1, 2. Ngaˬ hui coˇ caˇ leh hteˇ cawˇ ve kʼo, Yaˬhoˉvaˬ hkʼaˬ hkʼe dawˇ ve le?

 Liꞈ henˇ hpehˇ peuˬ hkʼawꞈ nawˉ, yaˇ paˍ teˇ gʼaˇ kʼoꞈ˗e chehˇ htaˇ, yaꞈ kʼaw hpuiˇ lo hpu guˉ pi ce taˍ ve htaꞈ gʼa mawˬ ve yoˬ. Yawˇ hkʼaˬ hkʼe te ve le? Yawˇ gʼawˆ teh taˍ ve kaꞈ hpehꞈ ve yoˬ. Yaꞈ hkʼaˇ, yawˇ awˬ shehˍ hpaˇ htaꞈ hkʼawꞈ piˇ ve yoˬ. Yaˇ paˍ ve awˬ e yawˇ te ve awˬ ceuˬ htaꞈ gʼa shiˍ ve teˇ yanˇ, ha lehˬ jaˇ.

² Maˇ˗awˍ ve awˬ pa awˬ e yawˇ hui ve yaˇ hteˇ cawˇ ve pa taw, ha lehˬ ve yoˬ. Mvuhˇ naw ma hkʼoˆ chehˇ ve ngaˬ hui ve Awˬ pa Yaˬhoˉvaˬ lehˬ “ka tiꞈ yeˬ ve Gʼuiˬ sha hpehꞈ ve yoˬ.” Ngaˬ hui hteˇ ve kʼo, yawˇ ha lehˬ ve yoˬ. (Chiˇ mvuh ve 31:5) Ngaˬ hui yawˇ nyi hkʼaˇ suh tuˬ te piˇ gaˇ leh “teˇ ceuˬ le le awˬ hkʼaw lo ngaˬ hui hteˇ cawˇ ve htaꞈ tiˉ te gaˇ ve yoˬ.” (Heˍbrehˇ 13:18, MGS) Teˇ pawˆ pawˆ kʼo, hteˇ cawˇ ve chaw hpehꞈ tuˬ haˍ jaˇ. Hkʼaˬ hkʼe te haˍ ve 4 hpawˇ cawˬ ve htaꞈ teˇ geh nyi sheˍ. Chi teˇ hpaˍ awˬ hkʼaw lo hteˇ cawˇ ve kʼo, ngaˬ hui awˬ bon hkʼaˬ hkʼe gʼa ve htaꞈ kaꞈ teˇ geh nyi tuˬ yoˬ.

3-5. (a) Ngaˬ hui a shu yawˇ awˬ to htaꞈ hkʼaˬ hkʼe te heˍ gʼa ve le? (b) A shu yawˇ awˬ to hteˇ cawˇ gʼa tuˬ, aˬ htoꞈ ma ga laˇ gʼa ve le?

³ Ngaˬ hui shu htaꞈ hteˇ cawˇ gʼa tuˬ, a shu yawˇ awˬ to  htaꞈ awˉ lawˉ gʼa hteˇ cawˇ ve yoˬ. Teˇ pawˆ pawˆ chi hkʼe te tuˬ maˇ sha. Tcuh yaˇ ve awˬ co˗e htaˇ, Lawˍdiˍkiˆ venˇ chaw awˬ viˉ awˬ nyi a shu yawˇ awˬ to htaꞈ heˍ ve yoˬ. Yawˇ hui Gʼuiˬ sha nyi hkʼaˇ suh tuˬ te chehˇ ve tehꞈ dawˇ ve htawˇ, awˬ tehˬ te ve maˇ heˆ. (Hpeuꞈ maˍ ve 3:17) Ngaˬ hui awˬ tehˬ awˬ na hkʼaˬ hkʼe ve chaw hpehꞈ ve htaꞈ chaˬ nyi htaˇ, ngaˬ hui kaꞈ a shu yawˇ awˬ to htaꞈ heˍ gʼa ve yoˬ.

⁴ Tcuh yaˇ Yaˍkoˆ kʼoˆ ve, “chaw teˇ gʼaˇ gʼaˇ oˉ kʼoˍ pui ve awˬ liˇ htaꞈ yawˇ hkʼa dehꞈ te ve tehꞈ dawˇ htawˇ, yawˇ ve ha tehˍ htaꞈ maˇ gʼaˇ ve kʼo, yawˇ awˬ to htaꞈ heˍ chehˇ ve yoˬ. Yawˇ oˉ kʼoˍ pui ve lehˬ hkʼe leˇ hpehꞈ ve yoˬ.” (Yaˍkoˆ 1:26) Ngaˬ hui daꞈ ve htaꞈ te chehˇ ve pa taw, chaꞈ chiˆ ve tawˇ yaw ve, tzuhˇ juˆ te ve, heˍ ve chi teˇ hpaˍ te chehˇ ve htawˇ, Gʼuiˬ sha ngaˬ hui htaꞈ maˇ ciˍ yanˍ laˇ tehꞈ dawˇ ve kʼo, ngaˬ hui a shu yawˇ awˬ to htaꞈ heˍ chehˇ ve yoˬ. Ngaˬ hui awˬ to htaꞈ maˇ gʼa heˍ tuˬ, aˬ htoꞈ ma ga laˇ gʼa ve le?

⁵ Ngaˬ hui mehˆ gʼeuˆ nyi ve teˇ yanˇ, awˬ to awˬ htaꞈ hpawˇ lo mawˬ ve yoˬ. Ngaˬ hui Liꞈ hpu gʼaw ve teˇ yanˇ, nyi ma hkʼaw hkʼaˬ hkʼe cawˬ ve shiˍ gʼa ve yoˬ. Ngaˬ hui awˬ to daꞈ hpawˇ maˇ daꞈ hpawˇ shiˍ tuˬ, Liꞈ hpu ga laˇ gʼa ve yoˬ. Te hkʼaˇ dawˇ hkʼaˇ, tawˇ yaw ve hkʼaˬ hkʼe te pa gʼa tuˬ ngaˬ hui henˇ gʼa ve yoˬ. (Yaˍkoˆ 1:23-25 gʼaw sheˍ.) Yaꞈ hkʼaˇ, ngaˬ hui yaꞈ kuiˬ maˇ cawˬ tehꞈ kʼoˆ ve kʼo, ngaˬ hui maˇ pa gʼa ve yoˬ. Chi htaꞈ pa taw, hteˇ cawˇ ve hkʼaw ngaˬ hui awˬ to htaꞈ chaˬ nyi tuˬ, Liꞈ hpu htaꞈ gʼa cuˇ ve yoˬ. (Dawˇ haˍ ve 3:40; Haˆgehˇ 1:5) Ngaˬ hui awˬ tehˬ awˬ na hkʼaˬ hkʼe ve chaw hpehꞈ ve tehꞈ ngaˬ hui bon lawˬ htaˇ shiˍ gʼa ve yoˬ. Yaˬhoˉvaˬ ngaˬ hui htaꞈ chaˬ nyi laˇ tuˬ, ngaˬ hui ve yaꞈ kuiˬ htaꞈ shiˍ leh pa gʼa tuˬ, yawˇ geh bon lawˬ gʼa ve yoˬ. (Chiˇ mvuh ve 139:23, 24) Yaˬhoˉvaˬ “haiˬ ve kanˉ htaꞈ te ve chaw htaꞈ canˇ leh, hteˇ ve cawˇ ve chaw htaꞈ awˬ chawˇ te piˇ ve yoˬ” tehꞈ, ngaˬ hui tawnˇ taˍ cawˇ ve yoˬ.—Tawˇ naˉ ve 3:32.

6. Awˬ hpawˇ awˬ miˇ ma aˬ htoꞈ ma te ka tiꞈ yeˬ daꞈ cawˇ ve le?

⁶ Hteˇ cawˇ ve lehˬ yehˬ kʼa hkʼaw a yeˇ uiˍ jaˇ. Awˬ hpawˇ awˬ miˇ ma hteˇ lehˍ kʼoˆ daꞈ ve kʼo, yawˇ hui kawˆ tuˬ maˇ cawˬ, teˇ gʼaˇ leh teˇ gʼaˇ yonˍ daꞈ gʼa ve yoˬ. Awˬ hpawˇ awˬ miˇ ma ka tiꞈ maˇ yeˬ daꞈ tuˬ te piˇ ve laiˉ ceuˬ cawˬ ve yoˬ. Tawˇ pa haˉ te kʼo, yehˬ kʼa cawˬ ve chaw teˇ hpaˍ hpaˍ shu htaꞈ maˆ hkawˇ yaw guiˇ ve, awˬ ku nyi te ve awˬ han nyi ve, maˇ heˆ leh shu geh zuhꞈ gaˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, “teꞈ chiˉ awˬ bon maˇ cawˬ ve chaw leh heˍ puiˉ ve chaw hui htaꞈ ngaˬ awˬ chawˇ te tuˬ ve maˇ heˆ.” (Chiˇ mvuh ve 26:4) Nawˬ ve yehˬ kʼa htaꞈ ka tiꞈ maˇ yeˬ tuˬ dawˇ ve ceh kaꞈ yehˬ kʼa hpaˆ daꞈ kʼai gʼa ve yoˬ.

7, 8. Hteˇ cawˇ ve a yeˇ uiˍ jaˇ ve tehꞈ ngaˬ hui ve yaˇ shiˍ tuˬ, Liꞈ hpu htaꞈ cuˇ leh hkʼaˬ hkʼe te maˍ piˇ gʼa tuˬ le?

 ⁷ Hteˇ cawˇ ve lehˬ a yeˇ uiˍ jaˇ ve tehꞈ yaˇ teˇ hpaˍ htawˇ shiˍ cawˇ ve yoˬ. Yawˇ hui htaꞈ maˍ piˇ tuˬ, awˬ pa awˬ e Liꞈ hpu htaꞈ gʼa cuˇ ve yoˬ. Liꞈ hpu hkʼaw maˇ hteˇ maˇ cawˇ ve chaw laiˉ gʼaˇ ve awˬ lawn cawˬ taˍ ve yoˬ. Tawˇ pa haˉ te kʼo, Aˍhkanˍ chaw hkʼawˇ hpehꞈ ve, Geˍhaˍziˆ hpu gʼa tuˬ heˍ ve, leh Yuˇdaꞈ Iˉsaˍkaˍriˍoˆ kaꞈ hpu hkʼawˇ leh hkʼawꞈ nawˉ htaˇ hpu 30 htehꞈ gʼa tuˬ Yeˍsuˆ htaꞈ hpfuhˆ ve yoˬ.—Yawˇsuˆ 6:17-19; 7:11-25; 2 Jawˇmawˇ 5:14-16, 20-27; Maꞈhtehˍ 26:14, 15; Yoˇhanˬ 12:6.

⁸ Liꞈ hpu hkʼaw hteˇ cawˇ ve chaw laiˉ gʼaˇ ve awˬ lawn kaꞈ cawˬ taˍ ve yoˬ. Tawˇ pa haˉ te kʼo, Yaˍkoˆ lehˬ yawˇ ve yaˇ paˍ teˇ hpaˍ hpu gʼa mawˬ htaˇ ca hkʼawꞈ piˇ tcuh ve, Yeˍhpaˍtaˆ leh yawˇ ve yaˇ miˇ Gʼuiˬ sha htaꞈ ka tiꞈ te taˍ ve hkʼe gʼaꞈ te ve, leh Yeˍsuˆ haˍ ve gʼa hpuˇ ve htawˇ, teˇ ceuˬ le le hkʼaw hteˇ cawˇ ve yoˬ. (Awˬ hkuiˉ puiˍ 43:12; Suhˉ jehˬ ve 11:30-40; Yoˇhanˬ 18:3-11) Hteˇ cawˇ ve hkʼaˬ hkʼe taw a yeˇ uiˍ ve ngaˬ hui ve yaˇ na gʼa tuˬ, awˬ lawn chi teˇ hpaˍ ga piˇ gʼa ve yoˬ.

9. Awˬ pa awˬ e hteˇ cawˇ ve kʼo, yaˇ awˬ bon hkʼaˬ hkʼe gʼa ve le?

⁹ Liꞈ hpu hkʼaw kʼoˆ ve, “nawˬ shu htaꞈ maˍ piˇ chehˇ ve kaꞈ nawˬ awˬ to htaꞈ maˇ maˍ leh laˇ? Shu ve mawˇ htaꞈ taˇ hkʼawˇ tehꞈ nawˬ maˍ piˇ chehˇ ve kaꞈ nawˬ awˬ to shu ve mawˇ htaꞈ hkʼawˇ ve laˇ?” (Roˉmaꞈ 2:21) Liꞈ hpu hkʼaw ve awˬ liˇ awˬ hkʼaˇ chi ve awˬ pa awˬ e htaꞈ maˍ piˇ gʼa ve yoˬ. Awˬ pa awˬ e teˇ ceuˬ kʼoˆ leh teˇ ceuˬ te ve kʼo, yaˇ kaꞈ shiˍ ve yoˬ. ‘Nawˬ gʼa hteˇ cawˇ ve yoˬ’ tehꞈ ngaˬ hui yaˇ htaꞈ kʼoˆ piˇ ve htawˇ, ngaˬ hui maˇ hteˇ cawˇ ve kʼo, yaˇ htawˇ dawˇ nawˬ dawˇ cawˬ la tuˬ yoˬ. Awˬ pa awˬ e a ciˉ heˍ ve yaˇ mawˬ ve kʼo, yawˇ hui kaꞈ heˍ tuˬ yoˬ. (Luˉkaꞈ 16:10 gʼaw sheˍ.) Yaꞈ hkʼaˇ, awˬ pa awˬ e hteˇ cawˇ ve htaꞈ yaˇ mawˬ ve kʼo, yawˇ hui yaˇ cawˬ la htaˇ kaꞈ hteˇ cawˇ ve awˬ pa awˬ e hpehꞈ tuˬ yoˬ.—Tawˇ naˉ ve 22:6; Eˇfeˇsuꞈ 6:4.

10. Awˬ viˉ awˬ nyi geh tawˇ yaw daꞈ htaˇ, ngaˬ hui hkʼaˬ hkʼe te leh hteˇ cawˇ ve chaw hpehꞈ gʼa tuˬ le?

¹⁰ Ngaˬ hui awˬ viˉ awˬ nyi htaꞈ kaꞈ gʼa hteˇ cawˇ ve yoˬ. Tawˇ yaw daꞈ ve ceh kaꞈ shu htaꞈ she piˇ leh hkʼaiˉ daꞈ ve teˇ ceuˬ hkʼa sha sha˗ehˬ hpehꞈ la gʼa ve yoˬ. Awˬ lawn oˇ ve awˬ tehˬ heˆ maˇ heˆ ve ngaˬ hui hkʼa dehꞈ maˇ shiˍ leh ca kʼawꞈ caˉ kʼoˆ ve kʼo, ngaˬ hui heˍ ve chaw hpehꞈ la gʼa ve yoˬ. Chi htaꞈ pa taw, ngaˬ hui “taꞈ iˉ gawˬ lehˍ” chehˇ ve lehˬ daꞈ ve yoˬ. (Tawˇ naˉ ve 10:19) Hteˇ cawˇ ve chaw hpehꞈ ve lehˬ gʼa shiˍ ve, gʼa kaˇ ve, dawˇ ve hkʼa peu˗eˬ htaꞈ kʼoˆ cawˇ ve tehꞈ kʼoˆ gaˇ ve maˇ heˆ. Ngaˬ hui kʼoˆ tuˬ ve awˬ lawn awˬ tehˬ hpehꞈ ve htawˇ, ngaˬ hui ve awˬ lawn maˇ heˆ, kʼoˆ tuˬ maˇ loˍ, leh maˇ ha kʼaˉ puiˉ ve awˬ lawn hpehꞈ ve kʼo, maˇ kʼoˆ cawˇ. (1 Hteˇsaˍlawˇniˆ 4:11) Chaw teˇ hpaˍ choˬ kʼoˆ oˇ kʼoˆ kʼoˆ ve, “ngaˬ kʼoˆ ve awˬ tehˬ hpehꞈ ve law.” Yaꞈ hkʼaˇ, ngaˬ hui Yaˬhoˉvaˬ ve chaw hpehꞈ ve pa taw, ha kʼaˉ puiˉ ve tawˇ leh na sha ve tawˇ hkʼaˬ htaˆ kaꞈ gʼa yaw ve yoˬ.—Kawˇlawˇsehˇ 4:6 gʼaw sheˍ.

11, 12. (a) Chaw teˇ gʼaˇ venˇ baˆ uiˍ jaˇ ve te leh hteˇ lehˍ maˇ kʼoˆ ve kʼo, hkʼaˬ hkʼe hpehꞈ tuˬ le? (b) Ngaˬ hui aˬ htoꞈ ma na hkawˇ htaꞈ na hpehꞈ ve le? (c) Yaˬhoˉvaˬ ve kanˉ hkʼaˇ htaꞈ ngaˬ hui hkʼaˬ hkʼe te leh hteˇ cawˇ gʼa tuˬ le?

¹¹ Hkriꞈ yaˇ awˬ moˍ hkʼaw ga piˇ tuˬ, Yaˬhoˉvaˬ nyi haꞈ shaˉ shehˍ hpaˇ htaꞈ awˬ vuiˬ piˇ ve yoˬ. Ngaˬ hui hteˇ cawˇ ve chaw hpehꞈ ve kʼo, nyi haꞈ shaˉ shehˍ hpaˇ ngaˬ hui htaꞈ ga laˇ tuˬ sha ve yoˬ. Aˬ htoꞈ ma pa taw le? Nawˬ maˇ chehˇ sha leh saˍ laꞈ gʼonˍ geh kʼai htaˇ, nawˬ naˬ ve htaꞈ faˉ taˍ tuˬ laˇ? Nawˬ oˇ hkʼe te ve kʼo, yawˇ hkʼaˬ hkʼe te ga laˇ gʼa tuˬ le? Chi hkʼa shuˍ shuˍ, ngaˬ hui venˇ baˆ uiˍ ve htaꞈ te ve kʼo, maˇ heˍ cawˇ ve yoˬ. Yaꞈ hkʼaˇ, ngaˬ hui nyi haꞈ shaˉ shehˍ hpaˇ geh kʼai leh awˬ lawn oˇ ve hteˇ lehˍ gʼa kʼoˆ maˍ piˇ ve yoˬ. (Chiˇ mvuh ve 12:2; Tcuh yaˇ 5:1-11) Awˬ lawn chi ve htaꞈ dawˇ nyi sheˍ. Nawˬ ve awˬ chawˇ venˇ  baˆ uiˍ jaˇ ve te ve htaꞈ nawˬ shiˍ ve kʼo, hkʼaˬ hkʼe te tuˬ le? (Oˉ kʼoˍ pui ve 5:1) “Ngaˬ yawˇ htaꞈ awˬ tehˬ awˬ na awˬ chawˇ hpehꞈ ve kʼo, yawˇ te ve awˬ ceuˬ htaꞈ faˉ piˇ˗a” tehꞈ nawˬ kʼoˆ tuˬ laˇ? Maˇ heˆ leh yawˇ Yaˬhoˉvaˬ htaꞈ kʼawꞈ meuˆ daꞈ la tuˬ, nyi haꞈ shaˉ shehˍ hpaˇ ga piˇ cawˇ ve tehꞈ nawˬ tawnˇ taˍ cawˇ ve maˇ heˆ laˇ?—Heˍbrehˇ 13:17; Yaˍkoˆ 5:14, 15.

¹² Ngaˬ hui Yaˬhoˉvaˬ ve kanˉ hkʼaˇ htaꞈ kaꞈ gʼa hteˇ cawˇ ve yoˬ. Tawˇ pa haˉ te kʼo, hto toˇ ve awˬ yanˇ bvuhꞈ keu htaˇ, gʼuˇ suhˍ peuˍ ve kanˉ te tuˬ ngaˬ hui ve awˬ lawn bvuhꞈ keu htaˇ, leh awˬ kaˍ awˬ nu Gʼuiˬ sha kanˉ te htaˇ, teˇ ceuˬ le le gʼa hteˇ cawˇ ve yoˬ.—Tawˇ naˉ ve 6:16-19 gʼaw sheˍ.

13. Awˬ viˉ awˬ nyi geh tanˇ kaˬ te ve kʼo, ngaˬ hui hkʼaˬ hkʼe te hteˇ cawˇ gʼa tuˬ le?

¹³ Hkriꞈ yaˇ lehˬ tanˇ kaˬ hpawˇ leh oˉ kʼoˍ pui ve hpawˇ gʼa fuiˍ gʼa pehˬ ve yoˬ. Tawˇ pa haˉ te kʼo, ngaˬ hui hpawnˬ daꞈ kuiˬ lo chehˇ htaˇ, hto toˇ˗e htaˇ, tanˇ kaˬ maˇ te. Tanˇ kaˬ te ve kʼo, ngaˬ hui gʼa cawˇ ve htaꞈ awˬ viˉ awˬ nyi geh awˬ leuˉ taˇ yuˬ. Nawˬ geh gʼaˇ ga caˇ ve chaw Shaˉhkiˆhkanˍ ve chaw hpehꞈ ve kʼo, awˬ yanˇ cawˇ cawˇ gʼaˇ hpfuhˇ gʼa piˇ ve, kʼoˆ daꞈ ve hkʼe gʼaˇ hpfuhˇ gʼa piˇ ve, leh mvuhˇ miˬ ve awˬ liˇ cawˬ ve hkʼe gʼa piˇ ve yoˬ. Naˬ la gawˬ la htaˇ haꞈ shaˉ tuˬ hpu, kanˉ awˬ leuˉ te ve gʼaˇ hpfuhˇ yawˇ htaꞈ piˇ cawˇ ve kʼo, gʼa piˇ ve yoˬ. (1 Tiˆmoˉseˍ 5:18; Yaˍkoˆ 5:1-4) Nawˬ ve paw leˍ Shaˉhkiˆhkanˍ ve chaw hpehꞈ ve kʼo, yawˇ nawˬ htaꞈ shu aꞈ kehˉ nyi haꞈ shaˉ laˇ tuˬ taˇ dawˇ law. (Eˇfeˇsuꞈ 6:5-8) Kʼoˆ daꞈ ve hkʼe kanˉ awˬ yanˇ hkʼa biˇ gʼa te piˇ ve yoˬ.—2 Hteˇsaˍlawˇniˆ 3:10.

14. Tanˇ kaˬ maˇ te daꞈ sheˍ htaˇ, Hkriꞈ yaˇ aˬ htoꞈ ma te cawˇ ve le?

¹⁴ Ngaˬ hui awˬ viˉ awˬ nyi geh tanˇ kaˬ teˇ geh te ve kʼo, hkʼaˬ hkʼe te tuˬ le? Kʼoˆ gaˇ ve lehˬ ngaˬ hui ve hpu leh yawˇ ve hpu pawnˇ daꞈ ve, maˇ heˆ leh hpu awˉ lawˉ  tawˆ leh chiˇ piˇ ve yoˬ. Chi hkʼe hpehꞈ ve kʼo, awˬ tehˬ awˬ na yehˇ gʼa ve Liꞈ hpu hkʼaw awˬ liˇ awˬ hkʼaˇ cawˬ ve yoˬ. Teˇ ceuˬ le le hkʼa dehꞈ bvuhꞈ keu sheˍ! Tcuh kaˍ paˍ Yeˍraˍmiˆ miˬ guiˬ vuiˬ htaˇ, yawˇ liꞈ 2 kʼoˆ bvuhꞈ cheˆ taˍ ve yoˬ. Teˇ kʼoˆ kʼo shaˉ hkiˆ te ve chaw awˬ meh bvuhꞈ tcuh ve leh, awˬ gʼuˇ suhˍ hpawˇ yehˇ tuˬ liꞈ chi 2 kʼoˆ gʼawˆ teh taˍ ve yoˬ. (Yeˍraˍmiˆ 32:9-12; Awˬ hkuiˉ puiˍ 23:16-20 hkʼaw kaꞈ nyi sheˍ.) Liꞈ chi hkʼe te bvuhꞈ cheˆ ve kʼo, awˬ viˉ awˬ nyi htaꞈ maˇ yonˍ ve htaꞈ shuˍ ve tehꞈ teˇ hpaˍ hpaˍ dawˇ ve yoˬ. Yaꞈ hkʼaˇ, awˬ tehˬ kʼo liꞈ bvuhꞈ cheˆ ve lehˬ yonˍ yaꞈ ve, nyi ma luˬ ve, tawˇ gʼawˬ daꞈ ve maˇ cawˬ la tuˬ fanˬ taˍ ve yoˬ. Tanˇ kaˬ te htaˇ, Hkriꞈ yaˇ awˬ moˍ hkʼaw cawˇ daꞈ hawˍ daꞈ ve lehˬ ngaˬ hui ve tanˇ kaˬ aꞈ kehˉ a yeˇ uiˍ ve yoˬ tehꞈ taˇ leunˇ piˇ.—1 Kawˇrenˍhtuˆ 6:1-8; Kʼoˆ maˍ ve awˬ lawn 30 htaꞈ nyi sheˍ.

15. Tanˇ kaˬ hpawˇ maˇ hteˇ cawˇ ve htaꞈ Yaˬhoˉvaˬ hkʼaˬ hkʼe dawˇ ve le?

¹⁵ Ngaˬ hui teˇ gʼaˇ le le htaꞈ gʼa hteˇ cawˇ ve yoˬ. Yaˬhoˉvaˬ ve Shaˉhkiˆhkanˍ ve chaw maˇ hpehꞈ ve chaw htaꞈ htawˇ gʼa hteˇ cawˇ ve yoˬ. Yaˬhoˉvaˬ ngaˬ hui htaꞈ hteˇ cawˇ tcuh gaˇ ve yoˬ. “Gʼuiˬ sha lehˬ maˇ cawˇ ve tsuh tu yehˇ ve chaw hui htaꞈ canˇ ve yoˬ. Yawˇ lehˬ cawˇ ve tsuh tu htaꞈ nyi ma cawˇ ve yoˬ.” (Tawˇ naˉ ve 11:1; 20:10, 23) Oˇ htaˇ teˇ co˗e, tanˇ kaˬ te tuˬ tsuh tu htaꞈ yehˇ ve yoˬ. Yaꞈ hkʼaˇ, tanˇ kaˬ paˍ teˇ hpaˍ mawˇ vuiˬ la ve chaw htaꞈ kʼoˆ daꞈ ve hkʼe hkʼa biˇ maˇ piˇ, maˇ heˆ leh gʼa cawˇ ve htaꞈ awˬ leuˉ yuˬ ve yoˬ. Chi beuꞈ teˇ co˗e htawˇ, tanˇ kaˬ hpawˇ maˇ hteˇ ve hkʼa biˇ cawˬ ve yoˬ. Aˬ sho˗eˬ htaˇ maˇ hteˇ maˇ cawˇ ve htaꞈ Yaˬhoˉvaˬ canˇ ve hkʼa shuˍ, chi beuꞈ htawˇ yawˇ canˇ chehˇ ve yoˬ.

16, 17. Maˇ hteˇ maˇ cawˇ ve hkʼaˬ hkʼe ve teˇ ceuˬ htaꞈ ngaˬ hui jaw kʼai cawˇ ve le?

¹⁶ Ngaˬ hui teˇ gʼaˇ le le hteˇ ve cawˇ ve htaꞈ lawˇ nyi laˇ  tuˬ gʼa hpuˇ ve yoˬ. Tawˇ pa haˉ te kʼo, kanˉ te tuˬ ngaˬ hui ve awˬ lawn bvuhꞈ keu htaˇ, mvuhˇ miˬ hpawˇ caˉ daꞈ ve awˬ lawn bvuhꞈ keu htaˇ, liꞈ henˇ yehˬ lo liꞈ na htaˇ, chi teˇ hpaˍ hpehꞈ ve yoˬ. Heˍ ve, awˬ leuˉ kʼoˆ ve, shu yonˍ yaꞈ tuˬ hkʼawꞈ piˇ ve chi teˇ hpaˍ maˇ yaꞈ tehꞈ laiˉ gʼaˇ dawˇ ve yoˬ. Yawˇ hui oˇ hkʼe dawˇ ve ngaˬ hui anˇ tuˬ maˇ cawˬ. Awˬ lawn kʼo, Liꞈ hpu hkʼaw kʼoˆ taˍ ve, awˬ leh meuˇ ve awˬ yanˇ htaˇ chaw yaˇ “a shu yawˇ awˬ to htaꞈ haꞈ ve chaw, hpu htaꞈ sheˉ lai ve chaw, . . . daꞈ ve htaꞈ canˇ ve chaw hpehꞈ tuˬ yoˬ.”—2 Tiˆmoˉseˍ 3:1-5.

¹⁷ Teˇ pawˆ pawˆ ngaˬ hui nyi˗a kʼo, maˇ hteˇ ve chaw daꞈ ve laiˉ ceuˬ gʼa ve yoˬ. (Chiˇ mvuh ve 73:1-8) Hkriꞈ yaˇ kanˉ maˇ kʼawꞈ gʼa te, hpu heˍ caˇ piˇ ve, yawˇ hui hteˇ ve pa taw kanˉ te kuiˬ lo maˇ shawˍ maˇ caˆ te piˇ ve htaꞈ gʼa hpuˇ ve yoˬ. Yaꞈ hkʼaˇ, hteˇ cawˇ ve lehˬ shonˇ kʼai ve hkʼa peu˗eˬ aꞈ kehˉ awˬ hpfuhˇ hkʼaˆ ve yoˬ. Aˬ htoꞈ ma pa taw le?

18. Daꞈ ve awˬ meh cawˬ tuˬ aˬ htoꞈ ma te awˬ hpfuhˇ hkʼaˆ jaˇ ve le?

¹⁸ Chi beuꞈ teˇ co˗e, hteˇ cawˇ ve chaw, yonˍ gʼa ve chaw ca haˍ jaˇ. Chaw teˇ gʼaˇ hteˇ cawˇ ve kʼo, yawˇ daꞈ ve awˬ meh cawˬ tuˬ yoˬ. Ngaˬ hui teˇ gʼaˇ le le daꞈ ve awˬ meh cawˬ ve chaw hpehꞈ tuˬ te gʼa ve yoˬ. (Miˆhkaˍ 7:2) Ngaˬ hui hteˇ ve chaw hpehꞈ ve kʼo, chaw teˇ hpaˍ ngaˬ hui htaꞈ maˇ shawˍ maˇ caˆ kʼoˆ leh kʼaˍ jaˇ tehꞈ kʼoˆ laˇ ve yoˬ hehˉ. Yaꞈ hkʼaˇ, nawˬ hteˇ cawˇ ve awˬ hpfuhˇ hkʼaˆ jaˇ tehꞈ shawˍ leh nawˬ htaꞈ yonˍ ve chaw kaꞈ cawˬ tuˬ yoˬ. Yaˬhoˉvaˬ ve Shaˉhkiˆhkanˍ ve chaw hteˇ ve chaw hpehꞈ ve tehꞈ laiˉ gʼaˇ shiˍ ve yoˬ. Shaˉhkiˆhkanˍ ve chaw hteˇ cawˇ ve tehꞈ paw leˍ teˇ hpaˍ shiˍ ve pa taw, yawˇ hui htaꞈ kanˉ te tcuh gaˇ ve yoˬ. Laiˉ pawˆ kʼo gʼaˇ ga caˇ ve awˬ nu ve chaw maˇ hteˇ ve pa taw, gʼaꞈ tawˆ piˇ ve htawˇ, Shaˉhkiˆhkanˍ ve chaw kanˉ gʼa kʼawꞈ caˉ te ve yoˬ.

19. Hteˇ cawˇ ve chaw hpehꞈ ve kʼo, nawˬ Yaˬhoˉvaˬ htaꞈ meuˆ daꞈ ve teˇ ceuˬ hkʼaˬ hkʼe heuˆ la ve le?

 ¹⁹ Teˇ ceuˬ le le awˬ hkʼaw lo hteˇ cawˇ ve kʼo, nawˬ dawˇ shiˍ puiˉ ve nyi ma kehˬ lehˍ cawˬ leh nyi ma gawˬ lehˍ cawˬ tuˬ yoˬ. Ngaˬ hui Pawˇluꞈ hkʼa shuˍ hpehꞈ gʼa ve yoˬ. Yawˇ kʼoˆ ve, “ngaˬ ve shiˍ puiˉ ve nyi ma lehˬ yaꞈ kuiˬ maˇ cawˬ tehꞈ ngaˬ shiˍ taˍ ve yoˬ.” (Heˍbrehˇ 13:18) A yeˇ uiˍ jaˇ ve lehˬ nawˬ teˇ ceuˬ le le awˬ hkʼaw lo coˇ caˇ leh hteˇ cawˇ ve kʼo, nawˬ htaꞈ haꞈ jaˇ ve Awˬ pa Yaˬhoˉvaˬ mawˬ leh awˬ hpfuhˇ hkʼaˆ jaˇ tehꞈ shawˍ tuˬ yoˬ.—Chiˇ mvuh ve 15:1, 2; Tawˇ naˉ ve 22:1 gʼaw sheˍ.