1, 2. Pyawˍ ve leuˆ yuˬ htaˇ, aˬ htoꞈ ma te ngaˬ hui shaˍ tiꞈ gʼa te ve le?

 Nawˬ iˉ shiˍ teˇ shiˍ geuꞈ caˇ˗a te htaˇ, a ciˉ kuiˇ˗aˍ ve htaꞈ gʼa mawˬ ve yoˬ. Nawˬ hkʼaˬ hkʼe te tuˬ le? Nawˬ iˉ shiˍ chi htaꞈ caˇ tuˬ laˇ? Gʼawˆ baˬ tuˬ laˇ? Kuiˇ˗aˍ ve htaꞈ ceh baꞈ baˬ leh daꞈ kuiˬ lo caˇ tuˬ laˇ?

² Pyawˍ ve lehˬ iˉ shiˍ chi teˇ shiˍ htaꞈ shuˍ ve yoˬ. Pyawˍ ve teˇ ceuˬ ceuˬ kʼo, ha lehˬ tuˬ hpehꞈ ve yoˬ. Yaꞈ hkʼaˇ, pehꞈ ve tzuhˆ ve, haiˬ ve, neˇ htaꞈ caˉ daꞈ ve pa taw, pyawˍ ve laiˉ ceuˬ kuiˇ˗oˬ ve yoˬ. Chi htaꞈ pa taw, pyawˍ ve leuˆ yuˬ htaˇ nawˬ hkʼaˬ hkʼe dawˇ ve le? “Ngaˬ ve awˬ lawn yoˬ. Ngaˬ hkʼaˬ hkʼe leuˆ yuˬ kaꞈ ngaˬ hkʼaˇ ngaˬ yoˬ” tehꞈ kʼoˆ ve laˇ?  Maˇ heˆ leh “pyawˍ ve hkʼa peu˗eˬ maˇ daꞈ” tehꞈ kʼoˆ ve laˇ? Nawˬ pyawˍ ve leuˆ yuˬ htaˇ, hkʼa dehꞈ dawˇ nyi leh maˇ daꞈ ve htaꞈ jaw kʼai leh daꞈ ve htaꞈ haꞈ yuˬ tuˬ laˇ?

3. Ngaˬ hui pyawˍ ve leuˆ yuˬ htaˇ, aˬ htoꞈ ma awˬ lawn htaꞈ dawˇ nyi cawˇ ve le?

³ Ngaˬ hui teˇ gʼaˇ le le gʼaˇ jehˇ gaˇ leh pyawˍ gaˇ ve yoˬ. Hkʼe te leh, ngaˬ hui hkʼa dehꞈ leuˆ yuˬ gaˇ ve yoˬ. Oˇ hkʼe kʼo, ngaˬ hui a shu yawˇ awˬ to htaꞈ na nyi cawˇ ve, ngaˬ hui pyawˍ ve leuˆ yuˬ htaˇ, Yaˬhoˉvaˬ htaꞈ oˉ kʼoˍ pui ve hkʼaˬ hkʼe heuˆ la gʼa ve le?

4. Pyawˍ ve leuˆ yuˬ tuˬ Liꞈ hpu hkʼaw ve awˬ liˇ awˬ hkʼaˇ hkʼaˬ ve teˇ tawn ngaˬ hui htaꞈ ga laˇ gʼa ve le?

⁴ Ngaˬ hui Yaˬhoˉvaˬ htaꞈ awˬ to chiˇ aꞈ piˇ htaˇ, ngaˬ hui a shaꞈ teꞈ chehˇ ve teˇ co˗e yawˇ ve kanˉ te tuˬ yoˬ tehꞈ ka tiꞈ te ve yoˬ. (Cuˇ yiˍ piˇ ve 5:4 gʼaw sheˍ.) “Hkʼa peu˗eˬ awˬ hkʼaw lo Gʼuiˬ sha ve awˬ meꞈ awˬ hponˇ tawˆ la tuˬ te” tuˬ yoˬ tehꞈ, ngaˬ hui ka tiꞈ te ve yoˬ. (1 Kawˇrenˍhtuˆ 10:31) Kʼoˆ gaˇ ve lehˬ ngaˬ hui gʼaˇ jehˇ chehˇ htaˇ, maˇ heˆ leh awˬ han nyi chehˇ htaˇ, ngaˬ hui ve awˬ to Gʼuiˬ sha htaꞈ chiˇ aꞈ piˇ˗oˬ ve yoˬ. Hpawnˬ daꞈ kuiˬ lo chehˇ htaˇ, hto toˇ kuiˬ lo chehˇ htaˇ ceh tiˉ maˇ heˆ.

5. Ngaˬ hui oˉ kʼoˍ pui ve hkʼaˬ hkʼe ve teˇ ceuˬ Yaˬhoˉvaˬ htaꞈ piˇ cawˇ ve le?

⁵ Ngaˬ hui a shaꞈ teꞈ kuiˬ te ve teˇ ceuˬ le le Yaˬhoˉvaˬ htaꞈ oˉ kʼoˍ pui ve awˬ hkʼaw lo caˉ daꞈ ve yoˬ. Awˬ lawn chi htaꞈ Pawˇluꞈ kʼoˆ taˍ ve, “nawˬ hui ve awˬ to lehˬ teꞈ chehˇ ve, daꞈ kehˬ ve leh Gʼuiˬ sha nyi ma cawˇ ve tanˇ tuˬ, yawˇ htaꞈ chiˇ aꞈ piˇ˗oˆ.” (Roˉmaꞈ 12:1) Yeˍsuˆ kʼoˆ ve, “nawˬ ve nyi ma hkʼa peu˗eˬ, nawˬ ve co ha hkʼa peu˗eˬ, nawˬ ve dawˇ hkʼaˇ hkʼa peu˗eˬ, leh nawˬ ve awˬ gʼaˇ awˬ shaˉ hkʼa peu˗eˬ nawˬ ve Jawˇmawˇ Gʼuiˬ sha htaꞈ gʼa haꞈ ve yoˬ.” (Maˍkuˆ 12:30)  Ngaˬ hui hkʼaˬ htaˆ kaꞈ daꞈ jaˇ ve mawˇ Yaˬhoˉvaˬ htaꞈ piˇ gaˇ ve yoˬ. Aˬ sho˗eˬ htaˇ Iˉsaˍreˍlaˆ chaw Yaˬhoˉvaˬ htaꞈ to nuˇ to shaˆ tanˇ piˇ htaˇ, awˬ kuiˉ awˬ haiˇ maˇ cawˬ ve to nuˇ to shaˆ gʼa tuˉ tanˇ ve yoˬ. To nuˇ to shaˆ oˇ ve mehˆ cuˉ ve, naˬ chehˇ ve, hkui hteh ve kʼo, Gʼuiˬ sha maˇ haꞈ yuˬ. (Oˉ kʼoˍ pui ve 22:18-20) Chi hkʼa shuˍ shuˍ, Yaˬhoˉvaˬ ngaˬ hui oˉ kʼoˍ pui ve htaꞈ maˇ haꞈ yuˬ laˇ tuˬ yoˬ hehˉ. Aˬ htoꞈ ma te chi hkʼe hpehꞈ gʼa ve le?

6, 7. Ngaˬ hui pyawˍ ve leuˆ yuˬ htaˇ Yaˬhoˉvaˬ htaꞈ oˉ kʼoˍ pui ve hkʼaˬ hkʼe heuˆ la gʼa ve le?

⁶ Yaˬhoˉvaˬ kʼoˆ ve, “ngaˬ daꞈ kehˬ ve pa taw, nawˬ hui htawˇ daꞈ kehˬ piˇ˗oˆ.” (1 Peˍtruˆ 1:14-16; 2 Peˍtruˆ 3:11) Ngaˬ hui oˉ kʼoˍ pui ve daꞈ kehˬ ve teˇ ceuˬ htaꞈ ceh tiˉ Yaˬhoˉvaˬ haꞈ yuˬ tuˬ yoˬ. (Bon maˍ ve 15:21) Yaˬhoˉvaˬ canˇ ve awˬ ceuˬ, guiˇ yaꞈ ve, haiˬ ve, neˇ htaꞈ caˉ daꞈ ve chi teˇ hpaˍ htaꞈ ngaˬ hui te ve kʼo, ngaˬ hui oˉ kʼoˍ pui ve maˇ daꞈ kehˬ. (Roˉmaꞈ 6:12-14; 8:13) Chi hkʼoˆ kaꞈ, chi teˇ hpaˍ htaꞈ caˉ daꞈ ve pyawˍ ve awˬ ceuˬ ngaˬ hui leuˆ yuˬ ve kʼo, Yaˬhoˉvaˬ nyi ma maˇ cawˇ. Chi hkʼe te ve lehˬ ngaˬ hui oˉ kʼoˍ pui ve teˇ ceuˬ maˇ daꞈ kehˬ leh Yaˬhoˉvaˬ maˇ haꞈ yuˬ tuˬ, ngaˬ hui yawˇ geh meuˆ daꞈ ve teˇ ceuˬ htaꞈ luˬ kʼai tuˬ, te laˇ gʼa ve yoˬ.

⁷ Chi htaꞈ pa taw, ngaˬ hui pyawˍ ve awˬ ceuˬ leuˆ yuˬ htaˇ, hkʼaˬ hkʼe te cuˇ yiˍ cawˬ gʼa tuˬ le? Pyawˍ ve hkʼaˬ ve teˇ ceuˬ haꞈ yuˬ gʼa maˇ haꞈ yuˬ gʼa ve ngaˬ hui shiˍ tuˬ, awˬ liˇ awˬ hkʼaˇ hkʼaˬ ve teˇ tawn ga laˇ gʼa ve le?

8, 9. Ngaˬ hui pyawˍ ve hkʼaˬ ve teˇ ceuˬ htaꞈ jaw kʼai cawˇ ve le? Aˬ htoꞈ ma pa taw le?

⁸ Chi beuꞈ teˇ co˗eˬ, pyawˍ ve laiˉ ceuˬ cawˬ ve yoˬ. Teˇ ceuˬ ceuˬ kʼo, Hkriꞈ yaˇ haꞈ yuˬ gʼa ve yoˬ. Yaꞈ hkʼaˇ, laiˉ ceuˬ htaꞈ haꞈ yuˬ maˇ gʼa. Pyawˍ ve hkʼaˬ ve teˇ ceuˬ htaꞈ ngaˬ hui jaw kʼai cawˇ ve teˇ geh nyi sheˍ.

 ⁹ Awˬ han, vehˆsaiˉ, tv hkʼaw ve awˬ lawn, vdo leˬ guiˇ tuˬ, liꞈ hkawˇ laiˉ ceuˬ lehˬ guiˇ yaꞈ ve, haiˬ ve, neˇ htaꞈ caˉ daꞈ ve chi teˇ hpaˍ cawˬ ve yoˬ. Laiˉ pawˆ kʼo, maˇ daꞈ ve teˇ hpaˍ awˬ tawꞈ ma maˇ cawˬ leh gʼuiˬ yawˬ tuˬ hkʼa shuˍ hpehꞈ ve yoˬ. Yaꞈ hkʼaˇ, pyawˍ ve awˬ ceuˬ Yaˬhoˉvaˬ daꞈ kehˬ ve awˬ liˇ awˬ hkʼaˇ htaꞈ maˇ hawˍ daꞈ ve kʼo, Hkriꞈ yaˇ maˇ haꞈ yuˬ. (Tcuh yaˇ 15:28, 29; 1 Kawˇrenˍhtuˆ 6:9, 10) Chi hkʼe te ve kʼo, ngaˬ hui haiˬ ve htaꞈ canˇ ve yoˬ tehꞈ Yaˬhoˉvaˬ htaꞈ hpeuꞈ maw piˇ ve yoˬ.—Chiˇ mvuh ve 34:14; Roˉmaꞈ 12:9.

10. Maˇ daꞈ ve pyawˍ ve htaꞈ ngaˬ hui leuˆ yuˬ ve kʼo, hkʼaˬ hkʼe heuˆ la gʼa ve le?

¹⁰ Yaꞈ hkʼaˇ, pyawˍ ve awˬ ceuˬ teˇ hpaˍ haiˬ ve, guiˇ yaꞈ ve, neˇ htaꞈ caˉ daꞈ ve htawˇ maˇ yaꞈ tehꞈ chaw teˇ hpaˍ dawˇ ve yoˬ. Yawˇ hui dawˇ ve, ‘oˇ teˇ hpaˍ kawˆ tuˬ hkʼaˬ hkʼe cawˬ ve le? Ngaˬ oˇ hkʼe awˬ tehˬ tehˬ maˇ te neˬ.’ Ngaˬ hui chi hkʼe dawˇ ve kʼo, a shu yawˇ awˬ to htaꞈ heˍ chehˇ ve yoˬ. Liꞈ hpu hkʼaw kʼoˆ ve, “chaw yaˇ ve nyi ma lehˬ, awˬ kaˍ awˬ nu awˬ ceuˬ teˇ hpaˍ aꞈ kehˉ heˍ puiˉ jaˇ ve yoˬ. Gu na˗e piˇ tuˬ ve te maˇ gʼa.” (Yeˍraˍmiˆ 17:9) Yaˬhoˉvaˬ maˇ haꞈ yuˬ ve pyawˍ ve htaꞈ ngaˬ hui leuˆ yuˬ leh dawˇ cawˇ ve kʼo, ngaˬ hui haiˬ ve htaꞈ canˇ ve yoˬ tehꞈ kʼoˆ hpehꞈ˗aw laˇ? Ngaˬ hui pyawˍ ve oˇ hkʼe ve htaꞈ dawˇ cawˇ jaˇ ve kʼo, a hkʼe leˇ ceh hpehꞈ leh haꞈ yuˬ la ve yoˬ. Maˇ maw maw kʼo, ngaˬ hui dawˇ shiˍ puiˉ ve nyi ma awˬ gʼaˇ nuˇ kʼai leh ngaˬ hui te yaꞈ˗a te htaˇ shaˍ tiꞈ maˇ kʼawꞈ peꞈ laˇ.—Chiˇ mvuh ve 119:70; 1 Tiˆmoˉseˍ 4:1, 2.

11. Pyawˍ ve htaꞈ leuˆ yuˬ tuˬ Gaˍlaˍtiˆ liꞈ 6:7 hkʼaw ngaˬ hui htaꞈ hkʼaˬ hkʼe ga laˇ ve le?

¹¹ Liꞈ hpu hkʼaw kʼoˆ ve, “chaw teˇ gʼaˇ lehˬ yawˇ awˬ yawˇ sheˍ ve hkʼe yawˇ gʼa gʼeuꞈ tuˬ yoˬ.” (Gaˍlaˍtiˆ 6:7) Maˇ daꞈ ve pyawˍ ve htaꞈ dawˇ cawˇ ve kʼo, maˇ maw maw kʼo awˬ tehˬ awˬ na te gaˇ la ve yoˬ. Tawˇ pa haˉ te kʼo, chaw teˇ hpaˍ guiˇ yaꞈ ve awˬ lawn dawˇ cawˇ ve pa taw, awˬ hkʼawꞈ nawˉ htaˇ  yawˇ hui kaꞈ guiˇ yaꞈ ve te ve yoˬ. Yaꞈ hkʼaˇ, ngaˬ hui cuˇ yiˍ cawˬ ve hkʼaw pyawˍ ve htaꞈ leuˆ yuˬ gʼa tuˬ, Yaˬhoˉvaˬ ga laˇ ve yoˬ.

12. Cawˇ ve awˬ hkʼaw lo pyawˍ ve htaꞈ leuˆ yuˬ gʼa tuˬ, ngaˬ hui htaꞈ aˬ htoꞈ ma ga laˇ gʼa ve le?

¹² Pyawˍ ve teˇ ceuˬ ceuˬ kʼo, Yaˬhoˉvaˬ maˇ haꞈ yuˬ ve ngaˬ hui hkʼa tawˍ lehˆ mawˬ htaˇ, ngaˬ hui jaw kʼai ve yoˬ. Yaꞈ hkʼaˇ, ngaˬ hui hkʼa dehꞈ maˇ shiˍ ve kʼo, hkʼaˬ hkʼe te tuˬ le? Ngaˬ hui nyi ve, na ve, gʼaw ve awˬ hkʼaw lo hpehꞈ maˇ hpehꞈ ve Yaˬhoˉvaˬ ngaˬ hui htaꞈ awˬ liˇ tawˇ hkawˇ teˇ maˬ le le teh˗aˉ laˇ ve maˇ heˆ. Yaꞈ hkʼaˇ, Liꞈ hpu htaꞈ cuˇ leh te jawˬ taˍ ve dawˇ shiˍ puiˉ ve nyi ma yawˇ ngaˬ hui htaꞈ yuˬ yehˇ tcuh gaˇ ve yoˬ. (Gaˍlaˍtiˆ 6:5 gʼaw sheˍ.) Yaˬhoˉvaˬ ngaˬ hui htaꞈ awˬ liˇ awˬ hkʼaˇ peꞈ laˇ ve yoˬ. Awˬ liˇ awˬ hkʼaˇ chi ve awˬ tehˬ hpehꞈ leh, Yaˬhoˉvaˬ hkʼaˬ hkʼe dawˇ ve maˍ laˇ ve yoˬ. Awˬ liˇ awˬ hkʼaˇ chi teˇ hpaˍ ngaˬ hui ve dawˇ shiˍ puiˉ ve nyi ma htaꞈ te jawˬ tcuh laˇ ve yoˬ. Yaˬhoˉvaˬ ve “a loˍ hkʼaˬ hkʼe cawˬ ve” ngaˬ hui shiˍ leh, ngaˬ hui dawˇ cheˆ ve htaꞈ yawˇ nyi hkʼaˇ suh tuˬ, Liꞈ hpu hkʼaw ve awˬ liˇ awˬ hkʼaˇ ga laˇ gʼa ve yoˬ.—Eˇfeˇsuꞈ 5:17.

13. Aˬ htoꞈ ma te pyawˍ ve htaꞈ Hkriꞈ yaˇ teˇ gʼaˇ le le leuˆ yuˬ ve maˇ shuˍ daꞈ ve le? Hkriꞈ yaˇ teˇ gʼaˇ le le ve awˬ pon a yeˇ uiˍ jaˇ ve aˬ htoꞈ ma le?

¹³ Laiˉ pawˆ kʼo, pyawˍ ve awˬ ceuˬ Hkriꞈ yaˇ leuˆ yuˬ ve maˇ shuˍ daꞈ. Aˬ htoꞈ ma pa taw le? Awˬ lawn kʼo, ngaˬ hui dawˇ cawˇ ve maˇ shuˍ daꞈ. Chi hkʼoˆ kaꞈ, teˇ ceuˬ ceuˬ kʼo teˇ gʼaˇ haꞈ yuˬ gʼa ve htawˇ, awˬ nu ve teˇ gʼaˇ haꞈ yuˬ maˇ gʼa. Yaꞈ hkʼaˇ, cawˇ ve hkʼaw dawˇ cheˆ gʼa tuˬ, Hkriꞈ yaˇ teˇ gʼaˇ le le Liꞈ hpu hkʼaw ve awˬ liˇ awˬ hkʼaˇ htaꞈ gʼa yehˇ ve yoˬ. (Hpiˇliˇpiˆ 1:9) Gʼuiˬ sha haꞈ yuˬ gʼa ve pyawˍ ve htaꞈ leuˆ yuˬ tuˬ, chi teˇ hpaˍ ga laˇ ve yoˬ.—Chiˇ mvuh ve 119:11, 129; 1 Peˍtruˆ 2:16.

14. (a) Ngaˬ hui awˬ yanˇ yehˇ ve awˬ hkʼaw lo aˬ htoꞈ ma teˇ ceuˬ dawˇ nyi cawˇ ve le? (b) Pawˇluꞈ Hkriꞈ yaˇ htaꞈ aˬ htoꞈ ma beˆ maˍ piˇ ve le?

 ¹⁴ Ngaˬ hui pyawˍ ve htaꞈ awˬ yanˇ hkʼaˬ ma yehˇ chehˇ ve kaꞈ dawˇ nyi cawˇ ve yoˬ. Ngaˬ hui awˬ pon pyawˍ ve a yeˇ hkʼaˬ hkʼe taw uiˍ ve htaꞈ awˬ yanˇ yehˇ ve chi kʼoˆ laˇ gʼa ve yoˬ. Hkriꞈ yaˇ ve a shaꞈ teꞈ kuiˬ lo Yaˬhoˉvaˬ ve kanˉ te ve a yeˇ uiˍ jaˇ. (Maꞈhtehˍ 6:33 gʼaw sheˍ.) Yaꞈ hkʼaˇ, shaˍ tiꞈ maˇ te ve kʼo, ngaˬ hui maˇ dawˇ nyi leh pyawˍ ve htaꞈ awˬ yanˇ yehˇ maˇ la ve yoˬ. Pawˇluꞈ Hkriꞈ yaˇ htaꞈ beˆ maˍ piˇ ve, ‘nawˬ hui hkʼaˬ hkʼe dawˇ ve te ve htaꞈ shaˍ tiꞈ hkʼa dehꞈ taˍ˗oꞈ. Cuˇ yiˍ maˇ cawˬ ve chaw hui hkʼe taˇ te. Cuˇ yiˍ cawˬ ve chaw hui hkʼe te chehˇ˗oˆ. Awˬ yanˇ htaꞈ vuiˬ hkʼawꞈ leh hkʼa dehꞈ yehˇ˗oˆ.’ (Eˇfeˇsuꞈ 5:15, 16) Chi htaꞈ pa taw, pyawˍ ve htaꞈ awˬ yanˇ hkʼaˬ hkʼe taw yehˇ cawˇ ve ngaˬ hui gʼa  dawˇ teh taˍ ve yoˬ. Ngaˬ hui a shaꞈ teꞈ kuiˬ lo Gʼuiˬ sha kanˉ te ve hkʼaˬ htaˆ kaꞈ a yeˇ uiˍ jaˇ tehꞈ gʼa shawˍ taˍ ve yoˬ.—Hpiˇliˇpiˆ 1:10.

15. Yaˬhoˉvaˬ htaꞈ meuˆ daꞈ ve teˇ ceuˬ maˇ gʼa luˬ kʼai tuˬ, ngaˬ hui hkʼaˬ hkʼe te cawˇ ve le?

¹⁵ Yaˬhoˉvaˬ maˇ haꞈ yuˬ ve pyawˍ ve awˬ ceuˬ ngaˬ hui maˇ te. Yaꞈ hkʼaˇ, pyawˍ ve teˇ ceuˬ ceuˬ htaꞈ haꞈ yuˬ gʼa ve maˇ haꞈ yuˬ gʼa ve maˇ shiˍ kʼo, ngaˬ hui hkʼaˬ hkʼe te tuˬ le? Ngaˬ hui shaˍ tiꞈ gʼa te chehˇ ve laˇ? Dawˇ nyi sheˍ. Nawˬ hkʼaw hkʼoˆ lo juˇ kʼai chehˇ htaˇ, haˉ hpawˇ hkʼoˆ meuˇ lo kʼai tuˬ laˇ? Maˇ kʼai. Nawˬ ve a shaꞈ awˬ hpfuhˇ hkʼaˆ jaˇ tehꞈ shawˍ ve kʼo, kawˆ tuˬ cawˬ ve htaꞈ jaw kʼai tuˬ yoˬ. Awˬ lawn chi ve pyawˍ ve leuˆ yuˬ ve htaꞈ shuˍ ve yoˬ. “Haiˬ ve awˬ ceuˬ htaꞈ jaw kʼai” tehꞈ Liꞈ hpu hkʼaw ngaˬ hui htaꞈ kʼoˆ laˇ ve yoˬ. (Tawˇ naˉ ve 4:25-27) Chi htaꞈ pa taw, pyawˍ ve maˇ daꞈ tehꞈ ngaˬ hui shiˍ ve kʼo, ngaˬ hui jaw kʼai ve yoˬ. Chi hkʼoˆ kaꞈ, pyawˍ ve htaꞈ daꞈ˗aˬ laˇ, maˇ daꞈ laˇ tehꞈ htawˇ dawˇ nawˬ dawˇ cawˬ leh, Yaˬhoˉvaˬ htaꞈ meuˆ daꞈ ve teˇ ceuˬ te luˬ laˇ gʼa ve kʼo, ngaˬ hui jaw kʼai ve yoˬ.

16. (a) Yaˬhoˉvaˬ canˇ ve awˬ ceuˬ aˬ htoꞈ ma cawˬ ve le? (b) Yaˬhoˉvaˬ canˇ ve awˬ ceuˬ htaꞈ ngaˬ hui kaꞈ canˇ ve yoˬ tehꞈ hkʼaˬ hkʼe te hpeuꞈ maw piˇ gʼa ve le?

¹⁶ Chiˇ mvuh ve liꞈ bvuhꞈ paˍ bvuhꞈ taˍ ve, “haiˬ ve awˬ ceuˬ htaꞈ canˇ ve chaw teˇ hpaˍ htaꞈ [Yaˬhoˉvaˬ] haꞈ ve yoˬ.” (Chiˇ mvuh ve 97:10) Yaˬhoˉvaˬ lehˬ awˬ lawn teˇ hpaˍ htaꞈ hkʼaˬ hkʼe dawˇ ve le tehꞈ Liꞈ hpu hkʼaw kʼoˆ maˍ laˇ ve yoˬ. Nawˬ awˬ lawn teˇ hpaˍ htaꞈ Yaˬhoˉvaˬ hkʼa shuˍ dawˇ tuˬ, nawˬ gʼa henˇ ve awˬ ceuˬ hkʼaˬ hkʼe ga laˇ gʼa ve a shu yawˇ awˬ to htaꞈ na nyi sheˍ. Tawˇ pa haˉ te kʼo, “heˍ puiˉ ve ha tehˍ, teꞈ chiˉ venˇ baˆ maˇ cawˬ ve chaw htaꞈ tiˇ pehˍ ve laꞈ sheh, haiˬ ve awˬ ceuˬ htaꞈ dawˇ nyi chehˇ ve nyi ma, chaꞈ chiˆ ve kanˉ htaꞈ te tuˬ gʼuiˇ kʼai chehˇ ve hkui sheh” chi teˇ hpaˍ Yaˬhoˉvaˬ canˇ ve yoˬ tehꞈ, ngaˬ hui gʼa henˇ ve yoˬ.  (Tawˇ naˉ ve 6:16-19) ‘Haˉ chawˇ haˉ paˆ te ve, shaˉ hoꞈ htaꞈ oˉ kʼoˍ pui ve, neˇ te ve, canˇ daꞈ ve, yaˇ daꞈ jiˆ daꞈ ve, hkawehˉ ve, tzuhˬ dawˬ bvuhˆ ve, ha lehˬ tuˬ te ponˬ te leuˉ ve’ chi hkʼe ve teˇ hpaˍ ngaˬ hui gʼa jaw kʼai ve yoˬ tehꞈ gʼa henˇ ve yoˬ. (Gaˍlaˍtiˆ 5:19-21) Pyawˍ ve awˬ ceuˬ leuˆ yuˬ tuˬ, Liꞈ hpu hkʼaw cawˬ ve awˬ liˇ awˬ hkʼaˇ chi teˇ hpaˍ hkʼaˬ hkʼe ga laˇ gʼa ve nawˬ mawˬ˗aw laˇ? Ngaˬ hui a shaꞈ teꞈ kuiˬ teˇ hpawˇ le le lo shu geh chehˇ htaˇ maˇ kʼoˆ, teˇ gʼaˇ tiˉ chehˇ htaˇ maˇ kʼoˆ, Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gaˇ ve yoˬ. (2 Kawˇrenˍhtuˆ 3:18) Awˬ tehˬ kʼo, ngaˬ hui teˇ gʼaˇ tiˉ chehˇ htaˇ leuˆ yuˬ ve awˬ ceuˬ ngaˬ hui hkʼaˬ hkʼe ve chaw hpehꞈ ve hpeuꞈ maw piˇ gʼa ve yoˬ.—Chiˇ mvuh ve 11:4; 16:8.

17. Pyawˍ ve awˬ ceuˬ maˇ leuˆ yuˬ sheˍ htaˇ, ngaˬ hui a shu yawˇ awˬ to htaꞈ hkʼaˬ hkʼe te na nyi cawˇ ve le?

¹⁷ Oˇ hkʼe kʼo, nawˬ a shu yawˇ awˬ to htaꞈ na nyi cawˇ ve, ‘ngaˬ pyawˍ ve awˬ ceuˬ leuˆ yuˬ ve lehˬ Yaˬhoˉvaˬ geh meuˆ daꞈ ve htaꞈ hkʼaˬ hkʼe heuˆ la gʼa ve le? Ngaˬ ve dawˇ shiˍ puiˉ ve nyi ma htaꞈ hkʼaˬ hkʼe heuˆ la gʼa ve le?’ Ngaˬ hui pyawˍ ve htaꞈ leuˆ yuˬ htaˇ, aˬ htoꞈ ma awˬ liˇ awˬ hkʼaˇ kʼawꞈ ga laˇ gʼa ve teˇ geh chaˬ nyi sheˍ.

18, 19. (a) Pawˇluꞈ Hkriꞈ yaˇ htaꞈ aˬ htoꞈ ma beˆ maˍ piˇ ve le? (b) Pyawˍ ve htaꞈ leuˆ yuˬ tuˬ aˬ htoꞈ ma awˬ liˇ awˬ hkʼaˇ ngaˬ hui htaꞈ ga laˇ gʼa ve le?

¹⁸ Ngaˬ hui pyawˍ ve htaꞈ leuˆ yuˬ htaˇ, nyi ma hkʼaw yuˬ keu tuˬ leuˆ yuˬ chehˇ ve yoˬ. Pawˇluꞈ bvuhꞈ taˍ ve, “hteˇ ve awˬ ceuˬ hkʼa peu˗eˬ, yawˆ yan keunˍ ve awˬ ceuˬ hkʼa peu˗eˬ, cawˇ ve awˬ ceuˬ hkʼa peu˗eˬ, daꞈ ve kehˬ ve awˬ ceuˬ hkʼa peu˗eˬ, nyi sha ve awˬ ceuˬ hkʼa peu˗eˬ leh, shu ve awˬ lawn daꞈ ve awˬ ceuˬ gʼa kaˇ ve hkʼa peu˗eˬ, oˇ ve teˇ hpaˍ awˬ hkʼaw lo daꞈ jaˇ ve awˬ ceuˬ teˇ ceuˬ ceuˬ, chiˇ mvuh keunˍ ve awˬ ceuˬ teˇ ceuˬ ceuˬ cawˬ ve kʼo, awˬ lawn oˇ ve teˇ hpaˍ htaꞈ dawˇ nyi˗o.” (Hpiˇliˇpiˆ 4:8) Ngaˬ hui nyi ma hkʼaw daꞈ ve awˬ ceuˬ yuˬ keu ve teˇ yanˇ, ‘Yaˬhoˉvaˬ˗oˬ, ngaˬ ve tawˇ hkawˇ teˇ hpaˍ leh ngaˬ ve dawˇ hkʼaˇ teˇ hpaˍ, nawˬ haꞈ yuˬ  hpehꞈ ve awˬ ceuˬ hpehꞈ la piˇ˗oˆ’ tehꞈ ngaˬ hui kʼoˆ hpehꞈ ve yoˬ.—Chiˇ mvuh ve 19:14.

¹⁹ Nawˬ a shu yawˇ awˬ to htaꞈ na nyi cawˇ ve, ‘ngaˬ ve nyi ma hkʼaw aˬ htoꞈ ma yuˬ keu chehˇ ve le? Awˬ han, awˬ han tawˆ kuiˬ (TV) hkʼaw teˇ lawn lawn nyi peuˬ hkʼawꞈ nawˉ, ngaˬ ha lehˬ leh daꞈ ve dawˇ hkʼaˇ cawˬ chehˇ˗aw laˇ? Ngaˬ nyi ma gawˬ lehˍ cawˬ leh dawˇ shiˍ puiˉ ve nyi ma daꞈ chehˇ˗aw laˇ? (Eˇfeˇsuꞈ 5:5; 1 Tiˆmoˉseˍ 1:5, 19) Ngaˬ Yaˬhoˉvaˬ geh bon lawˬ htaˇ nyi ma sha ve laˇ? Maˇ heˆ leh nyi ma maˇ sha ve laˇ? Pyawˍ ve oˇ ve haiˬ ve leh guiˇ yaꞈ ve htaꞈ dawˇ tuˬ te laˇ ve laˇ? (Maꞈhtehˍ 12:33; Maˍkuˆ 7:20-23) Ngaˬ pyawˍ ve htaꞈ leuˆ yuˬ ve “chi miˬ guiˬ yaˇ ve awˬ liˇ awˬ hkʼaˇ” htaꞈ gʼaꞈ te chehˇ ve laˇ?’ (Roˉmaꞈ 12:2) Na hkawˇ htaꞈ ngaˬ hui hteˇ lehˍ hkʼawꞈ ve kʼo, Yaˬhoˉvaˬ htaꞈ hkʼaˬ htaˆ kaꞈ meuˆ daꞈ tuˬ, aˬ htoꞈ ma te cawˇ ve ngaˬ hui shiˍ gʼa ve yoˬ. Chiˇ mvuh ve liꞈ bvuhꞈ paˍ hkʼa shuˍ, ngaˬ hui bon lawˬ gaˇ ve yoˬ. Yawˇ kʼoˆ ve, “teꞈ chiˉ awˬ bon maˇ cawˬ ve tawˇ htaꞈ maˇ gʼa na yuˬ tuˬ ngaˬ htaꞈ ga laˇ˗oˆ.” a—Chiˇ mvuh ve 119:37.

20, 21. Ngaˬ hui pyawˍ ve htaꞈ leuˆ yuˬ htaˇ, aˬ htoꞈ ma te shu awˬ pon dawˇ nyi piˇ cawˇ ve le?

²⁰ Ngaˬ hui hkʼaˬ htaˆ kaꞈ dawˇ nyi cawˇ ve awˬ liˇ awˬ hkʼaˇ kʼawꞈ cawˬ sheˍ. “Hkʼa peu˗eˬ ve htaꞈ te tuˬ a hkaw˗anˬ cawˬ ve yoˬ. Yaꞈ hkʼaˇ, hkʼa peu˗eˬ ve uiˍ la yeˬ la piˇ puiˉ ve maˇ heˆ. Hkʼaˬ ve teˇ gʼaˇ maˇ kʼoˆ, a shu yawˇ awˬ to awˬ pon awˬ bon gʼa tuˬ taˇ ca. Yaꞈ hkʼaˇ, shu awˬ pon awˬ bon gʼa tuˬ ca˗o.” (1 Kawˇrenˍhtuˆ 10:23, 24) Ngaˬ hui teˇ ceuˬ ceuˬ te tuˬ a hkaw˗anˬ cawˬ ve htawˇ, awˬ ceuˬ oˇ ve htaꞈ te cawˇ ve tehꞈ kʼoˆ gaˇ ve maˇ heˆ. Ngaˬ hui dawˇ cheˆ ve awˬ viˉ awˬ nyi htaꞈ hkʼaˬ hkʼe heuˆ la gʼa ve hkʼa dehꞈ gʼa dawˇ nyi ve yoˬ.

 ²¹ Dawˇ shiˍ puiˉ ve nyi ma teˇ gʼaˇ leh teˇ gʼaˇ maˇ shuˍ daꞈ. Tawˇ pa haˉ te kʼo, tv hkʼaw awˬ lawn teˇ lawn htaꞈ nyi tuˬ, nawˬ ve dawˇ shiˍ puiˉ ve nyi ma nyi hpehꞈ˗aw tehꞈ kʼoˆ laˇ ve yoˬ hehˉ. Yaꞈ hkʼaˇ, awˬ hkʼawꞈ nawˉ gaˬ leh tv hkʼaw ve awˬ lawn oˇ ve awˬ nu ve awˬ viˉ awˬ nyi dawˇ shiˍ puiˉ ve nyi ma htaꞈ shoꞈ shaꞈ tuˬ te piˇ ve tehꞈ nawˬ gʼa shiˍ ve yoˬ. Nawˬ hkʼaˬ hkʼe te tuˬ le? Awˬ lawn oˇ ve htaꞈ nawˬ nyi tuˬ a hkaw˗anˬ cawˬ ve htawˇ, maˇ nyi˗o tehꞈ nawˬ dawˇ cheˆ ve yoˬ hehˉ. Aˬ htoꞈ ma pa taw le? Awˬ lawn kʼo, nawˬ ‘awˬ viˉ awˬ nyi hui htaꞈ leh Hkriꞈ htaꞈ maˇ te yaꞈ piˇ gaˇ.’ (1 Kawˇrenˍhtuˆ 8:12) Teˇ ceuˬ ceuˬ te leh awˬ viˉ awˬ nyi Hkriꞈ yaˇ hkui hteˇ poˬ ve kʼo, ngaˬ hui maˇ te gaˇ.—Roˉmaꞈ 14:1; 15:1; 1 Kawˇrenˍhtuˆ 10:32.

22. Awˬ viˉ awˬ nyi leuˆ yuˬ ve nawˬ htaꞈ peun daꞈ ve htawˇ, nawˬ awˬ hkʼaˇ cawˬ ve chaw hpehꞈ ve kʼo, hkʼaˬ hkʼe te cawˇ ve le?

²² Yaꞈ hkʼaˇ, shu nyi ve, gʼaw ve, maˇ heˆ leh teˇ ceuˬ ceuˬ te ve htaꞈ nawˬ ve dawˇ shiˍ puiˉ ve nyi ma maˇ te cawˇ tehꞈ kʼoˆ laˇ ve kʼo, nawˬ hkʼaˬ hkʼe te tuˬ le? Nawˬ awˬ viˉ awˬ nyi htaꞈ haꞈ leh yawˆ yan ve pa taw, nawˬ hkʼa shuˍ dawˇ tuˬ yawˇ hui htaꞈ maˇ nyiˉ piˇ. Kaˇ gʼaꞈ ve chaw lehˬ teˇ gʼaˇ le le yawˇ hkʼa shuˍ gʼaꞈ gehˬ ve maˇ heˆ tehꞈ yawˇ shiˍ ve yoˬ. Yaꞈ hkʼaˇ, yawˇ hui kaꞈ kaˇ hkʼa dehꞈ gʼaꞈ puiˉ ve yoˬ. Chi hkʼa shuˍ shuˍ, nawˬ leh awˬ viˉ awˬ nyi Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve yoˬ. Yaꞈ hkʼaˇ, pyawˍ ve awˬ ceuˬ hkʼaˬ ve haꞈ yuˬ gʼa, maˇ haꞈ yuˬ gʼa ve nawˬ 2 gʼaˇ dawˇ ve a ciˉ peun daꞈ ve yoˬ.—Cuˇ yiˍ piˇ ve 7:16; Hpiˇliˇpiˆ 4:5.

23. Ngaˬ hui pyawˍ ve htaꞈ leuˆ yuˬ puiˉ tuˬ, aˬ htoꞈ ma ga laˇ gʼa ve le?

²³ Oˇ hkʼe kʼo, ngaˬ hui pyawˍ ve htaꞈ leuˆ yuˬ puiˉ tuˬ, aˬ htoꞈ ma ga laˇ gʼa ve le? Liꞈ hpu hkʼaw ve awˬ liˇ awˬ hkʼaˇ htaꞈ cuˇ leh te jawˬ taˍ ve dawˇ shiˍ puiˉ ve nyi ma htaꞈ ngaˬ hui yehˇ leh, awˬ viˉ awˬ nyi htaꞈ hkʼa dehꞈ dawˇ nyi piˇ ve kʼo, ngaˬ hui leuˆ yuˬ puiˉ tuˬ yoˬ. Ngaˬ hui “hkʼa peu˗eˬ awˬ hkʼaw lo Gʼuiˬ sha ve awˬ meꞈ awˬ hponˇ tawˆ la tuˬ” te chehˇ ve tehꞈ shiˍ ve pa taw, ha lehˬ ve yoˬ.