1-3. (a) Chaw laiˉ gʼaˇ yawˇ hui ve kanˉ htaꞈ hkʼaˬ hkʼe dawˇ ve le? (b) Chi teˇ lawn hkʼaw ngaˬ hui aˬ htoꞈ ma na hkawˇ htaꞈ hkʼawꞈ tuˬ le?

 Chaw yaˇ a shu yawˇ awˬ to leh yehˬ kʼa htaꞈ hu tuˬ kanˉ gʼaˇ hteꞈ te ve yoˬ. Chaw laiˉ gʼaˇ yawˇ ve kanˉ htaꞈ maˇ dawˇ cawˇ. Teˇ hpaˍ hpaˍ kʼo teˇ nyi le le kanˉ ca te tuˬ dawˇ haˍ ve yoˬ. Nawˬ chi hkʼe dawˇ ve kʼo, nawˬ kanˉ te ve awˬ hkʼaw lo hkʼaˬ hkʼe te leh ha lehˬ gʼa tuˬ le? Nawˬ hkʼaˬ hkʼe te leh kanˉ kʼawꞈ te gaˇ tuˬ le?

² Yaˬhoˉvaˬ kʼoˆ ve, “ngaˬ hui lehˬ a shu yawˇ ca gʼa ve mawˇ jeˬ htaꞈ yehˇ leh ha lehˬ ha kʼa caˇ chehˇ dawˬ chehˇ cawˇ ve yoˬ. Chi lehˬ, Gʼuiˬ sha ve laꞈ shawnˍ hpehꞈ ve yoˬ.” (Cuˇ yiˍ piˇ ve 3:13) Ngaˬ hui kanˉ te puiˉ tuˬ, Yaˬhoˉvaˬ ngaˬ hui htaꞈ hpanˍ laˇ ve yoˬ. Yawˇ ngaˬ hui htaꞈ kanˉ te leh ha lehˬ tcuh gaˇ ve yoˬ.—Cuˇ yiˍ piˇ ve 2:24; 5:18 gʼaw sheˍ.

³ Ngaˬ hui kanˉ te ve hkʼaˬ hkʼe te ha lehˬ gʼa tuˬ le? Hkriꞈ yaˇ hkʼaˬ hkʼe ve kanˉ jaw kʼai cawˇ ve le? Ngaˬ hui hkʼaˬ hkʼe te leh kanˉ leh Yaˬhoˉvaˬ htaꞈ oˉ kʼoˍ pui ve keunˍ lawꞈ cawˇ lawꞈ te gʼa tuˬ le? Ngaˬ hui te gʼa ve a yeˇ uiˍ jaˇ ve kanˉ aˬ htoꞈ ma le?

4, 5. Yaˬhoˉvaˬ kanˉ htaꞈ hkʼaˬ hkʼe dawˇ ve le?

⁴ Yaˬhoˉvaˬ kanˉ te ve htaꞈ dawˇ cawˇ jaˇ. Awˬ hkuiˉ puiˍ liꞈ 1:1 hkʼaw kʼoˆ ve, “awˬ hkuiˉ puiˍ htaˇ, Gʼuiˬ sha miˬ guiˬ leh mvuhˇ naw ma htaꞈ te hpanˍ ve yoˬ.” Miˬ guiˬ leh miˬ guiˬ hkʼoˆ cawˬ ve awˬ ceuˬ htaꞈ te hpanˍ peuˬ hkʼawꞈ nawˉ, “daꞈ jaˇ” tehꞈ Gʼuiˬ sha kʼoˆ ve yoˬ. (Awˬ hkuiˉ puiˍ 1:31)  Ngaˬ hui ve Hpanˍ shehˍ hpaˇ lehˬ yawˇ te hpanˍ taˍ ve awˬ ceuˬ htaꞈ nyi ma cawˇ ve yoˬ.—1 Tiˆmoˉseˍ 1:11.

⁵ Yaˬhoˉvaˬ kanˉ te ve maˇ jehˇ jaw. Yeˍsuˆ kʼoˆ ve, “ngaˬ Awˬ pa lehˬ chi beuꞈ hkʼa gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ.” (Yoˇhanˬ 5:17) Yaˬhoˉvaˬ te taˍ ve daꞈ ve awˬ ceuˬ ngaˬ hui hkʼa peu˗eˬ maˇ shiˍ ve htawˇ, teˇ ceuˬ ceuˬ gʼa shiˍ ve yoˬ. Gʼuiˬ sha ve mvuhˇ miˬ hkʼaw yawˇ ve Yaˇ paˍ Yeˍsuˆ Hkriꞈ geh uˉ peunˍ tuˬ ve chaw htaꞈ yawˇ leuˆ yuˬ taˍ peuˬ. (2 Kawˇrenˍhtuˆ 5:17) Chi hkʼoˆ kaꞈ, Yaˬhoˉvaˬ chaw yaˇ htaꞈ beˆ maˍ piˇ leh haꞈ shaˉ piˇ ve yoˬ. Miˬ guiˬ hkʼoˆ lo daꞈ ve awˬ lawn sha tanˇ hto toˇ chehˇ ve pa taw, chaw laiˉ lanˬ gʼaˇ Yaˬhoˉvaˬ htaꞈ shiˍ la leh miˬ guiˬ hkʼoˆ Paˍraˍdiˇsuˆ hkʼaw co co taiˍ taiˍ gʼa chehˇ tuˬ dawˇ law kuiˬ cawˬ ve yoˬ.—Yoˇhanˬ 6:44; Roˉmaꞈ 6:23.

6, 7. Yeˍsuˆ kanˉ te htaˇ, hkʼaˬ hkʼe te ve le?

⁶ Yeˍsuˆ kaꞈ yawˇ Awˬ pa hkʼa shuˍ, kanˉ te ve htaꞈ dawˇ cawˇ jaˇ. Yawˇ miˬ guiˬ hkʼoˆ maˇ yaꞈ la sheˍ htaˇ, Gʼuiˬ sha geh kanˉ te ve yoˬ. Miˬ guiˬ leh mvuhˇ naw ma hkʼoˆ cawˬ ve hkʼa peu˗eˬ Gʼuiˬ sha te hpanˍ htaˇ, yawˇ ga piˇ ve yoˬ. (Tawˇ naˉ ve 8:22-31; Kawˇlawˇsehˇ 1:15-17) Yeˍsuˆ miˬ guiˬ hkʼoˆ chehˇ htaˇ kaꞈ kanˉ gʼaˇ hteꞈ te ve yoˬ. Yawˇ yaˇ nehˬ hpehꞈ chehˇ htaˇ, laꞈ shaˉ maˉ hpawˇ ve kanˉ henˇ ve yoˬ. Kʼoˆ gaˇ ve lehˬ yawˇ yehˬ leh mawˇ yehˇ hkʼeun teˇ hpaˍ te ve yoˬ. Yeˍsuˆ yawˇ kanˉ te puiˉ ve pa taw, chaw yaˇ yawˇ htaꞈ “laꞈ shaˉ maˉ” tehꞈ kuˬ ve yoˬ.—Maˍkuˆ 6:3.

⁷ Yaꞈ hkʼaˇ, Yeˍsuˆ miˬ guiˬ hkʼoˆ chehˇ htaˇ, a yeˇ uiˍ jaˇ ve kanˉ lehˬ shu htaꞈ daꞈ ve awˬ lawn sha tanˇ hto piˇ leh Yaˬhoˉvaˬ ve awˬ lawn maˍ piˇ ve yoˬ. Yawˇ kanˉ te biˇ tuˬ awˬ yanˇ 3 hkʼawꞈ hpaˆ cawˬ leh mvuhˇ shawˉ teˇ naꞈ te leh mvuhˇ hpeuꞈ htaˇ hkʼa gaˬ gʼaˇ hteꞈ te ve yoˬ. (Luˉkaꞈ 21:37, 38; Yoˇhanˬ 3:2) Yeˍsuˆ jeꞈ meu˗e hkʼa biˇ cawˬ ve yaꞈ kʼaw laiˉ ha kiˇ loˇ juˇ kʼai leh chaw maˇ maˇ htaꞈ daꞈ ve awˬ lawn sha tanˇ hto maˍ piˇ ve yoˬ.—Luˉkaꞈ 8:1.

8, 9. Yeˍsuˆ yawˇ ve kanˉ htaꞈ aˬ htoꞈ ma te dawˇ cawˇ ve le?

 ⁸ Yeˍsuˆ lehˬ Gʼuiˬ sha ve kanˉ htaꞈ caˇ tuˬ hkʼe shawˍ ve yoˬ. Kanˉ chi te ve htaꞈ pa taw, yawˇ awˬ gʼaˇ cawˬ maˇ la ve yoˬ. Laiˉ pawˆ yawˇ laiˉ nyi kanˉ gʼaˇ hteꞈ te leh awˍ kaꞈ caˇ maˇ tanˇ. (Yoˇhanˬ 4:31-38) Yawˇ teˇ yanˇ le le Awˬ pa ve awˬ lawn shu htaꞈ maˍ piˇ ve yoˬ. Chi htaꞈ pa taw, yawˇ Yaˬhoˉvaˬ htaꞈ kʼoˆ piˇ gʼa ve, “nawˬ ngaˬ htaꞈ te tcuh laˇ ve kanˉ htaꞈ ngaˬ te peuˬ leh, chi miˬ guiˬ hkʼoˆ lo nawˬ ve awˬ meꞈ awˬ hponˇ htaꞈ ngaˬ tawˇ la piˇ lawˬ peuˬ.”—Yoˇhanˬ 17:4.

⁹ Yaˬhoˉvaˬ leh Yeˍsuˆ yawˇ huiˉ maˬ kanˉ gʼaˇ hteꞈ te leh ha lehˬ ve tehꞈ ngaˬ hui hkʼa tawˍ lehˆ mawˬ ve yoˬ. Ngaˬ hui kaꞈ Gʼuiˬ sha “hkʼa shuˍ shuˍ te” gaˇ leh “[Yeˍsuˆ] ve hkui ha awˬ hkʼaˇ suh gʼaꞈ kʼai” gaˇ ve yoˬ. (Eˇfeˇsuꞈ 5:1; 1 Peˍtruˆ 2:21) Chi htaꞈ pa taw, ngaˬ hui kanˉ gʼaˇ hteꞈ te leh aˬ htoꞈ ma kanˉ te ve maˇ kʼoˆ hkʼa dehꞈ te ve yoˬ.

10, 11. Ngaˬ hui ve kanˉ htaꞈ daꞈ ve hpawˇ dawˇ nyi puiˉ tuˬ, aˬ htoꞈ ma ga laˇ gʼa ve le?

¹⁰ Yaˬhoˉvaˬ ve chaw teˇ gʼaˇ le le a shu yawˇ awˬ to leh yehˬ kʼa htaꞈ hu tuˬ, kanˉ gʼaˇ hteꞈ te ve yoˬ. Ngaˬ hui kanˉ te htaˇ ha lehˬ gaˇ ve yoˬ. Yaꞈ hkʼaˇ, chi hkʼe te tuˬ maˇ sha ve yoˬ hehˉ. Ngaˬ hui ve kanˉ htaꞈ ngaˬ hui maˇ dawˇ cawˇ ve kʼo, hkʼaˬ hkʼe te tuˬ le?

¹¹ Daꞈ ve hpawˇ dawˇ nyi sheˍ. Ngaˬ hui ve kanˉ te kuiˬ leh awˬ yanˇ ngaˬ hui pa maˇ gʼa ve yoˬ hehˉ. Yaꞈ hkʼaˇ, ngaˬ hui ve dawˇ hkʼaˇ pa gʼa ve yoˬ. Chi hkʼe te gʼa tuˬ, Yaˬhoˉvaˬ te tcuh gaˇ ve awˬ ceuˬ htaꞈ gʼa dawˇ nawˇ ve yoˬ. Tawˇ pa haˉ te kʼo, Yaˬhoˉvaˬ yehˬ shehˍ hpaˇ htaꞈ yehˬ kʼa hkʼaw teˇ gʼaˇ le le loˍ ve hkʼe hkʼa dehꞈ nyi haꞈ shaˉ tcuh gaˇ ve yoˬ. Awˬ tehˬ kʼo, yehˬ kʼa htaꞈ maˇ hu ve chaw “maˇ yonˍ ve chaw aꞈ kehˉ haiˬ ve” tehꞈ Liꞈ hpu hkʼaw kʼoˆ taˍ ve yoˬ.  (1 Tiˆmoˉseˍ 5:8) Nawˬ yehˬ shehˍ hpaˇ hpehꞈ ve kʼo, yehˬ kʼa hu tuˬ kanˉ gʼaˇ hteꞈ te ve yoˬ hehˉ. Nawˬ ve kanˉ htaꞈ maˇ dawˇ cawˇ ve htawˇ, nawˬ yehˬ kʼa htaꞈ hu ve kʼo, Yaˬhoˉvaˬ ha lehˬ tuˬ te piˇ chehˇ ve yoˬ.

12. Kanˉ gʼaˇ hteꞈ te leh hteˇ cawˇ ve chaw hpehꞈ ve kʼo, ngaˬ hui aˬ htoꞈ ma awˬ bon gʼa ve le?

¹² Kanˉ gʼaˇ hteꞈ te leh hteˇ cawˇ ve chaw hpehꞈ piˇ sheˍ. Chi hkʼe te ve kʼo, kanˉ te ve hkʼaw ha lehˬ kuiˬ cawˬ la ve yoˬ. (Tawˇ naˉ ve 12:24; 22:29) Teˇ ceuˬ lehˬ nawˬ ve paw leˍ nawˬ htaꞈ yonˍ gʼa ve yoˬ. Kanˉ te ve chaw hteˇ cawˇ leh kanˉ te ve awˬ yanˇ leh hpu shi mawˇ jeˬ maˇ hkʼawˇ ve kʼo, paw leˍ mawˬ ve teˇ yanˇ yawˇ hui htaꞈ dawˇ cawˇ ve yoˬ. (Eˇfeˇsuꞈ 4:28) Yaꞈ hkʼaˇ, a yeˇ uiˍ ve teˇ ceuˬ lehˬ nawˬ kanˉ gʼaˇ hteꞈ te leh hteˇ cawˇ ve kʼo, Yaˬhoˉvaˬ shiˍ ve yoˬ. Nawˬ ve “shiˍ puiˉ ve nyi ma lehˬ yaꞈ kuiˬ maˇ cawˬ.” Awˬ lawn kʼo, nawˬ haꞈ ve Gʼuiˬ sha a loˍ cawˇ tuˬ te piˇ chehˇ ve yoˬ tehꞈ nawˬ shiˍ ve yoˬ.—Heˍbrehˇ 13:18; Kawˇlawˇsehˇ 3:22-24.

13. Kanˉ te kuiˬ lo nawˬ hteˇ cawˇ ve kʼo, aˬ htoꞈ ma awˬ bon cawˬ sheˍ ve le?

¹³ Kanˉ te kuiˬ lo nawˬ awˬ liˇ awˬ hkʼaˇ daꞈ ve kʼo, Yaˬhoˉvaˬ htaꞈ chiˇ mvuh tuˬ te piˇ chehˇ ve tehꞈ tawnˇ taˍ sheˍ. Chi hkʼe dawˇ ve kʼo, ngaˬ hui kanˉ te htaˇ nyi ma sha la tuˬ yoˬ. (Tiˇtuˆ 2:9, 10) Nawˬ awˬ liˇ awˬ hkʼaˇ daꞈ ve pa taw, nawˬ geh kanˉ te ve chaw Liꞈ hpu henˇ gaˇ tuˬ yoˬ hehˉ.—Tawˇ naˉ ve 27:11; 1 Peˍtruˆ 2:12 gʼaw sheˍ.

14-16. Ngaˬ hui kanˉ leuˆ yuˬ ve teˇ yanˇ, aˬ htoꞈ ma dawˇ nyi cawˇ ve le?

¹⁴ Hkriꞈ yaˇ kanˉ hkʼaˬ hkʼe ve htaꞈ te cawˇ maˇ te cawˇ ve Liꞈ hpu hkʼaw hkʼa peu˗eˬ maˇ bvuhꞈ keu taˍ. Yaꞈ hkʼaˇ, kanˉ leuˆ yuˬ tuˬ Liꞈ hpu hkʼaw awˬ liˇ awˬ hkʼaˇ cawˬ ve yoˬ. (Tawˇ naˉ ve 2:6) Ngaˬ hui Liꞈ hpu hkʼaw ve awˬ liˇ awˬ hkʼaˇ yuˬ yehˇ leh a shu yawˇ awˬ to htaꞈ na hkawˇ chi teˇ hpaˍ na nyi cawˇ ve yoˬ.

¹⁵ Ngaˬ kanˉ chi htaꞈ te ve kʼo, Yaˬhoˉvaˬ nyi ma maˇ  cawˇ ve awˬ ceuˬ ngaˬ gʼa te tuˬ hehˉ laˇ? Yaˬhoˉvaˬ canˇ ve awˬ ceuˬ ngaˬ hui gʼa henˇ laˬ peuˬ ve yoˬ. Tawˇ pa haˉ te kʼo, shu mawˇ hkʼawˇ ve leh heˍ ve chi teˇ hpaˍ yoˬ. (Tawˆ kʼai ve 20:4; Tcuh yaˇ 15:29; Eˇfeˇsuꞈ 4:28; Hpeuꞈ maˍ ve 21:8) Chi htaꞈ pa taw, Yaˬhoˉvaˬ ve awˬ liˇ awˬ hkʼaˇ htaꞈ maˇ hawˍ daꞈ ve kanˉ teˇ ceuˬ ceuˬ cawˬ ve kʼo, ngaˬ hui maˇ te.—1 Yoˇhanˬ 5:3 gʼaw sheˍ.

¹⁶ Kanˉ chi ve Yaˬhoˉvaˬ canˇ ve awˬ ceuˬ gʼa ga piˇ chehˇ ve laˇ? Tawˇ pa haˉ te kʼo, bon yehˬ htaꞈ caˉ daꞈ ve awˬ ti lo kanˉ gʼa ca te piˇ ve kʼo, nawˬ hkʼaˬ hkʼe te tuˬ le? Kanˉ oˇ ve ceh te ve maˇ yaꞈ. Yaꞈ hkʼaˇ, bon yehˬ hkʼaw maˇ heˆ heˆ maˍ ve awˬ ceuˬ htaꞈ Yaˬhoˉvaˬ canˇ ve yoˬ tehꞈ nawˬ shiˍ ve yoˬ. Chi htaꞈ pa taw, bon yehˬ hkʼaw nawˬ maˇ heˆ heˆ ve  awˬ ceuˬ htaꞈ maˇ ca maˍ ve htawˇ, Yaˬhoˉvaˬ mehˆ gʼuˇ suhˍ nawˬ kaꞈ yaꞈ ve tehꞈ nawˬ dawˇ tuˬ laˇ?—Hpeuꞈ maˍ ve 18:4.

17. Ngaˬ hui Gʼuiˬ sha a loˍ cawˇ ve htaꞈ leuˆ yuˬ gʼa tuˬ, aˬ htoꞈ ma ga laˇ gʼa ve le?

¹⁷ Gʼuiˬ sha ve awˬ liˇ awˬ hkʼaˇ htaꞈ ngaˬ hui yuˬ yehˇ ve kʼo, Heˍbrehˇ liꞈ 5:14 hkʼaw kʼoˆ taˍ ve chaw hkʼe hpehꞈ ve yoˬ. Liꞈ hpu chi teˇ tawn kʼoˆ ve, “heh ve caˇ tuˬ lehˬ chaw mawˇ teˇ hpaˍ awˬ pon yoˬ. Yawˇ hui lehˬ a shu yawˇ mawˬ ve kaˇ ve jawˬ ve awˬ ceuˬ teˇ hpaˍ htaꞈ puiˉ la tuˬ laiˉ pawˆ te jawˬ ve pa taw, daꞈ ve leh maˇ daꞈ ve htaꞈ fuiˍ daꞈ pehˬ daꞈ gʼa ve yoˬ.” Nawˬ a shu yawˇ awˬ to htaꞈ na nyi cawˇ ve, ‘ngaˬ kanˉ chi htaꞈ te ve kʼo, shu hkui htiˇ poˬ tuˬ laˇ? Kanˉ chi ve te ve kʼo, awˬ hpawˇ awˬ miˇ ma leh yaˇ htaꞈ gʼa baˬ taˉ leh awˬ baˬ mvuhˇ miˬ lo gʼa kʼai ve laˇ? Oˇ hkʼe hpehꞈ ve kʼo, yawˇ hui hkʼaˬ hkʼe kʼai tuˬ le?’

18. Ngaˬ hui Yaˬhoˉvaˬ htaꞈ oˉ kʼoˍ pui ve hkʼaˬ htaˆ kaꞈ awˉ lawˉ teh ve aˬ htoꞈ ma te haˍ ve le?

¹⁸ Ngaˬ hui “haˍ jaˇ ve awˬ yanˇ” hkʼaw chehˇ taˍ ve pa taw, Yaˬhoˉvaˬ htaꞈ oˉ kʼoˍ pui ve awˉ lawˉ teh tuˬ maˇ sha. (2 Tiˆmoˉseˍ 3:1) Kanˉ ca leh kanˉ htaꞈ haꞈ shaˉ tuˬ haˍ jaˇ tehˬ yoˬ. Ngaˬ hui yehˬ kʼa htaꞈ gʼa hu ve yoˬ. Yaꞈ hkʼaˇ, Gʼuiˬ sha htaꞈ oˉ kʼoˍ pui ve awˉ lawˉ gʼa teh ve tehꞈ ngaˬ hui kaꞈ shiˍ ve yoˬ. Ngaˬ hui a shaꞈ teꞈ kuiˬ lo hpu shi mawˇ jeˬ a yeˇ uiˍ jaˇ ve awˬ ceuˬ hpehꞈ ve maˇ heˆ. (1 Tiˆmoˉseˍ 6:9, 10) Hkʼe te leh, “hkʼaˬ ve teˇ ceuˬ a yeˇ uiˍ ve le” tehꞈ shiˍ tuˬ, leh yehˬ kʼa htaꞈ kaꞈ hu gʼa tuˬ, ngaˬ hui hkʼaˬ hkʼe gʼa te tuˬ le?—Hpiˇliˇpiˆ 1:9, 10, MGS. a

19. Ngaˬ hui kanˉ htaꞈ keunˍ lawꞈ cawˇ lawꞈ te gʼa tuˬ, Yaˬhoˉvaˬ htaꞈ gʼaˇ va ve teˇ ceuˬ hkʼaˬ hkʼe ga laˇ gʼa ve le?

 ¹⁹ Nyi ma awˬ tawˬ hkʼa gaˬ Yaˬhoˉvaˬ htaꞈ gʼaˇ va sheˍ. (Tawˇ naˉ ve 3:5, 6 gʼaw sheˍ.) Ngaˬ hui loˍ ve awˬ ceuˬ Gʼuiˬ sha shiˍ leh yawˇ ngaˬ hui htaꞈ a yeˇ te laˇ chehˇ ve tehꞈ ngaˬ hui shiˍ ve yoˬ. (Chiˇ mvuh ve 37:25; 1 Peˍtruˆ 5:7) Liꞈ hpu hkʼaw kʼoˆ ve, “hpu htaꞈ sheˉ lai ve teˇ ceuˬ nawˬ hui awˬ hkʼaw lo taˇ cawˬ piˇ. Nawˬ hui hkʼa cawˬ taˍ ve teˇ hpaˍ htaꞈ nyi hkʼaˇ suh chehˇ˗oˆ. ‘Awˬ lawn kʼo, Ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ’ tehꞈ Gʼuiˬ sha kʼoˆ taˍ ve yoˬ.” (Heˍbrehˇ 13:5) Ngaˬ hui ve yehˬ kʼa htaꞈ hu tuˬ, Yaˬhoˉvaˬ ngaˬ hui htaꞈ maˇ dawˇ hkiˉ tcuh gaˇ. Laiˉ pawˆ kʼo, yawˇ ve chaw loˍ ve hkʼe yawˇ piˇ gʼa ve tehꞈ hpeuꞈ maw laˇ ve yoˬ. (Maꞈhtehˍ 6:25-32) Ngaˬ hui hkʼaˬ hkʼe ve kanˉ te chehˇ ve maˇ kʼoˆ, ngaˬ hui hkʼaˬ htaˆ kaꞈ Liꞈ hpu henˇ ve, daꞈ ve awˬ lawn sha tanˇ hto toˇ ve, leh Hkriꞈ yaˇ geh hpawnˬ daꞈ ve yoˬ.—Maꞈhtehˍ 24:14; Heˍbrehˇ 10:24, 25.

20. Ngaˬ hui hkʼaˬ hkʼe te leh a shaꞈ teꞈ kuiˬ lo caˇ lawꞈ dawˬ lawꞈ te gʼa ve le?

²⁰ Nawˬ ve mehˆ shiˍ teˇ ceuˬ htaꞈ ceh tiˉ nyi sheˍ. (Maꞈhtehˍ 6:22, 23 gʼaw sheˍ.) Kʼoˆ gaˇ ve lehˬ Yaˬhoˉvaˬ ve kanˉ te tcuhˉ taˍ gʼa tuˬ, ngaˬ hui a shaꞈ teꞈ kuiˬ lo caˇ lawꞈ dawˬ lawꞈ gʼa te ve yoˬ. Hpu shi mawˇ jeˬ, hpehꞈ sha ve, awˬ hkʼeun awˬ suhˉ chi teˇ hpaˍ ngaˬ hui Yaˬhoˉvaˬ htaꞈ meuˆ daꞈ ve aꞈ kehˉ a yeˇ te ve kʼo, ngaˬ hui cuˇ yiˍ maˇ cawˬ ve chaw hpehꞈ la ve yoˬ. Chi htaꞈ pa taw, a yeˇ uiˍ jaˇ ve htaꞈ awˉ lawˉ teh gʼa tuˬ, ngaˬ hui htaꞈ aˬ htoꞈ ma ga laˇ gʼa ve le? Ngaˬ hui jeˬ maˇ cha tuˬ gʼa coˇ caˇ ve yoˬ. Nawˬ jeˬ cha taˍ ve cawˬ ve kʼo, jeˬ yawnˇ kʼai leh peuˬ˗e tuˬ, hkʼa dehꞈ gʼa gu teh taˍ ve yoˬ. Ngaˬ hui shaˍ tiꞈ maˇ te ve kʼo, ngaˬ hui hpu shi mawˇ jeˬ htaꞈ gʼaꞈ ca ve pa taw, awˬ gʼaˇ awˬ shaˉ leh awˬ yanˇ maˇ maˇ shonˇ kʼai tuˬ yoˬ. Ngaˬ hui Gʼuiˬ sha geh bon maˇ lawˬ gaˇ, Liꞈ hpu maˇ henˇ gaˇ, maˇ hto toˇ  gaˇ ve yoˬ hehˉ. Hpu shi mawˇ jeˬ htaꞈ pa taw, ngaˬ hui ve a shaꞈ teꞈ kuiˬ lo maˇ shoꞈ shaꞈ tcuh gaˇ. “Caˇ tuˬ dawˬ tuˬ leh veuꞈ tuˬ kʼaˇ tuˬ cawˬ ve kʼo, ngaˬ hui nyi hkʼaˇ suh tuˬ yoˬ.” (1 Tiˆmoˉseˍ 6:8) Ngaˬ hui a shaꞈ teꞈ kuiˬ lo hkʼaˬ hkʼe hpehꞈ ve htawˇ maˇ kʼoˆ, ngaˬ hui Yaˬhoˉvaˬ ve kanˉ hkʼaˬ hkʼe te leh te maˇ la tuˬ, a shu yawˇ awˬ to htaꞈ teˇ pawˆ teˇ yanˇ chaˬ nyi cawˇ ve yoˬ.

21. Te keunˍ te cawˇ ve htaꞈ aˬ htoꞈ ma te ngaˬ hui hkʼa dehꞈ dawˇ nyi cawˇ ve le?

²¹ Teˇ ceuˬ le le te keunˍ te cawˇ ve te sheˍ. Ngaˬ hui cawˬ taˍ ve awˬ yanˇ, awˬ gʼaˇ awˬ shaˉ, hpu shi mawˇ jeˬ  cuˇ yiˍ cawˬ ve hkʼaw gʼa yehˇ ve yoˬ. Ngaˬ hui shaˍ tiꞈ maˇ te ve kʼo, liꞈ henˇ ve, hpu shi gʼaꞈ ca ve, leh a yeˇ maˇ uiˍ ve awˬ nu ve awˬ ceuˬ teˇ hpaˍ htaꞈ pa taw, awˬ hpfuhˇ hkʼaˆ jaˇ ve awˬ yanˇ shonˇ kʼai tuˬ yoˬ. Yeˍsuˆ kʼoˆ ve, ‘Gʼuiˬ sha ve mvuhˇ miˬ htaꞈ awˉ lawˉ ca˗o.’ (Maꞈhtehˍ 6:33) Ngaˬ hui leuˆ yuˬ ve awˬ ceuˬ, te hkʼaˇ dawˇ hkʼaˇ, teˇ nyi le le te ve awˬ ceuˬ, dawˇ teh taˍ ve chi teˇ hpaˍ ngaˬ hui nyi ma hkʼaw hkʼaˬ ve teˇ ceuˬ a yeˇ uiˍ jaˇ ve tehꞈ hpeuꞈ maw piˇ gʼa ve yoˬ.

22, 23. (a) Hkriꞈ yaˇ awˬ pon a yeˇ uiˍ ve kanˉ aˬ htoꞈ ma le? (b) Ngaˬ hui kanˉ te ve ha lehˬ gʼa tuˬ, aˬ htoꞈ ma ga laˇ gʼa ve le?

²² Ngaˬ hui te gʼa ve a yeˇ uiˍ jaˇ ve kanˉ lehˬ Yaˬhoˉvaˬ ve kanˉ te leh daꞈ ve awˬ lawn sha tanˇ shu htaꞈ hto piˇ ve yoˬ. (Maꞈhtehˍ 24:14; 28:19, 20) Yeˍsuˆ hkʼa shuˍ, ngaˬ hui te gʼa ve hkʼe teˇ ceuˬ le le te gaˇ ve yoˬ. Chaw teˇ hpaˍ kʼo, hto toˇ ve chaw loˍ jaˇ kuiˬ lo ca ga piˇ ve yoˬ. Laiˉ gʼaˇ kʼo, awˬ kaˍ awˬ nu chaw ceuˬ htaꞈ hto maˍ piˇ gʼa tuˬ, tawˇ hkawˇ awˬ suhˉ henˇ ve yoˬ. Chi hkʼe te ve hkʼaˬ hkʼe kʼai ve te jaw ve chaw htaꞈ na piˇ sheˍ. Yawˇ hui a shaꞈ teꞈ kuiˬ lo ha lehˬ tuˬ cawˬ leh awˬ bon hkʼaˬ ma gʼa ve nawˬ htaꞈ kʼoˆ maˍ laˇ tuˬ yoˬ.—Tawˇ naˉ ve 10:22 gʼaw sheˍ.

²³ Chi beuꞈ teˇ co˗e, ngaˬ hui laiˉ gʼaˇ yehˬ kʼa hu leh loˍ ve awˬ ceuˬ gʼa tuˬ, kanˉ laiˉ naˍ riˍ gʼa te ve, maˇ heˆ leh kanˉ laiˉ ceuˬ gʼa te ve yoˬ. Yaˬhoˉvaˬ awˬ lawn chi ve htaꞈ shiˍ leh ngaˬ hui te ve awˬ ceuˬ awˬ hpfuhˇ hkʼaˆ jaˇ tehꞈ shawˍ ve yoˬ. Chi htaꞈ pa taw, ngaˬ hui teˇ gʼaˇ le le Yaˬhoˉvaˬ leh Yeˍsuˆ htaꞈ caˉ leh henˇ yuˬ sheˍ. Ngaˬ hui hkʼaˬ hkʼe ve kanˉ te ve htawˇ maˇ kʼoˆ, gʼaˇ hteꞈ te cawˇ ve yoˬ. Chi hkʼoˆ kaꞈ, Yaˬhoˉvaˬ ve kanˉ te leh Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve lehˬ a yeˇ uiˍ ve kanˉ hpehꞈ ve tehꞈ tawnˇ taˍ˗a veuˬ. Chi hkʼe te ve kʼo, ngaˬ hui awˬ teh awˬ na ha lehˬ tuˬ yoˬ.