1-3. (a) Tawˇ naˉ ve liꞈ 13:20 hkʼaw ngaˬ hui aˬ htoꞈ ma maˍ laˇ ve le? (b) Ngaˬ hui awˬ chawˇ te tuˬ aˬ htoꞈ ma te cuˇ yiˍ cawˬ ve hkʼaw gʼa leuˆ yuˬ ve le?

 Yaˇ ehˉ awˬ pa awˬ e htaꞈ gʼaꞈ nyi htaˇ, nawˬ yawˇ htaꞈ gʼaꞈ nyi jaw laˇ? Yaˇ tawˇ maˇ yaw puiˉ sheˍ ve htawˇ, yawˇ gʼa mawˬ gʼa kaˇ ve awˬ ceuˬ htaꞈ tawnˇ taˍ ve yoˬ. Yawˇ uiˍ la ve teˇ yanˇ, awˬ pa awˬ e htaꞈ henˇ yuˬ gʼa ve yoˬ. Chaw mawˇ kaꞈ hkʼa shuˍ yoˬ. Chaw teˇ gʼaˇ geh maˇ maˇ chehˇ ve kʼo, yawˇ hui te ve dawˇ ve hkʼe leˇ gʼaꞈ te ve yoˬ.

² Tawˇ naˉ ve liꞈ 13:20 hkʼaw kʼoˆ ve, “cuˇ yiˍ cawˬ ve chaw htaꞈ awˬ chawˇ te˗o. Nawˬ htawˇ cuˇ yiˍ cawˬ la tuˬ yoˬ.” Kʼoˆ gaˇ ve lehˬ ngaˬ hui a shu teˇ gʼaˇ htaꞈ awˬ chawˇ te tuˬ, gʼa leuˆ yuˬ ve yoˬ. Teˇ kaˬ kaˬ lo teˇ geh chehˇ ve ceh tiˉ maˇ heˆ. Liꞈ hpu shiˍ ve chaw teˇ gʼaˇ kʼoˆ ve, chi ve lehˬ ngaˬ hui haꞈ leh meuˆ daꞈ ve chaw htaꞈ kʼoˆ gaˇ ve yoˬ. Chaw teˇ gʼaˇ geh maˇ maˇ chehˇ leh meuˆ daꞈ ve kʼo, ngaˬ hui htaꞈ heuˆ la kuiˬ cawˬ ve yoˬ.

³ Awˬ chawˇ lehˬ daꞈ ve maˇ daꞈ ve hpawˇ heuˆ la kuiˬ cawˬ ve yoˬ. Tawˇ naˉ ve liꞈ 13:20 hkʼaw kʼoˆ ve, “cuˇ yiˍ maˇ cawˬ ve chaw htaꞈ awˬ chawˇ te ve kʼo, nawˬ htawˇ gʼa luˬ gʼa sheˆ tuˬ yoˬ.” Heˍbrehˇ hkawˇ hkʼaw ‘awˬ chawˇ te ve’ kʼoˆ ve lehˬ chaw teˇ gʼaˇ geh hkʼaˬ htaˆ kaꞈ chehˇ ve htaꞈ kʼoˆ gaˇ ve yoˬ. (Tawˇ naˉ ve 22:24; Suhˉ jehˬ ve 14:20) Gʼuiˬ sha htaꞈ  haꞈ ve chaw geh awˬ chawˇ te ve kʼo, ngaˬ hui yawˇ htaꞈ ka tiꞈ yeˬ gʼa tuˬ yawˇ hui ga laˇ tuˬ yoˬ. Ngaˬ hui cuˇ yiˍ cawˬ ve hkʼaw awˬ chawˇ leuˆ yuˬ gʼa tuˬ, Yaˬhoˉvaˬ hkʼaˬ hkʼe ve chaw geh awˬ chawˇ te ve teˇ geh nyi sheˍ.

4. Gʼuiˬ sha geh awˬ chawˇ te ve aˬ htoꞈ ma te awˬ meꞈ awˬ hponˇ cawˬ jaˇ ve le? Aˬ htoꞈ ma te Yaˬhoˉvaˬ Aˍbraˍhanˍ htaꞈ “ngaˬ ve awˬ chawˇ” tehꞈ kuˬ ve le?

⁴ Miˬ guiˬ mvuhˇ naw hkʼa peu˗eˬ hkʼoˆ Kanˇ paˆ uiˍ jaˇ ve Yaˬhoˉvaˬ htaꞈ ngaˬ hui awˬ chawˇ te gʼa ve yoˬ. Chi lehˬ awˬ meꞈ awˬ hponˇ cawˬ jaˇ. Yaˬhoˉvaˬ yawˇ a shu teˇ gʼaˇ htaꞈ awˬ chawˇ te tuˬ, hkʼa dehꞈ leuˆ yuˬ ve yoˬ. Yawˇ htaꞈ haꞈ leh yonˍ ve chaw htaꞈ yawˇ leuˆ yuˬ ve yoˬ. Aˍbraˍhanˍ htaꞈ dawˇ nyi sheˍ. Gʼuiˬ sha awˬ pon yawˇ teˇ ceuˬ le le ha lehˬ ve hkʼaw te ve yoˬ. Aˍbraˍhanˍ na yuˬ leh ka tiꞈ yeˬ ve hpeuꞈ maw piˇ ve yoˬ. Yawˇ ve yaˇ paˍ Iˉcaˆ htaꞈ htawˇ, ha lehˬ ha kʼa tanˇ piˇ ve yoˬ. “Gʼuiˬ sha lehˬ chaw yaˇ htaꞈ suh kuiˬ lo kʼawꞈ teꞈ tu la piˇ puiˉ” ve yoˬ tehꞈ Aˍbraˍhanˍ yonˍ ve pa taw yoˬ. (Heˍbrehˇ 11:17-19; Awˬ hkuiˉ puiˍ 22:1, 2, 9-13) Aˍbraˍhanˍ ka tiꞈ yeˬ leh na yuˬ puiˉ ve pa taw, Yaˬhoˉvaˬ yawˇ htaꞈ “ngaˬ ve awˬ chawˇ” tehꞈ kuˬ ve yoˬ.—Iˉsaˍyaˆ 41:8; Yaˍkoˆ 2:21-23.

5. Ka tiꞈ yeˬ ve chaw htaꞈ Yaˬhoˉvaˬ hkʼaˬ hkʼe dawˇ ve le?

⁵ Yaˬhoˉvaˬ yawˇ ve awˬ chawˇ awˬ hpfuhˇ hkʼaˆ jaˇ tehꞈ, yawˇ shawˍ taˍ ve yoˬ. Yawˇ ve awˬ chawˇ awˬ pon Yaˬhoˉvaˬ htaꞈ ka tiꞈ yeˬ ve lehˬ teˇ ceuˬ le le aꞈ kehˉ a yeˇ uiˍ ve yoˬ. (2 Saˍmo˗eˍlaˆ 22:26 gʼaw sheˍ.) Yawˇ hui yawˇ htaꞈ haꞈ ve pa taw, ka tiꞈ yeˬ leh na yuˬ ve yoˬ. Liꞈ hpu hkʼaw kʼoˆ ve, Gʼuiˬ sha lehˬ “hteˇ ve cawˇ ve chaw htaꞈ awˬ chawˇ te piˇ ve yoˬ.” Chi lehˬ yawˇ hkawˇ na yuˬ ve chaw htaꞈ kʼoˆ gaˇ ve yoˬ. (Tawˇ naˉ ve 3:32) “Bon yehˬ” hkʼaw a yeˇ uiˍ jaˇ ve hkehˉ chaw hpehꞈ tuˬ, Yaˬhoˉvaˬ yawˇ ve awˬ chawˇ htaꞈ kuˬ laˬ ve yoˬ. Yawˇ hui yawˇ htaꞈ oˉ kʼoˍ pui la tuˬ leh hkʼaˬ htaˆ  kaꞈ yawˇ geh bon lawˬ tuˬ, yawˇ yawˇ hui htaꞈ kuˬ piˇ ve yoˬ.—Chiˇ mvuh ve 15:1-5.

6. Ngaˬ hui Yeˍsuˆ htaꞈ haꞈ ve yoˬ tehꞈ, hkʼaˬ hkʼe te hpeuꞈ maw piˇ gʼa tuˬ le?

⁶ Yeˍsuˆ kʼoˆ ve, “ngaˬ htaꞈ haꞈ ve chaw lehˬ ngaˬ ve tawˇ hkawˇ htaꞈ na yuˬ leh te tuˬ yoˬ. Ngaˬ Awˬ pa yawˇ htaꞈ haꞈ tuˬ yoˬ.” (Yoˇhanˬ 14:23) Chi htaꞈ pa taw, ngaˬ hui Yaˬhoˉvaˬ geh awˬ chawˇ te tuˬ, Yeˍsuˆ htaꞈ kaꞈ gʼa haꞈ leh yawˇ maˍ laˇ ve awˬ ceuˬ htaꞈ gʼa gʼaꞈ te ve yoˬ. Tawˇ pa haˉ te kʼo, Yeˍsuˆ kʼoˆ taˍ ve hkʼe, shu yawˇ ve awˬ laꞈ gʼawˇ hpehꞈ la tuˬ ngaˬ hui daꞈ ve awˬ lawn sha tanˇ ca hto maˍ piˇ ve yoˬ. (Maꞈhtehˍ 28:19, 20; Yoˇhanˬ 14:15, 21) Ngaˬ hui Yeˍsuˆ htaꞈ haꞈ ve pa taw, “yawˇ ve hkui ha awˬ hkʼaˇ suh gʼaꞈ kʼai” ve yoˬ. (1 Peˍtruˆ 2:21) Ngaˬ hui te ve yaw ve hkʼaw coˇ caˇ leh yawˇ ve Yaˇ paˍ htaꞈ henˇ yuˬ chehˇ ve htaꞈ Yaˬhoˉvaˬ mawˬ htaˇ, yawˇ ha lehˬ ve yoˬ.

7. Aˬ htoꞈ ma te ngaˬ hui ve awˬ chawˇ Yaˬhoˉvaˬ ve awˬ chawˇ hpehꞈ cawˇ ve le?

⁷ Yaˬhoˉvaˬ ve awˬ chawˇ lehˬ na yuˬ puiˉ ve, ka tiꞈ yeˬ ve, yawˇ ve Yaˇ paˍ htaꞈ haꞈ ve yoˬ. Ngaˬ hui ve awˬ chawˇ Yaˬhoˉvaˬ ve awˬ chawˇ htaꞈ shuˍ daꞈ˗aˬ laˇ? Nawˬ ve awˬ chawˇ teˇ hpaˍ Yeˍsuˆ htaꞈ henˇ yuˬ leh Gʼuiˬ sha ve mvuhˇ miˬ awˬ lawn shu htaꞈ hkʼaˬ htaˆ kaꞈ maˍ piˇ chehˇ ve kʼo, nawˬ daꞈ la leh Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ tuˬ, yawˇ hui ga laˇ gʼa ve yoˬ.

8. Ruˉhtaˆ leh Nawˉmiꞈ ve awˬ lawn aˬ htoꞈ ma te nawˬ dawˇ cawˇ ve le?

⁸ Liꞈ hpu hkʼaw awˬ chawˇ awˬ lawn laiˉ lawn cawˬ ve yoˬ. Tawˇ pa haˉ te kʼo, Ruˉhtaˆ leh yawˇ ve awˬ pi Nawˉmiꞈ ve awˬ lawn yoˬ. Yawˇ huiˉ maˬ teˇ gʼaˇ teˇ mvuhˇ miˬ chehˇ leh uiˍ la kuiˬ kaꞈ maˇ shuˍ daꞈ. Chi hkʼoˆ kaꞈ, Nawˉmiꞈ leh Ruˉhtaˆ a shaꞈ peun daꞈ jaˇ. Yaꞈ hkʼaˇ, yawˇ huiˉ maˬ Yaˬhoˉvaˬ htaꞈ haꞈ ve pa taw, meuˆ daꞈ jaˇ ve awˬ chawˇ  hpehꞈ la ve yoˬ. Nawˉmiꞈ Mawˇbaˆ mvuhˇ miˬ lo tawˆ la leh Iˉsaˍreˍlaˆ mvuhˇ miˬ lo kʼoꞈ˗e gaˇ htaˇ, “Ruˉhtaˆ lehˬ yawˇ ve awˬ pi ma htaꞈ kʼuˉ tiˍ taˍ ve yoˬ.” Yawˇ Nawˉmiꞈ htaꞈ kʼoˆ piˇ ve, “nawˬ ve chaw ceuˬ lehˬ ngaˬ ve chaw ceuˬ hpehꞈ la piˇ leh, nawˬ ve Gʼuiˬ sha htawˇ ngaˬ ve Gʼuiˬ sha hpehꞈ la tuˬ yoˬ.” (Ruˉhtaˆ 1:14, 16) Ruˉhtaˆ Nawˉmiꞈ htaꞈ te piˇ ve daꞈ jaˇ. Yawˇ hui Iˉsaˍreˍlaˆ mvuhˇ miˬ lo gaˬ htaˇ, Ruˉhtaˆ yawˇ ve awˬ chawˇ chi teˇ gʼaˇ htaꞈ ca caˍ tuˬ kanˉ te heuˬ jaˇ. Nawˉmiꞈ Ruˉhtaˆ htaꞈ haꞈ jaˇ leh hkʼa dehꞈ beˆ maˍ piˇ ve yoˬ. Ruˉhtaˆ htawˇ na yuˬ ve yoˬ. Chi htaꞈ pa taw, yawˇ huiˉ maˬ awˬ bon laiˉ ceuˬ gʼa ve yoˬ.—Ruˉhtaˆ 3:6.

9. Daˍviˆ leh Yawˇnaˆtanˍ ve awˬ lawn aˬ htoꞈ ma te nawˬ dawˇ cawˇ ve le?

⁹ Daꞈ ve henˇ yuˬ tuˬ teˇ lawn kʼawꞈ cawˬ sheˍ. Daˍviˆ leh Yawˇnaˆtanˍ ve awˬ lawn yoˬ. Yawˇ huiˉ maˬ Yaˬhoˉvaˬ htaꞈ ka tiꞈ yeˬ ve yoˬ. Yawˇnaˆtanˍ Daˍviˆ aꞈ kehˉ aˬ laˬ hkʼe a shaꞈ 30 hkʼawꞈ maˇ leh Iˉsaˍreˍlaˆ ve jawˇ mawˇ teˇ gʼaˇ gʼa kʼawꞈ te tuˬ yoˬ. (1 Saˍmo˗eˍlaˆ 17:33; 31:2; 2 Saˍmo˗eˍlaˆ 5:4) Yaꞈ hkʼaˇ, Yaˬhoˉvaˬ Daˍviˆ htaꞈ jawˇ mawˇ te tcuh tuˬ yoˬ tehꞈ, Yawˇnaˆtanˍ shiˍ htaˇ, yawˇ Daˍviˆ htaꞈ maˇ hkawehˉ leh enˍ daꞈ tuˬ maˇ te. Yawˇ te gʼa ve hkʼe teˇ ceuˬ le le Daˍviˆ htaꞈ ga piˇ ve yoˬ. Tawˇ pa haˉ te kʼo, Daˍviˆ kawˆ tuˬ htaꞈ gʼa hpuˇ htaˇ, Yaˬhoˉvaˬ “haꞈ shaˉ chehˇ ve awˬ lawn” Yawˇnaˆtanˍ Daˍviˆ htaꞈ kʼoˆ maˍ piˇ leh awˬ gʼaˇ piˇ ve yoˬ. Daˍviˆ htaꞈ ga piˇ tuˬ, Yawˇnaˆtanˍ a shaꞈ shonˇ kʼai ve htaꞈ htawˇ yawˇ maˇ kawˆ. (1 Saˍmo˗eˍlaˆ 23:16, 17) Daˍviˆ kaꞈ ka tiꞈ yeˬ ve awˬ chawˇ hpehꞈ ve yoˬ. Yawˇ Yawˇnaˆtanˍ ve yehˬ kʼa htaꞈ haꞈ shaˉ piˇ tuˬ yoˬ tehꞈ, ka tiꞈ te piˇ ve yoˬ. Yawˇnaˆtanˍ suh peuˬ ve htawˇ, Daˍviˆ ka tiꞈ oˇ ve htaꞈ gʼaꞈ te ve yoˬ.—1 Saˍmo˗eˍlaˆ 18:1; 20:15-17, 30-34; 2 Saˍmo˗eˍlaˆ 9:1-7.

10. Heˍbrehˇ chaw yaˇ nehˬ 3 gʼaˇ ve awˬ lawn nawˬ aˬ htoꞈ ma gʼa henˇ ve le?

¹⁰ Shaˆdraˆ, Meˍshehˆ, Aˍbeˍdaˍneˍgoˍ Heˍbrehˇ chaw  hpehꞈ ve yoˬ. Chi 3 gʼaˇ yaˇ ehˉ htaˇ kaꞈ shu hpeh kʼai taˍ ve yoˬ. Yawˇ hui ve yehˬ kʼa htaꞈ hpaˆ daꞈ kʼai vuiˇ jaˇ htaˇ, Yaˬhoˉvaˬ htaꞈ ka tiꞈ yeˬ tuˬ ga daꞈ ve yoˬ. Yawˇ hui uiˍ la htaˇ, yawˇ hui ve yonˍ hkʼaˇ htaꞈ lawˇ nyi piˇ ve yoˬ. Jawˇmawˇ Neˍbuˍhkaˍneˍzaˍ shi shaˉ hoꞈ te taˍ leh yawˇ hui htaꞈ oˉ kʼoˍ pui tuˬ tawˇ piˇ ve yoˬ. Shaˆdraˆ, Meˍshehˆ, Aˍbeˍdaˍneˍgoˍ shaˉ hoꞈ htaꞈ oˉ kʼoˍ maˇ pui leh “ngaˬ hui lehˬ nawˬ te taˍ ve shaˉ hoꞈ htaꞈ oˉ kʼoˍ pui tuˬ ve maˇ heˆ, tehꞈ jawˇ mawˇ htaꞈ kʼoˆ piˇ ve yoˬ.” Yawˇ hui ve yonˍ hkʼaˇ htaꞈ lawˇ nyi piˇ htaˇ, awˬ chawˇ chi 3 gʼaˇ Gʼuiˬ sha htaꞈ ka tiꞈ yeˬ chehˇ sheˍ ve yoˬ.—Daˍyeˍlaˆ 1:1-17; 3:12, 16-28.

11. Pawˇluꞈ leh Tiˆmoˉseˍ daꞈ ve awˬ chawˇ hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?

¹¹ Tcuh yaˇ Pawˇluꞈ yaˇ nehˬ Tiˆmoˉseˍ htaꞈ gʼa mawˬ daꞈ htaˇ, yawˇ Yaˬhoˉvaˬ htaꞈ haꞈ leh Hkriꞈ yaˇ awˬ moˍ awˬ pon dawˇ nyi puiˉ ve chaw hpehꞈ ve tehꞈ Pawˇluꞈ shiˍ ve yoˬ. Chi htaꞈ pa taw, awˬ viˉ awˬ nyi laiˉ kaˬ lo ga piˇ tuˬ, Pawˇluꞈ Tiˆmoˉseˍ htaꞈ maˍ piˇ ve yoˬ. (Tcuh yaˇ 16:1-8; 17:10-14) Tiˆmoˉseˍ kanˉ gʼaˇ hteꞈ te ve pa taw, Pawˇluꞈ kʼoˆ ve, “ha lehˬ ve bon hkawˇ bvuhˬ kʼai tuˬ yawˇ ngaˬ geh teˇ geh kanˉ te ve yoˬ.” Tiˆmoˉseˍ awˬ viˉ awˬ nyi awˬ pon “daꞈ ve teˇ ceuˬ htaꞈ awˬ tehˬ awˬ na dawˇ nyi puiˉ ve chaw teˇ gʼaˇ hpehꞈ ve” tehꞈ Pawˇluꞈ shiˍ ve yoˬ. Yawˇ huiˉ maˬ Yaˬhoˉvaˬ kanˉ teˇ geh gʼaˇ hteꞈ te ve pa taw, meuˆ daꞈ jaˇ ve awˬ chawˇ hpehꞈ la ve yoˬ.—Hpiˇliˇpiˆ 2:20-22; 1 Kawˇrenˍhtuˆ 4:17.

12, 13. (a) Hkriꞈ yaˇ awˬ moˍ hkʼaw a shu teˇ gʼaˇ htaꞈ meuˆ daꞈ gaˇ ve kʼo, aˬ htoꞈ ma te ngaˬ hui shaˍ tiꞈ gʼa te ve le? (b) Aˬ htoꞈ ma te 1 Kawˇrenˍhtuˆ 15:33 hkʼaw kʼoˆ taˍ ve hkʼe, Pawˇluꞈ shaˍ tiꞈ peꞈ laˇ ve le?

¹² Hkriꞈ yaˇ awˬ moˍ hkʼaw awˬ viˉ awˬ nyi htaꞈ ngaˬ hui henˇ yuˬ leh ka tiꞈ yeˬ tuˬ ga daꞈ gʼa ve yoˬ. (Roˉmaꞈ 1:11, 12 gʼaw sheˍ.) Yaꞈ hkʼaˇ, Hkriꞈ yaˇ awˬ moˍ hkʼaw htawˇ, ngaˬ hui a shu teˇ gʼaˇ htaꞈ meuˆ daꞈ gaˇ ve kʼo, shaˍ  tiꞈ gʼa te ve yoˬ. Ngaˬ hui ve awˬ viˉ awˬ nyi lehˬ awˬ liˇ awˬ hkʼaˇ leh uiˍ la kuiˬ laiˉ kaˬ lo laˬ ve yoˬ. Teˇ hpaˍ kʼo, awˬ viˉ awˬ nyi hpehꞈ la gehˇ sheˍ. Awˬ nu ve chaw hui kʼo, Yaˬhoˉvaˬ ve kanˉ te ve laiˉ hkʼawꞈ gaˬ peuˬ. Iˉ shiˍ meh la tuˬ awˬ yanˇ gʼa law ve hkʼa shuˍ shuˍ, chaw teˇ gʼaˇ Gʼuiˬ sha htaꞈ meuˆ daꞈ la tuˬ awˬ yanˇ gʼa yehˇ ve yoˬ. Chi htaꞈ pa taw, ngaˬ hui gʼa yeunˇ hkanˍ leh teˇ gʼaˇ leh teˇ gʼaˇ gʼa haꞈ daꞈ ve yoˬ. Chi hkʼoˆ kaꞈ, ngaˬ hui awˬ chawˇ leuˆ yuˬ ve awˬ hkʼaw lo hkʼaˬ htaˆ kaꞈ cuˇ yiˍ gʼa cawˬ ve yoˬ.—Roˉmaꞈ 14:1; 15:1; Heˍbrehˇ 5:12–6:3.

 ¹³ Hkriꞈ yaˇ awˬ moˍ hkʼaw awˬ lawn uiˍ ve cawˬ la ve teˇ yanˇ, ngaˬ hui shaˍ tiꞈ gʼa te ve yoˬ. Awˬ viˉ awˬ nyi teˇ gʼaˇ Liꞈ hpu hkʼaw yaꞈ ve yoˬ tehꞈ kʼoˆ taˍ ve htaꞈ te chehˇ ve yoˬ hehˉ. Teˇ hpaˍ kʼo, hkʼanˇ naˉ jaˇ leh Hkriꞈ yaˇ awˬ moˍ hkʼaw heuˆ la kuiˬ cawˬ ve yoˬ hehˉ. Chi ve anˇ tuˬ cawˬ ve maˇ heˆ. Awˬ lawn kʼo, awˉ lawˉ htaˇ ve Hkriꞈ yaˇ awˬ moˍ hkʼaw htawˇ, teˇ pawˆ pawˆ kʼo maˇ cawˇ maˇ hawˍ daꞈ ve yoˬ. Tcuh yaˇ Pawˇluꞈ awˉ lawˉ peuˇ ve Hkriꞈ yaˇ htaꞈ shaˍ tiꞈ piˇ ve, “nawˬ hui taˇ dawˇ yaꞈ. Haiˬ ve chaw teˇ hpaˍ htaꞈ awˬ chawˇ te ve teˇ ceuˬ lehˬ daꞈ ve awˬ liˇ teˇ hpaˍ htaꞈ te luˬ ve yoˬ.” (1 Kawˇrenˍhtuˆ 15:12, 33) Tiˆmoˉseˍ awˬ chawˇ meuˆ daꞈ tuˬ leuˆ yuˬ ve teˇ yanˇ, shaˍ tiꞈ gʼa te ve tehꞈ Pawˇluꞈ yawˇ htaꞈ kʼoˆ piˇ ve yoˬ. Chi beuꞈ teˇ co˗e, ngaˬ hui htawˇ chi hkʼa shuˍ te cawˇ ve yoˬ.—2 Tiˆmoˉseˍ 2:20-22 gʼaw sheˍ.

14. Ngaˬ hui awˬ chawˇ leuˆ yuˬ ve Yaˬhoˉvaˬ geh meuˆ daꞈ ve htaꞈ hkʼaˬ hkʼe te heuˆ la gʼa ve le?

¹⁴ Ngaˬ hui Yaˬhoˉvaˬ geh meuˆ daꞈ ve teˇ ceuˬ htaꞈ gʼa haꞈ shaˉ ve yoˬ. Chi ve lehˬ ngaˬ hui awˬ pon aw hpfuhˇ hkʼaˆ jaˇ. Chi htaꞈ pa taw, a shu teˇ gʼaˇ ngaˬ hui ve yonˍ hkʼaˇ leh Gʼuiˬ sha geh meuˆ daꞈ ve htaꞈ te luˬ laˇ ve kʼo, ngaˬ hui yawˇ geh awˬ chawˇ maˇ te. Ngaˬ hui shaˉ laˇ nuˇ ci cuˉ˗ehˍ ve awˬ gʼuiˬ hkʼaw tiˆ leh iˉ kaˆ nehˆ la ve htaꞈ maˇ dawˇ law ve hkʼa shuˍ shuˍ, ngaˬ hui te yaꞈ ve chaw geh awˬ chawˇ te ve kʼo, cawˇ ve htaꞈ te sha tuˬ yoˬ tehꞈ maˇ dawˇ law cawˇ. Awˬ chawˇ meuˆ daꞈ tuˬ leuˆ yuˬ ve teˇ yanˇ, ngaˬ hui shaˍ tiꞈ gʼa te ve yoˬ.—1 Kawˇrenˍhtuˆ 5:6; 2 Hteˇsaˍlawˇniˆ 3:6, 7, 14.

15. Hkriꞈ yaˇ awˬ moˍ hkʼaw daꞈ ve awˬ chawˇ ca gʼa tuˬ, nawˬ hkʼaˬ hkʼe te cawˇ ve le?

¹⁵ Hkriꞈ yaˇ awˬ moˍ hkʼaw awˬ tehˬ awˬ na Yaˬhoˉvaˬ htaꞈ haꞈ ve chaw nawˬ ca gʼa ve yoˬ. Yawˇ hui nawˬ ve awˬ chawˇ meuˆ daꞈ jaˇ ve hpehꞈ la gʼa ve yoˬ. (Chiˇ mvuh ve 133:1)  A shaꞈ hkʼa ma˗ehˬ ve, awˬ liˇ awˬ hkʼaˇ hkʼa shuˍ˗ehˬ ve chaw htaꞈ ceh tiˉ awˬ chawˇ te ve taˇ te. Yawˇnaˆtanˍ Daˍviˆ aꞈ kehˉ a shaꞈ laiˉ hkʼawꞈ maˇ leh Ruˉhtaˆ Nawˉmiꞈ aꞈ kehˉ a shaꞈ i jaˇ ve tehꞈ taˇ leunˇ piˇ. ‘Nyi ma awˬ hkʼaw lo haꞈ˗oꞈ’ tehꞈ Liꞈ hpu hkʼaw kʼoˆ taˍ ve hkʼe, ngaˬ hui gʼaꞈ te gaˇ ve yoˬ. (2 Kawˇrenˍhtuˆ 6:11; 1 Peˍtruˆ 2:17 gʼaw sheˍ.) Nawˬ Yaˬhoˉvaˬ htaꞈ henˇ yuˬ ve kʼo, shu kaꞈ nawˬ htaꞈ awˬ chawˇ te la gaˇ tuˬ yoˬ.

16, 17. Hkriꞈ yaˇ awˬ moˍ hkʼaw chaw teˇ gʼaˇ nyi ma zuhˆ tuˬ te laˇ ve kʼo, ngaˬ hui hkʼaˬ hkʼe maˇ te cawˇ ve le?

¹⁶ Teˇ yehˬ kʼa le le awˬ hkʼaw lo nyi ma, te hkʼaˇ dawˇ hkʼaˇ maˇ shuˍ daꞈ. Hkriꞈ yaˇ awˬ moˍ hkʼaw kaꞈ hkʼa shuˍ yoˬ. Maˇ shuˍ daꞈ ve teˇ hpaˍ htaꞈ pa taw, ngaˬ hui a shaꞈ teꞈ kuiˬ lo daꞈ ve awˬ ceuˬ gʼa mawˬ leh shu htaꞈ laiˉ ceuˬ henˇ yuˬ gʼa ve yoˬ. Yaꞈ hkʼaˇ, teˇ pawˆ pawˆ kʼo maˇ shuˍ daꞈ ve awˬ ceuˬ chi lehˬ ngaˬ hui ve awˬ viˉ awˬ nyi htaꞈ yonˍ yaꞈ leh nyi ma maˇ sha tuˬ te laˇ gʼa ve yoˬ. Ngaˬ hui nyi ma zuhˆ leh nyi ma naˬ ve yoˬ hehˉ. (Tawˇ naˉ ve 12:18) Awˬ lawn oˇ hkʼe ve cawˬ la htaˇ, ngaˬ hui awˬ gʼaˇ nuˇ leh Hkriꞈ yaˇ awˬ moˍ hkʼaw hpaˆ daꞈ kʼai tcuh cawˇ ve laˇ?

¹⁷ Maˇ hpaˆ daꞈ kʼai tcuh cawˇ. Chaw teˇ gʼaˇ ngaˬ hui htaꞈ nyi ma luˬ tuˬ te laˇ ve htawˇ, Hkriꞈ yaˇ awˬ moˍ hkʼaw maˇ hpaˆ daꞈ kʼai cawˇ. Ngaˬ hui nyi ma zuhˆ tuˬ, Yaˬhoˉvaˬ te laˇ ve maˇ heˆ. Yawˇ lehˬ ngaˬ hui htaꞈ a shaꞈ leh teˇ ceuˬ le le peꞈ laˇ ve yoˬ. Ngaˬ hui haꞈ ve teˇ ceuˬ, ka tiꞈ yeˬ ve teˇ ceuˬ htaꞈ yawˇ gʼa keunˍ ve yoˬ. (Hpeuꞈ maˍ ve 4:11) Hkriꞈ yaˇ awˬ moˍ lehˬ Yaˬhoˉvaˬ geh laˬ ve laꞈ shawnˍ hpehꞈ leh ngaˬ hui yonˍ ve htaꞈ haꞈ shaˉ gʼa tuˬ ga laˇ ve yoˬ. (Heˍbrehˇ 13:17) Shu ngaˬ hui htaꞈ nyi ma luˬ tuˬ te laˇ ve htawˇ, laꞈ shawnˍ chi ve htaꞈ ngaˬ hui maˇ chiˇ baˬ cawˇ ve yoˬ.—Chiˇ mvuh ve 119:165 gʼaw sheˍ.

18. (a) Ngaˬ hui awˬ viˉ awˬ nyi htaꞈ cawˇ daꞈ hawˍ daꞈ tuˬ, aˬ htoꞈ ma ga laˇ gʼa ve le? (b) Aˬ htoꞈ ma te ngaˬ hui shu htaꞈ venˇ baˆ hpehˇ piˇ cawˇ ve le?

 ¹⁸ Ngaˬ hui awˬ viˉ awˬ nyi htaꞈ haꞈ leh yawˇ hui htaꞈ cawˇ daꞈ hawˍ daꞈ gaˇ ve yoˬ. Teˇ gʼaˇ le le biˇ ve chaw hkʼe hpehꞈ cawˇ ve yoˬ tehꞈ, Yaˬhoˉvaˬ maˇ dawˇ law. Chi htaꞈ pa taw, ngaˬ hui htawˇ chi hkʼe maˇ dawˇ law cawˇ. (Tawˇ naˉ ve 17:9; 1 Peˍtruˆ 4:8) Ngaˬ hui teˇ gʼaˇ le le te yaꞈ puiˉ ve yoˬ. Yaꞈ hkʼaˇ, haꞈ pehnˇ ve lehˬ ngaˬ hui “venˇ baˆ hpehˇ daꞈ” tuˬ ga laˇ ve yoˬ. (Kawˇlawˇsehˇ 3:13) Ngaˬ hui awˬ viˉ awˬ nyi htaꞈ haꞈ ve kʼo, i ve awˬ lawn htaꞈ uiˍ ve awˬ lawn hpehꞈ la tcuh tuˬ ve htaꞈ ngaˬ hui maˇ te. Chaw teˇ gʼaˇ nyi ma zuhˆ tuˬ te laˇ ve kʼo, awˬ lawn oˇ ve htaꞈ leunˇ kʼai tuˬ haˍ ve yoˬ hehˉ. Awˬ tehˬ kʼo, nyi ma zuhˆ leh shu htaꞈ venˇ baˆ taˍ tuˬ sha ve yoˬ. Yaꞈ hkʼaˇ, ngaˬ hui chi hkʼe te ve kʼo, ha lehˬ kuiˬ maˇ cawˬ. Nyi ma zuhˆ tuˬ te laˇ ve chaw htaꞈ venˇ baˆ hpehˇ piˇ ve kʼo, ngaˬ hui nyi ma sha leh Hkriꞈ yaˇ awˬ moˍ hkʼaw cawˇ daꞈ hawˍ daꞈ tuˬ yoˬ. Chi aꞈ kehˉ a yeˇ uiˍ ve lehˬ Yaˬhoˉvaˬ htaꞈ ngaˬ hui meuˆ daꞈ tuˬ yoˬ.—Maꞈhtehˍ 6:14, 15; Luˉkaꞈ 17:3, 4; Roˉmaꞈ 14:19.

19. Hkriꞈ yaˇ awˬ moˍ hkʼaw chaw teˇ gʼaˇ htaꞈ awˬ chawˇ maˇ te piˇ ve hkʼaˬ htaˆ le?

¹⁹ Haꞈ daꞈ ve yehˬ kʼa lehˬ teˇ gʼaˇ le le ha lehˬ tuˬ, a shu yawˇ ve awˬ vuiˬ htaꞈ gʼa te ve yoˬ. Chaw teˇ gʼaˇ yawˇ awˬ vuiˬ maˇ te ve kʼo, hkʼaˬ hkʼe kʼai tuˬ le dawˇ nyi sheˍ. Yehˬ kʼa hkʼaw ve chaw teˇ gʼaˇ le le coˇ caˇ leh yawˇ htaꞈ laiˉ pawˆ ga piˇ ve htawˇ, yawˇ maˇ haꞈ yuˬ. Yawˇ dawˇ cheˆ leh yehˬ hkʼaw tawˆ˗e ve, maˇ heˆ kʼo yehˬ shehˍ hpaˇ yawˇ htaꞈ tawˆ˗e tcuh ve yoˬ hehˉ. Hkriꞈ yaˇ awˬ moˍ hkʼaw awˬ lawn chi hkʼe leˇ hpehꞈ la gʼa ve yoˬ. Chaw teˇ gʼaˇ Yaˬhoˉvaˬ nyi hkʼaˇ maˇ suh tuˬ hkʼaˬ htaˆ kaꞈ te chehˇ ve kʼo, Hkriꞈ yaˇ awˬ moˍ hkʼaw kawˆ tuˬ te piˇ gʼa ve yoˬ. Ga piˇ ve htaꞈ  yawˇ maˇ haꞈ yuˬ leh Hkriꞈ yaˇ awˬ moˍ hkʼaw maˇ kʼawꞈ chehˇ gaˇ ve tehꞈ hpeuꞈ maw laˇ ve yoˬ hehˉ. Yawˇ hkʼaˇ yawˇ tawˆ˗e ve maˇ heˆ kʼo, tawˆ cheˆ ve htaꞈ gʼa hkanˍ tuˬ yoˬ hehˉ. Awˬ lawn chi hkʼe ve cawˬ la htaˇ, ngaˬ hui yawˇ htaꞈ “awˬ chawˇ maˇ gʼa te” cawˇ ve tehꞈ Liꞈ hpu hkʼaw hkʼa tawˍ lehˆ kʼoˆ taˍ ve yoˬ. (1 Kawˇrenˍhtuˆ 5:11-13 gʼaw sheˍ; 2 Yoˇhanˬ 9-11) Chaw oˇ ve teˇ gʼaˇ ngaˬ hui ve awˬ chawˇ maˇ heˆ leh yehˬ kʼa hkʼaw ve chaw hpehꞈ ve kʼo, beˆ maˍ laˇ hkawˇ chi htaꞈ gʼaꞈ te tuˬ haˍ jaˇ. Yaꞈ hkʼaˇ, chi hkʼe gʼa hpuˇ ve teˇ yanˇ, teˇ gʼaˇ le le aꞈ kehˉ ngaˬ hui Yaˬhoˉvaˬ htaꞈ ka tiꞈ gʼa yeˬ ve yoˬ.—Kʼoˆ maˍ ve awˬ lawn 8 htaꞈ nyi sheˍ.

20, 21. (a) Tawˆ cheˆ ve lehˬ Yaˬhoˉvaˬ haꞈ pehnˇ ve hkʼaw gu teh taˍ ve yoˬ tehꞈ hkʼaˬ hkʼe te shiˍ gʼa ve le? (b) Ngaˬ hui awˬ chawˇ leuˆ yuˬ ve hkʼaw aˬ htoꞈ ma te shaˍ tiꞈ te tuˬ a yeˇ uiˍ ve le?

²⁰ Tawˆ cheˆ ve lehˬ Yaˬhoˉvaˬ haꞈ pehnˇ ve hkʼaw gu teh taˍ ve yoˬ. Chi lehˬ Yaˬhoˉvaˬ ve awˬ liˇ awˬ hkʼaˇ maˇ na yuˬ ve chaw htaꞈ Hkriꞈ yaˇ awˬ moˍ hkʼaw chehˇ ve chaw jaw kʼai gʼa tuˬ, ga piˇ ve yoˬ. (1 Kawˇrenˍhtuˆ 5:7; Heˍbrehˇ 12:15, 16) Yaˬhoˉvaˬ ve daꞈ kehˬ ve awˬ meh, yawˇ ve daꞈ jaˇ ve awˬ liˇ awˬ hkʼaˇ, leh yawˇ htaꞈ ngaˬ hui haꞈ ve yoˬ tehꞈ hpeuꞈ maw piˇ tuˬ, chi ve lehˬ ga laˇ ve yoˬ. (1 Peˍtruˆ 1:15, 16) Tawˆ cheˆ piˇ ve lehˬ Hkriꞈ yaˇ awˬ moˍ hkʼaw maˇ kʼawꞈ caˉ daꞈ ve chaw oˇ ve teˇ gʼaˇ htaꞈ haꞈ ve yoˬ tehꞈ hpeuꞈ maw piˇ ve yoˬ. Hehnˇ chaweh jawꞈ maˍ piˇ ve chi ve lehˬ yawˇ te ve awˬ ceuˬ maˇ cawˇ tehꞈ shiˍ leh pa gaˇ tuˬ, ga piˇ gʼa ve yoˬ hehˉ. Tawˆ cheˆ piˇ jaw ve chaw laiˉ gʼaˇ Yaˬhoˉvaˬ geh kʼawꞈ hpfuhˆ kʼawꞈ la htaˇ, Hkriꞈ yaˇ awˬ moˍ yawˇ hui htaꞈ ha lehˬ ha kʼa haꞈ yuˬ piˇ ve yoˬ.—Heˍbrehˇ 12:11.

²¹ Ngaˬ hui ve awˬ chawˇ ngaˬ hui htaꞈ awˬ tehˬ awˬ na heuˆ la kuiˬ cawˬ ve yoˬ. Chi htaꞈ pa taw, ngaˬ hui awˬ chawˇ leuˆ yuˬ ve hkʼaw shaˍ tiꞈ te tuˬ a yeˇ uiˍ jaˇ. Yaˬhoˉvaˬ haꞈ ve chaw hui htaꞈ haꞈ ve kʼo, ngaˬ hui Yaˬhoˉvaˬ htaꞈ co co taiˍ taiˍ ka tiꞈ yeˬ tuˬ yawˇ hui ga laˇ gʼa ve yoˬ.