1, 2. Yaˬhoˉvaˬ ve chaw htaꞈ te luˬ tuˬ, Baˍlehˆ aˬ htoꞈ ma te ve le?

 Ngaˇ ca paˍ teˇ gʼaˇ yawˇ heuˆ gaˇ ve ngaˇ chehˇ kuiˬ lo kʼai ve yoˬ. Yawˇ ngaˇ awˍ leuˆ yuˬ leh iˉ kaˆ hkʼaw biˉ baˬ keu ve yoˬ. Yawˇ yeunˇ hkanˍ leh law taˍ ve yoˬ. Ngaˇ caˇ la ve teˇ yanˇ, biˉ htaꞈ gʼawˬ yuˬ ve yoˬ.

² Chi hkʼa shuˍ shuˍ, chaw yaˇ htaꞈ kaꞈ beˬ gʼa tuˬ yoˬ. Tawˇ pa haˉ te kʼo, Iˉsaˍreˍlaˆ chaw ka tiꞈ te taˍ ve mvuhˇ miˬ lo gaˬ la paˇ neˇ ve teˇ yanˇ, yawˇ hui Mawˇbaˆ miˬ tawˬ kuiˬ lo deh chehˇ taˍ ve yoˬ. Baˍlehˆ Iˉsaˍreˍlaˆ chaw htaꞈ ca hkeu piˇ ve kʼo, hpu gʼa maˇ jaˇ tuˬ yoˬ tehꞈ Jawˇmawˇ Mawˇbaˆ yawˇ htaꞈ ka tiꞈ te piˇ ve yoˬ. Iˉsaˍreˍlaˆ chaw yawˇ hui hkʼaˇ yawˇ hui hkeu ve hkʼaw loꞈ˗e tuˬ awˬ hkʼaˇ Baˍlehˆ mawˬ ve yoˬ. Beˬ yuˬ ve htaꞈ yawˇ hkʼa dehꞈ leuˆ yuˬ ve yoˬ. Yawˇ Mawˇbaˆ chaw yaˇ miˇ haˉ htaꞈ Iˉsaˍreˍlaˆ chaw deh chehˇ taˍ kuiˬ lo kʼai tcuh leh hawˉ hkʼaˆ hui htaꞈ ca beˬ tcuh ve yoˬ.—Heh puiˉ hkʼaw 22:1-7; 31:15, 16; Hpeuꞈ maˍ ve 2:14.

3. Iˉsaˍreˍlaˆ chaw Baˍlehˆ ve va htaꞈ hkʼaˬ hkʼe te yaw ve le?

³ Baˍlehˆ ve awˬ hkʼaˇ yehˇ gʼa˗aw laˇ? Yehˇ gʼa ve yoˬ. Iˉsaˍreˍlaˆ chaw laiˉ hinˉ gʼaˇ “Mawˇbaˆ chaw hui htaꞈ haˉ chawˇ haˉ paˆ te ve yoˬ.” Yawˇ hui maˇ heˆ heˆ ve gʼuiˬ sha htaꞈ oˉ kʼoˍ ca pui ve yoˬ. Chaꞈ chiˇ jaˇ ve pehꞈ ve tzuhˆ  ve htaꞈ caˉ daꞈ ve Peˍawˇ venˇ ve maˇ heˆ heˆ ve Baˍlaˆ gʼuiˬ sha htaꞈ kaꞈ oˉ kʼoˍ pui ve yoˬ. Hkʼe te leh, Iˉsaˍreˍlaˆ chaw 24,000 gʼaˇ ka tiꞈ te taˍ ve mvuhˇ miˬ lo maˇ gaˬ sheˍ htaˇ miˬ tcuhˉ lo gʼa suh ve yoˬ.—Heh puiˉ hkʼaw 25:1-9.

4. Aˬ htoꞈ ma te Iˉsaˍreˍlaˆ chaw laiˉ hinˉ gʼaˇ pehꞈ ve tzuhˆ ve te ve le?

⁴ Aˬ htoꞈ ma te Iˉsaˍreˍlaˆ chaw laiˉ gʼaˇ Baˍlehˆ ve va htaꞈ yaw ve le? Yawˇ hui heuˆ gaˇ ve htaꞈ ceh tiˉ dawˇ nyi leh Yaˬhoˉvaˬ te piˇ jaw ve htaꞈ leunˇ kʼai ve pa taw yoˬ. Iˉsaˍreˍlaˆ chaw Gʼuiˬ sha htaꞈ ka tiꞈ yeˬ tuˬ awˬ hkʼaˇ laiˉ hkʼaˇ cawˬ ve yoˬ. Gʼuiˬ sha yawˇ hui htaꞈ Eˇjiˇtuꞈ mvuhˇ miˬ lo awˬ ceˬ te ve htaꞈ ponˬ piˇ ve, heh puiˉ hkʼaw lo caˇ tuˬ caˬ piˇ ve, ka tiꞈ te taˍ ve mvuhˇ miˬ miˬ tcuhˉ lo shiˍ laˬ piˇ ve yoˬ. (Heˍbrehˇ 3:12) Yaꞈ hkʼaˇ, yawˇ hui pehꞈ ve tzuhˆ ve te ve yoˬ. Tcuh yaˇ Pawˇluꞈ bvuhꞈ taˍ ve, “yawˇ hui teˇ hpaˍ hpaˍ haˉ chawˇ haˉ paˆ te ve yoˬ. Ngaˬ hui oˇ hkʼe maˇ gʼa te. Yawˇ hui oˇ hkʼe te ve pa taw, paˍ suh˗e ve yoˬ.”—1 Kawˇrenˍhtuˆ 10:8.

5, 6. Mawˇbaˆ miˬ tawˬ kuiˬ lo hpehꞈ la ve awˬ ceuˬ ngaˬ hui htaꞈ aˬ htoꞈ ma maˍ laˇ ve le?

⁵ Miˬ guiˬ awˬ suhˉ gaˬ la paˇ neˇ ve yoˬ. Chi htaꞈ pa taw, ngaˬ hui Iˉsaˍreˍlaˆ chaw hkʼa shuˍ ka tiꞈ te taˍ ve mvuhˇ miˬ hkʼaw maˇ gaˬ sheˍ ve miˬ tcuhˉ lo chehˇ taˍ ve yoˬ. (1 Kawˇrenˍhtuˆ 10:11) Chi beuꞈ teˇ co˗e ve chaw laiˉ gʼaˇ lehˬ aˬ sho˗eˬ htaˇ Mawˇbaˆ chaw aꞈ kehˉ pehꞈ ve tzuhˆ ve te tuˬ dawˇ cawˇ jaˇ. Dawˇ hkʼaˇ chi hkʼe ve Yaˬhoˉvaˬ ve chaw htaꞈ heuˆ la sha ve yoˬ. Awˬ tehˬ kʼo, Neˇ haiˬ Saˍtanˍ yehˇ gʼa jaˇ ve va lehˬ pehꞈ ve tzuhˆ ve teˇ ceuˬ yoˬ.—Heh puiˉ hkʼaw 25:6, 14; 2 Kawˇrenˍhtuˆ 2:11; Yuˇdaꞈ 4.

⁶ Nawˬ a shu yawˇ awˬ to htaꞈ na nyi cawˇ ve, ‘ngaˬ teˇ hkui teˇ yanˇ pyawˍ ve htaꞈ te gaˇ ve laˇ, maˇ heˆ leh miˬ guiˬ awˬ suhˉ hkʼaw ha lehˬ ha kʼa co co taiˍ taiˍ teꞈ chehˇ gaˇ ve laˇ?’ “Haˉ chawˇ haˉ paˆ te ve htaꞈ jaw kʼai loˬ” tehꞈ Yaˬhoˉvaˬ kʼoˆ ve htaꞈ ngaˬ hui na yuˬ ve kʼo, awˬ bon cawˬ maˇ jaˇ ve maˇ heˆ laˇ?—1 Kawˇrenˍhtuˆ 6:18.

7, 8. Pehꞈ ve tzuhˆ ve lehˬ aˬ htoꞈ ma le? Aˬ htoꞈ ma te awˬ lawn chi ve kawˆ tuˬ uiˍ jaˇ ve le?

⁷ Chi beuꞈ teˇ co˗e, chaw laiˉ gʼaˇ maˇ yaꞈ taw puiˉ leh, Gʼuiˬ sha ve awˬ liˇ tawˇ hkawˇ hkʼaw teˇ geh zuhꞈ ve htaꞈ maˇ shawˍ maˇ caˆ te ve yoˬ. Pehꞈ ve tzuhˆ ve lehˬ Liꞈ hpu hkʼaw awˬ liˇ awˬ hkʼaˇ cawˬ ve hkʼe maˇ heuˆ daꞈ ve chaw teˇ geh zuhꞈ ve htaꞈ kʼoˆ gaˇ ve yoˬ. Hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ teˇ geh zuhꞈ ve maˇ heˆ kʼo, to nuˇ to shaˆ geh zuhꞈ ve chi teˇ hpaˍ htaꞈ kaꞈ kʼoˆ gaˇ ve yoˬ. Teˇ geh zuhꞈ ve, mawꞈ kʼaw htaꞈ te ve, hkʼehˇ hkʼaw htaꞈ te ve, teˇ gʼaˇ ve mawˇ htaꞈ htawˇ leh zuhꞈ gaˇ ve nyi ma cawˬ la ve chi teˇ hpaˍ htaꞈ kaꞈ kʼoˆ gaˇ ve yoˬ.—Kʼoˆ maˍ ve awˬ lawn 23 htaꞈ nyi sheˍ.

⁸ Chaw teˇ gʼaˇ pehꞈ ve tzuhˆ ve te chehˇ ve kʼo, Hkriꞈ yaˇ awˬ moˍ hkʼaw chehˇ maˇ hpehꞈ tehꞈ Liꞈ hpu hkʼaw hkʼa tawˍ lehˆ kʼoˆ taˍ ve yoˬ. (1 Kawˇrenˍhtuˆ 6:9; Hpeuꞈ maˍ ve 22:15) Chi hkʼoˆ kaꞈ, pehꞈ ve tzuhˆ ve te ve chaw a shu yawˇ awˬ to htaꞈ maˇ yawˆ yan leh shu kaꞈ yawˇ htaꞈ yonˍ maˇ gʼa. Yawˇ dawˇ haˍ tuˬ cawˬ la ve yoˬ. Yawˇ dawˇ shiˍ puiˉ ve nyi ma maˇ daꞈ kehˬ ve yoˬ. Laiˉ pawˆ kʼo, maˇ dawˇ maˇ gaˇ ve hkʼaw yaˇ hu ve, yehˬ kʼa maˇ cawˇ maˇ hawˍ daꞈ ve, naˬ ve gawˬ ve, maˇ heˆ kʼo suh ve htaꞈ gʼa hkanˍ ve yoˬ. (Gaˍlaˍtiˆ 6:7, 8 gʼaw sheˍ.) Pehꞈ ve tzuhˆ ve te htaˇ aˬ htoꞈ ma gʼa hpuˇ la tuˬ chaw teˇ gʼaˇ hkʼa dehꞈ dawˇ nyi ve kʼo, yawˇ maˇ te gaˇ taˬ. Yaꞈ hkʼaˇ, chaw teˇ gʼaˇ yawˇ loˍ ve htaꞈ ceh tiˉ dawˇ nyi ve teˇ yanˇ, pehꞈ ve tzuhˆ ve htaꞈ tanˬ te gaˇ ve yoˬ. Pehꞈ ve tzuhˆ ve te ve lehˬ awˬ kʼu nyi ve awˬ han nyi ve htaꞈ tanˬ laˬ ve yoˬ.

9. Aˬ htoꞈ ma te awˬ kʼu nyi ve awˬ han nyi ve kawˆ tuˬ cawˬ ve le?

⁹ Ngaˬ hui chaꞈ chiˆ ve dawˇ hkʼaˇ cawˬ tuˬ, awˬ kʼu nyi ve awˬ han te tawˆ la taˍ ve yoˬ. Chi beuꞈ teˇ co˗e, awˬ kʼu nyi ve awˬ han teˇ kaˬ le le lo cawˬ ve yoˬ. Liꞈ kʼoˆ, liꞈ hkawˇ, awˬ  han tawˆ kuiˬ (TV), in˗teu˗neꞈ hkʼaw chi teˇ hpaˍ yoˬ. Kawˆ tuˬ teꞈ chiˉ maˇ cawˬ tehꞈ laiˉ gʼaˇ dawˇ ve htawˇ, awˬ tehˬ kʼo kawˆ tuˬ cawˬ maˇ jaˇ. Chaw teˇ gʼaˇ awˬ kʼu nyi ve awˬ han nyi ve kʼo, hkʼaˬ htaˆ kaꞈ zuhꞈ gaˇ ve nyi ma leh chaꞈ chiˆ jaˇ ve nyi ma cawˬ la ve yoˬ. Oˇ hkʼe hpehꞈ ve kʼo, yawˇ a shu yawˇ hkʼaˇ yawˇ shoˆ baˬ ve te leh yehˬ kʼa maˇ cawˇ maˇ hawˍ daꞈ ve, yehˬ kʼa hpaˆ daꞈ ve htaꞈ gʼa hpuˇ tuˬ yoˬ hehˉ.—Roˉmaꞈ 1:24-27; Eˇfeˇsuꞈ 4:19; Kʼoˆ maˍ ve awˬ lawn 24 htaꞈ nyi sheˍ.

10. Ngaˬ hui pehꞈ ve tzuhˆ ve htaꞈ jaw kʼai tuˬ, Yaˍkoˆ liꞈ 1:14, 15 hkʼaw ve awˬ liˇ awˬ hkʼaˇ hkʼaˬ hkʼe ga laˇ ve le?

¹⁰ Pehꞈ ve tzuhˆ ve ngaˬ hui htaꞈ hkʼaˬ hkʼe heuˆ la gʼa ve htaꞈ na gʼa tuˬ a yeˇ uiˍ jaˇ. Yaˍkoˆ liꞈ 1:14, 15 hkʼaw kʼoˆ ve, “hkʼaˬ ve chaw teˇ gʼaˇ maˇ kʼoˆ, a shu yawˇ sheˉ lai puiˉ ve nyi ma lehˬ venˇ baˆ te tuˬ yawˇ htaꞈ heˍ yuˬ beˬ yuˬ chehˇ ve yoˬ. Oˇ htaˇ, sheˉ lai puiˉ ve nyi ma lehˬ yaˇ hu ve hkʼe yawˇ awˬ hkʼaw lo hu la leh venˇ baˆ htaꞈ paw la piˇ ve yoˬ. Venˇ baˆ htawˇ, uiˍ la biˇ la ve teˇ yanˇ, suh ve teˇ ceuˬ htaꞈ paw la piˇ ve yoˬ.” Chi htaꞈ pa taw, maˇ cawˇ ve dawˇ hkʼaˇ cawˬ la htaˇ, laꞈ haˉ pa sheˍ. Nawˬ maˇ dawˇ maˇ gaˇ leh awˬ kʼu nyi ve awˬ han gʼa mawˬ ve kʼo, teˇ hpawˇ lo nyi peu sheˍ! Hkaw hpi˗u teuˇ hoˆ ve, maˇ heˆ leh awˬ han tawˆ kuiˬ hkʼaw awˬ nu ve teˇ lawn htaꞈ kʼawꞈ pa nyi˗o. Maˇ cawˇ ve awˬ ceuˬ nawˬ a shaꞈ teꞈ kuiˬ hkʼaw taˇ cawˬ tcuh. Nawˬ chi hkʼe maˇ te ve kʼo, maˇ daꞈ ve dawˇ hkʼaˇ awˬ gʼaˇ uiˍ la leh yuˬ tiˍ maˇ gʼaˇ la tuˬ yoˬ.—Maꞈhtehˍ 5:29, 30 gʼaw sheˍ.

11. Ngaˬ hui maˇ cawˇ ve dawˇ hkʼaˇ cawˬ ve kʼo, Yaˬhoˉvaˬ hkʼaˬ hkʼe ga laˇ gʼa ve le?

¹¹ Yaˬhoˉvaˬ ngaˬ hui ve awˬ to htaꞈ ngaˬ hui aꞈ kehˉ shiˍ ve yoˬ. Ngaˬ hui ve awˬ gʼaˇ nuˇ kuiˬ kaꞈ yawˇ shiˍ ve yoˬ. Yaꞈ hkʼaˇ, ngaˬ hui maˇ cawˇ ve dawˇ hkʼaˇ htaꞈ pa gʼa ve tehꞈ yawˇ shiˍ ve yoˬ. Yaˬhoˉvaˬ kʼoˆ ve, “nawˬ hui awˬ hkʼaw lo cawˬ ve miˬ guiˬ htaꞈ caˉ daꞈ ve awˬ ceuˬ teˇ hpaˍ htaꞈ tiˇ pehˍ˗oꞈ. Awˬ ceuˬ oˇ ve teˇ hpaˍ lehˬ haˉ chaw haˉ paˆ te ve,  chaꞈ chiˆ ve htaꞈ te ve, pehꞈ ve tzuhˆ ve htaꞈ te ve, haiˬ ve htaꞈ te ve leh, shu mawˇ shu jeˬ htaꞈ sheˉ lai ve, awˬ ceuˬ chi teˇ hpaˍ hpehꞈ ve yoˬ. Shu mawˇ shu jeˬ htaꞈ sheˉ lai ve teˇ ceuˬ lehˬ, shaˉ hoꞈ htaꞈ oˉ kʼoˍ pui ve teˇ ceuˬ hpehꞈ ve yoˬ.” (Kawˇlawˇsehˇ 3:5) Chi hkʼe te tuˬ maˇ sha ve htawˇ, Yaˬhoˉvaˬ ngaˬ hui htaꞈ yeunˇ hkanˍ leh ga laˇ tuˬ yoˬ. (Chiˇ mvuh ve 68:19) Awˬ viˉ awˬ nyi hawˉ hkʼaˆ yaˇ nehˬ teˇ gʼaˇ awˬ kʼu nyi ve awˬ han nyi leh a shu yawˇ hkʼaˇ yawˇ shoˆ baˬ ve te jaw ve yoˬ. Awˬ ceuˬ chi teˇ hpaˍ uiˍ la chehˇ ve chaw awˬ pon a hkʼe leˇ hpehꞈ ve tehꞈ Liꞈ henˇ yehˬ lo yawˇ ve awˬ chawˇ dawˇ ve yoˬ. Yawˇ kʼoˆ ve, “awˬ ceuˬ chi teˇ hpaˍ ngaˬ ve dawˇ shiˍ puiˉ ve nyi ma htaꞈ te luˬ laˇ leh ngaˬ pehꞈ ve tzuhˆ ve tanˬ te ve yoˬ.” Yawˇ ve nyi ma htaꞈ yuˬ tiˍ cawˇ ve tehꞈ yawˇ shiˍ ve yoˬ. Yaˬhoˉvaˬ ga piˇ ve pa taw, chi teˇ hpaˍ yawˇ maˇ kʼawꞈ te˗o. Nawˬ pehꞈ ve tzuhˆ ve te tuˬ dawˇ ve kʼo, nawˬ ve dawˇ hkʼaˇ daꞈ kehˬ la tuˬ, “uiˍ jaˇ daꞈ jaˇ ve kanˇ paˆ” Yaˬhoˉvaˬ geh lawˬ sheˍ.—2 Kawˇrenˍhtuˆ 4:7; 1 Kawˇrenˍhtuˆ 9:27.

12. Aˬ htoꞈ ma te ngaˬ hui nyi ma htaꞈ haꞈ shaˉ cawˇ ve le?

 ¹² Sawˉlaꞈmonˍ bvuhꞈ taˍ ve, “a shaꞈ teꞈ ve lehˬ nyi ma htaꞈ caˉ daꞈ ve pa taw, teˇ ceuˬ le le aꞈ kehˉ nawˬ ve nyi ma htaꞈ haꞈ shaˉ˗oˆ.” (Tawˇ naˉ ve 4:23, MGS) Ngaˬ hui ve “nyi ma” lehˬ ngaˬ hui awˬ tehˬ awˬ na hkʼaˬ hkʼe ve chaw hpehꞈ ve htaꞈ kʼoˆ gaˇ ve yoˬ. Ngaˬ hui awˬ tehˬ awˬ na hkʼaˬ hkʼe ve chaw hpehꞈ ve Yaˬhoˉvaˬ shiˍ ve yoˬ. Ngaˬ hui nyi ve awˬ ceuˬ awˬ tehˬ awˬ na ngaˬ hui htaꞈ heuˆ la gʼa ve yoˬ. Yawˇbaˆ kʼoˆ ve, “yaˇ miˇ haˉ htaꞈ pehꞈ ve tzuhˆ ve nyi ma hkʼaw ngaˬ teˇ pawˆ kaꞈ maˇ kʼawꞈ nyi tuˬ, ngaˬ ka tiꞈ te taˍ peuˬ ve yoˬ.” (Yawˇbaˆ 31:1) Yawˇbaˆ hkʼa shuˍ, ngaˬ hui nyi ve leh dawˇ ve awˬ ceuˬ gʼa yuˬ tiˍ ve yoˬ. Ngaˬ hui Chiˇ mvuh ve liꞈ bvuhꞈ paˍ hkʼa shuˍ, “teꞈ chiˉ awˬ bon maˇ cawˬ ve tawˇ htaꞈ maˇ gʼa na yuˬ tuˬ ngaˬ htaꞈ ga laˇ˗oˆ. Nawˬ ka tiꞈ cawˬ taˍ ve hkʼe, ngaˬ htaꞈ awˬ bon naꞈ laˇ˗oˆ” tehꞈ bon lawˬ hpehꞈ ve yoˬ.—Chiˇ mvuh ve 119:37.

13. Diˉnaˆ hkʼaˬ hkʼe ve chaw geh awˬ chawˇ te ve le?

¹³ Ngaˬ hui ve awˬ chawˇ lehˬ daꞈ ve leh maˇ daꞈ ve hpawˇ ngaˬ hui htaꞈ heuˆ la kuiˬ cawˬ ve yoˬ. Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve chaw geh awˬ chawˇ te ve kʼo, nawˬ Gʼuiˬ sha ve awˬ liˇ awˬ hkʼaˇ htaꞈ gʼaꞈ te tuˬ, yawˇ hui ga laˇ gʼa ve yoˬ. (Tawˇ naˉ ve 13:20; 1 Kawˇrenˍhtuˆ 15:33 gʼaw sheˍ.) Ngaˬ hui awˬ chawˇ leuˆ yuˬ ve a yeˇ uiˍ jaˇ tehꞈ, Diˉnaˆ ve awˬ lawn maˍ laˇ ve yoˬ. Diˉnaˆ Yaˍkoˆ ve yaˇ miˇ teˇ gʼaˇ hpehꞈ ve pa taw, Yaˬhoˉvaˬ htaꞈ oˉ kʼoˍ pui ve yehˬ kʼa hkʼaw uiˍ la taˍ ve yoˬ. Yawˇ pehꞈ puiˉ ve chaw hpehꞈ ve maˇ heˆ. Yaꞈ hkʼaˇ, yawˇ Yaˬhoˉvaˬ htaꞈ oˉ kʼoˍ maˇ pui ve Hkaˍnaˍniˆ chaw yaˇ miˇ geh awˬ chawˇ te ve yoˬ. Hkaˍnaˍniˆ chaw leh Gʼuiˬ sha ve chaw dawˇ hkʼaˇ maˇ shuˍ daꞈ. Yawˇ hui pehꞈ ve tzuhˆ ve hpawˇ awˬ meh bvuhˬ ve yoˬ. (Oˉ kʼoˍ pui ve 18:6-25) Diˉnaˆ yawˇ ve awˬ chawˇ geh chehˇ htaˇ, Hkaˍnaˍniˆ chaw Sheˍhkenˍ meh ve  hawˉ hkʼaˆ teˇ gʼaˇ htaꞈ mawˬ daꞈ ve yoˬ. Yawˇ Diˉnaˆ htaꞈ dawˇ cawˇ ve yoˬ. Sheˍhkenˍ “yawˇ awˬ pa ve yehˬ yaˇ kʼa yaˇ teˇ hpaˍ awˬ hkʼaw lo shu aꞈ kehˉ awˬ meꞈ awˬ hponˇ cawˬ ve chaw hpehꞈ ve yoˬ.” Yaꞈ hkʼaˇ, yawˇ Yaˬhoˉvaˬ htaꞈ maˇ haꞈ ve yoˬ.—Awˬ hkuiˉ puiˍ 34:18, 19.

14. Diˉnaˆ aˬ htoꞈ ma gʼa hpuˇ ve le?

¹⁴ Sheˍhkenˍ yawˇ te ve awˬ ceuˬ htaꞈ a hkʼe leˇ hpehꞈ ve tehꞈ shawˍ ve yoˬ. Yawˇ Diˉnaˆ htaꞈ dawˇ cawˇ ve pa taw, “hkʼa mvuhˇ hkʼa na te piˇ ve yoˬ.” (Awˬ hkuiˉ puiˍ 34:1-4 gʼaw sheˍ.) Hkʼe te leh, Diˉnaˆ yawˇ awˬ to leh yehˬ kʼa hkʼaw dawˇ haˍ tuˬ laiˉ ceuˬ cawˬ la ve yoˬ.—Awˬ hkuiˉ puiˍ 34:7, 25-31; Gaˍlaˍtiˆ 6:7, 8.

15, 16. Ngaˬ hui hkʼaˬ hkʼe te leh cuˇ yiˍ cawˬ ve chaw hpehꞈ gʼa tuˬ le?

¹⁵ Yaˬhoˉvaˬ ve awˬ liˇ awˬ hkʼaˇ ngaˬ hui awˬ pon daꞈ ve yoˬ. Awˬ lawn chi htaꞈ na gʼa tuˬ, ngaˬ hui Diˉnaˆ hkʼa shuˍ te yaꞈ tuˬ maˇ loˍ. “Cuˇ yiˍ cawˬ ve chaw htaꞈ awˬ chawˇ te˗o. Nawˬ htawˇ cuˇ yiˍ cawˬ la tuˬ yoˬ. Cuˇ yiˍ maˇ cawˬ ve chaw htaꞈ awˬ chawˇ te ve kʼo, nawˬ htawˇ gʼa luˬ gʼa sheˆ tuˬ yoˬ.” (Tawˇ naˉ ve 13:20) “Daꞈ ve awˬ ceuˬ leh hteˇ ve cawˇ ve awˬ ceuˬ htaꞈ nawˬ shiˍ la tuˬ,” dawˇ taˍ˗oꞈ. Chi hkʼe te ve kʼo, dawˇ haˍ gaˇ haˍ ve htaꞈ nawˬ maˇ gʼa hpuˇ tuˬ yoˬ.—Tawˇ naˉ ve 2:6-9; Chiˇ mvuh ve 1:1-3.

¹⁶ Ngaˬ hui cuˇ yiˍ cawˬ la tuˬ, Liꞈ hpu henˇ cawˇ ve, maˇ dawˇ cheˆ sheˍ htaˇ kaꞈ Gʼuiˬ sha geh bon lawˬ cawˇ ve, ka tiꞈ yeˬ leh cuˇ yiˍ cawˬ ve awˬ ceˬ geh laˬ ve beˆ maˍ laˇ hkawˇ htaꞈ gʼaꞈ te cawˇ ve yoˬ. (Maꞈhtehˍ 24:45; Yaˍkoˆ 1:5) Awˬ tehˬ kʼo, ngaˬ hui teˇ gʼaˇ le le maˇ biˇ leh awˬ gʼaˇ nuˇ puiˉ ve tehꞈ nawˬ kaꞈ shiˍ ve yoˬ. (Yeˍraˍmiˆ 17:9) Yaꞈ hkʼaˇ, nawˬ oˇ hkʼe te chehˇ ve kʼo, pehꞈ ve tzuhˆ ve te la mehˍ tehꞈ chaw teˇ gʼaˇ shaˍ tiꞈ peꞈ laˇ ve kʼo, nawˬ hkʼaˬ hkʼe te tuˬ le? Nawˬ nyi ma zuhˆ tuˬ laˇ, maˇ heˆ leh nawˬ nyi ma nuˇ nehˬ te leh ga laˇ tuˬ htaꞈ haꞈ yuˬ tuˬ laˇ?—2 Jawˇmawˇ 22:18, 19.

17. Awˬ chawˇ Hkriꞈ yaˇ beˆ maˍ laˇ ve ngaˬ hui htaꞈ hkʼaˬ hkʼe ga laˇ gʼa ve le? Tawˇ pa haˉ kʼoˆ maˍ laˇ sheˍ.

 ¹⁷ Tawˇ pa haˉ chi htaꞈ dawˇ nyi sheˍ. Awˬ viˉ awˬ nyi yaˇ miˇ teˇ gʼaˇ kanˉ te kuiˬ lo hawˉ hkʼaˆ teˇ gʼaˇ yawˇ htaꞈ dawˇ cawˇ leh ca guiˇ˗e tuˬ jehˬ piˇ ve yoˬ. Yawˇ Yaˬhoˉvaˬ ve kanˉ maˇ te ve chaw hpehꞈ ve htawˇ, nyi ma daꞈ ve chaw hpehꞈ ve yoˬ. Awˬ viˉ awˬ nyi yaˇ miˇ teˇ gʼaˇ yawˇ huiˉ maˬ teˇ geh chehˇ ve htaꞈ gʼa mawˬ leh awˬ viˉ awˬ nyi yaˇ miˇ htaꞈ shaˍ tiꞈ piˇ ve yoˬ. Awˬ viˉ awˬ nyi yaˇ miˇ awˉ lawˉ teˇ gʼaˇ hkʼaˬ hkʼe te tuˬ le? Yawˇ choˬ kʼoˆ oˇ kʼoˆ te ve laˇ, maˇ heˆ leh chi ve lehˬ cuˇ yiˍ cawˬ ve hkʼaw shaˍ tiꞈ peꞈ laˇ ve tehꞈ shawˍ ve laˇ? Awˬ viˉ awˬ nyi yaˇ miˇ chi teˇ gʼaˇ Yaˬhoˉvaˬ htaꞈ haꞈ leh cawˇ ve htaꞈ te gaˇ ve yoˬ hehˉ. Yaꞈ hkʼaˇ, yawˇ hawˉ hkʼaˆ chi teˇ gʼaˇ geh hkʼaˬ htaˆ kaꞈ guiˇ˗e chehˇ ve kʼo, yawˇ pehꞈ ve tzuhˆ ve htaꞈ “jaw kʼai” chehˇ ve laˇ, maˇ heˆ leh ‘yawˇ ve dawˇ hkʼaˇ awˬ hkʼaˇ suh’ gʼaꞈ te chehˇ ve laˇ?—Tawˇ naˉ ve 22:3; 28:26; Maꞈhtehˍ 6:13; 26:41.

18, 19. Aˬ htoꞈ ma te Yoˇsehꞈ maˇ te yaꞈ ve le?

¹⁸ Yoˇsehꞈ yaˇ nehˬ htaˇ Eˇjiˇtuꞈ mvuhˇ miˬ hkʼaw shu ceˬ te chehˇ ve yoˬ. Yawˇ ve yehˬ shehˍ ma teˇ nyi le le ngaˬ geh ca zuhꞈ la tehꞈ, yawˇ htaꞈ kʼoˆ piˇ ve yoˬ. Yaꞈ hkʼaˇ, chi hkʼe te ve lehˬ yaꞈ ve tehꞈ Yoˇsehꞈ shiˍ ve yoˬ. Yawˇ Yaˬhoˉvaˬ htaꞈ haꞈ leh nyi hkʼaˇ suh tuˬ te piˇ gaˇ ve yoˬ. Chi htaꞈ pa taw, yehˬ shehˍ ma yawˇ htaꞈ laiˉ pawˆ beˬ shoˆ la htawˇ, Yoˇsehꞈ yawˇ geh maˇ ca zuhꞈ piˇ. Yawˇ awˬ ceˬ hpehꞈ ve pa taw, yawˇ hpaw˗e maˇ hpehꞈ. Teˇ nyi htaˇ yawˇ ve yehˬ shehˍ ma geh ca zuhꞈ tuˬ nyiˉ piˇ htaˇ, Yoˇsehꞈ “gʼuiˇ hpaw˗e ve yoˬ.”—Awˬ hkuiˉ puiˍ 39:7-12 gʼaw sheˍ.

¹⁹ Yoˇsehꞈ yawˇ ve yehˬ shehˍ ma geh zuhꞈ ve ceh tiˉ dawˇ nyi ve kʼo, yawˇ maˇ hpaw˗e taˬ. Yaꞈ hkʼaˇ, yawˇ awˬ pon Yaˬhoˉvaˬ geh meuˆ daꞈ ve teˇ ceuˬ le le aꞈ kehˉ a yeˇ uiˍ jaˇ. Yawˇ yehˬ shehˍ ma htaꞈ kʼoˆ piˇ ve, “nawˬ teˇ gʼaˇ maˇ heˆ kʼo, [yehˬ shehˍ hpaˇ] ngaˬ htaꞈ maˇ chiˇ aꞈ laˇ ve awˬ ceuˬ teˇ ceuˬ kaꞈ maˇ cawˬ. Ngaˬ lehˬ hkʼaˬ hkʼe te chaꞈ chiˆ jaˇ ve kanˉ chi hkʼe ve htaꞈ te leh Gʼuiˬ sha htaꞈ te yaꞈ hpehꞈ tuˬ le?”—Awˬ hkuiˉ puiˍ 39:8, 9.

20. Yaˬhoˉvaˬ Yoˇsehꞈ htaꞈ nyi hkʼaˇ suh ve tehꞈ ngaˬ hui hkʼaˬ hkʼe te shiˍ ve le?

²⁰ Yoˇsehꞈ awˬ pa awˬ e awˬ viˉ awˬ nyi htaꞈ chehˇ vuiˇ jaˇ ve htawˇ, yawˇ Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ leh Gʼuiˬ sha yawˇ htaꞈ awˬ bon naꞈ piˇ ve yoˬ. (Awˬ hkuiˉ puiˍ 41:39-49) Yoˇsehꞈ ka tiꞈ yeˬ ve pa taw, Yaˬhoˉvaˬ ha lehˬ jaˇ. (Tawˇ naˉ ve 27:11) Pehꞈ ve tzuhˆ ve htaꞈ tawˍ daꞈ gʼaˇ tuˬ maˇ sha. Yaꞈ hkʼaˇ, tawˇ hkawˇ chi ve htaꞈ tawnˇ taˍ sheˍ. “Haiˬ ve awˬ ceuˬ htaꞈ canˇ ve chaw teˇ hpaˍ htaꞈ Gʼuiˬ sha haꞈ ve yoˬ. Yawˇ ve chaw teˇ hpaˍ ve a shaꞈ htaꞈ yawˇ haꞈ shaˉ piˇ leh, haiˬ ve chaw teˇ hpaˍ ve kanˇ paˆ awˬ hawˉ lo yawˇ hui htaꞈ ponˬ piˇ ve yoˬ.”—Chiˇ mvuh ve 97:10.

21. Awˬ viˉ awˬ nyi teˇ gʼaˇ Yoˇsehꞈ htaꞈ hkʼaˬ hkʼe te henˇ yuˬ ve le?

²¹ Yaˬhoˉvaˬ ve chaw haꞈ hanˉ ve hkʼaw “haiˬ ve awˬ ceuˬ  htaꞈ canˇ leh daꞈ ve awˬ ceuˬ htaꞈ haꞈ” ve tehꞈ yawˇ hui teˇ nyi le le hpeuꞈ maw laˇ chehˇ ve yoˬ. (Aˍmoˆ 5:15) Nawˬ a shaꞈ hkʼaˬ ma gaˬ˗oˬ ve htawˇ maˇ kʼoˆ, Yaˬhoˉvaˬ htaꞈ ka tiꞈ yeˬ gʼa ve yoˬ. Awˬ viˉ awˬ nyi hawˉ hkʼaˆ yaˇ nehˬ teˇ gʼaˇ liꞈ henˇ yehˬ lo lawˇ nyi ve htaꞈ gʼa hpuˇ ve yoˬ. Liꞈ na ve htaꞈ ga laˇ ve kʼo, ngaˬ geh zuhꞈ tcuh laˇ˗a tehꞈ yaˇ miˇ teˇ gʼaˇ yawˇ htaꞈ kʼoˆ piˇ ve yoˬ. Yawˇ hkʼaˬ hkʼe te ve le? Yawˇ Yoˇsehꞈ hkʼa shuˍ te ve yoˬ. “Ngaˬ maˇ te tehꞈ laꞈ haˉ kʼoˆ piˇ ve. Ngaˬ ka tiꞈ yeˬ ve pa taw, ngaˬ ve awˬ to htaꞈ yawˆ yan leh ngaˬ ve awˬ meꞈ awˬ hponˇ htaꞈ haꞈ shaˉ gʼa ve yoˬ.” “Teˇ tcuhˉ teˇ yanˇ” ha lehˬ gaˇ leh pehꞈ ve tzuhˆ ve te ve kʼo, nyi ma naˬ tuˬ yoˬ. (Heˍbrehˇ 11:25) Yaˬhoˉvaˬ hkawˇ na yuˬ ve kʼo, hkʼaˬ htaˆ kaꞈ ha lehˬ tuˬ yoˬ.—Tawˇ naˉ ve 10:22.

22, 23. Ngaˬ hui venˇ baˆ uiˍ jaˇ ve htaꞈ te yaꞈ ve htawˇ, Yaˬhoˉvaˬ hkʼaˬ hkʼe ga laˇ gʼa ve le?

²² Ngaˬ hui te yaꞈ tuˬ Saˍtanˍ coˇ caˇ leh pehꞈ ve tzuhˆ ve htaꞈ cuˇ ve pa taw, tawˍ daꞈ gʼaˇ tuˬ haˍ jaˇ. Ngaˬ hui teˇ pawˆ pawˆ kʼo, dawˇ yaꞈ puiˉ ve yoˬ. (Roˉmaꞈ 7:21-25) Awˬ lawn chi htaꞈ Yaˬhoˉvaˬ shiˍ leh “ngaˬ hui lehˬ jeꞈ meu˗e hpehꞈ ve htaꞈ dawˇ nawˇ chehˇ ve yoˬ.” (Chiˇ mvuh ve 103:14) Chi htaꞈ pa taw, Hkriꞈ yaˇ teˇ gʼaˇ venˇ baˆ uiˍ jaˇ ve pehꞈ ve tzuhˆ ve htaꞈ te ve kʼo, yawˇ hkʼaˬ hkʼe kʼai tuˬ le? Yawˇ htaꞈ chaw teˇ gʼaˇ kaꞈ ga piˇ maˇ gʼa ve laˇ? Yawˇ awˬ tehˬ awˬ na venˇ baˆ dawˇ hpfuhˆ ve kʼo, Yaˬhoˉvaˬ yawˇ htaꞈ ga piˇ tuˬ yoˬ. Gʼuiˬ sha “venˇ baˆ hpehˇ piˇ” puiˉ ve yoˬ.—Chiˇ mvuh ve 86:5; Yaˍkoˆ 5:16; Tawˇ naˉ ve 28:13 gʼaw sheˍ.

²³ Yaˬhoˉvaˬ ngaˬ hui htaꞈ ‘chaw yaˇ hpehꞈ ve laꞈ shawnˍ’ peꞈ laˇ ve yoˬ. Oˇ ve lehˬ ha kʼaˉ puiˉ ve nyi haꞈ shaˉ paˍ hpehꞈ ve yoˬ. (Eˇfeˇsuꞈ 4:8, 12; Yaˍkoˆ 5:14, 15) Ngaˬ hui Gʼuiˬ sha htaꞈ kʼawꞈ meuˆ daꞈ gʼa tuˬ, yawˇ nyi haꞈ shaˉ paˍ htaꞈ gu teh taˍ laˇ ve yoˬ.—Tawˇ naˉ ve 15:32.

24, 25. “Chaw luˬ paˍ” hkʼe maˇ hpehꞈ gaˇ ve kʼo, ngaˬ hui hkʼaˬ hkʼe te gʼa tuˬ le?

²⁴ Ngaˬ hui hkʼa dehꞈ dawˇ cheˆ puiˉ tuˬ, Yaˬhoˉvaˬ ve awˬ liˇ tawˇ hkawˇ ngaˬ hui awˬ pon awˬ bon hkʼaˬ hkʼe cawˬ ve ngaˬ hui na gʼa tuˬ loˍ ve yoˬ. Tawˇ naˉ ve liꞈ 7:6-23 hkʼaw ve hawˉ hkʼaˆ teˇ gʼaˇ hkʼe ngaˬ hui maˇ hpehꞈ gaˇ. Awˬ lawn kʼo, yawˇ maˇ dawˇ nyi puiˉ ve pa taw, chaw luˬ paˍ hpehꞈ leh pehꞈ ve tzuhˆ ve te ve yoˬ. Dawˇ nyi puiˉ ve chaw cuˇ yiˍ cawˬ ve ceh tiˉ maˇ heˆ. Ngaˬ hui dawˇ nyi puiˉ ve kʼo, Gʼuiˬ sha hkʼaˬ hkʼe dawˇ ve hkʼa dehꞈ na gʼa leh, shiˍ taˍ ve awˬ ceuˬ a shaꞈ teꞈ kuiˬ lo yuˬ yehˇ ve yoˬ. “Nawˬ ve awˬ to htaꞈ haꞈ leh hkʼa henˇ gʼa ve awˬ ceuˬ hkʼa peu˗eˬ htaꞈ henˇ yuˬ˗oꞈ. Henˇ taˍ peuˬ ve teˇ hpaˍ htaꞈ dawˇ nawˇ taˍ ve kʼo, nawˬ uiˍ la daꞈ la tuˬ yoˬ” tehꞈ tawnˇ taˍ˗oꞈ.—Tawˇ naˉ ve 19:8.

²⁵ Gʼuiˬ sha ve awˬ liˇ awˬ hkʼaˇ cawˇ ve tehꞈ nawˬ hkʼa dehꞈ yonˍ ve laˇ? Nawˬ gʼaꞈ te ve kʼo, ha lehˬ tuˬ yoˬ tehꞈ nawˬ awˬ tehˬ awˬ na yonˍ ve laˇ? (Chiˇ mvuh ve 19:7-10; Iˉsaˍyaˆ 48:17, 18) Nawˬ htawˇ dawˇ nawˬ dawˇ te chehˇ ve kʼo, Yaˬhoˉvaˬ daꞈ ve awˬ ceuˬ te laˇ jaw ve htaꞈ dawˇ nyi sheˍ. “Gʼuiˬ sha hkʼaˬ ma daꞈ jaˇ ve awˬ lawn nawˬ hkʼaˇ nawˬ dawˇ nyi˗o.” (Chiˇ mvuh ve 34:8) Nawˬ oˇ hkʼe te ve kʼo, Gʼuiˬ sha htaꞈ haꞈ maˇ la tuˬ yoˬ. Gʼuiˬ sha haꞈ ve awˬ ceuˬ htaꞈ haꞈ leh Gʼuiˬ sha canˇ ve awˬ ceuˬ htaꞈ canˇ˗oˆ. Nawˬ ve nyi ma hkʼaw daꞈ ve awˬ ceuˬ cawˬ piˇ˗oˆ. Tawˇ pa haˉ te kʼo, hteˇ ve, yawˆ yan keunˍ ve, cawˇ ve, daꞈ ve kehˬ ve, nyi sha ve awˬ ceuˬ chi teˇ hpaˍ hpehꞈ ve yoˬ. (Hpiˇliˇpiˆ 4:8, 9) Yoˇsehꞈ Yaˬhoˉvaˬ ve cuˇ yiˍ htaꞈ cuˇ leh awˬ bon gʼa ve hkʼa shuˍ shuˍ, ngaˬ hui kaꞈ te gʼa ve yoˬ.—Iˉsaˍyaˆ 64:8.

26. Ngaˬ hui aˬ htoꞈ ma henˇ tuˬ le?

²⁶ Nawˬ yehˬ kʼa cawˬ maˇ cawˬ ve htawˇ maˇ kʼoˆ, a shaꞈ teꞈ kuiˬ lo Yaˬhoˉvaˬ nawˬ htaꞈ ha lehˬ tcuh gaˇ ve yoˬ. Awˬ gʼuˇ suhˍ ve 2 lawn hkʼaw ngaˬ hui yehˬ kʼa hkʼaw ha lehˬ gʼa ve awˬ hkʼaˇ henˇ tuˬ yoˬ.