1, 2. Gʼuiˬ sha ngaˬ hui htaꞈ hkʼaˬ htaˆ kaꞈ haꞈ laˇ tuˬ, ngaˬ hui hkʼaˬ hkʼe te cawˇ ve le?

 Ngaˬ hui teˇ gʼaˇ le le awˬ gʼaˇ awˬ shaˉ cawˬ gaˇ leh chehˇ sha cawˬ sha gaˇ ve pa taw, daꞈ ve caˇ tuˬ caˇ ve, hkʼaˬ htaˆ kaꞈ awˬ gʼaˇ caw ve, leh awˬ to htaꞈ nyi haꞈ shaˉ ve yoˬ. Chi hkʼe te tuˬ maˇ sha ve htawˇ, daꞈ la ve htaꞈ gʼa mawˬ htaˇ, gʼaˇ hteꞈ kʼawꞈ te gaˇ ve yoˬ. Yaꞈ hkʼaˇ, oˇ hkʼe ceh maˇ lawꞈ. Ngaˬ hui co ha hpawˇ kaꞈ awˬ gʼaˇ awˬ shaˉ uiˍ la tuˬ loˍ ve yoˬ.

² Ngaˬ hui Yaˬhoˉvaˬ htaꞈ meuˆ daꞈ ve awˬ hkuiˉ puiˍ tanˬ ve daꞈ ve htawˇ, shaˬ te shaˬ meuˆ daꞈ maˇ la piˇ cawˇ ve yoˬ. Hkriꞈ yaˇ hui htaꞈ Yuˇdaꞈ kʼoˆ piˇ ve, “Gʼuiˬ sha ve haꞈ pehnˇ ve awˬ hkʼaw lo a shu yawˇ awˬ to yeˬ chaweh chehˇ taˍ˗oꞈ.” Yawˇ kʼawꞈ kʼoˆ ve, “daꞈ kehˬ jaˇ ve nawˬ hui yonˍ ve teˇ ceuˬ awˬ hkʼaw lo uiˍ la yeˬ la piˇ˗oˆ.” (Yuˇdaꞈ 20, 21) Hkʼaˬ hkʼe te leh ngaˬ hui yonˍ ve teˇ ceuˬ uiˍ la yeˬ la piˇ gʼa tuˬ le?

3-5. (a) Yaˬhoˉvaˬ ve awˬ liˇ awˬ hkʼaˇ htaꞈ Saˍtanˍ ngaˬ hui htaꞈ hkʼaˬ hkʼe dawˇ tcuh gaˇ ve le? (b) Yaˬhoˉvaˬ ve awˬ liˇ tawˇ hkawˇ leh awˬ liˇ awˬ hkʼaˇ htaꞈ nawˬ hkʼaˬ hkʼe dawˇ ve le?

³ Yaˬhoˉvaˬ ve awˬ hkʼaˇ daꞈ jaˇ ve tehꞈ nawˬ hkʼa dehꞈ yonˍ cawˇ ve yoˬ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve kʼo, a shaꞈ teꞈ chehˇ ve haˍ jaˇ, hkʼaˬ ve cawˇ maˇ cawˇ ve nawˬ hkʼaˇ nawˬ dawˇ cheˆ gʼa ve kʼo, ha lehˬ tuˬ yoˬ tehꞈ Saˍtanˍ nawˬ htaꞈ dawˇ tcuh gaˇ ve yoˬ. Aˬ sho˗eˬ htaˇ,  Eˍdenˍ hko hkʼaw tanˬ leh Saˍtanˍ chaw yaˇ htaꞈ chi hkʼe dawˇ tcuh ve yoˬ. (Awˬ hkuiˉ puiˍ 3:1-6) Chi beuꞈ teˇ co˗e htawˇ, Saˍtanˍ gʼaˇ hteꞈ coˇ caˇ chehˇ sheˍ ve yoˬ.

⁴ Saˍtanˍ kʼoˆ ve awˬ tehˬ yoˬ laˇ? Yaˬhoˉvaˬ ve awˬ liˇ awˬ hkʼaˇ hehnˇ jaˇ laˇ? Maˇ heˆ. Nawˬ daꞈ jaˇ ve hko hkʼaw te toˇ chehˇ ve htaꞈ dawˇ nyi sheˍ. Hko hkʼaw teˇ kaˬ lo ko taˍ ve mvuh jaˇ ve htaꞈ nawˬ mawˇ htaˇ, ‘aˬ htoꞈ ma te ko taˍ ve leh naˍ ngaˬ nyi maˇ mawˬ’ tehꞈ nawˬ dawˇ ve yoˬ hehˉ. Oˇ ve hkʼawꞈ nawˉ, hko ko taˍ ve teˇ hpawˇ lo laˇ caˬ shiˉ kuˬ chehˇ ve htaꞈ nawˬ gʼa kaˇ ve yoˬ. Chi teˇ hkui hko ko taˍ ve htaꞈ nawˬ hkʼaˬ hkʼe dawˇ ve le? Laˇ caˬ shiˉ nawˬ htaꞈ maˇ gʼa cheꞈ caˇ tuˬ, hko ko taˍ laˇ ve htaꞈ nawˬ ha lehˬ jaˇ! Yaˬhoˉvaˬ ve awˬ liˇ awˬ hkʼaˇ hko ko taˍ ve htaꞈ shuˍ leh, Neˇ haiˬ Saˍtanˍ kʼo laˇ caˬ shiˉ htaꞈ shuˍ ve yoˬ. Liꞈ hpu hkʼaw kʼoˆ ve, “shaˍ tiꞈ te leh hkʼa dehꞈ shaw taˍ˗oꞈ. Nawˬ hui ve canˇ paˍ neˇ haiˬ lehˬ kuˬ chehˇ ve laˇ caˬ shiˉ hkʼa shuˍ shuˍ, shu htaꞈ cheꞈ caˇ tuˬ ca caw nyi toˇ chehˇ ve yoˬ.”—1 Peˍtruˆ 5:8.

⁵ Yaˬhoˉvaˬ nawˬ htaꞈ daꞈ jaˇ ve a shaꞈ teꞈ chehˇ tcuh gaˇ ve yoˬ. Yawˇ lehˬ Saˍtanˍ ngaˬ hui htaꞈ maˇ heˍ yuˬ tcuh gaˇ. Chi htaꞈ pa taw, ngaˬ hui htaꞈ haꞈ shaˉ leh ngaˬ hui ha lehˬ tuˬ, Gʼuiˬ sha awˬ liˇ tawˇ hkawˇ leh awˬ liˇ awˬ hkʼaˇ peꞈ laˇ ve yoˬ. (Eˇfeˇsuꞈ 6:11) Yaˍkoˆ bvuhꞈ taˍ ve, “biˇ ve awˬ liˇ tawˇ hkawˇ htaꞈ nyi tcuhˉ taˍ ve chaw teˇ gʼaˇ lehˬ . . . yawˇ hkʼa te ve kanˉ teˇ hpaˍ awˬ hkʼaw lo awˬ bon uiˍ ve yoˬ.”—Yaˍkoˆ 1:25.

6. Yaˬhoˉvaˬ ve awˬ hkʼaˇ daꞈ jaˇ ve tehꞈ ngaˬ hui yonˍ gʼa tuˬ hkʼaˬ hkʼe te cawˇ ve le?

⁶ Ngaˬ hui Yaˬhoˉvaˬ beˆ maˍ laˇ hkawˇ htaꞈ gʼaꞈ te ve kʼo, a shaꞈ teꞈ kuiˬ lo daꞈ la leh yawˇ geh meuˆ daꞈ maˇ laˇ tuˬ yoˬ. Tawˇ pa haˉ te kʼo, ngaˬ hui yawˇ geh hkʼaˬ htaˆ kaꞈ bon lawˬ tuˬ yawˇ kuˬ laˇ ve htaꞈ haꞈ yuˬ htaˇ, ngaˬ hui awˬ bon gʼa ve yoˬ. (Maꞈhtehˍ 6:5-8; 1 Hteˇsaˍlawˇniˆ 5:17) Ngaˬ hui yawˇ beˆ maˍ laˇ hkawˇ htaꞈ gʼaꞈ te leh yawˇ htaꞈ oˉ kʼoˍ pui tuˬ hpawnˬ daꞈ la ve, awˬ gʼaˇ piˇ daꞈ ve, shu htaꞈ Liꞈ hpu maˍ  leh gʼaˇ hteꞈ hto toˇ chehˇ ve kʼo, ngaˬ hui ha lehˬ ve yoˬ. (Maꞈhtehˍ 28:19, 20; Gaˍlaˍtiˆ 6:2; Heˍbrehˇ 10:24, 25) Ngaˬ hui yonˍ ve shaˬ te shaˬ uiˍ la yeˬ la tuˬ, chi teˇ hpaˍ hkʼaˬ hkʼe ga laˇ gʼa ve le tehꞈ dawˇ nyi ve kʼo, Yaˬhoˉvaˬ ve awˬ hkʼaˇ daꞈ jaˇ ve tehꞈ ngaˬ hui yonˍ gʼa ve yoˬ.

7, 8. Awˬ gʼuˇ suhˍ hpawˇ beˬ ve lawˇ ve gʼa hpuˇ ve htaꞈ ngaˬ hui maˇ dawˇ hkiˉ tuˬ, aˬ htoꞈ ma ga laˇ gʼa ve le?

⁷ Awˬ gʼuˇ suhˍ hpawˇ beˬ ve lawˇ ve gʼa hpuˇ htaˇ tawˍ daꞈ maˇ gʼaˇ tuˬ yoˬ tehꞈ ngaˬ hui dawˇ hkiˉ ve yoˬ hehˉ. Nawˬ chi hkʼe dawˇ ve kʼo, Yaˬhoˉvaˬ kʼoˆ taˍ ve htaꞈ tawnˇ taˍ sheˍ. “Ngaˬ [Yaˬhoˉvaˬ, MGS] lehˬ nawˬ hui ve Gʼuiˬ sha hpehꞈ leh, nawˬ hui daꞈ la tuˬ maˍ laˇ shehˍ hpaˇ leh, nawˬ hui kʼai cawˇ ve yaꞈ kʼaw htaꞈ beˆ maˍ laˇ shehˍ hpaˇ hpehꞈ ve yoˬ. Nawˬ hui ngaˬ ve tawˇ htaꞈ hkʼa dehꞈ na yuˬ ve hkʼe kʼo, ngaˬ ve awˬ bon teˇ hpaˍ teˇ pawˆ kaꞈ maˇ fiˍ kʼai puiˉ ve iˉ kaˆ lawˬ hkʼa shuˍ, nawˬ hui awˬ pon tawˆ la tuˬ yoˬ. Laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ hkʼa shuˍ, nawˬ hui gʼaˇ shehˍ hpaˇ hpehꞈ tuˬ yoˬ.”—Iˉsaˍyaˆ 48:17, 18.

⁸ Ngaˬ hui Yaˬhoˉvaˬ hkawˇ na yuˬ ve kʼo, maˇ fiˍ kʼai puiˉ  ve iˉ kaˆ lawˬ hkʼa shuˍ, ngaˬ hui hkʼaˬ htaˆ kaꞈ gawˬ lehˍ cawˬ tuˬ yoˬ. Ngaˬ hui daꞈ ve htaꞈ te ve lehˬ laˇ tsuhˇ gʼuiˬ pfuhˍ lo taˆ la chehˇ ve gʼuiˬ baˇ hkʼa shuˍ hpehꞈ tuˬ yoˬ. Aˬ htoꞈ ma gʼa hpuˇ ve htawˇ maˇ kʼoˆ, ngaˬ hui ka tiꞈ yeˬ gʼa tuˬ yoˬ. Awˬ lawn kʼo, Liꞈ hpu hkʼaw ka tiꞈ te laˇ ve, “nawˬ ve dawˇ haˍ tuˬ teˇ hpaˍ Gʼuiˬ sha geh teh taˉ˗oˆ. Yawˇ nawˬ htaꞈ ga laˇ tuˬ yoˬ. Yawˇ lehˬ hteˇ ve cawˇ ve chaw htaꞈ teˇ pawˆ kaꞈ shonˇ kʼai piˇ tuˬ ve maˇ heˆ.”—Chiˇ mvuh ve 55:22.

9, 10. Co ha hpawˇ ve chaw mawˇ hpehꞈ ve lehˬ hkʼaˬ hkʼe kʼoˆ gaˇ ve le?

⁹ Nawˬ Yaˬhoˉvaˬ htaꞈ shaˬ te shaˬ meuˆ daꞈ tuˬ te ve kʼo, nawˬ co ha hpawˇ ve “chaw mawˇ” hpehꞈ la ve yoˬ. (Heˍbrehˇ 5:14) Chaw mawˇ hpehꞈ ve aˬ htoꞈ ma htaꞈ kʼoˆ gaˇ ve le?

¹⁰ Ngaˬ hui a shaꞈ maˇ la htaˇ, co ha hpawˇ ve chaw mawˇ teˇ pawˆ tiˉ hpehꞈ la ve tehꞈ kʼoˆ gaˇ ve maˇ heˆ. Co ha hpawˇ ve chaw mawˇ hpehꞈ tuˬ, Yaˬhoˉvaˬ htaꞈ gʼa meuˆ daꞈ leh yawˇ dawˇ ve hkʼe gʼa dawˇ ve yoˬ. (Yoˇhanˬ 4:23) Pawˇluꞈ bvuhꞈ taˍ ve, “awˬ suhˍ awˬ shaˍ htaꞈ caˉ daꞈ ve chaw teˇ hpaˍ lehˬ awˬ suhˍ awˬ shaˍ hpawˇ htaꞈ dawˇ nyi tcuhˉ taˍ ve nyi ma cawˬ ve yoˬ. Yaꞈ hkʼaˇ, Awˬ ha hpu htaꞈ caˉ daꞈ ve chaw teˇ hpaˍ lehˬ Awˬ ha hpu htaꞈ caˉ daꞈ ve awˬ ceuˬ teˇ hpaˍ htaꞈ dawˇ nyi tcuhˉ taˍ ve nyi ma cawˬ ve yoˬ.” (Roˉmaꞈ 8:5) Co ha hpawˇ ve chaw mawˇ lehˬ pyawˍ ve awˬ ceuˬ leh hpu shi mawˇ jeˬ a yeˇ uiˍ jaˇ tehꞈ maˇ shawˍ. Yaꞈ hkʼaˇ, cuˇ yiˍ cawˬ ve hkʼaw dawˇ cheˆ ve leh Yaˬhoˉvaˬ ve kanˉ te ve a yeˇ uiˍ jaˇ ve tehꞈ yawˇ shawˍ ve yoˬ. (Tawˇ naˉ ve 27:11; Yaˍkoˆ 1:2, 3 gʼaw sheˍ.) Shu nyiˉ piˇ htaˇ, yawˇ maˇ te yaꞈ. Co ha hpawˇ ve chaw mawˇ cawˇ ve htaꞈ shiˍ leh gʼaꞈ te ve yoˬ.

11, 12. (a) “Daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa ve” htaꞈ Pawˇluꞈ hkʼaˬ hkʼe kʼoˆ ve le? (b) Co ha hpawˇ ve chaw mawˇ hpehꞈ la ve enˍ daꞈ ve htaꞈ hkʼaˬ hkʼe te shuˍ ve le?

¹¹ Ngaˬ hui co ha hpawˇ ve chaw mawˇ hpehꞈ la tuˬ gʼa coˇ caˇ ve yoˬ. Tcuh yaˇ Pawˇluꞈ bvuhꞈ taˍ ve, “heh ve caˇ tuˬ  lehˬ chaw mawˇ teˇ hpaˍ awˬ pon yoˬ. Yawˇ hui lehˬ a shu yawˇ mawˬ ve kaˇ ve jawˬ ve awˬ ceuˬ teˇ hpaˍ htaꞈ puiˉ la tuˬ laiˉ pawˆ te jawˬ ve pa taw, daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa ve yoˬ.” (Heˍbrehˇ 5:14) “Te jawˬ ve” htaꞈ kʼoˆ htaˇ, enˍ daꞈ tuˬ te jawˬ ve htaꞈ ngaˬ hui dawˇ mawˬ gʼa ve yoˬ hehˉ.

¹² Enˍ daꞈ ve chaw cheuˬ jaˇ ve htaꞈ ngaˬ hui gʼa mawˬ ve kʼo, puiˉ la tuˬ yawˇ awˬ yanˇ yehˇ maˇ jaˇ leh gʼaˇ hteꞈ te jawˬ ve tehꞈ ngaˬ hui shiˍ ve yoˬ. Yawˇ paw la htaˇ kaꞈ enˍ daꞈ ve chaw hpehꞈ ve maˇ heˆ. Yaˇ ehˉ paw la htaˇ, hkui sheh laꞈ sheh hkʼaˬ hkʼe te yehˇ tuˬ yawˇ maˇ shiˍ sheˍ. Hkʼawꞈ nawˉ htaˇ, yawˇ choˬ yuˬ oˇ yuˬ te puiˉ la leh yaꞈ kʼaw juˇ jawˬ ve yoˬ. Yawˇ te jawˬ ve kʼo, enˍ daꞈ ve chaw hpehꞈ la tuˬ yoˬ hehˉ. Chi hkʼa shuˍ shuˍ, ngaˬ hui awˬ yanˇ yehˇ leh te jawˬ ve kʼo, co ha hpawˇ ve chaw mawˇ hpehꞈ la tuˬ yoˬ.

13. Yaˬhoˉvaˬ hkʼa shuˍ dawˇ nyi puiˉ la tuˬ, ngaˬ hui htaꞈ aˬ htoꞈ ma ga laˇ ve le?

¹³ Ngaˬ hui Yaˬhoˉvaˬ hkʼa shuˍ dawˇ nyi puiˉ tuˬ, liꞈ chi teˇ kʼoˆ hkʼaw gʼa chaˬ nyi peuˬ. Chi hkʼoˆ kaꞈ, Yaˬhoˉvaˬ ve awˬ liˇ awˬ hkʼaˇ htaꞈ haꞈ leh awˬ hpfuhˇ shiˍ tuˬ, liꞈ kʼoˆ chi ve hkʼaw maˍ laˇ ve yoˬ. Ngaˬ hui gʼa dawˇ cheˆ ve teˇ yanˇ, a shu yawˇ awˬ to htaꞈ na nyi cawˇ ve, ‘Liꞈ hpu hkʼaw cawˬ ve awˬ liˇ tawˇ hkawˇ leh awˬ liˇ awˬ hkʼaˇ hkʼaˬ ve teˇ tawn yehˇ gʼa ve le? Awˬ liˇ awˬ hkʼaˇ chi htaꞈ ngaˬ hkʼaˬ hkʼe te yehˇ tuˬ le? Yaˬhoˉvaˬ ngaˬ htaꞈ aˬ htoꞈ ma te tcuh gaˇ ve le?’—Tawˇ naˉ ve 3:5, 6; Yaˍkoˆ 1:5 gʼaw sheˍ.

14. Ngaˬ hui yonˍ ve uiˍ la yeˬ la tuˬ, aˬ htoꞈ ma gʼa te ve le?

¹⁴ Ngaˬ hui Yaˬhoˉvaˬ htaꞈ yonˍ ve lehˬ hkʼaˬ htaˆ kaꞈ uiˍ la yeˬ la gʼa ve yoˬ. Ngaˬ hui awˬ bon cawˬ ve caˇ tuˬ caˇ ve kʼo, awˬ gʼaˇ awˬ shaˉ cawˬ la ve yoˬ. Chi hkʼa shuˍ shuˍ, ngaˬ hui Yaˬhoˉvaˬ ve awˬ lawn henˇ ve kʼo, yonˍ ve teˇ ceuˬ uiˍ la yeˬ la ve yoˬ. Ngaˬ hui Liꞈ hpu tanˬ henˇ htaˇ, Yaˬhoˉvaˬ ve awˬ lawn leh yawˇ te tcuh gaˇ ve awˬ ceuˬ gʼa henˇ ve yoˬ. Yaꞈ hkʼaˇ, awˬ yanˇ ponˬ kʼai htaˇ, ngaˬ hui haˍ ve awˬ lawn  teˇ hpaˍ htaꞈ hkʼa dehꞈ na gʼa tuˬ loˍ ve yoˬ. Pawˇluꞈ kʼoˆ taˍ ve, “heh ve caˇ tuˬ lehˬ chaw mawˇ teˇ hpaˍ awˬ pon yoˬ.” Ngaˬ hui henˇ taˍ ve awˬ ceuˬ yuˬ yehˇ ve kʼo, cuˇ yiˍ cawˬ tuˬ yoˬ. Liꞈ hpu hkʼaw kʼoˆ ve, “cuˇ yiˍ htaꞈ ca ve teˇ ceuˬ lehˬ uiˍ jaˇ ve kanˉ teˇ maˬ hpehꞈ ve yoˬ.”—Tawˇ naˉ ve 4:5-7; 1 Peˍtruˆ 2:2.

15. Awˬ tehˬ awˬ na Yaˬhoˉvaˬ leh awˬ viˉ awˬ nyi htaꞈ haꞈ ve hkʼaˬ hkʼe te a yeˇ uiˍ ve le?

¹⁵ Awˬ gʼaˇ awˬ shaˉ cawˬ gaˇ leh chehˇ sha cawˬ sha gaˇ ve chaw lehˬ yawˇ awˬ to htaꞈ hkʼa dehꞈ gʼa nyi haꞈ shaˉ ve yoˬ. Chi hkʼa shuˍ shuˍ, co ha hpawˇ ve chaw mawˇ Yaˬhoˉvaˬ htaꞈ hkʼaˬ htaˆ kaꞈ meuˆ daꞈ tuˬ, gʼa coˇ caˇ ve yoˬ. Pawˇluꞈ shaˍ tiꞈ peꞈ laˇ ve, “nawˬ hui yonˍ ve awˬ hkʼaw lo yeˬ chehˇ˗aw laˇ, maˇ yeˬ chehˇ laˇ, a shu yawˇ awˬ to htaꞈ hkʼa dehꞈ tehˆ nyi lawˇ nyi sheˍ.” (2 Kawˇrenˍhtuˆ 13:5) Yaꞈ hkʼaˇ, yonˍ ve uiˍ la yeˬ la ve ceh tiˉ maˇ lawꞈ. Yaˬhoˉvaˬ leh awˬ viˉ awˬ nyi htaꞈ haꞈ maˇ la tuˬ, ngaˬ hui gʼa coˇ caˇ ve yoˬ. Pawˇluꞈ kʼoˆ ve, “cuˇ yiˍ hkʼa peu˗eˬ htaꞈ ngaˬ shiˍ ve maˇ kʼoˆ, hkʼaw teˇ hpaˍ htaꞈ jiˆ kʼai gʼa tuˬ yonˍ ve nyi ma hkʼa biˇ cawˬ ve maˇ kʼoˆ, haꞈ pehnˇ ve maˇ cawˬ kʼo, ngaˬ teꞈ chiˉ awˬ bon maˇ cawˬ.”—1 Kawˇrenˍhtuˆ 13:1-3.

16. Saˍtanˍ ngaˬ hui htaꞈ hkʼaˬ hkʼe dawˇ tcuh gaˇ ve le?

¹⁶ Ngaˬ hui Yaˬhoˉvaˬ nyi hkʼaˇ suh tuˬ te piˇ maˇ gʼa tehꞈ Saˍtanˍ ngaˬ hui htaꞈ dawˇ tcuh gaˇ ve yoˬ. Yawˇ ngaˬ hui htaꞈ awˬ gʼaˇ nuˇ kʼai tcuh leh tuꞈ ve hkanˍ ve htaꞈ ponˬ tuˬ awˬ hkʼaˇ maˇ cawˬ tehꞈ dawˇ tcuh gaˇ ve yoˬ. Yawˇ ngaˬ hui awˬ viˉ awˬ nyi htaꞈ maˇ yonˍ daꞈ tcuh gaˇ leh maˇ ha lehˬ tcuh gaˇ. (Eˇfeˇsuꞈ 2:2) Ngaˬ hui maˇ daꞈ ve dawˇ hkʼaˇ cawˬ ve kʼo, ngaˬ hui a shu yawˇ awˬ to leh Yaˬhoˉvaˬ geh meuˆ daꞈ ve htaꞈ luˬ kʼai tuˬ yoˬ tehꞈ Saˍtanˍ shiˍ ve yoˬ. Yaꞈ hkʼaˇ, maˇ daꞈ ve dawˇ hkʼaˇ htaꞈ tawˍ daꞈ gʼaˇ tuˬ, Yaˬhoˉvaˬ dawˇ law kuiˬ peꞈ laˇ ve yoˬ.

17. Aˬ htoꞈ ma te dawˇ law kuiˬ a yeˇ uiˍ jaˇ ve le?

 ¹⁷ 1 Hteˇsaˍlawˇniˆ liꞈ 5:8 hkʼaw ngaˬ hui ve dawˇ law kuiˬ leh maꞈ yaˇ ve sho uˉ tcuhˍ htaꞈ tehˆ daꞈ ve yoˬ. Oˇ kaˬ lo kʼoˆ ve sho uˉ tcuhˍ chi ve lehˬ “htaiˍ hkʼawꞈ ve htaꞈ caˉ daꞈ ve dawˇ law” kuiˬ hpehꞈ ve yoˬ. Ngaˬ hui ve dawˇ hkʼaˇ htaꞈ haꞈ shaˉ leh maˇ daꞈ ve dawˇ hkʼaˇ htaꞈ tawˍ daꞈ gʼaˇ tuˬ, Yaˬhoˉvaˬ ka tiꞈ te laˇ ve dawˇ law kuiˬ lehˬ ga laˇ ve yoˬ.

18, 19. Dawˇ law kuiˬ Yeˍsuˆ htaꞈ hkʼaˬ hkʼe gʼa piˇ ve le?

¹⁸ Yeˍsuˆ dawˇ law kuiˬ cawˬ ve pa taw, yawˇ awˬ gʼaˇ maˇ nuˇ. Yawˇ maˇ suh sheˍ teˇ haˉ htaˇ, dawˇ haˍ tuˬ laiˉ ceuˬ gʼa hpuˇ ve yoˬ. Meuˆ daꞈ jaˇ ve awˬ chawˇ teˇ gʼaˇ yawˇ htaꞈ hpfuhˆ ve yoˬ. Awˬ nu ve teˇ gʼaˇ kʼo, yawˇ htaꞈ maˇ shiˍ daꞈ tehꞈ kʼoˆ piˇ ve yoˬ. Awˬ nu ve meuˆ daꞈ jaˇ ve awˬ chawˇ yawˇ htaꞈ baˬ taˉ leh hpaw˗e ve yoˬ. Yawˇ ve chehˇ kuiˬ lo chehˇ ve chaw yawˇ htaꞈ tawˍ piˇ leh tuꞈ hkanˍ suh tcuh gaˇ ve yoˬ. Yeˍsuˆ hkʼaˬ hkʼe te yeunˇ hkanˍ gʼaˇ ve le? “Yawˇ awˬ gʼuˇ suhˍ teh taˍ ve ha lehˬ tuˬ ve teˇ ceuˬ htaꞈ pa taw, yaꞈ taw ve teˇ ceuˬ htaꞈ maˇ dawˇ leh, [suhˆ hkuiˉ daw, MGS] hkʼoˆ lo  hkanˍ suh peuˬ ve yoˬ. Yawˇ lehˬ chi beuꞈ Gʼuiˬ sha ve kʼaw jaw laꞈ sha paˉ lo mui chehˇ taˍ peuˬ.”—Heˍbrehˇ 12:2.

¹⁹ Yeˍsuˆ ka tiꞈ yeˬ ve kʼo, Yaˬhoˉvaˬ awˬ meꞈ awˬ hponˇ gʼa leh Saˍtanˍ heˍ paˍ hpehꞈ ve tehꞈ hpeuꞈ maw piˇ gʼa ve tehꞈ Yeˍsuˆ shiˍ ve yoˬ. Dawˇ law kuiˬ chi htaꞈ pa taw, Yeˍsuˆ ha lehˬ jaˇ. Maˇ maw kʼo, mvuhˇ naw ma hkʼoˆ Awˬ pa geh gʼa chehˇ tuˬ yoˬ tehꞈ Yeˍsuˆ shiˍ ve yoˬ. Dawˇ law kuiˬ chi cawˬ ve pa taw, yawˇ yeunˇ hkanˍ gʼaˇ ve yoˬ. Yeˍsuˆ hkʼa shuˍ, ngaˬ hui dawˇ law kuiˬ chi htaꞈ hkʼaˬ htaˆ kaꞈ dawˇ nyi cawˇ ve yoˬ. Ngaˬ hui chi hkʼe te ve kʼo, aˬ htoꞈ ma gʼa hpuˇ ve htawˇ maˇ kʼoˆ, yeunˇ hkanˍ gʼaˇ tuˬ yoˬ.

20. Nawˬ daꞈ ve dawˇ hkʼaˇ cawˬ tuˬ, aˬ htoꞈ ma ga laˇ gʼa ve le?

²⁰ Nawˬ ve yonˍ hkʼaˇ leh yeunˇ hkanˍ ve htaꞈ Yaˬhoˉvaˬ mawˬ ve yoˬ. (Iˉsaˍyaˆ 30:18; Maˍlaˍhkiˆ 3:10 gʼaw sheˍ.) Yawˇ ka tiꞈ te laˇ ve, “nawˬ heuˆ gaˇ ve awˬ ceuˬ [ngaˬ] nawˬ htaꞈ piˇ laˇ tuˬ yoˬ.” (Chiˇ mvuh ve 37:4) Chi htaꞈ pa taw, nawˬ dawˇ law kuiˬ htaꞈ hkʼaˬ htaˆ kaꞈ dawˇ nyi sheˍ. Yaˬhoˉvaˬ ka tiꞈ te taˍ ve hpehꞈ la tuˬ awˬ nyi maˇ cawˬ tehꞈ  Saˍtanˍ ngaˬ hui htaꞈ dawˇ tcuh gaˇ ve yoˬ. Yaꞈ hkʼaˇ, maˇ daꞈ ve dawˇ hkʼaˇ taˇ cawˬ tcuh! Nawˬ ve dawˇ law kuiˬ htaꞈ hkʼa dehꞈ maˇ mawˬ cehnˍ ve kʼo, Yaˬhoˉvaˬ ga laˇ tuˬ lawˬ sheˍ. Hpiˇliˇpiˆ liꞈ 4:6, 7 hkʼaw kʼoˆ taˍ ve htaꞈ taˇ leunˇ piˇ. “Aˬ htoꞈ ma teˇ ceuˬ awˬ lawn htaꞈ maˇ kʼoˆ, taˇ dawˇ hkiˉ. Teˇ ceuˬ le le awˬ hkʼaw lo nawˬ hui bon lawˬ ve, lawˬ hkawˉ ve, leh chiˇ mvuh ve awˬ hkʼaw lo nawˬ hui hkʼa lawˬ gaˇ ve teˇ hpaˍ Gʼuiˬ sha htaꞈ hto piˇ˗oˆ. Oˇ hkʼe te ve kʼo, Gʼuiˬ sha lo laˬ ve chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ nawˬ hui ve nyi ma leh nawˬ hui ve dawˇ hkʼaˇ teˇ hpaˍ htaꞈ Yeˍsuˆ Hkriꞈ awˬ hkʼaw lo haꞈ shaˉ laˇ tuˬ yoˬ.”

21, 22. (a) Yaˬhoˉvaˬ miˬ guiˬ chi hkʼoˆ hkʼaˬ hkʼe hpehꞈ tcuh gaˇ ve le? (b) Nawˬ aˬ htoꞈ ma te gaˇ ve le?

²¹ Nawˬ awˬ yanˇ yehˇ leh awˬ gʼuˇ suhˍ hpawˇ daꞈ ve htaꞈ hkʼaˬ htaˆ kaꞈ dawˇ nyi sheˍ. Maˇ maw kʼo, a shaꞈ teꞈ chehˇ ve teˇ gʼaˇ le le Yaˬhoˉvaˬ htaꞈ oˉ kʼoˍ pui tuˬ yoˬ. (Hpeuꞈ maˍ ve 7:9, 14) Miˬ guiˬ awˬ suhˉ hkʼaw a shaꞈ teꞈ ve htaꞈ dawˇ nyi sheˍ. Ngaˬ hui dawˇ gʼa ve teˇ ceuˬ le le aꞈ kehˉ daꞈ ve yoˬ! Oˇ htaˇ, Saˍtanˍ, yawˇ ve neˇ hui, leh haiˬ ve hkʼa peu˗eˬ maˇ kʼawꞈ cawˬ. Nawˬ maˇ gʼa naˬ leh maˇ gʼa suh tuˬ yoˬ. Teˇ shawˉ le le tu la htaˇ, nawˬ awˬ gʼaˇ cawˬ leh a shaꞈ teꞈ chehˇ ve pa taw, ha lehˬ jaˇ tuˬ yoˬ. Miˬ guiˬ hkʼoˆ Paˍraˍdiˇsuˆ hpehꞈ la tuˬ, teˇ gʼaˇ le le kanˉ teˇ geh te tuˬ yoˬ. Caˇ tuˬ dawˬ tuˬ hkʼa biˇ cawˬ tuˬ yoˬ. Hkʼaˬ kaˬ lo chehˇ ve htawˇ maˇ kʼoˆ, kawˆ tuˬ maˇ cawˬ. Chaw yaˇ lehˬ daꞈ ve chaw, shiˍ puiˉ ve chaw hpehꞈ leh awˬ haiˬ maˇ te daꞈ ve yoˬ. Maˇ maw maw kʼo, miˬ guiˬ hkʼoˆ chehˇ ve chaw teˇ gʼaˇ le le “Gʼuiˬ sha ve awˬ yaˇ awˬ duˬ teˇ hpaˍ ve awˬ meꞈ awˬ hponˇ htaꞈ caˉ daꞈ ve ponˬ ve teˇ ceuˬ htaꞈ gʼa” tuˬ yoˬ.—Roˉmaꞈ 8:21.

²² Yaˬhoˉvaˬ lehˬ nawˬ yawˇ htaꞈ meuˆ daꞈ tcuh gaˇ ve yoˬ. Chi htaꞈ pa taw, teˇ nyi le le yawˇ hkawˇ na yuˬ leh yawˇ htaꞈ meuˆ daꞈ maˇ laˇ tuˬ, nawˬ te gʼa ve hkʼe teˇ ceuˬ le le te sheˍ. Ngaˬ hui teˇ gʼaˇ le le Gʼuiˬ sha haꞈ ve chaw co co taiˍ taiˍ hpehꞈ tuˬ, te˗a veuˬ!—Yuˇdaꞈ 21.