1, 2. Maˇ cawˇ maˇ hawˍ daꞈ htaˇ, teˇ geh kʼawꞈ chehˇ maˇ gʼa˗o ve laˇ? Kʼoˆ maˍ laˇ sheˍ.

 Awˬ hpawˇ awˬ miˇ ma heuˆ daꞈ ve lehˬ Yaˬhoˉvaˬ peꞈ laˇ ve laꞈ shawnˍ hpehꞈ ve yoˬ. Heuˆ daꞈ ve chaw lehˬ ha lehˬ dawˇ sha tuˬ cawˬ maˇ ve yoˬ. Yaꞈ hkʼaˇ, teˇ ca le le maˇ cawˇ maˇ hawˍ daꞈ ve kaꞈ gʼa hpuˇ tuˬ yoˬ. Awˬ hpawˇ awˬ miˇ ma maˇ cawˇ maˇ hawˍ daꞈ ve htaꞈ gu tuˬ awˬ hkʼaˇ maˇ mawˬ ve kʼo, oˇ htaˇ hkʼe leˇ maˇ meuˆ daꞈ tehꞈ yawˇ hui dawˇ ve yoˬ hehˉ.

² Ngaˬ hui ve awˬ hpawˇ awˬ miˇ ma teˇ pawˆ pawˆ maˇ cawˇ maˇ hawˍ daꞈ ve kʼo, ngaˬ hui anˇ tuˬ maˇ loˬ. Maˇ cawˇ maˇ hawˍ daꞈ htaˇ, teˇ geh kʼawꞈ chehˇ maˇ gʼa˗o ve maˇ heˆ. Teˇ ca ca kʼo, awˬ lawn uiˍ jaˇ ve cawˬ ve htawˇ, cawˇ daꞈ tuˬ ve awˬ hkʼaˇ mawˬ leh yehˬ kʼa kʼawꞈ yeˬ chehˇ gʼa ve yoˬ. Yawˇ hui hkʼaˬ hkʼe te gʼa ve le?

3, 4. Teˇ pawˆ pawˆ awˬ hpawˇ awˬ miˇ ma aˬ htoꞈ ma gʼa hpuˇ ve le?

³ Heuˆ daꞈ ve lehˬ maˇ shuˍ daꞈ ve chaw 2 gʼaˇ teˇ geh chehˇ la ve yoˬ. Yawˇ huiˉ maˬ dawˇ cawˇ ve, te hkʼaˇ dawˇ hkʼaˇ teˇ hpaˍ maˇ shuˍ daꞈ. Chi hkʼoˆ kaꞈ, paw la kuiˬ leh chaw liˇ vaˇ liˇ kaꞈ peun daꞈ ve yoˬ hehˉ. Yawˇ huiˉ maˬ hkʼa dehꞈ shiˍ daꞈ leh na gʼa daꞈ tuˬ, awˬ yanˇ gʼa yehˇ leh gʼa coˇ caˇ ve yoˬ.

⁴ Awˬ yanˇ maw la htaˇ, awˬ hpawˇ awˬ miˇ ma a shu yawˇ ve awˬ lawn htaꞈ dawˇ hkiˉ jaˇ ve kʼo, yawˇ hui vuiˇ daꞈ kʼai  gʼa ve yoˬ. Nyi˗a kʼo, yawˇ huiˉ maˬ teˇ geh maˇ chehˇ ve htaꞈ shuˍ ve yoˬ. Yawˇ hui meuˆ daꞈ la gʼa tuˬ aˬ htoꞈ ma ga piˇ gʼa ve le?

5. (a) Hkriꞈ yaˇ hui a shu yawˇ ve awˬ hpawˇ awˬ miˇ ma htaꞈ meuˆ daꞈ maˇ laˇ tuˬ hkʼaˬ hkʼe te gʼa ve le? (b) Heˍbrehˇ liꞈ 13:4 hkʼaw awˬ hpawˇ awˬ miˇ ma heuˆ daꞈ ve htaꞈ hkʼaˬ hkʼe shawˍ cawˇ ve le?

⁵ Yaˬhoˉvaˬ leh nawˬ ve awˬ hpawˇ awˬ miˇ ma htaꞈ meuˆ daꞈ maˇ la tuˬ, Yaˬhoˉvaˬ beˆ maˍ laˇ hkawˇ gu teh taˍ laˇ ve yoˬ. (Chiˇ mvuh ve 25:4; Iˉsaˍyaˆ 48:17, 18) Yawˇ kʼoˆ ve, “awˬ hpawˇ awˬ miˇ heuˆ daꞈ ve teˇ ceuˬ htaꞈ chaw hkʼa peu˗eˬ taˍ uiˍ taˍ mvuh piˇ˗oˆ.” (Heˍbrehˇ 13:4) Taˍ uiˍ taˍ mvuh piˇ ve awˬ ceuˬ lehˬ awˬ hpfuhˇ hkʼaˆ jaˇ. Awˬ ceuˬ chi htaꞈ haꞈ shaˉ cawˇ leh hkʼa sha sha˗ehˬ gʼa taˍ ve maˇ heˆ tehꞈ shawˍ cawˇ ve yoˬ. Yaˬhoˉvaˬ ngaˬ hui htaꞈ heuˆ daꞈ ve teˇ ceuˬ chi hkʼe shawˍ tcuh gaˇ ve yoˬ.

6. Yaˬhoˉvaˬ heuˆ daꞈ ve htaꞈ shawˍ taˍ ve awˬ hkʼaˇ Maꞈhtehˍ liꞈ 19:4-6 hkʼaw hkʼaˬ hkʼe kʼoˆ taˍ ve le?

⁶ Yaˬhoˉvaˬ heuˆ daꞈ ve htaꞈ awˉ lawˉ tanˬ shehˍ hpaˇ hpehꞈ ve yoˬ. Yawˇ ve Yaˇ paˍ Yeˍsuˆ kʼoˆ ve, “Te hpanˍ shehˍ hpaˇ lehˬ awˬ hkuiˉ puiˍ htaˇ kaꞈ hawˉ hkʼaˆ leh yaˇ miˇ htaꞈ te hpanˍ taˍ peuˬ leh kʼoˆ ve, chi htaꞈ pa taw hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh yawˇ ve awˬ miˇ ma htaꞈ caˉ daꞈ leh, yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ tehꞈ bvuhꞈ taˍ ve tawˇ hkawˇ htaꞈ nawˬ hui maˇ gʼaw jaw laˇ? Chi htaꞈ pa taw, yawˇ huiˉ maˬ nyiˇ gʼaˇ hpehꞈ ve maˇ heˆ, teˇ gʼaˇ tiˉ hpehꞈ la peuˬ. Hkʼe te leh, Gʼuiˬ sha caˉ daꞈ piˇ taˍ ve htaꞈ chaw yaˇ maˇ gʼa yuˬ hpaˆ daꞈ piˇ.” (Maꞈhtehˍ 19:4-6) Awˬ hkuiˉ puiˍ htaˇ kaꞈ, Yaˬhoˉvaˬ awˬ hpawˇ awˬ miˇ ma htaꞈ teˇ co˗e yeˬ piˇ tcuh gaˇ ve yoˬ. Yawˇ yehˬ kʼa meuˆ daꞈ leh a shaꞈ teꞈ chehˇ ve hkʼaw ha lehˬ tcuh gaˇ ve yoˬ.

7. Heuˆ daꞈ ve htaꞈ yeˬ gʼa tuˬ, awˬ hpawˇ awˬ miˇ ma hkʼaˬ hkʼe gʼa te ve le?

⁷ Chi beuꞈ teˇ co˗e oˇ htaˇ teˇ co˗e aꞈ kehˉ awˬ hpawˇ awˬ miˇ ma dawˇ haˍ tuˬ laiˉ ceuˬ gʼa hpuˇ ve yoˬ. Teˇ pawˆ pawˆ dawˇ haˍ ve cawˬ maˇ ve pa taw, awˬ hpawˇ awˬ miˇ ma teˇ geh chehˇ maˇ gʼa˗o tehꞈ dawˇ leh kʼawꞈ cawˇ daꞈ tuˬ maˇ te gaˇ. Yaꞈ hkʼaˇ, Yaˬhoˉvaˬ heuˆ daꞈ ve htaꞈ shawˍ taˍ ve awˬ hkʼaˇ shiˍ ve kʼo, ngaˬ hui awˬ bon gʼa tuˬ yoˬ.—1 Yoˇhanˬ 5:3.

8, 9. (a) Heuˆ daꞈ ve teˇ ceuˬ Yaˬhoˉvaˬ beˆ maˍ laˇ hkawˇ htaꞈ gʼaꞈ te cawˇ ve hkʼaˬ htaˆ le? (b) Ngaˬ hui awˬ pon heuˆ daꞈ ve teˇ ceuˬ awˬ hpfuhˇ hkʼaˆ jaˇ ve kʼo, hkʼaˬ hkʼe te cawˇ ve le?

⁸ Yaˬhoˉvaˬ beˆ maˍ laˇ ve hkʼaˬ htaˆ kaꞈ ngaˬ hui awˬ pon awˬ bon cawˬ ve yoˬ. Ngaˬ hui henˇ laˬ peuˬ ve hkʼe yawˇ kʼoˆ ve, “awˬ hpawˇ awˬ miˇ heuˆ daꞈ ve teˇ ceuˬ htaꞈ chaw hkʼa peu˗eˬ taˍ uiˍ taˍ mvuh piˇ˗oˆ.” (Heˍbrehˇ 13:4; Cuˇ yiˍ piˇ ve 5:4) Awˬ lawn chi ve haˍ ve htawˇ, ngaˬ hui  Yaˬhoˉvaˬ beˆ maˍ laˇ ve awˬ hkʼaˇ suh gʼaꞈ te ve kʼo, awˬ tehˬ awˬ na awˬ bon gʼa ve yoˬ.—1 Hteˇsaˍlawˇniˆ 1:3; Heˍbrehˇ 6:10.

⁹ Ngaˬ hui awˬ pon heuˆ daꞈ ve teˇ ceuˬ awˬ hpfuhˇ hkʼaˆ jaˇ ve pa taw, tawˇ yaw ve leh te ve awˬ hkʼaw lo awˬ hpawˇ awˬ miˇ ma naˬ tuˬ ngaˬ hui maˇ te piˇ gaˇ. Yaꞈ hkʼaˇ, ngaˬ hui yehˬ kʼa meuˆ daꞈ leh yeˬ chehˇ tuˬ te gaˇ ve yoˬ. Ngaˬ hui hkʼaˬ hkʼe te gʼa tuˬ le?

10, 11. (a) Heuˆ daꞈ ve chaw teˇ hpaˍ hpaˍ aˬ htoꞈ ma hehnˇ ve awˬ lawn cawˬ la ve le? (b) Aˬ htoꞈ ma te ngaˬ hui ve awˬ hpawˇ awˬ miˇ ma htaꞈ tawˇ yaw piˇ ve awˬ hkʼaˇ a yeˇ uiˍ ve le?

¹⁰ Awˬ hpawˇ awˬ miˇ ma nyi ma luˬ tuˬ te piˇ daꞈ ve awˬ hkʼaˇ laiˉ hkʼaˇ cawˬ ve yoˬ hehˉ. Hkriꞈ yaˇ hpehꞈ ve awˬ hpawˇ awˬ miˇ ma dawˆ daꞈ maˇ hpehꞈ tehꞈ ngaˬ hui shiˍ ve yoˬ. Yaꞈ hkʼaˇ, ngaˬ hui tawˇ yaw ve awˬ hkʼaw lo naˬ tuˬ te piˇ daꞈ gʼa ve yoˬ hehˉ. Ngaˬ hui ve tawˇ hkawˇ lehˬ dawˆ daꞈ ve laꞈ caˉ hkʼa shuˍ hpehꞈ la gʼa ve yoˬ. Yaˇ miˇ teˇ gʼaˇ kʼoˆ ve, “ngaˬ ve awˬ hpawˇ ngaˬ htaꞈ dawˆ laˇ ve tawˇ yaw ve teˇ ceuˬ yoˬ. Ngaˬ awˬ to chawˇ˗aˍ ve htaꞈ mawˬ gʼa ve maˇ heˆ. Yaꞈ hkʼaˇ, yawˇ ve tawˇ aˉ hteꞈ hkʼa shuˍ juꞈ laˇ ve lehˬ ‘nawˬ htaꞈ pa taw hkeuꞈ ve, nawˬ teꞈ chiˉ tcuhˉ kuiˬ maˇ cawˬ’ tehꞈ kʼoˆ laˇ ve yoˬ! Ngaˬ nyi ma naˬ jaˇ.” Awˬ hpawˇ teˇ gʼaˇ kʼoˆ ve yawˇ ve awˬ miˇ ma yawˇ htaꞈ maˇ shawˍ maˇ caˆ kʼoˆ leh hehnˇ jaˇ ve tawˇ yaw piˇ ve yoˬ. “Yawˇ kʼoˆ laˇ ve tawˇ chaꞈ chiˆ jaˇ ve pa taw, ngaˬ shu htaꞈ kʼoˆ piˇ maˇ haˆ. Chi htaꞈ pa taw, ngaˬ yawˇ geh tawˇ yaw daꞈ maˇ hpehꞈ leh kanˉ te kuiˬ lo shehˍ kʼaw hkui hkʼa gaˬ chehˇ taˍ ve yoˬ. Aˉ hkʼaw kʼoꞈ˗e ve aꞈ kehˉ daꞈ ve yoˬ.” Chi beuꞈ teˇ co˗e, chaw laiˉ gʼaˇ nyi ma naˬ tuˬ te piˇ ve tawˇ, maˇ daꞈ ve tawˇ, leh maˇ ha kʼaˉ puiˉ ve tawˇ htaꞈ yaw hkʼeh jaˇ.

¹¹ Awˬ hpawˇ awˬ miˇ ma maˇ daꞈ ve tawˇ yaw daꞈ ve kʼo,  nyi ma naˬ ve na˗e la tuˬ awˬ yanˇ maw jaˇ ve yoˬ. Yaˬhoˉvaˬ awˬ hpawˇ awˬ miˇ ma htaꞈ chi hkʼe te daꞈ tcuh gaˇ ve maˇ heˆ. Yaꞈ hkʼaˇ, teˇ pawˆ pawˆ nawˬ nyi ma naˬ tuˬ te piˇ chehˇ ve htaꞈ nawˬ maˇ shiˍ ve yoˬ hehˉ. Nawˬ ha kʼaˉ leh te piˇ ve tehꞈ dawˇ ve htawˇ, nawˬ ve awˬ hpawˇ awˬ miˇ ma hkʼaˬ hkʼe dawˇ ve le? Nawˬ tawˇ yaw ve yawˇ nyi ma naˬ tuˬ teˇ piˇ chehˇ ve tehꞈ shiˍ ve kʼo, nawˬ pa tuˬ laˇ?—Gaˍlaˍtiˆ 5:15; Eˇfeˇsuꞈ 4:31 gʼaw sheˍ.

12. Heuˆ daꞈ ve chaw leh Yaˬhoˉvaˬ htaꞈ meuˆ daꞈ ve aˬ htoꞈ ma heuˆ la gʼa ve le?

¹² Awˬ hpawˇ awˬ miˇ ma tawˇ yaw daꞈ ve awˬ hkʼaˇ yawˇ huiˉ maˬ tiˉ chehˇ htaˇ maˇ kʼoˆ, shu mehˆ gʼuˇ suhˍ chehˇ htaˇ maˇ kʼoˆ, Yaˬhoˉvaˬ awˬ pon a yeˇ uiˍ ve yoˬ. (1 Peˍtruˆ 3:7 gʼaw sheˍ.) Yaˍkoˆ liꞈ 1:26 hkʼaw kʼoˆ ve, “chaw teˇ gʼaˇ  gʼaˇ oˉ kʼoˍ pui ve awˬ liˇ htaꞈ yawˇ hkʼa dehꞈ te ve tehꞈ dawˇ htawˇ, yawˇ ve ha tehˍ htaꞈ maˇ gʼaˇ ve kʼo, yawˇ awˬ to htaꞈ heˍ chehˇ ve yoˬ. Yawˇ oˉ kʼoˍ pui ve lehˬ hkʼe leˇ hpehꞈ ve yoˬ.”

13. Awˬ hpawˇ awˬ miˇ ma nyi ma luˬ tuˬ te piˇ daꞈ gʼa ve teˇ ceuˬ kʼawꞈ cawˬ sheˍ ve aˬ htoꞈ ma le?

¹³ Awˬ hpawˇ awˬ miˇ ma nyi ma luˬ tuˬ te piˇ daꞈ gʼa ve teˇ ceuˬ kʼawꞈ cawˬ sheˍ. Tawˇ pa haˉ te kʼo, nawˬ chaw teˇ gʼaˇ geh maˇ maˇ chehˇ ve kʼo, yawˇ hkʼaˬ hkʼe dawˇ tuˬ le? Nawˬ leh chaw oˇ ve teˇ gʼaˇ Gʼuiˬ sha kanˉ teˇ geh te ve, maˇ heˆ leh awˬ lawn htaꞈ gu tuˬ ga daꞈ ve htawˇ, nawˬ ve awˬ hpawˇ awˬ miˇ ma nyi ma luˬ tuˬ laˇ? Hkriꞈ yaˇ hpehꞈ ve awˬ miˇ ma teˇ gʼaˇ kʼoˆ ve, “ngaˬ ve awˬ hpawˇ Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ teˇ gʼaˇ geh awˬ yanˇ yehˇ leh a yeˇ yuˬ piˇ ve htaꞈ ngaˬ mawˬ htaˇ nyi ma luˬ ve yoˬ. Ngaˬ yaˇ miˇ oˇ ve teˇ gʼaˇ hkʼe leˇ maˇ daꞈ tehꞈ dawˇ ve yoˬ.”

14. (a) Awˬ hkuiˉ puiˍ liꞈ 2:24 hkʼaw a yeˇ uiˍ jaˇ ve aˬ htoꞈ ma maˍ laˇ ve le? (b) Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁴ Ngaˬ hui Hkriꞈ yaˇ hpehꞈ ve pa taw, awˬ pa awˬ e leh Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ gʼa nyi haꞈ shaˉ ve yoˬ. Yaꞈ hkʼaˇ, ngaˬ hui heuˆ daꞈ peuˬ ve kʼo, ngaˬ hui ve awˬ hpawˇ awˬ miˇ ma htaꞈ shu aꞈ kehˉ gʼa nyi haꞈ shaˉ ve yoˬ. Yaˬhoˉvaˬ kʼoˆ ve, awˬ hpawˇ “yawˇ ve awˬ miˇ ma htaꞈ caˉ daꞈ” ve yoˬ. (Awˬ hkuiˉ puiˍ 2:24) Ngaˬ hui ve awˬ hpawˇ awˬ miˇ ma ve dawˇ hkʼaˇ htaꞈ a yeˇ te cawˇ ve yoˬ. Nawˬ a shu yawˇ awˬ to htaꞈ na nyi cawˇ ve, ‘ngaˬ ve awˬ hpawˇ awˬ miˇ ma loˍ ve keunˍ ve hkʼe, ngaˬ yawˇ htaꞈ haꞈ leh awˬ yanˇ piˇ leh a yeˇ te piˇ chehˇ˗aw laˇ?’

15. Heuˆ daꞈ peuˬ ve Hkriꞈ yaˇ aˬ htoꞈ ma te a shu yawˇ ve awˬ hpawˇ awˬ miˇ ma aꞈ kehˉ shu htaꞈ maˇ meuˆ daꞈ cawˇ ve le?

¹⁵ Ngaˬ hui a shu yawˇ ve awˬ hpawˇ awˬ miˇ ma aꞈ kehˉ shu htaꞈ meuˆ daꞈ ve kʼo, ngaˬ hui heuˆ daꞈ ve ha lehˬ kuiˬ maˇ cawˬ. Ngaˬ hui chaw oˇ ve teˇ gʼaˇ htaꞈ meuˆ daꞈ maˇ la ve teˇ yanˇ, teˇ geh chehˇ gaˇ leh dawˇ cawˇ daꞈ la ve yoˬ.  (Maꞈhtehˍ 5:28) Chi hkʼe ve dawˇ hkʼaˇ cawˬ maˇ la ve kʼo, heuˆ daꞈ ve luˬ kʼai gʼa ve yoˬ.

16. Heuˆ daꞈ ve htaꞈ Liꞈ hpu hkʼaw hkʼaˬ hkʼe tawˇ piˇ taˍ ve le?

¹⁶ Liꞈ hpu hkʼaw kʼoˆ ve, “awˬ hpawˇ awˬ miˇ heuˆ daꞈ ve teˇ ceuˬ htaꞈ chaw hkʼa peu˗eˬ taˍ uiˍ taˍ mvuh piˇ˗oˆ.” Oˇ ve hkʼawꞈ nawˉ kʼawꞈ kʼoˆ taˍ ve, “awˬ hpawˇ awˬ miˇ teˇ hpaˍ maˇ hteˇ maˇ cawˇ ve awˬ hkʼaˇ suh taˇ kʼai. Awˬ lawn kʼo, guiˇ yaꞈ ve chaw leh haˉ chawˇ haˉ paˆ te ve chaw teˇ hpaˍ htaꞈ Gʼuiˬ sha ciˍ yanˍ piˇ tuˬ yoˬ.” (Heˍbrehˇ 13:4) Choˬ kaˬ lo awˬ hpawˇ awˬ miˇ ma teˇ geh zuhꞈ ve htaꞈ kʼoˆ chehˇ ve yoˬ. (Tawˇ naˉ ve 5:18) Awˬ lawn chi htaꞈ taˍ uiˍ taˍ mvuh leh “maˇ hteˇ maˇ cawˇ ve awˬ hkʼaˇ suh” maˇ gʼa kʼai tuˬ, ngaˬ hui hkʼaˬ hkʼe te gʼa ve le?

17. (a) Haˉ chawˇ te ve htaꞈ chaw laiˉ gʼaˇ hkʼaˬ hkʼe dawˇ ve le? (b) Haˉ chawˇ te ve htaꞈ Hkriꞈ yaˇ hui hkʼaˬ hkʼe shawˍ cawˇ ve le?

¹⁷ Chi beuꞈ teˇ co˗e, shu geh ca zuhꞈ˗e ve maˇ yaꞈ tehꞈ laiˉ gʼaˇ dawˇ ve yoˬ. Ngaˬ hui chi hkʼe dawˇ maˇ hpehꞈ. Yaˬhoˉvaˬ hkʼa tawˍ lehˆ kʼoˆ taˍ ve, guiˇ yaꞈ ve leh haˉ chawˇ haˉ paˆ te ve htaꞈ yawˇ canˇ ve yoˬ. (Roˉmaꞈ 12:9 gʼaw sheˍ; Heˍbrehˇ 10:31; 12:29) Ngaˬ hui shu geh ca zuhꞈ ve kʼo, heuˆ daꞈ ve htaꞈ maˇ daꞈ kehˬ tuˬ te ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ maˇ taˍ uiˍ leh yawˇ geh meuˆ daꞈ ve htaꞈ te luˬ ve yoˬ. Chi htaꞈ pa taw, haˉ chawˇ maˇ gʼa te tuˬ awˬ hkuiˉ puiˍ htaˇ kaꞈ shaˍ tiꞈ gʼa te ve yoˬ. Chi kʼoˆ gaˇ ve lehˬ chaw teˇ gʼaˇ htaꞈ maˇ dawˇ keunˍ ve dawˇ hkʼaˇ taˇ cawˬ piˇ.—Yawˇbaˆ 31:1.

18. (a) Haˉ chawˇ te ve hkʼaˬ hkʼe te leh shaˉ hoꞈ htaꞈ oˉ kʼoˍ pui ve hkʼa shuˍ hpehꞈ gʼa ve le? (b) Haˉ chawˇ te ve htaꞈ Yaˬhoˉvaˬ hkʼaˬ hkʼe shawˍ taˍ ve le?

¹⁸ Iˉsaˍreˍlaˆ awˬ co˗e htaˇ, Moˉseˍ ve awˬ liˇ tawˇ hkawˇ hkʼaw kʼoˆ taˍ ve, haˉ chawˇ te ve chaw lehˬ shaˉ hoꞈ htaꞈ oˉ kʼoˍ pui ve hkʼa shuˍ venˇ baˆ uiˍ jaˇ. Chi 2 ceuˬ htaꞈ ciˍ  yanˍ ve lehˬ suh ve teˇ ceuˬ yoˬ. (Oˉ kʼoˍ pui ve 20:2, 10) Haˉ chawˇ te ve hkʼaˬ hkʼe te leh shaˉ hoꞈ htaꞈ oˉ kʼoˍ pui ve hkʼa shuˍ hpehꞈ gʼa ve le? Iˉsaˍreˍlaˆ chaw teˇ gʼaˇ gʼaˇ shaˉ hoꞈ htaꞈ oˉ kʼoˍ pui ve kʼo, Yaˬhoˉvaˬ htaꞈ ka tiꞈ yeˬ tuˬ kʼoˆ taˍ ve hkʼe maˇ gʼaꞈ te. Chi hkʼa shuˍ shuˍ, chaw teˇ gʼaˇ gʼaˇ haˉ chawˇ te ve kʼo, awˬ hpawˇ awˬ miˇ ma ka tiꞈ yeˬ daꞈ tuˬ kʼoˆ taˍ ve hkʼe maˇ gʼaꞈ te. (Tawˆ kʼai ve 19:5, 6; Bon maˍ ve 5:9; Maˍlaˍhkiˆ 2:14 gʼaw sheˍ.) Aˬ sho˗eˬ htaˇ haˉ chawˇ te ve htaꞈ venˇ baˆ uiˍ jaˇ tehꞈ, Yaˬhoˉvaˬ shawˍ taˍ ve yoˬ.

19. Ngaˬ hui haˉ chawˇ te ve htaꞈ jaw kʼai gʼa tuˬ, aˬ htoꞈ ma ga laˇ gʼa ve le?

¹⁹ Chi beuꞈ teˇ co˗e hkʼaˬ hkʼe kʼai ve le? Ngaˬ hui Moˉseˍ ve awˬ liˇ tawˇ hkawˇ htaꞈ maˇ gʼa gʼaꞈ te ve htawˇ, haˉ chawˇ te ve htaꞈ Yaˬhoˉvaˬ ve dawˇ hkʼaˇ maˇ pa sheˍ. Ngaˬ hui shaˉ hoꞈ htaꞈ oˉ kʼoˍ maˇ pui ve hkʼa shuˍ, ngaˬ hui shu geh maˇ ca zuhꞈ cawˇ ve yoˬ. (Chiˇ mvuh ve 51:1, 4; Kawˇlawˇsehˇ 3:5) Ngaˬ hui oˇ hkʼe te ve kʼo, ngaˬ hui heuˆ daꞈ ve leh Yaˬhoˉvaˬ Gʼuiˬ sha htaꞈ maˇ taˍ uiˍ ve yoˬ.—Kʼoˆ maˍ ve awˬ lawn 26 htaꞈ nyi sheˍ.

20. Cuˇ yiˍ cawˬ ve lehˬ heuˆ daꞈ ve htaꞈ hkʼaˬ hkʼe te ga laˇ gʼa ve le?

²⁰ Nawˬ heuˆ daꞈ ve htaꞈ hkʼaˬ hkʼe te yeˬ gʼa tuˬ le? Liꞈ hpu hkʼaw kʼoˆ ve, “yehˬ teˇ hpaˍ lehˬ cuˇ yiˍ leh shiˍ puiˉ ve nyi ma htaꞈ pa taw cawˬ la ve yoˬ.” (Tawˇ naˉ ve 24:3) Yehˬ oˇ ve chehˇ gaˇ tuˬ maˇ chehˇ gaˇ tuˬ, yehˬ kʼa hkʼaw ve chaw htaꞈ cawˬ ve yoˬ. Chi lehˬ heuˆ daꞈ ve htaꞈ hkʼa shuˍ yoˬ. Cuˇ yiˍ cawˬ ve chaw heuˆ daꞈ ve yeˬ leh ha lehˬ kuiˬ cawˬ tuˬ te ve yoˬ.

21. Heuˆ daꞈ ve yeˬ gʼa tuˬ, shiˍ puiˉ ve nyi ma cawˬ ve lehˬ hkʼaˬ hkʼe ga laˇ gʼa ve le?

²¹ Yehˬ oˇ ve htaꞈ Liꞈ hpu hkʼaw kʼawꞈ kʼoˆ ve, “shiˍ puiˉ ve nyi ma cawˬ ve kʼo, bawehˇ teˇ hpaˍ htawˇ daꞈ jaˇ leh nyi sha jaˇ ve yoˬ.” (Tawˇ naˉ ve 24:4) Nawˬ heuˆ daꞈ ve daꞈ la  tuˬ, Liꞈ hpu hkʼaw gʼa henˇ ve awˬ ceuˬ ga laˇ gʼa ve yoˬ. (Roˉmaꞈ 12:2; Hpiˇliˇpiˆ 1:9) Awˬ hpawˇ awˬ miˇ ma Liꞈ hpu leh liꞈ teˇ hpaˍ htaꞈ teˇ geh gʼaw ve kʼo, gʼa gʼaw ve awˬ ceuˬ hkʼaˬ hkʼe te yuˬ yehˇ tuˬ kʼoˆ daꞈ sheˍ. Teˇ gʼaˇ leh teˇ gʼaˇ haꞈ daꞈ leh taˍ uiˍ daꞈ tuˬ awˬ hkʼaˇ gʼaꞈ ca sheˍ. Ha kʼaˉ daꞈ leh dawˇ nawˇ daꞈ cawˇ ve yoˬ. Nawˬ heuˆ daꞈ ve yeˬ tuˬ, daꞈ ve te hkʼaˇ dawˇ hkʼaˇ nawˬ cawˬ leh nawˬ ve awˬ hpawˇ awˬ miˇ ma nawˬ htaꞈ haꞈ maˇ laˇ tuˬ, Yaˬhoˉvaˬ geh lawˬ sheˍ.—Tawˇ naˉ ve 15:16, 17; 1 Peˍtruˆ 1:7.

22. Aˬ htoꞈ ma te ngaˬ hui ve awˬ hpawˇ awˬ miˇ ma htaꞈ haꞈ ve hkʼaw daꞈ daꞈ lehˍ te piˇ ve, yawˆ yan ve, taˍ uiˍ taˍ mvuh piˇ cawˇ ve le?

²² Ngaˬ hui ve awˬ hpawˇ awˬ miˇ ma htaꞈ haꞈ ve hkʼaw daꞈ daꞈ lehˍ te piˇ tuˬ, yawˆ yan tuˬ, taˍ uiˍ taˍ mvuh tuˬ, ngaˬ hui te gʼa ve hkʼe teˇ ceuˬ le le te cawˇ ve yoˬ. Chi hkʼe te ve kʼo, ngaˬ hui ve awˬ hpawˇ awˬ miˇ ma ha lehˬ tuˬ cawˬ leh yehˬ kʼa yeˬ gʼa ve yoˬ. A yeˇ uiˍ ve lehˬ Yaˬhoˉvaˬ kaꞈ ha lehˬ tuˬ yoˬ.—Chiˇ mvuh ve 147:11; Roˉmaꞈ 12:10.