1, 2. Ngaˬ hui maˇ kʼai jaw kuiˬ lo kʼai ve kʼo, aˬ htoꞈ ma te yaꞈ kʼaw maˍ laˇ tuˬ loˍ ve le? Ngaˬ hui htaꞈ sheh kʼai laˇ tuˬ, Yaˬhoˉvaˬ aˬ htoꞈ ma peꞈ laˇ ve le?

 Nawˬ shehˇ de lonˉ hkʼaw juˇ kʼai chehˇ ve htaꞈ dawˇ nyi sheˍ. Mvuhˇ haw meuˆ hehnˇ jaˇ leh nawˬ gʼuˇ suhˍ lo shehˇ shiˍ pa kʼai ve pa taw, nawˬ yaꞈ kʼaw yaꞈ kʼai gʼa ve yoˬ. Yaꞈ kʼaw shiˍ tuˬ, nawˬ hkʼaˬ hkʼe gʼa te ve le? Yaꞈ kʼaw shiˍ ve chaw maˇ heˆ leh teˇ ceuˬ ceuˬ gʼa cawˬ ve yoˬ. Yaꞈ kʼaw maˍ laˇ gʼa ve awˬ hkʼeun, mvuhˇ nyi ha pa, miˬ guiˬ awˬ han, awˬ ti hto laˇ ve (GPS), maˇ heˆ leh shehˇ de mvuhˇ miˬ hkʼa dehꞈ shiˍ ve chaw chi teˇ hpaˍ htaꞈ gʼa cuˇ ve yoˬ. Yaꞈ kʼaw shiˍ ve chaw cawˬ tuˬ a yeˇ uiˍ jaˇ. Awˬ lawn kʼo, nawˬ kʼai kuiˬ shiˍ ve kʼo, a shaꞈ ponˬ tuˬ yoˬ.

 ² Ngaˬ hui teˇ gʼaˇ le le a shaꞈ teꞈ kuiˬ lo tuꞈ ve hkanˍ ve laiˉ ceuˬ gʼa hpuˇ leh teˇ pawˆ pawˆ kʼo, hkʼaˬ kaˬ lo kʼai chehˇ ve maˇ shiˍ. Yaꞈ hkʼaˇ, ngaˬ hui htaꞈ yaꞈ kʼaw maˍ laˇ tuˬ, Yaˬhoˉvaˬ dawˇ shiˍ puiˉ ve nyi ma peꞈ laˇ ve yoˬ. (Yaˍkoˆ 1:17) Dawˇ shiˍ puiˉ ve nyi ma aˬ htoꞈ ma le leh, kanˉ hkʼaˬ hkʼe te ve le teˇ geh nyi sheˍ. Chi hkʼoˆ kaꞈ, ngaˬ hui dawˇ shiˍ puiˉ ve nyi ma htaꞈ hkʼaˬ hkʼe te jawˬ gʼa tuˬ le, aˬ htoꞈ ma te shu dawˇ shiˍ puiˉ ve nyi ma htaꞈ dawˇ nyi piˇ cawˇ ve le, ngaˬ hui daꞈ ve dawˇ shiˍ puiˉ ve nyi ma cawˬ ve kʼo, a shaꞈ hkʼaˬ hkʼe daꞈ la gʼa ve le teˇ geh henˇ tuˬ yoˬ.

3. Dawˇ shiˍ puiˉ ve nyi ma aˬ htoꞈ ma le?

³ Dawˇ shiˍ puiˉ ve nyi ma lehˬ Yaˬhoˉvaˬ geh gʼa taˍ ve daꞈ ve laꞈ shawnˍ hpehꞈ ve yoˬ. Chi ve ngaˬ hui awˬ to hkʼaw cawˬ leh hkʼaˬ ve cawˇ maˇ cawˇ ve hto laˇ ve awˬ ceuˬ hpehꞈ ve yoˬ. Liꞈ hpu hkʼaw Heˍlaˍsaˆ tawˇ hkawˇ awˬ hkʼaw lo “dawˇ shiˍ puiˉ ve nyi ma” kʼoˆ ve lehˬ “a shu yawˇ awˬ to hkʼaw cawˬ ve cuˇ yiˍ maˍ yiˍ” htaꞈ kʼoˆ gaˇ ve yoˬ. Dawˇ shiˍ puiˉ ve nyi ma kanˉ hkʼa dehꞈ te ve kʼo, ngaˬ hui hkʼaˬ hkʼe ve chaw hpehꞈ ve chaˬ nyi tuˬ ga laˇ ve yoˬ. Ngaˬ hui ve nyi ma hkʼaw cawˬ ve htaꞈ haꞈ yuˬ gʼa tuˬ, dawˇ shiˍ puiˉ ve nyi ma ga laˇ gʼa ve yoˬ. Daꞈ ve htaꞈ te tuˬ leh haiˬ ve htaꞈ jaw kʼai tuˬ kaꞈ ga laˇ ve yoˬ. Ngaˬ hui dawˇ cheˆ cawˇ ve kʼo, dawˇ shiˍ puiˉ ve nyi ma chi ve ha lehˬ tuˬ te laˇ ve yoˬ. Yaꞈ hkʼaˇ, dawˇ cheˆ ve maˇ cawˇ ve kʼo, a shu yawˇ awˬ to htaꞈ venˇ baˆ taˍ ve yoˬ.—Kʼoˆ maˍ ve awˬ lawn 5 htaꞈ nyi sheˍ.

4, 5. (a) Aˍdanˍ Eˇvaꞈ dawˇ shiˍ puiˉ ve nyi ma maˇ na yuˬ ve teˇ yanˇ, aˬ htoꞈ ma hpehꞈ la ve le? (b) Dawˇ shiˍ puiˉ ve nyi ma kanˉ te ve awˬ hkʼaˇ Liꞈ hpu hkʼaw aˬ htoꞈ ma henˇ yuˬ tuˬ cawˬ ve le?

⁴ Dawˇ shiˍ puiˉ ve nyi ma htaꞈ na yuˬ maˇ na yuˬ tuˬ, ngaˬ hui teˇ gʼaˇ le le leuˆ yuˬ gʼa ve yoˬ. Aˍdanˍ Eˇvaꞈ dawˇ shiˍ puiˉ ve nyi ma maˇ na yuˬ ve pa taw, yawˇ huiˉ maˬ venˇ baˆ te ve yoˬ. Yawˇ hui dawˇ nawˇ la htaˇ, hkʼawꞈ nawˉ  leh˗oˬ. Yawˇ hui Gʼuiˬ sha hkawˇ maˇ na yuˬ. (Awˬ hkuiˉ puiˍ 3:7, 8) Yawˇ hui dawˇ shiˍ puiˉ ve nyi ma biˇ jaˇ leh Gʼuiˬ sha hkawˇ maˇ na yuˬ ve teˇ ceuˬ yaꞈ ve yoˬ tehꞈ shiˍ ve htawˇ, dawˇ shiˍ puiˉ ve nyi ma yawˇ hui htaꞈ shaˍ tiꞈ piˇ htaˇ, Aˍdanˍ Eˇvaꞈ maˇ na yuˬ ve yoˬ.

⁵ Yaꞈ hkʼaˇ, maˇ biˇ ve chaw laiˉ gʼaˇ a shu yawˇ ve dawˇ shiˍ puiˉ ve nyi ma htaꞈ na yuˬ ve yoˬ. Yawˇbaˆ lehˬ daꞈ ve henˇ yuˬ tuˬ hpehꞈ ve yoˬ. Yawˇ hkʼa dehꞈ dawˇ cheˆ ve pa taw, “ngaˬ ve shiˍ puiˉ ve nyi ma kehˬ lehˍ cawˬ chehˇ ve” tehꞈ yawˇ kʼoˆ gʼa ve yoˬ. (Yawˇbaˆ 27:6) “Shiˍ puiˉ ve nyi ma” oˇ ve lehˬ hkʼaˬ ve cawˇ maˇ cawˇ ve Yawˇbaˆ htaꞈ kʼoˆ piˇ ve yoˬ. Yaꞈ hkʼaˇ, teˇ pawˆ pawˆ Daˍviˆ yawˇ ve dawˇ shiˍ puiˉ ve nyi ma maˇ na yuˬ leh Yaˬhoˉvaˬ hkawˇ htaꞈ htawˇ maˇ na yuˬ. Oˇ ve hkʼawꞈ nawˉ, yawˇ nyi ma luˬ jaˇ leh “nyi ma maˇ sha.” (1 Saˍmo˗eˍlaˆ 24:5) Chi kʼoˆ gaˇ ve lehˬ Daˍviˆ te yaꞈ ve yoˬ tehꞈ, dawˇ shiˍ puiˉ ve nyi ma yawˇ htaꞈ kʼoˆ piˇ chehˇ ve yoˬ. Daˍviˆ dawˇ shiˍ puiˉ ve nyi ma htaꞈ na yuˬ ve teˇ yanˇ, yawˇ te yaꞈ jaw ve htaꞈ maˇ kʼawꞈ te ve yoˬ.

6. Dawˇ shiˍ puiˉ ve nyi ma Yaˬhoˉvaˬ geh gʼa taˍ ve laꞈ shawnˍ hpehꞈ ve yoˬ tehꞈ aˬ htoꞈ ma te kʼoˆ gʼa ve le?

⁶ Yaˬhoˉvaˬ htaꞈ maˇ shiˍ ve chaw kaꞈ cawˇ ve leh maˇ cawˇ ve awˬ ceuˬ cawˬ ve tehꞈ shiˍ ve yoˬ. Liꞈ hpu hkʼaw kʼoˆ ve, “yawˇ hui ve nyi ma hkʼaw dawˇ hkʼaˇ teˇ hpaˍ lehˬ venˇ baˆ cawˬ ve tehꞈ kʼoˆ ve, maˇ heˆ kʼo venˇ baˆ maˇ cawˬ tehꞈ kʼoˆ ve yoˬ.” (Roˉmaꞈ 2:14, 15) Tawˇ pa haˉ te kʼo, chaw htaꞈ tiˇ pehˍ ve, mawˇ hkʼawˇ ve yaꞈ ve yoˬ tehꞈ chaw maˇ˗awˍ ve shiˍ ve yoˬ. Yawˇ hui maˇ shiˍ ve htawˇ, awˬ tehˬ kʼo dawˇ shiˍ puiˉ ve nyi ma htaꞈ na yuˬ chehˇ ve yoˬ. Chi ve lehˬ hkʼaˬ ve cawˇ maˇ cawˇ ve yawˇ hui shiˍ tuˬ, Yaˬhoˉvaˬ keu piˇ taˍ ve yoˬ. Yawˇ hui Gʼuiˬ sha ve awˬ liˇ awˬ hkʼaˇ htaꞈ gʼaꞈ te chehˇ ve yoˬ. Awˬ liˇ awˬ hkʼaˇ chi lehˬ awˬ tehˬ hpehꞈ leh ngaˬ hui dawˇ cheˆ puiˉ tuˬ, Yaˬhoˉvaˬ peꞈ laˇ ve yoˬ.

7. Aˬ htoꞈ ma te teˇ pawˆ pawˆ dawˇ shiˍ puiˉ ve nyi ma yaꞈ kʼai gʼa ve le?

⁷ Teˇ pawˆ pawˆ ngaˬ hui ve dawˇ shiˍ puiˉ ve nyi ma yaꞈ  kʼai gʼa ve yoˬ. Tawˇ pa haˉ te kʼo, maˇ biˇ ve dawˇ hkʼaˇ ngaˬ hui ve dawˇ shiˍ puiˉ ve nyi ma htaꞈ heuˆ la ve kʼo, yaꞈ kʼaw sheh yaꞈ laˇ gʼa ve yoˬ. Dawˇ shiˍ puiˉ ve nyi ma kanˉ hkʼa dehꞈ te gʼa tuˬ, ngaˬ hui teˇ ceuˬ ceuˬ gʼa te ve yoˬ. (Awˬ hkuiˉ puiˍ 39:1, 2, 7-12) Ngaˬ hui dawˇ shiˍ puiˉ ve nyi ma htaꞈ gʼa te jawˬ ve yoˬ. Ngaˬ hui htaꞈ ga laˇ tuˬ, Yaˬhoˉvaˬ daꞈ kehˬ ve awˬ ha hpu leh Liꞈ hpu hkʼaw awˬ liˇ awˬ hkʼaˇ peꞈ laˇ ve yoˬ. (Roˉmaꞈ 9:1) Ngaˬ hui dawˇ shiˍ puiˉ ve nyi ma htaꞈ hkʼaˬ hkʼe te jawˬ gʼa tuˬ le? Teˇ geh nyi sheˍ.

8. (a) Ngaˬ hui ve nyi ma hkʼaw cawˬ ve awˬ ceuˬ dawˇ shiˍ puiˉ ve nyi ma htaꞈ hkʼaˬ hkʼe heuˆ la gʼa ve le? (b) Ngaˬ hui maˇ dawˇ cheˆ sheˍ htaˇ, a shu yawˇ awˬ to htaꞈ hkʼaˬ hkʼe na nyi cawˇ ve le?

⁸ Chaw teˇ hpaˍ dawˇ ve, dawˇ shiˍ puiˉ ve nyi ma htaꞈ na yuˬ ve lehˬ nyi ma a loˍ awˬ hkʼaˇ suh gʼaꞈ te ve htaꞈ kʼoˆ gaˇ ve yoˬ. Nyi ma sha ve kʼo, hkʼaˬ hkʼe te kaꞈ hpehꞈ ve tehꞈ yawˇ hui dawˇ ve yoˬ. Yaꞈ hkʼaˇ, ngaˬ hui ve nyi ma hkʼaw cawˬ ve awˬ ceuˬ maˇ biˇ ve pa taw, ngaˬ hui htaꞈ yaꞈ kʼaw sheh yaꞈ laˇ gʼa ve yoˬ. Nyi ma hkʼaw cawˬ ve awˬ ceuˬ kanˇ paˆ cawˬ jaˇ ve pa taw, dawˇ shiˍ puiˉ ve nyi ma htaꞈ heuˆ la ve yoˬ. Liꞈ hpu hkʼaw kʼoˆ ve, “chaw yaˇ ve nyi ma htaꞈ a shu shiˍ hpehꞈ ve le? Chaw yaˇ ve nyi ma lehˬ awˬ kaˍ awˬ nu awˬ ceuˬ teˇ hpaˍ aꞈ kehˉ heˍ puiˉ jaˇ ve yoˬ. Gu na˗e piˇ tuˬ ve te maˇ gʼa.” (Yeˍraˍmiˆ 17:9) Chi htaꞈ pa taw, yaꞈ ve htaꞈ cawˇ ve yoˬ tehꞈ ngaˬ hui dawˇ la gʼa ve yoˬ. Tawˆ pa haˉ te kʼo, Pawˇluꞈ Hkriꞈ yaˇ maˇ hpehꞈ la sheˍ htaˇ, Gʼuiˬ sha ve chaw htaꞈ fawˉ mehˍ piˇ ve cawˇ ve tehꞈ yawˇ dawˇ ve yoˬ. Pawˇluꞈ daꞈ ve dawˇ shiˍ puiˉ ve nyi ma cawˬ ve tehꞈ yawˇ dawˇ ve yoˬ. Yaꞈ hkʼaˇ, peuˬ hkʼawꞈ nawˉ yawˇ kʼoˆ ve, “ngaˬ htaꞈ suhˉ jehˬ shehˍ hpaˇ lehˬ” Yaˬhoˉvaˬ yoˬ. (1 Kawˇrenˍhtuˆ 4:4; Tcuh yaˇ 23:1; 2 Tiˆmoˉseˍ 1:3) Yawˇ te ve awˬ ceuˬ Yaˬhoˉvaˬ hkʼaˬ hkʼe dawˇ ve htaꞈ shiˍ ve teˇ yanˇ,  Pawˇluꞈ pa ve yoˬ. Ngaˬ hui teˇ ceuˬ ceuˬ te˗a yoˬ te htaˇ, a shu yawˇ awˬ to htaꞈ na nyi cawˇ ve, ‘Yaˬhoˉvaˬ ngaˬ htaꞈ aˬ htoꞈ ma te tcuh gaˇ ve le?’

9. Gʼuiˬ sha htaꞈ kawˆ ve teˇ ceuˬ aˬ htoꞈ ma htaꞈ kʼoˆ gaˇ ve le?

⁹ Nawˬ chaw teˇ gʼaˇ htaꞈ haꞈ ve kʼo, yawˇ nyi hkʼaˇ maˇ suh tuˬ maˇ te piˇ gaˇ. Ngaˬ hui Gʼuiˬ sha htaꞈ haꞈ ve pa taw, yawˇ nyi hkʼaˇ maˇ suh tuˬ maˇ te piˇ gaˇ. Ngaˬ hui hkʼaˬ htaˆ kaꞈ Yaˬhoˉvaˬ nyi hkʼaˇ maˇ suh la ve dawˇ kawˆ ve yoˬ. Ngaˬ hui Neˍhaˍmiˆ htaꞈ henˇ yuˬ gʼa ve yoˬ. Yawˇ paw sha tuˬ yawˇ ve aˉ yaˇ htaꞈ maˇ yehˇ. Aˬ htoꞈ ma pa taw le? Yawˇ kʼoˆ ve, “Gʼuiˬ sha htaꞈ kawˆ ve pa taw oˇ hkʼe maˇ te.” (Neˍhaˍmiˆ 5:15) Neˍhaˍmiˆ Yaˬhoˉvaˬ nyi hkʼaˇ maˇ suh tuˬ maˇ te piˇ gaˇ. Yawˇ hkʼa shuˍ, ngaˬ hui kaꞈ te yaꞈ la ve htaꞈ kawˆ leh Yaˬhoˉvaˬ nyi hkʼaˇ maˇ suh la ve dawˇ kawˆ ve yoˬ. Ngaˬ hui Liꞈ hpu gʼaw htaˇ, Yaˬhoˉvaˬ nyi hkʼaˇ suh ve awˬ ceuˬ htaꞈ shiˍ la ve yoˬ.—Kʼoˆ maˍ ve awˬ lawn 6 htaꞈ nyi sheˍ.

10, 11. Tzuhˬ dawˬ ve awˬ lawn ngaˬ hui hkʼa dehꞈ dawˇ cheˆ gʼa tuˬ, Liꞈ hpu hkʼaw aˬ htoꞈ ma awˬ liˇ awˬ hkʼaˇ ga laˇ gʼa ve le?

¹⁰ Tawˇ pa haˉ te kʼo, teˇ pawˆ pawˆ Hkriꞈ yaˇ tzuhˬ dawˬ cawˇ maˇ dawˬ cawˇ ve htaꞈ gʼa dawˇ cheˆ ve yoˬ. Yawˇ hui hkʼa dehꞈ dawˇ cheˆ gʼa tuˬ, aˬ htoꞈ ma awˬ liˇ awˬ hkʼaˇ ga piˇ gʼa ve le? Awˬ lawn chi htaꞈ dawˇ nyi sheˍ. Liꞈ hpu hkʼaw tzuhˬ taˇ dawˬ tehꞈ maˇ kʼoˆ. Awˬ tehˬ kʼo, a pehˉ meuˇ gʼuiˬ lehˬ Gʼuiˬ sha peꞈ laˇ ve laꞈ shawnˍ hpehꞈ ve yoˬ tehꞈ Liꞈ hpu hkʼaw kʼoˆ ve yoˬ. (Chiˇ mvuh ve 104:14, 15) Yaꞈ hkʼaˇ, Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, “tzuhˬ dawˬ bvuhˆ ve” taˇ te. (Luˉkaꞈ 21:34) “Ha lehˬ tuˬ te ponˬ te leuˉ leh tzuhˬ dawˬ bvuhˆ ve” htaꞈ jaw kʼai˗o tehꞈ, Pawˇluꞈ Hkriꞈ yaˇ hui htaꞈ kʼoˆ piˇ ve yoˬ. (Roˉmaꞈ 13:13) Yawˇ kʼoˆ ve, tzuhˬ dawˬ bvuhˆ ve chaw “Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e.”—1 Kawˇrenˍhtuˆ 6:9, 10.

¹¹ Hkriꞈ yaˇ a shu yawˇ awˬ to htaꞈ na nyi cawˇ ve, ‘ngaˬ awˬ pon tzuhˬ dawˬ ve a yeˇ hkʼaˬ ma uiˍ ve le? Ngaˬ nyi ma sha tuˬ dawˬ ve laˇ? Ngaˬ a shu yawˇ awˬ to yonˍ gʼa tuˬ dawˬ  ve laˇ? Hkʼaˬ ma dawˬ ve, hkʼaˬ ma dawˬ hkʼeh ve, a shu yawˇ awˬ to htaꞈ yuˬ tiˍ gʼaˇ˗aw laˇ? a Tzuhˬ maˇ cawˬ kʼo, ngaˬ awˬ chawˇ geh daꞈ ve awˬ yanˇ cawˬ gʼa˗aw laˇ?’ Cuˇ yiˍ cawˬ ve awˬ hkʼaw lo dawˇ cheˆ gʼa tuˬ, Yaˬhoˉvaˬ geh bon lawˬ gʼa ve yoˬ. (Chiˇ mvuh ve 139:23, 24 gʼaw sheˍ.) Ngaˬ hui chi hkʼe te ve kʼo, dawˇ shiˍ puiˉ ve nyi ma htaꞈ te jawˬ gʼa leh Liꞈ hpu hkʼaw awˬ liˇ awˬ hkʼaˇ htaꞈ hawˍ daꞈ tcuh ve yoˬ. Yaꞈ hkʼaˇ, ngaˬ hui te tuˬ kʼawꞈ cawˬ sheˍ.

12, 13. Ngaˬ hui ve dawˇ shiˍ puiˉ ve nyi ma aˬ htoꞈ ma te shu htaꞈ peun daꞈ ve hehˉ le? Ngaˬ hui chi hkʼe peun daꞈ ve htaꞈ gʼa hpuˇ ve kʼo, hkʼaˬ hkʼe te tuˬ le?

¹² Teˇ gʼaˇ le le ve dawˇ shiˍ puiˉ ve nyi ma maˇ shuˍ daꞈ. Nawˬ ve dawˇ shiˍ puiˉ ve nyi ma teˇ ceuˬ ceuˬ te hpehꞈ ve tehꞈ nawˬ htaꞈ kʼoˆ laˇ ve htawˇ, awˬ kaˍ awˬ nu chaw teˇ gʼaˇ yawˇ ve dawˇ shiˍ puiˉ ve nyi ma maˇ te hpehꞈ tehꞈ yawˇ htaꞈ kʼoˆ piˇ ve yoˬ hehˉ. Tawˇ pa haˉ te kʼo, nawˬ tzuhˬ dawˬ hpehꞈ ve yoˬ tehꞈ dawˇ ve htawˇ, teˇ gʼaˇ kʼo maˇ dawˬ cawˇ tehꞈ dawˇ ve yoˬ hehˉ. Aˬ htoꞈ ma te teˇ lawn tiˉ hpehꞈ ve kaꞈ chaw 2 gʼaˇ dawˇ hkʼaˇ peun daꞈ gʼa ve le?

¹³ Laiˉ pawˆ kʼo, uiˍ la kuiˬ, yehˬ kʼa hkʼaw dawˇ ve awˬ hkʼaˇ, a shu yawˇ awˬ to hpehꞈ laˬ jaw ve, leh awˬ nu ve awˬ ceuˬ chaw yaˇ ve dawˇ hkʼaˇ htaꞈ heuˆ la ve yoˬ. Tzuhˬ dawˬ ve htaꞈ kʼoˆ ve teˇ yanˇ, keunˍ lawꞈ cawˇ lawꞈ maˇ dawˬ puiˉ ve kʼo, a ciˉ kaꞈ maˇ dawˬ ve lehˬ daꞈ ve yoˬ tehꞈ chaw teˇ hpaˍ dawˇ ve yoˬ. (1 Jawˇmawˇ 8:38, 39) Nawˬ chaw teˇ gʼaˇ gʼaˇ htaꞈ tzuhˬ taw piˇ leh yawˇ maˇ dawˬ ve kʼo, nawˬ hkʼaˬ hkʼe te tuˬ le? Nawˬ nyi hkʼaˇ maˇ suh tuˬ laˇ? Nawˬ yawˇ htaꞈ nehꞈ taw piˇ tuˬ laˇ? Aˬ htoꞈ ma te nawˬ maˇ dawˬ le tehꞈ  yawˇ htaꞈ na piˇ tuˬ laˇ? Nawˬ oˇ hkʼe maˇ te. Awˬ lawn kʼo, nawˬ yawˇ ve dawˇ shiˍ puiˉ ve nyi ma htaꞈ taˍ uiˍ piˇ ve yoˬ.

14, 15. Pawˇluꞈ awˬ co˗e htaˇ, aˬ htoꞈ ma awˬ lawn cawˬ la ve le? Pawˇluꞈ aˬ htoꞈ ma daꞈ ve awˬ lawn beˆ maˍ laˇ ve le?

¹⁴ Pawˇluꞈ awˬ co˗e htaˇ, awˬ lawn teˇ lawn cawˬ la leh teˇ gʼaˇ le le ve dawˇ shiˍ puiˉ ve nyi ma peun daꞈ gʼa ve htaꞈ hpeuꞈ maw laˇ ve yoˬ. Tcuh hkʼaw lo shaˍ hawˇ taˍ ve teˇ ceuˬ ceuˬ kʼo, maˇ heˆ heˆ ve oˉ kʼoˍ pui ve hkʼaw yehˇ jaw leh shaˉ hoꞈ htaꞈ tanˇ peuˬ˗oˬ ve yoˬ. (1 Kawˇrenˍhtuˆ 10:25) Pawˇluꞈ dawˇ ve, shaˍ chi hkʼe ve vuiˬ caˇ ve maˇ yaꞈ. Yawˇ awˬ pon caˇ tuˬ teˇ ceuˬ le le Yaˬhoˉvaˬ geh laˬ ve yoˬ. Yaꞈ hkʼaˇ, shaˉ hoꞈ htaꞈ oˉ kʼoˍ pui jaw ve awˬ viˉ awˬ nyi teˇ hpaˍ Pawˇluꞈ dawˇ ve hkʼe maˇ dawˇ. Yawˇ hui dawˇ ve, shaˍ chi hkʼe ve caˇ ve kʼo yaꞈ ve yoˬ. ‘Awˬ lawn chi ve ngaˬ ve dawˇ shiˍ puiˉ ve nyi ma htaꞈ teꞈ chiˉ maˇ kʼai. Ngaˬ caˇ gaˇ ve hkʼe, caˇ tuˬ a hkaw˗anˬ cawˬ ve yoˬ.’ Pawˇluꞈ chi hkʼe dawˇ ve laˇ?

¹⁵ Pawˇluꞈ oˇ hkʼe maˇ dawˇ. Awˬ viˉ awˬ nyi dawˇ ve awˬ ceuˬ a yeˇ uiˍ ve tehꞈ yawˇ shawˍ ve yoˬ. Chi htaꞈ pa taw, a hkaw˗anˬ cawˬ ve teˇ ceuˬ ceuˬ htaꞈ yawˇ ha lehˬ ha kʼa baˬ taˉ ve yoˬ. Pawˇluꞈ kʼoˆ ve, ngaˬ hui “a loˍ awˬ hkʼaˇ suh maˇ te” cawˇ. Yawˇ kʼawꞈ kʼoˆ ve, “Hkriꞈ htawˇ yawˇ awˬ to nyi ma cawˇ ve htaꞈ yawˇ maˇ te.” (Roˉmaꞈ 15:1, 3) Yeˍsuˆ hkʼa shuˍ, Pawˇluꞈ yawˇ awˬ pon dawˇ nyi ve aꞈ kehˉ shu htaꞈ dawˇ nyi piˇ ve yoˬ.—1 Kawˇrenˍhtuˆ 8:13; 10:23, 24, 31-33 gʼaw sheˍ.

16. Awˬ viˉ awˬ nyi ve dawˇ shiˍ puiˉ ve nyi ma teˇ ceuˬ ceuˬ te hpehꞈ ve tehꞈ yawˇ hui htaꞈ kʼoˆ piˇ ve kʼo, aˬ htoꞈ ma te ngaˬ hui maˇ ca kʼoˆ cawˇ ve le?

¹⁶ Yaꞈ hkʼaˇ, teˇ ceuˬ ceuˬ yaꞈ ve tehꞈ ngaˬ hui dawˇ ve htawˇ, awˬ kaˍ awˬ nu ve chaw teˇ gʼaˇ yawˇ ve dawˇ shiˍ puiˉ ve nyi ma lehˬ te hpehꞈ˗aw tehꞈ yawˇ htaꞈ kʼoˆ piˇ ve kʼo, ngaˬ hui hkʼaˬ hkʼe te tuˬ le? Ngaˬ hui te ve cawˇ˗aw leh shu te ve maˇ cawˇ tehꞈ maˇ gʼa kʼoˆ tuˬ, shaˍ tiꞈ gʼa te ve yoˬ.  (Roˉmaꞈ 14:10 gʼaw sheˍ.) Ngaˬ hui ve awˬ to htaꞈ dawˇ cheˆ tuˬ, Yaˬhoˉvaˬ dawˇ shiˍ puiˉ ve nyi ma peꞈ laˇ ve yoˬ. Shu htaꞈ dawˇ cheˆ tuˬ peꞈ laˇ ve maˇ heˆ. (Maꞈhtehˍ 7:1) Ngaˬ hui dawˇ cheˆ ve Hkriꞈ yaˇ awˬ moˍ htaꞈ maˇ hpaˆ daꞈ tcuh gaˇ. Yaꞈ hkʼaˇ, Hkriꞈ yaˇ awˬ moˍ haꞈ daꞈ leh teˇ moˍ tiˉ hpehꞈ tuˬ, ngaˬ hui coˇ caˇ leh ga piˇ cawˇ ve yoˬ.—Roˉmaꞈ 14:19.

17. Chaw teˇ hpaˍ hpaˍ ve dawˇ shiˍ puiˉ ve nyi ma hkʼaˬ hkʼe kʼai ve le?

¹⁷ Tcuh yaˇ Peˍtruˆ bvuhꞈ taˍ ve, “nawˬ hui shiˍ puiˉ ve nyi ma htaꞈ kehˬ lehˍ cawˬ piˇ˗oˆ.” (1 Peˍtruˆ 3:16) Chaw teˇ hpaˍ hpaˍ Yaˬhoˉvaˬ ve awˬ liˇ awˬ hkʼaˇ htaꞈ a yeˇ maˇ yuˬ. Maw  la ve kʼo, dawˇ shiˍ puiˉ ve nyi ma yawˇ hui htaꞈ shaˍ tiꞈ maˇ kʼawꞈ piˇ. Pawˇluꞈ kʼoˆ ve, yawˇ hui ve dawˇ shiˍ puiˉ ve nyi ma htaꞈ “sho chiˆ ngawˉ piˇ leh hkeuꞈ kʼai peuˬ ve hkʼe hpehꞈ ve yoˬ.” (1 Tiˆmoˉseˍ 4:2) Nawˬ aˬ miˍ chiˆ jaw laˇ? Oˇ kaˬ lo ve awˬ guiˬ kʼuˉ maˇ jawˬ puiˉ. Chaw teˇ gʼaˇ hkʼaˬ htaˆ kaꞈ te yaꞈ chehˇ ve kʼo, dawˇ shiˍ puiˉ ve nyi ma “hkeuꞈ kʼai” la gʼa ve yoˬ. Awˬ leh meuˇ kʼo, kanˉ maˇ kʼawꞈ te ve yoˬ.

18, 19. (a) A shu yawˇ awˬ to htaꞈ venˇ baˆ taˍ leh yaꞈ taw˗a tehꞈ dawˇ ve lehˬ ngaˬ hui htaꞈ aˬ htoꞈ ma maˍ laˇ ve le? (b) Ngaˬ hui te yaꞈ leh dawˇ hpfuhˆ˗oˬ ve htawˇ venˇ baˆ taˍ chehˇ sheˍ ve kʼo, ngaˬ hui aˬ htoꞈ ma te gʼa ve le?

¹⁸ Ngaˬ hui teˇ ceuˬ ceuˬ te htaˇ, dawˇ shiˍ puiˉ ve nyi ma yaꞈ˗oˬ tehꞈ kʼoˆ laˇ ve kʼo, ngaˬ hui a shu yawˇ awˬ to htaꞈ venˇ baˆ taˍ ve yoˬ. Chi ve lehˬ ngaˬ hui te kʼai peuˬ ve awˬ ceuˬ htaꞈ chaˬ nyi leh maˇ kʼawꞈ te tuˬ ga laˇ ve yoˬ. Ngaˬ hui te yaꞈ ve pa taw, shaˍ tiꞈ hkʼa dehꞈ taˍ puiˉ leh teˇ pawˆ maˇ kʼawꞈ te yaꞈ gaˇ. Tawˇ pa haˉ te kʼo, Jawˇmawˇ Daˍviˆ venˇ baˆ  te ve htawˇ, yawˇ dawˇ hpfuhˆ tuˬ yawˇ ve dawˇ shiˍ puiˉ ve nyi ma ga piˇ ve yoˬ. Yawˇ te taˍ ve htaꞈ chaꞈ naˬ leh awˬ gʼuˇ suhˍ hpawˇ Yaˬhoˉvaˬ hkawˇ na yuˬ tuˬ dawˇ teh taˍ ve yoˬ. Daˍviˆ yawˇ hpehꞈ laˬ jaw ve awˬ lawn htaꞈ pa taw, yawˇ kʼoˆ ve, Yaˬhoˉvaˬ lehˬ “venˇ baˆ hpehˇ” laˇ puiˉ ve yoˬ.—Chiˇ mvuh ve 51:1-19; 86:5; Kʼoˆ maˍ ve awˬ lawn 7 htaꞈ nyi sheˍ.

¹⁹ Yaꞈ hkʼaˇ, chaw teˇ hpaˍ te yaꞈ jaw leh dawˇ hpfuhˆ maw˗oˬ ve htawˇ, yawˇ awˬ to htaꞈ venˇ baˆ taˍ chehˇ sheˍ ve yoˬ. Chi hkʼe dawˇ ve lehˬ yawˇ nyi ma naˬ tuˬ te piˇ leh yawˇ awˬ hpfuhˇ maˇ cawˬ tehꞈ dawˇ tcuh ve yoˬ. Teˇ pawˆ pawˆ nawˬ chi hkʼe dawˇ ve kʼo, hpehꞈ la peuˬ ve awˬ ceuˬ htaꞈ kʼawꞈ pa maˇ gʼa tehꞈ taˇ leunˇ. Oˇ htaˇ hkʼaˬ ve cawˇ maˇ cawˇ ve nawˬ hkʼa dehꞈ na gʼa maˇ na gʼa ve htawˇ, Yaˬhoˉvaˬ nawˬ htaꞈ awˬ tehˬ awˬ na venˇ baˆ hpehˇ laˇ leh shiˆ mehˉ laˇ peuˬ. Yaˬhoˉvaˬ mehˆ gʼuˇ suhˍ nawˬ daꞈ kehˬ ve chaw hpehꞈ leh cawˇ ve awˬ ceuˬ te chehˇ ve yoˬ. Nawˬ a shu yawˇ awˬ to htaꞈ venˇ baˆ taˍ chehˇ sheˍ ve yoˬ  hehˉ. Yaꞈ hkʼaˇ, Liꞈ hpu hkʼaw kʼoˆ ve, “ngaˬ hui ve nyi ma aꞈ kehˉ Gʼuiˬ sha lehˬ uiˍ jaˇ daꞈ jaˇ.” (1 Yoˇhanˬ 3:19, 20 gʼaw sheˍ.) Gʼuiˬ sha haꞈ pehnˇ ve leh venˇ baˆ hpehˇ laˇ ve lehˬ ngaˬ hui a shu yawˇ awˬ to htaꞈ venˇ baˆ taˍ ve, yaꞈ taw˗a tehꞈ dawˇ ve aꞈ kehˉ kanˇ paˆ cawˬ ve yoˬ tehꞈ kʼoˆ gaˇ ve yoˬ. Yaˬhoˉvaˬ nawˬ htaꞈ venˇ baˆ hpehˇ laˇ peuˬ tehꞈ nawˬ hkʼa dehꞈ yonˍ gʼa ve yoˬ. Chaw teˇ gʼaˇ Yaˬhoˉvaˬ venˇ baˆ hpehˇ laˇ ve htaꞈ haꞈ yuˬ ve kʼo, yawˇ ve dawˇ shiˍ puiˉ ve nyi ma gawˬ lehˍ cawˬ leh ha lehˬ ve hkʼaw Gʼuiˬ sha ve kanˉ te gʼa ve yoˬ.—1 Kawˇrenˍhtuˆ 6:11; Heˍbrehˇ 10:22.

20, 21. (a) Liꞈ chi teˇ kʼoˆ nawˬ htaꞈ hkʼaˬ hkʼe ga laˇ ve le? (b) Ngaˬ hui aˬ htoꞈ ma leuˆ yuˬ gʼa ve le? Leuˆ yuˬ gʼa ve chi htaꞈ ngaˬ hui hkʼaˬ hkʼe te yehˇ cawˇ ve le?

²⁰ Awˬ leh meuˇ ve awˬ nyi tuꞈ ve hkanˍ ve awˬ hkʼaw lo nawˬ ve dawˇ shiˍ puiˉ ve nyi ma nawˬ htaꞈ shaˍ tiꞈ peꞈ laˇ leh haꞈ shaˉ laˇ gʼa ve yoˬ. Nawˬ ve dawˇ shiˍ puiˉ ve nyi ma htaꞈ te jawˬ tuˬ, li chi teˇ kʼoˆ ga laˇ ve yoˬ. Nawˬ a shaꞈ teꞈ kuiˬ lo awˬ lawn teˇ hpaˍ gʼa hpuˇ ve kʼo, Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ gʼa tuˬ kaꞈ ga laˇ ve yoˬ. Liꞈ chi teˇ kʼoˆ nawˬ hkʼaˬ hkʼe te cawˇ ve teˇ ceuˬ le le kʼoˆ taˍ ve maˇ heˆ. Ngaˬ hui Gʼuiˬ sha ve awˬ liˇ awˬ hkʼaˇ htaꞈ cuˇ leh “Hkriꞈ ve awˬ liˇ tawˇ hkawˇ” awˬ hkʼaˇ suh a shaꞈ teꞈ ve yoˬ. (Gaˍlaˍtiˆ 6:2) Gʼuiˬ sha ve awˬ liˇ tawˇ hkawˇ hkʼa tawˍ lehˆ maˇ kʼoˆ taˍ laˇ ve pa taw, te yaꞈ ve yoˬ tehꞈ ngaˬ hui maˇ kʼoˆ. (2 Kawˇrenˍhtuˆ 4:1, 2; Heˍbrehˇ 4:13; 1 Peˍtruˆ 2:16) Yaꞈ hkʼaˇ, ngaˬ hui leuˆ yuˬ gʼa ve htaꞈ yehˇ leh Yaˬhoˉvaˬ htaꞈ haꞈ ve yoˬ tehꞈ hpeuꞈ maw piˇ ve yoˬ.

²¹ Ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ hkʼa dehꞈ dawˇ nyi leh gʼaꞈ te ve kʼo, “daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa” leh Yaˬhoˉvaˬ dawˇ ve hkʼe dawˇ ve yoˬ. (Heˍbrehˇ 5:14) Ngaˬ hui chi hkʼe te ve kʼo, dawˇ shiˍ puiˉ ve nyi ma htaꞈ te jawˬ chehˇ ve yoˬ. Chi ve lehˬ ngaˬ hui a shaꞈ teꞈ kuiˬ sheh kʼai laˇ leh Gʼuiˬ sha haꞈ pehnˇ ve awˬ hkʼaw lo chehˇ taˍ gʼa tuˬ ga laˇ ve yoˬ.