1, 2. Nawˬ aˬ htoꞈ ma te Yaˬhoˉvaˬ Gʼuiˬ sha htaꞈ haꞈ ve le?

 Nawˬ Gʼuiˬ sha htaꞈ haꞈ˗aw laˇ? Nawˬ Gʼuiˬ sha htaꞈ haꞈ ve pa taw, nawˬ awˬ to yawˇ htaꞈ chiˇ aꞈ piˇ˗oˬ ve yoˬ hehˉ. Yawˇ lehˬ nawˬ meuˆ daꞈ jaˇ ve awˬ chawˇ teˇ gʼaˇ hpehꞈ ve yoˬ tehꞈ, nawˬ dawˇ ve yoˬ hehˉ. Yaꞈ hkʼaˇ, nawˬ Yaˬhoˉvaˬ htaꞈ maˇ haꞈ sheˍ htaˇ, yawˇ nawˬ htaꞈ haꞈ˗oˬ ve yoˬ. Liꞈ hpu hkʼaw kʼoˆ ve, “Gʼuiˬ sha ngaˬ hui htaꞈ awˉ lawˉ haꞈ ve pa taw, ngaˬ hui htawˇ haꞈ ve yoˬ.”—1 Yoˇhanˬ 4:19.

² Yaˬhoˉvaˬ ngaˬ hui htaꞈ haꞈ ve awˬ hkʼaˇ laiˉ hkʼaˇ htaꞈ dawˇ nyi sheˍ. Yawˇ ngaˬ hui htaꞈ miˬ guiˬ peꞈ laˇ ve yoˬ. Chi lehˬ daꞈ jaˇ ve chehˇ kuiˬ hpehꞈ ve yoˬ. Ngaˬ hui a shaꞈ teꞈ kuiˬ lo ha lehˬ tuˬ loˍ ve awˬ ceuˬ kaꞈ peꞈ laˇ ve yoˬ. (Maꞈhtehˍ 5:43-48; Hpeuꞈ maˍ ve 4:11) Gʼuiˬ sha lehˬ ngaˬ hui yawˇ htaꞈ awˬ chawˇ te tcuh gaˇ leh yawˇ ve awˬ lawn maˍ laˇ ve yoˬ. Ngaˬ hui Liꞈ hpu gʼaw htaˇ, Yaˬhoˉvaˬ hkawˇ na chehˇ ve yoˬ. Ngaˬ hui bon lawˬ htaˇ, yawˇ na laˇ chehˇ ve yoˬ. (Chiˇ mvuh ve 65:2) Yawˇ ngaˬ hui htaꞈ awˬ gʼaˇ peꞈ laˇ leh beˆ maˍ laˇ tuˬ, daꞈ kehˬ ve awˬ ha hpu htaꞈ yehˇ ve yoˬ. (Luˉkaꞈ 11:13) Chi hkʼoˆ kaꞈ, ngaˬ hui ve venˇ baˆ leh suh ve htaꞈ ponˬ laˇ tuˬ, Gʼuiˬ sha yawˇ awˬ hpfuhˇ hkʼaˆ jaˇ ve yaˇ paˍ miˬ guiˬ hkʼoˆ peu laˇ ve yoˬ.—Yoˇhanˬ 3:16; Roˉmaꞈ 5:8 gʼaw sheˍ.

3. Yaˬhoˉvaˬ htaꞈ hkʼaˬ htaˆ kaꞈ meuˆ daꞈ tuˬ, ngaˬ hui hkʼaˬ hkʼe gʼa te ve le?

 ³ Nawˬ meuˆ daꞈ jaˇ ve awˬ chawˇ teˇ gʼaˇ htaꞈ dawˇ nyi sheˍ. Nawˬ ha lehˬ htaˇ, nyi ma luˬ htaˇ, yawˇ nawˬ geh chehˇ taˍ ve yoˬ. Nawˬ awˬ chawˇ chi teˇ gʼaˇ htaꞈ hkʼaˬ htaˆ kaꞈ meuˆ daꞈ gʼa tuˬ, gʼa coˇ caˇ ve yoˬ. Chi ve lehˬ Gʼuiˬ sha htaꞈ awˬ chawˇ te ve hkʼa shuˍ yoˬ. Yaˬhoˉvaˬ lehˬ ngaˬ hui ve daꞈ jaˇ ve awˬ chawˇ hpehꞈ ve yoˬ. Ngaˬ hui Yaˬhoˉvaˬ htaꞈ awˬ chawˇ te ve co co taiˍ taiˍ yeˬ gʼa ve yoˬ. Liꞈ hpu hkʼaw kʼoˆ ve, “Gʼuiˬ sha haꞈ pehnˇ ve awˬ hkʼaw lo a shu yawˇ awˬ to yeˬ chaweh chehˇ taˍ˗oꞈ.” (Yuˇdaꞈ 21) Ngaˬ hui hkʼaˬ hkʼe te gʼa tuˬ le? Liꞈ hpu hkʼaw kʼoˆ ve, “Gʼuiˬ sha htaꞈ haꞈ ve tehꞈ kʼoˆ ve lehˬ yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ leh te ve htaꞈ kʼoˆ ve yoˬ. Chi hkʼoˆ kaꞈ, yawˇ piˇ taˍ ve tawˇ hkawˇ teˇ hpaˍ lehˬ haˍ jaˇ ve teˇ ceuˬ hpehꞈ ve maˇ heˆ.”—1 Yoˇhanˬ 5:3.

4, 5. (a) “Gʼuiˬ sha htaꞈ haꞈ ve” kʼoˆ ve aˬ htoꞈ ma htaꞈ kʼoˆ gaˇ ve le? (b) Nawˬ Yaˬhoˉvaˬ htaꞈ hkʼaˬ htaˆ tanˬ haꞈ ve le?

⁴ Liꞈ hpu hkʼaw “Gʼuiˬ sha htaꞈ haꞈ ve” kʼoˆ ve aˬ htoꞈ ma htaꞈ kʼoˆ gaˇ ve le? Chi ve Gʼuiˬ sha ngaˬ hui htaꞈ haꞈ ve tehꞈ kʼoˆ gaˇ ve maˇ heˆ. Yaꞈ hkʼaˇ, ngaˬ hui Gʼuiˬ sha htaꞈ haꞈ ve tehꞈ kʼoˆ gaˇ ve yoˬ. Nawˬ Yaˬhoˉvaˬ htaꞈ hkʼaˬ htaˆ tanˬ haꞈ ve nawˬ tawnˇ gʼa˗aw laˇ?

⁵ Yaˬhoˉvaˬ nawˬ htaꞈ miˬ guiˬ awˬ suhˉ hkʼaw co co taiˍ taiˍ teꞈ chehˇ tcuh gaˇ ve yoˬ tehꞈ gʼa shiˍ htaˇ, nawˬ hkʼaˬ hkʼe dawˇ ve le? Nawˬ tawnˇ gʼa˗aw laˇ? Ka tiꞈ chi ve biˇ la tuˬ Gʼuiˬ sha laiˉ ceuˬ te ve yoˬ tehꞈ, nawˬ henˇ laˬ˗oˬ ve yoˬ. Yaˬhoˉvaˬ yawˇ ve yaˇ paˍ miˬ guiˬ hkʼoˆ peu laˇ ve htaꞈ kaꞈ shiˍ˗oˬ ve yoˬ. Chi ve lehˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. (Maꞈhtehˍ 20:28; Yoˇhanˬ 8:29; Roˉmaꞈ 5:12, 18) Yaˬhoˉvaˬ nawˬ htaꞈ hkʼaˬ ma haꞈ ve gʼa shiˍ ve teˇ yanˇ, nawˬ ha lehˬ leh yawˇ htaꞈ tanˬ haꞈ la ve yoˬ.—1 Yoˇhanˬ 4:9, 10 gʼaw sheˍ.

6. Chaw teˇ gʼaˇ htaꞈ haꞈ ve lehˬ aˬ htoꞈ ma htaꞈ kʼoˆ gaˇ ve le? Gʼuiˬ sha htaꞈ haꞈ ve pa taw, nawˬ aˬ htoꞈ ma te˗oˬ ve le?

 ⁶ Yaꞈ hkʼaˇ, ngaˬ hui Gʼuiˬ sha htaꞈ haꞈ ve lehˬ awˬ hkuiˉ puiˍ tanˬ ve ceh tiˉ sheˍ. Tawˇ pa haˉ te kʼo, ngaˬ hui chaw teˇ gʼaˇ htaꞈ haꞈ ve kʼo, “ngaˬ nawˬ htaꞈ haꞈ ve yoˬ” tehꞈ kʼoˆ piˇ ve ceh maˇ lawꞈ. Ngaˬ hui chaw oˇ ve teˇ gʼaˇ htaꞈ ha lehˬ tcuh gaˇ ve pa taw, teˇ ceuˬ le le te piˇ ve yoˬ. Chi hkʼa shuˍ shuˍ, nawˬ Yaˬhoˉvaˬ htaꞈ haꞈ ve pa taw, nawˬ a shaꞈ teꞈ kuiˬ lo yawˇ nyi hkʼaˇ suh tuˬ te piˇ gaˇ ve yoˬ. Nawˬ Yaˬhoˉvaˬ htaꞈ haꞈ maˇ la htaˇ, yawˇ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ˗oˬ ve yoˬ hehˉ. Chi hkʼe te ve lehˬ nawˬ Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ ka tiꞈ te piˇ˗oˬ ve yoˬ. (Roˉmaꞈ 14:7, 8 gʼaw sheˍ.) Nawˬ ka tiꞈ chi ve htaꞈ hkʼaˬ hkʼe te leh haꞈ shaˉ gʼa tuˬ le?

7. Ngaˬ hui Yaˬhoˉvaˬ htaꞈ haꞈ ve kʼo, aˬ htoꞈ ma te tuˬ le? Yawˇ piˇ taˍ ve tawˇ hkawˇ aˬ htoꞈ ma cawˬ ve le?

⁷ Yaˬhoˉvaˬ htaꞈ haꞈ ve pa taw, “yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ” ve yoˬ. Yaˬhoˉvaˬ ngaˬ hui htaꞈ a shaꞈ hkʼaˬ hkʼe teꞈ chehˇ tcuh gaˇ ve Liꞈ hpu hkʼaw kʼoˆ maˍ laˇ taˍ ve yoˬ. Tawˇ pa haˉ te kʼo, tzuhˬ dawˬ bvuhˆ ve, shu mawˇ hkʼawˇ ve, heˍ ve, guiˇ yaꞈ ve, Yaˬhoˉvaˬ awˬ hkʼoˆ awˬ kaˍ awˬ nu gʼuiˬ sha htaꞈ oˉ kʼoˍ pui ve chi hkʼa peu˗eˬ yaꞈ ve yoˬ tehꞈ, yawˇ ngaˬ hui htaꞈ maˍ laˇ ve yoˬ.—1 Kawˇrenˍhtuˆ 5:11; 6:18; 10:14; Eˇfeˇsuꞈ 4:28; Kawˇlawˇsehˇ 3:9.

8, 9. Liꞈ hpu hkʼaw awˬ liˇ tawˇ hkawˇ hkʼa tawˍ lehˆ maˇ kʼoˆ taˍ ve kʼo, Yaˬhoˉvaˬ aˬ htoꞈ ma te tcuh gaˇ ve ngaˬ hui hkʼaˬ hkʼe te shiˍ gʼa ve le? Tawˇ pa haˉ kʼoˆ maˍ laˇ sheˍ.

⁸ Yaˬhoˉvaˬ nyi hkʼaˇ suh tuˬ, yawˇ piˇ taˍ ve tawˇ hkawˇ na yuˬ ve ceh maˇ lawꞈ. Awˬ kaˍ awˬ nu gʼa te ve yoˬ. Ngaˬ hui a shaꞈ teꞈ kuiˬ lo gʼa hpuˇ ve awˬ ceuˬ hkʼa peu˗eˬ awˬ liˇ tawˇ hkawˇ teˇ hkawˇ le le Gʼuiˬ sha maˇ peꞈ laˇ. Chi  htaꞈ pa taw, teˇ pawˆ pawˆ ngaˬ hui gʼa hpuˇ la ve awˬ ceuˬ hkʼaˬ hkʼe te cawˇ ve Liꞈ hpu hkʼaw awˬ liˇ tawˇ hkawˇ maˇ cawˬ. Ngaˬ hui hkʼaˬ hkʼe te leh hkʼa dehꞈ dawˇ cheˆ gʼa tuˬ le? (Eˇfeˇsuꞈ 5:17) Liꞈ hpu hkʼaw awˬ liˇ awˬ hkʼaˇ cawˬ ve yoˬ. Chi ve lehˬ awˬ tehˬ hpehꞈ leh awˬ lawn teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve maˍ laˇ ve yoˬ. Ngaˬ hui Liꞈ hpu gʼaw ve teˇ yanˇ, Yaˬhoˉvaˬ htaꞈ shiˍ maˇ la ve yoˬ. Yawˇ haꞈ ve canˇ ve awˬ ceuˬ leh yawˇ hkʼaˬ hkʼe dawˇ ve ngaˬ hui gʼa henˇ ve yoˬ.—Chiˇ mvuh ve 97:10 gʼaw sheˍ; Tawˇ naˉ ve 6:16-19; Kʼoˆ maˍ ve awˬ lawn 1 htaꞈ nyi sheˍ.

⁹ Tawˇ pa haˉ te kʼo, awˬ han tawˆ kuiˬ (TV), In˗teu˗neꞈ (Internet) hkʼaw ngaˬ hui aˬ htoꞈ ma nyi tuˬ ve hkʼaˬ hkʼe te dawˇ cheˆ gʼa tuˬ le? Ngaˬ hui hkʼaˬ hkʼe te cawˇ ve Yaˬhoˉvaˬ hteˇ˗ehˍ maˇ kʼoˆ laˇ. Yaꞈ hkʼaˇ, ngaˬ hui hkʼa dehꞈ dawˇ cheˆ gʼa tuˬ, yawˇ peꞈ laˇ ve awˬ liˇ awˬ hkʼaˇ ga laˇ ve yoˬ. Chi beuꞈ teˇ co˗e, pyawˍ ve awˬ ceuˬ haiˬ ve leh pehꞈ ve tzuhˆ ve hkʼa biˇ cawˬ ve yoˬ. Liꞈ hpu hkʼaw Yaˬhoˉvaˬ ngaˬ hui htaꞈ kʼoˆ laˇ ve, ‘haiˬ ve chaw htaꞈ yawˇ canˇ ve yoˬ.’ Yawˇ ‘guiˇ yaꞈ ve chaw teˇ hpaˍ htaꞈ ciˍ yanˍ piˇ tuˬ yoˬ.’ (Chiˇ mvuh ve 11:5; Heˍbrehˇ 13:4) Ngaˬ hui dawˇ cheˆ gʼa tuˬ, awˬ liˇ awˬ hkʼaˇ chi ve hkʼaˬ hkʼe ga laˇ gʼa ve le? Yaˬhoˉvaˬ nyi bawˬ ve, pehꞈ ve tzuhˆ ve hpehꞈ ve tehꞈ yawˇ shawˍ ve awˬ ceuˬ, ngaˬ hui shiˍ ve teˇ yanˇ jaw kʼai cawˇ ve yoˬ.

10, 11. Aˬ htoꞈ ma pa taw ngaˬ hui Yaˬhoˉvaˬ hkawˇ na yuˬ ve le?

¹⁰ Aˬ htoꞈ ma te ngaˬ hui Yaˬhoˉvaˬ hkawˇ na yuˬ ve le? Dawˇ cheˆ ve maˇ cawˇ ve kʼo, dawˇ haˍ ve awˬ ceuˬ, ciˍ yanˍ laˇ ve gʼa hpuˇ ve htaꞈ kawˆ leh na yuˬ ve ceh tiˉ maˇ heˆ. (Gaˍlaˍtiˆ 6:7) Ngaˬ hui Yaˬhoˉvaˬ htaꞈ haꞈ ve pa taw, yawˇ hkawˇ na yuˬ ve yoˬ. Yaˇ awˬ pa htaꞈ ha lehˬ tcuh gaˇ ve hkʼa shuˍ, ngaˬ hui mvuhˇ naw ma hkʼoˆ chehˇ ve Awˬ pa htaꞈ ha lehˬ tcuh gaˇ ve yoˬ. Ngaˬ hui Yaˬhoˉvaˬ nyi hkʼaˇ suh ve chaw hpehꞈ ve lehˬ daꞈ jaˇ ve teˇ ceuˬ yoˬ!—Chiˇ mvuh ve 5:12; Tawˇ naˉ ve 12:2; Kʼoˆ maˍ ve awˬ lawn 2 htaꞈ nyi sheˍ.

 ¹¹ Jaw kʼai maˇ gʼa leh te sha ve teˇ yanˇ ceh ngaˬ hui Yaˬhoˉvaˬ hkawˇ na yuˬ ve maˇ heˆ. Awˬ liˇ tawˇ hkawˇ teˇ hpaˍ hpaˍ htaꞈ ceh na yuˬ ve kaꞈ maˇ heˆ. (Bon maˍ ve 12:32) Ngaˬ hui yawˇ ve hkawˇ hkʼa dehꞈ na yuˬ ve yoˬ. Chiˇ mvuhˇ ve liꞈ bvuhꞈ paˍ hkʼa shuˍ, ngaˬ hui yawˇ ve “awˬ liˇ tawˇ hkawˇ teˇ hpaˍ htaꞈ haꞈ ve pa taw, oˇ ve teˇ hpaˍ htaꞈ na yuˬ gaˇ ve nyi ma cawˬ ve yoˬ.” (Chiˇ mvuh ve 119:47; Roˉmaꞈ 6:17) Ngaˬ hui Noˉaꞈ hkʼa shuˍ hpehꞈ gaˇ ve yoˬ. Yawˇ Yaˬhoˉvaˬ htaꞈ haꞈ ve yoˬ tehꞈ hpeuꞈ maw piˇ ve awˬ hkʼaw lo Gʼuiˬ sha kʼoˆ ve hkʼa peu˗eˬ na yuˬ leh gʼaꞈ te ve yoˬ. Liꞈ hpu hkʼaw kʼoˆ ve, Gʼuiˬ sha kʼoˆ piˇ taˍ ve hkʼa peu˗eˬ Noˉaꞈ “na yuˬ leh te ve yoˬ.” (Awˬ hkuiˉ puiˍ 6:22) Ngaˬ hui htaꞈ kaꞈ Yaˬhoˉvaˬ chi hkʼe kʼoˆ laˇ tcuh gaˇ˗aˬ laˇ?

12. Yaˬhoˉvaˬ ha lehˬ tuˬ ngaˬ hui hkʼaˬ hkʼe te piˇ gʼa ve le?

¹² Ngaˬ hui Yaˬhoˉvaˬ hkawˇ na yuˬ ve kʼo, yawˇ hkʼaˬ hkʼe kʼai ve le? Yawˇ “ha lehˬ tuˬ yoˬ.” (Tawˇ naˉ ve 11:20; 27:11) Dawˇ nyi sheˍ! Ngaˬ hui yawˇ hkawˇ na yuˬ ve kʼo, miˬ guiˬ mvuhˇ naw Hpanˍ shehˍ hpaˇ ha lehˬ tuˬ te piˇ ve yoˬ. Yaꞈ hkʼaˇ, yawˇ ngaˬ hui htaꞈ maˇ nyiˉ laˇ jaw. Yawˇ ngaˬ hui htaꞈ leuˆ yuˬ tcuh laˇ ve yoˬ. Kʼoˆ gaˇ ve lehˬ ngaˬ hui cawˇ maˇ cawˇ ve htaꞈ te tuˬ leuˆ yuˬ gʼa ve yoˬ. Ngaˬ hui hkʼa dehꞈ dawˇ cheˆ gʼa tuˬ, Yaˬhoˉvaˬ htaꞈ haꞈ ve teˇ ceuˬ ga laˇ leh, yawˇ loˍ ve hkʼe ngaˬ hui daꞈ jaˇ ve a shaꞈ gʼa tuˬ yoˬ.—Bon maˍ ve 30:15, 16, 19, 20; Kʼoˆ maˍ ve awˬ lawn 3 htaꞈ nyi sheˍ.

13, 14. Gʼuiˬ sha piˇ taˍ ve tawˇ hkawˇ htaꞈ na yuˬ tuˬ haˍ jaˇ ve maˇ heˆ tehꞈ, ngaˬ hui hkʼaˬ hkʼe te shiˍ ve le? Tawˇ pa haˉ kʼoˆ maˍ laˇ sheˍ.

¹³ Yaˬhoˉvaˬ piˇ taˍ ve tawˇ hkawˇ na yuˬ tuˬ haˍ jaˇ, ngaˬ hui gʼaꞈ te ve kʼo, te gaˇ ve hkʼe te maˇ gʼa tehꞈ dawˇ ve cawˇ˗aw laˇ? Liꞈ hpu hkʼaw kʼoˆ taˍ ve, “yawˇ piˇ taˍ ve tawˇ hkawˇ teˇ hpaˍ lehˬ haˍ jaˇ ve teˇ ceuˬ hpehꞈ ve maˇ heˆ.”  (1 Yoˇhanˬ 5:3) Heˍlaˍsaˆ tawˇ hkawˇ hkʼaw “haˍ ve” kʼoˆ ve lehˬ “hehnˇ ve” htaꞈ kʼoˆ gaˇ ve yoˬ. Awˬ kaˍ awˬ nu Liꞈ hpu awˬ tawn hkʼaw chi teˇ hkawˇ lehˬ shu naˬ tuˬ nyiˉ te ve awˬ liˇ leh awˬ liˇ awˬ hkʼaˇ maˇ ca ve chaw htaꞈ kʼoˆ gaˇ ve yoˬ. (Maꞈhtehˍ 23:4; Tcuh yaˇ 20:29, 30) Awˬ kaˍ awˬ nu yuˬ tawˆ ve Liꞈ hpu teˇ kʼoˆ hkʼaw kʼoˆ ve, “yawˇ piˇ taˍ ve tawˇ hkawˇ ngaˬ hui htaꞈ gʼawˬ tiˍ taˍ laˇ ve maˇ heˆ.” Yaˬhoˉvaˬ ve tawˇ hkawˇ maˇ hehnˇ leh na yuˬ tuˬ maˇ haˍ. Yaˬhoˉvaˬ ngaˬ hui htaꞈ te tcuh gaˇ ve awˬ ceuˬ keunˍ daꞈ cawˇ daꞈ ve yoˬ.

¹⁴ Tawˇ pa haˉ te kʼo, nawˬ ve awˬ chawˇ teˇ gʼaˇ teˇ kaˬ lo ca chehˇ leh mawˇ gʼa ga chiˇ piˇ ve htaꞈ dawˇ nyi sheˍ. Yawˇ mawˇ hkʼa peu˗eˬ ta kʼoˍ hkʼaw gʼawˆ doˆ taˍ ve yoˬ. Teˇ maˬ kʼo lawˬ leh chiˇ sha ve, teˇ maˬ kʼo hehnˇ leh chaw 2 gʼaˇ gʼa chiˇ ve yoˬ. Nawˬ dawˇ kʼo, awˬ chawˇ mawˇ hehnˇ jaˇ ve nawˬ htaꞈ tiˉ chiˇ tcuh laˇ tuˬ laˇ? Yawˇ oˇ hkʼe maˇ te taˬ! Aˬ htoꞈ ma pa taw le? Yawˇ nawˬ htaꞈ maˇ naˬ tcuh gaˇ. Awˬ chawˇ chi teˇ gʼaˇ hkʼa shuˍ, Yaˬhoˉvaˬ nawˬ htaꞈ haˍ jaˇ ve awˬ ceuˬ maˇ te tcuh laˇ taˬ. (Bon maˍ ve 30:11-14) “Ngaˬ hui hkʼaˬ hkʼe ve chaw hpehꞈ ve htaꞈ [Yaˬhoˉvaˬ] shiˍ taˍ leh, ngaˬ hui lehˬ jeꞈ meu˗e hpehꞈ ve htaꞈ dawˇ nawˇ chehˇ ve yoˬ.”—Chiˇ mvuh ve 103:14.

15. Yaˬhoˉvaˬ ve tawˇ hkawˇ ngaˬ hui awˬ pon awˬ bon cawˬ ve tehꞈ, ngaˬ hui hkʼaˬ hkʼe te shiˍ ve le?

¹⁵ Moˉseˍ Iˉsaˍreˍlaˆ chaw htaꞈ kʼoˆ piˇ ve, yawˇ hui “uiˍ la daꞈ la piˇ tuˬ,” Yaˬhoˉvaˬ yawˇ hui htaꞈ tawˇ hkawˇ piˇ ve yoˬ. Yawˇ hui na yuˬ ve kʼo, “co zuhˬ ha zuhˬ gʼa chehˇ” tuˬ yoˬ. (Bon maˍ ve 5:28-33; 6:24) Chi beuꞈ teˇ co˗e hkʼa shuˍ, Yaˬhoˉvaˬ te tcuh laˇ ve awˬ ceuˬ ngaˬ hui a shaꞈ daꞈ la tuˬ ga laˇ ve yoˬ. (Iˉsaˍyaˆ 48:17 gʼaw sheˍ.) Ngaˬ hui awˬ pon aˬ htoꞈ ma daꞈ jaˇ ve Awˬ pa Yaˬhoˉvaˬ shiˍ ve yoˬ. (Roˉmaꞈ 11:33) Liꞈ hpu hkʼaw kʼoˆ ve, “Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇhanˬ 4:8) Kʼoˆ gaˇ ve lehˬ Yaˬhoˉvaˬ kʼoˆ ve te ve teˇ ceuˬ le le haꞈ pehnˇ ve htaꞈ pa taw yoˬ.

16. Ngaˬ hui maˇ biˇ leh haiˬ ve miˬ guiˬ hkʼoˆ chehˇ taˍ ve htawˇ, Gʼuiˬ sha hkawˇ na yuˬ gʼa ve yoˬ tehꞈ hkʼaˬ hkʼe te shiˍ gʼa ve le?

 ¹⁶ Gʼuiˬ sha hkawˇ na yuˬ ve hkʼaˬ htaˆ kaꞈ sha ve maˇ heˆ. Neˇ haiˬ Saˍtanˍ uˉ peunˍ ve awˬ hawˉ lo haiˬ ve miˬ guiˬ hkʼoˆ ngaˬ hui a shaꞈ teꞈ chehˇ ve yoˬ. Yawˇ chaw yaˇ haiˬ ve awˬ ceuˬ te tuˬ beˬ yuˬ chehˇ ve yoˬ. (1 Yoˇhanˬ 5:19) Chi hkʼoˆ kaꞈ, ngaˬ hui maˇ biˇ ve chaw hpehꞈ ve pa taw, Gʼuiˬ sha hkawˇ maˇ na yuˬ gaˇ ve dawˇ hkʼaˇ htaꞈ gʼa tawˍ daꞈ ve yoˬ. (Roˉmaꞈ 7:21-25) Yaꞈ hkʼaˇ, Yaˬhoˉvaˬ htaꞈ haꞈ ve lehˬ ngaˬ hui cawˇ ve awˬ ceuˬ te tuˬ awˬ gʼaˇ peꞈ laˇ ve yoˬ. Ngaˬ hui coˇ caˇ leh Yaˬhoˉvaˬ hkawˇ na yuˬ ve htaꞈ yawˇ mawˬ leh ngaˬ hui htaꞈ ga laˇ tuˬ, yawˇ daꞈ kehˬ ve awˬ ha hpu peꞈ laˇ ve yoˬ. (1 Saˍmo˗eˍlaˆ 15:22, 23; Tcuh yaˇ 5:32) Daꞈ kehˬ ve awˬ ha hpu ga laˇ ve kʼo, ngaˬ hui daꞈ ve te hkʼaˇ dawˇ hkʼaˇ cawˬ la leh Gʼuiˬ sha hkawˇ na yuˬ sha ve yoˬ.—Gaˍlaˍtiˆ 5:22, 23.

17, 18. (a) Liꞈ chi teˇ kʼoˆ hkʼaw ngaˬ hui aˬ htoꞈ ma awˬ lawn gʼa henˇ tuˬ le? (b) Awˬ gʼuˇ suhˍ teˇ lawn hkʼaw ngaˬ hui aˬ htoꞈ ma awˬ lawn henˇ tuˬ le?

¹⁷ Ngaˬ hui a shaꞈ teꞈ kuiˬ lo hkʼaˬ hkʼe te leh Yaˬhoˉvaˬ nyi hkʼaˇ suh tuˬ, liꞈ chi teˇ kʼoˆ hkʼaw gʼa henˇ tuˬ yoˬ. Awˬ liˇ awˬ hkʼaˇ hkʼaˬ hkʼe te yuˬ yehˇ cawˇ ve htaꞈ kaꞈ gʼa henˇ tuˬ yoˬ. Yaˬhoˉvaˬ hkawˇ na yuˬ tuˬ yawˇ maˇ nyiˉ laˇ tehꞈ tawnˇ taˍ cawˇ ve yoˬ. Ngaˬ hui na yuˬ tuˬ leuˆ yuˬ ve kʼo, a shaꞈ teꞈ kuiˬ daꞈ la leh awˬ gʼuˇ suhˍ hpawˇ kaꞈ daꞈ tuˬ yoˬ. A yeˇ uiˍ jaˇ ve lehˬ, Gʼuiˬ sha htaꞈ hkʼaˬ ma haꞈ ve hpeuꞈ maw piˇ gʼa ve yoˬ.—Kʼoˆ maˍ ve awˬ lawn 4 htaꞈ nyi sheˍ.

¹⁸ Hkʼaˬ ve cawˇ maˇ cawˇ ve shiˍ tuˬ, Yaˬhoˉvaˬ ngaˬ hui teˇ gʼaˇ le le htaꞈ dawˇ shiˍ puiˉ ve nyi ma peꞈ laˇ ve yoˬ. Ngaˬ hui dawˇ shiˍ puiˉ ve nyi ma chi htaꞈ te jawˬ ve kʼo, “yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ” tuˬ ga laˇ ve yoˬ. Oˇ hkʼe kʼo, dawˇ shiˍ puiˉ ve nyi ma aˬ htoꞈ ma le? Ngaˬ hui dawˇ shiˍ puiˉ ve nyi ma htaꞈ hkʼaˬ hkʼe te jawˬ gʼa tuˬ le? Teˇ geh nyi sheˍ.