1. Yaˬhoˉvaˬ ngaˬ hui ve oˉ kʼoˍ pui ve htaꞈ haꞈ yuˬ tuˬ, ngaˬ hui hkʼaˬ hkʼe gʼa te ve le? Aˬ htoꞈ ma pa taw le?

 Yeˍsuˆ kʼoˆ ve, “awˬ tehˬ awˬ na oˉ kʼoˍ pui ve chaw teˇ hpaˍ lehˬ nyi ma awˬ hkʼaw lo Awˬ pa htaꞈ oˉ kʼoˍ gʼa pui tuˬ ve awˬ yanˇ gaˬ la chehˇ leh, chi beuꞈ kaꞈ gaˬ la peuˬ. Awˬ lawn kʼo, Awˬ pa lehˬ yawˇ htaꞈ oˉ kʼoˍ pui tuˬ oˇ hkʼe ve chaw teˇ hpaˍ htaꞈ heuˆ gaˇ ve yoˬ.” (Yoˇhanˬ 4:23; 6:44) Ngaˬ hui teˇ gʼaˇ le le ‘Jawˇmawˇ Yeˍsuˆ nyi ma cawˇ ve awˬ ceuˬ htaꞈ shiˍ la tuˬ’ te cawˇ ve yoˬ. (Eˇfeˇsuꞈ 5:10) Chi hkʼe te tuˬ maˇ sha. Yaˬhoˉvaˬ maˇ dawˇ cawˇ ve htaꞈ te tuˬ, Saˍtanˍ ngaˬ hui htaꞈ heˍ laˇ ve yoˬ.—Hpeuꞈ maˍ ve 12:9.

2. Siˉnaˆ hkʼaw awˬ paˇ lo aˬ htoꞈ ma hpehꞈ la ve kʼoˆ maˍ laˇ sheˍ.

² Saˍtanˍ ngaˬ hui htaꞈ hkʼaˬ hkʼe te heˍ laˇ ve le? Yawˇ yehˇ ve awˉ lawˉ teˇ hkʼaˇ lehˬ hkʼaˬ ve cawˇ maˇ cawˇ ve htaꞈ ngaˬ hui fuiˍ daꞈ maˇ gʼa tuˬ te laˇ ve yoˬ. Iˉsaˍreˍlaˆ chaw Siˉnaˆ hkʼaw awˬ paˇ lo deh chehˇ htaˇ hpehꞈ la ve awˬ ceuˬ htaꞈ dawˇ nyi sheˍ. Moˉseˍ hkʼaw hkʼoˆ lo taˆ˗e leh yawˇ kʼawꞈ la ve htaꞈ yawˇ hui law taˍ ve yoˬ. Yawˇ hui law maw jaˇ leh yawˇ hui awˬ pon Gʼuiˬ sha teˇ gʼaˇ te laˇ tuˬ Aˍronˍ geh lawˬ ve yoˬ. Aˍronˍ lehˬ nuˇ ehˉ htaꞈ shuˍ ve shi shaˉ hoꞈ te ve yoˬ. Yawˇ hui hti caˇ hti dawˬ ve pawehˇ te ve yoˬ. Nuˇ ehˉ htaꞈ awˬ kʼaw ji lo teh taˍ leh pawehˇ te leh oˉ kʼoˍ pui ve yoˬ. Shi shaˉ hoꞈ oˇ ve htaꞈ yawˇ hui oˉ kʼoˍ pui ve lehˬ Yaˬhoˉvaˬ htaꞈ pui chehˇ ve hkʼa shuˍ tehꞈ, yawˇ hui  dawˇ ve yoˬ. Yawˇ hui pawehˇ chi ve Yaˬhoˉvaˬ htaꞈ “oˉ kʼoˍ pui tuˬ ve awˬ nyi hpehꞈ ve” tehꞈ kʼoˆ ve htawˇ, yawˇ hui chi hkʼe te ve cawˇ ve maˇ heˆ. Awˬ lawn chi ve shaˉ hoꞈ htaꞈ oˉ kʼoˍ pui ve hkʼa shuˍ yoˬ tehꞈ, Yaˬhoˉvaˬ shawˍ taˍ ve pa taw, yawˇ hui laiˉ gʼaˇ gʼa suh˗e ve yoˬ. (Tawˆ kʼai ve 32:1-6, 10, 28) Awˬ lawn chi ve ngaˬ hui htaꞈ aˬ htoꞈ ma maˍ laˇ ve le? “Chaꞈ chiˆ ve mawˇ teˇ hpaˍ htaꞈ taˇ htawˇ.” Hkʼaˬ ve cawˇ maˇ cawˇ ve Yaˬhoˉvaˬ nawˬ htaꞈ maˍ laˇ tcuh sheˍ.—Iˉsaˍyaˆ 52:11; Yeˍsaˍkeˍlaˆ 44:23; Gaˍlaˍtiˆ 5:9.

3, 4. Te heuˇ jaˇ ve pawehˇ tawˆ la kuiˬ htaꞈ aˬ htoꞈ ma te ngaˬ hui chaˬ nyi cawˇ ve le?

³ Yeˍsuˆ miˬ guiˬ hkʼoˆ chehˇ htaˇ, daꞈ kehˬ ve oˉ kʼoˍ pui ve htaꞈ tcuh yaˇ hui te maˍ gʼa tuˬ, Yeˍsuˆ yawˇ hui htaꞈ maˍ piˇ ve yoˬ. Yawˇ suh peuˬ hkʼawꞈ nawˉ, tcuh yaˇ hui Yaˬhoˉvaˬ ve awˬ liˇ awˬ hkʼaˇ awˬ laꞈ gʼawˇ awˬ suhˉ htaꞈ hkʼaˬ htaˆ kaꞈ maˍ piˇ chehˇ ve yoˬ. Yaꞈ hkʼaˇ, tcuh yaˇ hui suh peuˬ hkʼawꞈ nawˉ, maˇ heˆ heˆ maˍ ve chaw lehˬ Hkriꞈ yaˇ awˬ moˍ hkʼaw maˇ cawˇ ve dawˇ hkʼaˇ, chaw liˇ vaˇ liˇ, leh lawˇ kiˍ yaˇ ve pawehˇ teˇ hpaˍ yuˬ yehˇ ve yoˬ. Lawˇ kiˍ yaˇ ve pawehˇ htaꞈ Hkriꞈ yaˇ nyi ma pfuhˇ tuˬ, yawˇ hui pawehˇ ve awˬ meh awˬ suhˉ pa ve yoˬ. (Tcuh yaˇ 20:29, 30; 2 Hteˇsaˍlawˇniˆ 2:7, 10; 2 Yoˇhanˬ 6, 7) Chi beuꞈ teˇ co˗e htaˇ hkʼa gaˬ, laiˉ gʼaˇ pawehˇ chi teˇ hpaˍ htaꞈ te heuˇ jaˇ leh maˇ cawˇ ve yonˍ hkʼaˇ leh neˇ htaꞈ caˉ daꞈ ve kaꞈ gʼa ga ha lehˬ piˇ chehˇ ve yoˬ. a—Hpeuꞈ maˍ ve 18:2-4, 23.

⁴ Chi beuꞈ teˇ co˗e, pawehˇ te ve leh jehˇ ve awˬ nyi htaꞈ chaw yaˇ a shaꞈ teꞈ kuiˬ lo a yeˇ uiˍ ve awˬ ceuˬ hpehꞈ ve yoˬ. Yaꞈ hkʼaˇ, pawehˇ teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve nawˬ gʼa shiˍ ve teˇ yanˇ, nawˬ ve dawˇ hkʼaˇ pa cawˇ ve tehꞈ nawˬ shiˍ ve yoˬ hehˉ. Chi hkʼe te tuˬ maˇ sha ve htawˇ,  Yaˬhoˉvaˬ nawˬ htaꞈ ga laˇ gʼa ve tehꞈ nawˬ yonˍ gʼa ve yoˬ. Te heuˇ jaˇ ve pawehˇ tawˆ la kuiˬ htaꞈ ngaˬ hui teˇ geh chaˬ nyi sheˍ. Ngaˬ hui chi hkʼe te ve kʼo, pawehˇ te ve teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve tehꞈ shiˍ la ve yoˬ.

5. Ha pa 12 maˬ 25 nyi htaˇ Yeˍsuˆ paw la ve maˇ heˆ tehꞈ aˬ htoꞈ ma shaˉ hkiˆ cawˬ ve le?

⁵ Miˬ guiˬ chi hkʼoˆ laiˉ kaˬ lo Ha pa 12 maˬ (Diˬseˇbeˬ) 25 nyi htaˇ Hkriˆsuhˍmaˆ pawehˇ te ve yoˬ. Chi ve teˇ nyi Yeˍsuˆ paw ve awˬ nyi hpehꞈ ve tehꞈ maˇ˗awˍ ve chaw dawˇ ve yoˬ. Yeˍsuˆ hkʼaˬ teˇ nyi hkʼaˬ teˇ ha pa paw ve Liꞈ hpu hkʼaw maˇ kʼoˆ taˍ laˇ. Yaꞈ hkʼaˇ, oˇ ve teˇ hkʼawꞈ ve awˬ tcuhˉ awˬ yanˇ teˇ ceuˬ ceuˬ kʼoˆ laˇ taˍ ve yoˬ. Luˉkaꞈ bvuhꞈ taˍ ve Yeˍsuˆ Behˍlehˍhehnˍ venˇ lo paw la htaˇ, “yawˬ hawˉ shehˍ hpaˇ teˇ hpaˍ lehˬ heh hkʼaw lo . . . yawˬ moˍ htaꞈ shaw chehˇ ve yoˬ.” (Luˉkaꞈ 2:8-11) Ha pa 12 maˬ htaˇ Behˍlehˍhehnˍ venˇ lo kaˆ jaˇ, mvuhˇ yeˬ laˬ jaˇ, vanˇ meu˗e kaꞈ kʼa jaˇ ve yoˬ. Chi htaꞈ pa taw, mvuhˇ hpeuꞈ htaˇ awˬ baˬ lo yawˬ hawˉ paˍ yawˬ htaꞈ maˇ shaw. Awˬ lawn chi ve ngaˬ hui htaꞈ aˬ htoꞈ ma maˍ laˇ ve le? Yeˍsuˆ paw la htaˇ awˬ tcuhˉ awˬ yanˇ daꞈ ve yoˬ. Ha pa 12 maˬ htaˇ maˇ heˆ. Liꞈ hpu leh hpehꞈ laˬ ve awˬ lawn htaꞈ nyi kʼo, Ha pa 9 maˬ leh 10 maˬ htaˇ Yeˍsuˆ paw la ve tehꞈ ngaˬ hui shiˍ gʼa ve yoˬ.

6, 7. (a) Hkriˆsuhˍmaˆ hkʼaˬ hkʼe te tanˬ cawˬ la ve le? (b) Aˬ htoꞈ ma te leh ngaˬ hui shu htaꞈ laꞈ shawnˍ piˇ ve le?

⁶ Oˇ hkʼe kʼo, Hkriˆsuhˍmaˆ hkʼaˬ hkʼe te tanˬ cawˬ la ve le? Roˉmaꞈ chaw lawˇ kiˍ yaˇ ve pawehˇ geh tanˬ te tawˆ la ve yoˬ. Pawehˇ chi ve Saˍhteuˍnaˍliˍ meh ve leh muiˬ caˇ vaˇ caˇ ve Saˍhteuˍ gʼuiˬ sha htaꞈ chiˇ aꞈ piˇ ve pawehˇ hpehꞈ ve yoˬ. Liꞈ teˇ kʼoˆ hkʼaw kʼoˆ ve, “Roˉmaꞈ chaw ve pawehˇ Saˍhteuˍnaˍliˍ lehˬ Ha pa 12 maˬ htaˇ te ve yoˬ. Hkriˆsuhˍmaˆ te kʼai tuˬ ve awˬ pon chaw liˇ vaˇ liˇ awˬ hkuiˉ puiˍ hpehꞈ ve yoˬ. Pawehˇ chi ve htaꞈ pa taw, hti caˇ hti dawˬ  ve, laꞈ shawnˍ piˇ daꞈ ve, leh ngaˇ chu taˬ tuˉ ve teˇ hpaˍ tanˬ cawˬ la ve yoˬ.” Chi hkʼoˆ kaꞈ, Paˇshaˇ ve mvuhˇ nyi gʼuiˬ sha Miˆhta paw ve awˬ nyi kaꞈ Ha pa 12 maˬ 25 nyi htaˇ te ve yoˬ.

⁷ Yaꞈ hkʼaˇ, Hkriˆsuhˍmaˆ te ve lawˇ kiˍ yaˇ geh tanˬ tawˆ la ve htaꞈ chi beuꞈ teˇ co˗e ve chaw maˇ˗awˍ ve maˇ dawˇ nyi ve yoˬ. Yawˇ hui yehˬ kʼa hkʼaw ve chaw geh teˇ geh chehˇ leh caˇ tuˬ daꞈ daꞈ caˇ leh laꞈ shawnˍ piˇ daꞈ tuˬ, Hkriˆsuhˍmaˆ  ve awˬ nyi htaꞈ ceh law taˍ ve yoˬ. Yaˬhoˉvaˬ ve kanˉ te ve chaw teˇ gʼaˇ le le lehˬ yehˬ kʼa hkʼaw ve chaw, awˬ chawˇ awˬ paˆ htaꞈ haꞈ leh daꞈ ve awˬ ceuˬ pehˬ piˇ tcuh gaˇ ve yoˬ. 2 Kawˇrenˍhtuˆ liꞈ 9:7 hkʼaw kʼoˆ taˍ ve, “ha lehˬ ha kʼa tanˇ piˇ ve chaw htaꞈ Gʼuiˬ sha haꞈ ve yoˬ.” Ngaˬ hui shu htaꞈ teˇ pawˆ teˇ yanˇ ceh ha lehˬ tuˬ te piˇ ve Yaˬhoˉvaˬ maˇ te tcuh gaˇ. Yaˬhoˉvaˬ ve kanˉ te ve chaw lehˬ laꞈ shawnˍ piˇ daꞈ tuˬ, yehˬ kʼa hkʼaw ve chaw leh awˬ chawˇ awˬ paˆ geh chehˇ tuˬ, teˇ hkʼawꞈ ma ve awˬ hkʼaw lo hkʼaˬ ve teˇ yanˇ kaꞈ te hpehꞈ ve yoˬ. Yawˇ hui kʼawꞈ hkʼawꞈ laˇ tuˬ ve htaꞈ maˇ dawˇ law. Yawˇ hui shu htaꞈ haꞈ ve pa taw, te piˇ ve yoˬ.—Luˉkaꞈ 14:12-14.

8. Cuˇ yiˍ cawˬ paˍ hui Yeˍsuˆ htaꞈ laꞈ shawnˍ piˇ htaˇ yawˇ paw la gehˇ sheˍ ve laˇ? Kʼoˆ maˍ laˇ sheˍ.

⁸ Yeˍsuˆ nuˇ hkawˆ hkʼaw paw la htaˇ cuˇ yiˍ cawˬ paˍ 3 gʼaˇ yawˇ htaꞈ laꞈ shawnˍ piˇ ve pa taw, Hkriˆsuhˍmaˆ awˬ nyi htaˇ laꞈ shawnˍ piˇ daꞈ cawˇ ve tehꞈ chaw laiˉ gʼaˇ kʼoˆ ve yoˬ. Hawˉ hkʼaˆ teˇ moˍ Yeˍsuˆ geh kʼai leh laꞈ shawnˍ piˇ ve awˬ tehˬ yoˬ. Liꞈ hpu awˬ co˗e htaˇ kaꞈ a yeˇ uiˍ ve chaw htaꞈ laꞈ shawnˍ piˇ ve teˇ ceuˬ cawˬ ve yoˬ. (1 Jawˇmawˇ 10:1, 2, 10, 13) Yaꞈ hkʼaˇ, cuˇ yiˍ cawˬ paˍ chi teˇ hpaˍ meuꞈ keu shiˍ htaꞈ nyi ve chaw hpehꞈ ve tehꞈ nawˬ shiˍ˗aˬ laˇ? Yawˇ hui mawˉ nyi paˍ hpehꞈ leh Yaˬhoˉvaˬ htaꞈ oˉ kʼoˍ maˇ pui. Chi hkʼoˆ kaꞈ, yawˇ hui Yeˍsuˆ nuˇ hkawˆ hkʼaw paw la gehˇ sheˍ htaˇ kʼai ve maˇ heˆ. Yawˇ hui kʼai htaˇ Yeˍsuˆ “yaˇ paˍ ehˉ” hpehꞈ leh aˉ hkʼaw lo chehˇ taˍ ve yoˬ.—Maꞈhtehˍ 2:1, 2, 11.

9. Liꞈ hpu hkʼaw kʼoˆ taˍ ve paw ve awˬ nyi te ve a shu le?

⁹ Yaˇ ehˉ paw la htaˇ ha lehˬ ve awˬ nyi hpehꞈ ve yoˬ. (Chiˇ mvuh ve 127:3) Yaꞈ hkʼaˇ, paw ve awˬ nyi te cawˇ ve tehꞈ kʼoˆ gaˇ ve maˇ heˆ. Awˬ lawn chi htaꞈ dawˇ nyi sheˍ. Liꞈ hpu hkʼaw paw ve awˬ nyi te ve 2 pawˆ ceh tiˉ kʼoˆ ve  yoˬ. Awˉ lawˉ teˇ pawˆ Eˇjiˇtuꞈ mvuhˇ miˬ ve Hpaˍrawˇ paw ve awˬ nyi hpehꞈ leh awˬ nu ve teˇ pawˆ kʼo hkunˉ hawˉ hkanˇ Heˍroˆ Aˍgiˇpaˆ paw ve awˬ nyi hpehꞈ ve yoˬ. (Awˬ hkuiˉ puiˍ 40:20-22; Maˍkuˆ 6:21-29 gʼaw sheˍ.) Uˉ peunˍ paˍ chi 2 gʼaˇ Yaˬhoˉvaˬ htaꞈ oˉ kʼoˍ pui ve chaw hpehꞈ ve maˇ heˆ. Awˬ tehˬ kʼo, Yaˬhoˉvaˬ htaꞈ oˉ kʼoˍ pui ve chaw paw ve awˬ nyi te ve tehꞈ Liꞈ hpu hkʼaw maˇ kʼoˆ taˍ ve yoˬ.

10. Awˉ lawˉ htaˇ ve Hkriꞈ yaˇ paw ve awˬ nyi htaꞈ hkʼaˬ hkʼe shawˍ taˍ ve le?

¹⁰ Liꞈ teˇ kʼoˆ hkʼaw kʼoˆ ve, awˉ lawˉ htaˇ ve Hkriꞈ yaˇ “chaw teˇ gʼaˇ paw ve awˬ nyi te ve lehˬ lawˇ kiˍ yaˇ ve awˬ liˇ hpehꞈ ve tehꞈ shawˍ ve yoˬ.” Awˬ liˇ chi teˇ hpaˍ maˇ heˆ heˆ ve yonˍ hkʼaˇ geh tanˬ tawˆ la ve yoˬ. Tawˇ pa haˉ te kʼo, aˬ sho˗eˬ htaˇ Heˍlaˍsaˆ chaw yonˍ ve, chaw teˇ gʼaˇ le le paw la ve teˇ yanˇ, yawˇ htaꞈ haꞈ shaˉ piˇ tuˬ neˇ oˇ kaˬ lo huˉ chehˇ ve yoˬ. Neˇ chi lehˬ oˇ ve teˇ nyi paw la ve gʼuiˬ sha htaꞈ caˉ daꞈ ve tehꞈ yawˇ hui yonˍ ve yoˬ. Lawˇ kiˍ yaˇ chi hkʼe te yonˍ ve awˬ hkʼoˆ kaꞈ paw ve awˬ nyi te ve lehˬ meuꞈ keu shiˍ nyi ve leh awˬ bon daꞈ maˇ daꞈ ve mawˉ nyi ve htaꞈ kaꞈ kʼawꞈ caˉ daꞈ sheˍ ve yoˬ.

11. Ngaˬ hui shiˍ puiˉ ve chaw hpehꞈ ve kʼo, Yaˬhoˉvaˬ hkʼaˬ hkʼe dawˇ ve le?

¹¹ Laiˉ gʼaˇ dawˇ ve, paw ve awˬ nyi daꞈ jaˇ ve awˬ nyi hpehꞈ ve pa taw, shu yawˇ htaꞈ a yeˇ te laˇ cawˇ ve yoˬ. Yaꞈ hkʼaˇ, ngaˬ hui ve yehˬ kʼa leh awˬ chawˇ awˬ paˆ htaꞈ teˇ nyi ceh tiˉ a yeˇ te piˇ cawˇ ve maˇ heˆ, teˇ hkʼawꞈ ve awˬ hkʼaw lo haꞈ daꞈ hpehꞈ ve yoˬ. Yaˬhoˉvaˬ ngaˬ hui htaꞈ nyi ma daꞈ leh shiˍ puiˉ ve chaw hpehꞈ tcuh gaˇ ve yoˬ. (Tcuh yaˇ 20:35 gʼaw sheˍ.) Ngaˬ hui a shaꞈ teꞈ chehˇ ve teˇ nyi le le Gʼuiˬ sha htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. Paw ve awˬ nyi teˇ nyi ceh tiˉ maˇ heˆ.—Chiˇ mvuh ve 8:3, 4; 36:9.

12. Hkʼaˬ hkʼe te leh suh ve awˬ nyi paw ve awˬ nyi aꞈ kehˉ daꞈ ve le?

¹² Cuˇ yiˍ piˇ ve liꞈ 7:1 hkʼaw kʼoˆ ve, “daꞈ ve awˬ meh cawˬ  ve chaw teˇ gʼaˇ lehˬ awˬ hpfuhˇ hkʼaˆ jaˇ ve naˍ manˇ hawnˉ aꞈ kehˉ daꞈ leuˉ ve yoˬ. Nawˬ suh ve awˬ nyi lehˬ nawˬ paw la ve awˬ nyi aꞈ kehˉ daꞈ leuˉ ve yoˬ.” Hkʼaˬ hkʼe te leh suh ve awˬ nyi paw ve awˬ nyi aꞈ kehˉ daꞈ ve le? Ngaˬ hui paw la htaˇ a shaꞈ teꞈ kuiˬ lo daꞈ maˇ daꞈ ve teꞈ chiˉ kaꞈ maˇ gʼa te sheˍ. Yaꞈ hkʼaˇ, ngaˬ hui “daꞈ ve awˬ meh” cawˬ tuˬ, Yaˬhoˉvaˬ ve kanˉ htaꞈ te leh shu htaꞈ daꞈ ve awˬ ceuˬ te piˇ ve kʼo, ngaˬ hui suh kʼai peuˬ ve htawˇ Yaˬhoˉvaˬ  tawnˇ taˍ ve yoˬ. (Yawˇbaˆ 14:14, 15) Yaˬhoˉvaˬ ve chaw a shu yawˇ paw ve awˬ nyi leh Yeˍsuˆ paw ve awˬ nyi maˇ te. Awˬ tehˬ kʼo, Yeˍsuˆ yawˇ suh ve htaꞈ dawˇ nawˇ˗oˆ tehꞈ kʼoˆ laˇ taˉ ve oˇ ve teˇ ceuˬ htaꞈ ceh tiˉ ngaˬ hui te ve yoˬ.—Luˉkaꞈ 22:17-20; Heˍbrehˇ 1:3, 4.

13, 14. Iˉsiˉteuˇ lehˬ aˬ htoꞈ ma htaꞈ caˉ daꞈ ve le?

¹³ Yeˍsuˆ teꞈ tu la ve htaꞈ haꞈ yuˬ tuˬ, chaw laiˉ gʼaˇ Iˉsiˉteuˇ pawehˇ te ve yoˬ. Yaꞈ hkʼaˇ, awˬ tehˬ kʼo Iˉsiˉteuˇ te ve leh Uˉsuhˬteuˍ htaꞈ caˉ daꞈ ve yoˬ. Chi lehˬ Eh˗goˍ˗Sehˆsaw lawˇ kiˍ yaˇ suhˆ caˍ caˍ ve gʼuiˬ sha ve awˬ meh hpehꞈ ve yoˬ. Liꞈ teˇ kʼoˆ hkʼaw kʼoˆ ve yawˇ lehˬ yaˇ maˇ maˇ cawˬ la tuˬ awˬ bon naꞈ piˇ ve gʼuiˬ sha hpehꞈ ve yoˬ. Iˉsiˉteuˇ te ve awˬ liˇ teˇ hpaˍ chi ve htaꞈ caˉ daꞈ ve yoˬ. Tawˇ pa haˉ te kʼo, liꞈ teˇ kʼoˆ hkʼaw kʼoˆ ve gʼaˆ u lehˬ “a shaꞈ awˬ suhˉ leh kʼawꞈ teꞈ tu la ve awˬ heˆ hpehꞈ ve yoˬ.” Chi hkʼoˆ kaꞈ, lawˇ kiˍ yaˇ oˉ kʼoˍ pui ve awˬ hkʼaw lo pa taiˇ lehˬ yaˇ paw puiˉ jaˇ ve awˬ heˆ hpehꞈ ve yoˬ tehꞈ yonˍ laˬ ve maw jaˇ peuˬ. Iˉsiˉteuˇ lehˬ Yeˍsuˆ kʼawꞈ teꞈ tu la ve htaꞈ maˇ caˉ daꞈ tehꞈ ngaˬ hui hkʼa tawˍ lehˆ gʼa mawˬ ve yoˬ.

¹⁴ Chaw yaˇ maˇ heˆ heˆ ve bon liˇ ve awˬ liˇ htaꞈ yuˬ leh Yaˬhoˉvaˬ yaˇ paˍ kʼawꞈ teꞈ tu la ve awˬ nyi htaꞈ pawnˇ daꞈ la ve yawˇ nyi hkʼaˇ suh ve laˇ? Yawˇ nyi hkʼaˇ maˇ suh taˬ. (2 Kawˇrenˍhtuˆ 6:17, 18) Awˬ tehˬ kʼo, Yaˬhoˉvaˬ ngaˬ hui htaꞈ Yeˍsuˆ kʼawꞈ teꞈ tu ve htaꞈ te˗o tehꞈ maˇ kʼoˆ laˇ jaw.

15. Haˬlaˬviˇ lehˬ hkʼaˬ hkʼe te tanˬ tawˆ la ve le?

¹⁵ Haˬlaˬviˇ lehˬ mawˉ nyi ma, maˇ mawˬ jaw ve to nuˇ to shaˆ, leh neˇ htaꞈ caˉ daꞈ ve yoˬ. Pawehˇ chi ve awˬ suhˉ hpehꞈ ve maˇ heˆ. Ha pa tawˍ ve teˇ nyi Ha pa 11 maˬ (Noˬveˇbaˬ) 1 nyi maˇ gaˬ sheˍ htaˇ, aˬ sho˗eˬ htaˇ Eˍgaˍlanˍ leh Aiˆsuh˗lehˇ mvuhˇ miˬ hkʼaw Hkehˇ˗oˆ chaw ceuˬ awˬ liˇ  Sa˗vin te ve yoˬ. Awˬ yanˇ chi ve hkʼaw awˬ ha ku miˬ guiˬ hkʼoˆ kʼawꞈ la ve tehꞈ yawˇ hui yonˍ ve yoˬ. Yawˇ hui htaꞈ awˬ ha ku maˇ gʼa yaꞈ la tuˬ, caˇ tuˬ dawˬ tuˬ awˬ baˬ hpawˇ lo ca yuˬ teh ve yoˬ. Chi beuꞈ teˇ co˗e, yaˇ ehˉ teˇ hpaˍ laiˉ ceuˬ veuꞈ kʼaˇ veuꞈ leh teˇ yehˬ peuˬ teˇ yehˬ kʼai leh hkaoˍ monˇ lawˬ ve yoˬ. Yawˇ hui neˇ htaꞈ caˉ daꞈ ve aˬ sho˗eˬ htaˇ ve awˬ liˇ te chehˇ ve tehꞈ yawˇ hui maˇ shiˍ.

16, 17. Ngaˬ hui hkehˉ caˇ tuˬ gu hehnˇ ve kʼo, aˬ htoꞈ ma htaꞈ dawˇ nyi cawˇ ve le?

¹⁶ Heuˆ daꞈ htaˇ ha lehˬ ve awˬ yanˇ hpehꞈ ve yoˬ. Miˬ guiˬ chi hkʼoˆ lo hkehˉ caˇ ve awˬ hkʼaˇ peun daꞈ ve yoˬ. Maˇ˗awˍ ve chaw hkehˉ caˇ ve awˬ liˇ hkʼaˬ kaˬ lo laˬ ve maˇ dawˇ nyi. Chi htaꞈ pa taw, hkehˉ caˇ ve awˬ liˇ teˇ hpaˍ hpaˍ lawˇ kiˍ yaˇ geh laˬ ve tehꞈ yawˇ hui maˇ shiˍ. Yaꞈ hkʼaˇ, Hkriꞈ yaˇ hkehˉ caˇ tuˬ gu hehnˇ ve teˇ yanˇ, yawˇ hui Yaˬhoˉvaˬ a loˍ cawˇ tuˬ te gaˇ ve yoˬ. Hkehˉ caˇ ve awˬ liˇ oˇ ve hkʼaˬ hkʼe te tanˬ cawˬ la ve htaꞈ shiˍ ve kʼo, yawˇ hui cawˇ ve hkʼaw dawˇ cheˆ gʼa tuˬ yoˬ.—Maˍkuˆ 10:6-9.

¹⁷ Hkehˉ caˇ ve awˬ liˇ heuˆ daꞈ ve chaw awˬ pon ‘awˬ bon daꞈ ve’ hpehꞈ ve tehꞈ chaw teˇ hpaˍ yonˍ ve yoˬ. (Iˉsaˍyaˆ 65:11) Tawˇ pa haˉ te kʼo, teˇ kaˬ kaˬ kʼo yawˇ hui chaw haˉ yaˇ miˇ haˉ awˬ to htaꞈ suhˉ veˆ maˇ heˆ leh teˇ ceuˬ ceuˬ hkaˆ pfuhˍ piˇ ve yoˬ. Chi hkʼe te ve lehˬ heuˆ daꞈ ve chaw yaˇ cawˬ tuˬ, ha lehˬ dawˇ sha tuˬ, co zuhˬ ha zuhˬ cawˬ tuˬ, neˇ haꞈ shaˉ piˇ ve tehꞈ yawˇ hui yonˍ ve yoˬ. Yaꞈ hkʼaˇ, Hkriꞈ yaˇ lehˬ maˇ heˆ heˆ ve bon liˇ htaꞈ caˉ daꞈ ve awˬ liˇ htaꞈ shaˍ tiꞈ te leh jaw kʼai ve yoˬ.—2 Kawˇrenˍhtuˆ 6:14-18 gʼaw sheˍ.

18. Hkehˉ caˇ tuˬ gu hehnˇ htaˇ, Liꞈ hpu hkʼaw ve awˬ liˇ awˬ hkʼaˇ yehˇ gʼa ve aˬ htoꞈ ma cawˬ ve le?

¹⁸ Hkriꞈ yaˇ heuˆ daꞈ ve teˇ nyi htaˇ, awˬ meꞈ awˬ hponˇ leh ha lehˬ ve hkʼa biˇ cawˬ tcuh gaˇ ve yoˬ. Yawˇ hui hkehˉ caˇ la ve chaw hui htaꞈ ha lehˬ tcuh gaˇ ve yoˬ. Hkriꞈ yaˇ heuˆ  daꞈ ve hkʼaw laˬ ve hkehˉ chaw lehˬ maˇ ha kʼaˉ puiˉ ve tawˇ, chaꞈ chiˆ ve baˇ daꞈ gʼuiˬ daꞈ ve tawˇ, chaw haˉ yaˇ miˇ haˉ leh shu htaꞈ maˇ yawˆ yan ve tawˇ maˇ yaw ve yoˬ. (Tawˇ naˉ ve 26:18, 19; Luˉkaꞈ 6:31; 10:27) Hkriꞈ yaˇ heuˆ daꞈ ve hkʼaw “hpu shi mawˇ jeˬ” cawˬ maˇ ve tehꞈ maˇ te tawˆ cawˇ ve yoˬ. (1 Yoˇhanˬ 2:16) Nawˬ hkehˉ caˇ tuˬ gu hehnˇ htaˇ awˬ lawn chi teˇ hpaˍ htaꞈ tawnˇ taˍ ve kʼo, heuˆ daꞈ ve awˬ nyi htaꞈ kʼawꞈ dawˇ nyi ve teˇ yanˇ, nawˬ nyi ma maˇ luˬ ve yoˬ.—Kʼoˆ maˍ ve awˬ lawn 28 htaꞈ nyi sheˍ.

19, 20. Laˬ hkehˇ chiˇ guˆ daꞈ ve hkʼaˬ hkʼe tanˬ te tawˆ la ve le?

¹⁹ Laiˉ pawˆ kʼo, hkehˉ caˇ kuiˬ lo laˬ hkehˇ chiˇ guˆ daꞈ ve teˇ ceuˬ cawˬ ve yoˬ. Teˇ gʼaˇ lehˬ chaw haˉ yaˇ miˇ haˉ htaꞈ awˬ bon naꞈ piˇ leh awˬ nu ve chaw yawˇ hui ve laˬ hkehˇ chiˇ taˆ ve yoˬ. Hkriꞈ yaˇ hui laˬ hkehˇ chiˇ guˆ daꞈ ve htaꞈ hkʼaˬ hkʼe shawˍ cawˇ ve le?

²⁰ Tzuhˬ leh chaw liˇ vaˇ liˇ ve awˬ lawn hpfuhˆ nyi kuiˬ liꞈ teˇ kʼoˆ hkʼaw kʼoˆ ve, laˬ hkehˇ chiˇ guˆ daꞈ ve lehˬ aˬ sho˗eˬ htaˇ lawˇ kiˍ yaˇ “yawˇ hui ve gʼuiˬ sha teˇ hpaˍ htaꞈ daꞈ kehˬ ve dawˬ tuˬ tanˇ piˇ ve yoˬ.” Yawˇ hui “awˬ bon naꞈ piˇ gaˇ leh bon lawˬ hpehˇ htaˇ kʼoˆ ve ‘co zuhˬ ha zuhˬ cawˬ piˇ˗oˆ!’ maˇ heˆ leh ‘chehˇ sha cawˬ sha piˇ˗oˆ!’ tehꞈ kʼoˆ piˇ gaˇ ve pa taw, chi hkʼe te ve yoˬ.” Aˬ sho˗eˬ htaˇ, chaw yaˇ yawˇ hui ve gʼuiˬ sha awˬ bon naꞈ laˇ tuˬ laˬ hkehˇ chiˇ taˆ ve yoˬ. Yaꞈ hkʼaˇ, chi hkʼe te ve Yaˬhoˉvaˬ ngaˬ hui htaꞈ awˬ bon naꞈ laˇ tuˬ ve maˇ heˆ.—Yoˇhanˬ 14:6; 16:23.

21. Hkriꞈ yaˇ hkʼaˬ hkʼe ve pawehˇ htaꞈ jaw kʼai cawˇ ve le?

²¹ Nawˬ pawehˇ teˇ ceuˬ ceuˬ te tuˬ dawˇ cheˆ htaˇ, pawehˇ oˇ ve te hkʼaˇ dawˇ hkʼaˇ hkʼaˬ hkʼe ve htaꞈ caˉ daꞈ ve le tehꞈ hkʼa dehꞈ gʼa dawˇ nyi ve yoˬ. Tawˇ pa haˉ te kʼo, pawehˇ teˇ  ceuˬ ceuˬ te ve hkʼaw pehꞈ ve tzuhˆ ve pawehˇ te ve, dawˬ ponˬ dawˬ leuˉ ve, haˉ chawˇ haˉ paˆ te ve chi teˇ hpaˍ cawˬ ve yoˬ. Awˬ kaˍ awˬ nu ve pawehˇ te ve lehˬ hawˉ hkʼaˆ chawˇ hawˉ hkʼaˆ, yaˇ miˇ chawˇ yaˇ miˇ, leh a shu yawˇ ve chaw ceuˬ htaꞈ haꞈ tuˬ awˬ gʼaˇ piˇ ve cawˬ ve yoˬ hehˉ. Ngaˬ hui oˇ hkʼe ve pawehˇ htaꞈ te chehˇ ve kʼo, Yaˬhoˉvaˬ canˇ ve awˬ ceuˬ htaꞈ awˬ tehˬ awˬ na canˇ chehˇ˗aw laˇ?—Chiˇ mvuh ve 1:1, 2; 97:10; 119:37.

22. Hkriꞈ yaˇ pawehˇ te tuˬ maˇ te tuˬ aˬ htoꞈ ma ga piˇ gʼa ve le?

²² Gʼuiˬ sha htaꞈ maˇ yawˆ yan ve pawehˇ te ve teˇ hpaˍ Hkriꞈ yaˇ shaˍ tiꞈ gʼa te leh gʼa jaw kʼai ve yoˬ. Tcuh yaˇ Pawˇluꞈ kʼoˆ ve, “nawˬ hui caˇ ve maˇ kʼoˆ, dawˬ ve maˇ kʼoˆ, aˬ htoꞈ ma teˇ ceuˬ te ve maˇ kʼoˆ, hkʼa peu˗eˬ awˬ hkʼaw lo Gʼuiˬ sha ve awˬ meꞈ awˬ hponˇ tawˆ la tuˬ te˗o.” (1 Kawˇrenˍhtuˆ 10:31; Kʼoˆ maˍ ve awˬ lawn 29 htaꞈ nyi sheˍ.) Pawehˇ hkʼa peu˗eˬ pehꞈ ve tzuhˆ ve, maˇ heˆ heˆ ve bon liˇ, a shu yawˇ ve chaw ceuˬ haꞈ ve htaꞈ caˉ daꞈ ve maˇ heˆ. Pawehˇ oˇ ve te ve Liꞈ hpu hkʼaw ve awˬ liˇ awˬ hkʼaˇ htaꞈ maˇ yaꞈ ve kʼo, ngaˬ hui te tuˬ maˇ te tuˬ a shu yawˇ hkʼaˇ yawˇ gʼa dawˇ cheˆ ve yoˬ. Ngaˬ hui dawˇ cheˆ ve shu htaꞈ hkʼaˬ hkʼe heuˆ la gʼa ve kaꞈ gʼa dawˇ nyi ve yoˬ.

23, 24. Ngaˬ hui pawehˇ teˇ hpaˍ htaꞈ maˇ te˗o tehꞈ dawˇ cheˆ ve teˇ yanˇ, yehˬ kʼa hkʼaw ve chaw htaꞈ hkʼaˬ hkʼe kʼoˆ maˍ piˇ gʼa tuˬ le?

²³ Yaˬhoˉvaˬ htaꞈ maˇ yawˆ yan ve pawehˇ teˇ hpaˍ nawˬ maˇ kʼawꞈ te˗o ve yoˬ hehˉ. Yaꞈ hkʼaˇ, nawˬ ve yehˬ kʼa Yaˬhoˉvaˬ ve Shaˉhkiˆhkanˍ ve chaw maˇ hpehꞈ ve teˇ gʼaˇ gʼaˇ nawˬ yawˇ hui htaꞈ maˇ dawˇ cawˇ leh yawˇ hui geh maˇ chehˇ gaˇ˗o tehꞈ dawˇ tuˬ yoˬ hehˉ. Jehˇ ve awˬ nyi htaˇ ceh tiˉ yehˬ kʼa hkʼaw ve chaw teˇ geh hpoˆ chehˇ ve awˬ yanˇ hpehꞈ ve tehꞈ yawˇ hui dawˇ ve yoˬ hehˉ. Oˇ hkʼe kʼo nawˬ hkʼaˬ  hkʼe te tuˬ le? Nawˬ yawˇ hui htaꞈ haꞈ leh a yeˇ te piˇ chehˇ ve tehꞈ hpeuꞈ maw piˇ tuˬ awˬ hkʼaˇ laiˉ hkʼaˇ cawˬ ve yoˬ. (Tawˇ naˉ ve 11:25; Cuˇ yiˍ piˇ ve 3:12, 13) Awˬ kaˍ awˬ nu awˬ yanˇ htaˇ yawˇ hui nawˬ geh teˇ geh chehˇ tuˬ kuˬ piˇ gʼa ve yoˬ.

²⁴ Aˬ htoꞈ ma te nawˬ pawehˇ teˇ hpaˍ hpaˍ htaꞈ maˇ kʼawꞈ te˗o tehꞈ awˬ suhˍ awˬ shaˍ hpawˇ ve awˬ viˉ awˬ nyi shiˍ gaˇ ve kʼo, nawˬ yawˇ hui htaꞈ kʼoˆ maˍ piˇ gʼa tuˬ ngaˬ hui ve liꞈ teˇ hpaˍ leh vehˆsaiˉ jw.org hkʼaw yehˇ gʼa ve yoˬ. Nawˬ yawˇ htaꞈ tawˇ gʼawˬ daꞈ gaˇ leh, yawˇ htaꞈ nawˬ hkʼe leˇ dawˇ tcuh gaˇ ve tehꞈ yawˇ hui maˇ gʼa dawˇ tuˬ shaˍ tiꞈ te sheˍ. Nawˬ maˇ dawˇ cheˆ sheˍ htaˇ, awˬ lawn chi htaꞈ caˉ daꞈ ve hkʼa dehꞈ dawˇ nyi˗oˬ tehꞈ yawˇ hui htaꞈ shiˍ tcuh piˇ sheˍ. Nyi ma gawˬ lehˍ te leh “nawˬ hui tawˇ yaw ve teˇ hpaˍ lehˬ hkʼaˬ htaˆ kaꞈ shu awˬ pon cawˇ daꞈ leh na sha ve tawˇ hkawˇ htaꞈ yaw leh aˉ lehꞈ hkawꞈ taˍ ve hkʼe hpehꞈ piˇ˗oˆ.”—Kawˇlawˇsehˇ 4:6.

25, 26. Yaˬhoˉvaˬ ve awˬ liˇ awˬ hkʼaˇ htaꞈ yaˇ haꞈ tuˬ, awˬ pa awˬ e hkʼaˬ hkʼe ga piˇ gʼa ve le?

²⁵ Aˬ htoꞈ ma te pawehˇ teˇ ceuˬ ceuˬ htaꞈ maˇ te ve ngaˬ hui a shu yawˇ awˬ to hkʼa dehꞈ shiˍ cawˇ ve yoˬ. Awˬ lawn chi ve a yeˇ uiˍ jaˇ. (Heˍbrehˇ 5:14) Ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve yoˬ. Ngaˬ hui ve yaˇ Liꞈ hpu hkʼaw ve awˬ liˇ awˬ hkʼaˇ htaꞈ haꞈ leh na gʼa tuˬ, awˬ pa awˬ e awˬ yanˇ gʼa yehˇ leh gʼa ga piˇ ve yoˬ. Yaˬhoˉvaˬ awˬ tehˬ awˬ na teꞈ chehˇ ve tehꞈ yaˇ shiˍ ve kʼo, yawˇ hui kaꞈ yawˇ nyi hkʼaˇ suh tuˬ te piˇ gaˇ ve yoˬ.—Iˉsaˍyaˆ 48:17, 18; 1 Peˍtruˆ 3:15.

²⁶ Cawˇ ve awˬ hkʼaˇ hkʼaw Yaˬhoˉvaˬ htaꞈ oˉ kʼoˍ pui gʼa tuˬ, ngaˬ hui te gʼa ve hkʼe teˇ ceuˬ le le te ve kʼo, yawˇ ha lehˬ tuˬ yoˬ. (Yoˇhanˬ 4:23) Yaꞈ hkʼaˇ, laiˉ gʼaˇ dawˇ ve miˬ guiˬ chi hkʼoˆ ka tiꞈ maˇ yeˬ ve chaw cawˬ maˇ ve pa taw, ka tiꞈ yeˬ tuˬ haˍ jaˇ. Awˬ lawn chi ve awˬ tehˬ yoˬ laˇ? Awˬ gʼuˇ suhˍ teˇ lawn hkʼaw teˇ geh henˇ tuˬ yoˬ.