maˇ keu. (Tcuh yaˇ 15:20) Chi lehˬ ngaˬ hui chehˇ sha cawˬ sha hpawˇ kaꞈ haꞈ shaˉ laˇ ve yoˬ. Chi beuꞈ teˇ co˗e, awˬ suhˍ keu ve kawˆ tuˬ cawˬ ve tehꞈ maˇ˗awˍ ve chaw shiˍ ve yoˬ. Chi hkʼoˆ kaꞈ, a naˍ gu tuˬ awˬ suhˍ maˇ yehˇ ve kʼo, chaw naˬ awˬ pon chehˇ sha cawˬ sha hpawˇ daꞈ jaˇ tehꞈ saˍ laꞈ gʼonˍ laiˉ gʼaˇ yonˍ ve yoˬ. Yaˬhoˉvaˬ te ve awˬ ceuˬ haꞈ pehnˇ ve leh cuˬ yiˍ cawˬ ve awˬ hkʼaˇ hpehꞈ ve tehꞈ ngaˬ hui hkʼa tawˍ lehˆ mawˬ ve yoˬ.—Iˉsaˍyaˆ 55:9 gʼaw sheˍ; Yoˇhanˬ 14:21, 23.

14, 15. (a) Yaˬhoˉvaˬ yawˇ ve chaw htaꞈ haꞈ shaˉ piˇ tuˬ aˬ htoꞈ ma awˬ liˇ tawˇ hkawˇ piˇ ve le? (b) Awˬ liˇ tawˇ hkawˇ chi htaꞈ caˉ daꞈ ve awˬ liˇ awˬ hkʼaˇ ngaˬ hui hkʼaˬ hkʼe te yuˬ yehˇ gʼa ve le?

¹⁴ Gʼuiˬ sha ve awˬ liˇ tawˇ hkawˇ hkʼaˬ htaˆ kaꞈ yawˇ  ve chaw awˬ pon awˬ bon cawˬ ve yoˬ. Aˬ sho˗eˬ htaˇ ve Iˉsaˍreˍlaˆ chaw kawˆ tuˬ uiˍ jaˇ ve maˇ gʼa hpuˇ tuˬ, Yaˬhoˉvaˬ awˬ liˇ tawˇ hkawˇ piˇ ve yoˬ. Tawˇ pa haˉ te kʼo, chaw maˇ gʼa ce tuˬ, yehˬ shehˍ hpaˇ koˇ caˉ gʼa ko ve tehꞈ awˬ liˇ tawˇ hkawˇ piˇ taˍ ve yoˬ. (Bon maˍ ve 22:8) Awˬ liˇ tawˇ hkawˇ to nuˇ to shaˆ htaꞈ caˉ daꞈ ve kaꞈ cawˬ ve yoˬ. A shu teˇ gʼaˇ haiˬ jaˇ ve nuˇ paˍ cawˬ ve kʼo, shu maˇ gʼa naˬ tuˬ, shu htaꞈ maˇ gʼa guˆ pehˍ tuˬ, awˬ shehˍ hpaˇ hkʼa dehꞈ gʼa nyi haꞈ shaˉ ve yoˬ. (Tawˆ kʼai ve 21:28, 29) Iˉsaˍreˍlaˆ chaw teˇ gʼaˇ awˬ liˇ tawˇ hkawˇ chi teˇ hpaˍ htaꞈ maˇ na yuˬ leh chaw gʼa suh ve kʼo, yawˇ hui htaꞈ venˇ baˆ taˍ tuˬ yoˬ.

¹⁵ Awˬ liˇ tawˇ hkawˇ chi teˇ hpaˍ htaꞈ henˇ ve teˇ yanˇ, Yaˬhoˉvaˬ mehˆ gʼuˇ suhˍ a shaꞈ awˬ hpfuhˇ hkʼaˆ jaˇ ve tehꞈ ngaˬ hui gʼa mawˬ ve yoˬ. Chi hkʼe shiˍ ve kʼo, hkʼaˬ hkʼe te cawˇ ve le? Ngaˬ hui a shaꞈ htaꞈ taˍ uiˍ ve tehꞈ hpeuꞈ maw piˇ cawˇ ve yoˬ. Ngaˬ hui ve yehˬ leh kaˇ htaꞈ hkʼa dehꞈ gʼa nyi haꞈ shaˉ leh kaˇ gʼaꞈ ve awˬ hkʼaˇ, pyawˍ ve awˬ ceuˬ leuˆ yuˬ htaˇ, hkʼa dehꞈ gʼa dawˇ nyi ve yoˬ. Yaˇ nehˬ teˇ hpaˍ hpaˍ maˇ daꞈ ve awˬ ceuˬ maˇ gʼa hpuˇ tehꞈ dawˇ ve pa taw, hpehꞈ la ve awˬ ceuˬ htaꞈ maˇ dawˇ nyi leh kawˆ tuˬ cawˬ ve awˬ ceuˬ htaꞈ te ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ chi hkʼe maˇ dawˇ tcuh gaˇ. Ngaˬ hui ve a shaꞈ leh shu ve a shaꞈ hkʼa peu˗eˬ a yeˇ uiˍ jaˇ tehꞈ yawˇ ngaˬ hui htaꞈ shawˍ tcuh gaˇ ve yoˬ.—Cuˇ yiˍ piˇ ve 11:9, 10.

16. Yaˇ te shawˆ ve htaꞈ Yaˬhoˉvaˬ hkʼaˬ hkʼe dawˇ ve le?

¹⁶ Yaˬhoˉvaˬ mehˆ gʼuˇ suhˍ chaw yaˇ teˇ gʼaˇ le le ve a shaꞈ a yeˇ uiˍ jaˇ. Maˇ paw la sheˍ ve yaˇ ehˉ ve a shaꞈ htawˇ kaꞈ awˬ hpfuhˇ hkʼaˆ jaˇ. Moˉseˍ ve awˬ liˇ tawˇ hkawˇ hkʼaw maˇ dawˇ maˇ gaˇ ve hkʼaw chaw teˇ gʼaˇ yaˇ hu chehˇ ve yaˇ miˇ htaꞈ te naˬ leh, teˇ gʼaˇ maˇ kʼoˆ teˇ gʼaˇ suh ve kʼo, chaw oˇ ve teˇ gʼaˇ lehˬ tiˇ pehˍ paˍ hpehꞈ ve tehꞈ Yaˬhoˉvaˬ shawˍ tuˬ yoˬ. Kʼoˆ gaˇ ve lehˬ chaw teˇ gʼaˇ maˇ dawˇ maˇ gaˇ ve hkʼaw shu htaꞈ tiˇ pehˍ ve kʼo, a shaꞈ awˬ tan a shaꞈ gʼa cawˬ tuˬ yoˬ.  (Tawˆ kʼai ve 21:22, 23 gʼaw sheˍ.) Maˇ paw la sheˍ ve yaˇ ehˉ a shaꞈ teꞈ˗oˬ ve tehꞈ Yaˬhoˉvaˬ shawˍ ve yoˬ. Nawˬ dawˇ kʼo, yaˇ te shawˆ ve htaꞈ Gʼuiˬ sha hkʼaˬ hkʼe dawˇ ve le? Teˇ hkʼawꞈ le le maˇ paw la sheˍ ve yaˇ ehˉ laiˉ lanˬ gʼaˇ tiˇ pehˍ ve htaꞈ Yaˬhoˉvaˬ mawˬ htaˇ, yawˇ hkʼaˬ hkʼe dawˇ ve le?

17. Yaˇ miˇ teˇ gʼaˇ Yaˬhoˉvaˬ htaꞈ maˇ shiˍ sheˍ htaˇ yaˇ te shawˆ jaw ve kʼo, yawˇ htaꞈ aˬ htoꞈ ma ga piˇ gʼa ve le?

¹⁷ Yaˬhoˉvaˬ yaˇ te shawˆ ve htaꞈ hkʼaˬ hkʼe dawˇ ve htaꞈ yaˇ miˇ teˇ gʼaˇ maˇ shiˍ leh yaˇ te shawˆ ve kʼo, yawˇ hkʼaˬ hkʼe kʼai tuˬ le? Yeˍsuˆ htaiˍ hkʼawꞈ laˇ ve pa taw, Yaˬhoˉvaˬ venˇ baˆ hpehꞈ piˇ gʼa ve tehꞈ yawˇ hkʼa dehꞈ yonˍ gʼa ve yoˬ. (Luˉkaꞈ 5:32; Eˇfeˇsuꞈ 1:7) Yaˇ miˇ teˇ gʼaˇ yawˇ te yaꞈ jaw ve htaꞈ awˬ tehˬ awˬ na nyi ma luˬ jaˇ ve kʼo, a shu yawˇ awˬ to htaꞈ venˇ baˆ maˇ kʼawꞈ taˍ cawˇ ve yoˬ. “Gʼuiˬ sha lehˬ haꞈ pehnˇ uiˍ leh ha kʼaˉ puiˉ ve yoˬ. . . . Mvuhˇ nyi tawˆ hpawˇ lehˬ mvuhˇ nyi kʼehˬ hpawˇ htaꞈ vuiˇ daꞈ jaˇ ve hkʼe, yawˇ lehˬ ngaˬ hui ve venˇ baˆ teˇ hpaˍ ngaˬ hui htaꞈ vuiˇ kuiˬ lo yuˬ baˬ ve yoˬ.”—Chiˇ mvuh ve 103:8-14.

18. Maˇ daꞈ ve dawˇ hkʼaˇ yuˬ baˬ tuˬ aˬ htoꞈ ma te ngaˬ hui te gʼa ve hkʼe teˇ ceuˬ le le te cawˇ ve le?

¹⁸ Gʼuiˬ sha peꞈ laˇ ve a shaꞈ htaꞈ ngaˬ hui taˍ uiˍ tuˬ, nyi ma hkʼaw gʼa cawˬ ve yoˬ. Chi ve lehˬ ngaˬ hui shu htaꞈ hkʼaˬ hkʼe dawˇ ve kaꞈ caˉ daꞈ ve yoˬ. Tcuh yaˇ Yoˇhanˬ bvuhꞈ taˍ ve, “a shu yawˇ ve awˬ viˉ awˬ nyi htaꞈ canˇ ve chaw teˇ gʼaˇ le le lehˬ chaw htaꞈ tiˇ pehˍ shehˍ hpaˇ hpehꞈ ve yoˬ.” (1 Yoˇhanˬ 3:15) Shu htaꞈ maˇ dawˇ cawˇ ve lehˬ shu htaꞈ nyi bawˬ ve teˇ ceuˬ hpehꞈ la gʼa ve yoˬ. Nyi bawˬ ve lehˬ shu htaꞈ maˇ taˍ uiˍ gaˇ, shu htaꞈ she piˇ ve, shu htaꞈ suh tcuh gaˇ ve yoˬ. Ngaˬ hui shu htaꞈ hkʼaˬ hkʼe dawˇ nyi chehˇ ve Yaˬhoˉvaˬ shiˍ ve yoˬ. (Oˉ kʼoˍ pui ve 19:16; Bon maˍ ve 19:18-21; Maꞈhtehˍ 5:22) Ngaˬ hui chaw teˇ gʼaˇ gʼaˇ htaꞈ maˇ daꞈ ve hpawˇ dawˇ ve kʼo, dawˇ hkʼaˇ chi htaꞈ yuˬ baˬ tuˬ ngaˬ hui gʼaˇ hteꞈ gʼa coˇ caˇ ve yoˬ.—Yaˍkoˆ 1:14, 15; 4:1-3.

19. Yaˬhoˉvaˬ haiˬ ve htaꞈ hkʼaˬ hkʼe dawˇ ve ngaˬ hui shiˍ ve kʼo, hkʼaˬ hkʼe te cawˇ ve le?

 ¹⁹ A shaꞈ awˬ hpfuhˇ hkʼaˆ jaˇ tehꞈ ngaˬ hui hpeuꞈ maw piˇ gʼa ve teˇ hkʼaˇ kʼawꞈ cawˬ sheˍ. Chiˇ mvuh ve liꞈ 11:5 hkʼaw kʼoˆ ve, Yaˬhoˉvaˬ lehˬ “awˬ liˇ awˬ hkʼaˇ maˇ ca ve chaw hui htaꞈ yawˇ canˇ ve yoˬ.” Ngaˬ hui pyawˍ ve awˬ ceuˬ haiˬ ve htaꞈ leuˆ yuˬ ve kʼo, ngaˬ hui haiˬ ve htaꞈ haꞈ ve tehꞈ kʼoˆ gaˇ ve yoˬ hehˉ. Maˇ daꞈ ve tawˇ hkawˇ, dawˇ hkʼaˇ, leh awˬ han ngaˬ hui ve nyi ma hkʼaw maˇ yuˬ keu gaˇ ve maˇ heˆ laˇ? Yaꞈ hkʼaˇ, daꞈ kehˬ ve dawˇ hkʼaˇ leh dawˇ sha gaˇ sha ve teˇ hpaˍ ngaˬ hui ve nyi ma hkʼaw yuˬ keu gaˇ ve yoˬ.—Hpiˇliˇpiˆ 4:8, 9 gʼaw sheˍ.

20-22. (a) Yaˬhoˉvaˬ Saˍtanˍ ve miˬ guiˬ htaꞈ hkʼaˬ hkʼe dawˇ ve le? (b) Gʼuiˬ sha ve chaw “chi miˬ guiˬ htaꞈ maˇ caˉ daꞈ” tehꞈ hpeuꞈ maw piˇ tuˬ, yawˇ hui hkʼaˬ hkʼe te gʼa ve le?

²⁰ Saˍtanˍ ve miˬ guiˬ a shaꞈ htaꞈ maˇ taˍ uiˍ ve yoˬ. Chi lehˬ Yaˬhoˉvaˬ awˬ pon chaw htaꞈ tiˇ pehˍ ve htaꞈ shuˍ ve yoˬ. Ponˬ laˬ ve laiˉ hinˉ hkʼawꞈ mvuhˇ miˬ hpawˇ ve kanˇ paˆ yehˇ ve pa taw, chaw suh maˇ jaˇ. Yaˬhoˉvaˬ ve kanˉ te ve chaw kaꞈ cawˬ taˍ ve yoˬ. Mvuhˇ miˬ hpawˇ ve kanˇ paˆ lehˬ haiˬ ve to nuˇ to shaˆ hkʼa shuˍ hpehꞈ ve tehꞈ Liꞈ hpu hkʼaw kʼoˆ taˍ ve yoˬ. (Daˍyeˍlaˆ 8:3, 4, 20-22; Hpeuꞈ maˍ ve 13:1, 2, 7, 8) Chi beuꞈ teˇ co˗e, bawˆ daꞈ tuˬ ve laꞈ caˉ hawˇ daꞈ jaˇ. Chaw laiˉ gʼaˇ shu htaꞈ bawˆ pehˍ tuˬ laꞈ caˉ hawˇ ve pa taw, hpu gʼa maˇ jaˇ. “Miˬ guiˬ hkʼa peu˗eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ” ve tehꞈ ngaˬ hui hkʼa tawˍ lehˆ gʼa mawˬ ve yoˬ.—1 Yoˇhanˬ 5:19.

²¹ Yaꞈ hkʼaˇ, awˬ tehˬ ve Hkriꞈ yaˇ “chi miˬ guiˬ htaꞈ maˇ caˉ daꞈ.” Yaˬhoˉvaˬ ve chaw mvuhˇ miˬ hpawˇ leh maꞈ hpawˇ choˬ paˉ oˇ paˉ maˇ pawˬ. Yawˇ hui chaw htaꞈ maˇ tiˇ pehˍ leh chaw tiˇ pehˍ ve awˬ moˍ htaꞈ maˇ caˉ daꞈ. (Yoˇhanˬ 15:19; 17:16) Fawˉ mehˍ ve htaꞈ gʼa hkanˍ htaˇ, haiˬ ve htaꞈ cuˇ leh te hkʼawꞈ piˇ ve Hkriꞈ yaˇ hui maˇ te. Ngaˬ hui canˇ paˍ htaꞈ  htawˇ haꞈ cawˇ ve tehꞈ Yeˍsuˆ maˍ laˇ taˍ ve yoˬ.—Maꞈhtehˍ 5:44; Roˉmaꞈ 12:17-21.

²² Chi hkʼoˆ kaꞈ, bon liˇ htaꞈ pa taw chaw laiˉ lanˬ gʼaˇ gʼa suh ve yoˬ. Uiˍ ve Baˍbuˍlonˍ maˇ heˆ heˆ ve bon liˇ hkʼa peu˗eˬ ve htaꞈ Liꞈ hpu hkʼaw kʼoˆ ve, “Gʼuiˬ sha ve tcuh kaˍ paˍ hui ve awˬ suhˍ, daꞈ kehˬ ve chaw hui ve awˬ suhˍ, leh miˬ guiˬ hkʼoˆ lo tiˇ pehˍ ve htaꞈ gʼa hkanˍ ve chaw hkʼa peu˗eˬ ve awˬ suhˍ htaꞈ venˇ oˇ ve awˬ hkʼaw lo gʼa mawˬ ve yoˬ.” Yaˬhoˉvaˬ kʼoˆ ve, “ngaˬ ve chaw teˇ hpaˍ˗oˬ, . . . venˇ oˇ ve awˬ hkʼaw lo tawˆ la˗o.” Aˬ htoꞈ ma te yawˇ chi hkʼe kʼoˆ ve nawˬ na gʼa˗aw laˇ? Yaˬhoˉvaˬ htaꞈ oˉ kʼoˍ pui ve chaw maˇ heˆ heˆ ve bon liˇ htaꞈ maˇ gʼa caˉ daꞈ—Hpeuꞈ maˍ ve 17:6; 18:2, 4, 24.

23. Uiˍ ve Baˍbuˍlonˍ hkʼaw tawˆ la tuˬ hkʼaˬ hkʼe gʼa te ve le?

²³ Uiˍ ve Baˍbuˍlonˍ hkʼaw “tawˆ la” tuˬ ngaˬ hui maˇ heˆ heˆ ve bon liˇ htaꞈ maˇ kʼawꞈ caˉ daꞈ˗oˬ tehꞈ, hkʼa tawˍ lehˆ gʼa hpeuꞈ maw piˇ ve yoˬ. Tawˇ pa haˉ te kʼo, bon liˇ hkʼaw awˬ meh cawˬ taˍ ve htaꞈ gʼa yuˬ tawˆ ve yoˬ. Ngaˬ hui awˬ kaˍ awˬ nu kaꞈ gʼa te sheˍ. Maˇ heˆ heˆ ve bon liˇ te chehˇ ve haiˬ ve htaꞈ ngaˬ hui nyi bawˬ leh maˇ haꞈ yuˬ. Maˇ heˆ heˆ ve bon liˇ lehˬ guiˇ yaꞈ ve, mvuhˇ miˬ hpawˇ, lawˇ hpaꞈ uiˍ ve chi teˇ hpaˍ htaꞈ haꞈ yuˬ ve yoˬ. (Chiˇ mvuh ve 97:10 gʼaw sheˍ; Hpeuꞈ maˍ ve 18:7, 9, 11-17) Ponˬ laˬ ve laiˉ hkʼawꞈ chi teˇ hpaˍ htaꞈ pa taw, chaw laiˉ lanˬ gʼaˇ gʼa suh ve yoˬ.

24, 25. Ngaˬ hui dawˇ sha gaˇ sha leh daꞈ ve dawˇ shiˍ puiˉ ve nyi ma cawˬ tuˬ,Yaˬhoˉvaˬ htaꞈ shiˍ la ve teˇ ceuˬ hkʼaˬ hkʼe ga laˇ ve le?

²⁴ Yaˬhoˉvaˬ htaꞈ maˇ shiˍ daꞈ la sheˍ htaˇ, ngaˬ hui teˇ gʼaˇ le le Saˍtanˍ ve miˬ guiˬ maˇ daꞈ ve hpawˇ lo awˬ gʼaˇ piˇ jaw ve yoˬ hehˉ. Yaꞈ hkʼaˇ, chi teˇ hkui ngaˬ hui pa˗oˬ. Ngaˬ hui htaiˍ hkʼawꞈ ve htaꞈ haꞈ yuˬ leh ngaˬ hui ve a shaꞈ Gʼuiˬ sha htaꞈ chiˇ˗aꞈ piˇ ve yoˬ. Ngaˬ hui Yaˬhoˉvaˬ geh “dawˇ sha ve” htaꞈ gʼa ve yoˬ. Ngaˬ hui yawˇ nyi hkʼaˇ suh tuˬ te piˇ chehˇ ve tehꞈ shiˍ ve pa taw, dawˇ sha gaˇ sha leh daꞈ ve dawˇ shiˍ puiˉ ve nyi ma cawˬ ve yoˬ.—Tcuh yaˇ 3:19; Iˉsaˍyaˆ 1:18.

 ²⁵ Ngaˬ hui a shaꞈ htaꞈ maˇ taˍ uiˍ ve awˬ moˍ htaꞈ caˉ daꞈ jaw ve htawˇ, htaiˍ hkʼawꞈ laˇ ve htaꞈ pa taw, Yaˬhoˉvaˬ ngaˬ hui htaꞈ venˇ baˆ hpehˇ laˇ gʼa ve yoˬ. Yaˬhoˉvaˬ a shaꞈ peꞈ laˇ ve htaꞈ ngaˬ hui awˬ hpfuhˇ hkʼa dehꞈ shiˍ ve yoˬ. Ngaˬ hui laꞈ shawnˍ chi ve htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ, shu Yaˬhoˉvaˬ ve awˬ lawn shiˍ la tuˬ, shu Saˍtanˍ ve miˬ guiˬ lo tawˆ la tuˬ, leh shu Gʼuiˬ sha htaꞈ meuˆ daꞈ la tuˬ, ngaˬ hui te gʼa ve hkʼe teˇ ceuˬ le le te ve yoˬ.—2 Kawˇrenˍhtuˆ 6:1, 2.

26-28. (a) Yaˬhoˉvaˬ Yeˍsaˍkeˍlaˆ htaꞈ aˬ htoꞈ ma kanˉ piˇ ve le? (b) Chi beuꞈ Yaˬhoˉvaˬ ngaˬ hui htaꞈ aˬ htoꞈ ma te tcuh laˇ ve le?

²⁶ Iˉsaˍreˍlaˆ awˬ co˗e htaˇ, Yaˬhoˉvaˬ lehˬ tcuh kaˍ paˍ Yeˍsaˍkeˍlaˆ htaꞈ kanˉ piˇ ve yoˬ. Yeˍruˆsaˍlehnˍ venˇ htaꞈ te luˬ tuˬ Yeˍsaˍkeˍlaˆ chaw yaˇ htaꞈ shaˍ tiꞈ gʼa ca piˇ leh ponˬ tuˬ ve awˬ hkʼaˇ gʼa maˍ piˇ ve yoˬ. Yawˇ chi hkʼe maˇ te ve kʼo, chaw yaˇ a shaꞈ awˬ pon Yaˬhoˉvaˬ yawˇ htaꞈ venˇ baˆ taˍ tuˬ yoˬ. (Yeˍsaˍkeˍlaˆ 33:7-9) Yeˍsaˍkeˍlaˆ daꞈ ve awˬ lawn sha tanˇ a yeˇ uiˍ ve chi htaꞈ hto maˍ piˇ ve pa taw, a shaꞈ awˬ hpfuhˇ hkʼaˆ ve tehꞈ hpeuꞈ maw piˇ ve yoˬ.

²⁷ Yaˬhoˉvaˬ ngaˬ hui htaꞈ kaꞈ kanˉ peꞈ laˇ ve yoˬ. Saˍtanˍ ve miˬ guiˬ htaꞈ te luˬ la tuˬ yoˬ tehꞈ, ngaˬ hui shu htaꞈ shaˍ tiꞈ gʼa ca piˇ ve yoˬ. Yawˇ hui Yaˬhoˉvaˬ htaꞈ shiˍ la leh miˬ guiˬ awˬ suhˉ 2hkʼaw gʼa chehˇ tuˬ ngaˬ hui gʼa ga piˇ ve yoˬ. (Iˉsaˍyaˆ 61:2; Maꞈhtehˍ 24:14) Daꞈ ve awˬ lawn chi ve shu htaꞈ maˍ piˇ tuˬ, ngaˬ hui te gʼa ve hkʼe teˇ ceuˬ le le te ve yoˬ. Pawˇluꞈ kʼoˆ ve, “nawˬ hui hkʼa peu˗eˬ ve awˬ suhˍ htaꞈ ngaˬ ponˬ ve tehꞈ, yaꞈ nyi ngaˬ nawˬ hui htaꞈ shaˉ hkiˆ hkanˍ ve yoˬ. Awˬ lawn kʼo, Gʼuiˬ sha ve a loˍ hkʼa peu˗eˬ nawˬ hui htaꞈ maˍ laˇ tuˬ ngaˬ maˇ jaw kʼai.” Ngaˬ hui htawˇ yawˇ hkʼa shuˍ kʼoˆ gaˇ ve yoˬ.—Tcuh yaˇ 20:26, 27.

²⁸ Ngaˬ hui ve awˬ to htaꞈ kaꞈ kehˬ lehˍ gʼa nyi haꞈ shaˉ ve yoˬ. Awˬ gʼuˇ suhˍ teˇ lawn hkʼaw gʼa henˇ tuˬ yoˬ.