1, 2. (a) Ngaˬ hui a shu ve beˆ maˍ laˇ hkawˇ htaꞈ gʼaꞈ te tuˬ loˍ ve le? (b) Awˬ lawn chi ve hkʼaw aˬ htoꞈ ma na hkawˇ jehˬ daꞈ tuˬ le?

 Nawˬ yaˇ ehˉ htaˇ, teˇ pawˆ pawˆ nawˬ maˇ te gaˇ ve awˬ ceuˬ nawˬ pa nawˬ e te tcuh laˇ ve yoˬ hehˉ. Nawˬ lehˬ nawˬ pa nawˬ e htaꞈ haꞈ leh yawˇ hui hkawˇ na yuˬ cawˇ ve yoˬ tehꞈ shiˍ ve yoˬ. Yaꞈ hkʼaˇ, teˇ pawˆ pawˆ nawˬ yawˇ hui hkawˇ maˇ na yuˬ gaˇ ve yoˬ hehˉ.

² Ngaˬ hui ve awˬ pa Yaˬhoˉvaˬ ngaˬ hui htaꞈ haꞈ ve yoˬ tehꞈ, ngaˬ hui shiˍ ve yoˬ. Yawˇ ngaˬ hui htaꞈ haꞈ shaˉ laˇ leh ngaˬ hui a shaꞈ teꞈ kuiˬ lo ha lehˬ tuˬ, loˍ ve hkʼa peu˗eˬ peꞈ laˇ ve yoˬ. Ngaˬ hui teˇ ceuˬ le le te gʼa tuˬ, yawˇ beˆ maˍ laˇ ve yoˬ. Teˇ pawˆ pawˆ kʼo, ngaˬ hui htaꞈ beˆ maˍ laˇ tuˬ yawˇ shu htaꞈ yehˇ ve yoˬ. Ngaˬ hui Yaˬhoˉvaˬ uˉ peunˍ ve kanˇ paˆ htaꞈ yawˆ yan tuˬ loˍ ve yoˬ. (Tawˇ naˉ ve 24:21) Yaꞈ hkʼaˇ, aˬ htoꞈ ma te teˇ pawˆ pawˆ beˆ maˍ laˇ hkawˇ htaꞈ na yuˬ tuˬ haˍ ve le? Aˬ htoꞈ ma te beˆ maˍ laˇ hkawˇ htaꞈ na yuˬ tuˬ Yaˬhoˉvaˬ ngaˬ hui htaꞈ lawˬ ve le? Yawˇ uˉ peunˍ ve kanˇ paˆ htaꞈ ngaˬ hui yawˆ yan ve yoˬ tehꞈ, hkʼaˬ hkʼe te hpeuꞈ maw piˇ gʼa tuˬ le?—Kʼoˆ maˍ ve awˬ lawn 9 htaꞈ nyi sheˍ.

3, 4. Chaw yaˇ hkʼaˬ hkʼe te leh maˇ biˇ ve chaw hpehꞈ la ve le? Aˬ htoꞈ ma te shu beˆ maˍ laˇ hkawˇ htaꞈ ngaˬ hui haꞈ yuˬ tuˬ haˍ ve le?

³ Aˍdanˍ Eˇvaꞈ venˇ baˆ te htaˇ tanˬ leh chaw yaˇ teˇ gʼaˇ le le maˇ na yuˬ gaˇ ve nyi ma cawˬ la ve yoˬ. Yawˇ huiˉ maˬ biˇ jaˇ ve chaw hpehꞈ ve htawˇ, Gʼuiˬ sha uˉ peunˍ ve kanˇ paˆ  htaꞈ maˇ haꞈ yuˬ. Oˇ htaˇ tanˬ leh chaw yaˇ teˇ gʼaˇ le le maˇ biˇ ve hkʼaw paw la ve yoˬ. Ngaˬ hui maˇ biˇ ve chaw hpehꞈ ve pa taw, Yaˬhoˉvaˬ leh shu beˆ maˍ laˇ hkawˇ htaꞈ haꞈ yuˬ tuˬ haˍ ve yoˬ. Chi hkʼoˆ kaꞈ, ngaˬ hui htaꞈ beˆ maˍ laˇ tuˬ Yaˬhoˉvaˬ yehˇ ve chaw kaꞈ maˇ biˇ ve yoˬ.—Awˬ hkuiˉ puiˍ 2:15-17; 3:1-7; Chiˇ mvuh ve 51:5; Roˉmaꞈ 5:12.

⁴ Ngaˬ hui maˇ biˇ ve pa taw, caˆ muiˬ puiˉ la ve yoˬ. Caˆ muiˬ puiˉ ve kʼo, beˆ maˍ laˇ hkawˇ htaꞈ haꞈ yuˬ tuˬ haˍ ve yoˬ. Tawˇ pa haˉ te kʼo, aˬ sho˗eˬ htaˇ ve Iˉsaˍreˍlaˆ chaw htaꞈ sheh kʼai tuˬ, Yaˬhoˉvaˬ Moˉseˍ htaꞈ leuˆ yuˬ ve yoˬ. Kawˇraˆ meh ve hawˉ hkʼaˆ teˇ gʼaˇ Yaˬhoˉvaˬ ve kanˉ laiˉ hkʼawꞈ te laˬ ve htawˇ, yawˇ caˆ muiˬ puiˉ la leh Moˉseˍ htaꞈ maˇ yawˆ yan. Yaꞈ hkʼaˇ, Moˉseˍ lehˬ Gʼuiˬ sha ve chaw htaꞈ sheh kʼai paˍ hpehꞈ ve htawˇ, maˇ caˆ muiˬ puiˉ. Awˬ tehˬ kʼo, miˬ guiˬ hkʼoˆ chehˇ ve chaw hkʼa peu˗eˬ aꞈ kehˉ Moˉseˍ nyi ma nuˇ nehˬ jaˇ ve tehꞈ Liꞈ hpu hkʼaw kʼoˆ taˍ ve yoˬ. Yaꞈ hkʼaˇ, Kawˇraˆ Moˉseˍ beˆ maˍ piˇ ve htaꞈ maˇ haꞈ yuˬ. Yawˇ lehˬ Moˉseˍ htaꞈ tawˍ daꞈ tuˬ, yawˇ geh chaw moˍ lonˉ jehˬ hpoˆ ve yoˬ. Kawˇraˆ leh chaw hpfuhˆ hui aˬ htoꞈ ma gʼa hpuˇ ve le? Yawˇ hui htaꞈ tiˇ pehˍ piˇ ve yoˬ. (Heh puiˉ hkʼaw 12:3; 16:1-3, 31–35) Caˆ muiˬ puiˉ ve kawˆ tuˬ cawˬ ve tehꞈ Liꞈ hpu hkʼaw ve awˬ lawn laiˉ lawn maˍ laˇ ve yoˬ.—2 Raˍsaˍvanˍ 26:16-21; Kʼoˆ maˍ ve awˬ lawn 10 htaꞈ nyi sheˍ.

5. Chaw teˇ hpaˍ kanˇ paˆ htaꞈ haiˬ ve hpawˇ hkʼaˬ hkʼe te yehˇ ve le?

⁵ “Kanˇ paˆ htaꞈ pa taw, haiˬ ve chaw hpehꞈ la gʼa ve yoˬ” tehꞈ kʼoˆ ve chi htaꞈ nawˬ kaˇ jaw laˇ? Teˇ co˗e peuˬ teˇ co˗e chaw yaˇ laiˉ gʼaˇ yawˇ hui kanˇ paˆ htaꞈ haiˬ ve hpawˇ yehˇ ve yoˬ. (Cuˇ yiˍ piˇ ve 8:9 gʼaw sheˍ.) Tawˇ pa haˉ te kʼo, Iˉsaˍreˍlaˆ ve jawˇ mawˇ te tuˬ, Yaˬhoˉvaˬ Sawˇluꞈ htaꞈ leuˆ yuˬ htaˇ, yawˇ nyi ma nuˇ nehˬ leh daꞈ ve chaw hpehꞈ ve yoˬ. Yaꞈ hkʼaˇ, Sawˇluꞈ caˆ muiˬ puiˉ ve leh hkawehˉ ve yawˇ ve nyi ma hkʼaw uiˍ la tcuh ve yoˬ. Chi htaꞈ pa taw, teꞈ chiˉ maˇ te yaꞈ ve Daˍviˆ htaꞈ yawˇ fawˉ mehˍ piˇ ve yoˬ.  (1 Saˍmo˗eˍlaˆ 9:20, 21; 10:20-22; 18:7-11) Awˬ hkʼawꞈ nawˉ htaˇ, Daˍviˆ jawˇ mawˇ gʼa te leh yawˇ Iˉsaˍreˍlaˆ chaw hui ve daꞈ jaˇ ve jawˇ mawˇ teˇ gʼaˇ hpehꞈ la ve yoˬ. Yaꞈ hkʼaˇ, awˬ yanˇ maw la htaˇ Daˍviˆ yawˇ kanˇ paˆ htaꞈ haiˬ ve hpawˇ yehˇ ve yoˬ. Uˇriˇyaꞈ meh ve hawˉ hkʼaˆ teˇ gʼaˇ ve awˬ miˇ ma Beˍtaˍsheˍbaˆ htaꞈ yawˇ haˉ chawˇ te ve yoˬ. Oˇ ve hkʼawꞈ nawˉ, yawˇ venˇ baˆ htaꞈ faˉ taˍ tuˬ, maꞈ bawˆ kuiˬ lo Uˇriˇyaꞈ htaꞈ peu piˇ leh suh tcuh ve yoˬ.—2 Saˍmo˗eˍlaˆ 11:1-17.

6, 7. (a) Yaˬhoˉvaˬ htaꞈ haꞈ ve pa taw, ngaˬ hui aˬ htoꞈ ma te gaˇ tuˬ le? (b) Na yuˬ tuˬ maˇ sha ve htawˇ, ngaˬ hui htaꞈ aˬ htoꞈ ma ga laˇ tuˬ le?

⁶ Ngaˬ hui Yaˬhoˉvaˬ htaꞈ haꞈ ve pa taw, yawˇ beˆ maˍ laˇ ve htaꞈ haꞈ yuˬ ve yoˬ. Ngaˬ hui teˇ ceuˬ le le leh teˇ gʼaˇ le le aꞈ kehˉ Yaˬhoˉvaˬ htaꞈ haꞈ ve pa taw, yawˇ ha lehˬ tuˬ te piˇ gaˇ ve yoˬ. (Tawˇ naˉ ve 27:11; Maˍkuˆ 12:29, 30 gʼaw sheˍ.) Chaw yaˇ awˉ lawˉ teˇ ca Eˍdenˍ hko hkʼaw a shaꞈ teꞈ chehˇ htaˇ tanˬ leh Yaˬhoˉvaˬ uˉ peunˍ ve kanˇ paˆ htaꞈ Saˍtanˍ chaw yaˇ htaꞈ htawˇ dawˇ nawˬ dawˇ te tcuh gaˇ ve yoˬ. Ngaˬ hui aˬ htoꞈ ma te cawˇ ve Yaˬhoˉvaˬ kʼoˆ laˇ tuˬ a hkaw˗anˬ maˇ cawˬ tehꞈ, Saˍtanˍ dawˇ tcuh laˇ gaˇ ve yoˬ. Yaꞈ hkʼaˇ, chi lehˬ awˬ tehˬ maˇ heˆ ve tehꞈ ngaˬ hui shiˍ ve yoˬ. “Ngaˬ hui ve Jawˇmawˇ Gʼuiˬ sha˗oˬ, nawˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ, leh kanˇ paˆ teˇ ceuˬ htaꞈ gʼa keunˍ ve yoˬ. Awˬ lawn kʼo, awˬ ceuˬ hkʼa peu˗eˬ htaꞈ nawˬ hpanˍ taˍ ceˍ taˍ” ve tehꞈ, kʼoˆ ve chi htaꞈ ngaˬ hui haꞈ yuˬ ve yoˬ.—Hpeuꞈ maˍ ve 4:11.

⁷ Nawˬ yaˇ ehˉ htaˇ teˇ pawˆ pawˆ nawˬ pa nawˬ e hkawˇ htaꞈ maˇ na yuˬ gaˇ ve htawˇ, yawˇ hui hkawˇ na yuˬ tuˬ maˍ laˇ ve yoˬ hehˉ. Chi hkʼa shuˍ shuˍ, teˇ pawˆ pawˆ kʼo Yaˬhoˉvaˬ hkawˇ na yuˬ tuˬ maˇ sha. Yaꞈ hkʼaˇ, ngaˬ hui Yaˬhoˉvaˬ htaꞈ haꞈ leh yawˆ yan ve pa taw, yawˇ ve hkawˇ na yuˬ tuˬ, ngaˬ hui te gʼa ve hkʼe teˇ ceuˬ le le te tuˬ yoˬ. Yeˍsuˆ  ngaˬ hui henˇ yuˬ tuˬ te maˍ laˇ ve yoˬ. Yaˬhoˉvaˬ hkawˇ na yuˬ tuˬ maˇ sha ve htawˇ, Yeˍsuˆ na yuˬ ve yoˬ. Chi htaꞈ pa taw, yawˇ Awˬ pa htaꞈ kʼoˆ piˇ ve, “ngaˬ a loˍ cawˇ ve hkʼe taˇ hpehꞈ piˇ. Nawˬ a loˍ cawˇ ve hkʼe hpehꞈ piˇ˗oˆ.”—Luˉkaꞈ 22:42; Kʼoˆ maˍ ve awˬ lawn 11 htaꞈ nyi sheˍ.

8. Ngaˬ hui htaꞈ beꞈ maˍ laˇ tuˬ, Yaˬhoˉvaˬ aˬ htoꞈ ma htaꞈ yehˇ ve le? (“ Beˆ maˍ laˇ hkawˇ htaꞈ na yuˬ˗oꞈ” awˇ ceˍ awˇ fa hkʼaw nyi sheˍ.)

⁸ Chi beuꞈ teˇ co˗e, Yaˬhoˉvaˬ ngaˬ hui htaꞈ beˆ maˍ laˇ tuˬ awˬ hkʼaˇ laiˉ hkʼaˇ yehˇ ve yoˬ. Tawˇ pa haˉ te kʼo, yawˇ ngaˬ hui htaꞈ Liꞈ hpu peꞈ laˇ ve yoˬ. Hkriꞈ yaˇ awˬ moˍ hkʼaw nyi haꞈ shaˉ paˍ kaꞈ peꞈ laˇ ve yoˬ. Ngaˬ hui yawˇ hui htaꞈ yawˆ yan ve kʼo, Yaˬhoˉvaˬ uˉ peunˍ ve kanˇ paˆ htaꞈ ngaˬ hui yawˆ yan ve yoˬ tehꞈ hpeuꞈ maw piˇ gʼa ve yoˬ. Yawˇ hui ga laˇ ve htaꞈ ngaˬ hui maˇ haꞈ yuˬ ve kʼo, Yaˬhoˉvaˬ htaꞈ maˇ haꞈ yuˬ ve hkʼa shuˍ yoˬ. Iˉsaˍreˍlaˆ chaw Moˉseˍ htaꞈ maˇ haꞈ yuˬ ve teˇ yanˇ, chi ve lehˬ kawˆ tuˬ cawˬ ve yoˬ tehꞈ Yaˬhoˉvaˬ shawˍ ve yoˬ. Iˉsaˍreˍlaˆ chaw yawˇ htaꞈ maˇ haꞈ yuˬ ve hkʼa shuˍ yoˬ tehꞈ, Gʼuiˬ sha shawˍ taˍ ve yoˬ.—Heh puiˉ hkʼaw 14:26, 27; Kʼoˆ maˍ ve awˬ lawn 12 htaꞈ nyi sheˍ.

9. Ngaˬ hui beˆ maˍ laˇ hkawˇ htaꞈ na yuˬ tuˬ, aˬ htoꞈ ma te haꞈ pehnˇ ve a yeˇ uiˍ ve le?

⁹ Kanˇ paˆ cawˬ ve chaw htaꞈ ngaˬ hui yawˆ yan ve kʼo, awˬ viˉ awˬ nyi htaꞈ haꞈ ve yoˬ tehꞈ hpeuꞈ maw piˇ ve yoˬ. Tawˇ pa haˉ te kʼo, mvuhˇ haw lonˉ laˬ htaˇ maˇ kʼoˆ, iˉ kaˆ htonˍ htaˇ maˇ kʼoˆ, awˬ kaˍ awˬ nu hpehꞈ la htaˇ maˇ kʼoˆ, shu ve a shaꞈ htaꞈ ga ponˬ piˇ tuˬ, ga piˇ ve chaw awˬ moˍ teˇ geh kanˉ te ve yoˬ. Yawˇ hui hkʼa dehꞈ te gʼa tuˬ, awˬ moˍ hkʼaw beˆ maˍ piˇ ve chaw teˇ gʼaˇ gʼa cawˬ leh teˇ gʼaˇ le le gʼa na yuˬ ve yoˬ. Yaꞈ hkʼaˇ, chaw teˇ gʼaˇ beˆ maˍ piˇ hkawˇ htaꞈ maˇ na yuˬ leh a shu yawˇ dawˇ taˍ ve htaꞈ te ve kʼo, hkʼaˬ hkʼe hpehꞈ la tuˬ le? Yawˇ daꞈ ve dawˇ hkʼaˇ cawˬ ve htawˇ maˇ na yuˬ ve kʼo, teˇ geh kanˉ te ve chaw htaꞈ shoꞈ shaꞈ tuˬ te piˇ gʼa ve yoˬ. Teˇ hpaˍ htaꞈ naˬ jaˇ tuˬ te piˇ ve yoˬ hehˉ. Chi hkʼa shuˍ shuˍ, ngaˬ hui Yaˬhoˉvaˬ leh yawˇ kanˇ paˆ piˇ ve  chaw beˆ maˍ laˇ hkawˇ htaꞈ maˇ na yuˬ ve kʼo, shu htaꞈ heuˆ la gʼa ve yoˬ. Yaꞈ hkʼaˇ, ngaˬ hui Yaˬhoˉvaˬ hkawˇ na yuˬ ve kʼo, awˬ viˉ awˬ nyi htaꞈ haꞈ leh Yaˬhoˉvaˬ gu teh taˍ ve htaꞈ yawˆ yan ve yoˬ tehꞈ, hpeuꞈ maw piˇ ve yoˬ.—1 Kawˇrenˍhtuˆ 12:14, 25, 26.

10, 11. Ngaˬ hui aˬ htoꞈ ma awˬ lawn henˇ tuˬ le?

¹⁰ Yaˬhoˉvaˬ beˆ maˍ laˇ ve teˇ ceuˬ le le ngaˬ hui awˬ pon awˬ bon cawˬ ve yoˬ. Yehˬ kʼa hkʼaw maˇ kʼoˆ, Hkriꞈ yaˇ awˬ moˍ hkʼaw maˇ kʼoˆ, mvuhˇ miˬ hpawˇ maˇ kʼoˆ, ngaˬ hui kanˇ paˆ htaꞈ yawˆ yan ve kʼo, teˇ gʼaˇ le le awˬ bon gʼa tuˬ yoˬ.—Bon maˍ ve 5:16; Roˉmaꞈ 13:4; Eˇfeˇsuꞈ 6:2, 3; Heˍbrehˇ 13:17.

¹¹ Ngaˬ hui shu htaꞈ yawˆ yan cawˇ ve yoˬ tehꞈ Yaˬhoˉvaˬ kʼoˆ laˇ ve yoˬ. Aˬ htoꞈ ma te yawˇ ngaˬ hui htaꞈ chi hkʼe te tcuh gaˇ ve le tehꞈ ngaˬ hui na gʼa ve kʼo, te sha ve yoˬ. A shaꞈ teꞈ kuiˬ 3 hpawˇ ngaˬ hui kanˇ paˆ htaꞈ hkʼaˬ hkʼe te yawˆ yan gʼa ve teˇ geh nyi sheˍ.

12. Awˬ hpawˇ kanˇ paˆ htaꞈ yawˆ yan ve kʼo, hkʼaˬ hkʼe te cawˇ ve le?

¹² Yaˬhoˉvaˬ yehˬ kʼa tanˬ shehˍ hpaˇ hpehꞈ leh yehˬ kʼa hkʼaw ve chaw teˇ gʼaˇ le le htaꞈ awˬ vuiˬ piˇ ve yoˬ. Teˇ gʼaˇ le le Yaˬhoˉvaˬ te tcuh gaˇ ve awˬ ceuˬ na gʼa ve kʼo, yehˬ kʼa gu teh taˍ laˇ ve daꞈ la leh yehˬ kʼa hkʼaw ve chaw awˬ bon gʼa tuˬ yoˬ. (1 Kawˇrenˍhtuˆ 14:33) Yaˬhoˉvaˬ awˬ hpawˇ htaꞈ yehˬ kʼa hkʼaw awˬ hoˉ te tcuh ve yoˬ. Chi kʼoˆ gaˇ ve lehˬ awˬ hpawˇ awˬ miˇ ma leh awˬ yaˇ htaꞈ nyi haꞈ shaˉ leh haꞈ pehnˇ ve hkʼaw sheh kʼai tuˬ, Yaˬhoˉvaˬ dawˇ law ve yoˬ. Awˬ hpawˇ yehˬ kʼa hkʼaw ve chaw hkʼaˬ hkʼe te haꞈ shaˉ ve, a shu yawˇ hkʼaˇ yawˇ Yaˬhoˉvaˬ htaꞈ gʼa kʼoˆ maˍ piˇ tuˬ yoˬ. Yeˍsuˆ Hkriꞈ yaˇ awˬ moˍ htaꞈ nyi haꞈ shaˉ ve hkʼa shuˍ, Hkriꞈ yaˇ hpehꞈ ve awˬ hpawˇ ha kʼaˉ puiˉ leh haꞈ pehnˇ ve hkʼaw yehˬ kʼa htaꞈ nyi haꞈ shaˉ ve yoˬ. Awˬ hpawˇ chi hkʼe te ve kʼo, yawˇ Yaˬhoˉvaˬ htaꞈ yawˆ yan ve tehꞈ, hpeuꞈ maw piˇ ve yoˬ.—Eˇfeˇsuꞈ 5:23; Kʼoˆ maˍ ve awˬ lawn 13 htaꞈ nyi sheˍ.

13. Awˬ miˇ ma kanˇ paˆ htaꞈ yawˆ yan ve kʼo, hkʼaˬ hkʼe te cawˇ ve le?

 ¹³ Hkriꞈ yaˇ hpehꞈ ve awˬ miˇ ma kaꞈ a yeˇ uiˍ ve awˬ vuiˬ cawˬ ve yoˬ. Awˬ hpawˇ yehˬ kʼa hkʼaw ve chaw awˬ pon daꞈ ve awˬ hoˉ hpehꞈ gʼa tuˬ, awˬ miˇ ma yawˇ htaꞈ ga piˇ ve yoˬ. Yawˇ awˬ hpawˇ geh teˇ geh yaˇ htaꞈ maˍ piˇ tuˬ awˬ vuiˬ cawˬ ve yoˬ. Yaˇ yawˆ yan puiˉ tuˬ, yawˇ daꞈ ve henˇ yuˬ tuˬ kaꞈ gʼa te maˍ piˇ ve yoˬ. (Tawˇ naˉ ve 1:8) Yawˇ awˬ hpawˇ htaꞈ yawˆ yan leh awˬ hpawˇ dawˇ cheˆ ve htaꞈ gʼaꞈ te ve yoˬ. Teˇ pawˆ pawˆ yawˇ awˬ hpawˇ hkʼe leˇ maˇ dawˇ ve htawˇ, yawˆ yan ve leh haꞈ pehnˇ ve hkʼaw yawˇ hkʼaˬ hkʼe dawˇ ve kʼoˆ maˍ piˇ ve yoˬ. Hkriꞈ yaˇ hpehꞈ ve yaˇ miˇ lehˬ awˬ hpawˇ Shaˉhkiˆhkanˍ ve chaw maˇ hpehꞈ ve kʼo, hpehꞈ haˍ ve yoˬ. Yaꞈ hkʼaˇ, yawˇ awˬ hpawˇ htaꞈ haꞈ leh yawˆ yan tcuhˉ taˍ ve kʼo, awˬ hpawˇ Yaˬhoˉvaˬ htaꞈ shiˍ daꞈ gaˇ leh oˉ kʼoˍ pui gaˇ la tuˬ yoˬ hehˉ.—1 Peˍtruˆ 3:1 gʼaw sheˍ.

14. Yaˇ kanˇ paˆ htaꞈ yawˆ yan ve kʼo, hkʼaˬ hkʼe te cawˇ ve le?

¹⁴ Yaˬhoˉvaˬ mehˆ gʼuˇ suhˍ yaˇ awˬ hpfuhˇ hkʼaˆ jaˇ. Awˬ pa awˬ e nyi haꞈ shaˉ piˇ leh beˆ maˍ piˇ tuˬ, yawˇ hui loˍ ve yoˬ. Yaˇ na yuˬ ve kʼo, awˬ pa awˬ e ha lehˬ ve yoˬ. A yeˇ uiˍ ve lehˬ Yaˬhoˉvaˬ htaꞈ kaꞈ yawˆ yan leh ha lehˬ tuˬ te piˇ chehˇ ve yoˬ. (Tawˇ naˉ ve 10:1) Yaˇ laiˉ gʼaˇ awˬ pa ceh tiˉ awˬ e ceh tiˉ cawˬ ve yoˬ. Chi hkʼe hpehꞈ ve kʼo, teˇ gʼaˇ le le awˬ pon haˍ jaˇ. Yaꞈ hkʼaˇ, yaˇ awˬ pa hkawˇ maˇ heˆ leh awˬ e hkawˇ htaꞈ na yuˬ leh yawˇ htaꞈ ga piˇ ve kʼo, yehˬ kʼa daꞈ la tuˬ yoˬ. Hkʼaˬ hkʼe hpehꞈ ve htawˇ maˇ kʼoˆ, yehˬ kʼa teˇ yehˬ kaꞈ biˇ ve maˇ cawˬ. Yaꞈ hkʼaˇ, yehˬ kʼa hkʼaw ve chaw Yaˬhoˉvaˬ beˆ maˍ piˇ ve htaꞈ gʼaꞈ te ve kʼo, ha lehˬ gʼa ve yoˬ. Chi lehˬ yehˬ kʼa tanˬ shehˍ hpaˇ Yaˬhoˉvaˬ htaꞈ awˬ meꞈ awˬ hponˇ te piˇ ve yoˬ.—Eˇfeˇsuꞈ 3:14, 15.

15. Ngaˬ hui Hkriꞈ yaˇ awˬ moˍ hkʼaw kanˇ paˆ htaꞈ yawˆ yan ve kʼo, hkʼaˬ hkʼe te cawˇ ve le?

¹⁵ Ngaˬ hui htaꞈ beˆ maˍ laˇ tuˬ, Yaˬhoˉvaˬ Hkriꞈ yaˇ awˬ moˍ htaꞈ yehˇ leh yawˇ Yeˍsuˆ awˬ moˍ oˇ ve htaꞈ uˉ peunˍ  tuˬ kanˇ paˆ piˇ ve yoˬ. (Kawˇlawˇsehˇ 1:18) Miˬ guiˬ hkʼoˆ chehˇ ve Gʼuiˬ sha ve chaw hui htaꞈ nyi haꞈ shaˉ tuˬ, “ka tiꞈ yeˬ leh cuˇ yiˍ cawˬ ve awˬ ceˬ” htaꞈ Yeˍsuˆ awˬ vuiˬ piˇ ve yoˬ. (Maꞈhtehˍ 24:45-47) Chi beuꞈ teˇ co˗e, “ka tiꞈ yeˬ leh cuˇ yiˍ cawˬ ve awˬ ceˬ” lehˬ Uˉ peunˍ ve Kawˍmiˍtiˍ hpehꞈ ve yoˬ. Ngaˬ hui hkʼaˬ htaˆ kaꞈ yonˍ hehnˇ tuˬ, Uˉ peunˍ ve Kawˍmiˍtiˍ ngaˬ hui loˍ ve awˬ ceuˬ awˬ yanˇ cawˇ cawˇ gu teh laˇ ve yoˬ. Nyi haꞈ shaˉ paˍ, ga piˇ shehˍ hpaˇ, toˇ nyi shehˍ hpaˇ miˬ guiˬ hkʼa peu˗eˬ hkʼoˆ Hkriꞈ yaˇ awˬ moˍ htaꞈ ga piˇ tuˬ, Uˉ peunˍ ve Kawˍmiˍtiˍ beˆ maˍ piˇ ve yoˬ. Awˬ viˉ awˬ nyi hawˉ hkʼaˆ chi teˇ hpaˍ ngaˬ hui htaꞈ nyi haꞈ shaˉ laˇ tuˬ awˬ vuiˬ cawˬ ve yoˬ. Yawˇ hui awˬ vuiˬ chi hkʼaˬ hkʼe te ve, Yaˬhoˉvaˬ htaꞈ gʼa kʼoˆ maˍ piˇ tuˬ yoˬ. Chi htaꞈ pa taw, ngaˬ hui yawˇ hui htaꞈ yawˆ yan ve kʼo, Yaˬhoˉvaˬ htaꞈ kaꞈ yawˆ yan chehˇ ve yoˬ.—1 Hteˇsaˍlawˇniˆ 5:12; Heˍbrehˇ 13:17 gʼaw sheˍ; Kʼoˆ maˍ ve awˬ lawn 14 htaꞈ nyi sheˍ.

16. Nyi haꞈ shaˉ paˍ leh ga piˇ shehˍ hpaˇ htaꞈ leuˆ yuˬ htaˇ, daꞈ kehˬ ve awˬ ha hpu ga piˇ ve tehꞈ aˬ htoꞈ ma te ngaˬ hui shiˍ gʼa ve le?

¹⁶ Hkriꞈ yaˇ awˬ moˍ ka tiꞈ yeˬ leh cawˇ daꞈ gʼa tuˬ, nyi haꞈ shaˉ paˍ leh ga piˇ shehˍ hpaˇ ga piˇ ve yoˬ. Yawˇ hui ngaˬ hui hkʼa shuˍ maˇ biˇ ve chaw hpehꞈ ve yoˬ. Hkʼe te leh, yawˇ hui htaꞈ hkʼaˬ hkʼe te leuˆ yuˬ ve le? Hawˉ hkʼaˆ chi teˇ hpaˍ te hkʼaˇ dawˇ hkʼaˇ Liꞈ hpu hkʼaw kʼoˆ taˍ ve hkʼe gʼa cawˬ ve yoˬ. (1 Tiˆmoˉseˍ 3:1-7, 12; Tiˇtuˆ 1:5-9) Yawˇ hui hkʼaˬ hkʼe ve chaw hpehꞈ cawˇ ve htaꞈ Liꞈ hpu bvuhꞈ paˍ hui kʼoˆ maˍ laˇ tuˬ, Yaˬhoˉvaˬ daꞈ kehˬ ve awˬ ha hpu htaꞈ yehˇ ve yoˬ. Chaw teˇ gʼaˇ htaꞈ leuˆ yuˬ leh nyi haꞈ shaˉ paˍ maˇ heˆ leh ga piˇ shehˍ hpaˇ ve awˬ vuiˬ piˇ tuˬ, nyi haꞈ shaˉ paˍ awˬ moˍ Yaˬhoˉvaˬ geh daꞈ kehˬ ve awˬ ha hpu lawˬ ve yoˬ. Chi htaꞈ pa taw, Hkriꞈ yaˇ awˬ moˍ htaꞈ Yeˍsuˆ leh Yaˬhoˉvaˬ sheh kʼai chehˇ ve yoˬ tehꞈ, hkʼa tawˍ lehˆ gʼa mawˬ ve yoˬ. (Tcuh yaˇ 20:28) Ngaˬ hui htaꞈ ga laˇ leh nyi haꞈ shaˉ laˇ tuˬ leuˆ teh taˍ ve hawˉ hkʼaˆ chi teˇ hpaˍ Gʼuiˬ sha geh laˬ ve laꞈ shawnˍ hpehꞈ ve yoˬ.—Eˇfeˇsuꞈ 4:8.

17. Awˬ viˉ awˬ nyi yaˇ miˇ teˇ gʼaˇ Hkriꞈ yaˇ awˬ moˍ hkʼaw kanˇ paˆ htaꞈ yawˆ yan ve kʼo, teˇ pawˆ pawˆ hkʼaˬ hkʼe gʼa te ve le?

 ¹⁷ Teˇ pawˆ pawˆ Hkriꞈ yaˇ awˬ moˍ hkʼaw ve awˬ vuiˬ te tuˬ, nyi haꞈ shaˉ paˍ leh ga piˇ shehˍ hpaˇ teˇ gʼaˇ kaꞈ maˇ cawˬ. Baˆtiˆsaˬ haꞈ yuˬ peuˬ ve hawˉ hkʼaˆ ga piˇ gʼa tuˬ yoˬ. Yaꞈ hkʼaˇ, awˬ viˉ awˬ nyi hawˉ hkʼaˆ maˇ cawˬ ve kʼo, awˬ viˉ awˬ nyi yaˇ miˇ teˇ gʼaˇ hawˉ hkʼaˆ awˬ tan gʼa te leh kanˉ teˇ ceuˬ ceuˬ gʼa te tuˬ yoˬ hehˉ. Chi hkʼe hpehꞈ ve kʼo, yawˇ oˉ kʼoˍ htaꞈ beh tuˬ hpaˉ ceꞈ maˇ heˆ leh uˉ tcuhˍ hkʼawˆ cawˇ ve yoˬ. (1 Kawˇrenˍhtuˆ 11:3-10) Chi hkʼe te ve kʼo, yawˇ yehˬ kʼa leh Hkriꞈ yaˇ awˬ moˍ hkʼaw ve kanˇ paˆ Gʼuiˬ sha gu teh taˍ ve htaꞈ yawˆ yan ve yoˬ tehꞈ, hpeuꞈ maw piˇ ve yoˬ.—Kʼoˆ maˍ ve awˬ lawn 15 htaꞈ nyi sheˍ.

18, 19. (a) Roˉmaꞈ 13:1-7 hkʼaw ngaˬ hui htaꞈ aˬ htoꞈ ma maˍ laˇ ve le? (b) Ngaˬ hui mvuhˇ miˬ hpawˇ kanˉ te ve chaw htaꞈ yawˆ yan ve kʼo, hkʼaˬ hkʼe te cawˇ ve le?

¹⁸ Chi beuꞈ teˇ co˗e, Yaˬhoˉvaˬ lehˬ chaw yaˇ teˇ hpaˍ htaꞈ uˉ peunˍ tuˬ kanˇ paˆ cawˬ tcuh ve yoˬ. Ngaˬ hui yawˇ hui htaꞈ yawˆ yan cawˇ ve yoˬ. Mvuhˇ miˬ hkʼaw leh chaw chehˇ kuiˬ lo hkʼa sha sha˗ehˬ te gʼa tuˬ, mvuhˇ miˬ yaˇ loˍ ve awˬ ceuˬ piˇ tuˬ, yawˇ hui hteˇ lehˍ shawˇ lehˍ gu ve yoˬ. Roˉmaꞈ liꞈ 13:1-7 hkʼaw kʼoˆ taˍ ve htaꞈ Hkriꞈ yaˇ hui na yuˬ ve yoˬ. (Gʼaw sheˍ.) Ngaˬ hui “uˉ peunˍ shehˍ hpaˇ” htaꞈ yawˆ yan leh mvuhˇ miˬ ve awˬ liˇ maˇ heˆ leh ngaˬ hui chehˇ kuiˬ ve awˬ liˇ htaꞈ na yuˬ ve yoˬ. Awˬ liˇ chi teˇ hpaˍ lehˬ yehˬ kʼa, kanˉ, maˇ heˆ leh ngaˬ hui hpu shi mawˇ jeˬ htaꞈ heuˆ la gʼa ve yoˬ. Tawˇ pa haˉ te kʼo, ngaˬ hui awˬ hkawnˍ keu piˇ ve, mvuhˇ miˬ uˉ peunˍ ve chaw shiˍ gaˇ ve awˬ lawn awˬ tanˇ kʼoˆ piˇ ve yoˬ. Yaꞈ hkʼaˇ, mvuhˇ miˬ hpawˇ Gʼuiˬ sha ve awˬ liˇ tawˇ hkawˇ htaꞈ yaꞈ ve awˬ ceuˬ te tcuh laˇ ve kʼo, ngaˬ hui hkʼaˬ hkʼe te cawˇ ve le? Tcuh yaˇ Peˍtruˆ kʼoˆ ve, “chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.”—Tcuh yaˇ 5:28, 29.

 ¹⁹ Teˇ pawˆ pawˆ ngaˬ hui mvuhˇ miˬ hpawˇ kanˉ te ve chaw htaꞈ gʼa caˉ daꞈ ve yoˬ. Tawˇ pa haˉ te kʼo, suhˉ jehˬ paˍ, paˍ leˆ (taˍ nuꞈ) hpehꞈ ve yoˬ. Ngaˬ hui yawˇ hui htaꞈ hkʼaˬ htaˆ kaꞈ yawˆ yan cawˇ ve yoˬ. Hkriꞈ yaˇ yaˇ ehˉ yaˇ nehˬ liꞈ henˇ yehˬ lo saˍ laꞈ leh kanˉ te ve chaw htaꞈ yawˆ yan ve yoˬ. Ngaˬ hui kanˉ te kuiˬ lo awˬ shehˍ hpaˇ htaꞈ shu maˇ yawˆ yan ve htawˇ, ngaˬ hui yawˆ yan cawˇ ve yoˬ. Ngaˬ hui chi hkʼe te ve kʼo, tcuh yaˇ Pawˇluꞈ htaꞈ henˇ yuˬ chehˇ ve yoˬ. Teˇ pawˆ pawˆ maˇ sha ve htawˇ, mvuhˇ miˬ kanˉ te ve chaw htaꞈ Pawˇluꞈ yawˆ yan ve yoˬ. (Tcuh yaˇ 26:2, 25) Shu ngaˬ hui htaꞈ maˇ daꞈ ve te laˇ ve htawˇ, ngaˬ hui yawˇ hui htaꞈ hkʼaˬ htaˆ kaꞈ yawˆ yan ve yoˬ.—Roˉmaꞈ 12:17, 18 gʼaw sheˍ; 1 Peˍtruˆ 3:15.

20, 21. Ngaˬ hui shu htaꞈ yawˆ yan ve kʼo, aˬ htoꞈ ma daꞈ ve awˬ ceuˬ hpehꞈ la tuˬ hehˉ le?

²⁰ Miˬ guiˬ hkʼa peu˗eˬ hkʼoˆ chaw yaˇ yawˆ yan daꞈ ve i kʼai yawnˇ kʼai chehˇ ve yoˬ. Yaꞈ hkʼaˇ, Yaˬhoˉvaˬ ve chaw oˇ hkʼe maˇ hpehꞈ. Ngaˬ hui coˇ caˇ leh teˇ gʼaˇ le le htaꞈ yawˆ yan ve yoˬ. Tcuh yaˇ Peˍtruˆ beˆ maˍ laˇ ve htaꞈ ngaˬ hui gʼaꞈ te ve yoˬ. Yawˇ kʼoˆ ve, “chaw hkʼa peu˗eˬ htaꞈ yawˆ yan˗o.” (1 Peˍtruˆ 2:17) Ngaˬ hui chaw te gʼaˇ htaꞈ yawˆ yan ve kʼo, yawˇ dawˇ cawˇ ve yoˬ. Yeˍsuˆ kʼoˆ ve, “nawˬ hui htawˇ awˬ gʼeuˆ ba piˇ˗oˆ. Oˇ hkʼe te ve kʼo, nawˬ hui ve daꞈ ve kanˉ htaꞈ shu gʼa mawˬ htaˇ, mvuhˇ naw ma hkʼoˆ chehˇ ve nawˬ hui ve Awˬ pa htaꞈ chiˇ uiˍ chiˇ mvuh piˇ tuˬ yoˬ.”—Maꞈhtehˍ 5:16.

²¹ Yehˬ kʼa hkʼaw, Hkriꞈ yaˇ awˬ moˍ hkʼaw, leh a shaꞈ teꞈ kuiˬ lo awˬ nu ve hpawˇ ve kanˇ paˆ htaꞈ ngaˬ hui yawˆ yan ve kʼo, ngaˬ hui daꞈ ve awˬ liˇ awˬ hkʼaˇ shu mawˬ htaˇ, Yaˬhoˉvaˬ ve awˬ lawn henˇ gaˇ ve yoˬ hehˉ. Ngaˬ hui shu htaꞈ yawˆ yan ve kʼo, Yaˬhoˉvaˬ htaꞈ kaꞈ yawˆ yan chehˇ ve yoˬ. Chi lehˬ Yaˬhoˉvaˬ htaꞈ ha lehˬ tuˬ te piˇ leh ngaˬ hui yawˇ htaꞈ haꞈ ve yoˬ tehꞈ hpeuꞈ maw piˇ ve yoˬ.