1, 2. (a) Heuˆ daꞈ gehˇ sheˍ ve chaw aˬ htoꞈ ma dawˇ law ve le? (b) Ngaˬ hui aˬ htoꞈ ma awˬ lawn henˇ tuˬ le?

 Chaw haˉ yaˇ miˇ haˉ heuˆ daꞈ ve teˇ nyi htaˇ, yawˇ hui ha lehˬ jaˇ ve htaꞈ dawˇ nyi sheˍ. Yawˇ hui awˬ gʼuˇ suhˍ hpawˇ a shaꞈ teꞈ kuiˬ lo dawˇ law kuiˬ hkʼa biˇ cawˬ ve pa taw ha lehˬ jaˇ. Yawˇ hui heuˆ daꞈ ve maw chaweh yeˬ gʼa tuˬ yoˬ tehꞈ, yawˇ hui dawˇ law leh ha lehˬ ve yoˬ.

² Yaꞈ hkʼaˇ, yehˬ kʼa teˇ hpaˍ hpaˍ awˉ lawˉ htaˇ ha lehˬ ve hkʼa biˇ cawˬ ve htawˇ, awˬ hkʼawꞈ nawˉ htaˇ ha lehˬ kuiˬ maˇ cawˬ. Yehˬ kʼa maw chaweh yeˬ leh ha lehˬ ve cawˬ tuˬ, awˬ hpawˇ awˬ miˇ ma htaꞈ Gʼuiˬ sha beˆ maˍ piˇ tuˬ loˍ ve yoˬ. Chi htaꞈ pa taw, na hkawˇ chi teˇ hpaˍ htaꞈ hkʼawꞈ laˇ tuˬ, Liꞈ hpu hkʼaw teˇ geh nyi sheˍ. Heuˆ daꞈ ve aˬ htoꞈ ma awˬ bon cawˬ ve le? Nawˬ yehˬ kʼa ca ve kʼo, hkʼaˬ hkʼe te leh daꞈ ve awˬ hpawˇ awˬ miˇ ma ca gʼa tuˬ le? Nawˬ hkʼaˬ hkʼe te daꞈ ve awˬ hpawˇ awˬ miˇ ma hpehꞈ gʼa tuˬ le? Heuˆ daꞈ ve maw chaweh yeˬ gʼa tuˬ, aˬ htoꞈ ma ga laˇ gʼa ve le?—Tawˇ naˉ ve 3:5, 6 gʼaw sheˍ.

3. Ha lehˬ kuiˬ cawˬ tuˬ yehˬ kʼa ca cawˇ ve yoˬ tehꞈ nawˬ dawˇ ve laˇ? Kʼoˆ maˍ laˇ sheˍ.

³ Yehˬ kʼa maˇ cawˬ ve kʼo, ha lehˬ kuiˬ maˇ cawˬ tehꞈ chaw teˇ hpaˍ yonˍ ve yoˬ. Chi lehˬ awˬ tehˬ maˇ heˆ. Yeˍsuˆ  kʼoˆ ve, yehˬ kʼa maˇ ca ve chaw awˬ bon gʼa taˍ ve yoˬ. (Maꞈhtehˍ 19:11, 12) Tcuh yaˇ Pawˇluꞈ kʼoˆ ve, yehˬ kʼa maˇ ca ve chaw dawˇ hkiˉ tuˬ maˇ cawˬ. (1 Kawˇrenˍhtuˆ 7:32-38) Yehˬ kʼa ca maˇ ca ve nawˬ hkʼaˇ nawˬ dawˇ cheˆ gʼa ve yoˬ. Chaw liˇ vaˇ liˇ, awˬ chawˇ, yehˬ kʼa hkʼaw ve chaw nawˬ yehˬ kʼa ca tuˬ taˇ nyiˉ laˇ tcuh.

4. Heuˆ daꞈ ve aˬ htoꞈ ma awˬ bon cawˬ ve le?

⁴ Liꞈ hpu hkʼaw kʼoˆ ve, heuˆ daꞈ ve lehˬ Gʼuiˬ sha geh gʼa ve laꞈ shawnˍ hpehꞈ leh awˬ bon cawˬ kuiˬ kaꞈ cawˬ ve yoˬ. Yaˬhoˉvaˬ chaw yaˇ awˉ lawˉ teˇ gʼaˇ Aˍdanˍ htaꞈ kʼoˆ piˇ ve, “chaw yaˇ lehˬ yawˇ teˇ gʼaˇ tiˉ chehˇ ve maˇ daꞈ. Ngaˬ yawˇ htaꞈ keunˍ daꞈ ve awˬ chawˇ teˇ gʼaˇ ca piˇ shaˍ.” (Awˬ hkuiˉ puiˍ 2:18) Yaˬhoˉvaˬ lehˬ Aˍdanˍ ve awˬ miˇ ma Eˇvaꞈ htaꞈ te hpanˍ piˇ leh yawˇ huiˉ maˬ chaw yaˇ ve yehˬ kʼa awˉ lawˉ teˇ yehˬ kʼa hpehꞈ la ve yoˬ. Heuˆ daꞈ peuˬ ve chaw yaˇ cawˬ ve kʼo, yaˇ hu duˬ hu tuˬ yehˬ kʼa yeˬ piˇ cawˇ ve yoˬ. Yaꞈ hkʼaˇ, yaˇ cawˬ la tuˬ ceh tiˉ dawˇ law leh heuˆ daꞈ ve maˇ heˆ.—Chiˇ mvuh ve 127:3; Eˇfeˇsuꞈ 6:1-4.

5, 6. Heuˆ daꞈ ve teˇ ceuˬ hkʼaˬ hkʼe te leh “gʼoꞈ hkeh shehˆ caˆ” hkʼa shuˍ hpehꞈ gʼa ve le?

⁵ Jawˇmawˇ Sawˉlaꞈmonˍ bvuhꞈ taˍ ve, “chaw nyiˇ gʼaˇ teˇ geh chehˇ leh kanˉ te ve lehˬ teˇ gʼaˇ tiˉ te ve aꞈ kehˉ awˬ bon tawˆ la maˇ ve yoˬ. Teˇ gʼaˇ paiˍ ve kʼo, awˬ nu ve teˇ gʼaˇ yawˇ htaꞈ ga piˇ hpehꞈ ve yoˬ. Yaꞈ hkʼaˇ, chaw teˇ gʼaˇ lehˬ yawˇ teˇ gʼaˇ tiˉ chehˇ taˍ ve kʼo, yawˇ paiˍ ve teˇ yanˇ yawˇ htaꞈ ga piˇ paˍ maˇ cawˬ ve pa taw, yawˇ gʼa dawˇ haˍ jaˇ tuˬ yoˬ. . . . Gʼoꞈ hkeh shehˆ caˆ yuˬ vawꞈ daꞈ taˍ ve aˉ caˆ hkeh lehˬ hkʼa sha sha˗ehˬ maˇ cheˆ kʼai puiˉ.”—Cuˇ yiˍ piˇ ve 4:9-12.

⁶ Heuˆ daꞈ ve yeˬ ve lehˬ awˬ chawˇ 2 gʼaˇ meuˆ daꞈ jaˇ ve htaꞈ kʼoˆ gaˇ ve yoˬ. Yawˇ huiˉ maˬ ga daꞈ ve, awˬ gʼaˇ piˇ daꞈ ve, nyi haꞈ shaˉ daꞈ ve yoˬ. Haꞈ pehnˇ ve lehˬ heuˆ daꞈ ve teˇ ceuˬ yeˬ piˇ gʼa ve yoˬ. Yaꞈ hkʼaˇ, heuˆ daꞈ ve chi aꞈ kehˉ yeˬ  gʼa tuˬ, awˬ hpawˇ awˬ miˇ ma Yaˬhoˉvaˬ htaꞈ oˉ kʼoˍ gʼa pui ve yoˬ. Chi hkʼe hpehꞈ ve kʼo, heuˆ daꞈ ve lehˬ “gʼoꞈ hkeh shehˆ caˆ” hkʼa shuˍ hpehꞈ ve yoˬ. Gʼoꞈ hkeh shehˆ caˆ lehˬ kiˇ˗ehˍ vawꞈ daꞈ taˍ ve aˉ caˆ hkeh hpehꞈ ve yoˬ. Chi lehˬ nyiˇ caˆ vawꞈ daꞈ taˍ ve aꞈ kehˉ yeˬ ve yoˬ. Heuˆ daꞈ ve yeˬ gʼa tuˬ Yaˬhoˉvaˬ htaꞈ gʼa cuˇ ve yoˬ.

7, 8. Heuˆ daꞈ ve htaꞈ Pawˇluꞈ hkʼaˬ hkʼe beˆ maˍ laˇ taˍ ve le?

⁷ Heuˆ daꞈ peuˬ hkʼawꞈ nawˉ, awˬ hpawˇ awˬ miˇ ma teˇ geh zuhꞈ leh ha lehˬ tuˬ, teˇ gʼaˇ leh teˇ gʼaˇ loˍ ve hkʼe gʼa piˇ daꞈ ve yoˬ. (Tawˇ naˉ ve 5:18) Yaꞈ hkʼaˇ, chaw teˇ gʼaˇ zuhꞈ ve htaꞈ ceh loˍ leh yehˬ kʼa ca ve kʼo, yawˇ hkʼa dehꞈ leuˆ yuˬ ve maˇ heˆ hehˉ. Chi htaꞈ pa taw, Liꞈ hpu hkʼaw kʼoˆ ve, ‘chaw haˉ yaˇ miˇ haˉ te ve awˬ yanˇ’ ponˬ kʼai htaˇ heuˆ daꞈ cawˇ ve yoˬ. Awˬ lawn kʼo, ‘chaw haˉ yaˇ miˇ haˉ te ve awˬ yanˇ’ htaˇ, zuhꞈ gaˇ ve awˬ kaˍ awˬ nu awˬ yanˇ aꞈ kehˉ loˍ ve yoˬ. (1 Kawˇrenˍhtuˆ 7:36) Loˍ ve i kʼai htaˇ hkʼa gaˬ law taˍ ve kʼo daꞈ ve yoˬ. Oˇ ve hkʼawꞈ nawˉ, hkʼa dehꞈ dawˇ cheˆ gʼa ve yoˬ.—1 Kawˇrenˍhtuˆ 7:9; Yaˍkoˆ 1:15.

⁸ Nawˬ yehˬ kʼa ca tuˬ dawˇ ve kʼo, heuˆ daꞈ peuˬ ve teˇ ca le le maˇ cawˇ maˇ hawˍ daꞈ ve cawˬ la tuˬ yoˬ tehꞈ shiˍ cawˇ ve yoˬ. Pawˇluꞈ kʼoˆ ve, yehˬ kʼa ca ve chaw “awˬ suhˍ awˬ shaˍ hpawˇ gʼa tuꞈ gʼa hkanˍ tuˬ yoˬ.” (1 Kawˇrenˍhtuˆ 7:28) Heuˆ daꞈ ve teˇ ceuˬ daꞈ jaˇ ve htawˇ, tuꞈ ve hkanˍ ve awˬ yanˇ gʼa hpuˇ tuˬ yoˬ. Chi htaꞈ pa taw, nawˬ yehˬ kʼa ca tuˬ dawˇ ve kʼo, cuˇ yiˍ cawˬ ve hkʼaw gʼa leuˆ yuˬ ve yoˬ.

9, 10. Ngaˬ hui Yaˬhoˉvaˬ htaꞈ oˉ kʼoˍ maˇ pui ve chaw htaꞈ heuˆ ve kʼo, hkʼaˬ hkʼe kʼai tuˬ le?

⁹ Ngaˬ hui heuˆ tuˬ ve chaw htaꞈ leuˆ yuˬ ve teˇ yanˇ, Liꞈ hpu hkʼaw a yeˇ uiˍ ve awˬ liˇ awˬ hkʼaˇ chi htaꞈ tawnˇ taˍ cawˇ ve yoˬ. “Maˇ yonˍ ve chaw teˇ hpaˍ htaꞈ taˇ caˉ daꞈ, taˇ pawnˇ daꞈ.” (2 Kawˇrenˍhtuˆ 6:14) Tawˇ pa haˉ chi ve ti mi  te ve htaꞈ tehˆ maˍ laˇ ve yoˬ. To nuˇ to shaˆ 2 hkeh awˬ to leh awˬ gʼaˇ peun daꞈ ve kʼo, 2 hkeh hkeh gʼa naˬ la ve pa taw, awˬ shehˍ hpaˇ kanˉ maˇ tcuh caˇ. Heuˆ daꞈ ve teˇ ceuˬ kaꞈ chi hkʼa shuˍ shuˍ yoˬ. Teˇ gʼaˇ Yaˬhoˉvaˬ htaꞈ oˉ kʼoˍ pui leh teˇ gʼaˇ maˇ pui ve kʼo, maˇ cawˇ maˇ hawˍ daꞈ ve laiˉ ceuˬ cawˬ la tuˬ yoˬ. Chi htaꞈ pa taw, Liꞈ hpu hkʼaw beˆ maˍ laˇ ve, “Jawˇmawˇ Yeˍsuˆ htaꞈ cuˇ ve” chaw htaꞈ ceh tiˉ gʼa heuˆ ve yoˬ.—1 Kawˇrenˍhtuˆ 7:39.

¹⁰ Teˇ pawˆ pawˆ kʼo, Hkriꞈ yaˇ teˇ hpaˍ hpaˍ teˇ gʼaˇ tiˉ chehˇ ve aꞈ kehˉ Yaˬhoˉvaˬ htaꞈ oˉ kʼoˍ maˇ pui ve chaw htaꞈ heuˆ ve daꞈ˗aˬ tehꞈ dawˇ ve yoˬ. Yaꞈ hkʼaˇ, Liꞈ hpu hkʼaw beˆ maˍ laˇ hkawˇ htaꞈ a yeˇ maˇ te ve kʼo, ngaˬ hui nyi ma naˬ leh ha lehˬ kuiˬ maˇ cawˬ. Ngaˬ hui Yaˬhoˉvaˬ htaꞈ oˉ kʼoˍ pui ve pa taw, a shaꞈ teꞈ kuiˬ lo yawˇ ve kanˉ te ve a yeˇ uiˍ jaˇ. A yeˇ uiˍ jaˇ ve kanˉ chi htaꞈ nawˬ ve awˬ hpawˇ awˬ miˇ ma teˇ geh te maˇ hpehꞈ ve kʼo, nawˬ hkʼaˬ hkʼe kʼai tuˬ le? Yaˬhoˉvaˬ htaꞈ maˇ haꞈ leh oˉ kʼoˍ maˇ pui ve chaw htaꞈ maˇ heuˆ leh teˇ gʼaˇ tiˉ chehˇ tuˬ chaw laiˉ gʼaˇ dawˇ cheˆ ve yoˬ.—Chiˇ mvuh ve 32:8 gʼaw sheˍ.

11. Nawˬ hkʼaˬ hkʼe te leh daꞈ ve awˬ hpawˇ awˬ miˇ ma leuˆ yuˬ gʼa tuˬ le?

¹¹ A shu teˇ gʼaˇ htawˇ maˇ kʼoˆ, Yaˬhoˉvaˬ ve kanˉ te ve chaw hpehꞈ ve kʼo, nawˬ awˬ pon daꞈ ve awˬ hpawˇ awˬ miˇ ma hpehꞈ gʼa ve tehꞈ kʼoˆ gaˇ ve maˇ heˆ. Nawˬ yehˬ kʼa ca tuˬ dawˇ ve kʼo, nawˬ dawˇ cawˇ leh hawˍ daꞈ gʼa ve chaw htaꞈ heuˆ sheˍ. Nawˬ hkʼa shuˍ te gaˇ leh Gʼuiˬ sha ve kanˉ awˉ lawˉ teh ve chaw teˇ gʼaˇ htaꞈ mawˬ htaˇ hkʼa gaˬ law taˍ sheˍ. Awˬ yanˇ yehˇ leh ka tiꞈ yeˬ ve awˬ ceˬ gu teh taˍ laˇ ve liꞈ kʼoˆ hkʼaw yehˬ kʼa ca tuˬ beˆ maˍ laˇ taˍ ve awˬ lawn gʼaw leh hkʼa dehꞈ dawˇ nyi sheˍ.—Chiˇ mvuh ve 119:105 gʼaw sheˍ.

12. Liꞈ hpu hkʼaw awˬ pa awˬ e yaˇ htaꞈ yehˬ kʼa ca piˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹² Chaw liˇ vaˇ liˇ teˇ hpaˍ hpaˍ kʼo, awˬ pa awˬ e yawˇ hui  ve yaˇ paˍ yaˇ miˇ htaꞈ yehˬ kʼa ca piˇ ve yoˬ. Yaˇ awˬ pon aˬ htoꞈ ma teˇ ceuˬ daꞈ ve awˬ pa awˬ e shiˍ ve tehꞈ laiˉ gʼaˇ dawˇ ve pa taw yoˬ. Awˬ lawn chi ve Liꞈ hpu hkʼaw kaꞈ cawˬ ve yoˬ. Chi htaꞈ pa taw, nawˬ ve awˬ pa awˬ e awˬ liˇ chi htaꞈ gʼaꞈ te gaˇ ve kʼo, yaˇ awˬ pon hkʼaˬ hkʼe ve chaw leuˆ yuˬ piˇ cawˇ ve htaꞈ shiˍ tuˬ, Liꞈ hpu hkʼaw awˬ liˇ awˬ hkʼaˇ ga piˇ gʼa ve yoˬ. Tawˇ pa haˉ te kʼo, Aˍbraˍhanˍ yawˇ ve yaˇ paˍ Iˉcaˆ htaꞈ awˬ miˇ ma ca piˇ htaˇ, paw sha leh awˬ meh daꞈ ve chaw htaꞈ awˉ lawˉ dawˇ nyi ve maˇ heˆ. Yaꞈ hkʼaˇ, yaˇ miˇ oˇ ve teˇ gʼaˇ Yaˬhoˉvaˬ htaꞈ gʼa haꞈ ve yoˬ.—Awˬ hkuiˉ puiˍ 24:3, 67; Kʼoˆ maˍ ve awˬ lawn 25 htaꞈ nyi sheˍ.

13-15. (a) Hawˉ hkʼaˆ daꞈ ve awˬ hpawˇ hpehꞈ gʼa tuˬ, hkʼaˬ hkʼe te gu hehnˇ taˍ gʼa tuˬ le? (b) Yaˇ miˇ daꞈ ve awˬ miˇ ma hpehꞈ gʼa tuˬ, hkʼaˬ hkʼe te gu hehnˇ taˍ gʼa tuˬ le?

¹³ Nawˬ yehˬ kʼa cawˬ gaˇ ve kʼo, hkʼa dehꞈ gʼa gu hehnˇ taˍ ve yoˬ. Gu hehnˇ peuˬ˗oˬ tehꞈ nawˬ dawˇ ve yoˬ hehˉ. Yaꞈ hkʼaˇ, heuˆ daꞈ tuˬ hkʼaˬ hkʼe te hkʼa dehꞈ gu hehnˇ taˍ gʼa tuˬ le, teˇ geh chaˬ nyi sheˍ. Hkʼawꞈ laˇ ve nawˬ anˇ tuˬ yoˬ hehˉ.

¹⁴ Liꞈ hpu hkʼaw kʼoˆ ve yehˬ kʼa hkʼaw awˬ hpawˇ awˬ miˇ ma awˬ vuiˬ peun daꞈ ve yoˬ. Chi htaꞈ pa taw, heuˆ daꞈ gaˇ ve hawˉ hkʼaˆ leh yaˇ miˇ awˬ pon gu hehnˇ taˍ tuˬ ve awˬ ceuˬ maˇ shuˍ daꞈ. Hawˉ hkʼaˆ lehˬ a shu yawˇ awˬ to htaꞈ na nyi cawˇ ve, ‘ngaˬ yehˬ kʼa hkʼaw awˬ hoˉ hpehꞈ tuˬ gu hehnˇ taˍ˗oˬ laˇ?’ Yaˬhoˉvaˬ lehˬ awˬ hpawˇ htaꞈ awˬ miˇ ma awˬ yaˇ hpu shi mawˇ jeˬ hpawˇ leh nyi ma hpawˇ nyi haꞈ shaˉ tuˬ dawˇ law ve yoˬ. A yeˇ uiˍ ve teˇ ceuˬ lehˬ Gʼuiˬ sha htaꞈ oˉ kʼoˍ pui tuˬ awˬ hpawˇ gʼa shehˍ kʼai ve yoˬ. Liꞈ hpu hkʼaw kʼoˆ ve, hawˉ hkʼaˆ teˇ gʼaˇ yehˬ kʼa hkʼaw ve chaw maˇ nyi haꞈ shaˉ ve kʼo, yawˇ lehˬ “maˇ yonˍ ve chaw aꞈ kehˉ haiˬ ve yoˬ.” (1 Tiˆmoˉseˍ 5:8) Chi htaꞈ pa taw, nawˬ hawˉ hkʼaˆ hpehꞈ leh yehˬ kʼa ca tuˬ dawˇ chehˇ ve kʼo, Liꞈ hpu hkʼaw ve awˬ liˇ awˬ hkʼaˇ chi teˇ maˬ htaꞈ nawˬ hkʼaˬ hkʼe te yuˬ yehˇ tuˬ dawˇ nyi sheˍ. “Nawˬ ti mi maˇ te gʼa sheˍ ve ceh ceh, nawˬ ve chehˇ kuiˬ yehˬ htaꞈ awˉ lawˉ taˇ te.” Kʼoˆ gaˇ ve lehˬ yehˬ kʼa maˇ ca sheˍ htaˇ, awˬ hpawˇ htaꞈ Yaˬhoˉvaˬ te tcuh gaˇ ve hkʼe, nawˬ awˬ tehˬ awˬ na te gʼa ve yoˬ tehꞈ gʼa yonˍ ve yoˬ.—Tawˇ naˉ ve 24:27.

¹⁵ Yaˇ miˇ lehˬ a shu yawˇ awˬ to htaꞈ na nyi cawˇ ve, ‘ngaˬ awˬ miˇ ma ve awˬ vuiˬ maˇ heˆ leh yaˇ awˬ e te tuˬ gu hehnˇ taˍ˗oˬ laˇ?’ Daꞈ ve awˬ miˇ ma lehˬ awˬ hpawˇ leh yaˇ htaꞈ nyi haꞈ shaˉ tuˬ, Liꞈ hpu hkʼaw kʼoˆ taˍ ve yoˬ.  (Tawˇ naˉ ve 31:10-31) Chi beuꞈ teˇ co˗e, hawˉ hkʼaˆ leh yaˇ miˇ laiˉ gʼaˇ awˬ hpawˇ awˬ miˇ ma a shu yawˇ awˬ to pon te laˇ tuˬ tiˉ dawˇ nyi ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui ve awˬ hpawˇ awˬ miˇ ma awˬ pon te piˇ tuˬ ngaˬ hui htaꞈ dawˇ nyi tcuh gaˇ ve yoˬ.

16, 17. Nawˬ yehˬ kʼa ca tuˬ dawˇ ve kʼo, aˬ htoꞈ ma ve awˬ lawn htaꞈ dawˇ nyi cawˇ ve le?

¹⁶ Nawˬ yehˬ kʼa maˇ ca sheˍ htaˇ, awˬ hpawˇ awˬ miˇ ma htaꞈ Yaˬhoˉvaˬ hkʼaˬ hkʼe kʼoˆ taˍ ve hkʼa dehꞈ dawˇ nyi sheˍ. Hawˉ hkʼaˆ yehˬ kʼa awˬ hoˉ hpehꞈ ve kʼo, yehˬ kʼa hkʼaw ve chaw htaꞈ awˬ to leh nyi ma naˬ tuˬ te hpehꞈ ve yoˬ tehꞈ kʼoˆ gaˇ ve maˇ heˆ. Daꞈ ve awˬ hoˉ hpehꞈ tuˬ, Yeˍsuˆ htaꞈ henˇ yuˬ cawˇ ve yoˬ. Yeˍsuˆ nyi haꞈ shaˉ piˇ ve chaw htaꞈ hkʼaˬ htaˆ kaꞈ haꞈ leh ha kʼaˉ piˇ ve yoˬ. (Eˇfeˇsuꞈ 5:23) Awˬ hpawˇ dawˇ cheˆ ve htaꞈ haꞈ yuˬ leh gʼaꞈ te tuˬ ve tcuhˉ kuiˬ lehˬ aˬ htoꞈ ma htaꞈ kʼoˆ gaˇ ve yaˇ miˇ hkʼa dehꞈ dawˇ nyi cawˇ ve yoˬ. (Roˉmaꞈ 7:2) Nawˬ maˇ biˇ ve hawˉ hkʼaˆ kanˇ paˆ awˬ hawˉ lo ha lehˬ ha kʼa chehˇ gʼa tuˬ laˇ tehꞈ, a shu yawˇ awˬ to htaꞈ na nyi cawˇ ve yoˬ. Nawˬ te maˇ gʼa tehꞈ dawˇ ve kʼo, yehˬ kʼa maˇ ca sheˍ dawˇ cheˆ ve lehˬ daꞈ ve yoˬ hehˉ.

¹⁷ Awˬ hpawˇ yawˇ awˬ to pon dawˇ nyi ve aꞈ kehˉ awˬ miˇ ma awˬ pon gʼa dawˇ nyi piˇ ve yoˬ. Awˬ miˇ ma htawˇ chi hkʼa shuˍ shuˍ te cawˇ ve yoˬ. (Hpiˇliˇpiˆ 2:4 gʼaw sheˍ.) Pawˇluꞈ bvuhꞈ taˍ ve, “a shu yawˇ awˬ to htaꞈ haꞈ ve hkʼe, a shu yawˇ awˬ miˇ ma htaꞈ haꞈ˗oꞈ. Awˬ miˇ ma htawˇ, a shu yawˇ ve awˬ hpawˇ htaꞈ yawˆ yan˗o.” (Eˇfeˇsuꞈ 5:21-33) Hawˉ hkʼaˆ yaˇ miˇ teˇ gʼaˇ leh teˇ gʼaˇ haꞈ daꞈ leh yawˆ yan daꞈ cawˇ ve yoˬ. Heuˆ daꞈ ve chaw teˇ geh yeˬ chehˇ gʼa tuˬ, hawˉ hkʼaˆ yawˇ ve awˬ miˇ ma yawˇ htaꞈ yawˆ yan ve yoˬ tehꞈ shiˍ cawˇ ve yoˬ. Yaˇ miˇ htawˇ awˬ hpawˇ yawˇ htaꞈ haꞈ ve yoˬ tehꞈ shiˍ cawˇ ve yoˬ.

18. Hawˉ hkʼaˆ yaˇ miˇ maˆ daꞈ htaˇ, aˬ htoꞈ ma te shaˍ tiꞈ te tuˬ loˍ ve le?

¹⁸ Hawˉ hkʼaˆ yaˇ miˇ maˆ daꞈ htaˇ, ha lehˬ ve awˬ yanˇ  hpehꞈ ve yoˬ. Yawˇ hui teˇ gʼaˇ leh teˇ gʼaˇ ve awˬ lawn shiˍ maˇ la ve yoˬ. Yawˇ hui awˬ tehˬ hpehꞈ chehˇ ve htaꞈ nyi leh teˇ gʼaˇ leh teˇ gʼaˇ hkʼa dehꞈ chaˬ nyi daꞈ ve kʼo, teˇ geh chehˇ hpehꞈ˗aw laˇ tehꞈ yawˇ hui shiˍ gʼa ve yoˬ. Hawˉ hkʼaˆ yaˇ miˇ teˇ gʼaˇ leh teˇ gʼaˇ shiˍ daꞈ maˇ la htaˇ, tawˇ yaw daꞈ ve awˬ hkʼaˇ gʼa henˇ leh nyi ma hkʼaw cawˬ ve awˬ ceuˬ htaꞈ shiˍ la ve yoˬ. Yawˇ hui meuˆ daꞈ jaˇ ve kʼo, awˬ paˇ neˇ lo shaˬ te shaˬ jiˆ laˬ gaˇ ve htaꞈ anˇ tuˬ maˇ cawˬ. Yaꞈ hkʼaˇ, yawˇ hui maˇ heuˆ daꞈ sheˍ htaˇ, a shu yawˇ awˬ to htaꞈ gʼa yuˬ tiˍ gʼaˇ ve yoˬ. Chi lehˬ yawˇ hui maˇ gʼa guiˇ yaꞈ tuˬ haꞈ shaˉ taˍ ve yoˬ. Awˬ tehˬ awˬ na haꞈ daꞈ ve lehˬ a shu yawˇ awˬ  to htaꞈ yuˬ tiˍ gʼaˇ leh yawˇ hui meuˆ daꞈ ve leh Yaˬhoˉvaˬ htaꞈ meuˆ daꞈ ve teˇ ceuˬ maˇ gʼa luˬ kʼai tuˬ haꞈ shaˉ taˍ ve yoˬ.—1 Hteˇsaˍlawˇniˆ 4:6.

19, 20. Hkriꞈ yaˇ hui heuˆ daꞈ ve htaꞈ hkʼaˬ hkʼe shawˍ taˍ ve le?

¹⁹ Liꞈ kʼoˆ leh awˬ han laiˉ lawn awˬ leh meuˇ peuˬ htaˇ, heuˆ daꞈ ve pawehˇ lonˉ te leh ha lehˬ jaˇ. Awˬ tehˬ awˬ na a shaꞈ teꞈ kuiˬ lo kʼo, heuˆ daꞈ ve lehˬ awˬ hkuiˉ puiˍ tanˬ ve ceh tiˉ sheˬ. Yaˬhoˉvaˬ lehˬ awˬ hpawˇ awˬ miˇ ma htaꞈ teˇ co˗e teˇ geh chehˇ tcuh gaˇ ve yoˬ.—Awˬ hkuiˉ puiˍ 2:24.

²⁰ Chi beuꞈ teˇ co˗e, chaw laiˉ gʼaˇ heuˆ daꞈ ve teˇ ceuˬ teˇ hkui teˇ yanˇ ceh hpehꞈ ve yoˬ tehꞈ shawˍ ve yoˬ. Heuˆ daꞈ ve kaꞈ sha leh baˬ daꞈ ve kaꞈ sha ve yoˬ. Maˇ cawˇ maˇ hawˍ daꞈ ve kʼo, baꞈ daꞈ cawˇ ve yoˬ tehꞈ chaw teˇ hpaˍ hpaˍ dawˇ ve yoˬ. Yaꞈ hkʼaˇ, Liꞈ hpu hkʼaw gʼoꞈ hkeh shehˆ caˆ vawꞈ daꞈ taˍ ve awˬ lawn tawnˇ taˍ sheˍ. Maˇ dawˇ tawˆ ve htaꞈ gʼa hpuˇ ve htawˇ, gʼoꞈ hkeh shehˆ caˆ maˇ cheˆ kʼai puiˉ. Yaˬhoˉvaˬ ga laˇ tuˬ lawˬ ve kʼo, ngaˬ hui heuˆ daꞈ ve teˇ ceuˬ maw chaweh yeˬ gʼa tuˬ yoˬ. Yeˍsuˆ kʼoˆ ve, “Gʼuiˬ sha caˉ daꞈ piˇ taˍ ve htaꞈ chaw yaˇ maˇ gʼa yuˬ hpaˆ daꞈ piˇ.”—Maꞈhtehˍ 19:6.

21. Awˬ hpawˇ awˬ miˇ ma haꞈ daꞈ gʼa tuˬ, aˬ htoꞈ ma ga piˇ gʼa ve le?

²¹ Ngaˬ hui teˇ gʼaˇ le le daꞈ ve leh maˇ daꞈ ve hpawˇ cawˬ ve yoˬ. Ngaˬ hui shu ve maˇ daꞈ ve hpawˇ nyi tuˬ sha leh ngaˬ hui ve awˬ hpawˇ awˬ miˇ ma htaꞈ kʼo, maˇ daꞈ hpawˇ leuˉ leh kʼawꞈ mawˬ ve yoˬ. Chi hkʼe te nyi ve kʼo, ha lehˬ kuiˬ maˇ cawˬ. Ngaˬ hui ve awˬ hpawˇ awˬ miˇ ma daꞈ ve hpawˇ nyi ve kʼo, ha lehˬ ve yoˬ. Ngaˬ hui ve awˬ hpawˇ awˬ miˇ ma maˇ biˇ ve htawˇ, daꞈ ve hpawˇ nyi leh ha lehˬ gʼa˗aw laˇ? Ha lehˬ gʼa ve yoˬ! Ngaˬ hui maˇ biˇ ve htaꞈ Yaˬhoˉvaˬ shiˍ taˍ ve htawˇ, yawˇ ngaˬ hui ve daꞈ ve hpawˇ  nyi chehˇ sheˍ. Yawˇ chi hkʼe maˇ te nyi ve kʼo, hkʼaˬ hkʼe hpehꞈ tuˬ le dawˇ nyi sheˍ! “Nawˬ lehˬ ngaˬ hui te yaꞈ ve venˇ baˆ teˇ hpaˍ htaꞈ bvuhꞈ tawnˇ taˍ ve hkʼe kʼo, a shu teˇ gʼaˇ ciˍ yanˍ ve htaꞈ gʼa ponˬ tuˬ ve le?” (Chiˇ mvuh ve 130:3) Awˬ hpawˇ awˬ miˇ ma Yaˬhoˉvaˬ htaꞈ henˇ yuˬ gʼa ve yoˬ. Teˇ gʼaˇ leh teˇ gʼaˇ daꞈ ve hpawˇ nyi leh venˇ baˆ gʼa hpehˇ daꞈ ve yoˬ.—Kawˇlawˇsehˇ 3:13 gʼaw sheˍ.

22, 23. Awˬ hpawˇ awˬ miˇ ma Aˍbraˍhanˍ leh Saˍraˇ htaꞈ hkʼaˬ hkʼe te henˇ yuˬ gʼa ve le?

 ²² Awˬ yanˇ maw la ve teˇ yanˇ, yehˬ kʼa maw chaweh yeˬ gʼa ve yoˬ. Saˍraˇ yehˬ kʼa maw chaweh yeˬ gʼa leh ha lehˬ ve yoˬ. Yaˬhoˉvaˬ Aˍbraˍhanˍ htaꞈ Uˇraˆ venˇ lo tawˆ kʼai˗o kʼoˆ piˇ htaˇ, Saˍraˇ a shaꞈ 60 hkʼawꞈ hpaˆ gaˬ˗oˬ ve yoˬ. Hpehꞈ sha jaˇ ve venˇ lo tawˆ˗e leh aˉ po kʼo hkʼaw chehˇ ve hkʼaˬ ma hpehꞈ haˍ jaˇ ve htaꞈ dawˇ nyi sheˍ. Yaꞈ hkʼaˇ, Saˍraˇ lehˬ daꞈ ve awˬ miˇ ma leh daꞈ ve awˬ chawˇ kaꞈ hpehꞈ leh awˬ hpawˇ htaꞈ awˬ teh awˬ na yawˆ yan puiˉ ve yoˬ. Chi htaꞈ pa taw, yawˇ Aˍbraˍhanˍ dawˇ cheˆ ve htaꞈ haꞈ yuˬ leh gʼaꞈ te ve yoˬ.—Awˬ hkuiˉ puiˍ 18:12; 1 Peˍtruˆ 3:6.

²³ Heuˆ daꞈ ve lehˬ awˬ hpawˇ awˬ miˇ ma teˇ ceuˬ le le ve dawˇ hkʼaˇ hawˍ daꞈ ve kʼoˆ gaˇ ve maˇ heˆ. Teˇ pawˆ htaˇ, Aˍbraˍhanˍ leh Saˍraˇ ve dawˇ hkʼaˇ maˇ hawˍ daꞈ. Yaˬhoˉvaˬ Aˍbraˍhanˍ htaꞈ kʼoˆ piˇ ve, “Saˍraˇ kʼoˆ ve hkʼe te˗o.” Aˍbraˍhanˍ na yuˬ ve pa taw, daꞈ ve awˬ ceuˬ gʼa ve yoˬ. (Awˬ hkuiˉ puiˍ 21:9-13) Teˇ pawˆ pawˆ nawˬ leh nawˬ ve awˬ hpawˇ awˬ miˇ ma dawˇ hkʼaˇ maˇ hawˍ daꞈ ve kʼo, awˬ gʼaˇ taˇ nuˇ piˇ. Dawˇ hkʼaˇ maˇ hawˍ daꞈ ve htawˇ, haꞈ daꞈ leh yawˆ yan daꞈ ve teˇ ceuˬ a yeˇ uiˍ jaˇ.

24. Ngaˬ hui yehˬ kʼa ca ve hkʼaˬ hkʼe te leh Yaˬhoˉvaˬ htaꞈ awˬ meˬ awˬ hponˇ tawˆ la tuˬ te piˇ gʼa ve le?

²⁴ Hkriꞈ yaˇ awˬ moˍ hkʼaw ha lehˬ ve yehˬ kʼa laiˉ hinˉ ca cawˬ ve yoˬ. Nawˬ yehˬ kʼa ca gaˇ ve kʼo, nawˬ heuˆ tuˬ ve teˇ gʼaˇ leuˆ yuˬ ve lehˬ a yeˇ uiˍ jaˇ ve teˇ ceuˬ hpehꞈ ve tehꞈ taˇ leunˇ sheˍ. Chi ve lehˬ nawˬ a shaꞈ teꞈ chehˇ ve teˇ co˗e heuˆ la kuiˬ cawˬ ve yoˬ. Chi htaꞈ pa taw, Yaˬhoˉvaˬ beˆ maˍ laˇ hkawˇ htaꞈ haꞈ yuˬ sheˍ. Chi hkʼe te ve kʼo, nawˬ heuˆ tuˬ ve teˇ gʼaˇ htaꞈ cuˇ yiˍ cawˬ ve hkʼaw leuˆ yuˬ gʼa leh heuˆ daꞈ tuˬ hkʼa dehꞈ gu hehnˇ taˍ gʼa ve yoˬ. Nawˬ ve yehˬ kʼa htawˇ meuˆ daꞈ leh haꞈ daꞈ ve hkʼa biˇ cawˬ ve yoˬ. Chi lehˬ Yaˬhoˉvaˬ awˬ meꞈ awˬ hponˇ tawˆ la tuˬ te piˇ gʼa ve yoˬ.