1. Yeˍsuˆ maˇ suh sheˍ teˇ haˉ htaˇ, yawˇ aˬ htoꞈ ma dawˇ haˍ ve le?

 Yeˍsuˆ maˇ suh sheˍ teˇ haˉ htaˇ, awˬ laꞈ gʼawˇ hui htaꞈ gʼa hpaˆ daꞈ tuˬ yawˇ shiˍ ve pa taw, awˬ gʼuˇ suhˍ hpawˇ yawˇ hui hkʼaˬ hkʼe hpehꞈ la tuˬ yawˇ dawˇ haˍ ve yoˬ. Yeˍsuˆ yawˇ hui htaꞈ kʼoˆ piˇ ve, “nawˬ hui lehˬ chi miˬ guiˬ htaꞈ maˇ caˉ daꞈ.” (Yoˇhanˬ 15:19) Awˬ hkʼawꞈ nawˉ htaˇ, yawˇ Awˬ pa geh bon lawˬ leh kʼoˆ ve, “ngaˬ lehˬ chi miˬ guiˬ htaꞈ maˇ caˉ daꞈ ve hkʼe, yawˇ hui htawˇ chi miˬ guiˬ htaꞈ maˇ caˉ daꞈ.” (Yoˇhanˬ 17:15, 16) Yeˍsuˆ aˬ htoꞈ ma htaꞈ kʼoˆ gaˇ ve le?

2. Yeˍsuˆ “miˬ guiˬ” tehꞈ kʼoˆ ve lehˬ aˬ htoꞈ ma htaꞈ kʼoˆ gaˇ ve le?

² “Miˬ guiˬ” kʼoˆ ve lehˬ Gʼuiˬ sha htaꞈ maˇ shiˍ leh Saˍtanˍ uˉ peunˍ ve awˬ hawˉ lo chehˇ ve chaw htaꞈ kʼoˆ gaˇ ve yoˬ. (Yoˇhanˬ 14:30; Eˇfeˇsuꞈ 2:2; Yaˍkoˆ 4:4; 1 Yoˇhanˬ 5:19) Ngaˬ hui hkʼaˬ hkʼe te leh “chi miˬ guiˬ htaꞈ maˇ caˉ daꞈ” gʼa ve le? Chi teˇ lawn hkʼaw laiˉ hkʼaˇ chaˬ nyi tuˬ yoˬ. Gʼuiˬ sha ve mvuhˇ miˬ htaꞈ ngaˬ hui ka tiꞈ yeˬ leh chaw yaˇ ve mvuhˇ miˬ hpawˇ choˬ paˉ oˇ paˉ maˇ pawˬ. Miˬ guiˬ yaˇ dawˇ ve hkʼe maˇ gʼa dawˇ tuˬ, ngaˬ hui coˇ caˇ ve yoˬ. Ngaˬ hui keunˍ daꞈ cawˇ daꞈ ve veuꞈ kʼaˇ veuꞈ leh hpu shi mawˇ jeˬ hpawˇ keunˍ lawꞈ cawˇ lawꞈ dawˇ ve yoˬ. Chi hkʼoˆ kaꞈ, Gʼuiˬ sha ngaˬ hui htaꞈ gu teh taˍ laˇ ve “laꞈ caˉ hkʼa peu˗eˬ” htaꞈ veuꞈ deh ve yoˬ.—Kʼoˆ maˍ ve awˬ lawn 16 htaꞈ nyi sheˍ.

3. Mvuhˇ miˬ hpawˇ ve awˬ lawn htaꞈ Yeˍsuˆ hkʼaˬ hkʼe dawˇ ve le?

³ Yeˍsuˆ miˬ guiˬ hkʼoˆ chehˇ htaˇ, chaw yaˇ shoꞈ shaꞈ ve  laiˉ ceuˬ gʼa hpuˇ leh a shaꞈ teꞈ ve maˇ sha ve htaꞈ gʼa mawˬ ve yoˬ. Yawˇ yawˇ hui htaꞈ awˬ tehˬ awˬ na dawˇ haˍ leh ga piˇ gaˇ ve yoˬ. Yawˇ mvuhˇ miˬ hpawˇ sheh kʼai paˍ te gaˇ ve laˇ? Maˇ heˆ. Chaw yaˇ awˬ tehˬ awˬ na loˍ ve lehˬ Gʼuiˬ sha ve mvuhˇ miˬ yoˬ tehꞈ Yeˍsuˆ shiˍ ve yoˬ. Mvuhˇ miˬ chi ve uˉ peunˍ ve teˇ ceuˬ hpehꞈ leh Yeˍsuˆ Jawˇmawˇ te tuˬ yoˬ. Yawˇ chaw yaˇ htaꞈ hto maˍ piˇ htaˇ, Gʼuiˬ sha ve mvuhˇ miˬ a yeˇ uiˍ jaˇ ve awˬ lawn hpehꞈ ve yoˬ. (Daˍyeˍlaˆ 7:13, 14; Luˉkaꞈ 4:43; 17:20, 21) Yeˍsuˆ mvuhˇ miˬ hpawˇ htaꞈ maˇ caˉ daꞈ leh hkʼaˬ htaˆ kaꞈ choˬ paˉ oˇ paˉ maˇ pawˬ. Roˉmaꞈ jawˇ mawˇ Poˍtiˆ Piˉlaꞈ mehˆ gʼuˇ suhˍ chehˇ htaˇ Yeˍsuˆ kʼoˆ ve , “ngaˬ hkunˉ hawˉ hkanˇ te kuiˬ lehˬ chi miˬ guiˬ htaꞈ maˇ caˉ daꞈ.” (Yoˇhanˬ 18:36) Yawˇ ve awˬ laꞈ gʼawˇ kaꞈ choˬ paˉ oˇ paˉ maˇ pawˬ. Liꞈ teˇ kʼoˆ hkʼaw kʼoˆ ve, awˉ lawˉ teˇ co˗e ve Hkriꞈ yaˇ “mvuhˇ miˬ hpawˇ ve kanˉ maˇ te.” Chi beuꞈ teˇ co˗e awˬ tehˬ ve Hkriꞈ yaˇ htawˇ, yawˇ hui hkʼa shuˍ te ve yoˬ. Ngaˬ hui Gʼuiˬ sha ve mvuhˇ miˬ htaꞈ ka tiꞈ yeˬ leh miˬ guiˬ hkʼoˆ ve mvuhˇ miˬ hpawˇ htaꞈ maˇ caˉ daꞈ.—Maꞈhtehˍ 24:14.

4. Awˬ tehˬ ve Hkriꞈ yaˇ Gʼuiˬ sha ve mvuhˇ miˬ htaꞈ hkʼaˬ hkʼe te ga piˇ ve le?

⁴ Chaw teˇ gʼaˇ mvuhˇ miˬ awˬ tan te shehˍ hpaˇ hpehꞈ ve kʼo, yawˇ shu mvuhˇ miˬ hkʼaw ca chehˇ ve htawˇ, yawˇ ve mvuhˇ miˬ yaˇ awˬ pon kanˉ te ve yoˬ. Hkʼe te leh, yawˇ shu ve mvuhˇ miˬ hpawˇ maˇ caˉ daꞈ. Mvuhˇ naw ma hkʼoˆ lo Yeˍsuˆ geh teˇ geh uˉ peunˍ tuˬ dawˇ law kuiˬ cawˬ ve leuˆ yuˬ taˍ ve chaw hui lehˬ mvuhˇ miˬ awˬ tan te shehˍ hpaˇ hkʼa shuˍ hpehꞈ ve yoˬ. Hkriꞈ yaˇ leuˆ yuˬ taˍ ve chaw awˬ pon Pawˇluꞈ bvuhꞈ taˍ ve, “ngaˬ hui Hkriꞈ ve awˬ tan te shehˍ hpaˇ hpehꞈ ve yoˬ.” (2 Kawˇrenˍhtuˆ 5:20) Leuˆ yuˬ taˍ ve chaw teˇ hpaˍ lehˬ Gʼuiˬ sha ve uˉ peunˍ ve awˬ tan te shehˍ hpaˇ hpehꞈ ve yoˬ. Yawˇ hui miˬ guiˬ chi hkʼoˆ mvuhˇ miˬ hpawˇ ve awˬ lawn htaꞈ maˇ caˉ daꞈ. (Hpiˇliˇpiˆ 3:20) Chaw laiˉ lanˬ gʼaˇ Gʼuiˬ sha uˉ peunˍ ve awˬ lawn gʼa henˇ tuˬ,  leuˆ yuˬ taˍ ve chaw yawˇ hui htaꞈ ga piˇ ve yoˬ. Gʼuiˬ sha ve miˬ guiˬ awˬ suhˉ hkʼaw co co taiˍ taiˍ a shaꞈ teꞈ chehˇ tuˬ dawˇ law kuiˬ cawˬ ve “awˬ kaˍ awˬ nu yawˬ teˇ hpaˍ” lehˬ leuˆ yuˬ taˍ ve chaw htaꞈ ga piˇ ve yoˬ. Yawˇ hui htawˇ choˬ paˉ oˇ paˉ maˇ pawˬ. (Yoˇhanˬ 10:16; Maꞈhtehˍ 25:31-40) Miˬ guiˬ chi hkʼoˆ mvuhˇ miˬ hpawˇ htaꞈ caˉ daꞈ ve awˬ tehˬ ve Hkriꞈ yaˇ teˇ gʼaˇ kaꞈ maˇ cawˬ tehꞈ ngaˬ hui hkʼa tawˍ lehˆ gʼa mawˬ ve yoˬ.—Iˉsaˍyaˆ 2:2-4 gʼaw sheˍ.

5. Aˬ htoꞈ ma te Hkriꞈ yaˇ maꞈ maˇ ca bawˆ˗e ve le?

⁵ Awˬ tehˬ ve Hkriꞈ yaˇ lehˬ yonˍ hkʼaˇ hkʼa shuˍ cawˬ ve chaw htaꞈ yawˇ hui ve yehˬ kʼa hpehꞈ ve yoˬ tehꞈ shawˍ ve yoˬ. Hkʼaˬ ve teˇ mvuhˇ miˬ lo laˬ ve maˇ kʼoˆ, awˬ liˇ awˬ hkʼaˇ hkʼaˬ hkʼe cawˬ ve maˇ kʼoˆ, yawˇ hui teˇ moˍ tiˉ hpehꞈ ve yoˬ. (1 Kawˇrenˍhtuˆ 1:10) Ngaˬ hui maꞈ ca bawˆ˗e ve kʼo, yehˬ kʼa hkʼaw ve chaw, yonˍ hkʼaˇ hkʼa shuˍ cawˬ ve chaw htaꞈ bawˆ daꞈ chehˇ ve tehꞈ shuˍ ve yoˬ. Awˬ tehˬ kʼo, ngaˬ hui gʼa haꞈ daꞈ ve yoˬ tehꞈ Yeˍsuˆ kʼoˆ maˍ laˇ ve yoˬ. (Yoˇhanˬ 13:34, 35; 1 Yoˇhanˬ 3:10-12) Chi hkʼoˆ kaꞈ, canˇ  paˍ htaꞈ kaꞈ gʼa haꞈ ve yoˬ tehꞈ Yeˍsuˆ awˬ laꞈ gʼawˇ htaꞈ kʼoˆ piˇ ve yoˬ.—Maꞈhtehˍ 5:44; 26:52.

6. Yaˬhoˉvaˬ htaꞈ awˬ to chiˇ aꞈ piˇ peuˬ ve chaw mvuhˇ miˬ hpawˇ htaꞈ hkʼaˬ hkʼe dawˇ ve le?

⁶ Hkriꞈ yaˇ hkʼaˬ htaˆ kaꞈ choˬ paˉ oˇ paˉ maˇ pawˬ ve htawˇ, daꞈ ve mvuhˇ miˬ yaˇ hpehꞈ tuˬ, coˇ caˇ jaˇ ve yoˬ. Tawˇ pa haˉ te kʼo, uˉ peunˍ ve htaꞈ yawˆ yan ve pa taw, ngaˬ hui awˬ liˇ tawˇ hkawˇ htaꞈ na yuˬ leh awˬ hkawnˍ keu piˇ ve yoˬ. Yaꞈ hkʼaˇ, ‘Gʼuiˬ sha ve mawˇ ngaˬ hui Gʼuiˬ sha htaꞈ piˇ’ ve yoˬ. (Maˍkuˆ 12:17; Roˉmaꞈ 13:1-7; 1 Kawˇrenˍhtuˆ 6:19, 20) Ngaˬ hui Gʼuiˬ sha htaꞈ haꞈ ve, na yuˬ ve, oˉ kʼoˍ pui ve chi teˇ hpaˍ “Gʼuiˬ sha ve mawˇ” hpehꞈ ve yoˬ. Yaˬhoˉvaˬ hkawˇ maˇ na yuˬ tcuh laˇ ve kʼo, suh ve htaꞈ gʼa hpuˇ ve htawˇ, ngaˬ hui hkanˍ suh ve yoˬ.—Luˉkaꞈ 4:8; 10:27; Tcuh yaˇ 5:29; Roˉmaꞈ 14:8 gʼaw sheˍ.

7, 8. “Miˬ guiˬ yaˇ hui ve nyi ma” aˬ htoꞈ ma htaꞈ kʼoˆ gaˇ ve le?

⁷ Saˍtanˍ ve miˬ guiˬ htaꞈ maˇ caˉ daꞈ ve lehˬ “miˬ guiˬ yaˇ hui ve nyi ma” ngaˬ hui htaꞈ maˇ uˉ peunˍ tcuh ve htaꞈ kʼoˆ gaˇ ve yoˬ. Chi lehˬ Saˍtanˍ geh laˬ ve te hkʼaˇ dawˇ hkʼaˇ hpehꞈ leh Yaˬhoˉvaˬ ve kanˉ maˇ te ve chaw htaꞈ uˉ peunˍ ve yoˬ. Hkriꞈ yaˇ chi hkʼe ve nyi ma htaꞈ gʼa tawˍ daꞈ ve yoˬ. Pawˇluꞈ kʼoˆ taˍ ve hkʼe, “ngaˬ hui lehˬ miˬ guiˬ yaˇ hui ve nyi ma htaꞈ gʼa taˍ ve maˇ heˆ. Yaꞈ hkʼaˇ, . . . Gʼuiˬ sha lo laˬ ve awˬ ha hpu htaꞈ ngaˬ hui gʼa taˍ ve yoˬ.”—1 Kawˇrenˍhtuˆ 2:12; Eˇfeˇsuꞈ 2:2, 3; Kʼoˆ maˍ ve awˬ lawn 17 htaꞈ nyi sheˍ.

⁸ Miˬ guiˬ yaˇ hui ve nyi ma lehˬ chaw yaˇ htaꞈ a shu yawˇ awˬ to pon ceh tiˉ dawˇ nyi ve, caˆ muiˬ puiˉ ve, maˇ na yuˬ ve chaw hpehꞈ la tuˬ te piˇ ve yoˬ. Chi hkʼe ve chaw Gʼuiˬ sha hkawˇ na yuˬ tuˬ maˇ loˍ tehꞈ dawˇ ve yoˬ. Chaw yaˇ te gaˇ ve hkʼe, Saˍtanˍ te tcuh gaˇ leh heuˆ la kuiˬ kaꞈ maˇ dawˇ nyi tcuh gaˇ. “Awˬ suhˍ awˬ shaˍ a loˍ te gaˇ ve maˇ kʼoˆ, mehˆ shiˍ mawˬ leh heuˆ gaˇ ve maˇ kʼoˆ,” a shaꞈ teꞈ  kuiˬ lo a yeˇ uiˍ jaˇ ve tehꞈ, Saˍtanˍ chaw yaˇ htaꞈ yonˍ tcuh gaˇ ve yoˬ. (1 Yoˇhanˬ 2:16; 1 Tiˆmoˉseˍ 6:9, 10) Saˍtanˍ lehˬ Yaˬhoˉvaˬ kanˉ te ve chaw yaꞈ kʼai tuˬ, ngaˬ hui yawˇ hkʼa shuˍ dawˇ tuˬ, gʼaˇ hteꞈ coˇ caˇ ve yoˬ.—Yoˇhanˬ 8:44; Tcuh yaˇ 13:10; 1 Yoˇhanˬ 3:8.

9. Miˬ guiˬ yaˇ ve nyi ma ngaˬ hui htaꞈ aˬ htoꞈ ma heuˆ la kuiˬ cawˬ la gʼa ve le?

⁹ Miˬ guiˬ yaˇ ve nyi ma lehˬ shaˉ gʼawˬ chehˇ ve mvuhˇ haw hkʼa shuˍ, ngaˬ hui awˬ paˇ awˬ kui teˇ kaˬ le le cawˬ ve yoˬ. Miˬ guiˬ yaˇ ve nyi ma chi htaꞈ ngaˬ hui maˇ coˇ caˇ leh maˇ tawˍ daꞈ ve kʼo, heuˆ la kuiˬ cawˬ tuˬ yoˬ. (Tawˇ naˉ ve 4:23 gʼaw sheˍ.) Awˉ lawˉ htaˇ, heuˆ la kuiˬ teˇ ceuˬ ceuˬ htaꞈ nyi˗a kʼo, kawˆ tuˬ maˇ cawˬ ve htaꞈ shuˍ ve yoˬ hehˉ. Tawˇ pa haˉ te kʼo, Yaˬhoˉvaˬ htaꞈ oˉ kʼoˍ maˇ pui ve chaw hkʼe leˇ dawˇ ve teˇ ceuˬ yoˬ. (Tawˇ naˉ ve 13:20; 1 Kawˇrenˍhtuˆ 15:33) Maˇ heˆ leh, awˬ kʼu nyi te ve awˬ han nyi ve, Gʼuiˬ sha htaꞈ hpfuhˆ kʼai ve, enˍ daꞈ ve chi teˇ hpaˍ ngaˬ hui htaꞈ heuˆ la gʼa ve yoˬ.—Kʼoˆ maˍ ve awˬ lawn 18 htaꞈ nyi sheˍ.

10. Miˬ guiˬ yaˇ ve nyi ma htaꞈ tawˍ daꞈ tuˬ, ngaˬ hui hkʼaˬ hkʼe gʼa te cawˇ ve le?

¹⁰ Miˬ guiˬ yaˇ ve nyi ma maˇ uˉ peunˍ laˇ tuˬ ngaˬ hui hkʼaˬ hkʼe gʼa te ve le? Yaˬhoˉvaˬ awˬ paˇ lo gʼa chehˇ taˍ leh yawˇ ve cuˇ yiˍ cawˬ ve beˆ maˍ laˇ hkawˇ htaꞈ gʼa gʼaꞈ te ve yoˬ. Ngaˬ hui daꞈ kehˬ ve awˬ ha hpu hkʼaˬ htaˆ kaꞈ gʼa lawˬ leh yawˇ ve kanˉ gʼa te tcuhˉ taˍ ve yoˬ. Yaˬhoˉvaˬ lehˬ mvuhˇ naw ma miˬ naˆ ma hkʼa peu˗eˬ hkʼoˆ kanˇ paˆ uiˍ jaˇ mvuh jaˇ ve yoˬ. Miˬ guiˬ yaˇ ve nyi ma htaꞈ tawˍ daꞈ tuˬ yawˇ ga laˇ gʼa ve tehꞈ, ngaˬ hui hkʼa dehꞈ yonˍ ve yoˬ.—1 Yoˇhanˬ 4:4.

11. Miˬ guiˬ yaˇ ve nyi ma htaꞈ cawˬ ve pa taw, chaw yaˇ veuꞈ kʼaˇ hkʼaˬ hkʼe veuꞈ ve le?

¹¹ Ngaˬ hui veuꞈ kʼaˇ veuꞈ leh awˬ hkiˇ shawˍ ve kaꞈ ngaˬ hui miˬ guiˬ htaꞈ maˇ caˉ daꞈ tehꞈ hpeuꞈ maw piˇ gʼa ve yoˬ.  Shu nyi ma pfuhˇ tuˬ, pehꞈ ve tzuhˆ ve hpawˇ shu dawˇ tuˬ, shu hkawˇ maˇ na gaˇ ve nyi ma hpeuꞈ maw piˇ tuˬ, hpu cawˬ maˇ jaˇ ve hpeuꞈ maw piˇ tuˬ, miˬ guiˬ yaˇ laiˉ gʼaˇ veuꞈ kʼaˇ teˇ ceuˬ ceuˬ leuˆ leh veuꞈ ve yoˬ. Teˇ hpaˍ kʼo, a shu yawˇ awˬ to hkʼaˬ hkʼe kʼai ve a yeˇ maˇ te. Yawˇ hui maˇ nyi sha leh chaꞈ chiˆ ve veuꞈ kʼaˇ veuꞈ tuˬ leuˆ yuˬ ve yoˬ hehˉ. Ngaˬ hui dawˇ hkʼaˇ chi hkʼe ve maˇ cawˬ tcuh cawˇ ve yoˬ.

12, 13. Ngaˬ hui veuꞈ kʼaˇ htaꞈ leuˆ yuˬ htaˇ, aˬ htoꞈ ma awˬ liˇ awˬ hkʼaˇ ga laˇ gʼa ve le?

¹² Ngaˬ hui Yaˬhoˉvaˬ ve chaw hpehꞈ ve pa taw, hkʼaˬ htaˆ kaꞈ keunˍ daꞈ ve, nyi sha ve, kehˬ lehˍ ve veuꞈ kʼaˇ hkʼa  dehꞈ leuˆ yuˬ leh veuꞈ gaˇ ve yoˬ. “Gʼuiˬ sha htaꞈ yawˆ yan chehˇ ve” tehꞈ hpeuꞈ maw piˇ tuˬ, “nyi ma nuˇ nehˬ ve leh nyi ma taˍ puiˉ ve” hkʼaw veuꞈ ve yoˬ.—1 Tiˆmoˉseˍ 2:9, 10; Yuˇdaꞈ 21.

¹³ Yaˬhoˉvaˬ leh yawˇ ve chaw htaꞈ shu hkʼaˬ hkʼe dawˇ tuˬ, ngaˬ hui ve veuꞈ kʼaˇ veuꞈ ve awˬ lawn chi htaꞈ heuˆ la gʼa ve yoˬ. Ngaˬ hui te ve teˇ ceuˬ le le “Gʼuiˬ sha ve awˬ meꞈ awˬ hponˇ tawˆ la” piˇ gaˇ ve yoˬ. (1 Kawˇrenˍhtuˆ 10:31) Ngaˬ hui nyi ma nuˇ nehˬ ve kʼo, shu ve dawˇ hkʼaˇ htaꞈ yawˆ yan piˇ ve yoˬ. Chi htaꞈ pa taw, ngaˬ hui veuꞈ kʼaˇ veuꞈ ve maˇ kʼoˆ, awˬ hkiˇ shawˍ ve maˇ kʼoˆ, ngaˬ hui leuˆ yuˬ ve lehˬ shu htaꞈ heuˆ la kuiˬ cawˬ ve yoˬ tehꞈ tawnˇ taˍ cawˇ ve yoˬ.—1 Kawˇrenˍhtuˆ 4:9; 2 Kawˇrenˍhtuˆ 6:3, 4; 7:1.

14. Ngaˬ hui Hkriꞈ yaˇ ve kanˉ te htaˇ, veuꞈ kʼaˇ leuˆ yuˬ ve aˬ htoꞈ ma htaꞈ dawˇ nyi cawˇ ve le?

¹⁴ Hpawnˬ daꞈ htaˇ, hto toˇ htaˇ, ngaˬ hui hkʼaˬ hkʼe ve veuꞈ kʼaˇ veuꞈ ve le? Shu ngaˬ hui htaꞈ a yeˇ te laˇ tuˬ veuꞈ kʼaˇ veuꞈ ve laˇ? Shu yaꞈ taw tuˬ te piˇ ve laˇ? Ngaˬ hui veuꞈ kʼaˇ hkʼaˬ hkʼe veuꞈ kaꞈ ngaˬ hui a loˍ yoˬ shu htaꞈ maˇ caˉ daꞈ tehꞈ dawˇ ve laˇ? (Hpiˇliˇpiˆ 4:5; 1 Peˍtruˆ 5:6) Ngaˬ hui teˇ gʼaˇ le le nyi sha tcuh gaˇ ve yoˬ. Yaꞈ hkʼaˇ, awˬ tehˬ awˬ na daꞈ ve lehˬ Hkriꞈ yaˇ ve awˬ liˇ awˬ hkʼaˇ hpehꞈ ve yoˬ. Yaˬhoˉvaˬ ngaˬ hui htaꞈ nyi ve teˇ yanˇ, awˬ liˇ awˬ hkʼaˇ chi teˇ hpaˍ htaꞈ yawˇ mawˬ ve yoˬ. Awˬ liˇ awˬ hkʼaˇ chi teˇ hpaˍ lehˬ ngaˬ hui “awˬ hkʼaw hpawˇ” hkʼaˬ hkʼe ve chaw hpehꞈ ve hpeuꞈ maw piˇ ve yoˬ. Chi ve lehˬ “Gʼuiˬ sha mehˆ gʼuˇ suhˍ awˬ hpfuhˇ hkʼaˆ jaˇ.”—1 Peˍtruˆ 3:3, 4.

15. Ngaˬ hui veuꞈ kʼaˇ hkʼaˬ hkʼe veuꞈ cawˇ ve aˬ htoꞈ ma te Yaˬhoˉvaˬ hteˇ lehˍ maˇ kʼoˆ laˇ ve le?

¹⁵ Ngaˬ hui aˬ htoꞈ ma veuꞈ kʼaˇ veuꞈ cawˇ maˇ veuꞈ cawˇ ve Yaˬhoˉvaˬ awˬ liˇ tawˇ hkawˇ teˇ hkawˇ le le maˇ peꞈ laˇ. Yaꞈ hkʼaˇ, ngaˬ hui leuˆ yuˬ puiˉ tuˬ, yawˇ Liꞈ hpu hkʼaw awˬ liˇ awˬ hkʼaˇ peꞈ laˇ ve yoˬ. (Heˍbrehˇ 5:14) Ngaˬ hui uiˍ ve i ve awˬ lawn dawˇ cheˆ ve teˇ yanˇ, Yaˬhoˉvaˬ leh shu  htaꞈ haꞈ ve hkʼaw te ve tehꞈ yawˇ dawˇ law ve yoˬ. (Maˍkuˆ 12:30, 31 gʼaw sheˍ.) Miˬ guiˬ hkʼa peu˗eˬ hkʼoˆ Yaˬhoˉvaˬ ve chaw lehˬ chaw liˇ vaˇ liˇ leh te hkʼaˇ dawˇ hkʼaˇ maˇ shuˍ daꞈ ve pa taw, yawˇ hui veuꞈ kʼaˇ veuꞈ ve peun daꞈ ve yoˬ. Chi hkʼe te peun daꞈ ve lehˬ nyi sha leh ha lehˬ tuˬ hpehꞈ ve yoˬ.

16. Miˬ guiˬ yaˇ ve nyi ma hpu awˬ lawn leh Yeˍsuˆ maˍ ve hkʼaˬ hkʼe te peun daꞈ ve le? Ngaˬ hui a shu yawˇ awˬ to htaꞈ hkʼaˬ hkʼe te na nyi cawˇ ve le?

¹⁶ Hpu shi mawˇ jeˬ ha lehˬ tuˬ te piˇ gʼa ve tehꞈ Saˍtanˍ chaw yaˇ htaꞈ dawˇ tcuh gaˇ ve yoˬ. Yaꞈ hkʼaˇ, chi ve awˬ tehˬ maˇ heˆ tehꞈ Yaˬhoˉvaˬ ve kanˉ te ve chaw shiˍ ve yoˬ.  Ngaˬ hui Yeˍsuˆ ve tawˇ hkawˇ htaꞈ yonˍ ve yoˬ. Yawˇ kʼoˆ ve, “mawˇ jeˬ maˇ maˇ cawˬ ve pa taw chaw yaˇ a shaꞈ gʼa teꞈ ve maˇ heˆ.” (Luˉkaꞈ 12:15) Hpu lehˬ awˬ tehˬ awˬ na ha lehˬ tuˬ te laˇ maˇ gʼa. Hpu lehˬ awˬ tehˬ ve awˬ chawˇ, awˬ tehˬ awˬ na dawˇ sha gaˇ sha ve, co co taiˍ taiˍ a shaꞈ chi teˇ hpaˍ ngaˬ hui htaꞈ peꞈ laˇ maˇ gʼa. Ngaˬ hui hpu shi mawˇ jeˬ loˍ leh a shaꞈ teꞈ kuiˬ ha lehˬ gaˇ ve htawˇ, ngaˬ hui Gʼuiˬ sha htaꞈ meuˆ daꞈ leh yawˇ htaꞈ oˉ kʼoˍ pui ve teˇ ceuˬ a shaꞈ teꞈ kuiˬ lo awˬ hkuiˉ puiˍ teh ve kʼo, ha lehˬ tuˬ yoˬ tehꞈ Yeˍsuˆ maˍ laˇ ve yoˬ. (Maꞈhtehˍ 5:3; 6:22) ‘Hpu awˬ lawn miˬ guiˬ yaˇ hkʼa shuˍ ngaˬ dawˇ ve laˇ? Ngaˬ hpu awˬ lawn htaꞈ tiˉ dawˇ leh kʼoˆ ve laˇ?’ Na hkawˇ chi teˇ hpaˍ nawˬ a shu yawˇ awˬ to htaꞈ na nyi cawˇ ve yoˬ.—Luˉkaꞈ 6:45; 21:34-36; 2 Yoˇhanˬ 6.

17. Ngaˬ hui hpu awˬ lawn htaꞈ chaw yaˇ dawˇ ve hkʼe maˇ dawˇ ve kʼo, a shaꞈ teꞈ kuiˬ lo hkʼaˬ hkʼe te daꞈ la tuˬ le?

¹⁷ Ngaˬ hui Yaˬhoˉvaˬ ve kanˉ htaꞈ hkʼa dehꞈ te leh hpu awˬ lawn htaꞈ chaw yaˇ dawˇ ve hkʼe maˇ dawˇ ve kʼo, ngaˬ hui a shaꞈ teꞈ kuiˬ lo ha lehˬ tuˬ yoˬ. (Maꞈhtehˍ 11:29, 30) Ngaˬ hui nyi hkʼaˇ suh leh ha lehˬ ve hkʼa biˇ cawˬ tuˬ yoˬ. (Maꞈhtehˍ 6:31, 32; Roˉmaꞈ 15:13) Ngaˬ hui hpu shi mawˇ jeˬ hpawˇ hkʼe taw maˇ dawˇ hkiˉ. (1 Tiˆmoˉseˍ 6:9, 10 gʼaw sheˍ.) Shu htaꞈ piˇ ve kʼo, ngaˬ hui gʼa ha lehˬ tuˬ yoˬ. (Tcuh yaˇ 20:35) Chi hkʼe te ve kʼo, ngaˬ hui haꞈ ve chaw geh maˇ maˇ gʼa chehˇ tuˬ yoˬ. Chi hkʼoˆ kaꞈ, ngaˬ hui zuhꞈ mehˬ tuˬ yoˬ hehˉ.—Cuˇ yiˍ piˇ ve 5:12.

18. Saˍtanˍ coˇ caˇ leh ngaˬ hui htaꞈ aˬ htoꞈ ma te laˇ chehˇ ve le?

¹⁸ Saˍtanˍ lehˬ ngaˬ hui Yaˬhoˉvaˬ geh meuˆ daꞈ ve htaꞈ te luˬ tuˬ coˇ caˇ chehˇ ve yoˬ. Chi htaꞈ pa taw, ngaˬ hui meuˆ daꞈ ve chi htaꞈ haꞈ shaˉ taˍ tuˬ teˇ ceuˬ le le te gʼa ve hkʼe gʼa te ve yoˬ. Ngaˬ hui “haiˬ ve awˬ ha teˇ hpaˍ htaꞈ . . . gʼa tawˍ daꞈ ve yoˬ.” (Eˇfeˇsuꞈ 6:12) Saˍtanˍ leh neˇ hui ngaˬ hui htaꞈ maˇ ha lehˬ tcuh gaˇ leh co co taiˍ taiˍ a shaꞈ maˇ gʼa  tcuh gaˇ. (1 Peˍtruˆ 5:8) Kanˇ paˆ cawˬ jaˇ ve canˇ paˍ chi teˇ hpaˍ ngaˬ hui htaꞈ bawˆ daꞈ chehˇ ve yoˬ. Yaꞈ hkʼaˇ, Yaˬhoˉvaˬ ga laˇ ve pa taw, ngaˬ hui gʼaˇ tuˬ yoˬ.

19. Eˇfeˇsuꞈ liꞈ 6:14-18 hkʼaw Hkriꞈ yaˇ ve “laꞈ caˉ” aˬ htoꞈ ma cawˬ ve le?

¹⁹ Aˬ sho˗eˬ htaˇ, bawˆ daꞈ kuiˬ lo maꞈ yaˇ a shu yawˇ awˬ to htaꞈ fanˬ taˍ tuˬ laꞈ caˉ veuꞈ deh ve yoˬ. Chi hkʼa shuˍ shuˍ, ngaˬ hui teˇ gʼaˇ le le Yaˬhoˉvaˬ peꞈ laˇ ve “laꞈ caˉ” gʼa veuꞈ deh ve yoˬ. Awˬ ceuˬ chi teˇ hpaˍ ngaˬ hui htaꞈ haꞈ shaˉ laˇ tuˬ yoˬ. (Eˇfeˇsuꞈ 6:13) Awˬ lawn chi ve Eˇfeˇsuꞈ liꞈ 6:14-18 hkʼaw kʼoˆ taˍ ve, “hteˇ ve cawˇ ve teˇ ceuˬ nawˬ hui ve cawꞈ cehˍ nyi htaꞈ tsuhꞈ taˍ leh, nyi ma hteˇ ve cawˇ ve teˇ ceuˬ nyi ma pui htaꞈ htanˬ tuˬ veuꞈ deh leh, cawˇ daꞈ hawˍ daꞈ tuˬ te hpehꞈ ve ha lehˬ ve bon hkawˇ htaꞈ pa taw gu taˍ ve teˇ ceuˬ hkuiˉ nuˆ tcuhˉ ve hkʼe tcuhˉ leh huˉ taˍ˗oꞈ. Chi hkʼoˆ kaꞈ, haiˬ ve awˬ shehˍ hpaˇ teˇ gʼaˇ bawˆ laˇ ve aˬ miˍ toꞈ chehˇ ve hkʼaˆ ce teˇ hpaˍ htaꞈ tiˇ pehˍ gʼa tuˬ, htanˬ tuˬ htaꞈ pfuhˇ ve hkʼe, yonˍ ve teˇ ceuˬ htaꞈ pfuhˇ taˍ˗oꞈ. Htaiˍ hkʼawꞈ ve sho uˉ tcuhˍ htaꞈ hkʼawˆ taˍ leh, Awˬ ha hpu ve aˉ htaw htaꞈ pfuhˇ taˍ˗oꞈ. Aˉ htaw oˇ ve lehˬ Gʼuiˬ sha ve tawˇ hkawˇ hpehꞈ ve yoˬ. Hkʼaˬ htaˆ kaꞈ bon lawˬ ve leh lawˬ hkawˉ ve teˇ ceuˬ le le htaꞈ te leh, Awˬ ha hpu awˬ hkʼaw lo bon lawˬ chehˇ˗oˆ.”

20. “Laꞈ caˉ” haꞈ shaˉ laˇ tuˬ ngaˬ hui aˬ htoꞈ ma te cawˇ ve le?

²⁰ Maꞈ yaˇ teˇ gʼaˇ laꞈ caˉ teˇ ceuˬ ceuˬ yuˬ kʼai tuˬ leunˇ˗e leh yawˇ awˬ to maˇ gʼa beh taˍ ve kʼo, canˇ paˍ oˇ kaˬ lo bawˆ keu tuˬ yoˬ. “Laꞈ caˉ” ngaˬ hui htaꞈ haꞈ shaˉ laˇ tcuh gaˇ ve kʼo, laꞈ caˉ hkʼa peu˗eˬ gʼa veuꞈ deh ve yoˬ. Ngaˬ hui laꞈ caˉ hkʼa peu˗eˬ htaꞈ gʼa veuꞈ deh tcuhˉ taˍ leh daꞈ lehˍ cawˬ tuˬ gʼa nyi haꞈ shaˉ ve yoˬ. Saˍtanˍ ve miˬ guiˬ htaꞈ te luˬ piˇ leh miˬ guiˬ hkʼoˆ Saˍtanˍ leh neˇ hui htaꞈ yuˬ baˬ piˇ htaˇ hkʼa gaˬ ngaˬ hui hkʼaˬ htaˆ kaꞈ gʼa bawˆ daꞈ ve yoˬ. (Hpeuꞈ maˍ ve 12:17; 20:1-3) Chi htaꞈ pa taw, ngaˬ hui heuˆ gaˇ ve maˇ daꞈ ve awˬ ceuˬ leh a shu yawˇ ve yaꞈ kuiˬ htaꞈ bawˆ daꞈ chehˇ  ve kʼo, awˬ gʼaˇ maˇ nuˇ piˇ cawˇ ve yoˬ!—1 Kawˇrenˍhtuˆ 9:27.

21. Ngaˬ hui hkʼaˬ hkʼe te bawˆ daꞈ gʼaˇ tuˬ le?

²¹ Ngaˬ hui a shu yawˇ ve awˬ gʼaˇ htaꞈ ceh cuˇ ve kʼo, Saˍtanˍ aꞈ kehˉ awˬ gʼaˇ maˇ uiˍ. Yaꞈ hkʼaˇ, Yaˬhoˉvaˬ ga laˇ ve kʼo, ngaˬ hui Saˍtanˍ aꞈ kehˉ awˬ gʼaˇ uiˍ ve yoˬ! Ngaˬ hui hkʼaˬ htaˆ kaꞈ ka tiꞈ yeˬ tuˬ Yaˬhoˉvaˬ geh bon gʼa lawˬ ve, Liꞈ hpu gʼa henˇ ve, leh awˬ viˉ awˬ nyi geh gʼa chehˇ ve yoˬ. (Heˍbrehˇ 10:24, 25) Gʼuiˬ sha htaꞈ ka tiꞈ yeˬ leh ngaˬ hui yonˍ ve htaꞈ haꞈ shaˉ taˍ tuˬ, chi hkʼa peu˗eˬ ga laˇ gʼa ve yoˬ.

22, 23. (a) Ngaˬ hui yonˍ ve htaꞈ haꞈ shaˉ tuˬ aˬ htoꞈ ma te hkʼaˬ htaˆ kaꞈ gu hehnˇ taˍ cawˇ ve le? (b) Awˬ gʼuˇ suhˍ teˇ lawn hkʼaw ngaˬ hui aˬ htoꞈ ma awˬ lawn henˇ tuˬ le?

²² Ngaˬ hui yonˍ ve htaꞈ haꞈ shaˉ tuˬ hkʼaˬ htaˆ kaꞈ gu hehnˇ taˍ cawˇ ve yoˬ. (Yoˇhanˬ 15:19) Teˇ lawn lawn kʼo, Yaˬhoˉvaˬ ve Shaˉhkiˆhkanˍ ve chaw dawˇ hkʼaˇ lehˬ maˇ˗awˍ ve chaw dawˇ hkʼaˇ htaꞈ peun daꞈ jaˇ. (Chiˇ mvuh ve 34:2; Maꞈhtehˍ 10:32, 33) Na hkawˇ chi teˇ hpaˍ nawˬ a shu yawˇ awˬ to htaꞈ na nyi sheˍ. ‘Aˬ htoꞈ ma te ngaˬ chi hkʼe te ve ngaˬ awˬ tehˬ awˬ na shiˍ˗aˬ laˇ? Liꞈ hpu, ka tiꞈ yeˬ leh cuˇ yiˍ cawˬ ve awˬ ceˬ kʼoˆ ve awˬ ceuˬ cawˇ ve yoˬ tehꞈ ngaˬ hkʼa dehꞈ yonˍ ve laˇ? Yaˬhoˉvaˬ ve Shaˉhkiˆhkanˍ ve chaw teˇ gʼaˇ gʼa hpehꞈ ve pa taw, ngaˬ ha lehˬ˗aˬ laˇ? Ngaˬ ve yonˍ hkʼaˇ shu htaꞈ kʼoˆ maˍ piˇ gʼa˗aw laˇ?’—Maꞈhtehˍ 24:45; Yoˇhanˬ 17:17; 1 Peˍtruˆ 3:15 gʼaw sheˍ.

²³ Laiˉ pawˆ kʼo, ngaˬ hui miˬ guiˬ htaꞈ maˇ caˉ daꞈ tuˬ hkʼaˬ hkʼe te cawˇ ve hkʼa tawˍ lehˆ gʼa mawˬ ve yoˬ. Yaꞈ hkʼaˇ, teˇ pawˆ pawˆ kʼo, hkʼaˬ hkʼe te cawˇ ve hkʼa tawˍ lehˆ maˇ mawˬ. Saˍtanˍ va htaw laˇ ve laiˉ hkʼaˇ cawˬ ve yoˬ. Yawˇ yehˇ ve awˬ hkʼaˇ teˇ hkʼaˇ lehˬ pyawˍ ve awˬ ceuˬ yoˬ. Pyawˍ ve awˬ ceuˬ htaꞈ cuˇ yiˍ cawˬ ve hkʼaw hkʼaˬ hkʼe te leuˆ yuˬ gʼa tuˬ le? Awˬ gʼuˇ suhˍ teˇ lawn hkʼaw henˇ tuˬ yoˬ.